ဧရာမဝေလငါး လေရှုထုတ်ခြင်း။ ပရိသတ်ကို အံ့မခန်းဖြစ်စေခြင်း။ (၁)

စူးချန်ခုန်း အပြစ်တင်တာခံရပြီးနောက် မုန့်စန်း၏ မျက်နှာသည် ချက်ချင်း မည်းမှောင်သွားလေ၏။ ဧရာမဝေလငါးဂိုဏ်း၏ ဒုဂိုဏ်းခေါင်းဆောင်တစ်ယောက်အနေနှင့် ဂိုဏ်းအတွင်း၌ စစ်ခုန်းယုံသာလျှင် သူ့ထက် သာလွန်နိုင်မည်ဟု ယုံကြည်ခဲ့သည်။ သူ့မျက်လုံးထဲမှာ စစ်ခုန်းကျန့်က မရင့်ကျက်သေးတဲ့ ကောင်လေးတစ်ယောက်ထက် ဘာမှမပိုပေ။ ဒါတောင် သူ့ကို ပြစ်တင်မောင်းမဲရဲတယ်ပေါ့။

မုန့်စန်း တုံ့ဆိုင်းသွားခဲ့သည်။ အကယ်၍ သူသာကြားဝင်တားဆီးလိုက်ပါက သူတို့ သုံးဦးဟာ သူ၏ အမိန့်အတိုင်း လုပ်ဆောင်နေကြောင်း ဝန်ခံသလို ဖြစ်သွားမည်။ သို့သော် သူသာ ထိုသို့မလုပ်ပါက သူ့နောက်လိုက်သူများကို စိတ်ဓာတ်ကျစေလိမ့်မည် ။

"ခေါင်းဆောင်ငယ်လေး၊ ကျွန်တော့်ကို ဖိအားမပေးနဲ့!"

လေ့ဇီကျန်း၏ ချီစွမ်းအင်နှင့် သွေးများသည် သူ့ခန္ဓာကိုယ်အနှံ့ ပျံ့နှံ့သွားကာ အံကြိတ်လျက် အနီးရှိ စူးချန်ခုန်းကို စိုက်ကြည့်နေသည်။

ဧရာမဝေလငါးဂိုဏ်း၏ လက်ထောက်ခန်းမခေါင်းဆောင်တစ်ဦးအနေဖြင့် လေ့ဇီကျန်းသည် ရဲရင့်ပြီး တိုက်ခိုက်ရာတွင် အားကောင်းသည်။ သူ့ကိုယ်တိုင်ပင် ရက်စက်ကြမ်းကြုတ်သော အသွင်အပြင်ဖြစ်နေပြီဖြစ်သည်။ စူးချန်ခုန်း၏ အကျပ်ကိုင်မှုနှင့် ရင်ဆိုင်ရင်း လိုအပ်ပါက သူ့အသက်ကို နှုတ်ယူမည့် အတွေးများနှင့် အဆင်သင့်ဖြစ်နေလေပြီ။

ဝမ်ယိလည်း သူ့လက်ထဲတွင် ခေါက်ယပ်ဝောာင်ကို ဆုပ်ထားသည်။ ဒီကိစ္စမှာ ဝင်ပါမိတာ နည်းနည်းတော့ နောင်တရပေမယ့် မုန့်စန်းရဲ့ အစောပိုင်းကတိကို ပြန်သတိရတော့ သူ့မျက်နှာမှာ အေးစက်တဲ့ အမူအရာပေါ်လာလေ၏။ စစ်ခုန်းကျန့်ကို သတ်ပစ်ဖို့ မလိုပါ။ သူ့ကို လူရှေ့သူရှေ့မှာ မျက်နှာပျက်စေရုံနဲ့ လုံလောက်ပါပြီ။ ဒါက မုန့်စန်းရဲ့ မူလရည်ရွယ်ချက်ပင်။

စစ်ခုန်းဟွမ်သည် စူးချန်ခုန်းက လေ့ဇီကျန်းနှင့် ဝမ်ယိကို မကိုင်တွယ်မှာ စိုးရိမ်နေသည်။ ထို့အပြင် သူ၏ အားနည်းချက်ကို ထုတ်ပြမိပြီး သရုပ်အမှန် ဖော်ထုတ်ခံရမည်ကို စိုးရိမ်နေ၏။

စူးချန်ခုန်းက အားနည်းချက်ကို ထုတ်ပြမိမှာစိုးသောကြောင့် စစ်ခုန်းကျန့်၏ ငါးမန်းဓားသွားကို ဆက်လက် အသုံးမပြုတော့ပေ။ သူ့ရဲ့ သံဖြတ်ဓားနည်းပညာဟာ စစ်ခုန်းကျန့်နဲ့ အတော်လေးကွာခြားသည်။ သူသုံးလေလေ အားနည်းချက်တွေ ပိုများလာလေလေပင်။ သို့ပေမယ့် လက်နက်မရှိရင်တောင် စူးချန်ခုန်းက ဒီလူနှစ်ယောက်ကို သတ်နိုင်မယ်လို့ ယုံကြည်ထားသည်။

“အခု ချက်ချင်း စတော့!”

စူးချန်ခုန်းက အလျော့ပေးဖို့ ရည်ရွယ်ချက်မရှိတာကို မြင်လိုက်ရတော့ လေ့ဇီကျန်းနှင့် ဝမ်ယိတို့သည် အကြည့်ချင်းဖလှယ်ကာ နှစ်ယောက်စလုံး စိတ်ကို တင်းထားလိုက်သည်။ သူတို့မတိုက်ပါက သေချာပေါက် သေရမည်ဖြစ်ရာ နှစ်ယောက်သား အစွမ်းကုန် တိုက်ခိုက်ရမည်ဖြစ်သည်။

“မိုးကြိုးခွင်းလက်သီး!”

တောင့်တောင့်တင်းတင်း မုတ်ဆိတ်မွေးနှင့် လေ့ဇီကျန်းက ဦးစွာ စတင်လိုက်သည်။ သူခြေထောက်ကို ဆောင့်နင်းလိုက်ရာ သူ့ခန္ဓာကိုယ်၌ ပြင်းထန်သော ချီစွမ်းအင်နှင့် သွေးများက ဝဲတက်ကာ စုဝေးလာပြီး စူးချန်ခုန်းဆီသို့ ပိတ်စကျဲလေးကဲ့သို့ ချီတက်လာလေ၏။ သူ၏ ညာလက်သီးချက်သည် မိုးခြိမ်းသံသဖွယ် ကြောက်ခန်းမလိလိပင်။

လေ့ဇီကျန်း၏ ခွန်အားသည် အသေးအဖွဲ့မဟုတ်ပါ။ စူးချန်ခုန်း ယခင်က သတ်ခဲ့သော လီလေ့ထက် သာလွန်ပြီး ချီသွေးပြောင်းလဲခြင်း ဒုတိယနယ်ပယ်၏ အထွတ်အထိပ်သို့ ရောက်ရှိနေတာဖြစ်သည်။ တစ်ဆင့်တက်လိုက်ရုံနှင့် သူက ချီသွေးဝံပုလွေမြူအဆင့်နှင့် သိပ်မဝေးတော့ပေ။

စူးချန်ခုန်းသည် လေ့ဇီကျန်းနှင့် ဝမ်ယိတို့ကို အနိုင်ယူပြီး ပြတ်ပြတ်သားသား လုပ်ရမည်ဖြစ်သည်။

ဝေလငါးစွမ်းရည်ငါးခု။ အဆုံးမဲ့ဒေါသပင်လယ်။

လေ့ဇီကျန်း၏ ဖိနှိပ်ပြီး အားကောင်းသော လက်သီးများကို ရင်ဆိုင်ရင်း စူးချန်ခုန်းသည် မကြောက်ပါပေ။ သူ့အတွင်းရှိ ချီစွမ်းအင်၏ ရေစီးကြောင်းနှစ်ခုသည် ဆူနာမီလှိုင်းလုံးကြီးများကဲ့သို့ လှိုင်းထလာကာ သူ၏လက်ချောင်းများက လက်သီးများကို တင်းတင်းကြပ်ကြပ်ဆုပ်ထားလေ၏။ ဧရာမဝေလငါးနည်းပညာမှ နည်းစနစ်တစ်ခုဖြစ်သည့် သူ၏ညာဖက်လက်သီးဖြင့် ပြင်းထန်သော စွမ်းအင်စီးကြောင်းများ ထွက်ပေါ်လာသည်။

ဝုန်း

ခိုင်ခံ့တောင့်တင်းသော ချီစွမ်းအင်ပါရှိသော ဤလက်သီးသည် ဒေါသပင်လယ်ကြီးနှင့်တူပြီး ကြီးမားလှသော ပင်လယ်ရေလှိုင်းကို တလှိမ့်လှိမ့်တက်ကာ ခုခံမှုကို ရင်ဆိုင်ရသည့်အခါတွင် ပိုမိုအားကောင်းလာပြီး ၎င်း၏လမ်းကြောင်းပေါ်ရှိ အရာအားလုံးကို ချေမှုန်းပစ်လိုက်သည်။

"ဘုန်း!"

ပြင်းထန်သော လက်သီးနှစ်လုံး တိုက်မိသည်နှင့် နားကွဲမတတ် ပေါက်ကွဲသံကြီး ထွက်ပေါ်လာ၏။ မြေပြင်သည် ပြင်းထန်စွာ တုန်ခါသွားကာ အဝေးမှနေသူများပင် ၎င်းတို့၏ ခြေအောက်တွင် တုန်ခါမှုကို ခံစားနိုင်သည်။ စားပွဲများပေါ်တွင် တင်ထားသော ဝိုင်ခွက်အများအပြားသည် မှောက်ကျပြီး ကွဲ‌ကြေကုန်လေ၏။

ချီသွေးနယ်ပယ်ရှိ သိုင်းပညာရှင်တစ်ဦးသည် ရန်သူတစ်ရာကို တိုက်ခိုက်နိုင်သည့် စွမ်းအားကို ပိုင်ဆိုင်ထားပြီး ထိပ်တိုက်ရင်ဆိုင်မှုမှာ အသေးအဖွဲမဟုတ်ပါပေ။

"ဘာ"

တိုက်မိပြီးပြီးချင်းမှာပဲ လေ့ဇီကျန်းအံ့သြသွားလေ၏။ စူးချန်ခုန်း၏လက်သီးသည် ဝဲဂယက်တစ်ခုလိုခံစားရပြီး သူ့လက်သီး၏ တွန်းအားကိုစုပ်ယူကာ အများအပြားကို ပျောက်ကွယ်စေလျက် သူ့အား ဟန်ချက်ပျက်စေပြီး ဘေးတစ်ဖက်သို့ လှုပ်ယမ်းသွားစေသည့် လှည့်ပတ်မှုတစ်ခုကို ဖန်တီးပေးသည်။

ဝေလငါးစွမ်းရည်ငါးခုမှ အဆုံးမဲ့ဒေါသပင်လယ်၏ စွမ်းအားသည် ဤနေရာတွင် တိကျစွာတည်ရှိပြီး ရန်သူ၏အင်အားကို တိုက်ရိုက် တိုက်ကာ ချေဖျက်နိုင်စွမ်းရှိသည်။

"ဒုတ် ဒုတ် ဒုတ်!"

ချီသွေးအသွင်ပြောင်းခြင်းအဆင့်နှစ်သို့ ရောက်ပြီးပြီးချင်း စူးချန်ခုန်းသည် သီအိုရီအရ ထိုနယ်ပယ်တွင် နှစ်ပေါင်းများစွာ ရှိနေခဲ့သော လေ့ဇီကျန်းကဲ့သို့ ကြောက်မက်ဖွယ်ကောင်းသူ မဟုတ်ပေ။ သို့သော် အဆုံးမဲ့ဒေါသပင်လယ်၏ စွမ်းအားအောက်တွင် လေ့ဇီကျန်းသည် ခြေလှမ်းသုံးလှမ်းလောက် နောက်ပြန်ယိုင်သွားပြီး သူ၏ ချီစွမ်းအင်နှင့် သွေးများ ယောက်ယက်ခတ်သွားလေ၏။

ဝေလငါးစွမ်းရည်ငါးခု။ ဒေါသတကြီး လှိုင်းလုံးများက ကမ်းကို ရိုက်ခတ်ခြင်း။

စူးချန်ခုန်းက နောက်ဆုတ်သွားမည့်အစား လေ့ဇီကျန်း ဟန်ချက်ပျက်ပြီး ဆုတ်သွားသည့်အခိုက်အတန့်ကို အမိဖမ်းလိုက်သည်။ သူသည် သူ၏လက်သီးများကို လက်ဖဝါးရိုက်ချက်အဖြစ် ပြောင်းလဲကာ ဆက်တိုက် တက်လာသော လှိုင်းအလွှာများကဲ့သို့ လက်ဖဝါးစွမ်းအင်များကို ပြောင်းလဲလိုက်လေ၏။ တစ်ချက်ရိုက်လိုက်သည်နှင့် ဒီရေအော်သံကြီးက လေထုထဲ အပြည့်။

စူးချန်ခုန်း၏ စွမ်းရည်ဖြင့် ပြီးပြည့်စုံသော ဧရာမဝေလငါးနည်းပညာကို လွန်ခဲ့သည့်တစ်လကပင် ရရှိခဲ့သော်လည်း သူ၏ တစ်လတာ အလေ့အကျင့်သည် အခြားသူများ တစ်နှစ် သို့မဟုတ် နှစ်နှစ်ကျင့်တာနှင့် ညီမျှသည်။ သူသည် ဝေလငါးစွမ်းရည်ငါးခုကို အဆင့်တစ်ခုအထိ ကျင့်ကြံနိုင်ခဲ့သည်။

"သေစမ်း"

စူးချန်ခုန်း၏ ပြင်းထန်သော တိုက်ခိုက်မှု ကျရောက်လာသောအခါ လေ့ဇီကျန်းသည် သူ့ကိုယ်သူ ငြိမ်အောင်လုပ်လိုက်သည်။ သူအံကြိတ်ကာ တိတ်တဆိတ် ကျိန်ဆဲပြီး လည်ချောင်းမှ ဟိန်းဟောက်သံ ခပ်တိုးတိုးကိုသာ ထုတ်နိုင်တော့သည်။ သူ၏ ခွန်အားကို စုစည်းပြီး မိုးခြိမ်းသံကဲ့သို့ လက်သီးတစ်လုံး ပစ်လွှတ်လိုက်လေ၏။

“ဒုန်း ဘုန်း ဘုန်း”

သို့သော် လက်သီးနှင့် လက်ဖဝါးတို့ ဆုံတွေ့သောအခါတွင် စူးချန်ခုန်း၏ လက်ဖဝါးရိုက်ချက်သည် သူ့အပေါ်သို့ လှိုင်းလုံးများ မရပ်မနား လာနေသကဲ့သို့ လှိုင်းလုံးတိုင်းသည် နောက်ဆုံးတစ်ခေါက်ကထက် ပိုပြင်းထန်သည်ဟု ခံစားမိသည်။ သူ၏ မသိစိတ်က ဆင့်ခေါ်ထားသော ခွန်အားသည် စွမ်းအင်များ ဆက်တိုက် တလှိမ့်လှိမ့်တက်မလာမီ သူ့ဘယ်ဘက်လက်မောင်းထဲသို့ မရောက်လာခင်တွင် လက်ဖဝါး နှစ်ခု သို့မဟုတ် သုံးစာ စွမ်းအင်ကိုသာ ထိန်းထားနိုင်ခဲ့သည်။

“ဂျွတ် ဂျက်”

လေ့ဇီကျန်းက နာကျင်စွာ အော်လိုက်သည်။ သူ့ပါးစပ်မှ သွေးများ စီးကျကာ လွှင့်ထွက်သွားပြီး သူ၏ ဘယ်ဘက်လက်က ကျစ်ထားသောကြိုးနှင့် ပုံသဏ္ဍာန်တူစွာ ဆိုးဆိုးရွားရွား လိမ်ကျိုးသွားခြင်း ဖြစ်သည်။

ဧရာမဝေလငါးနည်းပညာသည် ဧရာမဝေလငါးဂိုဏ်း၏ ထိပ်တန်းစွမ်းရည်နှင့် သက်ဆိုင်သော ဝေလငါးစွမ်းရည်ငါးခုဖြင့် စူးချန်ခုန်း၏ လေးနက်သော အတွင်းအားဖြင့် တွဲလျက် ကြောက်မက်ဖွယ်ကောင်းသော စွမ်းအားကို ထုတ်လွှတ်လိုက်သည်။ နှစ်ကွက်လောက်နှင့် လေ့ဇီကျန်းသည် ပြင်းထန်စွာ အရိုက်ခံလိုက်ရပြီး ပြန်မထနိုင်တော့ပေ။

"ဆရာကြီးစူးရဲ့ ဝေလငါးစွမ်းရည်ငါးခုပဲ... အချိန်တိုလေးအတွင်းမှာ အဲဒါကို လေ့ကျင့်ပြီးပြီတဲ့လား။" စစ်ခုန်းဟွမ် မအံ့ဩဘဲမနေနိုင်ခဲ့။

စူးချန်ခုန်း၏ ဝေလငါးစွမ်းရည်ငါးခုကို အကြာဆုံး တစ်လလေ့ကျင့်ခဲ့ကြောင်း သူသိသော်လည်း ၎င်းက အလွန်ကြောက်စရာကောင်းသော လေ့ဇီကျန်းကို အနိုင်ယူနိုင်ခဲ့သည်။

ရွှီး!

စူးချန်ခုန်းရဲ့ အနောက်ကနေ အသံတိုးတိုးလေး ထွက်ပေါ်လာ၏။ ထိုသူက ဝမ်ယိပင်။ စူးချန်ခုန်းက လေ့ဇီကျန်းကို တိုက်ခိုက်စဉ်တွင် အနောက်မှ တိုက်ခိုက်မှုကို စတင်ခဲ့သည်။ သူ၏ ခေါက်ယပ်တောင်ကို ဖွင့်လိုက်ရာ ၎င်း၏အဖျားသည် ဓါးသွားများအဖြစ် လှန်ပြီး ယပ်တောင်တစ်ခုလုံးကို စက်ဝိုင်းခြမ်းဓားပြားအဖြစ်သို့ ပြောင်းလဲသွားသည်။ ဝှီးကနဲဖြင့် ၎င်းသည် စူးချန်ခုန်း၏ လည်ပင်းကို ခုတ်ဖြတ်ရန် ရောက်လာလေ၏။