ရွှေရောင် စွမ်းရည်၊ မသေမျိုး ရှောင်ချီ၊ ဝင်ရောက်ချိန် နီးကပ်လာသော သုံးထောင်ကမ္ဘာ (အပိုင်း ၃)

[သင်သည် ပေါင်းစည်းခြင်းအဆင့် ကျင့်ကြံသူတစ်ဦး ဖြစ်နေသည့် အပြင် မီးလျှံတစ်ထောင် နည်းစနစ်ကို ယခင်က သင်ယူဖူးထားသောကြောင့် သင်၏ မီးလျှံအနန္တ နည်းစနစ်အပေါ် နားလည်သဘောပေါက်သည့်နှုန်းသည် အလွန် လျင်မြန်နေသည်။]

[တစ်နှစ်အတွင်းမှာပင် သင်သည် မီးလျှံအနန္တ နည်းစနစ်၏ တတိယအဆင့်ကို အောင်မြင်စွာ ကျင့်ကြံနိုင်ခဲ့သည်။]

[ဆဋ္ဌမနှစ်တွင် ယခင်က သင် စုဆောင်းထားသော ဉာဏ်ကြီးရှင်အဆင့် အပိုဆုကြေးများ၏ အကူအညီဖြင့် မီးလျှံအနန္တ နည်းစနစ်၏ စတုတ္ထအဆင့်ကို အောင်မြင်စွာ ကျင့်ကြံနိုင်ခဲ့သည်။]

[သတ္တမနှစ်တွင် သင်သည် အနန္တမီးလျှံ နည်းစနစ်ကို ဆက်လက်ကျင့်ကြံခဲ့ရာ စတုတ္ထအဆင့်၏ နှောင်းပိုင်းသို့ ရောက်ရှိခဲ့သည်။]

[အဋ္ဌမနှစ်တွင် အနန္တမီးလျှံ နည်းစနစ် အပေါ် သင်၏ နားလည်သဘောပေါက်မှုသည် ပဉ္စမအဆင့်သို့ အောင်မြင်စွာ တက်လှမ်းနိုင်ခဲ့သည်။]

လက်တွေ့ကမ္ဘာ၌ စုရှင်းသည် ဤအရာကို မြင်သောအခါ အသာအယာ ခေါင်းညိတ်ပြီး တီးတိုး ရေရွတ်လိုက်သည်။

“မီးလျှံတစ်ထောင် နည်းစနစ်က အဆင့် ၆ အထိပဲ ကျင့်ကြံလို့ရတယ်။ ပြီးပြည့်စုံသွားရင် ကိုယ်ခန္ဓာ ပေါင်းစည်းခြင်း အဆင့်ကို ဖောက်ထွက်နိုင်တယ်...”

“ဒါပေမဲ့ ကိုယ်ခန္ဓာ ပေါင်းစည်းခြင်း အဆင့်ကို ရောက်ပြီးတဲ့နောက် ဆက်ပြီး ကျင့်ကြံချင်တယ် ဆိုရင်တော့ အနန္တမီးလျှံ နည်းစနစ်အပေါ် နားလည်မှုက အနည်းဆုံး အဆင့် ၇ ကို ရောက်နေမှရမယ်။”

“ဒါပေမဲ့...မီးလျှံတစ်ထောင် နည်းစနစ်နဲ့ အနန္တမီးလျှံ နည်းစနစ်ရဲ့ မူရင်းရင်းမြစ်က တူတူပဲဆိုတော့... ပြန်လည် ကျင့်ကြံတဲ့နှုန်းကြီးက တကယ် မြန်လွန်းပါတယ်ကွာ။”

စုရှင်းသည် ကျေနပ်စွာ ခေါင်းညိတ်လိုက်သည်။

အနန္တမီးလျှံ နည်းစနစ်သည် ကောင်းကင်အဆင့် နည်းစနစ်ဖြစ်ပြီး ယင်းသည် စုရှင်း၏ ကျင့်ကြံမှုအဆင့်ကို တိုးမြင့်ပေးသည် သာမက အခြား အကျိုးကျေးဇူးများလည်း ရှိသေးသည်။

ဝိညာဉ်စွမ်းအင်ပမာဏ တူညီနေလျှင်ပင် ကောင်းကင်အဆင့် အနန္တမီးလျှံ နည်းစနစ်၏ ဝိညာဉ်စွမ်းအင် စုပ်ယူမှုနှုန်းနှင့် ကျင့်ကြံမှုနှုန်းတို့သည် မီးလျှံတစ်ထောင် နည်းစနစ်ထက် များစွာ သာလွန်သည်။

ထိုအခါ စုရှင်း၏ စွမ်းအားတိုးတက်မှုနှုန်းသည် ပို၍ မြန်ဆန်လာမည်သာ ဖြစ်သည်။

“အနန္တမီးလျှံ နည်းစနစ် အဆင့် ၇ ကို ရောက်ဖို့ဆိုရင် ဆယ်နှစ်လောက်ပဲ ကြာမယ်ထင်တယ်၊ ဟုတ်တယ်မလား။”

ဤသို့ တွေးလိုက်ရင်း စုရှင်းသည် သရုပ်ပြခြင်း ဖန်သားပြင်ကို ကြည့်လိုက်သည်။

[ကိုးနှစ်မြောက်တွင် သင်သည် အနန္တမီးလျှံ ကျင့်စဉ်ကို ကြိုးစားကျင့်ကြံနေခဲ့သည်။ ပဉ္စမအဆင့်သို့ ရောက်ရှိပြီးနောက် သင်၏ နားလည်သဘောပေါက်မှုနှုန်း အနည်းငယ် နှေးကွေးသွားသည်ဟု ရှင်းရှင်းလင်းလင်း ခံစားခဲ့ရသည်။ သို့သော်လည်း တည်ငြိမ်စွာ တိုးတက်လျက် ရှိပါသည်။]

[ဆယ်နှစ်မြောက်တွင် သင်သည် အနန္တမီးလျှံ နည်းစနစ်ကို ကြိုးစားကျင့်ကြံခဲ့ရာ ပဉ္စမအဆင့်၏ နှောင်းပိုင်းသို့ ရောက်ရှိခဲ့သည်။]

[ဆယ့်တစ်နှစ်မြောက်တွင် အနန္တမီးလျှံ နည်းစနစ်ကို ကြိုးစားကျင့်ကြံခဲ့ရာ နောက်ဆုံးတွင် ဆဋ္ဌမအဆင့်သို့ ရောက်ရှိခဲ့သည်။ အနန္တမီးလျှံ နည်းစနစ်၏ ဆဋ္ဌမအဆင့်ရှိ ဝိညာဉ်စွမ်းအင် စုပ်ယူမှုနှုန်းသည် မီးလျှံတစ်ထောင် နည်းစနစ်ထပ် နှစ်ဆကျော် ပိုမိုမြန်ဆန်နေသည်။ သင်သည် ပျော်ရွှင်ဝမ်းမြောက်စွာဖြင့် အနန္တမီးလျှံ နည်းစနစ်ကို ဆက်လက် ကျင့်ကြံသည်။]

[ဆယ့်နှစ်နှစ်မြောက်တွင် သင်သည် အနန္တမီးလျှံ နည်းစနစ်ကို ကြိုးစားကျင့်ကြံဆဲ ဖြစ်သည်။]

[ထိုနှစ်တွင်ပင် သင်၏ အကူအညီဖြင့် လောရွှေရင်၏ အဆင့်သည် ဒဏ္ဍာရီအဆင့်၏ နှောင်းပိုင်းသို့ တက်လှမ်းနိုင်ခဲ့သည်။]

[ထို့အပြင် ဆင်းသက်ဂိုဏ်းသို့ ဝင်ရောက်ပြီးနောက် သင်၏ ဂိုဏ်းဝင်သက်တမ်း တိုးလာသည်နှင့်အမျှ တပည့်များနှင့် အဖွဲ့ဝင်များက သင့်ကို ပိုမို လေးစားကြည်ညိုလာကြသည်။ ဆင်းသက်ဂိုဏ်းအတွင်း သင်၏ ရာထူးသည် သိသိသာသာ မြင့်တက်လာသည်။]

[သင်သည် သဘာဝဂိုဏ်းခွဲ၏ ဂိုဏ်းခေါင်းဆောင် နေရာကိုကို ရယူရန် စတင် စီစဉ်နေပြီ ဖြစ်သည်။]

[ဆယ့်သုံးနှစ်မြောက်တွင် သင်သည် အနန္တမီးလျှံ နည်းစနစ်ကို ကြိုးစားကျင့်ကြံခဲ့ရာ ဆဋ္ဌမအဆင့်၏ အလယ်ပိုင်းသို့ ရောက်ရှိခဲ့သည်။]

[ဆယ့်လေးနှစ်မြောက်တွင် သင်သည် အနန္တမီးလျှံ နည်းစနစ်ကို ကြိုးစားကျင့်ကြံခဲ့ရာ ၎င်း၏အဆင့်သည် လျင်မြန်စွာ တိုးတက်လာပြီး ဆဋ္ဌမအဆင့်၏ နှောင်းပိုင်းသို့ပင် တက်လှမ်းနိုင်ခဲ့သည်။]

[ဆယ့်ငါးနှစ်မြောက်တွင် သင်သည် သဘာဝဂိုဏ်းခွဲ၏ ဂိုဏ်းခေါင်းဆောင် နေရာကို အရယူမည့် အစီအစဉ်ကို အကောင်အထည်ဖော်ခဲ့ပြီး၊ ထိုနေရာတွင်ပင် သူ့ကို သတ်ပစ်လိုက်သည်။]

[ဤအကြောင်းကို သိရှိသောအခါ 'ကျိန်စာသင့်နဂါး'သည် သင့်ကို လာရောက်ရှာဖွေခဲ့ပြီး သင့်အား အထင်အမြင်သေးစွာ ဆက်ဆံသည်။]

[သင်သည် ထိုအပြုအမူကို လှောင်ပြောင် ရယ်မောလိုက်သည်။ ဤသရုပ်ပြခြင်း၏ သေဆုံးရမည့် စာရင်း၌ ထိုကျိန်စာသင့်နဂါးကို ထည့်သွင်းထားပြီး ဖြစ်သည်။]

[သင်သည် တခြားကိစ္စများကို လျစ်လျူရှုလိုက်ပြီး အနန္တမီးလျှံ နည်းစနစ်ကို ကြိုးစားကျင့်ကြံနေခဲ့သည်။]

[ဆယ့်ခြောက်နှစ်မြောက်တွင် နောက်ဆုံး၌ သင်သည် ပိတ်ဆို့နေသည့် အတားအဆီးကို ကျော်လွှားနိုင်ခဲ့ပြီး အနန္တမီးလျှံ နည်းစနစ်ကို သတ္တမအဆင့်ထိ ကျင့်ကြံနိုင်ခဲ့သည်။ သင်၏ ချီကျင့်ကြံမှု အဆင့်သည် ယခုအခါ ရှေ့ဆက် တိုးတက်နိုင်ပြီ ဖြစ်သည်။]

လက်တွေ့ကမ္ဘာ၌ စုရှင်းသည် ဤအရာကို မြင်သောအခါ ကျေနပ်စွာ အသာခေါင်းညိတ်ပြီး ပြောလိုက်သည်။

“အနန္တမီးလျှံ နည်းစနစ် အဆင့် ၇ ရောက်ဖို့ အတွက် ဆယ့်သုံးနှစ်ပဲ ကြာတာပေါ့။”

“ပြန်လည် ကျင့်ကြံတဲ့နှုန်းက တကယ်ကို ကြောက်စရာပဲ... အရင်ကထက် အဆတစ်ရာလောက် ပိုမြန်တယ်လို့ ပြောရင်တောင် မလွန်ဘူး။”

စုရှင်းသည် သူ့မေးစေ့ကို ပွတ်သပ်ရင်း စဉ်းစားခန်းဝင်သွားသည်။

“ဒီသရုပ်ပြခြင်းမှာ ကျိန်စာသင့်နဂါးကို သေချာပေါက် သတ်ပစ်ရမယ်။ ပြီးတော့ လျှို့ဝှက်ဆန်းကြယ်တဲ့သူနဲ့ ဆက်သွယ်ဖို့ နည်းလမ်းရှာပြီး ကမ္ဘာသုံးထောင်ထဲ ဝင်ဖို့ လမ်းဖွင့်ရမယ်...”

“ဒါပေမဲ့ အဲဒီမတိုင်ခင် ကျိန်စာသင့်နဂါးကို သတ်နိုင်မယ့် အခွင့်အရေး အမြင့်ဆုံး ဖြစ်ဖို့အတွက် ငါ့ရဲ့ စွမ်းအားကို ထပ်ပြီး တိုးမြှင့်ရမယ်။”

“ကိုယ်ခန္ဓာ ပေါင်းစည်းခြင်း အဆင့်အတွင်း ငါ ဘယ်လောက်မြန်မြန် ဖောက်ထွက်နိုင်မလဲဆိုတာ ကြည့်ရအောင်။”

စုရှင်းသည် မျှော်လင့်တကြီးဖြင့် သရုပ်ပြခြင်း ဖန်သားပြင်ကို ကြည့်လိုက်သည်။

[အသေးစိတ် စဉ်းစားပြီးနောက် သင်သည် လာမည့် ကြီးမားသော တိုက်ပွဲ မတိုင်မီ သင်၏ ကျင့်ကြံမှုအဆင့်ကို ထပ်မံ တိုးမြှင့်ရန် ဆုံးဖြတ်ခဲ့သည်။]

[ဤအချိန်တွင် သင့်၌ ပြောင်းလဲထားသော ကောင်းကင်ဝိညာဉ်အမြစ် ရှိနေခြင်းနှင့် ပဉ္စမအဆင့် သေးငယ်သော ဝိညာဉ်စုစည်းခြင်း အစီအရင်၏ အကူအညီတို့ကြောင့် သင်၏ ကျင့်ကြံမှုနှုန်းသည် အထူး ကောင်းမွန်သော ဝိညာဉ်အမြစ် ရှိသူတစ်ဦး၏နှုန်းနှင့် နှိုင်းယှဉ်နိုင်သည်။]

[ထို့အပြင် ကောင်းကင်အဆင့် နည်းစနစ် ဖြစ်သော အနန္တမီးလျှံ နည်းစနစ်၏ ကျင့်ကြံမှုနှုန်း မြင့်မားခြင်းက သင်၏ ကျင့်ကြံမှုနှုန်းကို ပို၍ပင် အံ့အားသင့်စရာ ဖြစ်စေသည်။]

[ထို့အပြင် သင့်၌ ဝိညာဉ်အရည် သန်းပေါင်းများစွာ စုဆောင်းထားပြီးဖြစ်ရာ သင်၏ အဆင့်များကို ဖောက်ထွက်ရန် လုံလောက်သော ပံ့ပိုးမှုများ ရှိနေသည်။]

[ထို့ကြောင့် သင်သည် ကျင့်ကြံမှုများကို စတင်ခဲ့သည်။]

[ဝိညာဉ်စိုက်ခင်းဂူထဲ၌ သင်သည် အနန္တမီးလျှံ နည်းစနစ်ကို အရူးအမူး ကျင့်ကြံခဲ့ရာ ပတ်ဝန်းကျင်မှ ဝိညာဉ်စွမ်းအင်များသည် သင်၏ စည်းချက်ထဲသို့ စီးဝင်လာပြီး သန့်စင်သော ဝိညာဉ်စွမ်းအားနှင့် ကျင့်ကြံမှုများအဖြစ် လျင်မြန်စွာ ပြောင်းလဲသွားသည်။]

[တစ်ချိန်တည်းမှာပင် သင်၏ ဝမ်းဗိုက်ပေါ်ရှိ ပဉ္စမအဆင့် သေးငယ်သော ဝိညာဉ်စုစည်းခြင်း အစီအရင်သည် အလိုအလျောက် လည်ပတ်သွားပြီး သင်၏ ကျင့်ကြံမှုနှုန်းကို နောက်ထပ် ၅၀% ထပ်မံ တိုးမြှင့်ပေးသည်။]

[ဝိညာဉ်စိုက်ခင်းဂူသည် ကမ္ဘာသုံးထောင်တွင်ပင် ရှားပါးသော ဝိညာဉ်ကြွယ်ဝသည့် နေရာဖြစ်သော်လည်း သင့်ကို ကျေနပ်မှု မပေးနိုင်သေးချေ။]

[သင်သည် အဆင့်နိမ့် ဝိညာဉ်အရည် ပုလင်းတစ်ပုလင်းကို ထုတ်ယူကာ ဝိညာဉ်အရည် ထောင်ပေါင်းများစွာကို သောက်သုံးခဲ့သည်။]

[ထို့နောက် သင်သည် သင်၏ ကျင့်ကြံမှု နည်းစနစ်ကို အသက်သွင်းပြီး ဝိညာဉ်အရည်မှ သန့်စင်သော ဝိညာဉ်စွမ်းအင်များကို သင်၏ကိုယ်ပိုင် ဝိညာဉ်စွမ်းအားအဖြစ် လျင်မြန်စွာ ပြောင်းလဲခဲ့သည်။]

[ရက်အနည်းငယ် ကြာပြီးနောက် သင်သည် မျက်လုံးများကို ဖြည်းညှင်းစွာ ဖွင့်လိုက်သည်။ ဝိညာဉ်အရည် ထောင်ပေါင်းများစွာကို ကျင့်ကြံမှုအဖြစ် အပြည့်အဝ ပြောင်းလဲပြီး ဖြစ်သည်။]

[သင်၏ ကျင့်ကြံမှုအဆင့် တိုးတက်လာသည်ကို ရှင်းလင်းစွာ ခံစားရပြီးနောက် သင်သည် ကျေနပ်စွာ ခေါင်းညိတ်လိုက်သည်။]

[ထို့ကြောင့် သင်သည် ဝိညာဉ်စိုက်ခင်းဂူထဲ၌ တစ်နှစ်တာမျှ တိတ်ဆိတ်စွာ နေထိုင်ပြီး နေ့ရောညပါ ကြိုးစားကျင့်ကြံခဲ့သည်။]

[ထိုတစ်နှစ်တာအတွင်း သင်သည် ဝိညာဉ်အရည် ငါးသန်းနီးပါးကို စုပ်ယူခဲ့ပြီး အားလုံးကို ကျင့်ကြံမှုအဖြစ် ပြောင်းလဲခဲ့သည်။]

[သင်၏ ကျင့်ကြံမှုအဆင့်သည် ကိုယ်ခန္ဓာ ပေါင်းစည်းခြင်း အဆင့်၏ ပထမအဆင့် နှောင်းပိုင်းသို့ အောင်မြင်စွာ ရောက်ရှိခဲ့ပြီး ဒုတိယအဆင့်နှင့် နီးကပ်လာခဲ့သည်။]

[ဆယ်ုခုနစ်နှစ်မြောက်တွင် သင်သည် နောက်ထပ် ခြောက်လမျှ ပုန်းအောင်းနေပြီး ဝိညာဉ်အရည် နှစ်သန်းကို စုပ်ယူကာ ကျင့်ကြံမှုအဖြစ် ပြောင်းလဲခဲ့သည်။]

[သင်၏ ချီကျင့်ကြံမှုအဆင့်သည် နောက်ဆုံးတွင် ကိုယ်ခန္ဓာ ပေါင်းစည်းခြင်း အဆင့်၏ ဒုတိယအဆင့်သို့ တက်လှမ်းနိုင်ခဲ့သည်။]

လက်တွေ့ကမ္ဘာ၌ စုရှင်းသည် သူ့ရှေ့ရှိ သရုပ်ပြခြင်း စာသားကို ကြည့်ရင်း အနည်းငယ် မျက်မှောင်ကြုတ်လိုက်မိသည်။

“ဟာ... ကိုယ်ခန္ဓာ ပေါင်းစည်းခြင်း အဆင့်မှာ ကျင့်ကြံရတဲ့ ခက်ခဲမှုက လွတ်မြောက်ခြင်း ဖြိုခွင်းနယ်ပယ်ရဲ့ ခက်ခဲမှုထပ် ဆယ်ဆကျော် ပိုတယ်‌ပေါ့”

စုရှင်းသည် သူ့စိတ်ထဲတွင် အမြန် တွက်ချက်လိုက်သည်။

လွတ်မြောက်ခြင်း ဖြိုခွင်းနယ်ပယ် အဆင့်တွင် အဆင့်တစ်ဆင့် တက်ရန် ဝိညာဉ်အရည် တစ်သန်းမှ နှစ်သန်းအထိသာ လိုအပ်သည်။

…