ဇာတ်လမ်းပိုင်းအသစ်

[အိပ်စက်ခြင်းဘဝက အရေးကြီးတယ်: သူ့ရဲ့ မှင်သက်နေတာကို လုယူလိုက်၊ ဟားဟားဟား။]

[ဒါကစိတ်ဝင်စားစရာပဲ: အဲဒီဇာတ်ကောင်ကို လူသား တစ်ယောက်က ဖန်တီးခဲ့တာလား။ ဘာလို့ ရုပ်ရည်က ထူးကဲသာလွန်ပြီး ထင်ရှားနေရတာလဲ။]

[ရုရှားမိသားစုငါးယောက်: အဲ့ဒီအိမ်က ရေစိမ့်လိမ့်မယ်၊ ကောက်ရိုးနဲ့ ဖာထေးရလိမ့်မယ်။]

[ငါ့ ဘဝရဲ့ နက်ရှိုင်းဆုံးအဆုံးမှာ မင်းနဲ့ တွေ့ဆုံခြင်း: ဝါး။ ဘယ်လောက်တောင် ရုပ်ဆိုးပြီး ပုံပျက်ပန်းပျက် ဇာတ်ကောင်လဲ။ သူ့ကို ခေါင်းဖြတ်ပစ်လိုက်။]

[ပေါက်ကွဲသွားသော အန်စာတုံးများ: မင်းက ဒီထောင့်ကနေ စကတ်အောက်ပိုင်းပုံတွေ ရိုက်ဖို့ ကြိုးစားနေတာလား။]

...

ထာဝရတိုင်းပြည်၏ ဒန်ဂျင်အရှင် ခန်းမဆောင်တွင် ရှားလော့ခ်သည် [လက်ဗလာဖြင့် သစ်ပင်များ ခုတ်လှဲခြင်း၊ သဘာဝ တိုက်ခိုက်ရေးသမားသည် အစမှ ပြန်လည် စတင်ရန် မကြောက်ရွံ့ပေ။] ဟူသော ပိုစ့်ကို ကြည့်ရှုနေခဲ့သည်။

"အရှင်ရှားလော့ခ်၊ ဗစ်တိုးရီးယားရဲ့ တည်ဆောက်ရေးက အလွန် ချောမွေ့စွာ ရှေ့ဆက်နေပါတယ်။ ဒီတိုးတက်မှုနဲ့ ဆိုရင် ကျွန်တော်တို့ တစ်လအတွင်း ဂိမ်းမာ ၅,၀၀၀ အတွက် မြို့တစ်မြို့ ဖန်တီးနိုင်ပါလိမ့်မယ်။" ဘရုသည် အကောင်းမြင်စိတ်များဖြင့် ပြည့်နှက်နေခဲ့သည်။

"အင်း၊ တကယ်ပဲ။" ရှားလော့ခ်က ခေါင်းညိတ်လိုက်သည်။

"ဗစ်တိုးရီးယားမြို့ တည်ထောင်ပြီး ရှင်သန်ရပ်တည်နိုင်ပြီ ဆိုတာနဲ့ ကျွန်တော်တို့ အရည်ကျိုခြင်းနဲ့ ပန်းပဲလုပ်ငန်းတွေ စတင် နိုင်ပါလိမ့်မယ်။ ပြီးရင် ဂိမ်းမာတွေ ဓားပြတွေနဲ့ မှော်သားရဲကောင်တွေကို တိုက်ခိုက်ဖို့ သင့်တော်တဲ့ နေရာတွေ ရွေးချယ် ပေးပါ့မယ်။ ကျွန်တော်တို့ စွန့်စားသူ အစည်းအရုံး တစ်ခုလည်း တည်ထောင်နိုင်ပြီး မြေအောက်လောက စွန့်စားသူ အစည်းအရုံးနဲ့ သတင်း အချက်အလက်တွေ မျှဝေနိုင်ပါလိမ့်မယ်။ ထာဝရတိုင်းပြည်နဲ့ ဗစ်တိုးရီးယားက ဂိမ်းမာတွေ ယှဉ်ပြိုင်နိုင်ပါလိမ့်မယ်။ မြေပေါ်လောကမှာ ကျွန်တော်တို့ လူသားရေးရာ တွေမှာ ဝင်ရောက် စွက်ဖက်နိုင်ပါတယ်၊ ဥပမာ ယော့ခ်နယ်မြေရဲ့ အုပ်ချုပ်သူအဖြစ် ကျွန်တော်တို့ဘက်က အမည်စာရင်း တင်သွင်းထားတဲ့ ကိုယ်စားလှယ်လောင်းကို ထောက်ခံတာ လိုမျိုးပေါ့။ ဂိမ်းမာ ၅,၀၀၀ရဲ့ တိုက်ခိုက်ရေး စွမ်းအားအပေါ် အခြေခံပြီး ကျွန်တော်တို့ ယော့ခ်နယ်မြေကို သိမ်းပိုက် နိုင်ပါလိမ့်မယ်။"

"ယော့ခ်နယ်မြေကို ကျွန်တော်တို့ရဲ့ ခံတပ်အဖြစ် အသုံးပြုပြီး လူသားတိုင်းပြည် တစ်ခုကို သစ္စာခံကာ သူကောင်းမျိုးနွယ်တွေနဲ့ မဟာမိတ်ဖွဲ့ပါ့မယ်။ ပြီးရင် တိုင်းပြည်ရဲ့ စစ်တပ်ကို အနိုင်တိုက်ဖို့ ဂိမ်းမာ ၅,၀၀၀ကို အသုံးပြုပြီး တိုင်းပြည်မှာ ရွေးကောက်ပွဲ လုပ်ငန်းစဉ်ကို စတင်ပါ့မယ်။ အဲဒီနောက် ကျွန်တော်တို့ ရွေးကောက်ပွဲကို အင်အားသုံးပြီး ထိန်းသိမ်းကာ လီလိုကို ဘုရင်မအဖြစ် အမည်စာရင်း တင်သွင်းပါ့မယ်။ ကျွန်တော်တို့ လူသားတွေရဲ့ သမိုင်းကို ကြိုးကိုင် ခြယ်လှယ်ပါ့မယ်... ပါရမီရှင် အကြံအစည်ပဲ။ အရှင်ရှားလော့ခ်၊ ဗစ်တိုးရီးယားမြို့ တည်ဆောက်ရာမှာ အရှင့် အတွက် ဘာမှ အကျိုးယုတ်မှာကို ကျွန်တော် မမြင်ပါဘူး။" ဘရုက ရှားလော့ခ်အား စိတ်အားထက်သန်စွာ ပြောလိုက်သည်။

"မင်း ပြောသလို ငါ လုပ်ရင် ငါ့ အတွက် အကျိုးရှိမှာ မဟုတ်ဘူး။ အဲဒါထက် ရေရှည် ပိုပြီး ကြည့်ပြီး ဂိမ်းမာတွေကို သိမ်းပိုက်ရေး အင်အားစုအစား အလုပ်သမား အင်အားစုအဖြစ် အသုံးပြုမယ်ဆိုရင် တည်ငြိမ်တဲ့ ခံတပ်တစ်ခုက ပိုပြီး ဉာဏ်ရှိတဲ့ ရွေးချယ်မှု ဖြစ်တယ်ဆိုတာ မင်း တွေ့ရလိမ့်မယ်။"

ရှားလော့ခ်သည် သူ၏ သွေးဂန္ဓမာ လက်ဖက်ရည်ခွက်ကို ကောက်ယူလိုက်ပြီး "ငါက ပြဿနာတွေကို အကြမ်းဖက်မှု သုံးပြီး ဖြေရှင်းရတာ မကြိုက်ဘူး။ လောကနှစ်ခု အပြန်အလှန် အားဖြည့်နေကြတာကိုပဲ ငါ မြင်ချင်တယ်။ ဥပမာ၊ မြေအောက်လောက,က သစ်သား သယံဇာတတွေ ချို့တဲ့ပေမဲ့ သတ္တုရိုင်းတွေကျ ပေါကြွယ်ဝတယ်။ တန်ဖိုး မရှိတဲ့ ဒိုင်ယမွန်ဆင်း သတ္တုရိုင်းတောင် မြေပေါ်လောကမှာ အလွန် တန်ဖိုးကြီး လိမ့်မယ်။ မြေအောက်လောက,က ပေါကြွယ်ဝတဲ့ ရွှေနဲ့ငွေ သတ္တုရိုင်းတွေကို ပြုပြင်ပြီးရင် မြေပေါ်လောကမှာ ဈေးကောင်း ရလိမ့်မယ်။"ဟု ဆိုလိုက်သည်။

"အခြားတစ်ဖက်မှာတော့ မြေပေါ်လောကမှာ သစ်သား သယံဇာတတွေ ပေါကြွယ်ဝတယ်၊ အဲဒါတွေက မြေအောက်လောကမှာ ချို့တဲ့ နေတယ်။ သစ်မာ၊ သစ်ပျော့နဲ့ မာနာသစ်သား အမျိုးမျိုးကို မြေပေါ်လောကမှာ ရရှိ နိုင်တယ်။ ဒါ့အပြင် မြေအောက်လောကမှာ မတွေ့နိုင်တဲ့ စိုက်ပျိုးထားတဲ့ အဂ္ဂိရတ် ပစ္စည်းတွေနဲ့ မာနာပစ္စည်းတွေလည်း ရှိသေးတယ်။ ငါတို့ သွေးဂန္ဓမာ လက်ဖက်ရည်ရွက်တွေကို မြေပေါ်လောကမှာ စိုက်ပျိုးမယ်ဆိုရင် အသက်ဆက်ဖို့ မာနာ မလိုအပ်တဲ့ အတွက် ကုန်ကျစရိတ် နည်းသွားလိမ့်မယ်။ အဲဒါက ငါတို့ကို ကြီးပွားချမ်းသာ စေလိမ့်မယ်။"

ရှားလော့ခ်သည် သူ၏ လက်နှစ်ဖက်ကို ဖြန့်ကားလိုက်ပြီး အသက်ပြင်းပြင်း ရှူသွင်းလိုက်ကာ "ဘရု၊ မင်း နားမလည်ဘူးလား။ အဲဒါက အကန့်အသတ်မရှိ တဲ့ ဓနဥစ္စာပဲ။ မြေပေါ်လောကရဲ့ ကုန်သွယ်ရေးနဲ့ သယံဇာတတွေကို ထိန်းချုပ်တာက ငါတို့ရဲ့ ဩဇာအာဏာကို မြေအောက်လောကနဲ့ မြေပေါ်လောကရဲ့ ထောင့်စွန်း အားလုံးကို ပျံ့နှံ့စေလိမ့်မယ်။ အနာဂတ်မှာ ငါ့ ပုံတူက မှော်ကျောက်တုံးတိုင်းပေါ်မှာ ရှိနေလိမ့်မယ်။ ဓနဥစ္စာက အာဏာပဲ။"ဟု ဆိုလိုက်သည်။

"ကျွန်တော် သိပြီ။ ဗစ်တိုးရီးယားမြို့က အနာဂတ် ကုန်သွယ်ရေးခံတပ် ဖြစ်လာတော့မှာလား။"

ဘရုက စဉ်းစားတွေးတောပြီး ဆိုလိုက်သည် "ဓနဥစ္စာတွေ စုဆောင်းပြီးရင် ကျွန်တော်တို့ ဂိမ်းမာတွေကို လက်နက် တပ်ဆင်ပေးပြီး ဧရာမ စစ်သားရဲကောင်တွေကို ဝယ်ယူ နိုင်ပါလိမ့်မယ်။ ပြီးရင် ကျွန်တော်တို့ ဆောင်းတောင်ကုန်းမြို့ကနေ သိမ်းပိုက်ရေး စတင်ပါ့မယ်။"

"အာ၊ ဒါကို နောက်မှ ဆွေးနွေးကြတာပေါ့။" ရှားလော့ခ်သည် တစ်ကိုယ်တော် လှုပ်ရှားသူ တစ်ဦး၏ ပုံရိပ်ပေါ်နေသော မှော်ဖန်လုံး တစ်လုံးကို ကောက်ယူ လိုက်သည်။ သူ၏ ခေါင်းပေါ်တွင် "မာကိုပိုလို" ဟူသော စာလုံးများ ရှိနေခဲ့သည်။

"အရေးကြီးဆုံးက ဇာတ်လမ်းပိုင်းကို ကိုင်တွယ်ပြီး မြေအောက်လောကနဲ့ မြေပေါ်လောက,ကို ပေါင်းစည်းဖို့ပဲ။ ငါ ထာဝရတိုင်းပြည်နဲ့ ဗစ်တိုးရီးယားရဲ့ သယံဇာတတွေ အပြန်အလှန် အားဖြည့်နိုင်အောင် စီစဉ်ပေးမယ်။"

"အရှင်ရှားလော့ခ်က မာကိုပိုလိုကို အသုံးချတော့မှာလား။" ဘရုက မေးလိုက်သည်။

"ဘာလို့ မဖြစ်ရမှာလဲ။ သူ့ကို ဗစ်တိုးရီးယားကို သွားတဲ့လမ်း ရှာခိုင်းဖို့ ရိုးရှင်းတဲ့ မစ်ရှင်တစ်ခု ပေးလိုက်ရုံပဲ။ ပြီးရင် ငါတို့ မစ်ရှင်တွေ သုံးပြီး ဂိမ်းမာတွေကို သယံဇာတတွေ အဆုံးမရှိတဲ့ သံသရာလည်ပတ်မှုနဲ့ သယ်ယူပို့ဆောင်ခိုင်း နိုင်တယ်၊ ပြီးမြောက်ရင် သူတို့ကို ဆုချီးမြှင့်မယ်။ ပြီးရင် သယံဇာတတွေကို ဂိမ်းမာတွေက ကုန်သွယ်ရေး ထုတ်ကုန်တွေ အဖြစ် ပြုလုပ်နိုင်တယ်၊ ဒီလိုနဲ့ အကျိုးရှိတဲ့ သံသရာလည်ပတ်မှု တစ်ခု ဖြစ်ပေါ်လာလိမ့်မယ်။"

ဘရုက စိတ်လှုပ်ရှားစွာ ဆိုလိုက်သည်။ "အရှင့်ရဲ့ အတွေးအခေါ်တွေက ထူးချွန်ပါတယ်။ ကျွန်တော် အဲဒါကို မစဉ်းစားမိခဲ့ဘူး။ ဂိမ်းမာတွေက အလုပ်မစ်ရှင်တွေပဲ ရှိရင် ငြီးငွေ့လာကြလိမ့်မယ်။ ကုန်ပစ္စည်းတွေ သယ်ယူပို့ဆောင်တာနဲ့ ထုတ်လုပ်တာကို ဂိုဏ်းခွဲ မစ်ရှင်တွေအဖြစ် ပြုလုပ်ဖို့ ကျွန်တော် အကြံပြုပါတယ်။ ကျွန်တော်တို့ ဇာတ်လမ်းပိုင်းကို မြှင့်တင်ပြီး ဂိုဏ်းခွဲတွေ ကြားက ပဋိပက္ခကို တိုးမြှင့် ရပါလိမ့်မယ်။ ဒန်ဂျင် အနည်းငယ်ကို ဖျက်ဆီးပစ်ဖို့ ကျွန်တော် အကြံပြုပါတယ်။ ဆောင်းတောင်ကုန်းမြို့က ရွေးချယ်မှုကောင်း တစ်ခုပါ။ ဇာတ်ကောင် အနည်းငယ်ကို သတ်ပစ်တာက ပိုတောင် ကောင်းပါသေးတယ်။ အိပ်မက်နတ်ဆိုးမယ် အိဗလင်းက,ကော။ သူ အလုပ်သိပ်မလုပ်ဘဲ ကျွန်တော်တို့ဆှ ကပ်နေ,နေတာဆိုတော့ သူ့ကို စတေးပစ်လိုက်ပါ။"

ရှားလော့ခ်သည် ဘရု၏ အကြံပြုချက်များကို တုံ့ပြန်ခြင်း မပြုခဲ့ပေ။ သူသည် သူ၏ အာရုံကို မှော်ဖန်လုံးနှင့် မာကိုပိုလိုအပေါ် စူးစိုက်ထားပြီး သူ၏ မာနာကို မှော်ဖန်လုံးထဲသို့ လွှဲပြောင်း ပေးလိုက်သည်။

...

မာကိုပိုလိုသည် သူ၏ ခေါင်းမှ ချွေးများကို သုတ်လိုက်သည်။ သူ၌ ချွေးထွက်သည့် ခံစားချက် မရှိခဲ့သော်လည်း ချွေးစက်များသည် သူ၏ အမြင်အာရုံကို အနှောင့်အယှက် ပေးနေခဲ့သည်။

မာကိုပိုလိုသည် တတိယဘီတာ စမ်းသပ်မှု စတင် ပြီးပြီးချင်း ရပ်ကွက်ဟောင်း မြို့သားများ ညွှန်ပြသော လမ်းအတိုင်း နာရီဝက်ခန့် ခရီးသွားခဲ့ပြီး ဖြစ်သည်။

မာကိုပိုလိုသည် ခရီးစဉ် မည်မျှ ကြာမြင့်မည်ကို မသေချာခဲ့ပေ။ ယခင်က သူ ဆောင်းတောင်ကုန်းမြို့သို့ ခရီးသွားသည့်အခါ ရက်အနည်းငယ် ကြာမြင့်ခဲ့သည်။

မာကိုပိုလို အနားယူလိုက်သည်။ သူ ခရီးဆက်ရန် ပြင်ဆင်နေစဉ် အစိမ်းရောင် အလင်းတန်း တစ်ခုကို တွေ့လိုက်ရပြီး ၎င်းက သူ့ကို ထိတ်လန့်သွားစေခဲ့သည်။

အလင်းတန်း အတွင်းတွင် မသဲမကွဲ ပုံရိပ် တစ်ခုက သူ့ထံသို့ လက်ဆန့်တန်းလိုက်ပြီး "ရွေးချယ်ခံရသူ၊ မင်းရဲ့ ကံကြမ္မာ မစ်ရှင်ကို လက်ခံဖို့ ဆန္ဒရှိပါသလား။"ဟု ဆိုလိုက်သည်။