အင်မော်တယ် အရှင်သခင် (၂)...

~ဤသည်မှာ မီးလျှံနီအင်မော်တယ်ဘုရင်၏ အမွေအနှစ်နယ်မြေနှင့် များစွာ ဆင်တူလှပေသည်။

လုရီသည် ခုတင်ပေါ်တွင် ထိုင်လျက် သူ၏အခြေအနေကို စူးစိုက်စွာ ဆန်းစစ်ကြည့်ရှုနေ၏။

သူ၏ခန္ဓာကိုယ်အတွင်းမှ အင်မော်တယ်ဝိညာဉ်ချီစွမ်းအင်သည် တာအိုစွမ်းအင်အဖြစ်သို့ လုံးဝနီးပါး ပြောင်းလဲသွားခဲ့ပြီး အနည်းငယ်မျှသာ ကျန်ရှိတော့သည်။ ထိုအနည်းငယ်ကို အသွင်ပြောင်းရန် နှစ်အနည်းငယ်မျှသာ အချိန်ယူရပေလိမ့်မည်။

ထို့အပြင် တာအိုစွမ်းအင်နှင့် ပေါင်းစပ်မှု၊ အဆင့်တက်စဉ်အတွင်း ဖရိုဖရဲချီစွမ်းအင် အပိုင်းအစများကို စုပ်ယူမှုတို့ကြောင့် သူ၏ရုပ်ခန္ဓာသည်လည်း အလွန်အမင်း အားကောင်းလာခဲ့သည်။

တာအိုစွမ်းအင်ကို အကာအကွယ်အဖြစ် အသုံးမပြုလျှင်ပင် သူ၏ လက်ရှိရုပ်ခန္ဓာသည် တွင်းနက်များကဲ့သို့သော နေရာများသို့ ဝင်ရောက်နိုင်ပြီး ၎င်းတို့၏ ကြောက်မက်ဖွယ်ရာ ဆွဲငင်အားကြောင့် ထိခိုက်ဒဏ်ရာရမည် မဟုတ်ဟု သူ ခံစားမိလေသည်။

ထို့ထက်မက လုရီ၏ ခန္ဓာကိုယ်က သူ၏စွမ်းအားအပြည့်ကို ထုတ်သုံးလိုက်ပါက တွင်းနက်တစ်ခုနှင့် ဆင်တူသော ဆွဲငင်အား အာနိသင်ကိုပင် ဖန်တီးနိုင်ပေသည်။

ဤစွမ်းအားသည် ယခင်ကထက် များစွာ ကြီးမားလှ၏။

သူ၏ခန္ဓာကိုယ်အတွင်းရှိ တာအိုစွမ်းအင်၏ သိပ်သည်းမှုသည်လည်း ယခင်ကထက် သိသိသာသာ မြင့်တက်လာခဲ့ပြီး၊ သူ၏ လက်ရှိ တာအိုစွမ်းအင်အဆင့်ဖြင့် မူလဇာစ်မြစ်အင်မော်တယ်သိုင်းများကို အသုံးပြုပါက ထိုစွမ်းအားသည် အဆပေါင်းများစွာ တိုးပွားလာနိုင်ဖွယ် ရှိသည်။

ထို့အပြင် လုရီ၏ နတ်ဘုရားအာရုံသည်လည်း အလွန်တရာ တိုးတက်လာခဲ့သည်။

သူ၏ နတ်ဘုရားအာရုံသည် ကျယ်ပြန့်ထွက်သွားပြီး သူဖန်တီးထားသော ကမ္ဘာငယ်ကိုပင် ထိုးဖောက်ကာ ပြင်ပလောကသို့ ပျံ့နှံ့သွားလေ၏။

သူ၏ နတ်ဘုရားအာရုံ ပျံ့နှံ့သွားသည်နှင့်အမျှ လေ့ကျင့်နေသော ကျင့်ကြံသူအားလုံး၊ ယွီချန်နှင့် အခြားအင်မော်တယ်အရှင်သခင် အများအပြား အပါအဝင် မည်သူတစ်ဦးတစ်ယောက်မျှ လုရီ၏ နတ်ဘုရားအာရုံ လှုပ်ခတ်မှုကို သတိမထားမိကြချေ။

ထို့နောက် သူ၏ နတ်ဘုရားအာရုံသည် ဆက်လက်ပျံ့နှံ့သွားပြီး တဖြည်းဖြည်းနှင့် အလင်းနှစ် သောင်းပေါင်းများစွာသော အကွာအဝေးကို ကျော်လွန်သွားတော့သည်။

ဤသည်မှာ လုရီ၏ အကန့်အသတ်ပင် မဟုတ်သေးချေ။

လုရီကိုယ်တိုင်ပင် အနည်းငယ် အံ့အားသင့်သွားရသည်။

ဤနတ်ဘုရားအာရုံ၏ အတိုင်းအတာသည် အလွန်တရာ လွန်ကဲလှသည်။ သာမန်

အင်မော်တယ်ဘုရင်တစ်ပါးက ဤသို့ပြုလုပ်နိုင်မည်လော...။

သူသည် ယခုမှ အင်မော်တယ်အရှင်သခင်တစ်ပါးသာ ဖြစ်သေးသော်လည်း၊

အင်မော်တယ်ဘုရင်အဖြစ်သို့ တက်လှမ်းသည့်အခါတွင်မူ သူသည် ဖရိုဖရဲချီစွမ်းအင်ကို စတင်စုပ်ယူရပေမည်။ ထိုအခါ သူ၏ နတ်ဘုရားအာရုံသည် မည်သည့်အတိုင်းအတာအထိ ရောက်ရှိသွားမည်နည်း။

အလင်းနှစ် တစ်သိန်းလော။ အလင်းနှစ် တစ်သန်းလော။

အကယ်၍ သူသည် အင်မော်တယ်အင်ပါယာအဖြစ်သို့ တက်လှမ်းခဲ့ပါလျှင်၊ ထိုအချိန်၌ သူ၏ နတ်ဘုရားအာရုံသည် စကြဝဠာတစ်ခုလုံးကို ဖုံးလွှမ်းသွားမည် မဟုတ်လော။

လုရီ၏ မျက်နှာအမူအရာမှာ အနည်းငယ် ထူးဆန်းသွား၏။

အကယ်၍ သူသည် ထိုသို့သော ချဲ့ကားလွန်းသည့် နတ်ဘုရားအာရုံကို အမှန်တကယ် ပိုင်ဆိုင်ခဲ့ပါက၊ စကြဝဠာအတွင်းရှိ သက်ရှိအားလုံး၏ လှုပ်ရှားမှုတိုင်းသည် သူ၏ အကြည့်အောက်တွင် ရှိနေပေလိမ့်မည်။

လုရီ ခေါင်းကို ခါယမ်းလိုက်ပြီး ထိုအကြောင်းကို ဆက်လက် မတွေးတော့ပေ။ သူသည် ယခုမှ

အင်မော်တယ် အရှင်သခင် တစ်ပါးသာ ဖြစ်ပြီး

အင်မော်တယ် အင်ပါယာ တစ်ပါး ဖြစ်လာရန်မှာ အလှမ်း ကွာဝေးနေသေးသည်။

သူ၏ အခြေအနေကို ဆန်းစစ်ပြီးနောက် လုရီသည် အတော်လေး ကျေနပ်သွား၏။

ဤအဆင့်ချိုးဖြတ်မှုသည် လုရီအတွက် သိသာထင်ရှားသော တိုးတက်မှုကြီးတစ်ခု ဖြစ်သည်။ သူ၏ လက်ရှိအစွမ်းဖြင့် အင်မော်တယ်ဘုရင်အဆင့် စွမ်းအားရှင်တစ်ဦးကို ယှဉ်ပြိုင်တိုက်ခိုက်နိုင်လိမ့်မည်ဟု သုံးသပ်ရလေ၏။

ကံမကောင်းစွာဖြင့် သူ၏အစွမ်းကို စမ်းသပ်ရန်အတွက် အင်မော်တယ်ဘုရင်အဆင့် စွမ်းအားရှင်များ မရှိချေ။ အကယ်၍ အမှန်တကယ် စမ်းသပ်လိုပါက သူသည် ကျိုယိုကမ္ဘာသို့ သွားရပေလိမ့်မည်။ အင်မော်တယ်အရှင်သခင်နယ်ပယ်သို့ တက်လှမ်းပြီးဖြစ်သော်လည်း လုရီသည် ကျိုယိုသို့ သွားရောက်ရန် မဝံ့ရဲသေးပေ။ အကြောင်းမှာ ထိုနေရာသည် အင်မော်တယ်ဘုရင် စွမ်းအားရှင်များသာမက အင်မော်တယ်အင်ပါယာအဆင့် မိစ္ဆာကောင်ကြီးများပါ ရှိနေနိုင်သောကြောင့်တည်း။

သူသည် ဤကိစ္စကို ဘေးဖယ်ထားလိုက်ပြီး သူ၏ အလုပ် ဆုလာဘ်များကို စတင် တောင်းခံကာ တာအို စွမ်းအင်ကို စုပ်ယူ ပေါင်းစပ်ခြင်းအား အရှိန် မြှင့်တင်လိုက်တော့သည်။

ဤအရာအားလုံးကို စီမံခန့်ခွဲပြီးနောက် လုရီသည် နောက်ဆုံးတွင် သူ၏အခန်းမှ ထွက်ခွာလာပြီး စာအုပ်အချို့ဖတ်ရန် သိုင်းကျမ်းတိုက်သို့ သွားရောက်ခဲ့သည်။

အခြားသူများမှာ နားလည်ခံစားရန် အချိန်အနည်းငယ် ယူရဦးမည်ဖြစ်သောကြောင့် သူ့အနေနှင့် ဤအချိန်ကို အသုံးချကာ သူ၏အသိပညာကို ဆက်လက်စုဆောင်းပြီး တာအိုယင်ယန်အင်မော်တယ်ကျမ်းကို နားလည်ခံစားရန် ကြိုးစားနိုင်ပေသည်။

...

ဤတစ်ကြိမ် လုရီက အင်မော်တယ်အရှင်သခင်နယ်ပယ်သို့ အဆင့်ချိုးဖြတ်ချိန်တွင် ဖြစ်ပေါ်လာသော တာအိုဒီရေအဟုန်မှာ ယခင်ကထက် ပိုမိုကြီးမားလှပြီး နှစ်ပေါင်းများစွာ ကြာမြင့်မှသာ တဖြည်းဖြည်း လျော့ပါးသွားလေသည်။

တာအိုဒီရေအဟုန်များ မှေးမှိန်သွားသည်နှင့်အမျှ ကျင့်ကြံသူများစွာသည် သူတို့၏ နားလည်ခံစားခြင်းမှ တဖြည်းဖြည်း နိုးထလာကြသည်။

ကျင့်ကြံသူအားလုံး၏ မျက်နှာထက်တွင် ပီတိအပြုံးများ ယှက်သန်းနေပြီး အလွန်တရာ စိတ်လှုပ်ရှားနေကြ၏။

"ဟားဟားဟား။ ငါ့ရဲ့ နိယာမနားလည်နိုင်စွမ်း တိုးတက်လာပြီ။ မဟာအောင်မြင်မှုရဖို့ သိပ်မဝေးတော့ဘူး။"

"ငါ အင်မော်တယ်သိုင်းတစ်ကွက်ကို နားလည်သွားခဲ့တယ်။ အံ့ဩစရာပဲ။"

"ဟားဟားဟား...ငါ့ကို နှစ်သောင်းပေါင်းများစွာ ဒုက္ခပေးခဲ့တဲ့ ဒီအဟန့်အတား လျော့ရဲသွားပြီ။ အင်မော်တယ်အရှင်သခင်နယ်ပယ်က လက်တစ်ကမ်းမှာပဲ။"

"..."

ယွီမိသားစုမှ အင်မော်တယ်အရှင်သခင် ဘိုးဘေးများသည်လည်း တဖြည်းဖြည်း နိုးထလာကြသည်။

ယွီရွှမ်ယီ၏ မျက်လုံးများထဲတွင် နက်နဲဆန်းကြယ်သော တာအိုအလင်းတန်းများ

တဖျပ်ဖျပ်လက်နေပြီး ကမ္ဘာလောကများ ပျောက်ကွယ်နေသည့်အလား ထင်မှတ်ရလေသည်။ သူက ပြင်းထန်စွာ သက်ပြင်းတစ်ချက်ချလိုက်ပြီး သူ၏မျက်နှာအမူအရာမှာ အလွန်တရာ လေးနက်နေလျက် ရေရွတ်လိုက်သည်။

"ဒီအဘိုးကြီး အခု မူလဇာစ်မြစ် စွမ်းအားကို နားလည်ခံစားနိုင်လောက်ပြီ။"

သူ၏ဘေးမှ ယွီယင်းနှင့် အခြားသူများလည်း တဖြည်းဖြည်း နိုးထလာကြပြီး တစ်ယောက်ချင်းစီ၏ အရှိန်အဝါများမှာ သိသာစွာ ပြောင်းလဲနေကြသည်။

သူတို့သည် တစ်ဦးပြီး တစ်ဦး ခေါင်းညိတ်ပြကြပြီး သူတို့လည်း အရေးအကြီးဆုံးသော ခြေလှမ်းကို လှမ်းနိုင်ပြီ ဖြစ်ကြောင်း ညွှန်ပြကြ၏။

"မူလဇာစ်မြစ် စွမ်းအား..."

ပုံမှန်အားဖြင့် ခံစားချက်ကင်းမဲ့နေတတ်သော

ယွီယွင်ချင်းပင်လျှင် ဤအခိုက်အတန့်၌ စိတ်လှုပ်ရှားမှုအရိပ်အယောင်တစ်ခုကို ပြသမိလေသည်။

ထိုစဉ်မှာပင် ယွီချန်၏ အသံက အလွန်တရာ လေးနက်စွာ ထွက်ပေါ်လာ၏။

"မူလဇာစ်မြစ်ကို နားလည်ခံစားဖို့ မလောကြနဲ့ဦး။ ရီအာကို အရင် အကာအကွယ်ပေးခိုင်းလိုက်။"

သူသည်လည်း ထိုအချိန်တွင် နိုးထလာခဲ့ပြီ ဖြစ်သည်။

ယွီချန်၌ သိသာသော ပြောင်းလဲမှုများ မရှိသော်လည်း သူ၏အရှိန်အဝါက ပိုမိုစုစည်းခိုင်မာလာသည်ကို လူတိုင်း သတိပြုမိကြသည်။ သူသည် ပြည့်စုံခြင်းအဆင့်သို့ ရောက်ရှိသွားဖွယ် ရှိလေ၏။

ယွီချန်၏ စကားကို ကြားသောအခါ လူတိုင်း အံ့အားသင့်သွားပြီး အနည်းငယ် ဇဝေဇဝါဖြစ်သော အကြည့်များဖြင့် သူ့ကို ကြည့်လိုက်ကြသည်။

ယွီပေါ်ယွင်က မျက်မှောင်ကြုတ်ကာ မေးမြန်းလိုက်သည်။

"ဘာကြောင့်လဲ။ ငါတို့အားလုံးက အင်မော်တယ်အရှင်သခင် အထွတ်အထိပ်အဆင့်မှာ ရှိနေပြီး ဒီနယ်ပယ်မှာ နှစ်ပေါင်းများစွာ နေခဲ့ကြတာပဲ။ မူလဇာစ်မြစ်ကို နားလည်ခံစားတဲ့အခါမှာ အန္တရာယ်တစ်ခုခုများ ရှိနေလို့လား။"

ယွီချန်က သူ၏ မူလဇာစ်မြစ်ကို နားလည်ခံစားခဲ့ရသည့် အတွေ့အကြုံကို ပြန်လည်အမှတ်ရလိုက်စဉ် သူ၏မျက်လုံးများထဲတွင် ကြောက်ရွံ့မှုအရိပ်အယောင် ယှက်သန်းသွားပြီး လေးနက်စွာ ရှင်းပြလိုက်၏။

"စကြဝဠာမှာ တစ်ခုခု မှားယွင်းနေပြီလို့ ရီအာနဲ့ ငါ သံသယရှိနေတယ်။ ငါ ပထမဆုံးအကြိမ် မူလဇာစ်မြစ်ကို နားလည်ခံစားတုန်းက ကျိုယိုကမ္ဘာကို အမှန်တကယ် မြင်ခဲ့ရပြီး အဲ့ဒီကြောင့်ပဲ နှလုံးသား မိစ္ဆာနဲ့တောင် ကြုံခဲ့ရတယ်။ အကယ်၍သာ ရီအာ မရှိခဲ့ရင် အခြေအနေတွေက ထိန်းမနိုင်သိမ်းမရ ဖြစ်သွားနိုင်တယ်။"

"ဘာ..ကျိုယိုကမ္ဘာကို မြင်ခဲ့ရတယ် ဟုတ်လား။"

ယွီပေါ်ယွင်နှင့် အခြားသူတို့၏ မျက်လုံးအိမ်များ ကျုံ့သွားကြသည်။

"ဟုတ်တယ်။ ဒါကြောင့် သတိထားတဲ့အနေနဲ့

ရီအာကို အကာအကွယ်ပေးခိုင်းပါ။ ငါက ပုံရိပ်ယောင်မူလဇာစ်မြစ်ကို ဆုပ်ကိုင်ထားပေမဲ့၊ မင်းတို့ နှလုံးသားမိစ္ဆာနဲ့ ကြုံရရင် ငါလုပ်နိုင်တာက မင်းတို့ဆီကနေ မွေးဖွားလာတဲ့ နှလုံးသားမိစ္ဆာအင်မော်တယ်အရှင်သခင်ကို ဖိနှိပ်ထားနိုင်ရုံပဲ။ မင်းတို့ရဲ့ နှလုံးသားမိစ္ဆာတွေကို ဖယ်ရှားပေးနိုင်မှာ မဟုတ်ဘူး။ ဒါပေမဲ့ ရီအာကတော့ မတူဘူး။ သူ လုပ်နိုင်တယ်"

ယွီချန်က လေးနက်စွာ မှာကြားလိုက်သည်။

ဤစကားကို ကြားသောအခါ ယွီဘိုယွင်နှင့် အခြားသူများမှာ တစ်ယောက် မျက်နှာ

တစ်ယောက် ကြည့်ကာ ခဏတာ တိတ်ဆိတ်သွားကြသည်။

ယွီရွှမ်ယီက အနည်းငယ် အားမတန်မာန်လျှော့ဟန်ဖြင့် သူ၏ဆံပင်ကို ပွတ်သပ်လိုက်ရင်း ညည်းညူလိုက်၏။

"ငါတို့လို အဘိုးကြီးတွေက ရီအာရဲ့ ကျေးဇူးကို ဘယ်လိုပြန်ဆပ်ကြမလဲ။ မူလဇာစ်မြစ်ကို နားလည်ခံစားဖို့တောင် သူ့အကာအကွယ် လိုနေရတယ်ဆိုတော့ ငါတို့မှာ မျက်နှာထားစရာတောင် မရှိတော့ဘူး။"

မည်သို့ပင်ဖြစ်စေ သူတို့သည် အနည်းဆုံး နှစ်သန်းပေါင်းရာနှင့်ချီ၍ ကျင့်ကြံခဲ့ကြသူများဖြစ်ပြီး၊ လုရီမှာမူ နှစ်တစ်သောင်းခန့်သာ ကျင့်ကြံခဲ့သေးသည်။ ဤမျှကြီးမားသော ကွာခြားချက်ရှိနေသည့်အတွက် လုရီက အလွန်တရာ ပါရမီထူးချွန်သော်လည်း သူတို့အနေဖြင့် အနည်းငယ် မျက်နှာပူမိကြသည်သာ။

တစ်ဖက်တွင်မူ ယွီချန်က ပြုံးဖြီးဖြီးဖြင့် ဆိုလာသည်။

"ဟဲဟဲ။ ငါကတော့ ဂရုမစိုက်ပါဘူး။ ရီအာက ငါ့ကို တာအိုစွမ်းအင် တစ်မျှင်တောင် ပေးထားသေးတာ။ သူ့ကျေးဇူးကို အပြည့်အဝပြန်ဆပ်နိုင်မယ်လို့ ငါ ဘယ်တုန်းကမှ မတွေးခဲ့ဖူးဘူး။"

ထိုစကားကို ကြားတော့ယွီရွှမ်ယီနှင့် အခြားသူများက ယွီချန်အား စကားမပြောနိုင်တော့သည့်အလား ကြည့်လိုက်ကြသည်။

ယွီရွှမ်ယီ၏ နှုတ်ခမ်းထောင့်များက တွန့်ကွေးသွားပြီး သူက ထေ့ငေါ့လိုက်သည်။

"ယွီချန်၊ ငါ သဘောပေါက်သွားပြီ ၊မင်းက ငါ့ထက်တောင် မျက်နှာပြောင်တိုက်တာပဲ"

ထိုအခါ ယွီယင်းက တခစ်ခစ် ရယ်မောရင်း မြှောက်ပင့်ပြောဆိုလေ၏။

"ခစ်ခစ်ခစ်...ရီအာရဲ့ ဒီလောက်ကြီးမားတဲ့ ကျေးဇူးအတွက်ဆိုရင် ငါတို့ကိုယ်တိုင် သူ့ကို ပုံအပ်လိုက်တာကတောင် အနည်းဆုံး လုပ်ပေးနိုင်တဲ့ အရာပဲ ဖြစ်လိမ့်မယ် လေနော်။"

ယွီယွင်ချင်းသည်လည်း စိတ်မထိန်းနိုင်ဘဲ

ယွီယင်းကို တစ်ချက်လှမ်းကြည့်လိုက်မိသည်။

ယွီရွှမ်ယီနှင့် အခြားသူများကလည်း စကား

မပြောနိုင်တော့သော မျက်နှာထားများဖြင့်

ယွီယင်းကို ကြည့်နေကြသည်။

ကျေးဇူးဆပ်မလို့လား၊ ဒါမှမဟုတ် ရီအာရဲ့ ကိုယ်ခန္ဓာကို လိုချင်နေတာလား။

ပြီးတော့ ကိုယ့်အသက်ကိုရော ပြန်ကြည့်သေးရဲ့လား။

သေချာသည်မှာ ဤအတွေးများမှာ ယွီရွှမ်ယီနှင့် အခြားသူများ စိတ်ထဲ၌သာ တွေးဝံ့သည့် အတွေးများဖြစ်ပြီး အသံထွက်ပြောရန်မူ မဝံ့ရဲကြပေ။

သို့မဟုတ်ပါက ယွီယင်းမှာ ဒေါသူပုန်ထပြီး သူတို့နှင့် သည်းကြီးမည်းကြီး တိုက်ခိုက်ပေလိမ့်မည်။

ခဏတာ တိတ်ဆိတ်သွားပြီးနောက် ယွီပေါ်ယွင်က သက်ပြင်းတစ်ချက် ချကာ အဆုံးသတ်လိုက်သည်။

"ဒီလိုဖြစ်မှတော့ ငါတို့ ရီအာကိုပဲ အားကိုးရတော့မှာပေါ့။ လာ၊ သွားကြစို့။ ရီအာနဲ့ သွားပြောကြမယ်။"

လူတိုင်းက သဘောတူညီစွာ ခေါင်းညိတ်လိုက်ကြသည်။

ယွီချန်က ဖြည်းညှင်းစွာ ပြောလိုက်၏။

"မင်းတို့ မူလဇာစ်မြစ်ကို နားလည်ခံစားပြီးသွားရင် ငါလည်း အင်မော်တယ်ဘုရင်အဆင့်ကို အဆင့်ချိုးဖြတ်ဖို့ အဆင်သင့်ဖြစ်လောက်ပြီ။ ဒါက မင်းတို့ကို အကူအညီဖြစ်လိမ့်မယ်လို့ မျှော်လင့်ပါတယ်။"

ဤစကားကို ကြားသောအခါ အင်မော်တယ်အရှင်သခင်ဖြစ်ကြသော ယွီမိသားစုဝင်များ တုန်လှုပ်သွားကြပြီး ရုတ်တရက် ယွီချန်ကို ကြည့်လိုက်ကြသည်။

ခဏအကြာတွင် ယွီယွမ်ယိုက ဖြည်းညှင်းစွာ မေးခွန်းထုတ်သည်။

"မင်း အဆင်သင့်ဖြစ်ပြီလား။"

ယွီချန်က ခေါင်းညိတ်ပြ၏။

"ဒါပေါ့။ ဒီတစ်ခေါက် တာအိုဒီရေအဟုန်ကြောင့် ငါ သင်ယူနားလည်ခဲ့သမျှ အရာအားလုံးကို ပြန်လည်သုံးသပ်ပြီး ငါလုပ်နိုင်စွမ်းရှိတဲ့ အကန့်အသတ်ကို ရောက်သွားခဲ့ပြီ။

အဆင့်ချိုးဖြတ်ဖို့အတွက် အကောင်းဆုံးအချိန်ပဲ။"

ထိုစဉ် ယွီရွှမ်ယီက မနာလိုဟန်ဖြင့် ပြောလာလေသည်။

"မင်းမှာ ရီအာ ပေးထားတဲ့ တာအိုစွမ်းအင်လည်း ရှိသေးတယ်။ ဒီလို စုဆောင်းမှုတွေနဲ့ဆိုတော့ မင်း အဆင့်ချိုးဖြတ်ဖို့ အခွင့်အရေးက အရမ်းမြင့်တယ်။ ငါတို့ထဲမှာ မင်းက ပထမဆုံး

အင်မော်တယ်ဘုရင် ဖြစ်လာလိမ့်မယ်လို့

ထင်တောင် မထင်ထားခဲ့ဘူး။"

ထိုစဉ် ယွီယွမ်ယိုက စိတ်လှုပ်ရှားစွာ ကြွေးကြော်လိုက်၏။

"အိုး....ယွီချန်က အဆင့်ချိုးဖြတ်သွားရင် ငါတို့ ယွီမိသားစုက အင်မော်တယ် ဘုရင် အဆင့် စွမ်းအားရှင် တစ်ယောက် ပိုင်ဆိုင်သွားမှာ မဟုတ်လား။ စကြဝဠာမှာ တခြားလျှို့ဝှက်

အင်မော်တယ် ဘုရင်တွေ မရှိဘူးဆိုရင် ယွီချန်က ပထမဆုံး အင်မော်တယ် ဘုရင် ဖြစ်လာမှာပဲ ဟုတ်တယ်မလား။"

အခြားသူများလည်း သတိ ပြန်ဝင်လာကြပြီး

သူတို့၏ မျက်နှာ အမူအရာများမှာ စိတ်လှုပ်ရှားမှုများဖြင့် ပြည့်နှက်သွားသည်။

"ဒါဆို..ငါတို့ ယွီမိသားစုက အင်မော်တယ် ဘုရင်တစ်ပါးကို အမှန်တကယ် မွေးထုတ်ပေးတော့မှာလား။"

ယွီချန်၏ နှုတ်ခမ်းများက အနည်းငယ်ကွေးတက်သွားပြီး သူက အာမခံလိုက်လေသည်။

"ငါ ခုထိ အဆင့် မချိုးဖြတ်ရသေးပါဘူး။ ငါလုပ်ပြီးမှ ပျော်ပွဲရွှင်ပွဲလုပ်တာလည်း နောက်မကျသေးပါဘူး။ အင်မော်တယ် ဘုရင် တစ်ပါးဖြစ်လာဖို့က ဒီလောက် မရိုးရှင်းလောက်ဘူးလို့ ငါ့ရင်ထဲ ခံစားနေရတယ်။"

ပြောဆိုနေရင်း ယွီချန်သည် ယခင်က မူလဇာစ်မြစ်ကို နားလည်ခံစားရန် ကြိုးစားစဉ် ကျိုယိုကမ္ဘာကို မြင်တွေ့ခဲ့ရသည်ကို ပင်ကိုအသိစိတ်အရ ပြန်လည် အမှတ်ရမိပြီး သူ၏ နှလုံးသားမှာ လေးလံသွားလေ၏။