ကျုပ်က ခင်ဗျား ဖယ်ရှားချင်တဲ့ ရှနိုင်ငံတော်က ဧကရာဇ်ပဲ
Vol. 61 Ch. 907
လုချန်း၏ စကားကို ကြားပြီးနောက်
မုန်ထျန်း ခဏခန့် စဉ်းစားတွေးတောသွား၏။ သူတို့သာ ဆွမ်ဧကရာဇ်ကို လင်ဟူဂိုဏ်းဘက်သို့ သစ္စာခံလာအောင် အမှန်တကယ် စည်းရုံးနိုင်မည်ဆိုလျှင် သူတို့၏ ပြဿနာအားလုံး ဖြေရှင်းပြီး ဖြစ်သွားပေမည်။
သို့သော် အဓိက ပြဿနာမှာ ဆွမ်ဧကရာဇ်သည် ထျန်းချန်တိုက်ကြီးတစ်ခုလုံးကို ယခုလေးတင် ပေါင်းစည်းခဲ့ပြီး ကြီးမြတ်သော ဧကရာဇ်တစ်ပါး ဖြစ်လာခဲ့ခြင်း ဖြစ်သည်။ သူ့ကို လင်ဟူဂိုဏ်းဘက်သို့ သစ္စာခံပြီး ရုပ်သေးတစ်ရုပ် ဖြစ်လာရန် မည်သို့ မျှော်လင့်နိုင်မည်နည်း။ ဤသို့ ဂုဏ်သိက္ခာကျဆင်းစေသော အဆိုပြုချက်ကို သူ သဘောတူလိမ့်မည်ဟု မည်သို့မှ မယူဆနိုင်ပေ။
ထို့ပြင် နောက်ထပ် ပြဿနာတစ်ခုလည်း ရှိသေးသည်။ ဆွမ်ဧကရာဇ်က လင်ဟူဂိုဏ်းဘက်သို့ သစ္စာဖောက်ခဲ့လျှင်ပင် ယင်းသည် အမှန်တကယ် သစ္စာဖောက်ခြင်း ဟုတ်ချင်မှ ဟုတ်နိုင်မည်။
ဆွမ်ဧကရာဇ်သည် သစ္စာဖောက်ချင်ယောင်ဆောင်ကာ မြူခိုးဒေသမှ အခြားအင်အားစုများနှင့် လျှို့ဝှက်ပူးပေါင်း၍ လင်ဟူဂိုဏ်းကို တန်ပြန်တိုက်ခိုက်ဖို့ အလွန် ဖြစ်နိုင်ခြေရှိသည်။
ထို့ကြောင့် အကောင်းဆုံး နည်းလမ်းမှာ ဆွမ်ဧကရာဇ်ကို ဖယ်ရှားပြီးနောက် လင်ဟူဂိုဏ်းက နန်းတက်ရန် ထောက်ပံ့ပေးနိုင်မည့် ရုပ်သေးရုပ် ဧကရာဇ်တစ်ပါးကို ရွေးချယ်ခြင်းပင် ဖြစ်သည်။ သူတို့ကိုယ်တိုင် တင်မြှောက်ထားသော ရုပ်သေးရုပ်သည် ဆွမ်ဧကရာဇ်ကဲ့သို့ မြူခိုးဒေသရှိ အခြားအင်အားစုများနှင့် ပူးပေါင်းကြံစည်ရန် လွယ်ကူလိမ့်မည် မဟုတ်ပေ။
မုန်ထျန်း၏ စကားကို ကြားသောအခါ လုချန်း စိတ်ထဲမှ တွေးလိုက်သည်။ မြူခိုးဒေသမှ ကျင့်စဉ်ကျင့်သူများသည် လွယ်လွယ်ဖြင့် လိမ်လို့ရမည့်သူများ ဟုတ်ပုံမရပေ။
ထို့နောက် လုချန်းက
“ခင်ဗျားတို့ တစ်ခေါက်လောက် ကြိုးစားကြည့်လို့ ရနိုင်ပါတယ်။”
ဤအချိန်တွင် မုန်ထျန်းက လုချန်းကို တစ်ချက်အကဲခတ်လိုက်ပြီး
“ကျုပ် နည်းနည်းတော့ စပ်စုချင်တယ်။ ကောလာဟလတွေအရ ခင်ဗျားနဲ့ ဆွမ်ဧကရာဇ်က သဘောထားကွဲလွဲနေကြတယ်ဆို။ ဘယ်လိုဖြစ်လို့ အခု ခင်ဗျားက ဆွမ်ဧကရာဇ်ဘက်ကနေ ကာကွယ်ပြောဆိုနေရတာလဲ။”
လုချန်းက အေးဆေးစွာ ပြန်ဖြေပေးလိုက်သည်။
“ကျုပ် ဆွမ်ဧကရာဇ်နဲ့ သဘောထားကွဲလွဲခဲ့တာ မှန်ပါတယ်။ ဒါပေမဲ့ အသက်သေဆုံးတဲ့အထိ ဖြစ်ရမယ့် အခြေအနေတော့ မရောက်သေးပါဘူး။ နောက်ပြီး ဆွမ်ဧကရာဇ်သာ သေသွားရင် ဒီကမ္ဘာကြီးက နောက်တစ်ကြိမ် ဖရိုဖရဲ ဖြစ်သွားနိုင်တယ်။”
ထိုစကားကို ကြားသောအခါ မုန်ထျန်း နှာခေါင်းရှုံ့ကာ ရယ်မောလိုက်ပြီး
“လင်ဟူဂိုဏ်း ရှိနေမှတော့ ဆွမ်ဧကရာဇ် မရှိရင်တောင် ကျုပ်တို့က ဒီကမ္ဘာကြီးရဲ့ စည်းလုံးညီညွတ်မှုကို ထိန်းသိမ်းထားနိုင်တယ်။ ခင်ဗျား အဲဒါအတွက် စိတ်ပူစရာမလိုဘူး။”
လုချန်းက စကားစလိုက်သည်။
“အခု ကျုပ်ကလင်ဟူဂိုဏ်းကို ဝင်ပြီးပြီဆိုတော့ ဂိုဏ်းနဲ့ပတ်သက်ပြီး မေးခွန်းတချို့ ရှိပါတယ်။ ကျုပ်သိချင်တာတချို့ ပြောပြပေးလို့ရမလား။”
မုန်ထျန်း၏ မျက်ခုံးများ တွန့်သွား၏။ သူစိတ်မရှည်ဖြစ်နေကြောင်း ထင်ရှားသည်။
“ဘာမေးခွန်းတွေလဲ။”
လုချန်းက
“လင်ဟူဂိုဏ်းက မြူခိုးဒေသထဲမှာ အင်အားအဆင့် ဘယ်လောက်မှာ ရှိလဲဆိုတာ သိချင်ပါတယ်။”
ထိုမေးခွန်းကို ကြားသောအခါ မုန်ထျန်းက ချက်ချင်း မဖြေပဲ လုချန်းကို လျင်မြန်စွာ တစ်ချက်ကြည့်လိုက်သည်။ ခဏအကြာတွင် မုန်ထျန်းက နောက်ဆုံး၌
“ကြည့်ရတာ ခင်ဗျားရဲ့ လင်ဟူဂိုဏ်းကို ဝင်ဖို့ ဆုံးဖြတ်ချက်က သိပ်မခိုင်မာသေးဘူးထင်တယ်။”
လုချန်းက တည်ငြိမ်စွာဖြင့်
“ကျုပ်က လင်ဟူဂိုဏ်းကို ဝင်ပြီးပြီဆိုမှတော့ ကိုယ်ဝင်တဲ့ အဖွဲ့အစည်းရဲ့ အင်အားကို သိသင့်တာပေါ့။”
မုန်ထျန်းက
“စိတ်ချပါ။ လင်ဟူဂိုဏ်းက မြူခိုးဒေသရဲ့ အင်အားအကြီးဆုံး ထိပ်သီးသုံးဖွဲ့ထဲမှာ ပါဝင်တယ်။ မြူခိုးမှော်ဂိုဏ်းနဲ့ တန်ခိုးရှင် တစ်သောင်းဂိုဏ်းကလွဲပြီး တခြားဘယ်အဖွဲ့အစည်းမှ လင်ဟူဂိုဏ်းကို ရန်စရဲမှာ မဟုတ်ဘူး။”
မုန်ထျန်းက ဆက်လက်၍
“မြူခိုးမှော်ဂိုဏ်းနဲ့ တန်ခိုးရှင် တစ်သောင်းဂိုဏ်းက အပေါ်ယံမှာ လင်ဟူဂိုဏ်းထက် အင်အားကြီးတယ်ဆိုပေမဲ့ ကျုပ်တို့မှာရှိတဲ့ကောင်းကင်လူသား စွမ်းအားရှင် အရေအတွက်က အဲ့ဒီဂိုဏ်းနှစ်ခုလုံးထက် ပိုများတယ်။ တကယ်လို့ တိုက်ပွဲဖြစ်လာရင် အဲဒီဂိုဏ်းနှစ်ခုက ကျုပ်တို့ လင်ဟူဂိုဏ်းရဲ့ ပြိုင်ဘက်ဖြစ်ချင်မှ ဖြစ်မှာ။”
ထိုသို့ကြားရသောအခါ လုချန်း စိတ်အေးသွား၏။ လင်ဟူဂိုဏ်းသည် သူ၏ ကိုယ်ပိုင် တန်ခိုးရှင် တစ်သောင်းဂိုဏ်းလောက် အင်အားမကြီးပေ။ ထိုအချက်က ပြဿနာမရှိဟု ဆိုလိုသည်။
ထို့နောက်တွင် လုချန်းက ဆက်မေးလိုက်၏။
“လင်ဟူဂိုဏ်းမှာ ယင်ယန်နယ်ပယ်က အင်အားကြီး စွမ်းအားရှင်တွေ ရှိလား။”
မုန်ထျန်းက တုံ့ဆိုင်းခြင်းမရှိပဲ
“ရှိတာပေါ့။ ယင်ယန်နယ်ပယ်က အင်အားကြီး ပညာရှင်တွေ မရှိပဲနဲ့ ကျုပ်တို့က မြူခိုးမှော်ဂိုဏ်းနဲ့ တန်ခိုးရှင် တစ်သောင်းဂိုဏ်းကို ဘယ်လိုလုပ် ရင်ဆိုင်ရပ်တည်နိုင်မှာလဲ။”
“နေဦး…”
မုန်ထျန်းသည် ရုတ်တရက် တစ်စုံတစ်ခုကို သဘောပေါက်သွားသည်။ သူက လုချန်းကို သတိကြီးစွာဖြင့် ချက်ချင်း ကြည့်လိုက်ပြီးနောက်
“ခင်ဗျားက ယင်ယန်နယ်ပယ်အကြောင်းကို ဘယ်လိုလုပ် သိနေရတာလဲ။”
စောစောက ဤအဘိုးအိုသည် မူလအစကမ္ဘာ နယ်ပယ်အကြောင်းကိုပင် မသိခဲ့သဖြင့် မုန်ထျန်းကိုယ်တိုင်က သူ့အား အသိပေးခဲ့ရခြင်း ဖြစ်သည်။ မူလအစကမ္ဘာ၏ နယ်ပယ်အထက်တွင် ယင်ယန်နယ်ပယ်ရှိကြောင်းကို သူ လုံးဝ မပြောခဲ့ပေ။ ထိုသို့ဆိုလျှင် “ယင်ယန်နယ်ပယ်” ဟူသော စကားလုံးက ဤအဘိုးအို၏ ပါးစပ်မှ မည်သို့ ထွက်လာနိုင်မည်နည်း။
မုန်ထျန်း စကားဆုံးသည်နှင့် လင်ဟူဂိုဏ်းမှ အခြားတပည့်များလည်း သတိဝင်သွားကြပြီး လုချန်းကို အချိန်မရွေး အရေးယူရန် အသင့်အနေအထားဖြင့် စိုက်ကြည့်နေကြသည်။
လုချန်းက ပေါ့ပေါ့ပါးပါးပင်
“ကျုပ်က ဒီကမ္ဘာကနေ တစ်ခါမှ မထွက်ဖူးပေမဲ့ ကျင့်စဉ်လောကအကြောင်း နည်းနည်းပါးပါးတော့ သိပါတယ်။”
မုန်ထျန်းက
“မဖြစ်နိုင်ဘူး။ ခင်ဗျားက မြူခိုးဒေသက တခြားအဖွဲ့အစည်းတွေနဲ့ အဆက်အသွယ် လုပ်ခဲ့တာ ဖြစ်ရမယ်။ အဘိုးကြီး။ ပွင့်ပွင့်လင်းလင်း ပြောစမ်း။ ခင်ဗျား အဆက်အသွယ်လုပ်ခဲ့တဲ့ အဖွဲ့အစည်းနာမည်က ဘာလဲ။”
သူတို့ လင်ဟူဂိုဏ်း အာကာသအက်ကွဲကြောင်းမှတစ်ဆင့် ဤကမ္ဘာသို့ လာရောက်နိုင်လျှင် အခြားဂိုဏ်းများ သို့မဟုတ် အဖွဲ့အစည်းများလည်း သူတို့မတိုင်မီ အာကာသအက်ကွဲကြောင်းများမှတစ်ဆင့် ဤကမ္ဘာသို့ မလာနိုင်စရာ အကြောင်းမရှိဟု မုန်ထျန်း တွေးလိုက်သည်။
တစ်ခြားသော အင်အားစုများသည် မြူခိုးဒေသမှ အာကာသအက်ကွဲကြောင်းများကို ဖြတ်ကျော်ပြီး ဤကမ္ဘာသို့ ရောက်ရှိနေလောက်ပြီ ဖြစ်နိုင်ပြီး သူတို့ထက်ပင် ရှေ့ရောက်နေနိုင်သေးသည်။
ဒါက သူတို့အတွက် သတင်းကောင်း မဟုတ်ပေ။
မုန်ထျန်းနှင့် အခြားသူများ သတိကြီးနေသည်ကို မြင်သောအခါ ဆက်လက်၍ ဝေ့လည်ကြောင်ပတ် ပြောနေရန် မလိုအပ်တော့ဟု လုချန်း ခံစားလိုက်ရသည်။ သူ၏ အမြင်တွင် လင်ဟူဂိုဏ်းသည် တန်ခိုးရှင် တစ်သောင်းဂိုဏ်းထက်ပင် နိမ့်ကျပြီး အရေးမပါပေ။ ထို့ကြောင့် ကြောက်ရွံ့စရာ အကြောင်းမရှိပါ။
လုချန်း အခု အစိုးရိမ်ဆုံးမှာ မြူခိုးမှော်ဂိုဏ်း ဖြစ်သည်။ တန်ခိုးရှင် တစ်သောင်းဂိုဏ်းနှင့် မြူခိုးမှော်ဂိုဏ်းတို့၏ အင်အားသည် အတူတူလောက် ဖြစ်သင့်ပြီး အရေးယူရမည့် အချိန်ရောက်လာသည့်အခါ မည်သည့်ဂိုဏ်းက အောင်ပွဲခံနိုင်ခြေ ပိုများမည်မှန်း မသေချာပေ။
ဤအချိန်တွင် လုချန်း ကျောက်ခုံမှ ထရပ်လိုက်သည်။ လုချန်း မတ်တပ်ထရပ်သည်ကို မြင်သောအခါ မုန်ထျန်းနှင့် အခြားသူများလည်း တိုက်ခိုက်ရန် အသင့်အနေအထားဖြင့် ခြေလှမ်းအနည်းငယ် နောက်ဆုတ်လိုက်ကြသည်။
ထို့နောက် လုချန်းက သူ၏ ရုပ်သွင်ကို ပြောင်းလဲရန် ယင်ယန်မှန်ကို အသုံးပြုလိုက်ရာ မျက်စိတစ်မှိတ်အတွင်း သူ၏
မူလရုပ်သွင်သို့ ပြန်လည်ရောက်ရှိသွားသည်။
သူတို့နှင့် စကားပြောခဲ့သူမှာ လူငယ်တစ်ဦးဖြစ်ပြီး ရုပ်ဖျက်အတတ်ပညာကို အသုံးပြုခဲ့ကြောင်း မြင်သောအခါ မုန်ထျန်းတို့ အုပ်စုလည်း သူတို့ အလိမ်ခံလိုက်ရကြောင်း ချက်ချင်း သဘောပေါက်သွားကြသည်။ သူတို့ရှေ့မှ လူသည် မုဟုန်ကွမ်း မဟုတ်ပေ။
မုန်ထျန်းက မျက်မှောင်ကြုတ်ကာ
“မင်း ဘယ်သူလဲ။ ဘာလို့ မုဟုန်ကွမ်းအဖြစ် ဟန်ဆောင်ရတာလဲ။”
လုချန်းက ပြုံးလျက်
“ကိုယ့်ကိုယ်ကိုယ် မိတ်ဆက်ခွင့်ပြုပါ။ ကျွန်တော်ကခင်ဗျားတို့အားလုံး ဖယ်ရှားဖို့ စိတ်အားထက်သန်နေတဲ့ ရှနိုင်ငံတော်က ဧကရာဇ်ပဲ။”
ထိုစကားကို ကြားသောအခါ မုန်ထျန်းနှင့် အခြားသူများလည်း သူတို့၏ ဓားများကို အလိုအလျောက် ဆုပ်ကိုင်လိုက်ကြသည်။
ရှနိုင်ငံတော် ဧကရာဇ် ဟုတ်လား...
ဒီလူက တကယ်ပဲ ရှနိုင်ငံတော် ဧကရာဇ်တဲ့လား။
ရှနိုင်ငံတော် ဧကရာဇ်က ယင်ယန်နယ်ပယ်အကြောင်းကိုတောင် သိနေသည်။ သူသည် သာမန်လူတစ်ယောက် မဟုတ်ပေ။
ချက်ချင်းပင် မကောင်းသော ခံစားချက်တစ်ခုကို မုန်ထျန်း ရရှိလိုက်သည်။ ဤဆွမ်ဧကရာဇ်သည် အခြားအင်အားစုများက ထောက်ပံ့ထားသော ရုပ်သေးရုပ် ဧကရာဇ်တစ်ပါး ဖြစ်နိုင်သည်ဟု သူ သံသယဝင်သွားသည်။
မဟုတ်လျှင် အောက်ကမ္ဘာတစ်ခု၌ တိုက်ကြီးတစ်ခုလုံးကို ပေါင်းစည်းရုံသာမက ကောင်းကင်လူသား စွမ်းအားရှင်အားလုံးကို သူ၏ရှေ့မှောက်တွင် ဦးညွှတ်စေခဲ့သော ဤမျှ အင်အားကြီးမားသည့် ဧကရာဇ်တစ်ပါး မည်သို့ ပေါ်ပေါက်လာနိုင်မည်နည်း။
ထို့နောက် မုန်ထျန်း
“ကျုပ်တို့ထက်တောင် စောပြီး ဒီကမ္ဘာထဲကို စိမ့်ဝင်ခဲ့တဲ့ အင်အားစုတွေ ရှိနေလိမ့်မယ်လို့ တကယ်ပဲ မထင်ထားခဲ့ဘူး။”
“ခင်ဗျား ဘယ်ဂိုဏ်းကလဲ။”
လုချန်းလည်း ဆက်လက်၍ ဟန်မဆောင်တော့ပဲ တိုက်ရိုက်ဖြေပေးလိုက်သည်။
“တန်ခိုးရှင် တစ်သောင်းဂိုဏ်း။”
မုန်ထျန်းက
“ထင်တဲ့အတိုင်းပဲ”။
ဤကမ္ဘာမှ လူတစ်ယောက်က မူလအစကမ္ဘာအထက်မှ ယင်ယန် နယ်ပယ်အကြောင်းကို မည်သို့ သိနိုင်မည်နည်းဟု သူ အံ့ဩနေခဲ့ခြင်း ဖြစ်သည်။ တကယ်တမ်းတော့ ဤလူက တန်ခိုးရှင် တစ်သောင်းဂိုဏ်းမှ ဖြစ်နေသည်။
သူ တန်ခိုးရှင် တစ်သောင်းဂိုဏ်းမှ ဖြစ်ပါက ဆက်ပြောစရာ မရှိတော့ပေ။ လင်ဟူဂိုဏ်းက ရှနိုင်ငံတော်ကို ထိန်းချုပ်နိုင်ရန်အတွက် သူတို့ ဤလူကို သတ်ပစ်ရန် လိုအပ်သည်။
ထိုသို့တွေးမိပြီး မုန်ထျန်းက ရယ်မောကာ
“ဒီလောက်ကြီးတဲ့ ငါးကြီးတစ်ကောင်ကို ဖမ်းမိလိမ့်မယ်လို့ တကယ်ပဲ မထင်ထားခဲ့ဘူး။”
သူတို့သာ တန်ခိုးရှင် တစ်သောင်းဂိုဏ်းမှ တပည့်ဖြစ်သော ဆွမ်ဧကရာဇ်ကို ဖယ်ရှားပြီး ရှနိုင်ငံတော်ကို သူတို့ထံမှ လုယူနိုင်မည်ဆိုလျှင် လင်ဟူဂိုဏ်းသို့ ပြန်ရောက်သည့်အခါ သူတို့အတွက် ဆုလာဘ်များ ရရှိကြမည်မှာ သေချာသည်။
တန်ခိုးရှင် တစ်သောင်းဂိုဏ်း၏ အင်အားသည် လင်ဟူဂိုဏ်းထက် ကြီးမားသော်လည်း လင်ဟူဂိုဏ်းက သူတို့ကို မကြောက်ပေ။ သူတို့သည် အစဉ်အမြဲ ပြိုင်ဘက်များ ဖြစ်ခဲ့ကြသည်။
လုချန်းက ပေါ့ပေါ့ဆဆ မှတ်ချက်တစ်ခုပြုလိုက်သည်။
“အိုး။ ခင်ဗျားက အဲဒီလောက် ယုံကြည်မှု ရှိနေတာလား။”
မုန်ထျန်းက မဲ့ပြုံးဖြင့် ပြန်ဖြေလိုက်သည်။
“ခင်ဗျား ဒီကမ္ဘာမှာ ရောက်နေတာ တော်တော်ကြာပြီလို့ ကျုပ်ယူဆတယ်။ ဒီမှာက စိတ်ဝိညာဉ် စွမ်းအားက ရှားပါးတယ်။ ခင်ဗျား အခု ကောင်းကင်လူသား စွမ်းအားရှင်တစ်ယောက် ဖြစ်နေရင်တောင် ကောင်းကင်လူသား စွမ်းအားရှင်တစ်ယောက်ရဲ့ အင်အားအပြည့်အဝကို ထုတ်သုံးနိုင်မှာ မဟုတ်ဘူး။”
သူ စကားဆုံးသည်နှင့် မုန်ထျန်းက ကျယ်လောင်စွာ အော်ဟစ်လိုက်သည်။
“ပုံစံဖွဲ့။”