ခန္ဓာကိုယ်လဲလှယ်ခြင်း (အပိုင်း ၅)

အလောင်းအဆီဘူး သုံးဘူး၊ တစ်ဘူးက အစိမ်းရောင်၊ တစ်ဘူးက ခပ်ဖျော့ဖျော့ ခရမ်းရောင်နဲ့ ကျန်တစ်ဘူးကတော့ အနက်ရောင်ဖြစ်နေသည်။

အရင်က အခြားအလောင်းအဆီတွေကို နောက်ပြန်ရစ်တဲ့အချိန်တုန်းက သုံးကြည့်ပြီးပြီဖြစ်လို့ အသုံးမဝင်ကြောင်း သက်သေပြပြီးသားဖြစ်၏။

တချို့ဆေးတွေဆို မိုတားကို ပိုလို့တောင် ဒေါသထွက်စေခဲ့ပြီး ထုံဒီကလည်း ထိုကြောင့် အသက်ဆုံးရှုံးခဲ့ရသည်။

ဒီတော့ ဒီအလောင်းအဆီသုံးလုံးထဲမှာ မိုတားအတွက် ဘယ်အရာက အသုံးဝင်မလဲဆိုတာကို ယန်ကျွင်းဇဲ မပြောနိုင်သလို၊ မိုတားအပေါ် ဒီအလောင်းအဆီကို စမ်းသပ်ပြီးနောက် သူ့ကိုဒေါသထွက်ပြီး တိုက်ခိုက်လာမှာမဟုတ်ဘူးလို့လည်း အာမခံနိုင်ခြင်း မရှိပေ။

ဘယ်လိုပဲဖြစ်ဖြစ် မိုတားက သူ့ကိုတကယ်ပဲ တိုက်ခိုက်ချင်တယ်ဆိုရင် ယန်ကျွင်းဇဲ၏ လက်ရှိအခြေအနေနဲ့ဆို လုံးဝခုခံနိုင်စွမ်းရှိမှာ မဟုတ်ပေ။

မိုတား၏အနားကို ကပ်သွားပြီးနောက် ယန်ကျွင်းဇဲက လှည့်ကြည့်လိုက်တော့ ကျန်းရှောင်မိုနဲ့ ထုံဒီတို့နှစ်ယောက်လုံးက သူ့နောက်ကနေ တမင်လိုက်မလာဘဲ သူတို့၏လည်ပင်းများကို ဆန့်ပြီး မျက်တောင်မခတ်တမ်း ဒီဘက်ကို ကြည့်နေကြတာကို တွေ့လိုက်ရသည်။

လက်ထဲမှာရှိတဲ့ အလောင်းအဆီကို ချိန်ဆကြည့်ရင်း ယန်ကျွင်းဇဲက နောက်ထပ်ဖြစ်နိုင်ခြေတစ်ခုကို စဉ်းစားမိသည်။ ကျန်နေသေးတဲ့ အလောင်းအဆီသုံးလုံးလုံးက မိုတားအတွက် အသုံးမဝင်တာမျိုးလည်း ဖြစ်နိုင်သေးသည်။

ဘာကြောင့်လဲဆိုတော့ မိုတားက ယန်လုံ၏ထိန်းချုပ်မှုအောက်မှာ ရှိခဲ့တာကြောင့် အဲဒီအချိန်တုန်းက ယန်လုံက မိုတားအတွက် အသုံးဝင်တဲ့ အလောင်းအဆီအားလုံးကို သုံးပစ်ခဲ့ပြီးပြီလား။

တကယ်လို့ ဒီလိုသာဆိုရင် ဒီသတ္တဝါကို ဘယ်လိုကိုင်တွယ်ရမလဲဆိုတာကို ယန်ကျွင်းဇဲ မသိတော့ပေ။

သူ့စိတ်ရှုပ်ထွေးနေတဲ့ အတွေးများကို ခဏဘေးဖယ်ထားပြီး ယန်ကျွင်းဇဲက ပိုနီးကပ်စွာသွားလိုက်ကာ အစိမ်းရောင် အလောင်းအဆီဘူးကို ဖွင့်လိုက်ပြီး အဖုံးကို ပြောင်းပြန်လှန်ကာ အဆီပြန်တဲ့အနှစ်တွေကို နည်းနည်းယူပြီး မိုတား၏ အဝတ်အင်္ကျီအောက်ခြေထောင့်မှာ ညင်သာစွာ လိမ်းပေးလိုက်သည်။

သူက အရမ်းကို ဂရုတစိုက် လိမ်းပေးနေခဲ့ပေမယ့် အလောင်းအဆီက မိုတားအဝတ်တွေကို ထိလိုက်တာနဲ့ ရှေးဟောင်းရုပ်အလောင်းက ရုတ်တရက် ရပ်တန့်သွားပြီး ခေါင်းကိုလှည့်ကာ ကိုယ်ကိုကိုင်းညွှတ်ထားတဲ့ ယန်ကျွင်းဇဲကို ကြည့်လိုက်သည်။

ယန်ကျွင်းဇဲက အလန့်တကြားဖြစ်သွားပြီး သူ့၏သတိအနေအထားကို အမြင့်ဆုံးအဆင့်အထိ မြှင့်တင်လိုက်ရင်း လက်ထဲမှာ ကျန်နေသေးတဲ့ အစိမ်းရောင်အလောင်းအဆီအများစုကို ကိုင်ထားရင်းနဲ့ ကျန်နှစ်ဘူးကိုတော့ သူ့အိတ်ထဲ ထည့်ထားလိုက်သည်။

မိုတားက တိတ်ဆိတ်နေပြီး ဘာအသံမှမထွက်ဘဲ ယန်ကျွင်းဇဲကို ရိုးရှင်းစွာ ကြည့်နေသည်။

ယန်ကျွင်းဇဲလည်း ငြိမ်သက်စွာပဲ ရပ်နေခဲ့ပေမယ့် အလောင်းအဆီကို ဆက်မလိမ်းရဲသလို၊ တခြားတစ်ယောက်၏ပါးစပ်ထဲကိုလည်း တိုက်ရိုက်မထည့်ရဲတော့ပေ။

တကယ်လို့ ဒီအလောင်းအဆီက မိုတားအတွက် မသင့်တော်ဘူးဆိုရင် ထည့်လိုက်တာက မိုတား၏ဒေါသကိုသာ ဖြစ်ပေါ်စေမှာပဲ။

မိနစ်ဝက်လောက်ကြာတော့ မိုတားက နောက်ဆုံးတော့ နောက်ပြန်လှည့်ပြီး ဘာမှမလုပ်ဘဲ ရှေ့ဆက်ထွက်သွားတော့သည်။

အစိမ်းရောင် အလောင်းအဆီက သူ့ကို ထိန်းချုပ်ဖို့ မသင့်တော်တာပဲဖြစ်ရမည်၊ ဒါက မိုတားကို သူ့အာရုံစူးစိုက်မှု ရရှိစေရုံသာမက ဒေါသကိုလည်း မဖြစ်စေခဲ့ပေ။

ယန်ကျွင်းဇဲက သူ့လက်ထဲက အစိမ်းရောင်အလောင်းအဆီကို တစ်ချက်ကြည့်လိုက်ပြီး ဘေးကိုပစ်ချကာ ခပ်ဖျော့ဖျော့ ခရမ်းရောင်ဘူးကို ထုတ်လိုက်သည်။ ဒါကိုဖွင့်လိုက်တာနဲ့ ဆေးနံ့ပြင်းပြင်းက သူ့ကိုလာရိုက်ပြီး နှာချေလု နီးပါး ဖြစ်သွားရသည်။

သူခေါင်းကို အမြန်လှည့်လိုက်ပြီး ခပ်ဖျော့ဖျော့ ခရမ်းရောင် အလောင်းအဆီကို ခပ်ဝေးဝေးမှာ ကိုင်ထားလိုက်ပြီး သူ့ခေါင်းနဲ့ အရမ်းနီးကပ်မလာအောင် ကြိုးစားကာ မိုတား၏နောက်ကို ခြေဖျားထောက်ပြီး အမြန်လိုက်သွားတော့သည်။

ပြင်းရှတဲ့အနံ့က မိုတားဆီကနေ ထူးခြားတဲ့ တုံ့ပြန်မှုတစ်စုံတစ်ရာကို မဖြစ်စေခဲ့ဘဲ သူက တိတ်ဆိတ်စွာပဲ ဆက်လျှောက်သွားနေသည်။

ယန်ကျွင်းဇဲက ဒီလုပ်ငန်းစဉ်ကို ထပ်လုပ်ပြီး အဖုံးနဲ့ ဆေးအနှစ်တွေကို နည်းနည်းယူကာ မိုတား၏ အဝတ်အစွန်းတစ်ဖက်မှာ ထပ်ပြီး ဂရုတစိုက် လိမ်းပေးလိုက်သည်။

မိုတားက နောက်ပြန်မလှည့်ပေမယ့် အလောင်းအဆီက သူ့အဝတ်ကို ထိလိုက်တဲ့အချိန်မှာပဲ ချက်ချင်းဆိုသလို ရပ်တန့်သွားခဲ့သည်။

အရင်ကလိုပဲ ယန်ကျွင်းဇဲက လှုပ်ရှားခြင်းမရှိဘဲ ခေါင်းကိုမော့ပြီး မိုတား၏ တုံ့ပြန်မှုကို စောင့်နေခဲ့သည်။

သို့သော် ဒီတစ်ခါမှာတော့ မိုတားက ငြိမ်နေပေမယ့် ယန်ကျွင်းဇဲကို အရင်ကလို နောက်ပြန်လှည့်မကြည့်တော့ပေ။ ဒါက ခပ်ဖျော့ဖျော့ ခရမ်းရောင် အလောင်းအဆီက မှန်ကန်နိုင်ခြေ ရှိတယ်ဆိုတာကို ပြသနေသည်။

ယန်ကျွင်းဇဲက မိုတား၏ တုံ့ပြန်မှုကို ဂရုတစိုက် စောင့်ကြည့်ပြီးနောက် အဖုံးနဲ့ အလောင်းအဆီ အများကြီးကို ထပ်ယူလိုက်သည်။ တကယ်လို့ ဒါက မိုတားအပေါ်မှာ အလုပ်ဖြစ်တယ်လို့ သေချာပြီဆိုရင်တော့ သူ ရဲဝံ့ စွာလှုပ်ရှားဖို့ အဆင်သင့်ဖြစ်နေပြီ။

အဲဒီအချိန်မှာပဲ မိုတားက ရုတ်တရက် လှည့်လိုက်ပြီး သူ့၏လက်တစ်ဖက်က ရှေးဟောင်းဓားကို ကိုင်ကာ ယန်ကျွင်းဇဲ၏ခေါင်းဆီကို ပြင်းထန်တဲ့ အရှိန်အဟုန်နဲ့ ခုတ်ချလိုက်သည်။ အဲဒီလို ခုတ်မယ်ဆိုတဲ့ အရိပ်အယောင်က အရင်ကတည်းက လုံးဝ မပြခဲ့ပေ။

ကံကောင်းစွာနဲ့ပဲ ယန်ကျွင်းဇဲက ဘာတုံ့ပြန်မှုမျိုးကိုမဆို စောင့်ကြည့်နေခဲ့တာကြောင့် တစ်ခုခုမှားနေတယ်လို့ ခံစားမိပြီး မိုတားကို မော့ကြည့်လိုက်တဲ့အချိန်မှာ ဓားသွားက သူ့ခေါင်းနဲ့ လက်တစ်ဝက်လောက်ပဲ ဝေးတော့တာကို တွေ့လိုက်ရသည်။

နောက်ပြန်ရစ်!

ထပ်ပြီးစဉ်းစားဖို့ အချိန်မရှိတော့ဘဲ ယန်ကျွင်းဇဲ၏ အတွေးတွေ လျှပ်တစ်ပြက်ဖြစ်သွားပြီး အချိန်တွေ နောက်ပြန်လှည့်သွားကာ သူက ခပ်ဖျော့ဖျော့ ခရမ်းရောင် အလောင်းအဆီကို ကိုင်ထားရင်း မိုတားဆီကို ဒုတိယအကြိမ် ချဉ်းကပ်ခဲ့တဲ့အချိန်ဆီကို ရောက်သွားခဲ့ပြန်သည်။

အခုချိန်မှာတော့ ခပ်ဖျော့ဖျော့ ခရမ်းရောင်ဘူးကို လုံးဝ မသုံးသင့်ဘူးဆိုတာ ထင်ရှားသွားခဲ့ပြီ။ ဒါက ထုံဒီက အရင်က နောက်ပြန်ရစ်တဲ့အချိန်တုန်းက သုံးခဲ့တဲ့ အနီရောင်ရင့်ရင့် အလောင်းအဆီနဲ့ ဆင်တူနေပြီး မိုတားကို ရုတ်တရက် ဒေါသထွက်ပြီး ကြမ်းတမ်းလာအောင် လုပ်နိုင်ခဲ့သည်။

ယန်ကျွင်းဇဲသာ အချိန်ကို နောက်ပြန်မရစ်နိုင်ခဲ့ရင် သူ့၏ကံကြမ္မာက ထုံဒီနဲ့ အတူတူပဲ ဖြစ်နေလိမ့်မယ်။

ဒီတစ်ခါတော့ သူ ခပ်ဖျော့ဖျော့ ခရမ်းရောင်ဘူးကို မဖွင့်ဘဲ ဘေးကို ပစ်ချလိုက်ပြီး နောက်ဆုံးဘူးဖြစ်တဲ့ အနက်ရောင်ဘူးကို ထုတ်လိုက်သည်။

ယန်ကျွင်းဇဲက ဒီအလောင်းအဆီဘူးကို မှတ်မိနေသည်။ ဒါက ယန်လုံဆီကနေ ပြန်ရခဲ့တဲ့အထဲမှာ သူပထမဆုံး တွေ့ခဲ့တဲ့ဘူးဖြစ်ပြီး အဲဒီအချိန်တုန်းက သူ့ကို သိမ်မွေ့စွာ အရိပ်အမြွက်ပြခဲ့ပေမယ့် သူ သတိမထားမိခဲ့ပေ။

အခုတော့ အခြားအလောင်းအဆီတွေအားလုံးကို စမ်းသပ်ပြီးနောက် သူက အနက်ရောင်ဘူးကို ပြန်ယူလာခဲ့ပြန်သည်။

သူက အနက်ရောင်ဆေးက အနံ့လုံးဝမရှိဘူးဆိုတာကိုလည်း မှတ်မိနေခဲ့သည်။ မြေကြီးနံ့တောင် ဒီအလောင်းအဆီထက် ပြင်းထန်ခဲ့သည်။

မိုတားနားကို အမြန်ချဉ်းကပ်သွားပြီး ယန်ကျွင်းဇဲက အဖုံးနဲ့ အနက်ရောင်ဆေးအနှစ်အချို့ကို ထပ်ယူကာ သူရှေ့ကိုဆက်လျှောက်နေတဲ့ မိုတား၏ အဝတ်အောက်ခြေနားမှာ ဂရုတစိုက်လိမ်းပေးလိုက်သည်။

ဒီတစ်ခါမှာတော့ မိုတားက ဘာတုံ့ပြန်မှုမှ မပြဘဲ ရှေ့ကို ဆက်တိုးလျှောက်နေသည်။

“ဒါ အလုပ်ဖြစ်နိုင်တယ်” လို့ ယန်ကျွင်းဇဲက ကျေနပ်စွာ တွေးလိုက်မိသည်။ ဒါပေမယ့် မိုတားက မရပ်ဘဲ ဆက်သွားနေတာကို မြင်တော့ ရှေးဟောင်းရုပ်အလောင်းကို ထိန်းချုပ်နိုင်ခြေက မရှိဘူးလို့ ထင်ရသည်။

ပြန်စဉ်းစားပြီးနောက် သူက မိုတားကို အခုချက်ချင်း ရပ်တန့်စေချင်လိုက်သည်။

အဲဒီလိုတွေးလိုက်တာနဲ့ မိုတား၏ရှေ့ကိုတိုးနေတဲ့ ပုံရိပ်က အနည်းငယ်ရပ်တန့်သွားတာကို သူတွေ့လိုက်ရသည်။

သူ့၏အဆစ်အမြစ်တွေက လိုက်လျောညီထွေဖြစ်ဖို့ ခက်ခဲနေသလိုမျိုး တောင့်တင်းနေပုံရပြီး အနည်းငယ်ရုန်းကန်ပြီးနောက်မှာတော့ သူ့လှုပ်ရှားမှုတွေက ပြန်လည်ကောင်းမွန်လာပြီး ပုံမှန်အရှိန်အတိုင်း ပြန်ဖြစ်သွားခဲ့လေသည်။