ကျိုယို မိစ္ဆာနတ်ဘုရား...

~အင်မော်တယ်အရှင်သခင် နောက်ဆုတ်သွားပြီးနောက်၊ နောက်မှ အင်မော်တယ် ဧကရာဇ်များနှင့် အားနည်းသော ကျင့်ကြံသူများမှာလည်း အခြေအနေကို နားလည်စွာဖြင့် နောက်ဆုတ်သွားကြသည်။

ခဏအကြာတွင်၊ ကောင်းကင်ကပ်ဘေးသည် လုံးဝ ဖွဲ့စည်းပြီးစီးသွားပြီး၊ ကြောက်မက်ဖွယ်ကောင်းသော စွမ်းအားက ယွီရွှမ်ယီနှင့် အခြားသူများကို အလိုအလျောက် နောက်တစ်ကြိမ် ထပ်မံဆုတ်ခွာသွားစေသည်။

ထို့နောက် ဂျိန်းခနဲ အသံနှင့်အတူ၊ မှိန်ဖျော့နေသော လေဟာနယ်သည် လုံးဝ လင်းထိန်သွားတော့၏။

မူလဇာစ်မြစ်စွမ်းအားသည် ကောင်းကင်မိုးကြိုးအဖြစ်သို့ စုစည်းသွားပြီး၊ လုရီကို လွှမ်းခြုံသွားသည်။ လုရီပင်လျှင် သူ့တစ်ကိုယ်လုံးတွင် ပြင်းထန်သော နာကျင်ကိုက်ခဲသွားရပြီး မေးရိုးများ တင်းမာနေအောင် အံကြိတ်နေလိုက်သည်။

မူလဇာစ်မြစ် အင်မော်တယ်သိုင်းစွမ်းရည်များဖြင့် အလုံးစုံ ဖွဲ့စည်းထားသော ဤကောင်းကင်ကပ်ဘေးသည် အလွန်တရာ ကြောက်မက်ဖွယ်ကောင်းပြီး၊ အင်မော်တယ်ဘုရင်တစ်ပါး၏ အပြည့်အဝတိုက်ခိုက်မှုနှင့် ညီမျှလေသည်။

လုရီ၏ လက်ရှိစွမ်းအားမှာ အလွန်ကြောက်မက်ဖွယ်ကောင်းကာ တာအိုစွမ်းအင်အားလုံးကို ပေါင်းစည်းပြီး ဖရိုဖရဲချီကိုပင် စတင်ထည့်သွင်းပြီးနောက်၊ သူ၏ခန္ဓာကိုယ်မှာ ကြောက်မက်ဖွယ်အားကောင်းနေသော်လည်း ယခုလို ကောင်းကင်ကပ်ဘေးကို မည်သည့်ထိခိုက်မှုမျှ မရှိဘဲ မရင်ဆိုင်နိုင်သေးပေ။

သူ၏အသားနှင့်သွေးများ စုတ်ပြတ်သွားသည်။ သွေးများ ပန်းထွက်လာ၏။ မီးလောင်အကွက်များ သူ့ကိုယ်ပေါ်တွင် လောက်ကျွမ်းလာသည်။

သို့သော် တူညီသော အခိုက်အတန့်မှာပင်၊ အစိမ်းရောင် ရောင်ခြည်အမျှင်တန်းများက

လုရီ၏ ကိုယ်ပေါ်တွင် ပေါ်ထွက်လာပြီး၊

ပြင်းထန်သော ဒဏ်ရာများကို အမြန်အဆန်

ကုသပေး၏။ အသားနှင့် သွေးများ ပြန်လည်စီးဝင်လာပြီး လုရီ၏ခန္ဓာကိုယ်မှာ ပြန်လည်ကောင်းမွန်လာသည်။

သူသည် သက်စောင့်စွမ်းအား ပါဝင်သော

သဘာဝနိယာမကို အသုံးပြုခဲ့ပြီး၊ ပြန်လည်ရှင်သန်စေနိုင်ရာ၊ ကုသဖို့ကမူ သေချာပေါက် ပြဿနာ ရှိမနေပေ။

ဘုန်း… ဘုန်း… ဘုန်း…

ကောင်းကင်ကပ်ဘေးအမျှင်တန်းများ ကျဆင်းလာရာ၊ လုရီ၏ တစ်ကိုယ်လုံးမှာ ပြင်းထန်စွာ နာကျင်နေပြီး၊ အသားများ စုတ်ပြဲသွား၏။ အရိုးများလည်း ကြေမွသွားပြီး၊ ရူးမတတ် နာကျင်လှသည်။

သို့သော်လည်း တိုက်ခိုက်မှုများကို ခုခံရန် အင်မော်တယ်သိုင်းနည်းစနစ်များကို အသုံးမပြုပါ။ ထိုအစား သူ၏ ရုပ်ခန္ဓာကိုယ်ကို အားကိုး၍ ကောင်းကင်ကပ်ဘေးကို ခံယူကာ ရုပ်ခန္ဓာကို ပြန်လည် ကောင်းမွန်စေရန် သဘာဝ စွမ်းအားကို အသုံးပြုခဲ့သည်။

သူသည် မူလဇာစ်မြစ် အင်မော်တယ်သိုင်းစွမ်းရည်များဖြင့် အလုံးစုံ ဖွဲ့စည်းထားသော ဤကောင်းကင်ကပ်ဘေးကို အသုံးပြု၍

ရုပ်ခန္ဓာအား သန့်စင်ရန် ရည်ရွယ်လေသည်။

သူ့ခန္ဓာကိုယ် အဆက်မပြတ် ဖျက်ဆီးခံရပြီးနောက် တဖြည်းဖြည်း ပြန်လည် ကောင်းမွန်လာသည်နှင့်အမျှ၊ မရေမတွက်နိုင်သော မူလဇာစ်မြစ်စွမ်းအားအမျှင်တန်းများက ကိုယ်ပေါ်တွင်

တဟုန်ထိုး လည်ပတ်နေပြီး၊ လုရီထံသို့ တုံ့ပြန်မှုများကို ပေးပို့နေသည်။ မူလဇာစ်မြစ်စွမ်းအားအမျိုးမျိုးကို နားလည်သဘောပေါက်မှုမှာ လျင်မြန်စွာ တိုးတက်လာ၏။ တစ်ချိန်တည်းမှာပင်၊ လုရီ၏ အတွင်းကမ္ဘာသည် အရိပ်ယောင်တစ်ခုအဖြစ်သို့ ပြောင်းလဲသွားပြီး အစစ်အမှန်စကြဝဠာထဲတွင် ဝင်လိုက်ထွက်လိုက် မှုန်ပျပျ ဖြစ်နေသည်။

အဆုံးမရှိသော အရောင်အသွေးများ ရှိသည့် ဖရိုဖရဲချီအမျှင်တန်းများက အရိပ်ယောင်အတွင်း၌ တဟုန်ထိုးထွက်ပေါ်လာပြီး၊ ဧရာမလှိုင်းလုံးများအသွင် ပြောင်းလဲသွားသည်။

ထို့နောက် ကောင်းကင်မိုးကြိုးက သူ့ကို သန့်စင်ပေးသည်နှင့်အမျှ၊ ဖရိုဖရဲချီသည်လည်း သူ၏ခန္ဓာကိုယ်ထဲသို့ တစတစ လျင်မြန်စွာ ပေါင်းစပ်ဝင်ရောက်စပြုလာသည်။ ဖရိုဖရဲ

တာအိုအင်းကွက်သည် လုရီ၏ အသားနှင့် သွေးထဲတွင် မသေမချာ ဝေဝါးနေပြီး၊ သူ့အတွင်းမှ တာအိုစွမ်းအင်ဖြင့် လုံးလုံးလျားလျား ဖွဲ့စည်းထားသော စွမ်းအားသည် ဖရိုဖရဲစွမ်းအားအမျှင်တန်းများကို စတင်ထည့်သွင်းလာသည်။

ဤစွမ်းအားသည် တာအိုကို ကျော်လွန်သွားပြီး၊ အစအနမျှသာဖြစ်သည့်တိုင် သူ့ကို ကြီးမားစွာ အားဖြည့်ပေးပါသည်။ တာအိုစွမ်းအင်နှင့် နှိုင်းယှဉ်ပါက များစွာအားကောင်းပြီး၊

အင်မော်တယ်ဝိညာဉ်ချီထက် အဆပေါင်းများစွာ ပို၍အားကောင်းလှသည်။

ဤသို့သော ပြောင်းလဲမှုများကို သတိပြုမိသောအခါ၊ လုရီမှာ အလွန်တရာ စိတ်လှုပ်ရှားသွားရ၏။ ယခု ကောင်းကင်ကပ်ဘေးမှ သန့်စင်ခြင်းက ဤမျှ သိသာသော အားဖြည့်မှုကို ယူဆောင်လာလိမ့်မည်ဟု သူ မမျှော်လင့်ထားခဲ့ပေ။

ဤသည်က သူ့ကို ပို၍ပင် ကျေနပ်သွားစေပြီး၊ ကောင်းကင်ကပ်ဘေးကို သူ၏ခန္ဓာကိုယ်ကို သန့်စင်စေရန် ခွင့်ပြုလိုက်သည်။

မူလဇာစ်မြစ် ကောင်းကင်မိုးကြိုးအမျှင်တန်းများ ကျဆင်းလာရာ၊ တာအိုဒီရေသည် မကြာမီ ပေါ်ပေါက်လာတော့သည်။ မရေမတွက်နိုင်သော ကျင့်ကြံသူများမှာ တင်ပျဉ်ခွေထိုင်ကာ တာအိုဒီရေအလျဥ်၌ သမာဓိ ဝင်စားသွားကြသည်။

ကံမကောင်းစွာဖြင့်၊ မည်သည့်ကျင့်ကြံသူမျှ လုရီကို ဝန်းရံထားသော အရိပ်ယောင်ကို သတိမပြုမိကြ။ မည်သည့်ကျင့်ကြံသူမျှ လုရီ၏ ပတ်လည်တွင် ဝေ့ဝဲနေသော ဖရိုဖရဲချီကို မမြင်တွေ့ကြပေ။

…

တစ်ချိန်တည်းမှာပင်၊ မှောင်မိုက်သော ကျိုယိုကမ္ဘာ၏ နက်ရှိုင်းသော နေရာများတွင်၊ အရာဝတ္ထုများ၏ ဖရိုဖရဲလှုပ်ရှားမှုက အချိန်နှင့်နေရာကို ဤနေရာတွင် အဓိပ္ပာယ်မဲ့သွားစေသည်။

ပြီးတော့ ကျိုယိုကမ္ဘာကို ဖြည့်တင်းထားသော စွမ်းအားမှာ၊ အစစ်အမှန်စကြဝဠာနှင့် ဆန့်ကျင်ဘက်ဖြစ်ပြီး၊ ယိုယွင်းပျက်စီးခြင်းနှင့် ယုတ်မာခြင်းတို့ဖြင့် စွန်းထင်းနေသည်။ ဤဖရိုဖရဲကမ္ဘာထဲတွင် အလားတူ ယုတ်မာသော ကျိုယိုမိစ္ဆာများစွာကို ဖြစ်ပေါ်စေသည်။ လက်ရှိတွင်၊ ကျိုယိုကမ္ဘာမှ ဟင်းလင်းပြင် တစ်ခုတွင်၊

တာအိုစွမ်းအင်များ တဟုန်ထိုးထွက်ပေါ်လာပြီး၊ လှိုင်းထန်သော ဒီရေတစ်ခုအဖြစ်သို့ ပြောင်းလဲသွားကာ၊ ပတ်ဝန်းကျင်မှ ကျိုယိုချီများကို အရပ်လေးမျက်နှာသို့ ဆူနာမီကဲ့သို့ ပျံ့နှံ့သွားစေသည်။

ပြီးတော့ ဤကမ္ဘာ၏ ဒေသအသီးသီးတွင်၊ အားကောင်းသော အရှိန်အဝါများ တိုးထွက်လာသည်။ ၎င်းအရှိန်အဝါများက ဧရာမ အနက်ရောင်အရိပ်များအဖြစ် ထင်ရှားလာကာ၊ ကြယ်တာရာစနစ်တစ်ခုလုံးနှင့် ကြယ်တာရာနယ်မြေများကိုပင် လွှမ်းခြုံထားသည်။

အနက်ရောင် အရိပ်များ အားလုံးမှာ တာအိုဒီရေ စတင်ဖြစ်ပေါ်ရာ ဒေသသို့ လှည့်ကြည့်လိုက်ကြရင်း သူတို့၏ယုတ်မာသော ဖရိုဖရဲ အကြည့်များမှာ တာအိုဒီရေ၏ အလယ်ဗဟိုမှ ဖရိုဖရဲအရိပ်ယောင်ကို စူးစူးဝါးဝါး အကဲခတ်ကြ၏။

သူတို့၏ မျက်လုံးများမှာ ပြင်းထန်သော ရူးသွပ်မှုများဖြင့် တဖျပ်ဖျပ်လက်နေသည်။

“ဖရိုဖရဲ။”

နောက်တစ်ခဏတွင်၊ သူတို့၏ ပတ်လည်တွင် အရှိန်အဝါများ တဟုန်ထိုးထွက်ပေါ်လာပြီး၊ ယုတ်မာသော ဟိန်းဟောက်သံများကို ထုတ်လွှတ်လိုက်ရာ၊ ကျိုယိုကမ္ဘာအတွင်းမှ အဆုံးမရှိသော ကျိုယိုမိစ္ဆာများမှာ ဟိန်းဟောက်သံများကို ကြားပြီး ဧရာမပုံရိပ်များဆီသို့ စုဝေးလာကြသည်။

တစ်ချိန်တည်းမှာပင်၊ အခြားဒေသတစ်ခုတွင်၊ အစစ်အမှန် စကြဝဠာမှ အင်မော်တယ်ဘုရင်များနှင့် အင်မော်တယ်အင်ပါယာများသည်လည်း အလားတူ တာအို ဒီရေဧရိယာသို့ လှမ်းမျှော်ကြည့်လိုက်ကြရင်း မျက်နှာအမူအရာများမှာ သိသိသာသာ ပြောင်းလဲသွားသည်။

“ဒါက အရမ်းချဲ့ကားလွန်းနေပြီ။”

“ပြီးပြီ… ဒီတစ်ခါတော့ ကျိုယိုမိစ္ဆာနတ်ဘုရားတွေအားလုံး နိုးထလာလောက်ပြီ။ ငါတို့ တားလို့ မရတော့ဘူး။”

“အဲ့ဒီကယ်တင်ရှင်က အင်မော်တယ် ဘုရင်အဆင့်ကို တက်လှမ်းပြီးသွားပြီလား။ အရမ်းမြန်တာပဲ။”

“ဒီလိုစွမ်းအားနဲ့ဆိုရင်၊ ကျိုယိုမိစ္ဆာနတ်ဘုရားတွေအားလုံးနဲ့ ယှဉ်ပြိုင်နိုင်ပါ့မလား မသိဘူး။”

“ဒါက ယွင်ယန် အင်မော်တယ်အင်ပါယာ… မဟုတ်ဘူး… ယွင်ယန်မိစ္ဆာနတ်ဘုရားနဲ့ ပုယွဲ့မိစ္ဆာနတ်ဘုရားတို့ကိုတောင် ထည့်တွက်ရမှာ။”

“…”

အင်မော်တယ်ဘုရင်များနှင့် အင်မော်တယ်

အင်ပါယာများအဖွဲ့မှာ သူတို့အချင်းချင်း ဆွေးနွေးနေကြသည်။ သူတို့သည် ဒဏ်ရာကိုယ်စီ ရှိကာ၊ မျက်နှာများမှာ သွေးဆုတ်နေကြသည်။ အလွန်တရာ အားကောင်းသော

အင်မော်တယ်အင်ပါယာများပင်လျှင်၊ သူတို့၏တည်ရှိမှုနှင့် နက်ရှိုင်းသော အမူအရာများ ပြည့်နှက်နေသော်လည်း၊ အရှိန်အဝါတွင် အနည်းငယ် အားနည်းနေပါသည်။

သူတို့သည် အချိန်အလွန်ကြာအောင် တိုက်ခိုက်နေခဲ့ကြသည်ပင်။

ထိုအခိုက်အတန့်တွင်၊ သူတို့၏မျက်နှာအမူအရာများမှာ လေးနက်လာကြသည်။

သူတို့ စိတ်ကူးထားသည်ထက် ပို၍ကြောက်မက်ဖွယ်ကောင်းသော တာအိုဒီရေက ကျိုယို၏ မျှော်လင့်ထားသော စကြဝဠာထဲသို့ ကျူးကျော်မှုမှာ သိသိသာသာ ရှေ့တိုးလာနိုင်သည်ကို ရှင်းလင်းစွာ ပြသနေသည်။

…

ကောင်းကင်မိုးကြိုးအမျှင်တန်းများ ကျဆင်းလာရာ၊ လုရီ၏ အသားနှင့်အရိုးများမှာ စုတ်ပြဲခြင်းနှင့် ပြန်လည်ရှင်သန်ခြင်းကြားတွင် လှည့်ပတ်နေခဲ့သည်မှာ အချိန်အတော်ကြာခဲ့၏။

ကောင်းကင်ယံမှ မူလဇာစ်မြစ်ကောင်းကင်မိုးကြိုး ကုန်ခန်းသွားပြီး၊ ကောင်းကင်ကပ်ဘေး လုံးဝပျောက်ကွယ်သွားသည်အထိပင်။

လုရီ၏ ညာဘက်လက်မောင်းမှာ ကျိုးသွားပြီး၊ သူ့ကိုယ်မှာ သွေးများဖြင့် အနီရဲရဲ ဆိုးထားကာ၊ အရှိန်အဝါပင် အနည်းငယ် အားနည်းနေသည်။

နောက်တစ်ခဏတွင်၊ သူ၏ အသားနှင့်အရိုးများမှာ လှုပ်ရှားလာပြီး၊ သူ၏လက်မောင်းမှာ ပဉ္စလက်သဖွယ် အလိုအလျောက်ပြန်ဆက်လာတော့သည်။ သွေးများ ပြန်လည်စုပ်ယူခံရပြီး အသားမှာလည်း အပြည့်အဝ ပြန်လည်ကောင်းမွန်လာသည်။

ထိုအခိုက်ဝယ် လုရီ အနည်းငယ် ပင့်သက်ရှိုက်လိုက်ရင်း သူ့ အခြေအနေကို ခံစားကြည့်လိုက်ကာ

သူ၏ ချောမောခန့်ညားသော မျက်နှာထက်ဝယ် ကျေနပ်သော အပြုံးရိပ် တစ်ခု ပွင့်လန်းလာလေသည်။