ကောင်ကင်ဂိတ်တံခါးပွင့်ရန် နှစ်လအလို....

Vol. 38 Ch. 581

" ကောင်းကင်ဂိတ်တံခါး ပွင့်တော့မယ်မဟုတ်လား။ " နတ်ဘုရင်က မျက်လုံးများဖွင့်ပြီး တည်ငြိမ်စွာပြောလိုက်သည်။

" ဒိုင်မန်ရှင်းနှစ်ခုကမ္ဘာရဲ့ အချိန်အရ ကောင်းကင်ဂိတ်တံခါးပွင့်ဖို့ နှစ်လလိုပါသေးတယ်။ " ကမ်းစပ်ရှိခေါင်းဆောင်က ပြောလိုက်သည်။

ကောင်းကင်ဂိတ်တံခါးက နှစ်ပေါင်း တစ်သောင်းလျှင် တစ်ကြိမ်ဖွင့်လှစ်ပြီး ၎င်းက ဒိုင်မန်ရှင်းနှစ်ခုကမ္ဘာ၏ အခမ်းနားဆုံး အချိန်ဖြစ်လေသည်။ မရေတွက်နိုင်သော အင်အားကြီးသူများက ၎င်းကို သွားရောက်ကြည့်ရှုကြမည်ဖြစ်သည်။

ပင်မစကြာဝဠာမှ သက်ရှိများ ကျရောက်မလာမီ စုန်းဧကရာဇ်အဆင့်ရှိသူများသာ ယှဉ်ပြိုင်ရန် အရည်အချင်းပြည့်မီပြီး စုန်းဘိုးဘေးအဆင့်ရှိသူများသာ ကောင်းကင်ဂိတ်တံခါးသို့ ရောက်နိုင်လေသည်။ ယခု မျိုးနွယ်အမျိုးမျိုးမှ အင်အားကြီးသူများကြောင့် အကန့်အသတ်က များစွာ မြင့်မားသွားပြီဖြစ်သည်။

" ကောင်းပြီ။ ငါတို့ တစ်ရက်အတွင်း ကောင်းကင်တောင်ကို ထွက်ခွာမယ်။ " နတ်ဘုရင်က ဖြည်းညင်းစွာ ပြောလိုက်သည်။

ကောင်းကင်တောင်က ဒိုင်မန်ရှင်းနှစ်ခုကမ္ဘာ၏ အမြင့်ဆုံးတောင်ဖြစ်ပြီး ကောင်းကင်ဂိတ်တံခါးက ကောင်းကင်တောင်၏ ထိပ်တွင် ပေါ်လာမည်ဖြစ်သည်။

" နတ်ဘုရင် ကျွန်တော်တို့..." ခေါင်းဆောင်က တုန့်ဆိုင်းသွား၏။

" စိတ်မပူနဲ့။ မင်းတို့က ဒီဒိုင်မန်ရှင်းနှစ်ခုကမ္ဘာမှာ ငါ့ကို ကူညီပေးခဲ့တယ်။ ငါထွက်သွားနိုင်ရင် ကြီးမြတ်သူတစ်ယောက်ကို တောင်းဆိုပြီး မင်းတို့ရဲ့ ဆုံးရှုံးမှုတွေကို လျော့နည်းအောင် လုပ်ပေးမယ်။ " နတ်ဘုရင်က ကမ်းစပ်ရှိ ပုံရိပ်များကို ကြည့်ပြီး ပြောလိုက်သည်။

သူတို့အားလုံးက အင်အားကြီးသော အထူးသက်ရှိများဖြစ်ပြီး စကြာဝဠာ၏ မည်သည့်နေရာတွင်မဆို လွှမ်းမိုးနိုင်သော ရှေးဟောင်းနတ်ဘုရားများ ဖြစ်ကြသည်။

" ကျေးဇူးတင်ပါတယ် နတ်ဘုရင်။ "

" နတ်ဘုရင်အတွက် ဒီလိုလုပ်ပေးရရုံနဲ့ ကျေနပ်ပါတယ်။ " အားလုံးက စိတ်သက်သာရာရသွားကြသည်။

အခြေခံဆုံးရှုံးမှုကို ပြန်မပြင်နိုင်သော်လည်း ကြီးမြတ်သူတစ်ယောက်က သူတို့၏ ဆုံးရှုံးမှုများကို အနည်းဆုံးသို့ လျှော့ချပေးနိုင်လေသည်။ ထိုကြီးမြတ်သူကလည်း ဒိုင်မန်ရှင်းနှစ်ခုကမ္ဘာမှ ရတနာများကို ယူဆောင်မည်ဖြစ်သောကြောင့် ထိုသို့လုပ်ပေးရန် ဆန္ဒရှိပေလိမ့်မည်။

" နတ်ဘုရင်ရဲ့ စွမ်းအားနဲ့ဆို ဒီဒိုင်မန်ရှင်းနှစ်ခုကမ္ဘာထဲမှာ ဘယ်သူက ယှဉ်နိုင်မှာလဲ။ " ခေါင်းဆောင်က ပြောလိုက်သည်။

အခြားသူများကလည်း သဘောတူလိုက်ကြသည်။ သူတို့က အလွှာဆယ့်တစ်သက်ရှိများဖြစ်ကြသော်လည်း ထွက်သွားရန် မျှော်လင့်ချက်မရှိကြောင်း သိခဲ့ရသည်။ အရင်ဆုံး သူတို့၏ ရှေ့တွင်ရှိနေသော နတ်ဘုရင်ကို ယှဉ်ပြိုင်နိုင်စွမ်းမရှိပေ။

လက်ရှိကောင်းကင်တံခါးကို စွန့်လွှတ်ပြီး နောက်တစ်ကြိမ်ကို စောင့်ဆိုင်းခြင်းကလည်း သူတို့ထဲမှ အသန်မာဆုံး ကိုးယောက်အတွက်သာဖြစ်ပြီး သူတို့နှင့် မသက်ဆိုင်ပေ။

" ကောင်းပြီ။ မင်းတို့ ပြင်ဆင်ထားလိုက်ပါ။ " နတ်ဘုရင်က ပြောလိုက်သည်။

ကမ်းစပ်မှ ပုံရိပ်များက ထွက်ခွာသွားကြပြီး ရေကန်တွင် နတ်ဘုရင်တစ်ယောက်သာ ကျန်နေခဲ့လေသည်။

" နှစ်နှစ်ရာအတွင်း ငါက ကြီးမြတ်သူအဆင့်လက်နက်ကို အသုံးပြုပြီး ငါ့ရဲ့ ခွန်အားကို အကောင်းဆုံးမြှင့်တင်ပြီးသွားပြီ။ တိုက်ခိုက်ရေးစွမ်းအားအရ ငါက ဒီဒိုင်မန်ရှင်းနှစ်ခုကမ္ဘာရဲ့ ကန့်သတ်ချက်ကို ရောက်သွားပြီလို့ ပြောလို့ရတယ်။ " နတ်ဘုရင်က တိတ်ဆိတ်စွာ တွေးလိုက်သည်။

ဒိုင်မန်ရှင်းနှစ်ခုကမ္ဘာမှ ရတနာများနှင့် မတူဘဲ သူ၏ ကြီးမြတ်သူအဆင့်လက်နက်က ပင်မစကြာဝဠာမှ ယူဆောင်လာခြင်းဖြစ်သည်။ ၎င်းက အခြားအင်အားကြီးသူများကိုင်ဆောင်ထားသော ရတနာများနှင့် ကွဲပြားမှုတစ်ခုရှိသွားလေသည်။ နတ်ဘုရင်၏ ကြီးမြတ်သူအဆင့် လက်နက်က သန့်စင်ထားပြီးသားဖြစ်သည်။

အခြားအင်အားကြီးသူများက နတ်ဘုရင်ကဲ့သို့ စွမ်းအားကြီးသော ရတနာများကို ပိုင်ဆိုင်ခဲ့လျှင်တောင် သူတို့က ၎င်းတို့ကို သန့်စင်နိုင်စွမ်းမရှိပေ။ သူတို့က ထိုရတနာ၏ အနိမ့်ဆုံးစွမ်းအားကိုသာ အသုံးပြုနိုင်လေသည်။

ဒိုင်မန်ရှင်းနှစ်ခုကမ္ဘာထဲသို့ ကျရောက်ပြီးနောက် ကြီးမြတ်သူအဆင့်လက်နက်က ဖိနှပ်ခံခဲ့ရသော်လည်း နတ်ဘုရင်၏ သန့်စင်ပြီးသားလက်နက်များက သူ့ကို လျင်မြန်စွာ တိုးတက်လာစေခဲ့သည်။

" ဒီတစ်ခါ ကောင်းကင်ဂိတ်တံခါးဖွင့်ရင် ငါထွက်သွားနိုင်ရမယ်။ " နတ်ဘုရင်က ယုံကြည်မှုရှိစွာ ရေရွတ်လိုက်သည်။

အလွှာဆယ့်တစ် အထွတ်အထိပ်သက်ရှိတစ်ယောက်အနေဖြင့် သူက ပင်မစကြာဝဠာမှ သက်ရှိများကြား အသန်မာဆုံးထဲတွင် ရှိနေလေသည်။ ကြီးမြတ်သူအဆင့် လက်နက်နှင့်ဆိုလျှင် ၎င်းက ယုံကြည်မှုရှိရန် လုံလောက်ပေသည်။

မီးတောင်တစ်ခုအတွင်း ချော်ရည်များရှေ့တွင် အဘိုးအိုတစ်ယောက် ထိုင်နေသည်။ သူ၏ ပုံရိပ်က မီးတောက်ကဲ့သို့ ဖြစ်နေပြီး သူ၏ ခန္ဓာကိုယ်ပတ်လည်မှ အပူချိန်က ကျောက်နံရံများကို အရည်ပျော်သွားစေလေသည်။

" ဒါဆိုလုံလောက်ပါပြီ။ ငါက ကန့်သတ်ချက်ကို ရောက်နေပြီ။ " အဘိုးအိုက ပေါ့ပေါ့ပါးပါး အသက်ရှူလိုက်ပြီး ပတ်ဝန်းကျင်မှ အပူချိန်က လျင်မြန်စွာ လျော့ကျသွားသည်။ " ကောင်းကင်တောင်ကို သွားဖို့ အချိန်ကျပြီ။ "

အဘိုးအို၏ မျက်လုံးများက ကျဉ်းမြောင်းသွားသည်။ " ကောင်းကင်ဂိတ်တံခါးဖွင့်ချိန်မှာ ငါနဲ့ ယှဉ်ပြိုင်နိုင်တဲ့သူတွေက နတ်ဘုရင်နဲ့ အခြားအင်အားကြီးသူအချို့ပဲရှိမယ်။ နတ်ဘုရင်က ကြီးမြတ်သူအဆင့် လက်နက်ကိုင်ယူဆောင်လာနိုင်တော့ သူ့ကို ကိုင်တွယ်ဖို့ ခက်ခဲတယ်။ " အဘိုးအိုက စဉ်းစားလိုက်သည်။

ပုံမှန်အားဖြင့် အလွှာဆယ့်တစ်သက်ရှိများက ကြီးမြတ်သူအဆင့် လက်နက်များကို ကိုင်ဆောင်ခြင်းမရှိကြပေ။ အကြောင်းမှာ ၎င်းက အခြားကြီးမြတ်သူများကို ဆွဲဆောင်သွားနိုင်လေသည်။

ကြီးမြတ်သူများက သူတို့၏ စွမ်းအားနှင့် အားနည်းသူများကို အနိုင်မကျင့်သော်လည်း လုံလောက်သောအကျိုးကျေးဇူးများရှိလျှင် ထိုသို့ပြုလုပ်ပေလိမ့်မည်။ ကြီးမြတ်သူအဆင့် လက်နက်က အခြားကြီးမြတ်သူထံမှ ဆင်းသက်လာခြင်းဖြစ်လျှင်တော့ ရှောင်ရှားကြလေသည်။

နတ်ဘုရင်က ကြယ်စကြာဝဠာမဟာမိတ်၏ အလေးပေးခြင်းခံရပြီး ကြီးမြတ်သူအဆင့်သို့ တက်လှန်းရန် ပြုစုပျိုးထောင်ခြင်းခံရသောကြောင့် သူ့ကို ကြီးမြတ်သူအဆင့်လက်နက်တစ်ခု ပေးထားကြခြင်းဖြစ်သည်။

" ဒါပေမယ့် ဒီဒိုင်မန်ရှင်းနှစ်ခုကမ္ဘာထဲမှာ ကြီးမြတ်သူအဆင့် လက်နက်တစ်ခုနဲ့တောင် သူ့ရဲ့ အလားအလာကို ဘယ်လောက်တောင် ဖော်ထုတ်နိုင်မှာလဲ။ " အချိန်ကျရင် ငါတို့ လူအိုကြီးတွေက ပူးပေါင်းပြီး နတ်ဘုရင်ကို အရင်ဆုံး ကိုင်တွယ်ရမယ်။ " အဘိုးအိုက တွေးလိုက်သည်။

တိုက်ခိုက်ရေးစွမ်းအားအရ နတ်ဘုရင်က သူထက် သေချာပေါက် ပို၍ သန်မာပြီး ပင်မစကြာဝဠာမှ ဆင်းသက်လာသော သက်ရှိများကြာတွင် အသန်မာဆုံးပင် ဖြစ်နိုင်ခြေရှိလေသည်။ သို့သော် အသန်မာဆုံးဆိုသည်မှာ ပြိုင်ဘက်မရှိဟု ဆိုလိုခြင်းမဟုတ်ပေ။

သူတို့က နတ်ဘုရင်ကို ကိုင်တွယ်ရန် နည်းလမ်းများရှိလေသည်။ အဘိုးအို၏ အမြင်တွင် နတ်ဘုရင်က အကြီးမားဆုံး ခြိမ်းခြောက်မှုဖြစ်ပြီး အချိန်ကျလျှင် သူ၏ အဓိကပစ်မှတ် ဖြစ်လာပေလိမ့်မည်။

ကောင်းကင်တောင်ထိပ်တွင် နတ်ဘုရင်က လူအများ၏ ပစ်မှတ်ဖြစ်လာမည်မှာ သေချာလေသည်။ နတ်ဘုရင်ကိုသာ မကိုင်တွယ်ရသေးလျှင် အဘိုးအိုက သူ၏ စွမ်းအားများကို အသုံးပြုဝံ့လိမ့်မည်မဟုတ်ပေ။

" နတ်ဘုရင်ကို ကိုင်တွယ်ဖို့ မိတ်ဆွေဟောင်းကြီးတွေနဲ့ ဆွေးနွေးရမယ်။ " အဘိုးအိုက ပြုံးလိုက်သည်။

ဒိုင်မန်ရှင်းနှစ်ခုကမ္ဘာတွင် ရှေးဟောင်းနိုင်ငံဆယ့်နှစ်ခုက အကြီးမားဆုံး အင်အားစုများဖြစ်ကြသည်။ ရှေးဟောင်းနိုင်ငံဆယ့်နှစ်ခုအပြင် အခြားလျို့ဝှက်အင်အားစုများလည်း ရှိပြီး သူတို့၏ အမွေအနှစ်ကလည်း စုန်းဘိုးဘေးတစ်ယောက်ချန်ထားခဲ့သောကြောင့် ရှေးဟောင်းနိုင်ငံများထက် အားနည်းခြင်းမရှိပေ။

ထိုအင်အားစုများက ပြင်ပကမ္ဘာနှင့် အဆက်အသွယ်ဖြတ်ပြီး လျို့ဝှက်စွာ နေထိုင်ကြလေသည်။

ဝုန်း ဝုန်း....

ထိုအချိန်တွင် လျို့ဝှက်အင်အားစု၏ အနက်ရှိုင်းဆုံးနေရာမှ ကြောက်စရာကောင်းသော အော်ရာတစ်ခု ထွက်ပေါ်လာသည်။

" စုန်းဘိုးဘေး နောက်ဆုံးတော့ ငါက စုန်းဘိုးဘေးဖြစ်သွားခဲ့ပြီ။ " သက်လတ်ပိုင်းအမျိုးသားတစ်ယောက်က စိတ်လှုပ်ရှားစွာ ထွက်လာသည်။

သူ၏ နာမည်က ယန်ဖူဖြစ်ပြီး လျို့ဝှက်အင်အားစုထဲတွင် အသန်မာဆုံးဖြစ်လေသည်။ သူက ခက်ခဲစွာ ကျင့်ကြံပြီးနောက် နောက်ဆုံးတွင် စုန်းဘိုးဘေးအဆင့်သို့ တက်လှမ်းနိုင်ခဲ့သည်။

ဒေသခံသက်ရှိများအတွက် ဒိုင်မန်ရှင်းနှစ်ခုကမ္ဘာတွင် စုန်းဘိုးဘေးအဆင့်ကို တက်ခြင်းက ကောင်းကင်ကိုတက်သကဲ့သို့ ခက်ခဲလေသည်။ အတိတ်တွင် ကောင်းကင်ဂိတ်တံခါး ပေါ်လာချိန်၌ စုန်းဧကရာဇ်များသာယှဉ်ပြိုင်ခဲ့ကြသည်။

" ငါက ကောင်းကင်ဂိတ်တံခါး မပွင့်ခင်မှာ စုန်းဘိုးဘေးအဆင့်ကို တက်လှမ်းနိုင်တာ တကယ်အချိန်ကိုက်ပဲ။ ငါ့ရဲ့ ဘိုးဘေးတွေ မပြီးမြောက်ခဲ့တဲ့ တာဝန်ကို ငါအဆုံးသတ်ဖို့အချိန်ကျပြီ။ " ယန်ဖူက စိတ်လှုပ်ရှားနေသည်။

ဒိုင်မန်ရှင်းနှစ်ခုကမ္ဘာမှ ဒေသခံ သက်ရှိများအတွက် ကောင်းကင်ဂိတ်တံခါးသို့ ဝင်ရောက်ခြင်းက အဆုံးစွန်သော ပန်းတိုင်ဖြစ်လေသည်။ စုန်းဘိုးဘေးတစ်ယောက်အတွက်ပင် ကောင်းကင်ဂိတ်တံခါးသို့ ဝင်ရောက်နိုင်ရန် မသေချာပေ။ ကောင်းကင်ဂိတ်တံခါးက နှစ်တစ်သောင်းလျှင် တစ်ကြိမ်သာ ဖွင့်လှစ်ပြီး စုန်းဘိုးဘေးများ၏ သက်တမ်းက နှစ်နှစ်ထောင်မှ နှစ်သုံးထောင်အထိသာ ရှိလေသည်။

ထို့ကြောင့် ကောင်းကင်ဂိတ်တံခါးသို့ ဝင်ရောက်ရန်အတွက် စုန်းဘိုးဘေးများပင် ကံကောင်းခြင်းကို လိုအပ်လေသည်။ ယန်ဖူ၏ ဘိုးဘေးက ထိုမျှကံကောင်းခဲ့ခြင်းမရှိပေ။ သူက ကောင်းကင်ဂိတ်တံခါးဖွင့်လှစ်ပြီး နှစ်ပေါင်းရှစ်ရာအကြာတွင် စုန်းဘိုးဘေးဖြစ်လာခဲ့ပြီး ကောင်းကင်ဂိတ်တံခါးသို့ ဝင်ရောက်ရန် မျှော်လင့်ချက်က တိုက်ရိုက်ငြိမ်းသေသွားခဲ့သည်။