အံ့အားသင့်ဖွယ်ရာရလဒ်များနှင့် ယွမ်လင်သစ်ပင်

အပြင်ဘက်တွင် သွေးနံ့များနှင့် ရက်စက်ကြမ်းတမ်းသော တိုက်ပွဲများက လော့ချန်နှင့် မသက်ဆိုင်ပေ။

ဂူအတွင်း၌ လော့ချန်က တင်ပြင်ခွေထိုင်ကာ စိတ်အားထက်သန်စွာ သိုင်းပညာ ကျင့်ကြံနေသည်။ သူ၏ ဝမ်းတွင်းရှိ ဒျန်တန်တွင် နဂါးအော်သံများ ပဲ့တင်ထပ်နေပြီး မြွေငယ်လေးနှင့်တူသော နဂါးစွမ်းအင်က ရောင်စဉ်ကိုးသွယ်ရတနာကို ဝိုင်းပတ်ကာ တလှည့်စီ ခုန်ပေါက်လှုပ်ရှားနေသည်။ ထိုအရာက အလွန်စိတ်လှုပ်ရှားနေပုံ ရသည်။ ထို့နောက် အချိန်က တဟုန်ထိုး ကုန်လွန်သွားသည်။

တစ်နာရီခန့် ကုန်ဆုံးသွားသောအခါ နဂါးစွမ်းအင်၏ ဦးခေါင်းက ပိုမိုထင်ရှားလာပြီး ထောင့်များနှင့် အနားသတ်များက ပို၍ ရှင်းလင်းလာကာ တင့်တယ်သော အသွင်အပြင်ကို ဖော်ညွှန်းလျက် ရှိသည်။

“အင်း…”

မြည်ဟီးသော နဂါးအော်သံတစ်ခုနှင့်အတူ ဒျန်တန်အတွင်း၌ ရောင်စဉ်ကိုးသွယ်၏ အလင်းတန်းများ လှည့်ပတ်စီးဆင်းလျက် နဂါးစွမ်းအင်က တတိယအကြိမ် အဆင့်ပြောင်းလဲမှုကို ပြီးမြောက်လိုက်ပြီး ဦးခေါင်းမြင့်မားစွာ ထောင်ထားရင်း စစ်မှန်သော နဂါးတစ်ကောင်၏ ကျက်သရေကို အနည်းငယ်ဖော်ဆောင်နိုင်ခဲ့ပြီ ဖြစ်၏။

သို့သော် ဤသည်မှာ အဆုံးမဟုတ်သေးပေ။ နာရီဝက်အကြာတွင် နဂါးစွမ်းအင်၏ ဝမ်းဗိုက်တွင်လည်း ပြောင်းလဲမှုများ စတင်ဖြစ်ပေါ်လာသည်။ တိမ်တိုက်များနှင့် မြူခိုးများ ဝိုင်းပတ် လှုပ်ရှားနေပြီး သိမ်မွေ့သော သားရဲတစ်ကောင်၏ ဝမ်းဗိုက်ကဲ့သို့ တိမ်ဖြူများကို စီးချီထွက်ခွာနိုင်သည့်အလား ထင်ရသည်။

ထိုအခိုက်အတန့်တွင် လော့ချန်က မျက်လုံးများကို ဖွင့်လိုက်သည်။ သူ၏ ထက်ရှသော အကြည့်များက လျှပ်စစ်အလင်းတန်းများနှင့်တူပြီး ဂူအတွင်းကို လင်းထိန်စေကာ စူးရှသော အရိပ်အလျင်ကို ဖြစ်ပေါ်စေသည်။

“ငါထင်ထားသလိုပဲ သိုင်းဝိညာဉ်ကို ဝါးမျိုတာက စစ်မှန်တဲ့နဂါးကျင့်စဉ်ကို ကျင့်ကြံဖို့ အကောင်းဆုံးနည်းလမ်းပဲ…”

နဂါးစွမ်းအင်၏ ပြောင်းလဲမှုကို ခံစားမိရင်း လော့ချန်က ရင်ထဲမှ ဝမ်းမြောက်မှုကို ဖုံးကွယ်မထားနိုင်ပေ။ တစ်နာရီခွဲမျှသာ ကုန်လွန်သွားချိန်တွင် ဒျန်တန်အတွင်းရှိ နဂါးစွမ်းအင်က တတိယအကြိမ်နှင့် စတုတ္ထအကြိမ် အဆင့်ပြောင်းလဲမှုများကို ဆက်တိုက် ပြီးမြောက်ခဲ့သည်။

စစ်မှန်သောနဂါးကျင့်စဉ်က နှစ်ဆင့် တစ်ပြိုင်နက်တည်း တက်လှမ်းနိုင်ခဲ့ပြီး ယခုဆိုလျှင် စတုတ္ထအဆင့်သို့ ရောက်ရှိသွားပြီ ဖြစ်သည်။

ထို့အပြင် ပြင်းထန်သော စွမ်းအင်သန့်စင်မှုနှင့်အတူ လော့ချန်၏ စွမ်းအားအဆင့်တွင်လည်း ပိတ်ဆို့အဆင့်က တဖြည်းဖြည်း လှုပ်ရှားလာသည်။

စစ်မှန်သောနဂါးကျင့်စဉ်ကို တစ်ကြိမ်လည်ပတ်လိုက်တိုင်း သူ၏ သွေးကြောများအတွင်း၌ လှိုင်းရိုက်သံများကဲ့သို့ အသံများ ထွက်ပေါ်လာသည်။ ဤသည်မှာ စွမ်းအင်က သွေးကြောထဲသို့ စိမ့်ဝင်လာပြီး လူသာမန်ဘဝဖြတ်ကျော်အဆင့်ငါးကို တက်လှမ်းတော့မည့် လက္ခဏာပင် ဖြစ်သည်။

“သံပူရင် ရိုက်မှပဲ… ဒီအခွင့်အရေးမှာ လူသာမန်ဘဝဖြတ်ကျော်အဆင့်ငါးကို တစ်ခါတည်း ဖြတ်ကျော်ပြီးမှ အပြင်ထွက်မယ်…”

လော့ချန်က မျက်ဝန်းထဲတွင် ပြတ်သားသော ဆုံးဖြတ်ချက်များဖြင့် လေးနက်စွာ အသက်ရှူသွင်းလိုက်ပြီး သူ့အင်္ကျီထဲမှ ကျန်ရှိနေသော ကြယ်သုံးပွင့်ဆေးလုံးနှစ်လုံးကို ထုတ်ယူကာ တစ်ခါတည်း မျိုချလိုက်သည်။

“ဘုန်း…”

ကြယ်သုံးပွင့်ဆေးလုံးက ဝမ်းဗိုက်ထဲသို့ ရောက်သွားသည်နှင့် တစ်ပြိုင်နက် ပြင်းထန်သော စွမ်းအင်တစ်ခု ပေါက်ကွဲထွက်လာသည်။

လော့ချန်က စစ်မှန်သောနဂါးကျင့်စဉ်ကို တစ်ကြိမ်လည်ပတ်လိုက်တိုင်း စွမ်းအင်တစ်သောက်က သွေးကြောထဲသို့ သန့်စင်စိမ့်ဝင်သွားပြီး သွေးများကို ပိုမိုလေးလံစေသည်။ သွေးများ စီးဆင်းလာချိန်တွင် ထွက်ပေါ်လာသော အသံများက ပို၍ ကျယ်လောင်လာသည်။ ထိုသွေးများက သာမန်သွေးများ မဟုတ်တော့ဘဲ သံရည်များနှင့် ခဲကျိုရည်များကဲ့သို့ ဖြစ်လာသည်။ အချိန်က တစစီ ဖြတ်သန်းသွားသည်။

အပြင်ဘက်ကောင်းကင်ယံတွင် နံနက်စောစောပိုင်း၏ အလင်းရောင်တစ်ခုက ဖြည်းညင်းစွာ ထွက်ပေါ်လာသည်။

တစ်ညလုံး သတ်ဖြတ်မှုများနှင့် ဖြတ်သန်းခဲ့ရသော ချီယွမ်ကျွန်းသည်လည်း တဖြည်းဖြည်း ငြိမ်သက်လာသည်။

“ရှူး…”

သွေးများဖြင့် ပေကျံနေသော သုံးမီတာခန့်ရှည်လျားပြီး သံဆူးအရိုးများဖြင့် ဖုံးအုပ်ထားသည့် ခိုးကျားသစ်နှင့်တူသော နတ်ဆိုးသားရဲတစ်ကောင်က တောအုပ်ထဲမှ လျင်မြန်စွာ ပြေးထွက်လာသည်။

ထိုနတ်ဆိုးသားရဲက သံဆူးခိုးကျားသစ်ဖြစ်ပြီး ကြယ်နှစ်ပွင့်အဆင့်မြင့်နတ်ဆိုးသားရဲတစ်ကောင် ဖြစ်သည်။ ၎င်း၏ တိုက်ခိုက်စွမ်းရည်က လူသာမန်ဘဝဖြတ်ကျော်အဆင့်ငါးရှိ သိုင်းပညာရှင်တစ်ဦးနှင့် ညီမျှပြီး ဤတောအုပ်၏ ဘုရင်တစ်ပါး ဖြစ်သည်။

ဤတစ်ညအတွင်း သံဆူးခိုးကျားသစ်က ၎င်း၏ နယ်မြေကို ကင်းလှည့်ရင်း အဆင့်နိမ့်သိုင်းပညာရှင်များ၏ လက်ချက်ဖြင့် သေဆုံးသွားသူ နှစ်ဆယ်ကျော်ရှိခဲ့ပြီး ၎င်းတို့ထဲတွင် လူသာမန်ဘဝဖြတ်ကျော်အဆင့်ငါးရှိသူ သုံးဦးပါဝင်သည်။ ၎င်း၏ တိုက်ပွဲရလဒ်များက ထူးကဲလှသည်ဟု ဆိုနိုင်သည်။

တောင်ကုန်းနားသို့ ရောက်ရှိလာချိန်တွင် သံဆူးခိုးကျားသစ်က ရုတ်တရက် ရပ်တန့်လိုက်ပြီး ဂူအဝသို့ စူးစိုက်ကြည့်ကာ အံကြိတ်ရင်း လည်ချောင်းထဲမှ အော်ဟစ်သံများ ထွက်ပေါ်လာသည်။

ဤဂူက ၎င်း၏အသိုက် ဖြစ်သည်။ ယခုအခါ ကျောက်သားကြီးများဖြင့် ပိတ်ဆို့ထားပြီး လေထဲတွင် လူသားတစ်ဦး၏ အနံ့များကိုပါ ရရှိနေသည်။

ဤတောအုပ်၏ ဘုရင်တစ်ပါးဖြစ်သည့် ၎င်းက လူသားတစ်ဦးက သူ၏အသိုက်ကို သိမ်းပိုက်ထားသည်ကို လက်မခံနိုင်ပေ။

“ဘုန်း…”

အော်ဟစ်လိုက်ရင်း သံဆူးခိုးကျားသစ်က ဂူအဝရှိ ကျောက်သားကြီးကို ဝင်တိုက်ပြီး အတွင်းသို့ ပြေးဝင်ကာ မျက်စိမရှင်သည့် လူသားကို ကိုက်သတ်ရန် ပြင်ဆင်လိုက်သည်။

ထိုအချိန်တွင် အန္တရာယ်ကြီးမားသော အရိပ်အလျင်တစ်ခုက ဂူအတွင်းမှ ထွက်ပေါ်လာပြီး သံဆူးခိုးကျားသစ်ကို မထိန်းနိုင်မချုပ်နိုင်စွာ နောက်သို့ နှစ်လှမ်းဆုတ်သွားစေသည်။ ချက်ချင်းဆိုသလို…

“ဘုန်း…”

ဂူအဝကို ပိတ်ဆို့ထားသော ကျောက်သားကြီးက ရုတ်တရက် ပြိုကွဲသွားပြီး ကျောက်စကျောက်နများအဖြစ် လေးမျက်နှာသို့ ပြန့်ကျဲထွက်သွားသည်။

“ခွပ်… ခွပ်… ခွပ်…”

ခြေသံများ ထွက်ပေါ်လာပြီး လူသားတစ်ဦးက ဂူအတွင်းမှ ဖြည်းညင်းစွာ လျှောက်လှမ်းထွက်လာသည်။ ထိုသူက လော့ချန်ပင် ဖြစ်သည်။

“ဒီလက်သီးတစ်ချက်ရဲ့အင်အားက အနည်းဆုံး ပေါင်ခုနစ်သောင်းလောက်ရှိမယ်… ဆင်ရိုင်းသုံးကောင်ရဲ့ အင်အားနီးပါးပဲ…”

လော့ချန်က မြေပြင်ပေါ်ရှိ ကျောက်ကွဲစများကို ကြည့်ရင်း လက်သီးကို ဆုပ်ထားလျက် သူ၏ လက်သီးတစ်ချက်ဖြင့် ဖြစ်ပေါ်လာသော ဖျက်ဆီးမှုကို အလွန်ကျေနပ်မိသည်။ ဤသုံးနာရီအတွင်း သူ၏လေ့ကျင့်မှု ရလဒ်များက အလွန်ကြီးမားလှသည်။

နဂါးစွမ်းအင်က ဆက်တိုက် အဆင့်ပြောင်းလဲသွားပြီး စစ်မှန်သောနဂါးကျင့်စဉ်က စတုတ္ထအဆင့်သို့ တက်လှမ်းနိုင်ခဲ့သည်။ ထို့အပြင် သူ၏ စွမ်းအားအဆင့်သည်လည်း ထပ်မံတိုးတက်လာပြီး လူသာမန်ဘဝဖြတ်ကျော်အဆင့်ငါးသို့ ရောက်ရှိသွားသည်။

ဤအချက်နှစ်ခုကြောင့် လော့ချန်၏ အင်အားက နှစ်ဆတိုးလာပြီး ပေါင်ခုနစ်သောင်းအထိ ရောက်ရှိသွားသည်။ ဤသည်မှာ ထိတ်လန့်ဖွယ်ရာ ဂဏန်းတစ်ခု ဖြစ်သည်။

သာမန်လူသာမန်ဘဝဖြတ်ကျော်အဆင့်ငါးရှိ သိုင်းပညာရှင်တစ်ဦး၏ အင်အားက ဆင်ရိုင်းတစ်ကောင်၏ အင်အား ပေါင်နှစ်သောင်းငါးထောင်သာ ရှိသည်။ လော့ချန်၏ အင်အားက ၎င်းထက် သုံးဆနီးပါး ပိုများလှသည်။

သိုင်းပညာစွမ်းရည်တစ်ခုမျှ အသုံးမပြုဘဲ အားအပြည့် ထိုးထုတ်လိုက်လျှင် လက်သီးတစ်ချက်ဖြင့်ပင် လူသာမန်ဘဝဖြတ်ကျော်အဆင့်ငါးရှိ သိုင်းပညာရှင်တစ်ဦးကို သတ်ပစ်နိုင်သည်။

“အင်း…”

လော့ချန်က အကြည့်လွှဲလိုက်ရင်း ဘေးတွင်ရှိသော သံဆူးခိုးကျားသစ်ကို သတိပြုမိသည်။

“အား…”

သံဆူးခိုးကျားသစ်က လော့ချန်ကို စူးစိုက်ကြည့်ရင်း ကိုယ်ကို အောက်ကျုံ့ထားပြီး အံကြိတ်ကာ လည်ချောင်းထဲမှ အော်ဟစ်သံများ ထွက်ပေါ်လာသည်။

“ထွက်သွား…”

လော့ချန်၏ မျက်ဝန်းများထဲတွင် စွမ်းအင်အလင်းတန်းများ ထွက်ပေါ်လာပြီး တင့်တယ်သော အငွေ့အသက်တစ်ခုက သူ၏ခန္ဓာကိုယ်မှ ထွက်ပေါ်လာသည်။

“ဝူး... ဝူး…”

ပြင်းထန်သော အန္တရာယ်အငွေ့အသက်က သံဆူးခိုးကျားသစ်ကို တစ်ကိုယ်လုံး အေးစက်သွားစေပြီး ညည်းတွားသံတစ်ခု ထွက်လာကာ ချက်ချင်း လှည့်ပြေးပြီး တောအုပ်ထဲသို့ အပြေးအလွှား ထွက်ပြေးသွားသည်။

ဤမြင်ကွင်းကို မြင်လိုက်ရသောအခါ လော့ချန်က မထိန်းနိုင်ဘဲ ရယ်မိလိုက်သည်။

"ဟား... ဟား... ဟား..."

သံဆူးခိုးကျားသစ်က ကြယ်နှစ်ပွင့်နတ်ဆိုးသားရဲများထဲတွင် ထူးချွန်သူတစ်ကောင် ဖြစ်သည်။ သို့သော် သူ၏ အကြည့်တစ်ချက်တည်းဖြင့် ထိတ်လန့်ပြီး ထွက်ပြေးသွားရသည်မှာ အံ့အားသင့်စရာပင်။

“ဒါက လူသာမန်ဘဝဖြတ်ကျော်အဆင့်ငါးရဲ့ စွမ်းအားလား…”

လော့ချန်က တစ်ယောက်တည်း ရေရွတ်လိုက်သည်။

လူသာမန်ဘဝဖြတ်ကျော်အဆင့်ငါးတွင် စွမ်းအင်က သွေးကြောထဲသို့ စိမ့်ဝင်လာပြီး သိုင်းပညာရှင်တစ်ဦးသည် ခန္ဓာကိုယ်အသစ်သို့ ပြောင်းလဲသွားကာ သွေးများက ခဲကျိုရည်ကဲ့သို့ ဖြစ်လာပြီး ဒေါသမထွက်ဘဲပင် တင့်တယ်သော အငွေ့အသက်ကို ဖြစ်ပေါ်စေသည်။ အကြည့်များတွင်လည်း ထိတ်လန့်စေနိုင်သော အစွမ်းသတ္တိ ပါရှိသည်။

အကယ်၍ လူသာမန်ဘဝဖြတ်ကျော်အဆင့်ခြောက်သို့ ရောက်ရှိသွားပါက ဤအငွေ့အသက်ကို တိုက်ခိုက်ရေးစွမ်းရည်များထဲသို့ ပေါင်းစပ်ထည့်သွင်းနိုင်ပြီး အရှိန်အဟုန်ဖြင့် ပြိုင်ဘက်ကို ဖိနှိပ်နိုင်သည်။ ထို့ကြောင့် သိုင်းပညာ၏ စွမ်းအားက အဆပေါင်းများစွာ တိုးမြင့်လာမည် ဖြစ်သည်။

လော့ချန်က စွမ်းအားအဆင့်မြင့်သော သိုင်းပညာရှင်များသည် အကြည့်တစ်ချက်ဖြင့်ပင် လူတစ်ဦးကို သတ်ပစ်နိုင်သည်ဟု ကြားဖူးသည်။ သို့သော် ထိုအဆင့်က သူနှင့် အလှမ်းဝေးနေသေးသည်။

“နောက်တစ်နာရီလောက်ဆိုရင် အပြင်ထွက်ရတော့မယ်…”

လော့ချန်က အငွေ့အသက်ကို ပြန်လည်ထိန်းသိမ်းလိုက်ရင်း အဝေးရှိ နံနက်စောစောပိုင်း၏ အလင်းရောင်ကိုကြည့်ကာ တစ်ယောက်တည်း ရေရွတ်လိုက်သည်။ ဤချီယွမ်ကျွန်းသို့ လာရောက်ခြင်းဖြင့် သူက ရည်မှန်းချက်များစွာကို အကောင်အထည် ဖော်နိုင်ခဲ့သည်။

စစ်မှန်သောနဂါးကျင့်စဉ်က သုံးဆင့်တစ်ပြိုင်နက် တက်လှမ်းနိုင်ခဲ့ပြီး စွမ်းအားအဆင့်သည်လည်း မထင်မှတ်ထားဘဲ လူသာမန်ဘဝဖြတ်ကျော်အဆင့်ငါးသို့ ရောက်ရှိသွားသည်။ ထို့အပြင် အမဲလိုက်ပြိုင်ပွဲတွင် ရမှတ်တစ်သောင်းကျော် ရရှိထားပြီး ချင်းယွမ်စမ်းသပ်ပွဲတွင် ထိပ်ဆုံးသုံးဦးအတွင်း သေချာစွာ ဝင်ရောက်နိုင်မည် ဖြစ်သည်။ ထို့ကြောင့် အပြင်စည်းတပည့်အဖြစ်သို့ ဝင်ရောက်ရန်လည်း လွယ်ကူစွာ အောင်မြင်နိုင်မည် ဖြစ်သည်။

ထို့အပြင် လော့ချန်က အဆင့်နိမ့်သိုင်းပညာရှင်များထံမှ ရယူထားသော စည်းစိမ်ဥစ္စာများကလည်း အံ့အားသင့်ဖွယ်ရာ ပမာဏတစ်ခု ဖြစ်သည်။

စွမ်းအင်ဆေးလုံးများက တစ်ထောင်နီးပါးခန့်ရှိပြီး ၎င်းတို့၏ တန်ဖိုးသည် ငွေကျပ်သန်းဆယ်ချီ ရှိ၏။ ထိုပစ္စည်းများကို အထုပ်ကြီးတစ်ထုပ်အဖြစ် ထုပ်ပိုးထားသည်။ အကယ်၍ တစ်စုံတစ်ခုကို နောင်တရစရာအဖြစ် ဆိုရမည်ဆိုလျှင် အကြီးအကဲဟယ်၏ နီးကပ်သော တပည့်ဖြစ်သူ လင်ကျင်ထိုင်ကို သတ်ပစ်နိုင်ခြင်း မရှိခဲ့ခြင်းပင် ဖြစ်သည်။

ချီယွမ်ကျွန်းမှ ထွက်ခွာသွားသည်နှင့် ထိုကဲ့သို့ အခွင့်အရေးကို ထပ်မံရရှိရန် ခက်ခဲပေလိမ့်မည်။

“အနီးအနားမှာ လှည့်ပတ်ကြည့်လိုက်ဦးမယ်… ကံကောင်းရင် သူနဲ့ဆုံလောက်မယ်…”

လော့ချန်က ကိုယ်လက်လှုပ်၍ တောအုပ်ထဲသို့ ပြေးဝင်သွားသည်။ ထို့နောက် သိပ်မဝေးသည့်နေရာသို့ ရောက်ရှိသွားချိန်တွင် အဆင့်နိမ့်သိုင်းပညာရှင်တစ်စုက ရှေ့မှ အလျင်စလို ဖြတ်သန်းသွားပြီး မနီးမဝေးရှိ ဗဟိုတောင်ထွဋ်သို့ အပြေးအလွှား ဦးတည်သွားနေကြသည်။ ၎င်းတို့၏ အမူအရာများက အလျင်စလို ဖြစ်နေသည်။

“ဘာတွေ ဖြစ်နေတာလဲ…”

လော့ချန်က အနည်းငယ် အံ့ဩသွားပြီး သွားရောက်မေးမြန်းရန် စိတ်ကူးမိသော်လည်း ထိုသို့သွားရောက်မေးမြန်းပါက နောက်ထပ် သွေးထွက်သံယို ဖြစ်ရပ်တစ်ခုကို ဖြစ်ပေါ်စေနိုင်သည်ဟု တွေးမိသဖြင့် ရပ်တန့်လိုက်သည်။ သူ၏ ရည်မှန်းချက်များအားလုံး ပြီးမြောက်ပြီးဖြစ်သည့်အတွက် လော့ချန်က နောက်ထပ် သတ်ဖြတ်မှုများကို မလိုလားတော့ပေ။

“လော့ချန်ဆရာအစ်ကို…”

ထိုအချိန်တွင် ဝမ်းမြောက်သံတစ်ခု ရုတ်တရက် ထွက်ပေါ်လာသည်။

လော့ချန်က နောက်သို့ လှည့်ကြည့်လိုက်ရာ ထိုသူက ရှဲ့ဟန်ဖြစ်နေသည်။

“လော့ချန်ဆရာအစ်ကို… ဘာမှမဖြစ်ဘူးနော်…”

ရှဲ့ဟန်က လျင်မြန်စွာ အပြေးရောက်လာပြီး လော့ချန်တွင် ဒဏ်ရာတစ်စုံတစ်ရာ မရှိသည်ကို မြင်လိုက်ရသောအခါ ဝမ်းမြောက်မှုနှင့် အံ့အားသင့်မှုများ ရောယှက်နေသည်။

ယမန်ညက ရှဲ့ဟန်သည် လော့ချန်၏ ညွှန်ကြားချက်အတိုင်း သူ၏ သွားရာလာရာကို နေရာအနှံ့ သတင်းပြန့်ပွားစေခဲ့သည်။ သို့သော် စိတ်မချမ်းသာသဖြင့် ပြန်လည်လှည့်ပတ်ရှာဖွေခဲ့သည်။

လော့ချန်၏ သတင်းကို တစိုးတစိမှ မကြားရသဖြင့် သူက လော့ချန်မှာ ဆိုးရွားသော ဘေးဒုက္ခတစ်ခုနှင့် ကြုံတွေ့သွားပြီဟု ထင်မှတ်ကာ ပြန်လည်ထွက်ခွာရန် ပြင်ဆင်နေစဉ် ဤနေရာ၌ လော့ချန်နှင့် ဆုံတွေ့လိုက်ရသည်။

“ငါဘာမှမဖြစ်ပါဘူး…”

လော့ချန်က ပြုံးလျက်ပြောလိုက်သည်။

ရှဲ့ဟန်၏ ရင်ထဲတွင် တိတ်တဆိတ် အံ့အားသင့်သွားပြီး လေးစားမှု အမူအရာများ ပိုမိုထင်ရှားလာသည်။

ယမန်ညက လော့ချန်၏ သွားရာလာရာကို ရှာဖွေသူများက မည်မျှရှိသည်ကို မသိနိုင်ပေ။ ထိုမျှလောက် လူများစွာ၏ ဝိုင်းရံတိုက်ခိုက်မှုအောက်တွင် အသက်ရှင်လျက် ရှိနေခြင်းက သူ၏ စွမ်းရည်ကို သက်သေပြနေသည်။

“လူတွေ ယအများကြီးက ဗဟိုတောင်ထွဋ်ဆီ အပြေးအလွှား သွားနေတာကို ငါတွေ့လိုက်တယ်… ဘာတွေ ဖြစ်နေတာလဲ…”

လော့ချန်က မေးလိုက်၏။

“ကြားဖူးတာကတော့ လင်ကျင်ထိုင်က အဲဒီမှာ ယွမ်လင်သစ်ပင်တစ်ပင်ကို တွေ့ထားတယ်တဲ့… ပြီးတော့ ရင့်မှည့်နေတဲ့ ယွမ်လင်သီးတွေလည်း ရှိတယ်ဆိုပဲ… ဒီသတင်းကို ကြားသွားတဲ့သူတွေ အကုန်လုံး အဲဒီကို အပြေးအလွှား သွားနေကြတာပဲ…”

ရှဲ့ဟန်က ဖြေလိုက်သည်။

သူ၏မျက်နှာပေါ်တွင် စိတ်လှုပ်ရှားမှုများ ထင်ဟပ်နေသည်။