လယ်ယာသုံးသတ္တုကိရိယာ!
Vol. 71 Ch. 1064
ချင်လင်ကသူ့စိတ်ထဲမှဖန်သားပြင်တွင်လှုပ်ရှားမှုတွေ့ပြီး ချက်ချင်းသူ့ဂိမ်းဇာတ်ကောင်အား စိုက်ပျိုးရေးခြံအပေါက်ဝမှလူပုလေးအာနီဆီသွားစေသည်။
ဒီတစ်ခါ စကားပြောကထူးဆန်းသည်။
(လူပုလေးက သင်နှင့်ပစ္စည်းချင်းလဲချင်ပုံရသည်!)
ထိုမှတ်ချက်ကြောင့် လူပုလေးအာနီအပေါ်တန်းနှိပ်လိုက်သော်လည်း တုံ့ပြန်မှုမရှိ။
ဇာတ်ကွက်တာဝန်ကနှိပ်လိုက်ရင် စကားပြောပေါ်လာသည်။
သူထပ်ခါတလဲလဲနှိပ်သော်လည်း စကားပြောပေါ်မလာ။
“???”
ချင်လင်မျက်မှောင်ကြုတ်လိုက်သည်။
ဂိမ်းဇာတ်ကွက်တာဝန် ဟုတ်ဟန်မတူ။ ကြည့်ရတာ BUG ရှိ၍စကားပြောမထွက်နိုင်။
တနည်းပြောရရင် ဒီတစ်ခါလူပုလေးအာနီပုံစံက ဂိမ်းနှင့်မဆိုင်သလိုပင်။
ချင်လင်ကတစ်ခုခုတွေးမိသည်။ ကျောက်မိုချင်းတို့အချက်အလက်များဖတ်နေသည်ကိုအနှောင့်အယှက်မပေးဘဲ သူ့ရုံးခန်းထဲတန်းပြန်လာသည်။
ရုံးခန်းတံခါးလော့ချပြီးနောက် အတွေးနှင့်ဂိမ်းထဲဝင်လိုက်၏။
သူဂိမ်းထဲဝင်လိုက်သည်နှင့် အနီရောင်လူပုလေးတစ်ယောက်ပြေးလာသည်ကိုတွေ့ရသည်။ လူပုလေး ၇ ယောက်ထဲမှအနီရောင်ပင်။
"သူဌေး... အာနီလာရှာပါတယ်''
အနီလေးက သူ့ဆီရောက်လာသည်။
“သိပြီ''
ချင်လင်ခေါင်းညိမ့်လိုက်သည်။
သူ့ဂိမ်းဇာတ်ကောင်အား ခပ်လှမ်းလှမ်းမှလူပုလေးများနှင့်စကားပြောနေသောအာနီဆီသွားပြီး နှိပ်ကြည့်စေသည်။
ဒါဂိမ်းနဲ့တူပုံမရ။
ဒီတစ်ခါ လူပုလေးအာနီပုံစံကထူးခြားနေသည်။
ဂိမ်းဖန်သားပြင်ကိုကြည့်တုန်းက လူပုလေးအာနီပေါ်လာသော်လည်း ဘယ်လူပုလေးမှစကားလာမပြောကြ။
လူပုလေး ၇ ယောက်က ဂိမ်းထဲမှာချင်လင်ပေးထားသောတာဝန်များကိုအပြီးသတ်နေကြသည်။
ထို့ကြောင့် စိုက်ပျိုးရေးခြံပေါက်မှာလူပုလေးအာနီပေါ်လာတုန်းက လူပုလေး ၇ ယောက်မရှိပေ။
သို့သော် သူဝင်လာပြီးနောက် လူပုလေးများက အာနီနှင့်ရှေးဟောင်းနှောင်းဖြစ်များပြောနေကြသည်။
ဒါကလည်း ပုံမှန်အခြေအနေပင်။ ဘာပဲဖြစ်ဖြစ် အသိအကျွမ်းဟောင်းတွေက သေချာပေါက်ထွက်လာပြီး အရင်အကြောင်းတွေပြောကြမည်။
ချင်လင်က လူပုလေးအာနီဆီလျှောက်လာသည်။
"ပြန်ဆုံပြီနော်''
အာနီက စိတ်လှုပ်ရှားသံနှင့်_
"ငါမင်းနဲ့ဆွေးနွေးစရာရှိတယ်... ရလား?''
"ပြောပါ... ဘာလိုချင်လဲ?''
ချင်လင်က ပြုံးပြုံးနှင့်မေးသည်။
"မင်းမှာ ပန်းအိမ်ဒီဇိုင်းတွေအများကြီးရှိတယ်ဆိုတော့''
အာနီက လောလောနှင့်_
"ငါတို့အတူတူအလုပ်လုပ်ရင်ရော? ငါမင်းနဲ့ပန်းအိမ်ဒီဇိုင်းအလဲအလှယ်လုပ်ပြီး တခြားလူပုလေးတွေကိုရောင်းလို့ရတယ်''
ချင်လင်ကနားထောင်ရင်း ရယ်လိုက်သည်။
သူဒီလိုတွေးမိပေမဲ့ အာနီဒီလောက်ဉာဏ်ပြေးမယ်လို့ဘယ်ထင်မလဲ? တကယ်သူ့အိမ်ရောက်လာပြီး ပူးပေါင်းဖို့ပြောသည်။ ထို့ကြောင့် အာနီကိုပြုံးတုံ့တုံ့ကြည့်လိုက်၏။
ဒီလူက ဉာဏ်ကောင်းလိုက်တာ။ ဂိမ်းမှာဒီလူကိုယ်တိုင်လက်လွှဲယူထားတဲ့ဇာတ်ကွက်တချို့လည်းရှိသည်။ ယှဉ်ပြိုင်ရင်း သူ့ကိုတောင်လှည့်စားပြီး တမင်သက်သက်အရှုံးပေးသေးသည်။
ဒီလိုလူနဲ့စီးပွားလုပ်ရင် သတိထားရမည်။ မဟုတ်ရင် လှည့်စားခံရနိုင်သည်။
ချင်လင်စိုက်ကြည့်နေသောကြောင့် ချင်လင်ရဲ့လုပ်ငန်းကိုသူလွှဲယူဖို့တောင်းဆိုသလိုဖြစ်နေလားဟူ၍ အာနီကမလုံမလဲဖြစ်သွားသည်။ သူကချက်ချင်းပင်_
"တကယ်ပါ... ငါ့မှာသတ္တုစရှိတယ်... လူပုလေးတောင်ကြားကပန်းပဲဖိုမှာ လယ်ယာသုံးကိရိယာနှစ်ခုလုပ်ပေးလို့ရတယ်''
"လယ်ယာသုံးကိရိယာ!''
ချင်လင်မျက်စိကျယ်သွားသည်။
စိုက်ပျိုးရေးခြံပုံပြင်တွင် ငါးမျှားတံကိုအဆင့်မြှင့်နိုင်ရုံသာမက လယ်ယာသုံးကိရိယာကိုလည်းအဆင့်မြှင့်နိုင်သည်။
အဆင့်မြှင့်သောအစဉ်မှာ:
သာမန်၊ အဆင့် ၂ ကြေး၊ အဆင့် ၃ ငွေ၊ အဆင့် ၄ ရွှေ၊ အဆင့် ၅ သတ္တုဒြပ်စင်၊ အဆင့် ၆ ကျိန်စာ၊ အဆင့် ၇ ကောင်းချီး၊ အဆင့် ၈ ပညာ။
ကြေး၊ငွေ၊ရွှေက သာမန်လယ်ယာသုံးကိရိယာများဟုယူဆနိုင်ပြီး အသုံးပြုရင်းအစွမ်းတက်လာသည်။
ငါးမျှားတံကပိုမြန်ပြီး ငါးများများဖမ်းနိုင်သည်။
အရင် တူ ၄ ချက်ပေါက်ရင် ကျောက်တုံးတစ်တုံးကွဲသော်လည်း အခု ၂ ချက်သာပေါက်ရသည်။
ငွေအဆင့်ရောက်လာရင် တမျိုးဖြစ်သွားသည်။
ငွေက တစ်ချက်ပေါက်ရုံနှင့် ပတ်ပတ်လည်မြက်အားလုံးရှင်းနိုင်သည်။
ရွှေကတစ်ချက်ပေါက်ရင် ပတ်ပတ်လည်ကျောက်တုံးအားလုံးရှင်းနိုင်၏။
သတ္တုကမူ ပတ်ဝန်းကျင်ရှိသစ်ပင်များကိုခုတ်နိုင်သည်။
နောက်ဆုံး ပညာအဆင့်ရောက်ရင် ဖန်သားပြင်အပြည့်အာနိသင်ရှိမည်။
တစ်ချက်ပေါက်ပြီး ဖန်သားပြင်တစ်ပြင်လုံးရှင်းသွားမည်။ ကျောက်တုံးအားလုံးကွဲကြေသွားမည်။
စိုက်ပျိုးရေးခြံပုံပြင်က စိတ်ကူးယဉ်ဂိမ်းဖြစ်ရသည့်နောက်ထပ်အကြောင်းရင်းတစ်ခုပင်။
သို့ရာတွင် ကိရိယာကိုအဆင့်မြှင့်ချင်တိုင်းမြှင့်မရ။ ကျိန်စာအဆင့်ရောက်ရင် အထူးဇာတ်ကွက်တာဝန်၊ အထူးအခြေအနေများလိုအပ်သည်။
ကျိန်စာကိရိယာရရင် ခရစ်ယာန်ကျောင်းသွားပြီးဆုတောင်းနိုင်သည်။ အချိန်တစ်ခုကြာလျှင် ကျိန်စာက လယ်ယာသုံးကိရိယာမှာအစွမ်းပြမည်။
ကောင်းချီးကိရိယာကပိုစွမ်းသည်။ အရည်အသွေးမြင့်ပစ္စည်းကောင်းများရအောင်အသုံးချနိုင်သည်။
ကောင်းချီးကိရိယာသုံးလျှင် တူးရင်းဆွရင်း ရှေးဟောင်းအဖိုးတန်အရိုးများတူးဖော်ရနိုင်သည်။ တချို့ပုံစံများထဲတွင် ယဉ်ကျေးမှုပစ္စည်းများတောင်ရနိုင်သည်။
ဒီမတိုင်ခင်က သူ့လယ်ယာသုံးပစ္စည်းမှာ အဆင့်မြှင့်နိုင်ကြောင်းအသိပေးချက်မရဖူးပေ။ အာနီဆီက သတ္တုဒြပ်စင်ကိရိယာရမည်ဟုမထင်မိ။
ပုံမှန်ဂိမ်းအစီအစဉ်ကနေ သွေဖယ်သွားပုံရသည်။
ဂိမ်းထဲတွင် လယ်ယာသုံးပစ္စည်းကတစ်ဆင့်ချင်းအဆင့်တက်ရသည်။
နောက်ပြီး ပန်းအိမ်ဒီဇိုင်းက ဂိမ်းထဲမှာမရှိ။ ဒီအပိုင်းက လုံးဝဂိမ်းဇာတ်ကွက်မဟုတ်ပေ။
"ဘယ်လိုလဲ?''
လူပုလေးအာနီက ချင်လင်ကိုမျှော်လင့်ချက်နှင့်ကြည့်လိုက်သည်။
"အကြံကောင်းပဲ''
ချင်လင်ကပြုံးပြုံးနှင့်ထောက်ခံသည်။
လူပုလေးအာနီက စိတ်လှုပ်ရှားလာပြီး_
"လယ်ယာသုံးသတ္တုကိရိယာ ၂ ခုနဲ့ ဒီဇိုင်း ၁၀ ခုလဲမလား?''
ချင်လင်ကကြည့်ပြီးပြုံးလိုက်သည်။
ဒီလူဉာဏ်မကောင်းဘူးလား? သူ့ရည်ရွယ်ချက်ကိုပြောပြဖို့ အလောတကြီးရောက်လာတာ?
ကြည့်ရတာ ပန်းအိမ်ဒီဇိုင်းက လူပုလေးတွေကြားမှာအတော်ရေပန်းစားနေပုံရသည်။