အခန်း (၁၄၈၁)

အချင်းမိုင်တစ်သောင်းအတွင်းဝယ် ငွေရောင်ဓားအလင်းက ထွန်းလင်းတောက်ပသွားပြီး အရာအားလုံးကို ဖုံးလွှမ်းသွားသည်။ ယင်းက အစောနက တသီးတခြားဖြစ်သွားခဲ့သော လေဟာနယ်အစိတ်အပိုင်းများကို အသစ်တဖန် ပြန်စုဝေးသွားစေသည်။

ရှင်းလင်းစွာပင် ထိုဓားအလင်းက စကြာဝဠာ၏ ဟင်းလင်းပြင်ကို ထိုးဖောက်နိုင်စွမ်းရှိပြီး မည်သည့်လေဟာနယ်ကိုမဆို ဖျက်ဆီးပစ်နိုင်သည်။

ထိုဓားအလင်းဖြင့် ထိုးဖောက်ခံလိုက်ရသော လေဟာနယ်များက မူလအခြေအနေမှာ ရှိကြတော့မည် မဟုတ်ချေ။

လေဟာနယ်ကို လျစ်လျူရှုခြင်း… ငါမြင်နေရတဲ့ နေရာက ငါ့ဓား ရောက်နိုင်တဲ့ အကွာအဝေးဖြစ်တယ်…

အဆုံးမဲ့ဓားအလင်း… ငါ့ရဲ့ ဓားအလင်းက မိုးနဲ့မြေကြားထဲမှာ အကန့်အသတ်မဲ့တယ်…

ဤအခိုက်အတန့်မှာ မည်သည့်အရာမှ ထိုဓားအလင်းကို မခုခံနိုင်ပေ။

သို့ဖြစ်၍ အထွတ်အမြတ် အဆင့်တစ်ကောင်းကင်မိစ္ဆာသားရဲနှစ်ကောင်သည် သရဲတစ္ဆေကို မြင်လိုက်ရသည့်အလား ကြောက်လန့်သွားကြပြီး အမြန်ထွက်ပြေးသွားကြသည်။

သို့တိုင် ဓားအလင်းက ၎င်းတို့၏ အနောက်သို့ မြန်ဆန်စွာ လိုက်မီသွားပြီး နက်ရှိုင်းသော ဓားဒဏ်ရာများကို ပေးလိုက်သည်။

နောက်ဆုံးမှာတော့ အဝေးမှ ကောင်းကင်မိစ္ဆာသားရဲက လှောင်ချိုင့်ကို တရွတ်တိုက် ဆွဲသွားပြီး အဝေးသို့ အရူးအမူး ထွက်ပြေးသွားသည်။

ဟန်မူယဲ့သည် မိုင်တစ်သောင်းရှည်လျားသော ဓားအလင်းကို လက်ထဲမှာ ဆုပ်ကိုင်လျက် ခန္ဓာကိုယ်ကို ရွေ့လျားလိုက်သည်။ သူက ဓားတစ်ချက်ဖြင့် လေဟာနယ်ကို ဖြတ်တောက်လိုက်ပြီး အနောက်မှ လိုက်ဖမ်းသည်။

အကယ်၍ အပြင်လူများသာ ထိုမြင်ကွင်းကို မျက်မြင်တွေ့သွားမည်ဆိုလျှင် သူတို့က သေချာပေါက် ပါးစပ်အဟောင်းသားဖြစ်သွားကြလိမ့်မည်။

အထွတ်အမြတ် အဆင့်တစ်ကောင်းကင်မိစ္ဆာသားရဲသုံးကောင်က ဓားကျင့်ကြံသူတစ်ယောက်ကြောင့် အရူးအမူး ထွက်ပြေးနေကြသည်။

“ အရူး… ဒီကောင်က သေချာပေါက် အရူးပဲ ”

ဒုစရိုက်နဂါးက ဟန်မူယဲ့ကို ကြည့်လိုက်ပြီး သူ့ဘာသာ တီးတိုးရေရွတ်လိုက်သည်။ ထို့နောက် မတူညီသော စိတ်ခံစားချက်အမျိုးမျိုးက သူ၏ မျက်နှာပေါ်မှာ ထွက်ပေါ်လာသည်။

ဟန်မူယဲ့သည် ဓားကိုင်ဆွဲလျက် အထွတ်အမြတ် အဆင့်တစ်ကောင်းကင်မိစ္ဆာသားရဲသုံးကောင်ကို အသည်းအသန် လိုက်ဖမ်းသည်။

သို့သော်လည်း ဤနေရာက အကန့်အသတ်မဲ့ဟင်းလင်းပြင်နယ်မြေဖြစ်ပြီး ဤနေရာမှာ ဖရိုဖရဲလေဟာနယ်များနှင့် ပရမ်းပတာဟင်းလင်းပြင်များ ရှိသည်။ သို့ဖြစ်၍ တစ်စုံတစ်ယောက်က ခြေတစ်လှမ်း မှားယွင်းသွားမည်ဆိုလျှင် မိုင်သန်းပေါင်းများစွာ အကွာအဝေးသို့ ရောက်ရှိသွားလိမ့်မည်။

ထို့ကြောင့် အချိန်ကြာလာသည်နှင့်အမျှ ဟန်မူယဲ့နှင့် အထွတ်အမြတ် အဆင့်တစ်ကောင်းကင်မိစ္ဆာသားရဲသုံးကောင်ကြားမှ အကွာအဝေးက တဖြည်းဖြည်း ပိုပြီးကျယ်ပြောလာသည်။

“ သူတို့တွေ ငါ့ကို မသတ်နိုင်ဘူး… သူတို့က ငါတို့လို ကမ္ဘာဦးအုပ်ချုပ်သူတွေရဲ့ နတ်သားရဲအစွမ်းကို အသုံးပြုပြီး ဖရိုဖရဲကောင်းကင်အသူရာချောက်နက်ကို ချိပ်ပိတ်ချင်ကြတယ် ”

“ မင်းရဲ့ ခွန်အားက မလုံလောက်သေးဘူး ”

ဒုစရိုက်နဂါးက အဝေးမှ လှမ်းအော်ပြောလိုက်သည်။

ဟန်မူယဲ့၏ ခြေလှမ်းက ရပ်တန့်သွားသည်။

အကယ်၍ သူက နောက်ထပ် ဆက်လိုက်သွားမည်ဆိုလျှင်လည်း ၎င်းတို့ကို လိုက်မီလိမ့်မည် မဟုတ်ချေ။

ထို့ပြင် သူက အထွတ်အမြတ် အဆင့်တစ်ကောင်းကင်မိစ္ဆာသားရဲများ၏ ကိုယ်ပေါ်မှာ သူ၏ ဓားအမှတ်အသားများကို ချန်ထားခဲ့ပြီးပြီ ဖြစ်သည်။ သို့ဖြစ်၍ ၎င်းတို့ကို တားဆီးရန် အချိန်တစ်ခု သူစောင့်ဆိုင်းရန်သာ လိုအပ်သည်။

ဟန်မူယဲ့၏ အကြည့်က တဖြည်းဖြည်း ပျောက်ကွယ်သွားသော အသံ၏ ဦးတည်ရာဆီသို့ ကျရောက်သွားသည်။ သူ၏ မျက်လုံးထဲမှာ နတ်ဘုရားအလင်း ပေါ်လျှိုးလာသည်။

ဒုစရိုက်နဂါး ပြောသွားခဲ့သော စကားများမှတဆင့် သူက ရှေးခေတ်ကာလမှ သတင်းအချက်အလက်တချို့ကို ရှာတွေ့သွားသည်။

ကောင်းကင်မိစ္ဆာသားရဲများ၏ နောက်ကွယ်တွင် အစွမ်းထက် အင်အားစုကြီးတစ်ခု ရှိသည်။

ထိုကောင်းကင်မိစ္ဆာသားရဲများက ကောင်းကင်ဘုံဖွင့်လှစ်ခြင်းဓားဂိတ်ဟု ခေါ်သော တစ်စုံတစ်ခုကို ဖိနှိပ်ရန်အလို့ငှာ ဒုစရိုက်နဂါးကို ဖမ်းခေါ်သွားကြသည်။

ဟန်မူယဲ့ သိထားသည်မှာ ရှေးခေတ်ကာလမှစ၍ ယခုအချိန်ထိ ကြယ်စင်စုစကြာဝဠာကဲ့သို့ အစွမ်းထက် အင်အားစုကြီးတစ်ခုကို အမြစ်ဖြတ်သုတ်သင်ပစ်နိုင်သည့် တစ်ခုတည်းသော အင်အားစုက ကန်အန်းမျိုးနွယ်စု ဖြစ်သည်။

သို့ဆိုလျှင် ကောင်းကင်မိစ္ဆာသားရဲများ၏ နောက်ကွယ်မှာ ကန်အန်းမျိုးနွယ်စု ရှိနေခြင်းလော။

သို့သော်လည်း ကန်အန်းစကြာဝဠာ၏ အင်အားက ကောင်းကင်မိစ္ဆာသားရဲများကို အမှန်တကယ် ထိန်းချုပ်နိုင်သည်လော။

အထွတ်အမြတ် အဆင့်တစ်ကောင်းကင်မိစ္ဆာသားရဲများ၏ တိုက်ပွဲစွမ်းအားက ထိုအဆင့်ထိ ရောက်ရှိနေပြီ ဖြစ်၏။

ပိုပြီးအရေးကြီးသည့်အချက်မှာ လောကတစ်သောင်းယှဉ်ပြိုင်ပွဲ ကျင်းပသည့်အခါတိုင်း အထွတ်အမြတ် အဆင့်တစ်ကောင်းကင်မိစ္ဆာသားရဲများ ထွက်ပေါ်လာနိုင်ခြေရှိသည်။

သို့ဖြစ်လေရာ ဤနှစ်များတွင် အထွတ်အမြတ် အဆင့်တစ်ကောင်းကင်မိစ္ဆာသားရဲများက မည်မျှများပြားစွာ မွေးဖွားလာခဲ့ကြသနည်း။

ဟန်မူယဲ့က ဟင်းလင်းပြင်ထဲမှာ ရပ်မနေဘဲ အရှေ့သို့ မြန်ဆန်စွာ ရွေ့လျားသွားသည်။ မကြာမီ သူက ဟင်းလင်းပြင်ကို ချိုးဖြတ်သွားပြီး ကုန်းမြေတစ်ခုပေါ်သို့ ခြေချလိုက်သည်။

“ အထက်အဆင့်သုံးဆင့် ကုန်းမြေလား ”

ဘေးပတ်ဝန်းကျင်ကို စစ်ဆေးကြည့်ပြီးနောက် သူက တောအုပ်တစ်ခုထဲသို့ ဝင်ရောက်သွားသည်။

“ ခရက် ”

ဟန်မူယဲ့က သူ၏ လက်ထဲမှ အထွတ်အမြတ် အဆင့်တစ်ကောင်းကင်ပုတီးစေ့ကို ချေမွလိုက်သည်။

မူလစွမ်းအားစီးကြောင်းက သူ၏ ခန္ဓာကိုယ်တစ်ဝိုက်ကို ရစ်ပတ်သွားသည်။

သူ၏ အနောက်တွင် နတ်ဘုရားသတ်ဖြတ်ခြင်းရုပ်သေးရုပ်နှင့် ဟွင်းသွမ်းက ဆင်းသက်လာကြပြီး သူ့ကို ကာကွယ်ပေးရန် အသင့်ပြင်ထားကြသည်။

စောစောက တိုက်ပွဲတွင် နတ်ဘုရားသတ်ဖြတ်ခြင်းရုပ်သေးရုပ်ဖြစ်စေ သို့မဟုတ် ဟွင်းသွမ်းဖြစ်စေ သူတို့ဝင်ကူညီပေးရန် အရည်အချင်းမပြည့်မီကြချေ။

ယခုမှသာ သူတို့က ဟန်မူယဲ့ကို ကာကွယ်ပေးနိုင်ကြသည်။

“ ကျင့်ကြံခြင်းလမ်းစဉ်မှာ မင်းက ပိုပြီးအဆင့်မြင့်သွားတာနဲ့ ခွန်အားမဲ့တယ်လို့ ပိုပြီးခံစားရလာလိမ့်မယ် ”

ဟွင်းသွမ်းက တီးတိုးရေရွတ်လိုက်ပြီး အဝေးသို့ လှမ်းကြည့်လိုက်သည်။

သူက အတိတ်၌ ရှေးဦးအပျက်အစီးနယ်မြေထဲမှာ ထိပ်တန်းနတ်သားရဲများအနက် တစ်ကောင်ဖြစ်ခဲ့သည်။

နောက်ပိုင်းမှာ သူက ကြယ်စင်စုစကြာဝဠာမှ အစွမ်းထက် ပုဂ္ဂိုလ်တစ်ဦး၏ ဝင်္ကပါဝိညာဉ်အဖြစ် သန့်စင်ခံခဲ့ရသော်လည်း သူက ဤလောကထဲမှာ ရှားပါးသော အစွမ်းထက်မျိုးနွယ်စုတစ်ခု ဖြစ်နေဆဲပင်။

သို့တိုင် ဟန်မူယဲ့နောက်သို့ သူလိုက်သွားသည့်အချိန်မှစ၍ သူက တိုက်ပွဲတိုက်ခိုက်ရန်ပင် အရည်အချင်းမပြည့်မီတော့ချေ။

ကျင့်ကြံခြင်းလောကထဲမှ လူအများစုက သက်တောင့်သက်သာဘဝကို လိုချင်တောင့်တကြသည်။ သို့ဖြစ်၍ သူတို့က ကောင်းကင်စက်ဝန်းစစ်မြေပြင်ကဲ့သို့ နေရာများဆီသို့ ထွက်ပြေးသွားကြပြီး ပုန်းအောင်းနေကြကာ အပြင်လောကကို လျစ်လျူရှုထားကြသည်။

ဟန်မူယဲ့ကဲ့သို့ ရှားပါးသော ပုဂ္ဂိုလ်များသာလျှင် ဆက်လက် အဆင့်တတ်လှမ်းပြီး ဤလောက၏ အထွတ်အထိပ်စွမ်းအားကို ရှာဖွေကြလိမ့်မည်။

“ မင်းပြောတာ မှန်တယ် ”

နတ်ဘုရားသတ်ဖြတ်ခြင်းရုပ်သေးရုပ်က ပြောသည်။ အဝေးသို့ သူလှမ်းကြည့်လိုက်သည့်အခါ နတ်ဘုရားအလင်းက သူ၏ မျက်လုံးထဲမှာ ပေါ်လျှိုးလာသည်။

“ စကြာဝဠာကပ်ဘေးကို သူအဆုံးသတ်ဖို့ လိုတယ်… ပြီးတော့ အသန်မာဆုံး စွမ်းအားကို သူပိုင်ဆိုင်ထားမှပဲ အရာအားလုံးကို ရင်ဆိုင်ဖြေရှင်းနိုင်လိမ့်မယ် ”

စကြာဝဠာကပ်ဘေး… ။

ဟန်မူယဲ့က နေရာဒေသအသီးသီးတွင် စကြာဝဠာကပ်ဘေးကို အစပျိုးခဲ့ပြီးပြီ ဖြစ်၏။ သို့ဖြစ်၍ စကြာဝဠာကပ်ဘေး ကျရောက်လာရန် အချိန်တစ်ခုသာ လိုအပ်သည်။

သူ၏ ရည်ရွယ်ချက်က စကြာဝဠာကပ်ဘေး ကျရောက်လာသည့်အခါ ယင်းကို ခုခံတားဆီးနိုင်မည့် သူ့ကိုယ်ပိုင်စွမ်းအားကို အချိန်တိုလေးအတွင်း ပိုင်ဆိုင်နိုင်ရန် ဖြစ်၏။

“ ဝေါင်း ”

ဟန်မူယဲ့၏ ဘေးပတ်ပတ်လည်မှ မူလစွမ်းအားက သူ၏ ဘေးပတ်ဝန်းကျင်မှ လေဟာနယ်ထဲမှာ ပြည့်လျှံသွားသည်။

ထိုအဖြစ်အပျက်က အနီးနားဝန်းကျင်မှ မိုးမြေစွမ်းအားကို လှုံ့ဆော်လိုက်သည်။ အဝေးတွင် ကောင်းကင်မိစ္ဆာသားရဲများက သူ့ထံသို့ မြန်ဆန်စွာ ချဉ်းကပ်လာနေကြသည်။

“ ရွှီး ”

နတ်ဘုရားသတ်ဖြတ်ခြင်းရုပ်သေးရုပ်က သူ၏ လက်ထဲမှ ဓားမော့ကို မြှောက်လိုက်ပြီး အောက်သို့ ပိုင်းချလိုက်သည်။

ဓားမော့အလင်းက မိုင်တစ်ရာအဝေးသို့ ပျံသန်းသွားပြီး အပြာရောင် လေဟာနယ်အက်ကွဲကြောင်းတစ်ခုကို ဖွင့်လှစ်လိုက်သည်။

ထို့နောက် ဤနေရာသို့ ချဉ်းကပ်လာနေကြသော ကောင်းကင်မိစ္ဆာသားရဲအားလုံးက သုတ်သင်ခံလိုက်ကြရပြီး ကောင်းကင်ပုတီးစေ့များအဖြစ် ပြောင်းလဲသွားကြသည်။

အဆင့်သုံးနှင့် အဆင့်လေး ကောင်းကင်ပုတီးစေ့များက လေထဲမှာ လွင့်မျောနေကြပြီး ထွန်းလင်းတောက်ပနေသည်။

ကောင်းကင်ယံတွင် ပုံရိပ်တချို့က ထိုကောင်းကင်ပုတီးစေ့များထံသို့ ပျံသန်းသွားနေကြသည်။

“ ဟား ဟား… ပစ္စည်းကောင်းတွေက မြင်တဲ့လူ အပိုင်ပဲ ”

“ မဆိုးဘူး… အဆင့်လေး ကောင်းကင်ပုတီးစေ့တွေကို ဒီမဟာသူတော်စင်ခန်းမက ဝမ်းမြောက်ဝမ်းသာ လက်ခံပေးမယ် ”

“ ဘယ်လောက် ရှားပါးလိုက်လဲ… တစ်ယောက်ယောက်က ဒီလိုနေရာမှာ ကောင်းကင်မိစ္ဆာသားရဲတွေကို အမဲလိုက်နေတယ်… အရင်စည်းမျဉ်းတွေအရ ကောင်းကင်ပုတီးစေ့တွေကို မြင်သွားတဲ့လူတိုင်းက ဝေစုရလိမ့်မယ် ”

အသံအများအပြားက လေထဲမှာ ပဲ့တင်ထပ်သွားသည်နှင့် ပုံသဏ္ဍာန်မတူညီသော ပုံရိပ်တချို့က လေထဲမှာ ထွက်ပေါ်လာကြသည်။

သူတို့ထဲမှ တချို့က လူသားပုံသဏ္ဍာန်ရှိပြီး တချို့က သားရဲပုံသဏ္ဍာန်ရှိသည်။

ထို့ပြင် သူတို့အားလုံးက အလွန်အားကောင်းသော မိစ္ဆာအရှိန်အဝါကို ထုတ်လွှတ်နေကြသည်။

အမှန်တကယ်ပင် ဤနေရာက မိစ္ဆာနယ်မြေ ဖြစ်သည်။

အပြာရောင်ကျောက်စိမ်းပေတံက ဟွင်းသွမ်း၏ လက်ထဲမှာ ထွက်ပေါ်လာသည်နှင့် သူက မျက်လုံးတောက်ပသွားသည်။

“ မေ့ထားလိုက်ပါ ”

နတ်ဘုရားသတ်ဖြတ်ခြင်းရုပ်သေးရုပ်က ရုတ်တရက် ပြောသည်။

ဟွင်းသွမ်းက ရပ်တန့်သွားသည်။ သူက အရှေ့သို့ ခေါင်းမော့လိုက်ပြီး သူ၏ နတ်အာရုံကို ဖြန့်ကြက်လိုက်သည်။ ထို့နောက် သူက ခေါင်းယမ်းလိုက်ပြီး ပေါ့ပါးစွာ ရယ်လိုက်သည်။

ထိုစဉ် ပုံရိပ်တစ်ခုက ဟင်းလင်းပြင်ထဲမှ ခုန်ထွက်လာပြီး ဟွင်းသွမ်းနှင့် နတ်ဘုရားသတ်ဖြတ်ခြင်းရုပ်သေးရုပ်၏ အရှေ့မှာ ရပ်လိုက်သည်။

ထိုသူက ရွှေရောင်စစ်ချပ်ဝတ် ဝတ်ဆင်ထားပြီး သူ၏ လက်ထဲမှာ တုတ်တစ်ချောင်းကို ကိုင်ထားသည်။

တုတ်က ရွှေရောင်ထွန်းလင်းနေပြီး တုတ်၏ မျက်နှာပြင်တစ်လျှောက်မှာ ဝိညာဉ်အစီအရင်များက ပြွတ်သိပ်ယှက်ထွေနေကြသည်။ ယင်းက တန်ဖိုးကြီးရတနာတစ်ခုဖြစ်ကြောင်း မည်သူမဆို တစ်ချက်ကြည့်ရုံဖြင့် ပြောနိုင်သည်။

“ မတွေ့တာကြာပြီ ”

ပုံရိပ်က နတ်ဘုရားသတ်ဖြတ်ခြင်းရုပ်သေးရုပ်နှင့် ဟွင်းသွမ်းကို ကြည့်လိုက်သည့်အခါ ရွှေရောင်အလင်းက သူ၏ မျက်လုံးထဲမှာ ထွက်ပေါ်လာသည်။

“ ဟွင်းသွမ်း… အခုထိ မင်းအသက်ရှင်နေသေးတာ တကယ်မယုံနိုင်စရာပဲ ”

ပုံရိပ်က ပြောသည်။

ယင်းကို ကြားသောအခါ ဟွင်းသွမ်းက ပြုံးလိုက်သည်။

“ မျောက်ကြီး… အတိတ်မှာတုန်းက မင်းဘာကြောင့် ဒြပ်စင်ငါးပါးမီးပြင်းဖိုအောက်မှာ ဖိနှိပ်ခံခဲ့ရလဲဆိုတာ မေ့သွားပြီလား ”

“ အဲ့ဒါ မင်းရဲ့ ပါးစပ်ဆိုးကြောင့်ပဲ ”

ပုံရိပ်က မတ်တတ်ရပ်နေလျက် ဆက်ရှိနေသော်လည်း သူ့အနောက်မှ မိစ္ဆာများက အရှေ့သို့ ပြေးသွားကြသည်။

ဓားမော့ရှည်တစ်လက်က ဟွင်းသွမ်း၏ ဦးခေါင်းထံသို့ ကျဆင်းလာသည်။

“ မင်းက ငါတို့အကိုကြီးကို ဘယ်လိုတောင် စော်ကားရဲတာလဲ ”

“ သေချင်နေတာလဲ… မင်းက ဘယ်လောက် အစွမ်းအစရှိလို့လဲ ”

ဓားမော့အလင်းက ဝင်းလက်သွားပြီး အင်မော်တယ်ဘုရင်နှင့် နီးကပ်နေသော တိုက်ပွဲစွမ်းအားက ပေါ်လျှိုးလာသည်။

အကယ်၍ သာမန်လက်ရွေးစင်တစ်ယောက်က ထိုသို့ဓားချက်ဖြင့် ရင်ဆိုင်ရမည်ဆိုလျှင် သူတို့၏ ခုခံကာကွယ်မှုက ချက်ချင်း ကျိုးပျက်သွားပြီး အသက်သေဆုံးသွားလိမ့်မည်။

သို့သော်လည်း သူ့အရှေ့မှာ ရပ်နေသည့်သူက ကမ္ဘာဦးအဆင့် စစ်ပွဲရုပ်သေးရုပ်ဖြစ်သည်။ ထို့ပြင် သူ့ကို ဟန်မူယဲ့က အထူးသန့်စင်ပေးခဲ့ခြင်း ဖြစ်သည်။

ဟွင်းသွမ်း၏ ဝိညာဉ်စွမ်းအားနှင့် ဤသို့စစ်ပွဲရုပ်သေးရုပ်ကြောင့် သူ့အရှေ့မှ အင်မော်တယ်အရှင်သခင်အဆင့် မိစ္ဆာတစ်ကောင်ကို မဆိုထားနှင့် ထိပ်တန်းအင်မော်တယ်ဘုရင်တစ်ပါးကိုပင် သူကြောက်လိမ့်မည် မဟုတ်ချေ။

“ ထွက်သွားစမ်း ”

ဟွင်းသွမ်းက တိုးညင်းစွာ အော်လိုက်ပြီး လက်သီးတစ်လုံး ထိုးလွှတ်လိုက်သည်။

ထိုလက်သီးက သူ့ထံသို့ ဝင်ရောက်လာသော ဓားမော့အလင်းကို အပိုင်းပိုင်းအစစ ဖျက်ဆီးပစ်လိုက်သည်။

အရှေ့ဆုံးမှ မိစ္ဆာက လက်မြှောက်လိုက်ပြီး သူ၏ ဘေးပတ်ဝန်းကျင်မှ မိုးမြေကို အကျဉ်းချလိုက်သည်။

“ ရေမှင်စာ… မင်းဘာလို့ ဒီမိစ္ဆာငယ်လေးတွေနဲ့ ပူးပေါင်းနေတာလဲ ”

ဟွင်းသွမ်းက သူ၏ အရှေ့မှ ပုံရိပ်ကို ကြည့်လိုက်ပြီး အထင်သေးရှုံ့ချစွာ ပြောသည်။

ရေမှင်စာ… ။

၎င်းက နတ်ဘုရားသတ်ဖြတ်ခြင်းရုပ်သေးရုပ်၏ မူလခန္ဓာကိုယ် ဖြစ်သည်။

နတ်ဘုရားသတ်ဖြတ်ခြင်းရုပ်သေးရုပ်က ရေမှင်စာ ချန်ထားခဲ့သော အကြွင်းအကျန်ဝိညာဉ်မျှသာ ဖြစ်သည်။

မှန်ပေ၏။ ယခု နတ်ဘုရားသတ်ဖြတ်ခြင်းရုပ်သေးရုပ်က စကြာဝဠာအဆင့် တိုက်ပွဲစွမ်းအားကို ပိုင်ဆိုင်ထားသည်။ သူ၏ တိုက်ပွဲလက်နက်ဖြစ်စေ၊ စစ်ပွဲရုပ်သေးရုပ်၏ အမြူတေဖြစ်စေ သို့မဟုတ် အပြင်ဘက်စစ်ချပ်ဝတ်ဖြစ်စေ ယင်းတို့အားလုံးက စကြာဝဠာအဆင့်မှာ ဖြစ်ကြသည်။

မိစ္ဆာငယ်လေးများဟု ခေါ်ခံလိုက်ရသောအခါ ရေမှင်စာ၏ လက်အောက်မှ မိစ္ဆာများက ဒေါသထွက်သွားကြသည်။

သို့သော်လည်း ရေမှင်စာက လက်ဝှေ့ယမ်းလိုက်ပြီး နတ်ဘုရားသတ်ဖြတ်ခြင်းရုပ်သေးရုပ်ကို ကြည့်လိုက်သည်။

“ ငါတကယ် မမျှော်လင့်ထားဘူး… ဒီလောက်နှစ်တွေ ကြာပြီးတဲ့နောက်မှာ မင်းက ဒီအဆင့်ထိ ကြီးထွားလာခဲ့ပြီ ”

စိတ်ခံစားမှုတချို့က ရေမှင်စာ၏ မျက်နှာပေါ်မှာ ထွက်ပေါ်လာသည်။

နတ်ဘုရားသတ်ဖြတ်ခြင်းရုပ်သေးရုပ်က ခေါင်းညိတ်လိုက်ပြီး အရှေ့သို့ ခြေတစ်လှမ်း လှမ်းလိုက်သည်။

“ ဘန်း ”

တိုက်ပွဲစိတ်ဆန္ဒက တစ်ဟုန်ထိုး မြှောက်တတ်သွားပြီး အချင်းမိုင်တစ်ထောင်အတွင်း၌ ဝိညာဉ်အလင်း ထွန်းလင်းသွားသည်။

အနီရောင်လေကြမ်းက တိုက်ခတ်လာသည့်အခါ ကောင်းကင်က သွေးနီရောင်စွန်းထင်သွားသည်။

“ ဘန်း ”

နတ်ဘုရားသတ်ဖြတ်ခြင်းရုပ်သေးရုပ်က တုံ့ဆိုင်းမနေဘဲ လက်သီးတစ်လုံး ပစ်လွှတ်လိုက်သည်။

ရေမှင်စာက လက်မြှောက်လိုက်ပြီး သူ့ထံသို့ ဦးတည်လာနေသော လက်သီးကို လက်ဝါးဖြင့် တွန်းထုတ်လိုက်သည်။

“ ဗုန်း ”

ရေမှင်စာ၏ ခန္ဓာကိုယ်က အဝေးသို့ လွင့်စင်သွားသည်။

ထိုလက်သီးချက်ထဲမှာ ကိန်းဝပ်နေသော စွမ်းအားက ရေမှင်စာ၏ တိုက်ပွဲစွမ်းအားထက် အဆပေါင်းများစွာ ပိုပြီးသန်မာသည်။

အကယ်၍ နတ်ဘုရားသတ်ဖြတ်ခြင်းရုပ်သေးရုပ်သာ ရေမှင်စာကို သတ်ဖြတ်ရန် ဆန္ဒရှိသည်ဆိုလျှင် ထိုလက်သီးတစ်ချက်က လုံလောက်ပေသည်။

ရေမှင်စာက ပေတစ်ထောင်အဝေးသို့ လွင့်စင်သွားပြီး သွေးအန်လိုက်ရသည်။ စိတ်ပျက်သော အမူအရာက သူ၏ မျက်နှာပေါ်မှာ ထွက်ပေါ်လာသည်။

“ အကိုကြီး ”

“ ငါတို့ သူ့ကို အတူဝိုင်းတိုက်ရအောင် ”

“ အကိုကြီး ဒီကနေ ထွက်သွားနိုင်အောင် ငါတို့ ကာကွယ်ပေးမယ် ”

မဟာမိစ္ဆာအားလုံးက အော်ပြောလိုက်ကြသည်။ မိစ္ဆာတချို့က ရေမှင်စာဆီသို့ ပျံသန်းသွားကြပြီး တချို့က နတ်ဘုရားသတ်ဖြတ်ခြင်းရုပ်သေးရုပ်ဆီသို့ ပျံသန်းသွားကြသည်။