ကြယ်တာရာတပ်မတော် အခင်းအကျင်း၏ ပိုမိုကောင်းမွန်သော ပုံစံ (၂)...

~သို့သော်ငြားလည်း အင်မော်တယ်ဘုရင်နယ်ပယ်မှ ကျင့်ကြံသူများမှာမူ ကွဲပြားကြ၏။ သူတို့သည် တာအိုကို နားလည်သဘောပေါက်ပြီး သူတို့၏ အတွင်းကမ္ဘာများကို တာအိုနှင့် ရောစပ်ကာ မိမိကိုယ်ကို တာအိုနှင့် ယှက်နွယ်စေလျက် မူလဇာစ်မြစ်စွမ်းအင်ကို ဆုပ်ကိုင်ကြသည်။ နောက်ဆုံးတွင် သူတို့၏ အတွင်းကမ္ဘာများသည် စကြဝဠာအတွင်း၌ အင်မော်တယ် နယ်ပယ်တစ်ခုကိုပင် ပုံဖော်ပြသနိုင်စွမ်းရှိလာသည်။

ယေဘုယျအားဖြင့်ဆိုသော် အင်မော်တယ် သူတော်စင်နယ်ပယ်မှ ကျင့်ကြံသူများသည်ပင်လျှင် နှစ်ပေါင်း သန်းရာနှင့် ချီ၍ အလွန်ရှည်လျားသော သက်တမ်း ရှိလင့်ကစား သေဆုံးကြရသေးသည်။

သို့သော် သူတို့ အင်မော်တယ် ဘုရင်နယ်ပယ်သို့ ရောက်ရှိသွားသည်နှင့် သူတို့၏ အတွင်းကမ္ဘာများသည် တာအိုနှင့် ရောနှောသွားပြီး တာအိုကိုယ်တိုင် မပျက်စီးတော့သည့် တိုင်အောင် သူတို့သည် သေဆုံးခြင်း သို့မဟုတ် ပျက်စီးခြင်းမရှိတော့ဘဲ စစ်မှန်သော ထာဝရ မသေခြင်းကို ရရှိသွားကြလေသည်။

အင်မော်တယ်ဘုရင် အထက်တွင် အင်မော်တယ်အင်ပါယာ ရှိပြီး သူသည် တာအိုတစ်ခု၏ မူလဇာစ်မြစ်စွမ်းအင်ကို လုံးဝ ကျွမ်းကျင်သွားကာ စကြဝဠာ၏ အဆုံးစွန် ကန့်သတ်ချက်များသို့ ရောက်ရှိသွားပြီး စစ်မှန်သော အစွမ်းထက်ဆုံးပုဂ္ဂိုလ် ဖြစ်လာခြင်းပင်။

ထိုသို့သော စွမ်းအားရှင်များသည် အတွေး

တစ်ချက်ဖြင့် ကြယ်များကို ချေမှုန်းနိုင်သလို ကောင်းကင်နှင့်မြေကြီးကိုလည်း ပြန်လည်ဖန်တီးနိုင်စွမ်း ရှိကြ၏။

အင်မော်တယ် ဘုရင် နယ်ပယ်၏ ကျင့်ကြံခြင်းနည်းစနစ်မှတစ်ဆင့် လုရီသည် အင်မော်တယ်ဘုရင်များနှင့် အင်ပါယာများ နှစ်ဦးလုံး၏ စွမ်းအားကို အတိုင်းအတာ တစ်ခုအထိ နားလည်သွားခဲ့သည်။ ဤအချက်က လုရီကို မယုံနိုင်လောက်အောင် တုန်လှုပ်စေခဲ့သော်လည်း သူ့ကို ပို၍ပင် အံ့အားသင့်စေခဲ့သည်။

ထိုသို့သော စွမ်းအားရှင်များပင်လျှင် ကျိုယိုချီကို အနိုင်မယူနိုင်ခဲ့ခြင်းမှာ အတော်လေး အဓိပ္ပာယ်

မရှိလှပေ။

နေလောင်ကြယ်ကြွေ သိုင်းနည်းစနစ်ကို အခြေခံနားလည်မှု ရရှိပြီးနောက် လုရီသည် မူလဇာစ်မြစ်စွမ်းအင်အပေါ် သူ၏ နားလည်မှုကို ပိုမိုနက်ရှိုင်းစေခဲ့သည်။ သူသည် ရွှေအင်မော်တယ် နယ်ပယ်တွင်သာ ရှိနေသေးပြီး သူ၏ အတွင်းကမ္ဘာမှာ စတင်ပုံဖော်စ ဖြစ်ကာ မပြီးပြည့်စုံသေးသော်လည်း မည်သို့ပင် ဖြစ်စေ သူ၏ အတွင်းကမ္ဘာသည် တာအို စွမ်းအင်နှင့် ဖရိုဖရဲ ချီတို့ဖြင့်ပင် တုန်ခါနေခဲ့သည်။

တာအိုစွမ်းအင်ကို အသုံးချခြင်းဖြင့် လုရီသည် အပြင်ဘက်မှ တာအိုနှင့်လည်း ယှက်နွယ်နိုင်ခဲ့ရာ ၎င်းမှာ သူသည် ရွှေအင်မော်တယ် နယ်ပယ်တွင်သာ ရှိနေသော်လည်း အင်မော်တယ် ဘုရင်နယ်ပယ်၏ နည်းစနစ်များကို လုပ်ဆောင်နိုင်ပြီး တာအို မူလဇာစ်မြစ် စွမ်းအင်ကို ထိန်းချုပ်နိုင်သည်ဟု ဆိုလိုသည်။

သူသည် ယခင်ကတည်းက တာအိုစွမ်းအင်ကို အသုံးချနိုင်ခဲ့သော်လည်း ယခုနှင့်နှိုင်းယှဉ်လျှင် ကွာဟချက်မှာ ကြီးမားလှသည်။

ယခင်က လုရီသည် တာအိုစွမ်းအင်၏ အစိတ်အပိုင်းအနည်းငယ်ကို အသုံးချရန် သူ၏အင်အား အကုန်သုံးရန် လိုအပ်ခဲ့လျှင် ယခုအခါ လုရီသည် အားထုတ်မှု၏ ဆယ်ပုံတစ်ပုံသာ လိုအပ်တော့ပြီး ထို့အပြင် လုရီ၏ တာအိုစွမ်းအင်ကို အသုံးချနိုင်သည့် ကန့်သတ်ချက်မှာလည်း အဆက်မပြတ် တိုးတက်နေခဲ့သည်။

သူသည် ဤနည်းစနစ်ကို သူ၏နောက်ဆုံးလက်နက်အဖြစ် ထားရှိမည့်အစား အင်မော်တယ်ဝိညာဉ်ချီကဲ့သို့ သူ၏ပုံမှန်နည်းစနစ်များထဲမှ တစ်ခုအဖြစ်ပင် သတ်မှတ်နိုင်နေပြီ ဖြစ်သည်။

မိမိကိုယ်အတွင်းမှ ပြောင်းလဲမှုများကို ခံစားမိသော် လုရီသည် အတွင်းစိတ်ထဲမှ အူမြူးသွားပြီး ဆက်လက်နားလည်ရန် ကြိုးစားတော့သည်။

နှစ်ငါးဆယ်အကြာတွင် လုရီသည် ဤ

အင်မော်တယ်ဘုရင် သိုင်းကျမ်းကို အောင်မြင်မှုကြီးမားသောနယ်ပယ်သို့ ယူဆောင်လာခဲ့ရာ ဤအရှိန်မှာ မယုံနိုင်လောက်အောင် အံ့မခန်းဖြစ်နေခဲ့သည်။

ထို့အပြင် လုရီသည် နေလောင်ကြယ်ကြွေသိုင်းနည်းစနစ်မှ အားကောင်းသော လျှို့ဝှက်နည်းစနစ်များစွာကိုပင် သင်ယူခဲ့ပြီး သူ၏အင်အားကို တစ်ဖန် သိသိသာသာ မြှင့်တင်နိုင်ခဲ့ပြန်သည်။

ဤနှစ်ငါးဆယ်အတွင်း အင်မော်တယ်ဘုရင်သိုင်းကျမ်းအပေါ် သူ၏နားလည်မှုကို တိုးတက်စေသည့်အပြင် လုရီသည် အခြားကိစ္စများကိုလည်း လျစ်လျူမရှုခဲ့ပါ။

သူသည် ထျန်းမင်၏ တာအို ပို့ချပွဲတစ်ခုကိုမျှ

မလွတ်ခဲ့ဘဲ သူ၏ အခင်းအကျင်းတာအို၊ ဆေးလုံးတာအိုနှင့် လက်နက်တာအိုတို့၏ လေ့ကျင့်မှုမှာလည်း မရပ်မနား ဆက်လက်လုပ်ဆောင်ခဲ့ပေသည်။

ထိုမျှမကသေး၊ လုရီ၏ ကြယ်တာရာတပ်မတော် အခင်းအကျင်းအပေါ် ဖန်တီးတွက်ချက်မှုများသည် သူ၏ အခင်းအကျင်းတာအို တိုးတက်မှုနှင့်အတူ ဆက်လက်တိုးတက်နေခဲ့ပြီး ကြီးမားသော တိုးတက်မှုများ ရရှိခဲ့သည်။

လုရီ ယခုဖန်တီးတွက်ချက်ထားသော ကြယ်တာရာတပ်မတော် အခင်းအကျင်းသည် ယခင်နှင့်နှိုင်းယှဉ်လျှင် များစွာတိုးတက်နေပြီး ကာလတိုအတွင်း ထပ်မံတိုးတက်နိုင်စွမ်းမရှိတော့ဟု ထင်ရလေသည်။

သူ၏ ကျင့်ကြံမှုအခြေခံ ထပ်မံတိုးတက်လာခြင်း သို့မဟုတ် သူ တာအိုမူလဇာစ်မြစ်ကို ပိုမိုနက်ရှိုင်းစွာ နားလည်လာပြီး မူလဇာစ်မြစ်စွမ်းအင်ကို တပ်ဖွဲ့အခင်းအကျင်းထဲသို့ ပေါင်းစပ်ထည့်သွင်းနိုင်မှသာလျှင် မတူညီသော ပြောင်းလဲမှုများကို ယူဆောင်လာနိုင်ပေလိမ့်မည်။

သို့သော်လည်း လက်ရှိတိုးတက်မှုမှာ အတော်လေး သိသာထင်ရှားပြီး ကြယ်တာရာတပ်မတော်အတွက် ကြီးမားသော အင်အားမြှင့်တင်မှုတစ်ခု ဖြစ်ပါ၏။

ထို့ကြောင့် လုရီသည် လင်းလောင်တောင်ထိပ်ရှိ ယွီဟန်ကွမ်းကို သွားရှာခဲ့သည်။

လုရီသည် လွန်ခဲ့သောမကြာမီက ပို့ချပွဲတစ်ခု ပေးပြီးကာစဖြစ်သောကြောင့် ယွီဟန်ကွမ်းသည် တံခါးပိတ်ကျင့်ကြံနေခဲ့ရာ လုရီသူ့ကို ရှာတွေ့သောအခါ ယွီဟန်ကွမ်းသည် သူ၏ ကျင့်ကြံမှုသို့ ပြန်သွားရန် စိတ်အားထက်သန်နေခဲ့သည်။

"လုရီ၊ ဘာကိစ္စလဲ။ တစ်ခုခုရှိလို့လား။ မင်းသောက်ချင်ရင် ယွမ်ဝူကို သွားရှာလိုက်၊ ငါကျင့်ကြံနေတုန်းပဲကွ"

လုရီက ခပ်ဖွဖွရယ်မောလိုက်သည်။

"ကျွန်တော် ကြယ်တာရာ တပ်မတော်ရဲ့ အခင်းအကျင်းကို တိုးတက်အောင်လုပ်ထားတယ် ၊ အစ်ကိုဟန်ကွမ်းက ကျင့်ကြံဖို့ ကြံရွယ်နေတယ်ဆိုရင် ကျွန်တော် နောက်တစ်ခေါက်မှ ပြန်လာခဲ့ရမလားဗျ။"

ဤစကားကိုကြားသော် ယခုလေးတင် ကျင့်ကြံရန် ကြံရွယ်နေခဲ့သော ယွီဟန်ကွမ်းသည် ချက်ချင်းပင် အော်ဟစ်လာ၏။

"ကျင့်ကြံတယ် ဟုတ်လား။ မင်းနားကြားမှားတာနေမှာပါ၊ လာ... လာ... လုရီ၊ အထဲဝင်ခဲ့ပါ"

ယွီဟန်ကွမ်းက လုရီကို အခန်းထဲသို့ ဆွဲခေါ်သွားပြီး သူ၏မျက်နှာထက်တွင် အံ့ဩမှုများ ပြည့်နှက်နေခဲ့သည်။

ထို့နောက် သူက လုရီကို စိတ်အားထက်သန်စွာ ကြည့်လိုက်သည်။

"မင်းတကယ်ပဲ ကြယ်တာရာတပ်မတော်ရဲ့ အခင်းအကျင်းကို တိုးတက်အောင်လုပ်ခဲ့တာလား။ ဒါက ငါတို့ယွီမိသားစုရဲ့ မျိုးဆက်များစွာရဲ့ လက်ရာတစ်ခုပဲ၊ မင်းက ရာစုနှစ် အနည်းငယ်အတွင်းမှာပဲ တိုးတက်အောင် လုပ်နိုင်ခဲ့တယ်ဟုတ်လား။"

ယွီဟန်ကွမ်းသည် လုရီ၏ ပါရမီအပေါ် သံသယမရှိဘဲ လုရီသည် အခင်းအကျင်းကို သေချာပေါက် တိုးတက်အောင်လုပ်နိုင်မည်ကို သိရှိသော်လည်း ဤအမြန်နှုန်းမှာ ယွီဟန်ကွမ်းကို အံ့အားသင့်စေခဲ့ပါသည်။

လုရီက ရယ်မောကာ ခေါင်းညိတ်လိုက်သည်။ "အစ်ကို ဟန်ကွမ်း ကြည့်လိုက်တာနဲ့ သိသွားမှာပါ။"

ပြောပြောဆိုဆိုနှင့် လုရီက ကျောက်စိမ်းပေလွှာကို ထုတ်ယူကာ ယွီဟန်ကွမ်းထံသို့ ပစ်ပေးလိုက်သည်။

ယွီဟန်ကွမ်းမှာ ဖမ်းယူလိုက်ပြီးတပြိုင်နက် ၎င်းကို မစောင့်ဆိုင်းနိုင်တော့ဘဲ ကြည့်ရှုလိုက်သည်။ သူ ဖတ်လေလေ သူ၏ အမူအရာမှာ ပိုမိုတုန်လှုပ်လာလေလေဖြစ်ပြီး အံ့ဩမှုနှင့် ဝမ်းမြောက်မှုတို့ဖြင့် ပြည့်နှက်နေခဲ့သည်။

ကျောက်စိမ်းပေလွှာ၏ အကြောင်းအရာများကို ဖတ်ရှုပြီးနောက် ယွီဟန်ကွမ်းက မော့ကြည့်လိုက်ရာ သူ၏မျက်လုံးများ တဖျပ်ဖျပ်လက်နေပြီး

တအံ့တဩဖြစ်စွာ မေးလိုက်သည်။

"ဒီလို ပြုပြင်မွမ်းမံမှုတွေက တကယ်အလုပ်ဖြစ်နိုင်လို့လား။ သူတို့က တပ်ဖွဲ့ အခင်းအကျင်းထဲက ကျင့်ကြံသူအားလုံးရဲ့ အင်အားကို မြှင့်တင်ပေးနိုင်တယ်ဟုတ်လား။"

လုရီ တိုးတက်အောင်လုပ်ခဲ့သော ပြန်လည်ပြင်ဆင်ထားသည့် တပ်ဖွဲ့အခင်းအကျင်းသည် သူ ဖန်တီးတွက်ချက်နားလည်ခဲ့သော ယင်ယန်တာအိုတံဆိပ် လျှို့ဝှက်စွမ်းရည်ကို အခြေခံထားခြင်း ဖြစ်လေသည်။ ယင်ယန်တာအိုတံဆိပ်သည် အခြား လျှို့ဝှက်သိုင်းနည်းစနစ်များနှင့် ကွဲပြား၏။

လျိုနင်ရွှမ်းနှင့် အခြားသူများသည် တာအိုတံဆိပ်များအဖြစ် ပေါင်းစပ်ကာ လုရီနှင့် ပေါင်းစည်းနိုင်ခြင်းမှာ သူတို့သည် တာအို လက်တွဲဖော်များ ဖြစ်သောကြောင့်ဖြစ်သည်။ သူတို့၏ နေ့စဉ် နှစ်ကိုယ်တူကျင့်ကြံခြင်းမှ ဖြစ်ပေါ်လာသော ပြောင်းလဲမှုများသည် တာအိုယင်ယန် အင်မော်တယ်သိုင်းကျမ်းကို ဗဟိုပြုထားလေ၏။

တာအိုယင်ယန် အင်မော်တယ်သိုင်းကျမ်း မရှိဘဲ ဤသို့သော လျှို့ဝှက်သိုင်းနည်းစနစ်မှာ အသုံးဝင်မည် မဟုတ်သော်လည်း ထိုနည်းစနစ်အပြင် ယင်ယန်တာအိုတံဆိပ်သည် လျိုနင်ရွှမ်းနှင့် အခြားသူများ၏ ကျင့်ကြံမှုအခြေခံကိုလည်း ချဲ့ထွင်ပေးနိုင်ခဲ့ရာ သူတို့ ကျိုယိုချီစစ်မြေပြင်တွင် ရှိစဉ်က အကြိမ်များစွာ အသုံးပြုခဲ့ကြသည်။

အကြိမ်တိုင်း သူတို့၏ အင်အားကို ချဲ့ထွင်လိုက်တိုင်း သူတို့၏ စွမ်းအားမှာ သိသိသာသာ တိုးတက်လာပြီး လင်းလောင်တောင်ထိပ်သခင်မကိုပင် အမီလိုက်နိုင်သည့်အဆင့်အထိ ရောက်ရှိခဲ့သည်။

တာအိုတံဆိပ်တွင် ယင်ယန်တာအို၏ အနှစ်သာရပါဝင်သော်လည်း ၎င်းတွင် အခင်းအကျင်းအစိတ်အပိုင်းများကိုလည်း ထည့်သွင်းထားသည် ။ အတွင်းမှ ယင်ယန်တာအိုကို တပ်ဖွဲ့အခင်းအကျင်းတွင် အသုံးချနိုင်မည်မဟုတ်ပေ၊ မည်သို့ပင်ဖြစ်စေ ၎င်းသည် ယင်ယန်နိယာမကို နက်ရှိုင်းစွာ နားလည်ရန် လိုအပ်ပြီး လျိုနင်ရွှမ်းနှင့် အခြားသူများသည် နှစ်ကိုယ်တူကျင့်ကြံမှုအကြိမ်တိုင်းတွင် အနည်းငယ်သော ထိန်းချုပ်မှုကို ရရှိခဲ့ကြသည်။

သို့သော်လည်း ကြယ်တာရာတပ်မတော်မှ ကျင့်ကြံသူများသည် သေချာပေါက်

မလုပ်ဆောင်နိုင်ကြပေ။

လုရီသည် ယင်နှင့်ယန်တို့၏ အမြဲတမ်းချဲ့ထွင်နေသော အနှစ်သာရကို အခင်းအကျင်းမှတစ်ဆင့် ထင်ရှားပြသရန် ရွေးချယ်ခဲ့ပါသည်။ ရလဒ်အနေဖြင့် ဤသို့သော တပ်ဖွဲ့အခင်းအကျင်းအမျိုးအစားသည် လျိုနင်ရွှမ်းနှင့် အခြားသူများ၏ ပြောင်းလွယ်ပြင်လွယ်မှုကို မရှိစေခဲ့ချေ။ ၎င်းသည် တိုက်ပွဲအတွင်း သတ်မှတ်ထားသော အခင်းအကျင်းတစ်ခုကို ထိန်းသိမ်းရန် လိုအပ်သော်လည်း တစ်ချိန်တည်းတွင် ဤအခင်းအကျင်းသည် ယခင်ကြယ်တာရာတပ်မတော် အခင်းအကျင်းများကဲ့သို့ လူတစ်ဦး၏စွမ်းအားကိုသာ မြှင့်တင်ပေးမည်မဟုတ်ဘဲ အခင်းအကျင်းအတွင်းမှ ကျင့်ကြံသူအားလုံး၏ အင်အားကို သိသိသာသာ မြှင့်တင်ပေးမည်ဖြစ်သည်။

ဤမြှင့်တင်မှုသည် ယင်ယန်တာအိုတံဆိပ်ထက် နည်းပါးသော်လည်း ၎င်းသည် အစစ်အမှန်အင်မော်တယ်နယ်ပယ်မှ ကျင့်ကြံသူတစ်ဦးစီကို ပြဿနာတစ်စုံတစ်ရာမရှိဘဲ အသေးစားနယ်ပယ် သုံးခုမှ ငါးခုအထိ မြှင့်တင်ပေးနိုင်သေးသည်။

လုရီသည် တစ်ချိန်က အခင်းအကျင်းကို အသုံးပြု၍ ကြယ်တာရာတပ်မတော် စစ်သားများ၏ နိယာမများအပေါ် အခြေခံနားလည်မှုကို မြှင့်တင်ပေးရန်ပင် စဉ်းစားခဲ့သေးသော်လည်း သူ၏လက်ရှိ အခင်းအကျင်းတာအို ကျွမ်းကျင်မှုမှာ အနည်းငယ် ချို့တဲ့နေပါသေးသည်။

မူလဇာစ်မြစ် စွမ်းအင်ကို စေ့စေ့စပ်စပ် ပေါင်းစပ်ပြီးသည်နှင့် ထိုသို့ လုပ်ဆောင်နိုင်လိမ့်မည်ဟု

လုရီ ယုံကြည်ပါ၏။

လောလောဆယ်တွင် သူသည် ဤမျှအထိသာ လုပ်ဆောင်နိုင်သေးသည်။ ဤသို့တွေးရင်း လုရီသည် အနည်းငယ် နှမြောမိသည်။

"နှမြောစရာပဲ၊ ကျွန်တော့်ရဲ့ လက်ရှိအခင်းအကျင်းတာအိုအဆင့်နဲ့ တခြားစုဆောင်းမှုတွေက ကန့်သတ်ချက်ရှိနေတော့ ပိုကောင်းအောင် မလုပ်နိုင်သေးဘူး။ ကျွန်တော့်အင်အား ပိုတိုးတက်လာတာနဲ့ တိုးတက်မှုတွေ ပိုလုပ်နိုင်မှာပါ။"

ဝမ်းမြောက်မှုအလယ်တွင် ရှိနေသော ယွီဟန်ကွမ်းသည် လုရီ၏ စကားကိုကြားသော် တစ်ခဏမျှ စကားမပြောနိုင်ဖြစ်သွားပြီး အလွန် ဆွံ့အ သွားသည်။

"ဒါကိုတောင် ကန့်သတ်ချက် ရှိတယ်လို့ ပြောသေးတာလား။"

သူက ပါးစပ်ဟလိုက်ပြီး ခါးသက်သော အပြုံးဖြင့်

"လုရီ၊ တော်တော့၊ ငါ့ရဲ့စိတ်အခြေအနေ ပြိုကျတော့မယ်... ဒီလိုတိုးတက်မှုတွေက အစွမ်းထက်လွန်းနေပါပြီ။ အရင်အခင်းအကျင်းက လူတစ်ယောက်ရဲ့အင်အားကိုပဲ မြှင့်တင်ပေးနိုင်တာ၊ အဲ့ဒါက တခြားလူတိုင်းအတွက် အရမ်းအန္တရာယ်များတယ်။ အခုက လူတိုင်းရဲ့အင်အားကို တိုးစေရုံတင်မကဘဲ တိုးတက်မှုအတိုင်းအတာက အရင်ကထက်တောင် ပိုပြင်းထန်သေးတယ်၊ ဒါက ကြီးမားတဲ့ တိုးတက်မှုတစ်ခုပဲ၊ ကြယ်တာရာတပ်မတော်ရဲ့ အင်အားကို အဆပေါင်းများစွာ မြှင့်တင်ပေးဖို့ လုံလောက်တယ်။"

လေးနက်သော မျက်နှာဖြင့် ယွီဟန်ကွမ်းက လုရီအား ဆက်ပြော၏။

"လုရီ၊ ယွီမိသားစုကိုယ်စား၊ ပြီးတော့ ကြယ်တာရာတပ်မတော်က စစ်သားအားလုံးကိုယ်စား မင်းကို ကျေးဇူးတင်ပါတယ်ကွာ"

လုရီက ရယ်မောလိုက်သည်။

"အစ်ကိုဟန်ကွမ်းက အားနာနေပြန်ပြီ။"

ယွီဟန်ကွမ်းကလည်း နွေးထွေးစွာ ပြုံးလိုက်၏။

"ဟုတ်တယ်၊ မင်းက ငါ့ညီမနဲ့ ဒီလောက်ရင်းနှီးပြီး ငါတို့မျိုးဆက်သစ်တွေထက်တောင် ဘိုးဘေးနဲ့ ပိုရင်းနှီးနေမှတော့ မင်းက ငါတို့ယွီမိသားစုဝင်တစ်ယောက်လိုပါပဲ၊ ဒါကြောင့် မင်းနဲ့ သိပ်ပြီးတော့ သူစိမ်းဆန်မနေတော့ဘူး။"

သူက ကျောက်စိမ်းပေလွှာကို သိမ်းဆည်းလိုက်ပြီး အနည်းငယ် စိတ်မရှည်စွာဖြင့်

"ငါခဏလောက် ထွက်သွားဖို့လိုတယ်၊ ကျောက်စိမ်းကြယ်ကို ပြန်ပြီး ဒီတပ်ဖွဲ့အခင်းအကျင်းကို ကြယ်တာရာတပ်မတော်တစ်ခုလုံးဆီ အမြန်ဆုံး ဖြန့်ဝေရမယ်။"

လုရီက မျက်ခုံးပင့်လိုက်ပြီး သူ၏အပြုံးမှာ

မရှင်းမလင်းဖြစ်နေသည်။

"ဘာလဲ။ တံခါးပိတ်ကျင့်ကြံတော့ဘူးလား။"

"တံခါးပိတ်ကျင့်ကြံတယ် ဟုတ်လား။ ငါနည်းနည်းလောက် စောင့်လိုက်ဦးမယ်၊ မင်းရဲ့နောက်ထပ် တာအို ပို့ချပွဲအထိ စောင့်လိုက်မယ်၊ အခု၊ ဒါက ပိုအရေးကြီးတယ်ကွ..."

ယွီဟန်ကွမ်းနှင့် လုရီတို့ စကားပြောရင်း တံခါးအပြင်သို့ ထွက်လာကြသည်။

"ဒါနဲ့ လုရီ၊ မင်းငါနဲ့အတူ ကျောက်စိမ်းကြယ်တာရာဂြိုဟ်ကို ပြန်လိုက်ခဲ့မှာလား။"

လုရီက ခေါင်းခါလိုက်သည်။

"ကျွန်တော် မလိုက်တော့တာပဲ ကောင်းမယ်၊ ကျွန်တော် အင်မော်တယ်ဘုရင်သိုင်းကျမ်းကို ဆက်ပြီး နားလည်အောင်လုပ်ဖို့ လိုသေးတယ်။"

ယွီဟန်ကွမ်း၏ မျက်နှာထက်တွင် ချက်ချင်းပင် မနာလိုအားကျဟန်တစ်ခု ပေါ်လာသည်။

သူသည် အင်မော်တယ်သိုင်းကျမ်းအကြောင်း ကြားသိခဲ့ရသော်လည်း ကံမကောင်းစွာဖြင့်

မီးတာအိုကျင့်ကြံသူ တစ်ဦးမဟုတ်သောကြောင့် မနာလိုစွာ ကြည့်နေရုံသာ တတ်နိုင်ခဲ့သည်။

"ဒါဆိုရင်တော့ ငါသွားတော့မယ်။"

နောက်ဆုံးတွင် ယွီဟန်ကွမ်းသည် တစ်ယောက်တည်း ထွက်ခွာသွားခဲ့ပြီး လုရီမှာမူ သူ၏ ဂူစံအိမ်သို့ ပြန်ကာ သူ၏ ကျင့်ကြံမှုကို ဆက်လက် လုပ်ဆောင်တော့သည်။