မီးလျှံနီ မျိုးနွယ်၏ ကျိန်စာ (၂)...

~သို့သော် ဤသည်မှာလည်း သဘာဝကျပေသည်။ မည်သို့ပင်ဆိုစေကာမူ မီးလျှံနီ မျိုးနွယ်ကို ကိုယ်စားပြုသော ကိတ်မုန့်ကြီးမှာ အလွန်တရာ ကြီးမားလှသည် မဟုတ်လော။

"ဒီအချိန်အတောအတွင်းမှာ ငါတို့ မီးလျှံနီ

မျိုးနွယ်ဟာ ကျင့်ကြံခြင်း နည်းစနစ်ကျမ်းတွေနဲ့ အမွေအနှစ် အမျိုးမျိုးကို အများကြီး ဆုံးရှုံးခဲ့ရပြီး လူအများအပြားလည်း သေဆုံးခဲ့ကြရတယ်။ အကြီးအကဲတွေရဲ့ ပြောစကားအရ အဲ့ဒီအချိန်တုန်းက စကြဝဠာ တစ်ခုလုံးမှာ ရှိတဲ့ အင်အားစုအားလုံးဟာ သေဆုံးမှု အကြီးအကျယ်ကို ခံစားခဲ့ကြရတယ်တဲ့။ ကျိုယိုမိစ္ဆာတွေကို ရင်ဆိုင်ရတဲ့အခါ ငါတို့မှာ ခုခံ ကာကွယ်နိုင်စွမ်း လုံးဝမရှိသလောက် ဖြစ်ခဲ့ရတယ်။ ဒါပေမဲ့ နောက်ပိုင်းမှာ တစ်နေ့ကျတော့ ကျိုယိုမိစ္ဆာတွေက ကျိုယိုကမ္ဘာထဲကို ရုတ်တရက် ပြန်ဝင်သွားကြပြီး နောက်တစ်ခါ ဘယ်တော့မှ ပေါ်မလာတော့ဘူး။ ပြီးတော့ အဲ့ဒီ ကျိုယို လမ်းကြောင်းတွေမှာလည်း အပြောင်းအလဲ အမျိုးမျိုး ဖြစ်ပွားခဲ့ပြီး နေရာလပ် အက်ကွဲကြောင်းတွေက တံဆိပ်ခတ်ခံလိုက်ရတယ်၊ စကြဝဠာက ပုံမှန် အခြေအနေကို ပြန်ရောက်သွားသလိုပဲ၊ ဒါပေမယ့်…"

မီးလျှံစွန့်ခွာခြင်းဂိုဏ်းမှ အကြီးအကဲသည် အနီဖျော့ရောင် ပုံရိပ်ယောင်ကို ရှုပ်ထွေးသော အကြည့်တစ်ချက်ဖြင့် လှမ်းကြည့်လိုက်သည်။

အနီဖျော့ရောင် ပုံရိပ်ယောင်က မည်သို့မျှ ခံစားချက်မပြဘဲ မိန့်ကြားလိုက်သည်။

"ဒါပေမယ့် ငါနဲ့ တခြား အင်မော်တယ် ဘုရင်တွေ၊ အင်မော်တယ် ဧကရာဇ်တွေက ကျိုယိုကမ္ဘာထဲကနေ ပြန်မလာခဲ့ကြဘူး၊ အဲ့ဒီလိုလား။"

မီးလျှံစွန့်ခွာခြင်းဂိုဏ်းမှ အကြီးအကဲက ခေါင်းညိတ်လိုက်သည်။

"ဟုတ်ကဲ့ပါ ..."

အနီဖျော့ရောင် ပုံရိပ်ယောင်က အသာအယာ ခေါင်းညိတ်ရုံသာ ညိတ်လိုက်သည်။

"အဲ့ဒီနောက် ဘာဆက်ဖြစ်ခဲ့လဲ။ အကယ်၍သာ အရာအားလုံးက ပုံမှန်အတိုင်းဆိုရင် ကျိုယိုမိစ္ဆာတွေ ဆုတ်ခွာသွားပြီးနောက် မီးလျှံနီ မျိုးနွယ်က ဆုံးရှုံးမှုအကြီးအကျယ် ခံစားခဲ့ရပြီး အမွေအနှစ်တွေ ဆုံးရှုံးခဲ့ရင်တောင် အခြေခံအုတ်မြစ်တစ်ခု ရှိနေသေးသမျှ ကာလပတ်လုံး၊ အချိန်အတန်ကြာ အသံတိတ်နေလိုက်ရင် ငါတို့ ပြန်လည် နာလန်ထူနိုင်သင့်တယ် မဟုတ်လား။ အဲ့ဒီနောက် ဘယ်လို ကပ်ဘေးမျိုး ကြုံတွေ့ခဲ့ရသေးလဲ။"

မီးလျှံစွန့်ခွာခြင်းဂိုဏ်းမှ အကြီးအကဲ၏ မျက်နှာအမူအရာမှာ ယခုအခါ ပို၍ပင် ထူးဆန်းသွားတော့သည်။

သူက "တပည့်လည်း အတိအကျတော့ မသိပါဘူး၊ ပြီးတော့… အကြီးအကဲတွေတောင်မှ အတိအကျ မသိကြပါဘူး" ဟု ပြန်ဖြေလိုက်သည်။

"မင်း ဆိုလိုချင်တာက ဘာလဲ။"

အနီဖျော့ရောင် ပုံရိပ်ယောင်နှင့် လုရီ နှစ်ဦးစလုံး မျက်မှောင်ကြုတ်မိလိုက်ကြသည်။

ခဏမျှ စဉ်းစားပြီးနောက် မီးလျှံစွန့်ခွာခြင်းဂိုဏ်းမှ အကြီးအကဲက ဆိုလိုက်၏။

"တပည့် ငယ်ငယ်တုန်းက အကြီးအကဲ တစ်ပါး ပြောခဲ့ဖူးတာကတော့ ကျွန်တော်တို့ မီးလျှံနီ

မျိုးနွယ် ကျိန်စာတိုက်ခံခဲ့ရတယ်လို့ ထင်ရတယ်တဲ့။ မျိုးဆက် တစ်ခုချင်းစီမှာ ပေါ်ထွက်လာတဲ့ ပါရမီရှင်တွေရဲ့ အရေအတွက်က အရင်မျိုးဆက်ထက် ပိုနည်းလာခဲ့တယ်။ ဘိုးဘေးအင်မော်တယ်က အင်မော်တယ်ဘုရင်အဆင့်ကို အဆင့်

ချိုးဖြတ်ပြီး ကျွန်တော်တို့ မျိုးနွယ်ရဲ့ သွေးကြောကို မြင့်မြတ်စေခဲ့တဲ့အတွက် ကျွန်တော်တို့

မျိုးနွယ်မှာ မွေးဖွားလာတဲ့ အားအနည်းဆုံး အဖွဲ့ဝင်တွေတောင် အနည်းဆုံးတော့ တပိုင်း အင်မော်တယ်ဘုံမှာ ရှိခဲ့ကြတယ်။ ဒါပေမဲ့ ကျိုယိုမိစ္ဆာတွေ ထွက်ခွာသွားပြီး ကျိုယိုလမ်းကြောင်းတွေ ပိတ်သွားပြီးနောက် ကျွန်တော်တို့ မျိုးနွယ်မှာ သာမန် လူသားတွေတောင် မွေးဖွားလာခဲ့ပါတယ်"

ဤထုတ်ဖော်ပြောကြားချက်က အနီဖျော့ရောင် ပုံရိပ်ယောင်၏ မျက်နှာတွင် တုန်လှုပ်မှုကို ထင်ဟပ်သွားစေခဲ့သည်။

"ဘယ်လို၊ ဒါ ဘယ်လိုလုပ် ဖြစ်နိုင်မှာလဲ။ မြင့်မြတ်သွားပြီးဖြစ်တဲ့ သွေးကြောတွေကနေ သာမန်လူသားတွေ ဘယ်လိုလုပ် မွေးဖွားလာနိုင်မှာလဲ။"

လုရီပင်လျှင် အနည်းငယ် မှင်သက်သွားသည်။

မီးလျှံစွန့်ခွာခြင်းဂိုဏ်းမှ အကြီးအကဲ ယခင်က ပြောခဲ့သည်အရ အင်မော်တယ်ဘုရင်အဆင့်သို့ အဆင့် ချိုးဖြတ်ပြီးနောက် သူတို့၏ မျိုးနွယ်သွေးကြောသည် မြင့်မြတ်သွားပြီး သူတို့၏ ပါရမီများမှာ များစွာ တိုးတက်လာခဲ့သင့်သည် မဟုတ်လော။ သို့ဆိုလျှင် သူတို့ အဘယ်ကြောင့် အားနည်းသွားနိုင်မည်နည်း။

"ဟုတ်ကဲ့ပါ ၊ ဒါကြောင့်ပဲ တပည့်တို့လည်း

နားမလည်နိုင် ဖြစ်နေရတာပါ။ အကြီးအကဲတွေ လက်ဆင့်ကမ်းလာတဲ့ ယူဆချက်ကတော့ ကျွန်တော်တို့ မျိုးနွယ် ကျိန်စာတိုက်ခံရတယ်ဆိုတာပါပဲ၊ ပြီးတော့ ဘိုးဘေးအင်မော်တယ် မရှိတော့တဲ့အတွက် ငါတို့ မျိုးနွယ်ရဲ့ သွေးကြောက ဘိုးဘေးဆီကနေ မြစ်ဖျားခံခဲ့တာဖြစ်လို့ ဘိုးဘေးမရှိတော့တဲ့နောက်မှာ သူ့ရဲ့ မူလအခြေအနေကို သဘာဝအတိုင်း ပြန်ရောက်သွားတာလည်း ဖြစ်နိုင်ပါတယ်။ ဒါပေမယ့်…"

မီးလျှံစွန့်ခွာခြင်းဂိုဏ်းမှ အကြီးအကဲ၏ မျက်နှာအမူအရာမှာ ညှို့မှိုင်းသွားပြီး အံကို ကြိတ်လိုက်သည်။

"ဒါပေမဲ့ သွေးကြော အားနည်းသွားရုံတင်မကဘူး၊ ကျွန်တော်တို့ မျိုးနွယ်မှာ မွေးဖွားလာတဲ့ မွေးကင်းစကလေးတွေရဲ့ မွေးဖွားနှုန်းကလည်း အရင်ကထက် သိသိသာသာ လျော့ကျသွားပြီး လူဦးရေက တဖြည်းဖြည်း လျော့နည်းလာခဲ့ပါတယ် ဘိုးဘေး။"

ဤစကားကို ကြားသောအခါ လုရီသည် အတိုင်းအတာတစ်ခုအထိ နားလည်စပြုလာခဲ့ တော့သည်။

မျိုးနွယ်တစ်စု၏ ပါရမီ အားနည်းသွားခြင်းမှာ အသေအပျောက်အများဆုံးအရာ မဟုတ်ပေ။ မွေးဖွားနှုန်း လျော့ကျသွားခြင်းသာလျှင် မျိုးဆက်တစ်ခုပြီးတစ်ခု လူဦးရေ တဖြည်းဖြည်း လျော့နည်းလာစေမည်မှာ မလွဲဧကန်ပင် ဖြစ်သည်။

အကယ်၍ အခြေအနေများသာ တည်ငြိမ်နေပါက မျိုးဆက်ပိုမို မွေးဖွားခြင်းဖြင့် လူဦးရေကို ထိန်းသိမ်းထားနိုင်ဖွယ် ရှိသည်။

သို့သော် စကြဝဠာထဲတွင် အန္တရာယ်များနှင့် မတော်တဆမှုများ များပြားလှရာ တည်ငြိမ်မှုမှာ အချိန်ကြာမြင့်စွာ ထိန်းသိမ်းရန် လွယ်ကူလှသည် မဟုတ်ပေ။

လူဦးရေ လျော့နည်းလာသည်နှင့်အမျှ မည်သည့်အရေးပါသော အဖြစ်အပျက်မဆို မျိုးနွယ်တစ်ခုလုံးအတွက် ပြန်လည်ပြင်ဆင်မရနိုင်သော ကြီးမားသည့် ဆုံးရှုံးမှုများကို ဖြစ်စေနိုင်ပေသည်။

လုရီသာမက အနီဖျော့ရောင် ပုံရိပ်ယောင်ပါ နားလည်သွားပြီး သူ၏ မျက်နှာအမူအရာမှာ ခဏမျှ ရှုပ်ထွေးသွားခဲ့သည်။

လုရီသည် အနီဖျော့ရောင် ပုံရိပ်ယောင် မည်သို့ ခံစားနေရမည်ကို အတိုင်းအတာတစ်ခုအထိ နားလည်နိုင်ခဲ့သည်။

အကယ်၍ ဤကျိန်စာသည် မီးလျှံနီ အင်မော်တယ်ဘုရင်၏ ကွယ်လွန်မှုကြောင့် ဖြစ်ခဲ့ပါလျှင် သူသည် မီးလျှံနီမျိုးနွယ်ကို အထွတ်အထိပ်သို့ ပို့ဆောင်ခဲ့သော်လည်း သူတို့အား ငရဲသို့လည်း ဆွဲချခဲ့သည်ဟု ဆိုနိုင်ပေသည်။

လေထုမှာ ခဏမျှ တိတ်ဆိတ်သွားပြီး

လျိုနင်ရွှမ်းနှင့် အခြားသူများပင်လျှင် လေးနက်သော မျက်နှာထားများဖြင့် စကားမပြောဘဲ နေခဲ့ကြသည်။

တိတ်ဆိတ်မှုအပြီးတွင် အနီဖျော့ရောင် ပုံရိပ်ယောင်သည် တစ်စုံတစ်ခုကို တွေးမိပြီး

"တခြား အင်မော်တယ် ဘုရင်တွေနဲ့

အင်မော်တယ် အင်ပါယာတွေရဲ့ မျိုးနွယ်တွေရော ဘယ်လိုလဲ။ သူတို့ မျိုးနွယ်တွေလည်း ကျိန်စာတိုက်ခံခဲ့ရသလား" ဟု စုံစမ်းလိုက်သည်။

မီးလျှံ စွန့်ခွာခြင်းဂိုဏ်းမှ အကြီးအကဲက အလျင်အမြန် ခေါင်းညိတ်လိုက်သည်။

"ဟုတ်ကဲ့ပါ၊ ကျွန်တော်တို့နဲ့ နီးစပ်တဲ့ အင်မော်တယ်ဘုရင်မျိုးနွယ်တချို့၊ ဥပမာ ကံကြမ္မာ

အင်မော်တယ်ဘုရင်ရဲ့ မျိုးနွယ်လိုမျိုးလည်း ကျိန်စာတစ်ခုကို ခံစားခဲ့ရပါတယ်။ သူတို့ ကျင့်ကြံမှုကို လေ့ကျင့်တဲ့အခါ နှလုံးသားမိစ္ဆာတွေကို မကြာခဏ ကြုံတွေ့ခဲ့ရပြီး တချို့ဆိုရင် နှလုံးသားမိစ္ဆာတွေကြောင့် နေရာမှာတင် မိစ္ဆာအဖြစ်သို့ ပြောင်းလဲသွားခဲ့ကြပါတယ်။ ကျွန်တော်တို့ ရပ်တည်ဖို့ ရုန်းကန်နေရဆဲမှာပဲ ကံကြမ္မာ အင်မော်တယ်ဘုရင်ရဲ့ မျိုးနွယ်က လူတွေကတော့ အားလုံးနီးပါး သေဆုံးသွားခဲ့ကြပါပြီ။ အသက်ရှင်ကျန်ရစ်သူတွေကတော့ ကျင့်ကြံမှုကို လေ့ကျင့်ဖို့ မဝံ့ရဲကြတော့ဘဲ သာမန်လူသားတွေအဖြစ်သာ အသက်ရှင်နေနိုင်ကြပါတော့တယ် ဘိုးဘေးခင်ဗျာ။"

"ကံကြမ္မာ အင်မော်တယ်ဘုရင်…"

လုရီ၏ မျက်ဆံများ အနည်းငယ် ကျုံ့သွားပြီး အနည်းငယ် အံ့အားသင့်သွားသည်။

သူသည် ကံကြမ္မာ အင်မော်တယ်ဘုရင်အကြောင်း သတင်းကို ဤနေရာတွင် ကြားရလိမ့်မည်ဟု ဘယ်တုန်းကမှ မမျှော်လင့်ခဲ့ပေ။ ပြီးတော့ ဤမျှ ဝမ်းနည်းကြေကွဲဖွယ်ရာ ဇာတ်လမ်းတစ်ခု ဖြစ်နေခဲ့သည်။

ကံကြမ္မာ အင်မော်တယ်ဘုရင် ပျောက်ဆုံးနေသည်မှာ တစ်ခု၊ သို့သော် သူ၏ မျိုးနွယ်အခြေအနေမှာ များစွာ ပိုမိုဆိုးဝါးလှသည်။

မီးလျှံနီ မျိုးနွယ် ခံစားခဲ့ရသော ကျိန်စာမှာ သူတို့နှင့် နှိုင်းယှဉ်လျှင် ဘာမျှမဟုတ်တော့ပေ။

နှလုံးသားမိစ္ဆာများသည် မည်သည့် ကျင့်ကြံသူအတွက်မဆို အလွန်တရာ အန္တရာယ်ရှိသော တည်ရှိမှုတစ်ခု ဖြစ်သည်။ စိတ်ဓာတ်ခိုင်မာသူများအတွက်မူ ကိုင်တွယ်နိုင်ဖွယ် ရှိသော်လည်း သာမန် ကျင့်ကြံသူများအတွက်မူ နှလုံးသားမိစ္ဆာများသည် အားနည်းချက်များကို အလွယ်တကူ အခွင့်ကောင်းယူနိုင်ပြီး ကျင့်ကြံသူကို မိစ္ဆာအဖြစ်သို့ ပြောင်းလဲစေနိုင်၏။ ပို၍ ဆိုးသည်မှာ နှလုံးသားမိစ္ဆာများသည် မူလဝိညာဉ်ကို တိုက်ရိုက် ကြေမွသွားစေနိုင်ပြီး ၎င်းမှာ လုံးဝ ပြန်လည် ပြင်ဆင်မရနိုင်သော သေခြင်းတရားကို ဆိုလိုပေသည်။

ကျင့်ကြံမှုကို လေ့ကျင့်ရုံမျှဖြင့် နှလုံးသားမိစ္ဆာများကို ကြုံတွေ့ရဖွယ် ရှိသည်။ မည်သူ ခံနိုင်ရည်ရှိမည်နည်း။

လုရီသည်သာ ခိုင်မာသော အခြေခံမျိုး ရှိ၍ နှလုံးသားမိစ္ဆာများပင်လျှင် လုရီအပေါ်တွင် အကူအညီမဲ့နေပေလိမ့်မည်။ သာမန်ကျင့်ကြံသူများအတွက်မူ နှလုံးသားမိစ္ဆာတစ်ကောင်နှင့် ရင်ဆိုင်ရသောအခါ မည်သူက သူတို့၏ ကျင့်ကြံမှုကို ပုံမှန်အတိုင်း ဆက်လက်လုပ်ဆောင်နိုင်မည်နည်း။

သို့သော် အဘယ်ကြောင့် ကံကြမ္မာ အင်မော်တယ်ဘုရင်၏ မျိုးနွယ်ကျိန်စာက မီးလျှံနီ မျိုးနွယ်ထက် ဤမျှ ပို၍ ချဲ့ကားနေရသနည်း။

ဒါက အလွန်အကျူးဆန်လွန်းမနေဘူးလော။

လုရီသည် ချောက်နက်ကြီး အပျက်အစီး နယ်မြေကို ရုတ်တရက် တွေးမိလိုက်သည်။

၎င်းသည် ကံကြမ္မာ အင်မော်တယ်ဘုရင်၏ ကျင့်ကြံရာ နေရာ ဖြစ်နိုင်မလား၊ ပြီးတော့ ကံကြမ္မာ မျိုးနွယ် ချန်ထားခဲ့သော ကျင့်ကြံခြင်းနည်းစနစ်ကျမ်းများ ရှိနေမလား..။

အကယ်၍ ရှိခဲ့ပါလျှင် သူ ကျိန်စာတိုက်ခံရပြီးနောက် ကံကြမ္မာ မျိုးနွယ်အကြောင်း တစ်စုံတစ်ရာကို သင်ယူနိုင်ဖွယ် ရှိပြီး ဖြစ်နိုင်လျှင် သဲလွန်စ အချို့ကို ရှာဖွေ တွေ့ရှိနိုင်ကောင်း တွေ့ရှိနိုင်လိမ့်မည်။

မီးလျှံစွန့်ခွာခြင်းဂိုဏ်းမှ အကြီးအကဲ၏ စကားများကို ကြားရသောအခါ မီးလျှံနီ မျိုးနွယ်

အင်မော်တယ် ဘုရင်၏ ပုံရိပ်ယောင်မှာ ပို၍ပင် တိတ်ဆိတ်သွားတော့သည်။

သူ၏ မျက်နှာအမူအရာမှာ လေးနက်တည်ကြည်သွားသည်။

"ကံကြမ္မာ အင်မော်တယ်ဘုရင်ရဲ့ မျိုးနွယ်က တကယ်ပဲ ဒီလိုမျိုး ကြံ့ကြံ့ခံနေရတယ်တဲ့လား… တခြား အင်မော်တယ် ဘုရင်တွေနဲ့ အင်မော်တယ် အင်ပါယာ မျိုးနွယ်တွေရော ဘယ်လိုလဲ။"

မီးလျှံစွန့်ခွာခြင်းဂိုဏ်းမှ အကြီးအကဲသည် ခဏမျှ တွေးတောဆင်ခြင်ပြီးမှ လျှောက်တင်လိုက်သည်။

"တပည့် ငယ်ငယ်တုန်းက အကြီးအကဲတွေဆီက ကြားဖူးတာကတော့ အင်မော်တယ်ဘုရင်တွေနဲ့ အင်မော်တယ် အင်ပါယာတွေ ချန်ထားခဲ့တဲ့

မျိုးနွယ်အားလုံးနီးပါးက အတိုင်းအတာအမျိုးမျိုးနဲ့ ကျိန်စာတွေကို ခံစားခဲ့ရတယ်လို့ ထင်ရပါတယ်။ ဒါကလည်း ကျွန်တော်တို့ဘိုးဘေးတွေရဲ့ တာဝန် တစ်စိတ်တစ်ပိုင်းက ဘိုးဘေးရဲ့ ကွယ်လွန်မှုကြောင့် စတင်ဖြစ်ပေါ်လာရတဲ့ အကြောင်းရင်းပါပဲ။ တပည့် စိုးရိမ်တာကတော့ ကျိုယိုငရဲထဲကို ဝင်ရောက်သွားပြီး

အင်မော်တယ် ဘုရင်တွေ၊ အင်ပါယာတွေ ဖြစ်လာခဲ့တဲ့သူတွေ အားလုံး ကွယ်လွန်သွားခဲ့ကြပြီးဖြစ်လို့ သူတို့ရဲ့ မျိုးဆက်တွေက ဒီလို ဖြစ်နေရတာပါ… ဟုတ်တယ်၊ ကျွန်တော်တို့ ဘိုးဘေးတွေရဲ့ တစ်စိတ်တစ်ပိုင်းကလည်း ကျိုယိုကမ္ဘာထဲမှာ ကပ်ဘေး တစ်ခုခု ဖြစ်ပွားခဲ့ပြီး ကျိုယိုမိစ္ဆာတွေရဲ့ လက်ချက် ဖြစ်နိုင်တယ်လို့ ယုံကြည်ခဲ့ကြပါတယ်။ ဘာပဲဖြစ်ဖြစ် ကျိုယို ကမ္ဘာထဲကို ဝင်ရောက်သွားတဲ့ အင်မော်တယ် ဘုရင်တွေနဲ့

အင်ပါယာတွေရဲ့ မျိုးဆက်တွေပဲ ဒီလို အပြောင်းအလဲတွေ ပြသကြပြီး တခြားမျိုးနွယ်တွေမှာတော့ မဖြစ်ပါဘူး။ ဒါက ကျိုယို ကမ္ဘာရဲ့ ကျိန်စာ ဖြစ်နိုင်ပါတယ်။ ကျွန်တော် ဒီအတွေးကို တော်တော်လေး သဘောတူပါတယ်"

အနီဖျော့ရောင် ပုံရိပ်ယောင်သည် မျက်မှောင်အနည်းငယ် ကြုတ်လိုက်ပြီး ခဏမျှ တွေးတောဆင်ခြင်ကာ

"ဒါက ကျိုယိုကမ္ဘာနဲ့ အနည်းငယ် ပတ်သက်နေနိုင်တယ်" ဟု ဆိုလိုက်၏။

လုရီသည်လည်း အသာအယာ ခေါင်းညိတ်ကာ သဘောတူလိုက်သည်။

သူသည်လည်း ဤဖြစ်နိုင်ခြေမှာ အမှန်တကယ်တွင် အကြီးမားဆုံးဖြစ်သည်ဟု ခံစားမိသည်။ မည်သို့ပင်ဆိုစေ၊ ကျိုယိုငရဲသို့ ဝင်ရောက်သွားသော အင်မော်တယ်ဘုရင်များနှင့် အင်ပါယာ များ ချန်ထားခဲ့သော မျိုးနွယ်အားလုံး ကျိန်စာတိုက်ခံရပါက ၎င်းတို့သည် ကျိုယိုကမ္ဘာနှင့် မပတ်သက်ဘဲ ရှိမည်မဟုတ်ပေ။

လုရီ နားမလည်နိုင်သည်မှာ အကယ်၍ စကြဝဠာတစ်ခုလုံး ပြန်လည်နာလန်ထူပြီးဖြစ်ပါက ကျိုယိုကမ္ဘာသည် မည်သို့ စီမံခန့်ခွဲခဲ့သနည်း။

ကျိုယိုကမ္ဘာသို့ ဝင်ရောက်သွားသော အင်မော်တယ်ဘုရင်များနှင့် ဧကရာဇ်များ၏ မျိုးဆက်အားလုံးကို ၎င်းက မည်သို့ တိတိကျကျ ကျိန်စာတိုက်နိုင်မည်နည်း။

*ဒါက… ငါ မင်းကို မျိုးဖြုတ်ရုံတင်မကဘူး၊ မင်းရဲ့ သားစဉ်မြေးဆက်အထိပါ မျိုးဖြုတ်ပစ်မယ်ဆိုတဲ့ သဘောမျိုးပဲ မဟုတ်လား။*

လုရီသည် မီးလျှံစွန့်ခွာခြင်းဂိုဏ်းမှ အကြီးအကဲ ပြောပြခဲ့သော ကျိန်စာများကို ပြန်လည်အမှတ်ရလိုက်ပြီး သူ၏ နှလုံးသားထဲတွင်အလိုအလျောက် အေးစိမ့်သွားရလေ၏။

ဒါက ရက်စက်လွန်းလှသည်။

ထိုမှ တစ်ပါး လုရီ နားမလည်နိုင်သော အခြားသော အသွင်အပြင်များစွာလည်း ရှိနေသေးသည်။ မီးလျှံစွန့်ခွာခြင်းဂိုဏ်းမှ အကြီးအကဲ၏ ပြောစကားအရ အင်မော်တယ် ဘုရင်များနှင့် အင်ပါယာများ ကျိုယိုကမ္ဘာသို့ ဝင်ရောက်သွားပြီးနောက် စကြဝဠာသည် ခဏမျှ တည်ငြိမ်သွားခဲ့ပြီး ကျိုယိုမိစ္ဆာများက ဆက်လက်ကျူးကျော်ခြင်း မပြုခဲ့ကြပေ။ ထိုအချိန် ကာလအတွင်းတွင် အင်မော်တယ်ဘုရင်များနှင့် အင်ပါယာ များသည် ကျိုယိုမိစ္ဆာများကို ဟန့်တားထားခဲ့ရပေမည် မဟုတ်လော။

သို့သော် နောက်ပိုင်းတွင် ကျိုယိုမိစ္ဆာများသည် ကျိုယိုကမ္ဘာမှ ရုတ်တရက် ပြန်လည်ထွက်ပေါ်လာခဲ့သည်။ ၎င်းမှာ အင်မော်တယ် ဘုရင်များနှင့် အင်ပါယာများ အားနည်းလာနေသည်ဟု ဆိုလိုသည်လော။

ပြီးတော့ ကျိုယိုမိစ္ဆာများ စကြဝဠာထဲသို့ ဝင်ရောက်လာပြီးနောက် အကယ်၍ ပုံမှန်အတိုင်းဆိုလျှင် သူတို့ကို ခုခံကာကွယ်ရန် အင်မော်တယ်ဘုရင်များနှင့် အင်ပါယာများ မရှိဘဲနှင့် ထိုအချိန်က စကြဝဠာသည် သူတို့ကို ခံနိုင်ရည် မရှိနိုင်ဘူး မဟုတ်လော။

မီးလျှံစွန့်ခွာခြင်းဂိုဏ်းမှ အကြီးအကဲကလည်း ထိုအချိန်က အခြေအနေမှာ အလွန်ဆိုးရွားခဲ့သည်ဟု ဆိုခဲ့၏။

သို့သော် အဘယ်ကြောင့် ကျိုယိုမိစ္ဆာများ ရုတ်တရက် ပြန်သွားခဲ့ကြသနည်း။ ထိုမျှသာမက ကျိုယိုလမ်းကြောင်းပင်လျှင် ပြန်လည်ကောင်းမွန်သွားခဲ့သည်။

လုရီ၏ မျက်လုံးများမှာ ရှုပ်ထွေးမှုများဖြင့် တောက်ပနေခဲ့၏။

ထိုအချိန်က ကျိုယိုကမ္ဘာထဲတွင် အတိအကျ

ဘာတွေ ဖြစ်ပျက်ခဲ့သနည်း။

အင်မော်တယ်ဘုရင်များနှင့် အင်မော်တယ်

အင်ပါယာ များ ရုတ်တရက် စွမ်းအားပေါက်ကွဲထွက်လာပြီး ကျိုယိုမိစ္ဆာများကို ပြန်သွားရန် တွန်းအားပေးခဲ့သည့် တစ်စုံတစ်ခုကို လုပ်ဆောင်ခဲ့ပြီး လမ်းတလျှောက်တွင် လမ်းကြောင်းများကိုပါ တံဆိပ်ခတ်သွားခဲ့ခြင်း ဖြစ်နိုင်သလော။

အကယ်၍ ထိုသည်မှာ အမှန်တကယ်ပင် ဖြစ်ခဲ့ပါက ကျိုယိုကမ္ဘာအပေါ် ပျက်စီးမှုမှာ ကြီးမားရပေမည်။ သို့သော် ထိုအင်မော်တယ် ဘုရင်များနှင့် အင်မော်တယ် အင်ပါယာများ အတိအကျ

ဘာတွေ လုပ်ဆောင်ခဲ့ကြသနည်း။

ဤမှတပါး လုရီတွင် အခြားအတွေးတစ်ခုလည်း ရှိနေသေးသည်။