ဖရိုဖရဲ ကြယ်တာရာနယ်မြေ၊ ကြက်သွေးရောင် မိခင်ဂြိုဟ် (၂)...

“အခုက စောပါသေးတယ်… ဒီကနေ ဖရိုဖရဲကြယ်ကို သွားဖို့ အနည်းဆုံး နှစ်သုံးရာလောက် အချိန်ယူရတယ်။ တစ်ခုခု ကြန့်ကြာမှုရှိရင် ဒီထက်တောင် ပိုကြာနိုင်သေးတယ်။ သူတို့ ကုန်တွေရောင်းပြီး ပြန်လာတဲ့အချိန်ဆိုရင် အတော်ကြာနေလောက်ပြီ။ နှစ်တစ်ထောင်လောက် မရှိဘဲနဲ့ ဒီလောက်မြန်မြန် ပြန်ရောက်လာဖို့ဆိုတာ မဖြစ်နိုင်ဘူး” ဟု မျက်လုံးသုံးလုံးမျိုးနွယ်မှ ကျင့်ကြံသူ တစ်ဦးက အေးအေးလူလူ ဝင်ပြောလိုက်၏။

“အာ… ငါတော့ ဖရိုဖရဲကြယ်ကို တစ်ခါမှမရောက်ဖူးဘူး။ တကယ်သွားပြီး ဗဟုသုတရှာချင်လိုက်တာ။ အဲဒီနေရာက ကောင်းကင်ကြယ်တာရာနယ်မြေ၊ ရာရှိုမွန်ကြယ်တာရာ နယ်မြေနဲ့ သလင်းဝိညာဉ်ကြယ်တာရာနယ်မြေတွေရဲ့ လမ်းဆုံလမ်းခွဆိုတော့ အရမ်းစည်ကားမှာပဲလို့ ကြားဖူးတယ်” ဟု ကျင့်ကြံသူတစ်ဦးက တမ်းတမ်းတတ လေသံဖြင့် ဆိုလေသည်။

“စည်ကားတာတော့ ဟုတ်ပါတယ်… ဒါပေမဲ့ မမေ့နဲ့၊ အဲဒါက ဖရိုဖရဲကြယ်တာရာနယ်မြေ၊ တရားဥပဒေစိုးမိုးမှု ကင်းမဲ့တဲ့နေရာပဲ။ ကြယ်တာရာနယ်မြေကြီးသုံးခုကနေ အလိုရှိနေတဲ့ မရေမတွက်နိုင်တဲ့ ရက်စက်ကြမ်းကြုတ်တဲ့ ကြယ်တာရာပင်လယ်ဓားပြတွေနဲ့ တရားခံပြေးတွေ အဲဒီမှာ ပုန်းအောင်းနေကြတာ။ အစွမ်းမရှိရင် မင်းဘယ်လိုသေသွားမှန်းတောင် သိမှာမဟုတ်ဘူး။ ငါတို့လို ကြယ်လေပင်လယ်ဓားပြအဖွဲ့တောင် အဲဒီမှာ သတိထားပြီး လှုပ်ရှားရတယ်။ မသွားတာက ပိုကောင်းနိုင်တယ်။ အရင်တစ်ခေါက်က ငါတို့သွားတုန်းက ငါတို့ညီအစ်ကိုတချို့ အစအနမကျန် ပျောက်သွားခဲ့တယ်” အတွေ့အကြုံရင့် ဓားပြတစ်ဦးက သူ၏ ဂျူနီယာအား လေသံတင်းတင်းဖြင့် သတိပေးလိုက်လေ၏။

“ဒါပေမဲ့ အဲဒီမှာ အရာအားလုံးရနိုင်တယ်လေ။ ဖရိုဖရဲကြယ်မှာ ပိုက်ဆံသာရှိရင် လိုချင်တာမှန်သမျှ ရတယ်လို့ ကျွန်တော်ကြားဖူးတယ်” ဟု ဓားပြအသစ်လေးတစ်ဦးက လက်မခံနိုင်ဟန်ဖြင့် ချေပသည်။

ဓားပြအိုကြီးက မျှော်လင့်ချက်အပြည့်ဖြင့် ကြည့်နေသော ဓားပြသစ်လေးကို တစ်ချက်ကြည့်ကာ ခေါင်းခါလိုက်ပြီး ရေရွတ်လိုက်လေသည်။

“လူငယ်တွေကတော့ သေရမှာမကြောက်ကြဘူးပဲ”

“ပြောရရင် ဒီမျိုးနွယ်မှာ ပါရမီရှင်တွေ အများကြီးပဲ၊ တကယ့်ကို တန်ဖိုးရှိတဲ့ ဖမ်းမိမှုကြီးပါပဲ။ ငါတို့ခေါင်းဆောင်သာ သူတို့ကို အကုန်ရောင်းလိုက်ရင် ငါတို့လည်း ဝေစုကောင်းကောင်းရနိုင်တယ်။ ငါတို့ကျင့်ကြံမှုအဆင့်တွေ တက်လာတာနဲ့အမျှ ငါတို့ ကြယ်လေပင်လယ်ဓားပြအဖွဲ့ရဲ့

သြဇာအာဏာကလည်း ကျိန်းသေပေါက် တိုးပွားလာမှာဖြစ်ပြီး ဖရိုဖရဲကြယ်တာရာနယ်မြေမှာတောင် ပိုကောင်းအောင် လုပ်နိုင်လိမ့်မယ်” ဟု အခြားအကြီးအကဲတစ်ဦးက တွေးတွေးဆဆ ဆိုလိုက်၏။

ထိုအခါ စောစောက စကားပြောခဲ့သော ဓားပြအိုကြီးက ခေါင်းညိတ်ကာ

“အဘိုးကြီးကူယား ပြောတာလည်း ဟုတ်သားပဲ။ အဲဒီအခါကျရင် ငါတို့ကိုယ်တိုင်ရဲ့ ကျင့်ကြံမှုတွေတောင် တိုးတက်လာနိုင်တယ်” ဟု ထောက်ခံလိုက်လေသည်။

ပတ်ဝန်းကျင်ရှိ ကျင့်ကြံသူအားလုံး၏ မျက်လုံးများမှာ မျှော်လင့်ချက်များဖြင့် တလက်လက် တောက်ပလာကြတော့သည်။

“ငါတို့သခင်ကြီး မြန်မြန်ပြန်လာပါစေလို့ပဲ ဆုတောင်းရမှာပဲ”

ထိုအခိုက်အတန့်၌ ရုတ်တရက် အရေးပေါ် မြည်သံတစ်ခု ထွက်ပေါ်လာ၏။

ထိန်းချုပ်ခန်းအတွင်း၌ အခင်းအကျင်းအင်းကွက်များ ပေါ်ထွက်လာပြီး စီးဆင်းနေသောအလင်းများဖြင့် လင်းထိန်သွားသည်။ ခန်းအတွင်း၌ အခင်းအကျင်းအင်းကွက်များ ပေါ်ထွက်လာပြီး စီးဆင်းနေသောအလင်းများဖြင့် လင်းထိန်သွားသည်။

ကောင်းကင်ယံတွင် ကြယ်တာရာမြေပုံတစ်ခု ပုံရိပ်ထင်လာလေသည်။

ကြယ်တာရာမြေပုံပေါ်ရှိ အစိမ်းရောင်အစက်နှစ်စက်သည် သူတို့ ကြယ်လေပင်လယ်ဓားပြအဖွဲ့၏ ကောင်းကင်ယာဉ်ပျံသင်္ဘောတည်နေရာကို ကိုယ်စားပြုနေပြီး တစ်ချိန်တည်းမှာပင် အနီရောင်အစက်တစ်ခုက အရှိန်ပြင်းစွာ ချဉ်းကပ်လာနေသည်ကို တွေ့လိုက်ရ၏။

အားလုံး၏ မျက်နှာများမှာ ထိတ်လန့်တုန်လှုပ်မှုကြောင့် ဖြူဖျော့သွားကြသည်။

အတွေ့အကြုံရှိ ဓားပြတစ်ဦးက ချက်ချင်းပင် “တစ်ယောက်ယောက် လာနေပြီ။ ဘယ်သူဖြစ်နိုင်မလဲ” ဟု သတိပေး အော်ဟစ်လိုက်သည်။

“စတုတ္ထသခင်ကို အကြောင်းကြားလိုက်။ ပြီးတော့ ဝင်လာတဲ့အဖွဲ့ကို ဒါ ငါတို့ ကြယ်လေပင်လယ်ဓားပြအဖွဲ့ရဲ့ ပိုင်နက်ဖြစ်ကြောင်း သတိပေးလိုက်စမ်း။ ငါတို့ဆီကို တည့်တည့်ဝင်လာရဲတာ သေချင်နေကြတာပဲ”

မျက်လုံးသုံးလုံးမျိုးနွယ်မှ ဓားပြတစ်ဦးက သူ၏မျက်လုံးများထဲတွင် ရက်စက်သောအရိပ်အယောင်များဖြင့် ကြိမ်းဝါးလိုက်သည်။

အဖွဲ့သားများမှာ မဆိုင်းမတွပင် ချက်ချင်းလှုပ်ရှားကြတော့သည်။

မကြာမီမှာပင် မီးခိုးရောင်ကျောက်တုံးမျိုးနွယ်မှ ကျင့်ကြံသူတစ်ဦး ပေါ်ထွက်လာ၏။ သူသည် လေးမီတာခန့်မြင့်မားပြီး မီးခိုးရောင်နှင့် အဖြူရောင်ကျောက်တုံးများဖြင့် ပေါင်းစပ်ဖွဲ့စည်းထားသကဲ့သို့ ခန္ဓာကိုယ်ထွားကျိုင်းလှသည်။

ဤမီးခိုးရောင် ကျောက်တုံး မျိုးနွယ် ကျင့်ကြံသူ၏ အရှိန်အဝါမှာ အလွန်အမင်း အစွမ်းထက်လှ၏။ သူသည် နက်ရှိုင်းခြင်း အင်မော်တယ်နယ်ပယ်သို့ ရောက်ရှိနေပြီ ဖြစ်ပြီး ကြယ်လေပင်လယ်ဓားပြ အဖွဲ့၏ စတုတ္ထသခင်လေး ဖြစ်ပေ၏။

သူက တည်ငြိမ်သော မျက်နှာထားဖြင့် ထိန်းချုပ်ခန်းထဲသို့ ဝင်လာပြီး ကြယ်တာရာ မြေပုံကို

တည့်တည့်ကြည့်ကာ “ဘာဖြစ်နေတာလဲ” ဟု မေးလိုက်သည်။

“သခင်လေးလေး၊ တစ်စုံတစ်ယောက်က ကျွန်တော်တို့ဆီ ဦးတည်လာနေပါတယ်။ ကျွန်တော်တို့ သတိပေးချက်ပို့လိုက်ပေမယ့်

သူတို့ လျစ်လျူရှုထားပါတယ်” ဟု တာဝန်ကျဓားပြက ချက်ချင်း သတင်းပို့လိုက်၏။

စတုတ္ထသခင်၏ မဟူရာကျောက်တုံးကဲ့သို့သော မျက်လုံးများထဲတွင် ကြမ်းကြုတ်သောအလင်းရောင်တစ်ချက် လက်သွား၏။

“ငါတို့ ကြယ်လေပင်လယ်ဓားပြအဖွဲ့ရဲ့ နာမည်ကို ကြေညာလိုက်ရဲ့လား”

ဤဒေသတွင် ကြယ်လေပင်လယ်ဓားပြအဖွဲ့၏ အမည်သည် အမြဲတမ်း ထိရောက်မှုရှိခဲ့သည်သာ ဖြစ်သည်။

မျက်လုံးသုံးလုံးကြယ်တာရာနယ်မြေ၏ ထိပ်တန်းကုန်သည်အင်အားစုများမှ ကုန်သည်သင်္ဘောများပင်လျှင် ကြယ်လေပင်လယ်ဓားပြအဖွဲ့နှင့် ရင်ဆိုင်ရပါက သူတို့၏ကုန်ပစ္စည်းများကို နာခံစွာ ပေးအပ်ခဲ့ရသည်ချည်းပင်တည်း။

သို့သော်လည်း ကြယ်လေပင်လယ်ဓားပြအဖွဲ့မှာ မဆင်မခြင် လုပ်ဆောင်သူများမဟုတ်ပေ။ သူတို့သည် မိမိတို့ထက် အင်အားကြီးသော ပြိုင်ဘက်များနှင့် ရင်ဆိုင်တွေ့ဆုံခြင်းကို အမြဲရှောင်ရှားလေ့ရှိကြသည်။

“ဟုတ်ကဲ့၊ ကြေညာပြီးပါပြီ၊ ဒါပေမဲ့ သူတို့ မရပ်တန့်ခဲ့ပါဘူး” ဟု အခြားဓားပြတစ်ဦးက ဆိုသည်။

“ဒါ နိမိတ်မကောင်းဘူးပဲ”

စတုတ္ထသခင်က မျက်လုံးများကို ကျဉ်းမြောင်းလိုက်ပြီး ရေရွတ်လိုက်သည်။

“စတုတ္ထသခင်၊ ကျွန်တော်တို့ ဘာလုပ်သင့်ပါသလဲ”

ပြတင်းပေါက်မှ အနီရောင်ဂြိုဟ်ကို ကြည့်လိုက်ပြီးနောက် စတုတ္ထသခင်က

“ဒီနေရာက ရတနာမြေပဲ။ ငါတို့ ကြယ်လေပင်လယ်ဓားပြအဖွဲ့က ရှာဖွေတွေ့ရှိခဲ့တာဖြစ်လို့ ဒါ ငါတို့ပိုင်တယ်။ ပြီးတော့ ဒါကို ဝေမျှဖို့ ငါလုံးဝ သဘောမတူနိုင်ဘူး” ဟု အမိန့်ပေးလိုက်သည်။

ခေတ္တရပ်တန့်ပြီးနောက် သူသည် ဂရုတစိုက် အာရုံခံကြည့်လိုက်ရာ အေးစက်သော အပြုံးတစ်ပွင့် ဖြစ်ပေါ်လာ၏။

“အစစ်အမှန် အင်မော်တယ် တစ်ယောက်၊ ကောင်းကင်ဘုံ အင်မော်တယ် လေးယောက်၊ ပြီးတော့ တက်လှမ်းခြင်း အဆင့်တောင် မရောက်သေးတဲ့ နောက်တစ်ယောက်လား။ ဘယ်သူက သူတို့ကို ငါတို့ ကြယ်လေ ပင်လယ် ဓားပြအဖွဲ့ရဲ့ သတိပေးချက်ကို လျစ်လျူရှုရဲလောက်တဲ့ သတ္တိတွေ ပေးလိုက်တာလဲ”

ဓားပြများမှာ အစပိုင်းတွင် စိုးရိမ်နေခဲ့ကြသည်။

ကြယ်တာရာ ပင်လယ်ဓားပြများအဖြစ် ကောင်းကင်ယာဉ်ပျံသင်္ဘောအမျိုးမျိုး၊ ကျင့်ကြံသူအမျိုးမျိုးနှင့် ရင်ဆိုင်ရရာတွင် သူတို့ အကြောက်ဆုံးမှာ အလွန်အမင်း အစွမ်းထက်သော ကျင့်ကြံသူများနှင့် တွေ့ဆုံရပြီး အသနားခံရန် အခွင့်အရေးပင် မရလိုက်ခြင်းကိုပင်။

ဤအဖြစ်က သူတို့အား သတိပေးချက်ကို လျစ်လျူရှုသော သင်္ဘောပေါ်တွင် သူတို့ မထိပါးနိုင်သော ပုဂ္ဂိုလ်များ ပါလာနိုင်သည်ဟု စိုးရိမ်ကာ ပင်ကိုအသိစိတ်ဖြင့် သတိထားစေခဲ့သည်။

ယခုမူ ထိုအရာသည် ဟာသတစ်ခု ဖြစ်နေပုံရပါ၏။

ဤအချက်က ကြယ်တာရာ ပင်လယ်ဓားပြ တစ်စုကို စိတ်သက်သာရာရသွားစေသည်။

“လေလုံတံခါးကို ဖွင့်လိုက်။ ဘယ်ကောင်တွေက ဒီလောက် မိုက်မဲပြီး ကိုယ့်သေတွင်းကိုယ် တူးလာလဲ သွားကြည့်ကြရအောင်”

စတုတ္ထသခင်က ဖျော်ဖြေမှုကို ခံစားနေရသည့်ဟန်ဖြင့် ပြုံးကာ မှာကြားလိုက်သည်။

သူသည် အလင်းတန်း တစ်ခုအဖြစ်သို့ ပြောင်းလဲသွားပြီး အစစ်အမှန် အင်မော်တယ် အဆင့် ကျင့်ကြံသူ သုံးဦးနှင့် ကောင်းကင်ဘုံ

အင်မော်တယ်အဆင့် ကျင့်ကြံသူ ဆယ်ဦးကျော်ကို ဦးဆောင်ကာ ကောင်းကင် ယာဉ်ပျံသင်္ဘောထဲမှ ဟင်းလင်းပြင် အာကာသထဲသို့ ထွက်ခွာသွားလေသည်။

သူတို့၏ အမြင်အာရုံဖြင့် အနီရောင်ကောင်းကင်ဘုံ လှေပျံတစ်စင်း အရှိန်ပြင်းစွာ ချဉ်းကပ်လာသည်ကို သဘာဝကျကျ မြင်တွေ့လိုက်ရသည်။

မကြာမီမှာပင် ထိုလှေပျံသည် သူတို့ရှိရာ နေရာသို့ နီးကပ်လာခဲ့သည်။

စတုတ္ထသခင်သည် ရုတ်တရက် တစ်စုံတစ်ခုကို သတိပြုမိသွားပြီး အနီရောင်ကောင်းကင်ဘုံလှေပျံကို အနည်းငယ် အံ့အားသင့်သော မျက်နှာထားဖြင့် ကြည့်ကာ မသေမချာဖြစ်နေသော လေသံဖြင့် “…ဒီကောင်းကင်ဘုံလှေပျံ၊ တစ်ခုခုတော့ ထူးဆန်းနေတယ်” ဟု ဆိုလိုက်သည်။

အနီးရှိ အစစ်အမှန်အင်မော်တယ်တစ်ဦးက ထိုစကားကိုကြားလျှင် ထိတ်ထိတ်ပျာပျာ မေးမြန်းလိုက်၏။

“စတုတ္ထသခင်၊ ဘာများမှားလို့ပါလဲ”

စတုတ္ထသခင်က မျက်မှောင်ကြုတ်လိုက်ရင်း

“ဒီကောင်းကင်ဘုံလှေပျံက… အဆင့်မြင့်

အင်မော်တယ် လက်နက် ဖြစ်နိုင်တယ်”

လှေပျံအတွင်းမှ ထုတ်လွှတ်နေသော စွမ်းအားသည် သူ့အတွက်ပင် အနည်းငယ် အန္တရာယ်ရှိသည်ဟု ပင်ကိုအသိစိတ်က ခံစားနေရသည်။

ဤအချက်က အခြားသူများ၏ မျက်နှာအမူအရာကို အနည်းငယ် ပျက်ယွင်းသွားစေ၏။

“အဆင့်မြင့် အင်မော်တယ်လက်နက် ဟုတ်လား။ ဒီကို တည့်တည့်ဝင်လာရဲတာ အံ့ဩစရာမရှိတော့ပါဘူး”

အဆင့်မြင့် အင်မော်တယ်လက်နက်တစ်ခုကို အပြည့်အဝ အသုံးချနိုင်ပါက နက်ရှိုင်းခြင်းအင်မော်တယ်တစ်ဦးအတွက်ပင် အတော်လေး ဒုက္ခများပေလိမ့်မည်။

ထိုအခိုက် နေနီလှေပျံသည် ရပ်တန့်သွားလေသည်။

စတုတ္ထသခင်က နေနီလှေပျံကို မျက်မှောင်ကြုတ်ကြည့်ကာ မထီမဲ့မြင် ပြုံးလိုက်သည်။

“ဟမ့်...အဆင့်မြင့် အင်မော်တယ်လက်နက်ဖြစ်တော့ရော ဘာဖြစ်လဲ။ သူတို့ကို အရှင်ဖမ်းစမ်း။ အစစ်အမှန် အင်မော်တယ် တစ်ယောက်က အဆင့်မြင့် အင်မော်တယ်လက်နက်ကို ကိုင်စွဲနိုင်တယ်ဆိုမှတော့ သူတို့ရဲ့နောက်ခံက မြင့်မားမှာ သေချာတယ်။ အင်အားကြီး အဖွဲ့အစည်းတစ်ခုရဲ့ မျိုးဆက်သစ်တောင် ဖြစ်နိုင်တယ်။ သူတို့ကိုဖမ်းပြီး ပြန်ပေးဆွဲရတာ မဆိုးပါဘူး၊ အပိုဆုကြေးလို့ပဲ သဘောထားလိုက်”

ဤစကားကို ကြားသောအခါ အခြားသူများ၏ မျက်လုံးများမှာ အရောင်တောက်လာကြသည်။

ထိုသို့သော အလုပ်မျိုးကို သူတို့လုပ်ခဲ့သည်မှာ ဤတစ်ကြိမ် ပထမဆုံးအကြိမ် မဟုတ်တော့ပေ။

အင်အားကြီးအဖွဲ့အစည်းတစ်ခု၏ မျိုးဆက်သစ်တစ်ဦးကို ဖမ်းဆီးခြင်းသည် ကြီးမားသော ကြွယ်ဝမှုကို ဆိုလိုပြီး ပြန်ပေးငွေသည် သူတို့ကို အကြိမ်တိုင်းတွင် ချမ်းသာကြွယ်ဝစေခဲ့သည်။

သို့သော်လည်း ထိုသို့သော ပုဂ္ဂိုလ်များနှင့် ရင်ဆိုင်ရပါက စတုတ္ထသခင်ပင်လျှင် ပိုမိုသတိကြီးစွာ ထားရလေသည်။

အကယ်၍ အင်အားကြီးအဖွဲ့အစည်းမှ ပုဂ္ဂိုလ်တစ်ဦး အမှန်တကယ်ဖြစ်နေပါက သူတို့တွင် မရေမတွက်နိုင်သော လျှို့ဝှက်လက်နက်များ ရှိတတ်သည်။ နက်ရှိုင်းခြင်းအင်မော်တယ်အဆင့်နှောင်းပိုင်းဖြစ်သော သူပင်လျှင် ပေါ့ဆ၍ မဖြစ်ဘဲ မြောင်းထဲတွင် သင်္ဘောမှောက်သွားမည့် အဖြစ်ကို မစွန့်စားရဲပေ။

ထိုစဉ်မှာပင် ပုံရိပ်ခြောက်ခုက လျင်မြန်စွာ ပျံထွက်လာကြသည်။

၎င်းမှာ လုရီနှင့် သူ့အဖော်များပင် ဖြစ်ကြသည်။

လုရီနှင့် လျိုနင်ရွှမ်းတို့ လေးယောက်လုံးသည် အင်မော်တယ်နယ်ပယ်သို့ ရောက်ရှိနေကြပြီဖြစ်ရာ ဟင်းလင်းပြင်အာကာသသည် သူတို့အတွက် ဂြိုဟ်တစ်ခု၏ အတွင်းပိုင်းနှင့် ဘာမှမခြားနားတော့ပေ။ ပတ်ဝန်းကျင်က အလွန်အမင်း

မကြမ်းတမ်းသရွေ့ သူတို့ အသက်ရှင်ရပ်တည်နိုင်၏။

ကပ်ဘေးဖြတ်ကျော် ကျင့်ကြံသူ တစ်ဦးဖြစ်သော လိပ်ပြာနီမှာ ကျင့်ကြံမှုအဆင့် မမြင့်မားသော်လည်း ဟင်းလင်းပြင်တွင် အချိန်တိုအတွင်း အသက်ရှင်နိုင်ပါသည်။

သူမသည် ကြယ်လေ ပင်လယ်ဓားပြများအပေါ် အလွန် နက်ရှိုင်းသော အမုန်းတရားများ ထားရှိ၏။ သူတို့သည် သူမ၏ ဇာတိဂြိုဟ်ကို ချုပ်နှောင်ပြီး သူတို့၏ လိပ်ပြာနီမျိုးနွယ်ကို တိရစ္ဆာန်များကဲ့သို့ သဘောထားကာ လူကုန်ကူးခဲ့ကြသည် မဟုတ်ပါလား။

ဤကြယ်လေ ပင်လယ်ဓားပြများ သေဆုံးသွားသည်ကို သူမ၏ မျက်စိဖြင့် ကိုယ်တိုင်မြင်တွေ့လိုခဲ့သည်။

အရင်တစ်ကြိမ်က သူမသည် လှောင်အိမ်ထဲမှနေ၍ မမြင်တွေ့ခဲ့ရသည်မှာ လိပ်ပြာနီအတွက် နောင်တတစ်ခု ဖြစ်ခဲ့ရသည်။ ဤတစ်ကြိမ်တွင် သူမသည် လုရီထံမှ ဤအချက်ကို အတိအလင်း တောင်းဆိုခဲ့၏။

ဤသို့သော တောင်းဆိုချက်ငယ်လေး တစ်ခုကို ဖြည့်ဆည်းပေးရန်မှာ လုရီအတွက် သဘာဝကျသော အရာ ဖြစ်သောကြောင့် သူသည် လိပ်ပြာနီကို အတူ ခေါ်ဆောင်လာခဲ့ခြင်း ဖြစ်ပါသည်။

သူတို့သည် အပြင်သို့ ပျံထွက်လာသော

ကြယ်လေ ပင်လယ်ဓားပြများထံသို့ လျင်မြန်စွာ ချဉ်းကပ်သွားကြသည်။

လုရီနှင့် သူ့အဖော်များ နီးကပ်လာသည်နှင့်အမျှ စတုတ္ထသခင်၏ အကြည့်သည် သူတို့အပေါ်သို့ ကျရောက်သွားပြီး လိပ်ပြာနီကို မြင်လိုက်သောအခါ သူ၏ မျက်နှာပေါ်မှ မထီမဲ့မြင်အပြုံးသည် တဖြည်းဖြည်း ပျောက်ကွယ်သွားကာ သူ၏မျက်နှာအမူအရာမှာ တင်းမာသွားလေတော့၏။

စတုတ္ထသခင်သာမက အခြားသူများမှာလည်း ထိုနည်းတူပင် တုံ့ပြန်ကြသည်။

“ဟို၊ ဟိုတစ်ယောက်က!”

“အဲဒါ ကြယ်နီဂြိုဟ်ရဲ့ မင်းသမီးလေး မဟုတ်ဘူးလား။ သူ့ကို သခင်ကြီးက ဖရိုဖရဲကြယ်တာရာနယ်မြေမှာ ရောင်းဖို့ ခေါ်သွားတာလေ။ သူ ဘယ်လိုလုပ် ဒီကိုရောက်နေတာလဲ”

ကြယ်လေ ပင်လယ်ဓားပြတစ်စုမှာ အလွန်အမင်း အံ့အားသင့်သွားကြပြီး လျှို့ဝှက်အသံလှိုင်းဖြင့် ဆက်သွယ်ပြောဆိုနေကြသည်။

စတုတ္ထသခင်၏ မျက်နှာအမူအရာမှာ တဖြည်းဖြည်း မည်းမှောင်လာပြီး အဝေးမှ တည်ငြိမ်စွာ ချဉ်းကပ်လာသော လုရီ၏အဖွဲ့ကို ကြည့်ရင်း သူ၏ စိတ်မှာ တိုး၍ လေးလံလာသည်။

တစ်ခုခု အလွန်အမင်း မှားယွင်းနေပြီ ဖြစ်ကြောင်း သူ သဘောပေါက်လိုက်သည်။

လိပ်ပြာနီမင်းသမီး ဤနေရာတွင် ရှိနေသည်ဆိုလျှင် သခင်ကြီးဘက်တွင် တစ်ခုခုမှားယွင်းသွားပြီဖြစ်ပြီး ၎င်းသည် ကြီးမားသော အမှားတစ်ခု ဖြစ်ရမည်။

ထိုမျှသာမက၊ နက်ရှိုင်းခြင်း အင်မော်တယ်အဆင့် နှောင်းပိုင်းဖြစ်သော သူ့ကို ရင်ဆိုင်ရသော်လည်း အစစ်အမှန် အင်မော်တယ်

တစ်ယောက်နှင့် ကောင်းကင်ဘုံ အင်မော်တယ်လေးယောက်က အနည်းငယ်မျှပင် ထိတ်လန့်တုန်လှုပ်ခြင်း အရိပ်အယောင် မပြသည်မှာ အလွန်အမင်း ယုတ္တိ မရှိပေ။

စတုတ္ထသခင်သည် သူတို့ထံမှ အနည်းငယ်မျှသော ထိတ်လန့်မှု အရိပ်အယောင်ကိုပင် ရှာဖွေရန် ကြိုးစားခဲ့သော်လည်း အမှန်တကယ်တွင် တစ်စုံတစ်ရာမျှ မရှိခဲ့ပေ။

ထို့ထက်ပို၍ စတုတ္ထသခင်သည် သူတို့၏ မျက်လုံးများထဲတွင် စူးစမ်းအကဲခတ်နေသော အကြည့်ကိုပင် တွေ့လိုက်ရသည်။

ထိုအကြည့်၏ အဓိပ္ပာယ်ကို သူ ကောင်းစွာသိ၏။

သူတို့သည် သူ့ကို မကြောက်ကြသည့်အပြင် သူ့ကို ခြိမ်းခြောက်မှု တစ်ခုအဖြစ်ပင် လုံးဝမမြင်ကြပေ။

ဒါ ဘယ်လိုလုပ် ဖြစ်နိုင်မှာလဲ။