ပထမနေရာအတွက် ရွေးချယ်ခံရသူ၊ ခြောက်ထောင့်ငါးရာရမှတ်

လော့ချန်က သင်္ဘောကုန်းပတ်ပေါ်တွင် ရပ်နေရင်း လူအုပ်ကြီး၏ အံ့အားသင့်သံများကို ကြားလိုက်ရသည်။ သူ့စိတ်ထဲတွင် အနည်းငယ် အံ့သြသွားသည်။

တစ်ထောင့်ခုနစ်ရာကျော်ရမှတ်လောက်နှင့်ပင် လူတိုင်းကို ဤမျှလောက် အံ့အားသင့်စေနိုင်သည်တဲ့လား။

သို့သော် ခဏတွေးကြည့်ပြီးနောက် လော့ချန်လည်း တည်ငြိမ်သွားသည်။

ချင်ယွမ်စမ်းသပ်မှုတွင် ပါဝင်သည့် အလုပ်သင်တပည့်များက အများစုမှာ လူသာမန်ဘဝဖြတ်ကျော်အဆင့်သုံးနှင့် အဆင့်လေးသာရှိကြပြီး ၎င်းတို့က ကြယ်နှစ်ပွင့်အလယ်အဆင့် နတ်ဆိုးသားရဲများနှင့် ညီမျှသည်။

ဤလူများက အနည်းငယ် သာလွန်ထူးချွန်သည့် ကြယ်နှစ်ပွင့်နတ်ဆိုးသားရဲတစ်ကောင်နှင့်ဆုံလျှင် ထွက်ပြေးရုံမှတပါး အခြားနည်းလမ်း မရှိချေ။ တစ်ရက်အတွင်း ကြယ်နှစ်ပွင့်နတ်ဆိုးသားရဲ တစ်ရာကျော်ခန့်ကို သတ်ဖြတ်နိုင်လျှင်ပင် မဆိုးသည့်အောင်မြင်မှုဟု ဆိုနိုင်သည်။

“ငါ့ရဲ့စုစုပေါင်းရမှတ်က ဘယ်လောက်ရှိမလဲ… တစ်သောင်းငါးထောင်ကျော်နိုင်မလား…”

လော့ချန်၏ မျက်ဝန်းများတွင် မျှော်လင့်စိတ်အရိပ်အယောင်များ ပေါ်လာသည်။ ဖိုင်ရွှမ်နှင့် ချောင်ချင်းတို့ကို သတ်ဖြတ်ပြီးနောက် သူ၏အမဲလိုက်ရမှတ်မှာ တစ်သောင်းနီးပါး ရှိခဲ့သည်။ ထို့နောက် လော့ချန်က နတ်ဆိုးသားရဲများစွာနှင့် အလုပ်သင်တပည့်များကိုပါ သတ်ဖြတ်ခဲ့ပြီး ၎င်းတို့ထဲတွင် လင်ကျင်းထိုင်လည်း ပါဝင်သည်။

ထိုသူများ၏ အမဲလိုက်ရမှတ်များကို လော့ချန်က တစ်ဦးချင်းစီ သိမ်းယူခဲ့သော်လည်း ထိုရမှတ်များကို အသေးစိတ် စစ်ဆေးကြည့်ခြင်း မပြုခဲ့ပေ။ သို့သော် လင်ကျင်းထိုင်မှာ ဟယ်အကြီးအကဲက သူ့ကို ထောက်ခံထားသဖြင့် အလုပ်သင်တပည့်များထဲတွင် ဂုဏ်သတင်းကြီးမားပြီး လူများစွာကို လက်အောက်ငယ်သားအဖြစ် ထည့်ထားနိုင်သူ ဖြစ်သည်။ ထို့ကြောင့် သူ၏ရမှတ်မှာ နည်းနိုင်မည်မဟုတ်ဟု ထင်ရသည်။

လူအုပ်ကြီးက သင်္ဘောပေါ်မှ စနစ်တကျ ဆင်းလာကာ ရမှတ်များကို စာရင်းပြုစုနေကြသည်။

ရှေ့ဆုံးမှလူများ၏ ရလဒ်များမှာ သာမန်သာဖြစ်ပြီး တစ်ထောင်ကျော်သူမှာ ရှားပါးလှသည်။

တစ်ထောင့်ငါးရာကျော်သည့် ရမှတ်ရရှိသူများမှာ ထိပ်ဆုံးတစ်ရာအတွင်း ဝင်ရောက်နိုင်ကာ ၎င်းတို့၏အမည်များက ကွင်းပြင်ထဲရှိ ကြေညာချက်ဘုတ်ပေါ်တွင် ပေါ်လာပြီး လူအများက အထင်ကြီးလေးစားကြသည်။

ယခုအချိန်တွင် အဆင့်သတ်မှတ်ချက်စာရင်း၏ ပထမနေရာတွင်ရှိသူမှာ ဘုန်းလန်ဆိုသူဖြစ်ပြီး သူသည် လူသာမန်ဘဝဖြတ်ကျော်အဆင့်ငါးရှိသူဖြစ်ကာ တစ်ထောင့်ကိုးရာ့ရှစ်ဆယ်ရမှတ် ရရှိထားသည်။ ဤအချက်ကို လူအများက သိပ်ဂရုမစိုက်ကြပေ။

လူတိုင်းသိသည်မှာ ဤအရာများက အဆင့်သတ်မှတ်ချက်စာရင်း၏ အစပျိုးမှုသာ ဖြစ်သည်။

ထိပ်တန်းစာရင်းဝင်ဆယ်ဦး ရွေးချယ်ခံရသူများထဲမှ တစ်ဦးတစ်ယောက်မျှ သင်္ဘောပေါ်မှ ဆင်းမလာသေးပေ။ ထိုအခါမှပင် ထိပ်တန်းစာရင်းဝင်ဆယ်ဦး ရွေးချယ်ခံရသူများထဲမှ ပထမဆုံးသူတစ်ဦးက ပေါ်ထွက်လာသည်။

ကျိုးပင်းရိတ်...

သူက ထိပ်တန်းစာရင်းဝင်ဆယ်ဦး ရွေးချယ်ခံရသူများထဲတွင် လူကြိုက်အနည်းဆုံး ဖြစ်သည်။

ကျိုးပင်းရိတ်က သူ၏ရလဒ်ကို စာရင်းပြုစုသည့်အခါ ကွင်းပြင်တစ်ခုလုံး အသံလှိုင်းများဖြင့် ဆူညံလျက်ရှိသည်။

ထင်ရှားသည့်ဂဏန်းတစ်ခုက အဆင့်သတ်မှတ်ချက်စာရင်း၏ ထိပ်ဆုံးနေရာသို့ တက်ရောက်လာသည်။

ကျိုးပင်းရိတ် နှစ်ထောင့်ရှစ်ရာ့ကိုးဆယ်ရမှတ်...

“ဟင်း… နှစ်ထောင့်ရှစ်ရာ့ကိုးဆယ်ရမှတ်တဲ့… ဆရာကြီးကျိုးပင်းရိတ်ရဲ့ရမှတ်က မြင့်လွန်းတယ်လေ…”

“တော်လိုက်တာ… ဒုတိယနေရာကို တစ်ထောင်လောက် ဖြတ်ထားတာပဲ…”

“ဆရာကြီးကျိုးပင်းရိတ်က ထိပ်ဆုံးသုံးဦးထဲ ဝင်နိုင်မယ်ထင်တယ်…”

ကွင်းပြင်ထဲတွင် အံ့အားသင့်သံများ တစ်လှိုင်းပြီးတစ်လှိုင်း ထွက်ပေါ်လာပြီး အလုပ်သင်တပည့်များအားလုံး ဤရလဒ်ကြောင့် ထိတ်လန့်နေကြသည်။

ကျိုးပင်းရိတ်ပြီးနောက် မကြာမီတွင် ထိပ်တန်းဆယ်ဦး ရွေးချယ်ခံရသူထဲမှ နောက်တစ်ဦးဖြစ်သည့် ယွမ်ချီလန် သင်္ဘောပေါ်မှ ဆင်းလာသည်။ ထို့နောက် ချက်ချင်းဆိုသလိုပင် လူအများ၏အကြည့်များက ကြေညာချက်ဘုတ်ဆီသို့ တစ်ပြိုင်နက်တည်း ရောက်သွားကြသည်။

ယွမ်ချီလန်နှင့် ကူးလင်ဖန်တို့က ဗိုလ်စွဲရန်အလားအလာ အများဆုံးနှစ်ဦး ဖြစ်သည်။

ယွမ်ချီလန်က ရမှတ် ဘယ်လောက်ရထားလဲဆိုတာ လူတိုင်းသိချင်နေကြသည်။

ယွမ်ချီလန်က သူမ၏အထောက်အထားတံဆိပ်ပြားကို တင်သွင်းလိုက်သည်နှင့် သူမ၏အမည်က အဆင့်သတ်မှတ်ချက်စာရင်း၏ ပထမနေရာသို့ တက်လာသည်။

ယွမ်ချီလန် သုံးထောင့်ခုနစ်ရာ့ကိုးဆယ်ရမှတ်...

“ဟာ… ဆရာမယွမ်ချီလန်ရဲ့ရမှတ်က မြင့်လွန်းတယ်… လေးထောင်နီးပါးပဲ…”

“တော်လိုက်တာ… ကျိုးပင်းရိတ်ထက်တောင် တစ်ထောင်လောက်ပိုများတယ်…”

“ဒီရလဒ်ဆိုရင် ဆရာကြီးကူးလင်ဖန်ပဲ ယှဉ်နိုင်လိမ့်မယ်…”

“ဒီတစ်ခေါက် ချင်ယွမ်စမ်းသပ်မှုရဲ့ ပထမနေရာက ဆရာမယွမ်ချီလန်ပဲ ဖြစ်ရမယ်…”

ယွမ်ချီလန်က မျက်နှာလှပကာ ပုံမှန်ကာလတွင် လူတို့အား ဖော်ရွေစွာ ဆက်ဆံတတ်သူဖြစ်သဖြင့် အလုပ်သင်တပည့်များကြားတွင် သူမကို ထောက်ခံသူများစွာ ရှိသည်။

ယွမ်ချီလန်က ပထမနေရာသို့ တက်လာသည်ကို မြင်လိုက်ရသည့်အခါ ကွင်းပြင်ထဲမှ အော်ဟစ်သံများက တစ်လှိုင်းပြီးတစ်လှိုင်း မြင့်တက်လာသည်။

လူအများက ယွမ်ချီလန်၏အမည်ကို အော်ဟစ်ကြပြီး သူမက ဤချင်ယွမ်စမ်းသပ်မှု၏ ပထမနေရာဖြစ်ရမည်ဟု ယူဆကြသည်။

သို့သော် ကျိုးရို့၏မျက်ဝန်းများက အလွန်တည်ငြိမ်နေသည်။

ယွမ်လင်သီးကို ရရှိပြီးသည့်နောက် ဤချင်ယွမ်စမ်းသပ်မှုတွင် သူမက အောင်မြင်မှုများစွာ ရရှိခဲ့ပြီဖြစ်သဖြင့် ပထမနေရာရမရ သူမအတွက် အရေးမကြီးတော့ပေ။

ထို့ပြင် ယွမ်ချီလန်တွင် ခံစားချက်တစ်ခု ရှိနေသည်။ ဤချင်ယွမ်စမ်းသပ်မှု၏ရလဒ်က လူတိုင်း၏ထင်မြင်မှုကို ကျော်လွန်သွားနိုင်သည်ဟု သူမက ထင်သည်။

ထိုအတွေးဖြင့် ယွမ်ချီလန်က မသိမသာ ငါးထပ်အဆောင်စစ်သင်္ဘောဆီသို့ တစ်ချက်ကြည့်လိုက်သည်။ သင်္ဘောပေါ်မှ ဆင်းလာသူများက ထက်ဝက်ကျော်သွားပြီ ဖြစ်သည်။ မကြာမီတွင် ထိပ်တန်းစာရင်းဝင်ဆယ်ဦး ရွေးချယ်ခံရသူထဲမှ နောက်တစ်ဦးဖြစ်သည့် ကျိုးရို့က သင်္ဘောပေါ်မှ ဆင်းလာသည်။

ဤတစ်ကြိမ်တွင် လူအုပ်ကြီး၏ တုံ့ပြန်မှုမှာ ယွမ်ချီလန် ဆင်းလာစဉ်ကလောက် မဆူညံခဲ့ပေ။

ဂုဏ်သတင်းနှင့် စွမ်းအားအရ ကျိုးရို့က ယွမ်ချီလန်ထက် အနည်းငယ် နိမ့်ကျသည်။

လူအများက ကျိုးရို့၏ရလဒ်သည် ယွမ်ချီလန်ကို ကျော်လွန်နိုင်မည်မဟုတ်ဟု ယူဆကြသည်။

ကျိုးရို့က ကျောက်စိမ်းစားပွဲသို့ ရောက်လာပြီး သူမ၏အထောက်အထားတံဆိပ်ပြားကို တင်သွင်းလိုက်သည်။

ရလဒ်စာရင်းပြုစုပြီးသည့်အခါ ကွင်းပြင်တစ်ခုလုံး တိတ်ဆိတ်သွားပြီး လူတိုင်းက အဆင့်သတ်မှတ်ချက်ဘုတ်ကို အထူးတလည် ကြည့်နေကြသည်။

ထိုအချိန်တွင် ယွမ်ချီလန်၏အဆင့်က ဒုတိယနေရာသို့ ကျဆင်းသွားပြီ ဖြစ်သည်။

ပထမနေရာတွင် ထင်ရှားစွာ ပေါ်ထွက်လာသူမှာ ကျိုးရို့ ဖြစ်သည်။ ထင်ရှားလှသည့် ဂဏန်းတစ်ခုက လူတိုင်း၏မျက်ဝန်းထဲသို့ ရောက်ရှိလာသည်။

ခြောက်ထောင့်ငါးရာရမှတ်...

“ဟင်း… ငါ့မျက်လုံးတွေ မှားနေတာလား… ဆရာမကျိုးရို့ရဲ့ရလဒ်က ခြောက်ထောင့်ငါးရာတဲ့…”

“ဒါ မဖြစ်နိုင်တာပဲ…”

ကျိုးရို့၏ရလဒ်ကို မြင်လိုက်ရသည့်အခါ လူတိုင်းက အံ့အားသင့်လျက် မျက်လုံးပြူးမျက်စံပြူး ဖြစ်နေကြသည်။

ကျိုးရို့၏ရလဒ်က ယွမ်ချီလန်ကို ကျော်လွန်လိမ့်မည်ဟု မည်သူမျှ မထင်ထားခဲ့ပေ။ ဤမျှလောက် ကွာဟစွာ ကျော်လွန်လိမ့်မည်ဟုလည်း မမျှော်လင့်ခဲ့ကြပေ။

ယွမ်ချီလန်ပင်လည်း အံ့အားသင့်သွားပြီး ကျိုးရို့၏စွမ်းအားဖြင့်ဆိုလျှင် ဤမျှမြင့်မားသောရမှတ်ကို မရရှိနိုင်ပေ။

ထိပ်တန်းစာရင်းဝင်ဆယ်ဦး ရွေးချယ်ခံရသူတစ်ဦးက သူမကို ကူညီပေးခဲ့မှသာလျှင် ဤရလဒ်က ဖြစ်ပေါ်လာနိုင်သည်။ သို့သော် ထိုသို့ ဖြစ်နိုင်ပါမည်လော။

မျက်နှာထက်တွင် မက်မွန်ပွင့်များကဲ့သို့ လှပသော ကျိုးရို့က ယွမ်ချီလန်ကို တစ်ချက်ကြည့်လိုက်ပြီး သူမ၏နှုတ်ခမ်းထောင့်တွင် ကျီစယ်သည့်အပြုံးတစ်ခု ပေါ်လာသည်။ သူမ၏အစစ်အမှန်ရလဒ်မှာ ယွမ်ချီလန်ထက် နိမ့်ကျပြီး သုံးထောင်ကျော်သာ ရှိသည်။

သို့သော် ပိုင်ဘုန်းထိပ်တွင် ယွမ်လင်သီးကို အပြိုင်အဆိုင်ရယူရင်း သူမက ထိပ်တန်းစာရင်းဝင်ဆယ်ဦး ရွေးချယ်ခံရသူ သုံးဦးနှင့်အတူ ကူးလင်ဖန်နှင့် ယွမ်ချီလန်တို့ကို လိုက်လံတိုက်ခိုက်ခဲ့သည်။

ထိုအခါ ထိုသုံးဦးထဲမှ တစ်ဦးဖြစ်သူကို ကူးလင်ဖန်က သတ်ဖြတ်လိုက်ပြီး ကျိုးရို့က ထိုအခွင့်အရေးကို အသုံးချကာ ထိုသူ၏ရမှတ်များကို သိမ်းယူခဲ့ခြင်းကြောင့် ဤမျှ မြင့်မားသောရမှတ်ကို ရရှိခဲ့ခြင်း ဖြစ်သည်။

“ယွမ်ချီလန်… ယွမ်လင်သီးကို ငါမရခဲ့ဘူး… ဒါပေမဲ့ ဒီချင်ယွမ်စမ်းသပ်မှုရဲ့ ပထမနေရာကိုတော့ မင်းလည်း မရလောက်ပါဘူး…”

ကျိုးရို့က ယွမ်ချီလန်ဘေးမှ ဖြတ်သွားရင်း အေးစက်စွာ ဟွန်းကနဲ ရေရွတ်လိုက်သည်။

ထိုစိန်ခေါ်သံကို ကြားလိုက်ရသည့်အခါ ယွမ်ချီလန်က မျက်ခုံးကို အနည်းငယ်ပင့်လိုက်ပြီး ပြုံးရုံဖြင့်ဖြေသည်။

“အခုအချိန်မှာ ရလဒ်ကိုပြောတာက နည်းနည်းစောလွန်းနေမလား…”

ထိုစကားကို ကြားလိုက်ရသည့်အခါ ကျိုးရို့က မထီမဲ့မြင်ပြုလျက် ရယ်သည်။

“ဟား... ဟား... ဟား… မင်းထင်နေတာလား… ငါ့ကို ကျော်နိုင်မယ့်သူရှိမယ်လို့… ကူးလင်ဖန်လား… သူ့ရဲ့ရမှတ်က လေးထောင်ကျော်တောင် မဖြစ်နိုင်ဘူး…”

ကျိုးရို့က ခြောက်ထောင်ကျော်ရမှတ်ဖြင့် ဤချင်ယွမ်စမ်းသပ်မှု၏ ပထမနေရာက သူမ၏လက်ထဲတွင်သာ ရှိမည်ဟု ယုံကြည်ထားသည်။

“ဘယ်သူသိမှာလဲ…”

ယွမ်ချီလန်က တည်ငြိမ်စွာ ပြုံးလျက်ဖြေသည်။

ကျိုးရို့က ဟွန်းခနဲ ရေရွတ်သည်။

“ဒါဆို ငါတို့ စောင့်ကြည့်ရအောင်…”

ကွင်းပြင်ရှိ မြင့်မားသော စင်မြင့်ပေါ်တွင် ချင်ယွမ်စမ်းသပ်မှုကို တာဝန်ယူထားသည့် အပြင်စည်းအကြီးအကဲဆယ်ဦးက စုဝေးနေကြပြီး အဆင့်သတ်မှတ်ချက်အကြောင်း ဆွေးနွေးနေကြသည်။

အကြီးအကဲတစ်ဦးက ကျိုးရို့ထံမှ အကြည့်ကိုရုပ်သိမ်းလိုက်ပြီး ပြုံးကာ ပြောသည်။

“အရင်က ငါထင်ခဲ့တာ ပထမနေရာက ယွမ်ချီလန်ဖြစ်မယ်လို့… ဒါပေမဲ့ ကျိုးရို့က ထွက်ပေါ်လာတယ်… အခုကြည့်ရတာ ပထမနေရာက သူမပဲ ဖြစ်မယ်ထင်တယ်…”

ထို့နောက် ဘေးတွင်ထိုင်နေသည့် ဟယ်အကြီးအကဲက ပြောသည်။

“ဒါပေမဲ့ ငါကတော့ မသေချာဘူးလို့ထင်တယ်…”

ထိုအကြီးအကဲက မျက်ခုံးကို ပင့်လိုက်ပြီး သံသယဖြင့် ပြောသည်။

“ဟယ်အကြီးအကဲ ကျိုးရို့ရဲ့ရမှတ်ကို ကျော်လွန်နိုင်မယ့်သူ ရှိလိမ့်မယ်လို့ ထင်နေတာလား… ကူးလင်ဖန်လား… သူဆိုရင်တောင် ခြောက်ထောင်ကျော်ဖို့ ခက်ခဲမယ်လေ…”

ဟယ်အကြီးအကဲက ခေါင်းခါလျက် ပြုံးကာ ပြောသည်။

“ကူးလင်ဖန်မလုပ်နိုင်ဘူးဆိုတာ တခြားသူမလုပ်နိုင်ဘူးလို့ ပြောလို့မရပါဘူး… ငါပြောတာက လင်ကျင်းထိုင်ပါ…”

လင်ကျင်းထိုင်က ဟယ်အကြီးအကဲ၏ ယုံကြည်အားထားရသော တပည့်ဖြစ်ပြီး သူ့ကို ဗိုလ်စွဲရန် ကူညီပေးမည်ဟု ကတိပြုထားသည်။

ထို့အတွက် ဟယ်အကြီးအကဲက စွမ်းအားကြီးမားသော အလုပ်သင်တပည့်များစွာကို စုစည်းထားသည်။

ထိုသူများက ၎င်းတို့၏ အမဲလိုက်ရမှတ်များကို လင်ကျင်းထိုင်ထံ ပေးအပ်လျှင် ခြောက်ထောင်ကျော်ရန် လွယ်ကူလှသည်။

ဟယ်အကြီးအကဲ၏ စကားကို ကြားလိုက်ရသည့်အခါ တက်ရောက်နေသည့် အကြီးအကဲများ၏ မျက်နှာများက ထူးဆန်းသွားသည်။ ထိုအကြီးအကဲက တွေးတောဟန်ဖြင့် ပြောသည်။

“ဟယ်အကြီးအကဲ မသိသေးဘူးလား…”

“ဘာကိုလဲ…”

ဟယ်အကြီးအကဲ အံ့အားသင့်သွားသည်။

ထိုအကြီးအကဲက သက်ပြင်းဖွဖွချလျက် ခေါင်းခါကာ ပြောသည်။

“လင်ကျင်းထိုင်က သေသွားပြီ… သူ့ကိုသတ်လိုက်တဲ့သူကလည်း အသုံးမကျသိုင်းဝိညာဉ်နိုးကြားထားတဲ့ အလုပ်သင်တပည့်သစ် လော့ချန်ပဲ…”