ကောင်းကင်ဓား နည်းစနစ်ကို နားလည်ခြင်း၊ နဂါးစောင့်ရှောက်သူ နှင့် ထပ်မံ တိုက်ခိုက်ခြင်း!

စုရှင်းသည် ခေါင်းကို အနည်းငယ် ခါလိုက်သည်။

နှစ်ပေါင်းထောင်ချီ ကြာသည်အထိ စွမ်းအင်များ ခမ်းခြောက်နေသော ခေတ်ကြီးတွင် ရှင်သန်ခဲ့သည့် ကျင့်ကြံသူ တစ်ဦးကို စုရှင်း မလေးမစား မလုပ်ရဲခဲ့ပါ။

ထိုကဲ့သို့သော ခေတ်တွင် ထိုကဲ့သို့သော အဆင့်အထိ ကျင့်ကြံနိုင်ခြင်းသည် သူတို့၏ ထူးခြားမှုကို ဖော်ပြနေခြင်းပင် ဖြစ်သည်။

"ဘယ်လိုပဲဖြစ်ဖြစ် တိုက်ခိုက်ကြည့်မှပဲ သူ့ကို အနိုင်ရမလားဆိုတာ သိရမှာပဲ"

"တကယ်လို့ ရှုံးခဲ့ရင်လည်း ဆုံးရှုံးစရာ ဘာမှမရှိပါဘူး... အဆိုးဆုံးဆိုမှ စွမ်းအားတိုးတက်အောင် သရုပ်ပြခြင်း အကြိမ် အနည်းငယ် ထပ်လုပ်ရုံပဲပေါ့"

ဤသို့တွေးရင်း စုရှင်၏ အကြည့်သည် သရုပ်ပြခြင်း ဖန်သားပြင်ဘက်သို့ ပြောင်းသွားသည်။

"ခန္ဓာကိုယ် ပေါင်းစည်းခြင်း နယ်ပယ်ကို ရောက်ပြီးတဲ့နောက်မှာ အဆင့်တိုးမြှင့်ရုံတင် မကဘဲ... ကောင်းကင်ဓား အခန်းကို ကျင့်ကြံတာကလည်း ငါ့ရဲ့တိုက်ခိုက်ရေး စွမ်းရည်ကို အမြင့်ဆုံး မြှင့်တင်ပေးနိုင်မှာပဲ"

သုံးပါးသော ဓားစွမ်းရည်ကို အပြည့်အဝ ကျင့်ကြံနိုင်လျှင် ဓားအမတ တစ်ဦး ဖြစ်လာနိုင်သည် ဆိုသည့်အချက်ကို စုရှင်းမမေ့ခဲ့ပါ။

သို့သော် ယခင်က ကြီးမြတ်သော လမ်းစဉ်အပေါ် နားလည်နိုင်စွမ်း မလုံလောက်ခဲ့သည့် အတွက် သုံးပါးသော ဓာစွမ်းရည်၏ နောက်ဆုံးအခန်း ဖြစ်သော ကောင်းကင်ဓား အခန်းကို ကျင့်ကြံနိုင်ခြင်း မရှိခဲ့ပါ။

ယခု ခန္ဓာကိုယ် ပေါင်းစည်းခြင်း အဆင့်သို့ ရောက်ပြီးနောက်တွင် ကောင်းကင်နှင့် သဘာဝစွမ်းအားများကို နားလည်နိုင်စွမ်းသည် များစွာ တိုးတက်လာခဲ့သည့် အတွက် ကောင်းကင်ဓား အခန်းကို စတင် ကျင့်ကြံနိုင်ခြင်းသည် သဘာဝကျပါသည်။

[ဝိညာဉ်စိုက်ခင်းဂူထဲတွင် သင်သည် သရုပ်ပြခြင်း တစ်ခုထဲတွင် ရောက်နေကြောင်း သတိပြုမိသည်]

[နောက် ဆယ်ရက်တာ ကာလအတွင်း သင်သည် ဝိညာဉ်စိုက်ခင်းဂူထဲတွင်သာ နေပြီး ကြီးမြတ်သော ဉာဏ်ပညာ အခြေအနေ၏ စွမ်းအင်များကို စုဆောင်းသည်]

[ဆယ်ရက်အကြာတွင် သင်သည် လောထျန်း အစည်းအဝေးသို့ ထွက်ခွာသည်]

လက်တွေ့ဘဝတွင် ထိုအချက်ကို မြင်သည့်အခါ စုရှင်းသည် ခေါင်းညိတ်ကာ တီးတိုးရေရွတ်သည် -

"မဆိုးဘူး... အခု ငါက ခန္ဓာကိုယ် ပေါင်းစည်းခြင်း အဆင့်ကို ရောက်နေပြီဆိုတော့ မီးလျှံတစ်ထောင် နည်းစနစ်နဲ့ ဆက်လက်ကျင့်ကြံဖို့ လမ်း မရှိတော့ဘူး... ကောင်းကင် နည်းစနစ်ဖြစ်တဲ့ မီးလျှံတစ်သောင်း နည်းစနစ်ကို ကျင့်ကြံမှသာ ငါ့ရဲ့အဆင့်ကို ဆက်လက် မြှင့်တင်နိုင်မှာ"

"ပြီးတော့ ငါက မီလျှံတစ်သောင်း နည်းစနစ်ရဲ့ တစ်ဝက်ကျော်ကို မှတ်မိပြီးသား ဆိုတော့... ဒီ သရုပ်ပြခြင်း ပြီးသွားရင် ဒီ ကောင်းကင်အဆင့် နည်းစနစ်ကို လုံးဝ နားလည်နိုင်မယ်လို့ ထင်တယ်"

စုရှင်း တွေးနေသည်။

ကောင်းကင်အဆင့် နည်းစနစ် ဖြစ်သော မီးလျှံတစ်သောင်း နည်းစနစ်အား အမတ နယ်ပယ်အထိ ကျင့်ကြံနိုင်သည့် အတွက် စုရှင်းအနေနှင့် အနာဂတ်တွင် အဆင့်တက်ရန် လမ်းမရှိမည်ကို စိုးရိမ်နေစရာ မလိုတော့ပါ။

"မြှုပ်နှံသရုပ်ပြခြင်း လုပ်ဆောင်ချက်ကို သုံးမယ်၊ အချိန် ၂၄ နာရီ!"

[သင်သည် မြှုပ်နှံသရုပ်ပြခြင်းကို အောင်မြင်စွာ အသုံးပြုလိုက်သည်... ကျန်ရှိသောစွမ်းအင် - ၁ ဘီလီယံ ၇၆၂ သန်း ၄၃၀,၀၀၀ မှတ်]

သရုပ်ပြစက်၏ အချက်ပေးသံ ပြီးဆုံးပြီးနောက် စုရှင်း၏ အမြင်အာရုံသည် ပြောင်းလဲသွားပြီး လောထျန်းညီလာခံ၏ အဓိက ခန်းမဆောင်တွင် ပေါ်လာသည်။

…

ရင်းနှီးပြီးသား အလုပ်များကို ပြီးစီးပြီးတဲ့နောက် စုရှင်းသည် အချိန်သိပ်မကုန်စေဘဲ ကျမ်းစာတိုက်၏ ပဉ္စမထပ်သို့ တန်းသွားကာ ကောင်းကင်အဆင့် နည်းစနစ်ဖြစ်သော မီးလျှံတစ်သောင်း နည်းစနစ်ကို စတင် မှတ်သားသည်။

မကြာမီမှာပင် မြှုပ်နှံသရုပ်ပြခြင်း ပြီးဆုံးသွားပြီး စုရှင်းသည် လက်တွေ့ကမ္ဘာသို့ ပြန်လာသည်။

"မဆိုးဘူး၊ ငါ မီးလျှံတစ်သောင်း နည်းစနစ် အများစုကို မှတ်မိပြီးပြီ... နောက်ထပ် မြှုပ်နှံသရုပ်ပြခြင်း တစ်ခု လုပ်လိုက်ရင် ဒီ နည်းစနစ်ကို လုံးဝ မှတ်မိသွားလိမ့်မယ်"

စုရှင်းသည် ကျေနပ်စွာ ခေါင်းညိတ်လိုက်သည်။ ထို့နောက် သူ့အကြည့်သည် သရုပ်ပြခြင်း ဖန်သားဘက်သို့ ထပ်မံ ပြောင်းသွားသည်။

[လောထျန်းညီလာခံမှ ထွက်ခွာပြီးနောက် သင်သည် ဝိညာဉ်စိုက်ခင်းဂူသို့ ပြန်လာပြီး သုံးပါးသော ဓားစွမ်းရည်၏ ကောင်းကင်ဓား အခန်းကို ကျင့်ကြံရန် စတင် ကြိုးစားသည်]

[ရက်အနည်းငယ် ကျင့်ကြံပြီးနောက် သင်သည် ချိန်းဆိုထားသည့် အတိုင်း လောရွှေရင်နှင့် တွေ့ဆုံပြီး သူမ၏ လမ်းညွှန်မှုအောက်တွင် ဆင်းသက်ဂိုဏ်းသို့ ဝင်ရောက်ခဲ့သည်]

[ဆင်းသက်ဂိုဏ်းသို့ ဝင်ရောက်ပြီးနောက် သင်၏ အောင်မြင်မှုသခင် စွမ်းရည်ကြောင့် သင်သည် နောက်လိုက်များစွာကို အလျင်အမြန် ဆွဲဆောင်နိုင်ခဲ့သည်]

[သင်သည် သဘာဝအဖွဲ့၏ စောင့်ရှောက်သူ တစ်ဦး ဖြစ်လာပြီး သင်၏ နေ့စဉ် ဆေးဖော်စပ်ခြင်း လုပ်ငန်းကို စတင် လုပ်ဆောင်သည်]

[နေ့စဉ် ဆေးများ ဖော်စပ်ခြင်းအပြင် သင်သည် လောရွှေရင်ကိုလည်း သူမ၏စွမ်းအား မြှင့်တင်နိုင်ရန် အတွက် အချို့သော ဆေးများကို ပေးခဲ့သည်]

[ဒုတိယနှစ်တွင် သင်သည် လောထျန်းညီလာခံသို့ ထပ်မံ သွားရောက်သည်]

"မြှုပ်နှံသရုပ်ပြခြင်းကို သုံးမယ်..."

[သင်သည် မြှုပ်နှံသရုပ်ပြခြင်းကို အောင်မြင်စွာ အသုံးပြုလိုက်သည်၊ ကျန်ရှိသောစွမ်းအင် - ၁ ဘီလီယံ ၇၆၀ သန်း ၃၀၀,၀၀၀ မှတ်]

…

မကြာမီမှာပင် မြှုပ်နှံသရုပ်ပြခြင်း အချိန် ပြီးဆုံးသွားသည်။ လက်တွေ့ဘဝတွင်မူ စက္ကန့်အနည်းငယ်သာ ကုန်ဆုံးခဲ့သည်။

စုရှင်းသည် ဝိညာဉ်စိုက်ခင်းဂူသို့ ပြန်ရောက်လာသည်။ သူ့မျက်နှာပေါ်တွင် ကျေနပ်သော အမူအရာ ပေါ်နေသည် -

"မဆိုးဘူး! ငါ မီးလျှံတစ်သောင်း နည်းစနစ် တစ်ခုလုံးကို အပြည့်အဝ မှတ်မိသွားပြီ..."

"နောက်တစ်ဆင့်ကတော့ ကောင်းကင်အဆင့် နည်းစနစ်ကို ကျင့်ကြံဖို့ ပြောင်းလိုက်ရုံပဲ၊ အဲဒါဆို ခန္ဓာကိုယ် ပေါင်းစည်းခြင်း အဆင့်မှာ ငါ့ရဲ့အဆင့်ကို မြှင့်တင်နိုင်ပြီ"

စုရှင်းသည် သူ၏မေးစေ့ကို ပွတ်သပ်လိုက်သည်။

တစ္ဆေအဘွား၏ ယခင် ရှင်းပြချက်အရ မီလျှံတစ်ထောင် နည်းစနစ်နှင့် မီးလျှံတစ်သောင်း နည်းစနစ်သည် တိုက်ရိုက် ဆက်စပ်နေသည်။

မီးလျှံတစ်သောင်း နည်းစနစ်ကို ပြောင်းလဲကျင့်ကြံခြင်းသည် စုရှင်း အတွက် အများကြီး လွယ်ကူစေပြီး အချိန်လည်း သိပ်မကုန်ပါ။

သူ၏အကြည့်သည် သရုပ်ပြခြင်း ဖန်သားပြင်ဘက်သို့ ပြောင်းသွားသည် -

[လောထျန်းညီလာခံမှ ထွက်ခွာပြီးနောက် သင်သည် ဆင်းသက်ဂိုဏ်းသို့ ပြန်လာသည်]

[ထို့နောက်တွင် သင်သည် နေ့စဉ် ဆေးဖော်ခြင်းနှင့် ကောင်းကင်ဓား နည်းစနစ်အား နားလည်အောင် ကြိုးစားခြင်းတို့ကို ဆက်လက် လုပ်ဆောင်သည်]

[ထိုသို့ဖြင့် နောက်ထပ်တစ်နှစ် ကုန်ဆုံးသွားသည်]

[တတိယနှစ်တွင် သင်သည် ဆေးလုံးပေါင်း နှစ်သိန်းကျော် စုဆောင်းထားခဲ့သည်၊ သို့သော် သင်သည် ဆင်းသက်ဂိုဏ်းမှ ထွက်ခွာရန် အစီအစဉ်မရှိခဲ့ပါ။ လျှို့ဝှက်အလုပ်များကို ဆက်လက် လုပ်ဆောင်ရန်သာ ရည်ရွယ်သည်]

[သင်သည် ဆင်းသက်ဂိုဏ်းမှ လျှို့ဝှက်ထွက်ခွာပြီး သင့်ကိုယ်ပိုင် အရှိန်အဝါများကို ဖုံးကွယ်၍ လွန်ခဲ့သည့် နှစ်နှစ်အတွင်း သင်ဖော်စပ်ခဲ့သော ဆေးလုံးများကို လုယွမ်ဝူထံသို့ ပေးအပ်သည်]

[ထို့နောက်တွင် သင်သည် မည်သူ့၏ အာရုံစိုက်ခြင်းကိုမှ မခံရဘဲ ဆင်းသက်ဂိုဏ်း၏ အဓိက ဌာနချုပ်သို့ ယုံကြည်မှုရှိစွာ ပြန်လာသည်]

[နောက်ပိုင်းရက်များတွင် သင်သည် သင်၏ အရှိန်အဝါကို တိုးမြှင့်ရင်း ကျင့်ကြံမှုကို ဆက်လက် လုပ်ဆောင်သည်]

[ကောင်းကင်ဓား အခန်းကို ကျင့်ကြံခြင်းသည် သင် ထင်ထားသည်ထက် ပိုမိုခက်ခဲသည်]

[၎င်း၏ နိဒါန်းတွင် ကောင်းကင်ဓား အခန်းသည် သာမန် ဓားပညာ မဟုတ်ကြောင်း ရှင်းပြထားသည်... ဓားပညာတွင် ထူးချွန်သော ပါရမီရှင်များပင်လျှင် ယင်းကို နားလည်နိုင်ရန် နှစ်တစ်ရာ အချိန်ယူရမည်]

[သို့သော် မွေးရာပါ ဓားကိုယ်ခန္ဓာ ရှိသော သင့်လို လူတစ်ယောက် အတွက် "ထူးချွန်သော" ဟူသည့် စကားလုံးသည်ပင် နည်းပါးလွန်းသည်]

[ကောင်းကင်ဓား ပညာရပ်များကို နေ့စဉ် နားလည်အောင် ကြိုးစားရင်း သင်၏ဓားပညာသည် အလျင်အမြန် တိုးတက်လာသည်]

[စတုတ္ထနှစ်တွင် ဆင်းသက်ဂိုဏ်း အတွင်း သင်၏နာမည်မှာ အကြီးအကျယ် ကျော်ကြားလာသည်၊ ထောင်နှင့်ချီသော ဂိုဏ်းဝင်များ၏ ထက်ဝက်ကျော်က သင့်၏နောက်လိုက်များ ဖြစ်လာရန် မျှော်လင့်ကြသည်]

[အချို့သော ဂိုဏ်းဝင်များသည် သင့်အား တယူသန်အဖွဲ့၏ ခေါင်းဆောင် ဖြစ်လာစေရန် သို့မဟုတ် ဂိုဏ်းအသစ်တစ်ခု တည်ထောင်ရန်အတွက် တိတ်တဆိတ် ဆွေးနွေးကြသည်]

[သင်သည် ထိုသို့သော ဆွေးနွေးမှုများကို မတားမြစ်ခဲ့သလို တုံ့ပြန်ခြင်းလည်း မပြုလုပ်ခဲ့ပါ]

[သင်သည် ဤကောလာဟလများကို ထပ်မံ၍ ပျံ့နှံ့စေပြီး အရေးပါသော ရည်ရွယ်ချက် အတွက် အသုံးပြုနိုင်မည့် အချိန်ကို စောင့်နေသည်]

[ထို့ကြောင့် သင်သည် ကောင်းကင်ဓား အခန်းကို နားလည်အောင် ဆက်လက် ကြိုးစားသည်၊ ထိုသို့ဖြင့် နောက်ထပ် နှစ်နှစ် ကုန်ဆုံးသွားသည်]

[ဆဋ္ဌမနှစ်တွင် ကောင်းကင်ဓား ပညာရပ်များကို ဆက်တိုက် နားလည်အောင် ကြိုးစားရင်း သင်သည် သုံးပါးသော ဓားစွမ်းရည် နည်းစနစ်၏ လျှို့ဝှက်ချက်များကို တဖြည်းဖြည်း ဖွင့်ဟနိုင်ခဲ့သည်]

[မြေဓားအခန်းတွင် ကောင်းကင်နှင့် မြေကြီး၏ စွမ်းအားများကို အစောပိုင်း ကျွမ်းကျင်ပိုင်နိုင်မှု ပါဝင်ပြီး ယင်းစွမ်းအားများကို အသုံးပြုကာ မိမိကိုယ်ကိုယ် စွမ်းအင်မြှင့်တင်ပြီး မူလစွမ်းအားကို ရှာဖွေနိုင်သည်]

…