ဤတပည့်ကို မည်သည့် သိုင်းပညာရှင်က လေ့ကျင့်ပေးခဲ့သနည်း...

~ မီးလျှံစွန့်ခွာခြင်းဂိုဏ်းမှ အကြီးအကဲများ၏ အာရုံစိုက်မှုကို ရရှိပြီးဖြစ်ရာ ကိစ္စရပ်များမှာ ပိုမိုလွယ်ကူလာတော့၏။

လုရီသည် ရှေ့သို့ ခြေတစ်လှမ်းတိုးလိုက်ပြီး မီးလျှံအလင်းလုံးတစ်ခုအဖြစ်သို့ ပြောင်းလဲကာ ထိုနေရာ၌ပင် ချက်ချင်း ပျောက်ကွယ်သွားလေသည်။

ရုတ်တရက်ပင် သူသည် မီးလျှံစွန့်ခွာခြင်းဂိုဏ်းမှ တပည့်ဖြစ်သူ ယန်ကျွယ်၏ နောက်ကျောဘက်ရှိ မီးလျှံတစ်ခုအတွင်းမှ ပြန်လည်ပေါ်ထွက်လာခဲ့သည်။ နောက်တစ်ခဏ၌ သူသည် သူ၏ လက်များကို ဖြန့်ကျက်ကာ ယန်ကျွယ်အပေါ်သို့ ဖိချလိုက်ရာ အနီရောင်မီးလျှံထုကြီး တောက်လောင်လာ၏။ ၎င်းက ဧရာမ မီးလျှံလက်ဖဝါးကြီးအဖြစ် ဖွဲ့စည်းကာ အကျဉ်းထောင်တစ်ခု

ယန်ကျွယ်အပေါ်သို့ ကျရောက်လာသည့်အလား ဖိနှိပ်လိုက်တော့သည်။

ကြမ်းတမ်းရက်စက်သော စွမ်းအားများက သောင်းကျန်းနေပြီး ဖိနှိပ်ချုပ်ချယ်သော အားအရှိန်ကြောင့် ယန်ကျွယ်၏ ခန္ဓာကိုယ်မှာ အနည်းငယ် တုန်ယင်သွားကာ ရွှံ့နွံထဲတွင် နစ်နေသည့်ပမာ လေးလံဖိစီးသွား၏။ သူ၏ မျက်နှာမှာ သိသိသာသာ ပြောင်းလဲသွားပြီး သူ၏ နှလုံးသားထဲတွင် တုန်လှုပ်ခြောက်ခြားသွားတော့သည်။

*ဒီဖိအားက… ရွှေရောင်အင်မော်တယ်အဆင့် ကျင့်ကြံသူတစ်ယောက်ဆီက လာတာနဲ့ လုံးဝမတူပါလား။*

ယန်ကျွယ်ကိုယ်တိုင်သည် မီးလျှံစွန့်ခွာခြင်းဂိုဏ်း၏ အစစ်အမှန် တပည့်တစ်ဦး ဖြစ်သည်။ သူသည် အင်အားအကြီးဆုံးမဟုတ်သော်ငြားလည်း ဂိုဏ်း၏ ပြီးပြည့်စုံသော အမွေအနှစ်ကို ရရှိထားပြီး အဆင့်တူ အခြားရွှေအင်မော်တယ်များထက် သိသိသာသာ ပိုမိုအားကောင်းလေသည်။ သို့တိုင်အောင် လုရီနှင့် ရင်ဆိုင်ရသောအခါ သူသည် မီးလျှံစွန့်ခွာခြင်းဂိုဏ်း၏ အင်အားအကြီးဆုံး တိုက်ရိုက် တပည့်များနှင့် ရင်ဆိုင်ရစဉ်ကထက်ပင် များစွာ ကြီးမားသော မယုံကြည်နိုင်လောက်သည့် ဖိအားကို ခံစားနေရသည်။

သူသည် ဟိန်းဟောက်သံ တစ်ချက် ပြုလိုက်ပြီး သူ၏ ခန္ဓာကိုယ်မှာ ပြောင်းလဲမှု တစ်ခု ဖြစ်ပေါ်လာ၏။ သူ၏ လူ့ခန္ဓာကိုယ်ပေါ်တွင် အနီရောင်အကြေးခွံများ ထွက်ပေါ်လာပြီး ထိုအကြေးခွံများအပေါ်၌ နက်နဲသော တာအိုအင်းကွက်များက ကခုန်နေသော မီးလျှံများပမာ လှည့်ပတ် စီးဆင်းနေ၏။

ယန်ကျွယ်၏ ခန္ဓာကိုယ် ပြောင်းလဲမှုများနှင့်အတူ သူ၏ အရှိန်အဝါသည်လည်း ပိုမိုကြမ်းတမ်းကာ အရိုင်းဆန်လာတော့သည်။

လုရီသည် မျက်ခုံးပင့်လိုက်သော်လည်း အံ့ဩဟန် မပြခဲ့ပေ။ ယန်ကျွယ်၏ အရှိန်အဝါသည် လူသားတစ်ဦး၏ အရှိန်အဝါ မဟုတ်ဘဲ မိစ္ဆာ

မျိုးနွယ်တစ်ဦး၏ အရှိန်အဝါ ဖြစ်ကြောင်း သူ အစောကတည်းက ခံစားမိခဲ့ပြီး ဖြစ်သည်။

စွမ်းအားတိုးမြင့်သွားသော ယန်ကျွယ်ကို ရင်ဆိုင်ရင်း လုရီ၏ မျက်နှာအမူအရာမှာ မပြောင်းလဲဘဲ သူ၏ လက်ကို နောက်တစ်ကြိမ် ဖိချလိုက်ပြန်သည်။

" မီးလျှံစွန့်ခွာခြင်း အရှေ့အလင်း တံဆိပ်တော်။ငါ့အတွက် ဒါကို ချိုးဖျက်ပေး။"

ယန်ကျွယ်က ဟိန်းဟောက်လိုက်ပြီး သူ၏ ခန္ဓာကိုယ်ပေါ်တွင် ရွှေရောင်မီးလျှံများ တောက်လောင်လာသည်။ သူ၏ လက်များက အလွန်လျင်မြန်သော အရှိန်ဖြင့် တံဆိပ်များကို ဖန်တီးလိုက်ရာ သူ၏ ပတ်လည်မှ ရွှေရောင်မီးလျှံများသည် နောက်ဆုံးတွင် ရှုပ်ထွေးသော တံဆိပ်များအဖြစ်သို့ ပြောင်းလဲကာ တည်ငြိမ်သော ကြယ်ကြီး တစ်လုံးအဖြစ် စုစည်းသွားလေသည်။

ထိုတည်ငြိမ်သော ကြယ်ကြီးသည် အလင်းတန်းတစ်ခုအဖြစ်သို့ ပြောင်းလဲကာ ဧရာမ မီးလျှံလက်ဖဝါးကြီးထံသို့ ပစ်လွှတ်လိုက်၏။

ဤအခိုက်အတန့်တွင် မီးလျှံစွန့်ခွာခြင်း ဂိုဏ်းမှ တပည့်များစွာ ပျံသန်းထွက်လာကြသည်။ အချို့မှာ အစစ်အမှန် တပည့်များ ဖြစ်ကြပြီး အချို့မှာ သာမန် အတွင်းဂိုဏ်းသားများ ဖြစ်ကြသည်။

ယန်ကျွယ်နှင့် လုရီတို့၏ ကြီးကျယ်သော တိုက်ပွဲကို မြင်တွေ့ရသောအခါ သူတို့အားလုံးမှာ အံ့ဩမှုဖြင့် မျက်လုံးများ ပြူးကျယ်သွားကြ၏။

"အဲ့ဒါ…စီနီယာ အစ်ကို ယန်ကျွယ် မဟုတ်လား။"

"အားပါးပါး… စီနီယာ အစ်ကို ယန်ကျွယ် တော်တော်လေး အသည်းအသန် တိုက်ခိုက်နေရပုံပဲ။ ပြိုင်ဘက်က ဘယ်သူလဲ။ အားကောင်းလိုက်တဲ့ မီးလျှံ အင်မော်တယ် သိုင်းပညာပဲ။"

"စီနီယာ အစ်ကို ယန်ကျွယ်က ငါတို့ မီးလျှံစွန့်ခွာခြင်းဂိုဏ်းရဲ့ တိုက်ရိုက် တပည့်တွေထဲမှာ အဆင့်သုံးဆယ်အတွင်း ဝင်သူ ဖြစ်ပေမယ့် ဒီလောက်တောင် ခက်ခက်ခဲခဲ တိုက်ခိုက်နေရတယ် ဟုတ်လား။ အဲ့ဒီ ကျင့်ကြံသူက ဘယ်သူလဲ၊ ငါတို့ ဘာလို့ သူ့ကို တစ်ခါမှ မမြင်ဖူးရတာလဲ။"

"…"

အတွင်းဂိုဏ်းသားများသည် မယုံကြည်နိုင်စွာဖြင့် အသည်းအသန် ဆွေးနွေးနေကြစဉ် တိုက်ရိုက်တပည့်များမှာမူ မျက်မှောင်ကြုတ်ကာ လေးနက်သော မျက်နှာထားများဖြင့် ရှိနေကြသည်။

"ဒီလောက် ကြီးကျယ်တဲ့ နတ်ဘုရား သိုင်းကွက်တွေပဲ။ အဲ့ဒီ လူသား မျိုးနွယ်က ဘယ်သူလဲ။ ဘယ်သူ သူ့ကို သိကြသေးလဲ" ဟု အရပ်မြင့်ပြီး တောင့်တင်းကာ အနက်ရောင် စစ်ချပ်ဝတ်ကို ဝတ်ဆင်ထားသော အမျိုးသား တစ်ဦးက မျက်မှောင်ကြုတ်လျက် မေးလိုက်သည်။

သူ၏ ဘေးရှိ တိုက်ရိုက် တပည့်အချို့က ခေါင်းခါပြလိုက်ကြသည်။

"မသိဘူး၊ ဒါပေမဲ့ ဒီအတိုင်း ကြည့်ရတာတော့

ယန်ကျွယ် ဒုက္ခရောက်တော့မယ့် ပုံပဲ။ သူက မီးလျှံစွန့်ခွာခြင်း အရှေ့အလင်း တံဆိပ်တော်ကိုတောင် သုံးလိုက်ပြီ၊ အခြေအနေအရ ကြည့်ရရင် အဲ့ဒီ သိုင်းကွက်ကိုတောင် ချိုးဖျက်နိုင်မှာ မဟုတ်လောက်ဘူး။"

သူတို့ ပြောဆိုနေကြစဉ်မှာပင် ရွှေရောင်ကြယ်ကြီးသည် ဧရာမ မီးလျှံ လက်ဖဝါးကြီးထံသို့ ရောက်ရှိသွားခဲ့ပြီ ဖြစ်သည်။

ထိုစဉ်မှာပင် မီးလျှံ လက်ဖဝါးကြီး၏ ထိပ်ဖျားများမှ အနီရောင်မီးလျှံ စီးကြောင်းများ ပန်းထွက်လာခဲ့၏။

ဤစီးကြောင်းများသည် ရွှေရောင် ကြယ်ကြီးထံသို့ ချက်ချင်း တိုးဝင်သွားပြီး မျက်စိတစ်မှိတ်အတွင်းမှာပင် အနီရောင်မီးလျှံ စီးကြောင်းများသည် တည်ငြိမ်သော ကြယ်ကြီး၏ မျက်နှာပြင်ပေါ်တွင် ထူးဆန်းသော အင်းကွက်ပုံစံများ ဖန်တီးလိုက်သည်။ ဤပုံစံများသည် ထူးခြားသော တုန်ခါမှုများကို သယ်ဆောင်လာပုံရပြီး ခဏလေးအတွင်းမှာပင် ရွှေရောင်ကြယ်ကြီးမှာ မီးငြိမ်းသတ်ခံလိုက်ရသည့်အလား မှေးမှိန်သွား၏။ နေရာလပ်ကို လောင်ကျွမ်းနေသော အပူချိန် မြင့်မားမှုများပင်လျှင် မီးလျှံများ ငြိမ်းသတ်ခံလိုက်ရသည့်နှယ် ဖြစ်၏။

တစ်ချိန်တည်းမှာပင် ပတ်ပတ်လည်မှ အနီရောင်မီးလျှံစီးကြောင်းများမှာမူ ပို၍ပင် တောက်ပလာခဲ့သည်။

မီးလျှံစွန့်ခွာခြင်း ဂိုဏ်းမှ တပည့်များအားလုံး ပါးစပ်အဟောင်းသားဖြင့် ကြည့်နေကြစဉ်မှာပင် ရွှေရောင်ကြယ်ကြီးသည် နောက်ဆုံးတွင် လုံးဝ ပျောက်ကွယ်သွားပြီး အလင်းရောင်အကြွင်းအကျန်အမျှင်တစ်စသာ ကျန်ရစ်တော့သည်။ အနီရောင် မီးလျှံစီးကြောင်းများသည် ပြန်လည် ရုပ်သိမ်းသွားပြီး မီးလျှံလက်ဖဝါးကြီးထဲသို့ ပြန်လည် ပေါင်းစပ်

ဝင်ရောက်သွား၏။

ပြန်လည် ဝင်ရောက်လာသော မီးလျှံစီးကြောင်းများကို စုပ်ယူပြီးနောက် မီးလျှံ လက်ဖဝါးကြီး၏ တောက်လောင်မှုမှာ ပိုမို ပြင်းထန်လာပြီး ဂြိုဟ်တစ်လုံးကဲ့သို့ ကျယ်ပြောသော အရာ တစ်ခုကို လွှမ်းခြုံနိုင်သည့်အလား အဆက်မပြတ် ကျယ်ပြန့်လာခဲ့သည်။

ဤဖိအားအောက်တွင် ယန်ကျွယ်သည် ဧရာမတောင်ကြီး တစ်လုံးက သူ့အပေါ် ဖိထားသကဲ့သို့ ခံစားလိုက်ရပြီး အသက်ပင် မရှူနိုင်တော့သလောက် ဖြစ်သွားသည်။

"ဒါက ဘယ်လို ဖြစ်နိုင်မှာလဲ။ မီးလျှံစွန့်ခွာခြင်း အရှေ့အလင်း တံဆိပ်တော်က သူ့ဆီမှာ စုပ်ယူခံလိုက်ရတယ် ဟုတ်လား။"

"ဒါက ဘယ်လို အင်မော်တယ် သိုင်းပညာမျိုးလဲ။"

မီးလျှံစွန့်ခွာခြင်း ဂိုဏ်းမှ အစစ်အမှန် တပည့်များအဖွဲ့ပင်လျှင် ဤအခိုက်အတန့်၌ ထိတ်လန့်တုန်လှုပ်သော မျက်နှာထားများ ဖြစ်ပေါ်နေကြသည်။

မီးလျှံစွန့်ခွာခြင်း အရှေ့အလင်း တံဆိပ်တော်သည် မီးလျှံစွန့်ခွာခြင်း ဂိုဏ်း၏ အလွန်အစွမ်းထက်သော ရွှေရောင် အင်မော်တယ်

သိုင်းပညာ တစ်ခု ဖြစ်သည်။ အကြီးအကဲများနှင့် မဟာ အကြီးအကဲများအပါအဝင် အင်မော်တယ်ဧကရာဇ်များနှင့် အင်မော်တယ်အရှင်သခင်များသည် မီးလျှံစွန့်ခွာခြင်း အရှေ့အလင်း တံဆိပ်တော်ကို အသုံးပြု၍ တည်ငြိမ်သော ကြယ်စနစ်တစ်ခုလုံးကို အပြီးတိုင် ဖျက်ဆီးနိုင်သည်။

အသုံးပြုသူသည် အကြီးအကဲများ၊ မဟာအကြီးအကဲများကဲ့သို့ အစွမ်းမထက်သည့်တိုင် ယန်ကျွယ်၏ အစွမ်းသည် ရွှေရောင်အင်မော်တယ်အဆင့်တွင် ရှိနေဆဲဖြစ်ရာ မီးလျှံစွန့်ခွာခြင်း အရှေ့အလင်း တံဆိပ်တော်၏ စွမ်းအားမှာ အလွန်တရာ ကြောက်မက်ဖွယ် ကောင်းလှပေ၏။

တိုက်ရိုက်တပည့်များ၏ မူလမျှော်လင့်ချက်များအရ မီးလျှံစွန့်ခွာခြင်း အရှေ့အလင်း တံဆိပ်တော်သည် ဧရာမ မီးလျှံလက်ဖဝါးကြီးကို

မချိုးဖျက်နိုင်သည့်တိုင် အမည်မသိ မီးဓာတ်

ရွှေအင်မော်တယ်အား အနည်းငယ် ဒုက္ခပေးနိုင်သင့်သည်ဟု တွေးထင်ထားခဲ့ကြသည်။

သို့သော် ဤသို့သော ရလဒ်မျိုးကိုတော့ သူတို့ မည်သည့်အခါကမျှ မမျှော်လင့်ခဲ့ကြပေ။

မီးလျှံစွန့်ခွာခြင်းဂိုဏ်း၏ လေးစားကြည်ညိုဖွယ်ရာ မီးလျှံစွန့်ခွာခြင်း အရှေ့အလင်း တံဆိပ်တော်က တကယ်ပဲ ဝါးမြိုခံလိုက်ရတယ်တဲ့လား။

မထင်မှတ်ဘဲ ပြိုင်ဘက်၏ သိုင်းကွက်ကို ပိုမိုအားကောင်းသွားစေသည့် အားဖြည့် အစာ

တစ်ခု ဖြစ်သွားခဲ့သည်တကား။ ဤသည်ကို မည်သို့ လုပ်ဆောင်ခဲ့သည်ကို သူတို့ နားမလည်နိုင်ခဲ့ကြချေ။

တစ်ခဏမျှ အစစ်အမှန်

တပည့်များအားလုံးမှာ အနည်းငယ် မှင်သက်မိနေကြသည်။

ထိုသူများထဲတွင် အထိတ်လန့်ဆုံးသူမှာမူ သဘာဝအတိုင်းပင် ယန်ကျွယ်သာ ဖြစ်ပေတော့သည်။

သူသည် တိုး၍ အားကောင်းလာသော မီးလျှံလက်ဖဝါးကြီးကို မျက်လုံးများ ပြူးကျယ်လျက် အသက်ကို အနိုင်နိုင်ရှူရင်း စိုက်ကြည့်နေမိသည်။ ထာဝရလှောင်အိမ်တစ်ခုအတွင်း ပိတ်မိနေသော ပိုးကောင်တစ်ကောင်ကဲ့သို့ လွတ်မြောက်နိုင်ခြင်းငှာ မစွမ်းသာတော့ချေ။

နောက်တစ်ခဏတွင် မီးလျှံလက်ဖဝါးကြီးသည် ရုတ်တရက်ဆိုသလို မီးလျှံစီးကြောင်းများအဖြစ်သို့ ပြောင်းလဲကာ ပျောက်ကွယ်သွားပြီး သူ၏ ပတ်လည်မှ ဟင်းလင်းပြင်သည် လှပသော မီးပင်လယ်ကြီးတစ်ခုအဖြစ်သို့ ပြောင်းလဲကာ ပတ်ဝန်းကျင်မှ အမှောင်ထုကို အနီရောင်သို့ ဆိုးလိုက်လေသည်။

နေရာတွင် မှင်တက်မိနေခဲ့သော ယန်ကျွယ်သည် သတိပြန်လည်ဝင်လာခဲ့သည်။ သူသည် ပျံ့နှံ့နေသော မီးပင်လယ်ကြီးကို ကြည့်လိုက်ပြီး၊ ထို့နောက် ရှုပ်ထွေးသော အကြည့်များဖြင့် လုရီကို တစ်ဖန် ကြည့်လိုက်လေတော့သည်။