မြေပေါ်ကမ္ဘာ မြို့တော် တည်ဆောက်ခြင်း

ရှားလော့ခ်၏ ဗားရှင်း ၀.၃ အပ်ဒိတ်ဖြည့်စွက်ချက် ထုတ်ပြန်ပြီးနောက် ထက်သန်သော တုံ့ပြန်မှုများကို ရရှိခဲ့သည်။

[အိပ်မက်ကမ္ဘာစစ်ဘုရင်: ငါက ဂိုဘလင် မျက်နှာနဲ့ အက်လ်ဖ် တစ်ယောက် ဖန်တီးနေတယ် ဟီးဟီး။]

[ဂျမ် ဘာဒေးလ်: ငါက လူသားတစ်ယောက်ကို ရွေးလိုက်တယ်။ ဒီသာမန်နေ့လေးမှာ ငါက သာမန်ဖိနပ်ကို စီးပြီး သာမန်လမ်းမပေါ်မှာ လျှောက်လှမ်းနေတယ်။]

[သန်းခေါင်ယံအညှောက်များ: မင်း မျက်စိကန်းနေတာလား။ ငါက နတ်သက်ကြွေ ကောင်းကင်တမန်ကို ကြိုက်တာ။ တတိယဘီတာ စမ်းသပ်မှု အရည်အချင်း အတွက် တောင်းပန်နေပါတယ်ဗျို့။ ငါ မြေပေါ်လောကမှာ ရှားလီကို ခုတ်သတ်ပစ်မယ်။]

[ကေး_၀၆၀၁: အသစ် ထပ်တိုးလာတဲ့ စုံစမ်းစစ်ဆေးရေး မစ်ရှင် - ဗစ်တိုးရီးယားရဲ့ လျှို့ဝှက်ချက်။]

[ငါ့ ဘဝရဲ့ နက်ရှိုင်းဆုံး အဆုံးမှာ မင်းနဲ့ တွေ့ဆုံခြင်း: ထာဝရခွေးတွေ၊ လူမျိုးစုဝက်တွေ (ကိုယ်တိုင်ရေးဟာသ)။]

...

"အရှင်ရှားလော့ခ်။ မြေပေါ်လောကရဲ့ ချမ်းသာကြွယ်ဝမှုကို ရယူလိုတဲ့ အရှင့်ရဲ့ ရည်မှန်းချက်ကို ကျွန်တော် နားလည်ပါတယ်။ ဒါပေမဲ့ မြေပေါ်လောက စခန်း တစ်ခု ဖန်တီးဖို့ အရှင် အရမ်း စိတ်လောနေတာ မဟုတ်ဘူးလား။ မြေပေါ်လောကမှာ မတူညီတဲ့ နိုင်ငံတွေ အများကြီး ရှိပြီး အမြဲတမ်း ကမောက်ကမ ဖြစ်နေတတ်တယ်၊ ဒါပေမဲ့ သမိုင်းက သက်သေပြခဲ့ တာကတော့ မြေအောက်လောက မျိုးနွယ်စုတွေ ပေါ်လာတာနဲ့ သူတို့ စည်းလုံးပြီး တိုက်ခိုက်ကြလိမ့်မယ် ဆိုတာပါပဲ။ အရှင့်မှာ ပုံတူပွား အဖိုးတန်ပုလဲ ရှိနေပေမဲ့ အစီအစဉ် မအောင်မြင်ခဲ့ရင် သူတို့ မြေအောက်လောက,ကို တိုက်ခိုက်ပြီး ဒန်ဂျင်အမြုတေကို ဖျက်ဆီးပစ်ပါလိမ့်မယ်။ ဆုံးရှုံးမှုတွေက အကြီးအကျယ် ဖြစ်ပါလိမ့်မယ်။"

ဘရုက လေးနက်စွာ အကြံပြုသည်။ "ကျွန်တော်တို့ အင်အား စုဆောင်းပြီး မြေပေါ်လောက,ကို တိုက်ခိုက်သင့်တယ်လို့ အကြံပြုပါတယ်။ မိုက်ကယ်အိန်ဂျယ်လိုရဲ့ အရင် သိမ်းပိုက်မှုက အစီအစဉ်ကောင်း တစ်ခု ဖြစ်ခဲ့ပါတယ်။ မြေအောက်လောက,ကို သိမ်းပိုက်တာက နည်းလမ်းမှန်ပါပဲ။ ကျွန်တော်တို့ ဆောင်းတောင်ကုန်း မြို့ကနေ မစသင့်ဘူးလား။"

ရှားလော့ခ်က ဖိုရမ်ပေါ်မှ ဂိမ်းမာများ၏ တုံ့ပြန်မှုများကို ကြည့်ရှုနေစဉ် ဘရုက မြေအောက်လောက,ကို သိမ်းပိုက်ရန် အကြံ ပြုနေခဲ့သည်။

ရှားလော့ခ်သည် ဘရုကို တုံ့ပြန်ခြင်း မပြုခဲ့ပေ။ ဂိမ်းမာများ၏ တုံ့ပြန်မှုများကို ဖတ်ရှုပြီးနောက် သူသည် ကြက်ဥခေါင်း၏ ဦးခေါင်းကို ပုတ်လိုက်သည်။ ကြက်ဥခေါင်းသည် ရှားလော့ခ်၏ နောက်တွင် ကွန်ပျူတာ ဂိမ်းများကို အာရုံ စူးစိုက်စွာ ကစားနေခဲ့ပြီး "ငါ့ကို မနှောင့်ယှက်နဲ့။" ဟု ပြန်ပြောလိုက်သည်။

နောက်တစ်ခဏတွင် ရှားလော့ခ်သည် ကြက်ဥခေါင်း၏ တောင်ပံများကို ဆွဲကိုင်လိုက်ရာ သူ၏ လက်သည်းများသည် မောက်စ်ကို ဆုပ်ကိုင်ထားဆဲ ဖြစ်သည်။ ကွန်ပျူတာ မျက်နှာပြင်ပေါ်တွင် မြက်ပင်များ အကြားတွင် ပုန်းအောင်းနေသော တိုင်ရန်နိုဆောရတ်စ် အငယ်စား တစ်ကောင်ကို ရင်ဆိုင်နေသည့် ယူတာရက်ပ်တာ ဒိုင်နိုဆော တစ်ကောင်ကို ပြသနေခဲ့သည်။

ထိုဂိမ်း၏ အမည်မှာ "ကျွန်း" ဖြစ်ပြီး ဒိုင်နိုဆောများကို ဂိမ်းဇာတ်ကောင်များ အဖြစ် အသုံးပြုထားသော အွန်လိုင်းဂိမ်း တစ်ခု ဖြစ်သည်။ ရှားလော့ခ်သည် ထိုသို့သော ဂိမ်းမျိုးကို စိတ်ဝင်စားခြင်း မရှိချေ။

"မင်း မြေပေါ်လောက,ကို သွားချင်လား။" ရှားလော့ခ်က ကြက်ဥခေါင်းကို ဆွဲကိုင်ရင်း အပြင်သို့ လျှောက်သွားရင်း မေးလိုက်သည်။

"အဲဒီ တိုင်ရန်နိုဆောရတ်စ် အငယ်စားကို ကျွန်တော် စားပြီးတဲ့ အထိ စောင့်ပေးလို့ မရဘူးလား။ ကျွန်တော် စကစားကတည်းက အဲဒါ အော်နေတာ။" ကြက်ဥခေါင်းသည် သူ၏ မောက်စ်ကို ဖက်တွယ်ရင်း အလေးအနက် တောင်းပန်နေခဲ့သည်။

"မရဘူး။"

အရှင်ရှားလော့ခ်သည် စိတ်ခံစားချက် ကင်းမဲ့နေခဲ့သည်။

...

"ဘီးတယ်လ်မွန်ပေါ် တက်ကြ။"

ဆောင်းတောင်ကုန်းမြို့ တပ်စောင့်စခန်း အပြင်ဘက်တွင် လက်နက်ကိုင် အော့ခ် အနည်းငယ်သည် စိတ်ဓာတ်ကျနေသော အန်ဒရူးကို အပြင်ဘက်တွင် ရပ်ထားသော ဘီးတယ်လ်မွန် တစ်စီး အပေါ်သို့ တင်ဆောင်ရန် ပြင်ဆင် နေကြသည်။

အန်ဒရူး၏ လက်များကို မှော်အက္ခရာ မာနာ သုံးလွှာဖြင့် လက်ထိပ်ခတ်ထားသည်။ သူ၏ မျက်လုံးများသည် နီရဲနေပြီး စိတ်တို ဒေါသထွက်မှုများဖြင့် ပြည့်နှက်နေသော်လည်း လက်ထိပ်များက သူ၏ အစွမ်းကို ပိတ်ဆို့ထားသည်။ သူသည် အထက်တန်းစား နတ်ဆိုးတစ်ဦး ဖြစ်လင့်ကစား ခုခံနိုင်စွမ်း မရှိခဲ့ချေ။

အော့ခ်များက အန်ဒရူးကို ရှေ့သို့ တွန်းပို့လိုက်စဉ် ဘာရွန်နီကိုလပ်စ်သည် ဘီးတယ်လ်မွန်ဘေးတွင် ရပ်နေခဲ့သည်။ သူသည် အန်ဒရူးကို စောင့်မျှော်နေခဲ့သည်။

"ဟားဟား... နီကိုလပ်စ်၊ မင်း ငါ့ကို လှောင်ပြောင်ဖို့ လာတာလား။ မာနမကြီးနဲ့၊ ထာဝရမီးလျှံက ငါ့ကို စွန့်ပစ်မှာ မဟုတ်ဘူး။ မင်းတို့ စွပ်စွဲချက်တွေ အားလုံးက အသရေဖျက်မှုတွေ ချည်းပဲ။ မင်းတို့ တန်ရာတန်ကြေး ပြန်ပေးဆပ်ရလိမ့်မယ်။ ကုန်သည်မဟာမိတ်အဖွဲ့၊ ရှားလော့ခ်၊ ပြီးတော့ မင်းတို့ အားလုံး တန်ရာတန်ကြေး ပေးဆပ်ရလိမ့်မယ်ကွ။"

အန်ဒရူးသည် စုတ်ပြတ်သတ်နေသော မျက်နှာဖြင့် ရက်စက်စွာ ဆဲဆိုကြိမ်းမောင်း နေခဲ့သည်။

"တကယ်လား။ ငါတော့ အဲဒီလို မထင်ဘူး။ မင်း ဘဝရဲ့ ကျန်ရှိတဲ့ အချိန်တွေကို နောင်တတရားနဲ့ ကုန်ဆုံးရလိမ့်မယ်။ အဲဒါတော့ ငါ သေချာတယ်။"

နီကိုလပ်စ်သည် သူ၏ ခေါင်းကို မော့လိုက်ပြီး "ငါက အခု ဆောင်းတောင်ကုန်းမြို့ရဲ့ ဒန်ဂျင်အရှင်ပဲ။ ခန့်အပ်လွှာ စာရွက်စာတမ်းတွေ မကြာခင် ရောက်လာတော့မှာ၊ ဒါကြောင့် ဆောင်းတောင်ကုန်းမြို့ အတွက် မင်း စိတ်ပူစရာ မလိုတော့ဘူး။ သူ့ကို ခေါ်သွားကြတော့။"ဟု ဆိုလိုက်သည်။

အော့ခ်များသည် အန်ဒရူးကို ဘီးတယ်လ်မွန်ဆီသို့ ဆွဲခေါ် သွားကြသည်။

"ငါ ပြန်လာခဲ့မယ်။ ငါ၊ အန်ဒရူး၊ သေချာပေါက် ပြန်လာခဲ့မယ်။"

အန်ဒရူးသည် နာကျင်စွာ ရုန်းကန်နေသော်လည်း အော့ခ်များက သူ့ကို ဆွဲခေါ် သွားကြသည်။

သတ္တုတံခါးကို တင်းကျပ်စွာ ပိတ်လိုက်သည်။ အန်ဒရူးသည် သတ္တုလှောင်အိမ်ထဲတွင် ထိုင်နေခဲ့သည်။ မုန်းတီးမှုများဖြင့် ပြည့်နှက်နေသော သူ၏ မျက်လုံးများသည် တဖြည်းဖြည်း မှေးမှိန် ပျောက်ကွယ်သွားတော့သည်...

...

မှောင်မိုက်သော ကောင်းကင်ယံတွင် အနီရောင်လနှင့် အဖြူရောင်လ တို့သည် ဆန့်ကျင်ဘက် ထောင့်များတွင် နေရာယူထားကြသည်။

ညလေပြေသည် သစ်ပင်ထိပ်ဖျားများကို ပွတ်တိုက် ဖြတ်သန်း သွားပြီး လေချွန်သံများ ထွက်ပေါ်စေသည်။

မီးခိုးရောင် လေကာအင်္ကျီ ဝတ်ဆင်ထားသော လူသား တစ်ဦးသည် ၁.၅ မီတာမြင့်သော အနက်ရောင် ကောင်လေးတစ်ယောက်ကို ဆွဲခေါ်ကာ မှောင်မိုက်သော တောအုပ်ထဲတွင် လျှောက်လှမ်း နေခဲ့သည်။

ထိုလူသားမှာ လူသားပုံစံ ဖန်ဆင်းထားသော ရှားလော့ခ် ဖြစ်သည်။ သူ၏ အရပ်အမောင်းနှင့် ရုပ်ရည်မှာ သာမန်လူသားတစ်ဦးနှင့် တူညီသည်။ အနက်ရောင် ဆေးရည်အထဲမှ ဆွဲထုတ် ခံထားရသည့်အလား မဲနက်သော ပုံပန်းသဏ္ဌာန် ရှိသော ကလေးငယ်မှာ ကြက်ဥခေါင်း ဖြစ်သည်။

"ငါတို့ ဒီမှာ ဘာလုပ်နေကြတာလဲ။"

ကြက်ဥခေါင်းသည် စိတ်ရှုပ်ထွေးနေခဲ့သည်။ ရှားလော့ခ်က သူ့ကို ရှည်လျားသော ဥမင်လှိုဏ်ခေါင်းများ ဖြတ်သန်းစေပြီး၊ နေရာရွှေ့ပြောင်း ဝင်ပေါက်ကို ဖြတ်၍ အန္တရာယ် များသော မြေပေါ်လောကသို့ အဘယ်ကြောင့် ခေါ်ဆောင် လာသည်ကို သူ နားမလည်ခဲ့ချေ။ ကြက်ဥခေါင်းသည် စိတ်ရှုပ်ထွေး နေခဲ့သည်။ အထက်တန်းစား နတ်ဆိုးတစ်ဦးနှင့် နဂါးနက်တစ်ကောင် မြေပေါ်လောကတွင် ပေါ်လာပါက မဟာမှော်အရှင် အုပ်စုကြီးကို ဆွဲဆောင်မိမည် မဟုတ်ပါလော။

"မင်း အလုပ်က တည်ငြိမ်တဲ့ ဒန်ဂျင်အမြုတေ တစ်ခု ဖန်တီးပေးဖို့ပဲ။" ရှားလော့ခ်က ကြက်ဥခေါင်းကို ပြောပြီး တောအုပ်ထဲတွင် ပုလဲဖြူ တစ်လုံးကို ချထားလိုက်သည်။

ရှားလော့ခ်သည် ထို့နောက် ကြီးမားသော မှော်အက္ခရာ မာနာပုံစံကွက် စက်ဝိုင်း တစ်ခုကို ဖန်တီးလိုက်ပြီး "ဒီမှော်အက္ခရာ ပုံစံကွက်တွေကို မင်း မြင်လား။ မင်းရဲ့ မာနာကို ဒီနေရာကို လွှဲပြောင်းပေးလိုက်။ မင်း မောရင် နားလိုက်။ မှော်အက္ခရာ ပုံစံကွက်တွေ အားလုံး အသက်ဝင်သွားရင် မင်း မစ်ရှင် ပြီးဆုံးပြီ။ အဲဒီအချိန်ထိ ငါ မပြန်လာသေးရင် ဒီမှာပဲ ငါ့ကို စောင့်နေ။ တောအုပ်ထဲမှာ ပိုးတီကောင်တွေ အများကြီး ရှိတယ်။ မင်း ဗိုက်ဆာရင် ကိုယ့်ဘာသာကိုယ် နည်းနည်း ဖမ်းစားလိုက်။ ဘေးမှာ ရေမြောင်း တစ်ခု ရှိတယ်။ အဲဒီမှာ မင်းရဲ့ ရေငတ်ပြေအောင် သောက်လိုက်။"ဟု ဆိုသည်။

ရှားလော့ခ်သည် ကြက်ဥခေါင်းအား ပိုးတီကောင်များ ဖမ်းရန် အစိမ်းရောင် ပိုက်ကွန် တစ်ခု ပေးလိုက်သည်။

ကြက်ဥခေါင်းသည် သူ၏ လက်ထဲမှ အစိမ်းရောင် ပိုက်ကွန်ကို ကြည့်လိုက်ပြီးနောက် ရှားလော့ခ်ကို ကြည့်လိုက်သည်။ သူ ပါးစပ်အဟောင်းသား ဖြစ်သွားသော်လည်း စကားတစ်ခွန်းမှ မပြောခဲ့ချေ။ သူ၏ မျက်လုံးများမှာ မယုံကြည်နိုင်ခြင်းများဖြင့် ပြည့်နှက် နေခဲ့သည်။ သူ၏ အမူအရာ အတွက် အကြမ်းဖျင်း ဘာသာပြန်ဆိုချက်မှာ— "ငါက အမှောင်ဘုရင်၊ နတ်ဆိုးမီးလျှံ နဂါးကွ။ မင်းက ငါ့ကို ဒီအန္တရာယ်များတဲ့ နေရာမှာ ညသန်းခေါင်ယံကြီး ဒီလိုအလုပ်မျိုး လုပ်ခိုင်းနေတာလား။ ပြီးတော့ စားစရာ သောက်စရာလည်း မရှိဘူးပေါ့လေ။"

"မင်းရဲ့ စွမ်းဆောင်ရည် ကောင်းမွန်ရင် မင်းရဲ့ ဂိမ်းကစားချိန်ကို တစ်နာရီ တိုးပေးမယ်။ တစ်လလုံး အတွက်။" ရှားလော့ခ်က သူ၏ လက်ညှိုးကို ထောင်ပြရင်း ဆိုလိုက်သည်။

"စိတ်မပူပါနဲ့ အရှင်ရှားလော့ခ်၊ ဒါက ကျွန်တော့်အလုပ်ပဲ။" ကြက်ဥခေါင်းက လေးနက်စွာ ဆိုလိုက်သည်။

ရှားလော့ခ်သည် ခေါင်းညိတ်ကာ တောအုပ်ထဲမှ ထွက်ခွာ သွားသည်။ ကြက်ဥခေါင်းက "အရှင်ရှားလော့ခ်၊ အရှင် ဘယ်သွား မလို့လဲ။"ဟု မေးလိုက်သည်။

"လူစုဆောင်းဖို့။" ရှားလော့ခ်က ဆိုလိုက်သည်။