ထောင်မြင်ရာစွန့်!
Vol. 71 Ch. 1054
"ဒါတကယ် ဥက္ကာခဲလား?''
ဝန်ကြီးလုမမေးဘဲမနေနိုင်တော့။
"တော်ဝင်ပညာရှင်လီ''
ယွမ်ရှန်ကပြောသည်_
"သူဒီသုတေသနမှာပါခဲ့တာ... သူသိတယ်''
"ဟုတ်တယ် ဟုတ်တယ်... သူ့ကိုခေါ်ရမယ်''
ဝန်ကြီးလုကဖုန်းအမြန်ထုတ်ပြီး တော်ဝင်ပညာရှင်လီကိုဆက်သည်။
တစ်ဖက်တွင် ချင်လင်ကကွန်ပျူတာရှေ့တိတ်တိတ်လေးထိုင်ပြီး သိပ္ပံသုတေသနအကောင့်ထဲဝင်ကာ တရုတ်သိပ္ပံအကယ်ဒမီ၏ပြင်ပအချက်အလက်များထဲမှဥက္ကာခဲအကြောင်းရှာဖတ်နေသည်။
ဖတ်ပြီး သူပါးစပ်အဟောင်းသားဖြစ်သွား၏။
ဒီပစ္စည်းက သိပ္ပံသုတေသနမှာဒီလောက်အသုံးဝင်မည်ဟုသူမထင်မိ။ ဒါနဲ့စာရင် ခြေဖဝါးတိုက်တဲ့အာနိသင်က ဘာမှမဟုတ်တော့။
အထူးသဖြင့် သူ့ဥက္ကာခဲက အထူးဥက္ကာခဲဖြစ်ပြီးအထူးသိပ္ပံဆိုင်ရာအာနိသင် +၂ ရှိသည်။
မထူးခြားဘူးလား?
ထိုအကြောင်းတွေးရင်း ချင်လင်ကအမှတ်တမဲ့ သူ့စိတ်ထဲမှဖန်သားပြင်ကိုကြည့်ကာ ဂိမ်းဇာတ်ကောင်အား ရေကန်သတ္တုတွင်းအလွှာ ၄၀ ကိုဆက်တူးစေသည်။
ဆယ်ကွက်ကျော်ကျော်တူးပြီး စနစ်အသိပေးချက်ပေါ်လာပြန်သည်။
(ဂုဏ်ယူပါတယ်... အထူးဥက္ကာခဲတူးဖော်ရရှိပါတယ်!)
ထိုစာကြောင့် ချင်လင်မနေနိုင်ဘဲပြုံးစိစိဖြစ်လာသည်။
အရင်ကဥက္ကာခဲကိုအမြင်ကတ်ခဲ့သလောက် အခုတော့မျှော်လင့်နေပြီ။
သူကချက်ချင်း ဂိမ်းဇာတ်ကောင်အားဆက်တူးစေသည်။ ဖြစ်ချင်တော့ သူဆုတောင်းသလိုဖြစ်မလာ။ ဆက်တူးသော်လည်း အလွှာ ၄၀ ကုန်သည့်တိုင် ဘာဥက္ကာခဲမှမရတော့။
သော*က်ရမ်းအောင့်တယ်!
စိတ်ရှုပ်တယ်ဆိုတုန်းကကျ ဆက်တိုက်ပေါ်လာပြီး ဟုတ်ပြီ၊လိုချင်ပြီဆိုမှ အရွဲ့တိုက်ပြီးပေါ်မလာတော့။
ချင်လင်စိတ်ပျက်နေစဉ် တော်ဝင်ပညာရှင်လီက ကိရိယာသေတ္တာလေးနှင့်ရောက်လာပြီး_
"ဝန်ကြီးလု... ဥက္ကာခဲဘယ်မှာလဲ?''
ဖုန်းရရချင်း သူအရမ်းအံ့ဩသွားသည်။
သူဌေးချင်က သဘာဝဥက္ကာခဲရခဲ့တာဖြစ်မယ်တဲ့?
သေးသေးမဟုတ်ဘူးတဲ့?
"တော်ဝင်ပညာရှင်လီ!''
ဝန်ကြီးလုက တော်ဝင်ပညာရှင်လီကိုအမြန်ဆွဲခေါ်ပြီး_
"တော်ဝင်ပညာရှင်လီ ဒီမှာ! မြန်မြန်.. ကြည့်ပါဦး!''
တော်ဝင်ပညာရှင်လီက ဥက္ကာခဲကိုကြည့်ပြီးချက်ချင်းကိရိယာသေတ္တာလေးဖွင့်ကာ သေချာစစ်ဆေးလိုက်သည်။
အကြာကြီးကြာပြီးနောက် တော်ဝင်ပညာရှင်လီကမယုံနိုင်ပုံနှင့်_
"တကယ်ဥက္ကာခဲပဲ... အားလုံးသေချာဂရုစိုက်ကြပါ... ကျုပ် ဒီဥက္ကာခဲထည့်စရာရှာဦးမယ်''
တချို့ဥက္ကာခဲများတွင် မသန့်စင်သောဓာတ်များပါပြီး ၎င်းတို့၏မတည်ငြိမ်သောဖွဲ့စည်းပုံကြောင့်ဓာတ်ပြုကာ ရေဒီယိုသတ္တုကြွနိုင်သည်!
သူ့စကားကြောင့် လီခိုင်နှင့်ယွမ်ရှန်ကသတိထားလိုက်သည်။
တော်ဝင်ပညာရှင်လီကလည်း သူ့ကိရိယာသေတ္တာထဲမှထည့်စရာတစ်ခုသေချာထုတ်လိုက်သည်။
ချင်လင်တစ်ယောက်သာ စိတ်အေးလက်အေးဖြစ်နေ၏။
ဥက္ကာခဲမှတ်ချက်ထဲမှာ တည်ငြိမ်သည့်ဖွဲ့စည်းပုံရှိကြောင်းပါ၍ သာမန်ဥက္ကာခဲများနှင့်လုံးဝမတူ။ ခြေဖဝါးတိုက်နိုင်သည့်အတွက် အသုံးပြုနိုင်သည့်သဘောပင်။ တော်ဝင်ပညာရှင်လီပြောသလိုအခြေအနေမျိုးဖြစ်မလာနိုင်။
သို့ရာတွင် ဥက္ကာခဲဖြစ်ကြောင်းအတည်ပြုပြီးနောက် ဝန်ကြီးလုကချက်ချင်းရုံးခန်းအပြင်ထွက်ပြီးသူ့အခန်းထဲပြန်လာကာ ခေါင်းဆောင်ကိုလျှို့ဝှက်နံပါတ်မှတဆင့်ဆက်သွယ်လိုက်ပြန်သည်။
တဖက်တွင် ခေါင်းဆောင်ကနည်းနည်းစိတ်ရှုပ်သွားပုံရပြီး_
"ဝန်ကြီးလု ဘာဖြစ်လို့လဲ? မင်း တစ်နေ့တည်းဖုန်းနှစ်ခါဆက်တာ ရှားရှားပါးပါးပါလား!''
အရေးမကြီးရင် ဝန်ကြီးလုဖုန်းမဆက်တတ်မှန်း ခေါင်းဆောင်လည်းသိသည်။ သူခေါ်ရင် အရေးကြီးကိစ္စဖြစ်ရမည်။
"ခေါင်းဆောင်''
ဝန်ကြီးလုက အစီရင်ခံသည်_
"သူဌေးချင်မှာ သဘာဝဥက္ကာခဲ ၂၀၀ ဂရမ်ရှိတယ်''
"ဘာ?''
ခေါင်းဆောင်ကသတင်းကြားပြီး အံ့ဩသွားသည်။ သူကအကြာကြီးအသံတိတ်နေပြီးမှ_
"ငါတို့ဥက္ကာခဲကိုပြန်ယူရမယ်... သူဌေးချင်ကိုပေးထားလို့ဖြစ်မလား? တန်ရာတန်ကြေးပေးလိုက်ပါ''
"ကောင်းပါပြီ ခေါင်းဆောင်''
ဒါကလည်း ဝန်ကြီးလုဖုန်းဆက်ရသည့်အကြောင်းရင်းပင်။
ဥက္ကာခဲကဒီလောက်အရေးကြီးမှတော့ သူဌေးချင်များများစားစားလှူသင့်သည်။
ဒါပေမဲ့ စောစောကပဲ သူဌေးချင်ကကင်ဆာလက်ဖက်ခြောက်နည်းပညာမျှဝေဖို့ဆုံးဖြတ်ထားတာ။
အခုဥက္ကာခဲရှိလာတော့ ဥက္ကာခဲလှူစေချင်ပြန်ပြီ။ ဒီတော့ ဘယ်လိုဖြစ်သွားမလဲ?
ရိတ်ချင်တိုင်း ရိတ်လို့မရ။
သူဌေးချင်ကလှူချင်ရင်တောင်၊ သူတို့ရပိုင်ခွင့်ရှိတယ်လို့ထင်ရင်တောင် နှစ်ဦးနှစ်ဖက်ဆက်ဆံရေးအပေါ်ထိခိုက်မှုရှိနိုင်သည်။
ဒီတော့ တန်ရာတန်ကြေးပေးဝယ်တာ အကောင်းဆုံးပင်။
၂၀၀ ဂရမ်မှ ဘီလီယံ ၄၀ ကျော်တည်း။
နောက်ပြီး လက်ဖက်နည်းပညာကရမယ့်အကျိုးအမြတ်က ဒီထက်သာသေးသည်။
ထောင်မြင် ရာစွန့်ရမည်။
မကြာမီ ဝန်ကြီးလုကရုံးခန်းထဲပြန်လာပြီး ချင်လင်ကိုတန်းမေးလိုက်သည်_
"သူဌေးချင်... မင်းရဲ့ဥက္ကာခဲကို ငါတို့ဝယ်ချင်တယ်... စျေးကွက်ပေါက်စျေးအရ တစ်ဂရမ်ကို သန်း ၂၀၀ တန်တယ်''
"ဝန်ကြီးလု ဒါ.. ဒါ..''
ချင်လင်ပါးစပ်အဟောင်းသားဖြစ်သွားပြီး ဘာပြန်ပြောရမှန်းမသိ။
တစ်ဂရမ်ကို သန်း ၂၀၀ ဆိုတော့ ဘီလီယံ ၄၀ ကျော်ပေါ့?
ဘီလီယံ ၄၀ က ဘာကိုကိုယ်စားပြုလဲ? Forbes ရဲ့လူချမ်းသာစာရင်းမှာသူပါနိုင်ပြီး ပိုင်ဆိုင်မှုက ဘီလီယံ ၄၀ ရှိမည်။
ငွေသား ဘီလီယံ ၄၀ ပင်။
ပြည်တွင်းကအချမ်းသာဆုံးသူဌေးတောင် ငွေသားဘီလီယံ ၄၀ ထုတ်ပြနိုင်မည်မဟုတ်။
ထိပ်တန်းသူဌေးကြီးများ၏အမြင့်ဆုံးငွေကြေးစီးဆင်းမှုမှာ ဘီလီယံ ၄၀ ကျော်ဟုမှတ်တမ်းရှိသည်။ နောက်ပြီး ဘီလီယံ ၄၀ ကိုကြာကြာစုမထားနိုင်။
ထို့ကြောင့် Tiktok အင်တာနက်ဆယ်လီများမှာ ငွေကြေးစီးဆင်းမှုဆယ်ဘီလီယံရှိသည်ဟုပြောရင် ရယ်စရာဖြစ်နေမည်။
ထိပ်တန်းလူချမ်းသာ ၃၀ စာရင်းဝင်သူဌေးကြီးများသာ စတော့မပါဘဲ ငွေသားဘီလီယံဆယ်ချီလွှဲနိုင်သည်။
ငွေသားဘီလီယံ ၄၀ ကိုရှေ့ချထားရင် သူဌေးကြီးနှစ်ယောက်တောင် ရင်ခုန်သွားနိုင်သည်။
တကယ်တော့ ချင်လင်ကဥက္ကာခဲအကြောင်းသိပြီးနောက် မရောင်းဘဲနိုင်ငံကိုလှူလိုက်ချင်သည်။
ပထမအချက်၊ ရေကန်သတ္တုတွင်းမှာတူးနိုင်သောကြောင့် သူသိပ်ဂရုမစိုက်။
ဒုတိယအချက်၊ သူကနိုင်ငံကိုအင်အားရှိစေချင်သည်။ သိပ္ပံသုတေသနကိုအားကောင်းစေချင်သည်။
လူတစ်ယောက်ပျော်ရွှင်မှုကိုတည်တံ့အောင်ထိန်းပေးနိုင်စွမ်းက နိုင်ငံမှာရှိသည်ဟုသူသိထားသည်။ အခုလူတွေဘာမှသိပ်အားထုတ်စရာမလိုတဲ့အကြောင်းရင်းက နိုင်ငံ့အင်အားကြောင့်ပင်။
ထို့ကြောင့် အင်တာနက်ပေါ်မှာနိုင်ငံအပေါ်ပုံချနေသူများက လွန်ခဲ့သောနှစ် ၁၀၀ ကိုပြန်သွားသင့်သည်။ ဒါမှ ဒီနေ့ကျေးဇူးတင်ရကောင်းမှန်းသိလာမည်။