တာအိုစွမ်းအင်အား သန့်စင်ခြင်း...

~အင်မော်တယ်ဧကရာဇ်အဆင့်၏ အထွတ်အထိပ်သို့ ရောက်ရှိပြီးနောက်တွင်၊ လုရီသည် ယခင်အတိုင်းပင် သူ၏စိတ်ထဲ၌ အဆင့်ချိုးဖြတ်ခြင်း အလုပ် တစ်ခုကို ထုတ်ပြန်လိုက်ရာ၊ ဆုလာဘ်များမှာ သူမျှော်လင့်ထားသည့်အတိုင်းပင် တာအိုစွမ်းအင်အား ပေါင်းစပ်စုပ်ယူမှုကို အရှိန် မြှင့်တင်ပေးခြင်း ဖြစ်လေသည်။

နောက်ဆုံးအကြိမ် အဆင့် ချိုးဖြတ်ခြင်း အလုပ်မှ ဆုလာဘ်များဖြင့်၊ လုရီသည် သူ၏ အတွင်းကမ္ဘာထဲမှ တာအိုစွမ်းအင် တစ်ဝက်နီးပါးကို စုပ်ယူပြီးဖြစ်၏။ ဤအကြောင်းကြောင့်ပင် လုရီ၏ စွမ်းအားသည် တာအိုစွမ်းအင်ကို စုပ်ယူပေါင်းစပ်နေစဉ် အခိုက်အတန့်တိုင်း၌ အလျင်အမြန် တိုးတက်နေခဲ့သည်။

သူ၏ ကျင့်ကြံခြင်း အခြေခံသာ အင်မော်တယ်အရှင်သခင် အဆင့်သို့ တက်လှမ်းသွားပါက၊ အလုပ်အတွက် ဆုလာဘ်ကြောင့် အင်မော်တယ်ဘုရင် အဆင့်သို့ မတက်လှမ်းမီမှာပင် သူ၏ အတွင်းကမ္ဘာထဲတွင် ကျန်ရှိနေသော တာအိုစွမ်းအင်အားလုံးကို စုပ်ယူနိုင်လိမ့်မည်ဟု

သူ တွေးမြင်ယောင်နေမိ၏။

တာအိုစွမ်းအင်ကို အသုံးပြုခြင်းသည် အင်မော်တယ်ဘုရင်များနှင့် အင်မော်တယ်အင်ပါယာများအတွက်သာ သီးသန့်အခွင့်အရေးတစ်ခု ဖြစ်သည်။ အင်မော်တယ်ဘုရင်အဆင့်သို့ရောက်ရှိပြီး တာအိုနှင့် ပေါင်းစည်းမှသာလျှင် ဤသို့သော ကြောက်မက်ဖွယ်စွမ်းရည်များကို ပိုင်ဆိုင်နိုင်ပေသည်။ အင်မော်တယ်ဘုရင်များပင်လျှင် တာအိုစွမ်းအင်ကို အပြည့်အဝ အသုံးမချနိုင်သေးဘဲ၊ အင်မော်တယ်အင်ပါယာများသာလျှင် ထိုသို့ပြုလုပ်နိုင်စွမ်းရှိလေသည်။

သို့ဖြစ်သော်ငြားလည်း၊ အင်မော်တယ်အရှင်သခင်အဆင့်မှာပင် သူသည် ဤစွမ်းဆောင်မှုကို ပြုလုပ်နိုင်တော့မည် ဖြစ်သည်။

ထိုအခါကျလျှင်၊ သူ၏ကျင့်ကြံခြင်းအခြေခံက အနည်းငယ် အားနည်းနေဦးသည့်တိုင်၊ သူ၏တိုက်ခိုက်ရေးစွမ်းအားမှာ အင်မော်တယ်ဘုရင်တစ်ပါးနှင့် များစွာကွာခြားတော့မည် မဟုတ်ပေ။

ဤအချက်ကို လုရီမှာ အလွန်မျှော်လင့်နေမိပါသည်။

အဆင့်ချိုးဖြတ်ခြင်းအလုပ်ကို ထုတ်ပြန်ပြီးနောက်၊ လုရီသည် နှစ်တစ်ရာကြာ တံခါးပိတ်ကျင့်ကြံခဲ့သည်။ သူ၏ခန္ဓာကိုယ်ထဲမှ အင်မော်တယ်ဝိညာဉ်ချီနှင့် တာအိုစွမ်းအင်တို့သည် ပြည့်စုံခြင်းအဆင့်သို့ ရောက်ရှိသွားခဲ့ပြီး၊ ရှေ့ဆက်တိုးရန် မဖြစ်နိုင်တော့ပေ။

အဆင့်ချိုးဖြတ်ရန် အချိန်ကျရောက်လာပြီဖြစ်ကြောင်း လုရီ နားလည်လိုက်လေသည်။

သူသည် လင်းလောင်တောင်ထိပ်သခင်မနှင့်

လျိုနင်ရွှမ်းတို့အား ပြောကြားလိုက်ပြီး၊ လင်းလောင်တောင်ထိပ်တွင် ကျင့်ကြံရင်း အတော်ပင် ပြည့်ပြည့်စုံစုံ နေထိုင်နေသော ယွီယွမ်ဝူနှင့်အတူ သူတို့ကိုပါ ခေါ်ဆောင်ကာ ကျောက်စိမ်းကြယ်ဂြိုဟ်သို့ ပြန်သွားခဲ့သည်။

အင်မော်တယ်အရှင်သခင်အဆင့်သို့ တက်လှမ်းရန်အတွက်၊ လုရီသည် ကျောက်စိမ်းကြယ်ဂြိုဟ်သို့ သွားရောက် အဆင့်ချိုးဖြတ်ရန် သဘာဝအတိုင်း စီစဉ်ထား၏။

သို့မှသာ အဆင့်ချိုးဖြတ်ခြင်းကြောင့် ဖြစ်ပေါ်လာသော တာအိုဒီရေကို အခွင့်ကောင်းယူပြီး၊ ယွီရှင်း၏ မိသားစုမှ အင်မော်တယ်အရှင်သခင်အမျိုးမျိုးတို့သည် မူလဇာစ်မြစ်စွမ်းအားကို ခံစားနားလည်နိုင်ရန် အခွင့်အလမ်းကောင်းကြီးတစ်ခု ရရှိကြပေမည်။

သူပြင်ဆင်ပေးထားသော တာအိုစွမ်းအင်နှင့် ပေါင်းစပ်လိုက်ပါက၊ သူတို့တွင် အင်မော်တယ်ဘုရင်အဆင့်သို့ ရောက်ရှိရန် အခွင့်အလမ်းကောင်းများ ရှိနေသည်။

ဒါနဲ့… ဘိုးဘေး ယွီချန်ရဲ့ ပြင်ဆင်မှုတွေ ဘယ်လိုအခြေအနေ ရှိနေပြီလဲ မသိဘူး။

ဒီလောက် အချိန်တွေ ကြာသွားပြီဆိုတော့၊ သူ အဆင့်ချိုးဖြတ်ဖို့အတွက် ပြင်ဆင်မှုတွေ လုပ်ပြီးလောက်ရောပေါ့။

လုရီ စဉ်းစားနေစဉ်မှာပင်၊ ကျောက်စိမ်းဖြူကောင်းကင်ယာဉ်ပျံသည် ကျောက်စိမ်းကြယ်ဂြိုဟ်သို့ လျင်မြန်စွာ ပြန်လည်ရောက်ရှိလာခဲ့လေသည်။

လင်းလောင်တောင်ထိပ်သခင်မသည် လမ်းတစ်လျှောက်တွင် ယွီရှင်းနှင့် အခြားသူများကို အသိပေးပြီးဖြစ်၏။

လုရီ နောက်တစ်ကြိမ် အဆင့် ချိုးဖြတ်တော့မည်ကို ကြားသောအခါ၊ အဖွဲ့သား အားလုံးမှာ တုန်လှုပ်သွားကြသော်လည်း၊ တစ်ချိန်တည်းမှာပင် ဤသည်မှာ သူတို့အတွက် သဘာဝကျသော အရာတစ်ခုလို ဖြစ်နေသည်။

လုရီ၏ အတိတ်က စွမ်းဆောင်ရည်များကြောင့် သူဘာပဲလုပ်လုပ်၊ လက်ခံနိုင်ဖွယ်ဖြစ်သည်ဟု သူတို့ ခံစားနေရသည်။

လက်ရှိတွင် အင်မော်တယ်ဘုရင်အဆင့်အတွက် တံခါးပိတ်ပြင်ဆင်နေသော အကြီးအကဲ ယွီချန်မှလွဲ၍၊ ယွီရှင်း၏ မိသားစုမှ အင်မော်တယ်အရှင်သခင်အားလုံးသည် ယွီရှင်း၏ အိမ်တွင် စုရုံးနေကြပြီး လုရီကို မြင်သောအခါ အတော်ပင် ပျော်ရွှင်သွားကြသည်။

ဤနှစ်များတစ်လျှောက်၊ သူတို့သည်လည်း အချိန်ရတိုင်း ထျန်းမင်ကြယ်ဂြိုဟ်သို့ သွားရောက်ကာ လုရီနှင့်အတူ တာအိုဆွေးနွေးလေ့ရှိကြ၏။

တာအိုဆွေးနွေးပြီးနောက်၊ သူတို့သည် ကျောက်စိမ်းကြယ်ဂြိုဟ်သို့ ပြန်လာကာ တံခါးပိတ်ပြီး မူလဇာစ်မြစ်စွမ်းအားကို နားလည်ရန် ကြိုးပမ်းကြသည်။

နှစ်ရာပေါင်းများစွာ ကြာပြီးနောက်၊ သူတို့သည် မူလဇာစ်မြစ်စွမ်းအားကို နားလည်ရာတွင် သိသာသော တိုးတက်မှုများ ရရှိခဲ့ကြလေပြီ။

သူတို့သည် တကယ့် နားလည်သဘောပေါက်မှုနှင့် နောက်ဆုံး ခြေတစ်လှမ်းသာ ကွာတော့သည်။

“မင်းရဲ့အဆင့်ချိုးဖြတ်ခြင်းကနေ ဖြစ်ပေါ်လာတဲ့ တာအို ဒီရေအကြောင်းကို အဲ့ဒီအဖိုးကြီး

ယွီချန်ဆီကနေ ငါကြားထားတယ်။ ငါတို့က တစ်ခါမှ မကြုံဖူးသေးဘူး။ အခုတော့ နောက်ဆုံးမှာ ကိုယ်တိုင်ကိုယ်ကျ ကြုံတွေ့ခွင့်ရတော့မှာပေါ့။”

ဘိုးဘေး ယွီရွှမ်ယီက အပြုံးဖြင့် ဆို၏။

သူ၏မျက်နှာအမူအရာမှာ မျှော်လင့်ချက်များဖြင့် ပြည့်နှက်လို့နေသည်။

အနီးမှ ယွီပေါ်ယွင်နှင့် အခြားသူများမှာလည်း ထပ်တူထပ်မျှ မျှော်လင့်ချက်များဖြင့် ပြည့်နှက်နေကြ၏။

ယွီယွမ်ယိုက အလွန်တည်ငြိမ်စွာ ဆိုသည်။

“ယွီချန်က မင်းရဲ့အဆင့်ချိုးဖြတ်ခြင်းကနေ ရတဲ့ တာအိုဒီရေ အကြိမ်ပေါင်းများစွာကြောင့်သာ မူလဇာစ်မြစ်စွမ်းအားကို နားလည်သဘောပေါက်နိုင်ခဲ့တာပါ၊ ရီအာ။ ငါတို့က အခု မူလဇာစ်မြစ်ကို နားလည်ဖို့ တစ်လှမ်းပဲလိုတော့တယ်။ မင်း အဆင့် ချိုးဖြတ်ပြီး ဒီတာအိုဒီရေကို ကြုံတွေ့ပြီးရင်တော့၊ ငါတို့လည်း မူလဇာစ်မြစ်စွမ်းအားကို နားလည်နိုင်မယ့် အခွင့်အရေး ရသင့်ပါတယ်။”

“ယွီရှင်း… အားလုံး အဆင်သင့်ဖြစ်ပြီလား။”

ယွီပေါ်ယွင်က အနီးမှ ယွီရှင်းကို မေးလိုက်၏။

“အကြီးအကဲပေါ်ယွင်… ရီအာရဲ့ ဒီတစ်ခေါက် အင်မော်တယ် အရှင်သခင် အဆင့်ကို တက်လှမ်းခြင်းက သိသိသာသာ လှုပ်ခတ်မှုကြီးတစ်ခု ဖြစ်စေနိုင်ပါတယ်ခင်ဗျာ။ ဉာဏ်အလင်းစင်မြင့်ကို ပိုကျယ်တဲ့ဧရိယာတစ်ခုပေါ်မှာ တည်ဆောက်ဖို့ လိုအပ်နေပြီး အခုထိ ပြင်ဆင်နေတုန်းပါပဲ။”

ထိုသို့ ယွီရှင်းက ရိုသေစွာ တုံ့ပြန်လိုက်သည်။

ယွီပေါ်ယွင်က ခပ်ဖွဖွ ခေါင်းညိတ်လိုက်သည်။

“ကောင်းပြီ။ ရီအာ… ဒီအချိန်လေးမှာ စိတ်ကိုငြိမ်အောင်ထားပြီး မင်းရဲ့နောက်ဆုံး ပြင်ဆင်မှုတွေကို လုပ်လိုက်ပါဦး။”

ယွီယွင်ချင်းက အကြံပြုလိုက်၏။

အင်မော်တယ် အရှင်သခင်များအနေဖြင့်၊ သူတို့သည် အင်မော်တယ် အရှင်သခင်အဆင့်သို့ တက်လှမ်းရန်အတွက် ကောင်းကင်ကပ်ဘေး၏ ကြောက်မက်ဖွယ်ကောင်းပုံကို သိရှိကြသည်။

စေ့စပ်သေချာသော ပြင်ဆင်မှုမရှိဘဲ၊ လူတစ်ဦးသည် ပျက်စီးသွားနိုင်လေသည်။

ပြိုင်ဘက်ကင်းသော ပါရမီရှင် မည်မျှလောက်များ ကောင်းကင်ကပ်ဘေးကို အထင်သေးမိပြီး ထိုအထဲတွင် ပျက်စီး သေဆုံးခဲ့ကြပြီနည်း။

သူ့ဘေးမှ ယွီရှင်းနှင့် ယွီရှန်းယွင်တို့မှာမူ အနည်းငယ် ထူးဆန်းသော မျက်နှာအမူအရာများ ရှိနေကြပြီး၊ အကြီးအကဲများက ရီအာ၏ ယခင်ကပ်ဘေးများ မည်မျှလောက် ချဲ့ကားလွန်းခဲ့သည်ကို မမြင်ဖူးကြပါတကားဟု သူတို့ဘာသာသူတို့ ရေရွတ်နေမိကြသည်။

ရီအာက သူ့ကပ်ဘေးများကို ရင်ဆိုင်ရာတွင် မည်မျှလောက် သက်သောင့်သက်သာရှိသည်ကို

ဘိုးဘေးတို့ မသိကြပေ။

မဟုတ်လျှင်၊ သူတို့သည် ဤသို့သော စကားများကို သေချာပေါက် ပြောဆိုကြမည် မဟုတ်ပါ။

မိမိတို့၏ အမြင်အရတော့၊ လုရီသာ ကပ်ဘေးကို ပုံမှန်ရင်ဆိုင်ပြီး သူ၏ရုပ်ခန္ဓာကိုယ်ဖြင့်

အင်မော်တယ်အရှင်သခင်၏ ကောင်းကင်ကပ်ဘေးကို ခံယူလျှင်ပင်၊ သူတို့ လုံးဝ အံ့ဩကြမည် မဟုတ်ပေ။

ထိုစကားကို ကြားသောအခါ လုရီကလည်း ပြုံးလိုက်သည်။

“ဒီလိုဆိုမှတော့… ကျွန်တော်လည်း ခဏလောက် သွားပြင်ဆင်လိုက်ဦးမယ်။”

လုရီ တံခါးပိတ် ကျင့်ကြံရန် ဝင်သွားသောအခါ၊ လင်းလောင်တောင်ထိပ်သခင်မနှင့် အခြားသူများမှာမူ ခြံဝန်းငယ်လေးသို့ ပြန်သွားကြသည်။

လင်းလောင်တောင်ထိပ်သခင်မသည် မိန်းကလေးငယ် တစ်ယောက်ကဲ့သို့ မဟုတ်တော့သည်ကို မြင်သော်၊ ယွီရှန်းယွင်က သူမကို ချက်ချင်း ဘေးသို့ဆွဲခေါ်ကာ စုံစမ်းမေးမြန်းလေတော့သည်။ တိကျသော အဖြေတစ်ခုကို ရရှိပြီးနောက်၊ ယွီရှန်းယွင်က အလွန်ကျေနပ်စွာ ခေါင်းညိတ်လိုက်ပြီး၊ သူမ၏ အပြုံးမှာ တောက်ပစွာ ဝင်းလက်နေသည်။

“ကောင်းလိုက်တာ။ အခုဆိုရင် ယွီမိသားစုထဲက ဘယ်လောက်တောင် ထူးချွန်တဲ့ မိန်းမလှလေးတွေက ရီအာရဲ့ တာအိုလက်တွဲဖော် ဖြစ်ချင်နေကြလဲ။ ရေနဲ့နီးတဲ့ မျှော်စင်က အရင် လရောင်ခံစားခွင့်ရသလိုပဲ၊ လင်းလောင်..သမီး နောက်ဆုံးတော့ အောင်မြင်သွားပြီ။ မဟုတ်လို့ ဒီတစ်ခေါက် သမီး ပြန်လာတဲ့ အချိန်အထိ ဘာမှ

မထူးသေးရင်တော့၊ အမေက သမီးကို သေအောင် ရိုက်ရလိမ့်မယ်။”

အစပိုင်းတွင် လင်းလောင် တောင်ထိပ်သခင်မသည် ရှက်ရွံ့သော မျက်နှာဖြင့် နားထောင်နေပြီး အနည်းငယ် အနေရခက်နေသော်လည်း၊

စကားဝိုင်း ရှေ့ဆက်လာသည်နှင့်အမျှ သူမ၏ အပြုံးမှာ တဖြည်းဖြည်း တောင့်တင်းလာခဲ့သည်။

လင်းလောင်တောင်ထိပ် သခင်မမှာ စိတ်ထဲ၌ အနည်းငယ် စိတ်သက်သာရာရ ရသွား၏။

...တော်သေးတာပေါ့။ ငါနဲ့ အဲ့ဒီ ကောင်စုတ်လေး နောက်ဆုံးတော့ ဖြစ်သင့်တာတွေ ဖြစ်သွားလို့။ မဟုတ်ရင် အမေ့ရဲ့ အရင်က ပုံစံနဲ့ သူ့ဒေါသနဲ့ဆိုရင်၊ ဒီတစ်ခေါက် ပြန်လာတဲ့အချိန်မှာ ငါတော့ သေချာပေါက် သေမှာပဲ။...

…

ဤသည်မှာ လုရီ၏ အင်မော်တယ် အရှင်သခင်အဆင့်သို့ တက်လှမ်းခြင်း ဖြစ်လေရာ...

ယခင်က အတွေ့အကြုံ ရှိသော ယွီရှင်းနှင့် အခြားသူများမှာ ဤတစ်ကြိမ် ကောင်းကင်ကပ်ဘေးသည် အလွန်တရာ ကြောက်မက်ဖွယ်ကောင်းဖွယ် ရှိကာ ဤတာအိုဒီရေသည်လည်း ယခင်အကြိမ်များထက်ပင် ကျော်လွန်နိုင်ဖွယ်ရှိသည်ကို သဘာဝအတိုင်း သိရှိကြသည်။