အမွေအနှစ်ကြယ် တုန်ခါသွားခြင်း....

Vol. 36 Ch. 546

" စမ်းသပ်မှုက ဘာလဲ။ " လင်းယွမ်က မေးလိုက်သည်။

" စမ်းသပ်မှုက သေခြင်းရှင်ခြင်းနိယာမအပေါ် မင်းရဲ့ ကျွမ်းကျင်မှုကို စမ်းသပ်တာပဲ။ " အနက်ရောင်ဝတ်ရုံနှင့်လူက ပြောလိုက်သည်။

" ဒီနေရာမှာ သေခြင်းနဲ့ အသက်နိယာမတွေသာရှိပြီး အခြားနိယာမတွေကို သိမြင်နိုင်စွမ်းမရှိဘူးဆိုတာ မင်းသိမှာပါ။ " သူက ပြောလိုက်သည်။

" မှန်ပါတယ်။ " လင်းယွမ်က ခေါင်းညိမ့်လိုက်သည်။

အနက်ရောင်ဝတ်ရုံနှင့်လူက သူ၏ လက်ကို ဝှေ့ရမ်းလိုက်ပြီး အနက်ရောင် ကျောက်နံရံဆယ်ခုကျော်က ဆင်းသက်လာသည်။ ထိုကျောက်နံရံများက ရှေ့မှနောက် တန်းစီထားသည်။

" သေခြင်းရှင်ခြင်းနိယာမက သတ်ဖြတ်ခြင်းနိယာမတစ်ခုဖြစ်ပြီး ဒီလိုနိယာမကို စမ်းသပ်တာက ဖျက်ဆီးမှုအဆင့်အပေါ် မူတည်တယ်။ "

" အခု မင်းရဲ့ သေခြင်းရှင်ခြင်းနိယာမ စွမ်းအားအားလုံးကို အသုံးပြုပြီး အနက်ရောင်ကျောက်နံရံတွေကို တိုက်ခိုက်ကြည့်ပါ။ မင်း ဖျက်ဆီးနိုင်တဲ့ နံရံတွေ ပိုများလေ စမ်းသပ်မှုကို ဖြတ်ကျော်ဖို့ မျှော်လင့်ချက် ပိုများလေပဲ။ " အနက်ရောင်ဝတ်ရုံနှင့်လူက ပြောလိုက်သည်။

" ကျုပ်ရဲ့ ခွန်အား အားလုံးကို အသုံးရမှာလား။ " လင်းယွမ်က မေးလိုက်သည်။

" ဟုတ်တယ်။ ခွန်အားအပြည့်အဝ။ မင်းရဲ့ ဖျက်ဆီးနိုင်တဲ့ စွမ်းအားကို ငါကြည့်ပါရစေ။ " အနက်ရောင်ဝတ်ရုံနှင့် လူက လင်းယွမ်ကို ထူးဆန်းစွာ ကြည့်လိုက်သည်။

" စိတ်မပူပါနဲ့။ မင်းရဲ့ သေခြင်းရှင်ခြင်းနိယာမ အော်ရာကို ကြည့်ရတာ မင်း အဲ့ဒါကို အခုမှ နားလည်ခဲ့တာ ဖြစ်ရမယ်။ "

" ဒီအခြေအနေမှာ မင်းရဲ့ သေခြင်းရှင်ခြင်းနိယာမ အားလုံးကို အသုံးပြုရင်တောင် ပေါက်ကွဲလာတဲ့ စွမ်းအားက ပထမဆုံးကျောက်နံရံကိုတောင် ထိုးဖောက်နိုင်မှာမဟုတ်ဘူး။ လုံးဝဖြတ်ကျော်နိုင်ဖို့က ပြောစရာတောင်မလိုဘူး။ " အနက်ရောင်ဝတ်ရုံနှင့်လူက စိတ်ရှည်စွာ ပြောလိုက်သည်။

" ကောင်းပြီ။ " လင်းယွမ်က ခေါင်းညိမ့်လိုက်သည်။

သေခြင်းရှင်ခြင်းနိယာမကို နားလည်ပြီးနောက် သူက ထိုနိယာမ၏ စွမ်းအားကို အပြည့်အဝ အသုံးမပြုဖူးပေ။ ရွှမ်ဟွမ်လျို့ဝှက်နယ်မြေတွင် ထိုနိယာမက လျို့ဝှက်နယ်မြေပေါ်သို့ သက်ရောက်မှုရှိသည်ကို သိလိုက်သည်နှင့် ချက်ချင်း ရပ်တန့်ခဲ့သည်။

" စတော့ " အနက်ရောင်ဝတ်ရုံနှင့်လူက ပြောလိုက်သည်။

" သေခြင်းရှင်ခြင်းနိယာမ..." လင်းယွမ်က သူ၏ ညာလက်ညှိုးနှင့် အနက်ရောင်ကျောက်နံရံကို ထိလိုက်သည်။

တည်ငြိမ်စွာ ကြည့်နေသော အနက်ရောင်ဝတ်ရုံနှင့် လူ၏ မျက်နှာအမူအရာက ရုတ်တရက် ပြောင်းလဲသွားပြီး လင်းယွမ်၏ လက်ချောင်းကို မယုံကြည်နိုင်စွာ ကြည့်လိုက်သည်။

" ဘာလဲ..." အနက်ရောင်ဝတ်ရုံနှင့်လူ၏ သူငယ်အိမ်များ ကျုံ့သွားသည်။

သေခြင်းရှင်ခြင်းနိယာမ၏ စွမ်းအားက လေဟာနယ်အလွှာပေါင်းများစွာကို ထိုးဖောက်သွားပြီး အပေါက်တစ်ခုအဖြစ် ဆုတ်ဖြဲလိုက်သည်။ ထိုအပေါက်က အဝေးသို့ ဆက်လက်ထိုးဖောက်သွားပြီး နက်ရှိုင်းသော နေရာများသို့ ရွေ့လျားသွားသည်။ မှုန်ဝါးသော တုန်ခါမှုတစ်ခုက ပဲ့တင်ထပ်လာပြီးမှ အရာအားလုံး တည်ငြိမ်သွားသည်။ ထိုအပေါက်နေရာတွင် သေခြင်းရှင်ခြင်းနိယာမစွမ်းအားများက အဆက်မပြတ် လှုပ်ရှားနေပြီး အရာအားလုံးကို တိုက်စားနေသည်။

ရှယိုဆင့်ကဲပြောင်းလဲခြင်းမျှော်စင်။

ကြီးမြတ်သူရှချင်နှင့် ကြီးမြတ်သူယုတိုင်တို့က အနက်ရောင်ဂြိုလ်ကို လေ့လာရင်း ပေါ့ပေါ့ပါးပါး စကားပြောနေကြသည်။

ထိုခဏတွင် ကြီးမြတ်သူရှချင်၏ မျက်နှာအမူအရာက ထူးဆန်းစွာ ပြောင်းလဲသွားသည်။ ထို့နောက် သူက အလင်းနှစ်ပေါင်းများစွာ ဝေးသော အနက်ရောင်ဂြိုလ်ကို သေသေချာချာ ကြည့်လိုက်သည်။

ခဏကြာသောအခါ ကြီးမြတ်သူရှချင်က သူ၏ မျက်လုံးများကျဉ်းမြောင်းသွားပြီး ပြောလိုက်သည်။

" ယုတိုင် ခုနက အမွေအနှစ်ကြယ်က တုန်ခါသွားသလိုပဲ။ မင်းသတိပြုမိလား။ "

" တုန်ခါသွားတယ်..." ကြီးမြတ်သူယုတိုင်က အံ့ဩသွားသည်။

ထိုကဲ့သို့သော အမွေအနှစ်ကြယ်များက သုံးမျိုးခွဲခြားထားပြီး နဝမအလွှာ အမွေအနှစ်ကြယ်၊ အလွှာတစ်ဆယ် အမွေအနှစ်ကြယ်နှင့် အလွှာဆယ့်တစ် အမွေအနှစ်ကြယ်တို့ဖြစ်ကြသည်။

အနက်ရောင်ဂြိုလ်က အလွှာတစ်ဆယ် အမွေအနှစ်ကြယ်ဖြစ်ပြီး အလွှာတစ်ဆယ် သက်ရှိများသာ ဝင်ရောက်နိုင်လေသည်။ အလွှာတစ်ဆယ် အမွေအနှစ်ကြယ်က ပြင်ပကမ္ဘာတွင် အလွှာဆယ့်တစ် သက်ရှိတစ်ယောက်ပင် ၎င်းကို တစ်လက်မရွှေ့အောင် မလုပ်နိုင်ပေ။

အတွင်းထဲတွင် ရှိလျှင် အလွှာဆယ့်တစ်သက်ရှိတစ်ယောက်၏ တိုက်ခိုက်မှုတစ်ခုက သက်ရောက်မှုရှိနိုင်လေသည်။ သို့သော် အလွှာတစ်ဆယ် အမွေအနှစ်ကြယ်များကို အလွှာဆယ့်တစ်သက်ရှိများ ဝင်ရောက်ခွင့်မရှိပေ။

ထို့အပြင် အမွေအနှစ်နေရာက အခြားနိယာမများကို ဖိနှိပ်ထားပြီး သက်ဆိုင်ရာ ပေါင်းစပ်နိယာမတစ်ခုကိုသာ အသုံးပြုနိုင်လေသည်။ ပြင်ပစွမ်းအားများ၊ လျို့ဝှက်ရတနာများနှင့် အခြားနည်းစနစ်များအားလုံးက အသုံးမဝင်ပေ။ ထို့ကြောင့် အမွေအနှစ်ကြယ်တစ်ခုစီက ပြင်ပစွမ်းအားကြောင့် ပြောင်းလဲမှုမရှိဘဲ အလွန်အမင်း တည်ငြိမ်လေသည်။

ထိုကြောင့်လည်း ကြီးမြတ်သူရှချင်က အနည်းငယ် အံ့အားသင့်သွားခြင်းဖြစ်သည်။

" ငါ ကြည့်လိုက်ဦးမယ်။ " ကြီးမြတ်သူယုတိုင်၏ အတွေးများက အနည်းငယ် လှုပ်ရှားသွားသည်။

ကိုယ်ပွားတစ်ခုက အနက်ရောင်ဂြိုလ်၏ အပြင်ဘက်သို့ ချက်ချင်း ဆင်းသက်လာသည်။ တစ်ချိန်တည်းတွင် အနက်ရောင်ဂြိုလ်ကို ဗဟိုပြု၍ မိုင်သန်းပေါင်းများစွာ အကွာအဝေးအတွင်း အချိန်က ပြောင်းပြန်စီးဆင်းသွားသည်။ ၎င်းက ပုံမှန်အမြန်နှုန်းနှင့် မြင်ကွင်းတစ်ခုကို နောက်ပြန်ရစ်လိုက်သကဲ့သို့ ဖြစ်သည်။

အချိန်ပြောင်းပြန်လှည့်ခြင်း။ ၎င်းက အချိန်နိယာမကို သေချာနားလည်ထားသော မည်သည့်သက်ရှိမဆို အသုံးပြုနိုင်သော နည်းစနစ်တစ်ခုဖြစ်သည်။

သို့သော် လင်းယွမ်အတွက်ပင် အချိန်ပြောင်းပြန်လှည့်ခြင်း၏ ဧရိယာက မိုင်ဆယ်ဂဏန်းမှ ရာဂဏန်းထိသာ ဖြစ်ပေလိမ့်မည်။ သို့သော် ကြီးမြတ်သူယုတိုင်၏ အချိန်ပြောင်းပြန်လှည့်ခြင်း ဧရိယာက ဆယ်သန်းကျော်ထိ ကျန်ပြန့်ခဲ့သည်။

" တကယ် တုန်ခါမှုတစ်ခုရှိခဲ့တာပဲ။ " ကြီးမြတ်သူယုတိုင်က ခေါင်းညိမ့်လိုက်သည်။ အချိန်ပြောင်းပြန်လှည့်ခြင်းမှတစ်ဆင့် အနက်ရောင်ဂြိုလ်က အသေးစားတုန်ခါမှုတစ်ခု ဖြစ်သွားခဲ့သည်ကို သူမ တွေ့ခဲ့ရလေသည်။

" ဘာလို့ဒီလိုဖြစ်တာလဲ။ " ကြီးမြတ်သူရှချင်က သိချင်သွားသည်။

ဖြစ်နိုင်ခြေနှစ်ခုသာ ဖြစ်လေသည်။ တစ်ခုက အနက်ရောင်ဂြိုလ်၏ ကိုယ်ပိုင်လည်ပတ်မှုမှ မတော်တမှုတစ်ခုဖြစ်သွားခြင်းဖြစ်သည်။ နောက်တစ်ခုမှာ အနက်ရောင်ဂြိုလ်၏ အမွေအနှစ်နေရာအတွင်းမှ အင်အားကြီးသူတစ်ယောက်က အနက်ရောင်ဂြိုလ်၏ ခံနိုင်ရည်ထက် ကျော်လွန်သော တိုက်ခိုက်မှုတစ်ခုကို ထုတ်ဖော်ခဲ့ခြင်းဖြစ်သည်။

ပထမဖြစ်နိုင်ခြေကို မပြောမီ ဒုတိယဖြစ်နိုင်ခြေမှ လက်ရှိ လင်းယွမ်တစ်ယောက်တည်းသာ အနက်ရောင်ဂြိုလ်၏ အမွေအနှစ်နေရာတွင် ရှိနေခြင်းဖြစ်သည်။ ထိုဖြစ်နိုင်ခြေသာ မှန်ခဲ့လျှင် အလွှာဆယ့်တစ် တိုက်ခိုက်မှုတစ်ခုကို ထုတ်ဖော်ခဲ့သူမှာ လင်းယွမ်သာဖြစ်သည်။

သို့သော် ၎င်းက ဘယ်လိုလုပ်ဖြစ်နိုင်မှာလဲ။ တတိယအလွှာ၊ စတုတ္ထအလွှာနှင့် ပဉ္စမအလွှာတွင် လူတစ်ယောက်၏ ကိုယ်ပိုင်သွေးမျိုးဆက်၊ လျို့ဝှက်နည်းစနစ်မျာယအပေါ် ကျွမ်းကျင်မှုနှင့် အဆင့်ကျော်ပြီး တိုက်ခိုက်နိုင်လေသည်။ သို့သော် အဆင့်ပိုမြင့်လေ ဖြစ်နိုင်ခြေက နည်းလေဖြစ်သည်။

ကြီးမြတ်သူနှစ်ယောက်က လင်းယွမ် အလွှာတစ်ဆယ်သို့ တက်လှမ်းချိန်တွင် ဖရိုဖရဲဟင်းလင်းပြင် မူလရင်းမြစ်များစွာကို စုပ်ယူခဲ့ပြီး ကြီးမားသော အကျိုးကျေးဇူးများ ရရှိခဲ့သည်ကို သိကြလေသည်။ သို့သော် ၎င်းက လင်းယွမ် အလွှာတစ်ဆယ်ဖြစ်သည်ကို ပြောင်းလဲနိုင်စွမ်းမရှိပေ။

လင်းယွမ်၏ အရည်အချင်းနှင့် အချိန်ယူပြီး လေ့ကျင့်ခဲ့လျှင် အလွှာဆယ့်တစ်၏ တံခါးဝသို့ ရောက်ရန် မျှော်လင့်နိုင်လေသည်။ သို့သော် အချိန်က ဘယ်လောက်ကြာသေးလို့လဲ။ ဆင့်ကဲပြောင်းလဲသူတစ်ယောက်အနေဖြင့် အလွှာတစ်ဆယ်သို့ ဝင်ရောက်ပြီးချိန်တွင် အချိန်အတော်ကြာထိ ထိုစွမ်းအားနှင့် အသားမကျသေးပေ။ သို့သော် လင်းယွမ်၏ တိုက်ခိုက်မှုက အလွှာဆယ့်တစ်သို့ ရောက်နှင့်နေပြီဖြစ်သည်။

" ဒီကောင်လေးကတော့..." ကြီးမြတ်သူယုတိုင်က သူမ၏ ခေါင်းကို ခါလိုက်သည်။

သူတို့နှစ်ယောက်က လင်းယွမ်ကို ဂရုစိုက်ခဲ့သည့်အချိန်မှစ၍ လွန်ခဲ့သော နှစ်သန်းပေါင်းများစွာက အဖြစ်အပျက်များနှင့် ညီမျှသော အံ့အားသင့်မှုများကို ရရှိခဲ့သည်။

ကြယ်ပင်လယ်ခေတ်၏ သမိုင်းတွင် လူသားမျိုးနွယ်က နှစ်ပေါင်းနှစ်သန်းကျော်သာရှိခဲ့လေသည်။ သို့သော် ကြယ်ပင်လယ်ခေတ်မတိုင်မီ လူသားမျိုးနွယ်က ပုန်းကွယ်နေသော ကာလများ ရှိခဲ့လေသည်။

ကြီးမြတ်သူရှချင်နှင့် ကြီးမြတ်သူယုတိုင်တို့က နှစ်ပေါင်းနှစ်သန်းထက် ပို၍ အသက်ကြီးကြလေသည်။ သူတို့က ပုန်းကွယ်သောကာလမတိုင်မီ မွေးဖွားခဲ့ကြခြင်းဖြစ်သည်။

အနက်ရောင်ဂြိုလ်အတွင်း အနက်ရောင်ဝတ်ရုံနှင့် လူက လင်းယွမ်၏ တိုက်ခိုက်မှုကြောင့် ဖြစ်ပေါ်လာသော ကြောက်စရာကောင်းသော မြင်ကွင်းကို မှင်သက်စွာ ကြည့်နေခဲ့သည်။

သေခြင်းရှင်ခြင်းနိယာမ၏ စွမ်းအားက ကြောက်စရာကောင်းသော အော်ရာကို ထုတ်လွှတ်ပြီး အပေါက်များတစ်လျှောက် အပြင်ဘက်သို့ အဆက်မပြတ် ပျံ့နှံ့နေသည်။ ထို့အပြင် ၎င်း၏ သက်ရောက်မှုအောက်တွင် လေဟာနယ်က တွန့်လိမ်ပြီး ပျက်စီးနေသည်။

" ဒါက အခုမှနားလည်ထားတဲ့ သေခြင်းရှင်ခြင်းနိယာမလား။ " အနက်ရောင်ဝတ်ရုံနှင့်လူက အချိန်အတော်ကြာ တိတ်ဆိတ်နေခဲ့သည်။ " အနည်းဆုံး ဒါက ဒုတိယအဆင့် ဒါမှမဟုတ် တတိယအဆင့် သေခြင်းရှင်ခြင်းနိယာမနဲ့ ကိုက်ညီနေတယ်။ "

အနက်ရောင်ဝတ်ရုံနှင့်လူက တိုက်ခိုက်မှုကို ထုတ်ဖော်ခဲ့သော လင်းယွမ်ကို ကြည့်လိုက်သည်။ လင်းယွမ် အသုံးပြုခဲ့သော သေခြင်းရှင်ခြင်းနိယာမက အမှန်တကယ် ယခုမှ နားလည်ခဲ့ခြင်းဖြစ်ပြီး ပထမအဆင့်တွင်သာ ရှိနေဆဲ ဖြသ်သည်။

သာမန်ပေါင်းစပ်နိယာမဖြစ်စေ အဓိကပေါင်းစပ်နိယာမဖြစ်စေ နားလည်နိုင်စွမ်း၏ နက်ရှိုင်းမှုအပေါ်အခြေခံပြီး ပထမအဆင့်မှ နဝမအဆင့်ထိ ခွဲခြားထားသည်။

အလွှာတစ်ဆယ် ဆင့်ကဲပြောင်းလဲသူတစ်ယောက်က အလွှာဆယ့်တစ်သို့ တက်လှမ်းရန် အနည်းဆုံး အဓိကပေါင်းစပ်နိယာမကို နားလည်ပြီး ထိုနိယာမကို ဒုတိယအဆင့်ထိ ကျင့်ကြံထားရန် လိုအပ်လေသည်။ နိယာမများကို နားလည်ရန်ပင် အလွန်ခက်ခဲပြီး နိယာမများကို ပေါင်းစပ်ရန် ပြောစရာပင်မလိုပေ။

ရှေ့တွင် လမ်းညွှန်မှုတစ်ခုရှိခြင်းက ခက်ခဲသော်လည်း အနည်းဆုံး ပန်းတိုင်ကိုတော့ မြင်နိုင်လေသည်။ သို့သော် ပေါင်းစပ်နိယာမများကို အစွမ်းထက်သူများက သူတို့၏ ကိုယ်ပိုင်နားလည်မှုဖြင့် မတူညီသော နိယာမများကို ပေါင်းစပ်ထားခြင်းဖြစ်သည်။ ပေါင်းစပ်နိယာများကို လေ့ကျင့်ရာတွင် အဆင့်တိုင်းက ကွဲပြားလေသည်။