ကမ္ဘာငယ် ချင်းယွင်ရှိ အင်အားစု အသီးသီး၊ စုရှင်း၏ လျှို့ဝှက်ချက် ဖော်ထုတ်ခံတော့မည်လော။

စုရှင်းသည် သရုပ်ပြခြင်း ဖန်သားပြင်ကို မျက်တောင်မခတ်ဘဲ စိုက်ကြည့်ရင်း စဉ်းစားလိုက်သည်။

[သင်သည် သင့်ရှေ့မှ ကျင့်ကြံသူ ဒါဇင်ချီကို ကြည့်ကာ ပြုံးလျက် လျှောက်သွားလိုက်သည်။]

[နောက်တစ်စက္ကန့်တွင် သင်သည် ဝိညာဉ်ပေါက်ကွဲခြင်း နည်းစနစ်ကို ထုတ်သုံးပြီး နတ်ဘုရားအသွင်ပြောင်း ကျင့်ကြံသူ ဒါဇင်ချီကို ဖျက်ဆီးလိုက်သည်။]

[သင့်၏ ရုတ်တရက် တိုက်ခိုက်မှုကို မြင်သောအခါ အကျဉ်းထောင်မှ ပါရမီရှင်သည် အကြီးအကျယ် တုန်လှုပ်သွားပြီး နည်းစနစ်ကို သုံး၍ ထွက်ပြေးရန် ကြိုးစားသည်။]

[သို့သော် သာမန် လွတ်မြောက်ခြင်း ပြန်လည်ရောက်ရှိအဆင့် ကျင့်ကြံသူ တစ်ဦးသည် သင့်အား မည်ကဲ့သို့ ယှဉ်နိုင်မည်နည်း။ သင်သည် သူ၏ ကျင့်ကြံမှုအဆင့် တစ်ခုလုံးကို ဖျက်ဆီးပစ်လိုက်သည်။]

[ထို့နောက်တွင် သင်သည် ဝိညာဉ်ကို ရှာဖွေခြင်း နည်းစနစ်ကို သူ့အပေါ် အသုံးပြုလိုက်သည်။]

လက်တွေ့ကမ္ဘာတွင် စုရှင်းသည် ဤအရာကို မြင်သောအခါ ခပ်ဖွဖွ ခေါင်းညိတ်လိုက်သည်။

“မြှုပ်နှံသရုပ်ပြခြင်း လုပ်ဆောင်ချက်... တစ်နာရီကြာအောင် အသုံးပြုမယ်။”

[ဒင်၊ သင်သည် မြှုပ်နှံသရုပ်ပြခြင်းကို အောင်မြင်စွာ အသုံးပြုလိုက်သည်... ကျန်ရှိနေသော စွမ်းအင်မှာ ၁.၃၀၈ ဘီလီယံမှတ် ဖြစ်သည်။]

နောက်တစ်စက္ကန့် အကြာတွင် စုရှင်းသည် သရုပ်ပြခြင်း နေရာ၌ ပေါ်လာသည်။ သူသည် မျက်နှာချွန်၍ ပါးချောင်နားချောင်ကျသော ကျင့်ကြံသူတစ်ဦးကို ကိုင်ထားသည်။

မဆိုင်းမတွပင် စုရှင်းသည် ဝိညာဉ် ရှာဖွေခြင်း နည်းစနစ်ကို အသုံးပြုလိုက်သည်။

…

မကြာမီပင် မြှုပ်နှံသရုပ်ပြခြင်းအချိန် ကုန်ဆုံးသွားပြီး စုရှင်းသည် လက်တွေ့ကမ္ဘာသို့ ပြန်ရောက်လာသည်။

မျက်လုံးများ ပြန်ဖွင့်လိုက်သောအခါ စုရှင်း၏ မျက်လုံးများတွင် အံ့သြမှု အရိပ်အယောင်တစ်ခု လင်းလက်သွားသည်။

“ဒီလိုကိုး၊ ကမ္ဘာငယ်ချင်းယွင်က... တကယ်တော့ ဒီလိုနေရာမျိုးလား”

စုရှင်းသည် အနည်းငယ် အံ့အားသင့်သွားသည်။ ထိုပါရမီရှင်၏ စိတ်ထဲမှ ရရှိသော အချက်အလက်များက မများလှသော်လည်း ကမ္ဘာငယ် ချင်းယွင်အတွင်းရှိ အင်အားစုများ၏ အုပ်စုခွဲခြားမှုများကို စုရှင်း နားလည်သွားသည်။

စုရှင်း၏ မူလအတွေးများနှင့် ဆန့်ကျင်ဘက်ဖြစ်စွာ ကမ္ဘာငယ်ချင်းယွင်သည် ချင်းယွင်ဂိုဏ်း၏ အာဏာပိုင်အောက်တွင် လုံးဝမရှိတော့ပေ။

တစ်နည်းအားဖြင့် ကမ္ဘာငယ် ချင်းယွင်သည် တစ်ချိန်က ချင်းယွင်ဂိုဏ်း၏ သြဇာအာဏာအောက်တွင်ရှိပြီး ကမ္ဘာတစ်ထောင်၏ သေးငယ်သော အစိတ်အပိုင်းတစ်ခု ဖြစ်ခဲ့သည်။

သို့သော် တိုင်းတစ်ပါး လူမျိုးများနှင့် လူသားမျိုးနွယ်တို့ကြားရှိ နှစ်ပေါင်းထောင်ချီကြာသည့် အဆက်မပြတ် တိုက်ခိုက်မှုများကြောင့် တိုင်းတစ်ပါး လူမျိုးများ သိမ်းပိုက်ထားသော ကမ္ဘာအရေအတွက်မှာ တိုးလာခဲ့သည်။ ကမ္ဘာငယ် ချင်းယွင်သည်လည်း ထိခိုက်ပျက်စီးမှုကို ခံစားခဲ့ရသည်။

ထို့ကြောင့် ချင်းယွင်ဂိုဏ်းသည် ကမ္ဘာငယ် ချင်းယွင်အတွင်းရှိ ၎င်းတို့၏ သြဇာအာဏာ အများစုကို စွန့်လွှတ်ခဲ့ရသည်။

လက်ရှိအချိန်တွင် ကမ္ဘာငယ် ချင်းယွင်သည် အင်အားစုများစွာက တိုက်ခိုက်ယှဉ်ပြိုင်နေသည့် ရှုပ်ထွေးသော နေရာတစ်ခုဖြစ်သည်။

ပို၍ကြီးမားသော အင်အားစုများထဲတွင် ကောင်းကင်နတ်ဆိုး အကျဉ်းထောင်၊ ချင်းယွင်ဂိုဏ်း၊ ကောင်းကင်လျှို့ဝှက်ချက် နတ်စံအိမ်၊ အဖြူရောင် ဧကရာဇ်မျှော်စင်... နှင့် ဆင်းသက်ဂိုဏ်းတို့ ပါဝင်သည်။

ကမ္ဘာငယ်ချင်းယွင်၏ အပြင်ဘက်တွင်မူ တိုင်းတစ်ပါး လူမျိုးများနှင့် နတ်ဆိုးသားရဲများ၏ ကျူးကျော်မှုသည် ပို၍ပြင်းထန်လာပြီး ခုခံကာကွယ်ရန်လည်း ပိုမိုခက်ခဲလာသည်။

ကမ္ဘာငယ်ချင်းယွင် အတွင်း၌မူ အင်အားစု အသီးသီးသည် ဆက်လက် တိုက်ခိုက်နေကြသည်။

လွန်ခဲ့သော နှစ်ထောင်ချီက အခွင့်အရေး တစ်ခုအတွက် ဖြစ်ပွားခဲ့သော ပဋိပက္ခကြောင့် ကောင်းကင်နတ်ဆိုး အကျဉ်းထောင်နှင့် ချင်းယွင်ဂိုဏ်းသည် သူတို့၏ အဓိကတပည့်များ သေဆုံးခဲ့ပြီး ကမ္ဘာမကျေ ရန်သူများ ဖြစ်လာခဲ့သည်။

ထိုအချိန်တွင် ဆင်းသက်ဂိုဏ်းသည် တိုင်းတစ်ပါး လူမျိုးများ၏ ကျူးကျော်မှုကြောင့် မကြာသေးမီနှစ်များအတွင်း အင်အားကြီးလာခဲ့သည်။

၎င်းသည် ပုန်းအောင်းနေခြင်း မရှိတော့ဘဲ ကျန်အင်အားစု လေးခုကို ရံဖန်ရံခါ တိုက်ခိုက်လာကြသည်။

စုရှင်းသည် မျက်လုံးများကို ခပ်ဖွဖွမှိတ်ပြီး သူ၏ မှတ်ဉာဏ်များကို ဆက်လက်ရှာဖွေသည်။

“ဆင်းသက်ဂိုဏ်းက ကောင်းကင်နတ်ဆိုး အကျဉ်းထောင်၊ ချင်းယွင်ဂိုဏ်း၊ ကောင်းကင်လျှို့ဝှက်ချက် နတ်စံအိမ်နဲ့ အဖြူရောင် ဧကရာဇ်မျှော်စင်တို့နဲ့ ဆန့်ကျင်ဘက် အနေအထားမှာ ရှိနေတာကိုး၊ ဒါကြောင့် သူတို့ကို သစ္စာဖောက် အင်အားစုတွေလို့ ခေါ်တာ ဖြစ်မယ်”

“ကောင်းကင်နတ်ဆိုး အကျဉ်းထောင်နဲ့ ချင်းယွင်ဂိုဏ်း နှစ်ခုစလုံးက တိုင်းတစ်ပါး လူမျိုးတွေကို ခုခံပြီး ဆင်းသက်ဂိုဏ်းကို တိုက်ခိုက်ကြတယ် ဆိုပေမယ့် သူတို့ကိုယ်တိုင်လည်း အချင်းချင်း ရန်လိုနေကြဆဲပဲ”

“ကောင်းကင်နတ်ဆိုး အကျဉ်းထောင်ကတော့ တိုက်ခိုက်ရတာကို ရူးသွပ်တဲ့ ကျင့်ကြံသူတွေနဲ့ လုံးလုံးလျားလျား ဖွဲ့စည်းထားတာပဲ”

“ကောင်းကင်လျှို့ဝှက်ချက် နတ်စံအိမ်ကတော့ ဘက်မလိုက်ဘူး...အာ့တာက သုံးထောင်ကမ္ဘာရှိ ထိပ်တန်းအင်အားစုတွေထဲက တစ်ခုပဲ။ လောထျန်း အစည်းအဝေးတုန်းက ဒီအင်အားစုအကြောင်း တစ်ခါ ကြားဖူးတယ်”

“အဖြူ‌ရောင် ဧကရာဇ်မျှော်စင်ကတော့ သုံးထောင်ကမ္ဘာမှာ ရှိတဲ့ လွတ်လပ်တဲ့ ကျင့်ကြံသူတွေရဲ့ မဟာမိတ်။ အင်အားကြီးတဲ့ အဖြူရောင်ဧကရာဇ်က တည်ထောင်ခဲ့ပြီး တိုင်းတစ်ပါး လူမျိုးတွေကိုလည်း ရဲရဲဝံ့ဝံ့ ခုခံနေတယ်”

စုရှင်း၏ စိတ်ထဲတွင် ကမ္ဘာငယ်ချင်းယွင်ရှိ အဓိကအင်အားစု ငါးခုသည် တဖြည်းဖြည်း ရုပ်လုံးပေါ်လာသည်။

စုရှင်းသည် ခေါင်းအနည်းငယ် ကိုက်လာသဖြင့် သူ့ကိုယ်သူ ရေရွတ်သည်။

“နောက်ထပ် သရုပ်ပြခြင်းကျရင် ချင်းယွင်လက်မှတ်ကို အမိအရ ဖမ်းဆုပ်ထားမယ်ဆိုပြီး အစက စီစဉ်ခဲ့တာ၊ ဒါက ကောင်းကင်နတ်ဆိုး အကျဉ်းထောင်ကနေ လွတ်မြောက်ဖို့ အကူအညီဖြစ်မယ်လို့ ထင်ခဲ့တာ”

“ဒါပေမဲ့ အခုတော့ ချင်းယွင်လက်မှတ်ကို ထုတ်ပြရင် ပိုပြီးတောင် မြန်မြန် သေလိမ့်မယ် ထင်တယ်”

စုရှင်းသည် ခါးသက်စွာ ရယ်လိုက်သည်။ ချင်းယွင်ဂိုဏ်းသို့ အမြန်ဝင်ရောက်မည့် သူ၏ အစီအစဉ်ကို ဆိုင်းငံ့ထားပြီး ဆင်းသက်ဂိုဏ်း အတွင်းတွင် သတိကြီးစွာဖြင့် ရှေ့ဆက်သွားတာက ပို၍အဆင်ပြေမည် ထင်သည်။

ဤသို့တွေးရင်း စုရှင်း၏ မျက်လုံးများက သရုပ်ပြခြင်း ဖန်သားပြင်စီသို့ ပြန်လည် ရောက်ရှိသွားသည်။

[သင်သည် နတ်အာရုံ ထိခိုက်ထားသဖြင့် ဝိညာဉ်ရှာဖွေခြင်း နည်းစနစ်ကို လုပ်ဆောင်ရန် ခက်ခဲသည်။]

[သို့သော်လည်း သူ၏စိတ်ထဲမှ ကမ္ဘာငယ် ချင်းယွင်နှင့် ပတ်သက်သည့် အရေးကြီးသော အချက်အလက်များကို သင် ရရှိခဲ့သည်။]

[ကောင်းကင်နတ်ဆိုး အကျဉ်းထောင်နှင့် ချင်းယွင်ဂိုဏ်းတို့သည် ပြိုင်ဘက် အင်အားစုများ ဖြစ်သည်။ ၎င်းသည် သင့်အတွက် အားနည်းချက် ဖြစ်သည်။]

[သို့သော် ယခုအခါ သင်သည် ထိုအကြောင်းကို များများစားစား မစဉ်းစားနိုင်တော့ပါ။ သင်သည် ဤသရုပ်ပြခြင်းတွင် သွေးစေ့နေရာကို ဦးစွာရရှိရန် အာရုံစိုက်ရမည်။]

[ထို့ကြောင့် လာမည့်သုံးရက်အတွင်း သင်သည် အန္တရာယ်ရှောင်ခြင်းနှင့် ကံကောင်းခြင်းတို့၏ စွမ်းရည်များကို အားပြု၍ အဆင့်မြင့် ကျင့်ကြံသူများ၏ လိုက်လံမှုကို ရှောင်တိမ်းကာ သင့်ထက် အားနည်းသောသူ များစွာကို သတ်ဖြတ်ခဲ့သည်။]

[သုံးရက်အကြာတွင် သင်၏ စုစုပေါင်းရမှတ်မှာ ရှစ်ရာနီးပါးသို့ ရောက်ရှိသွားသည်။ ဤအမှတ်သည် သွေးစေ့ဖြစ်လာရန် လုံလောက်သည်။]

[မကြာမီတွင် သုံးရက်ကြာ သွေးစေ့ပြိုင်ပွဲ ပြီးဆုံးသွားပြီး အင်အားကြီး ကျင့်ကြံသူများ ဤနယ်မြေသို့ ရောက်လာသည်။]

[အလွန် ကြောက်မက်ဖွယ် ကောင်းသော အငွေ့အသက်ရှိသည့် အင်အားကြီး ကျင့်ကြံသူ ဆယ်ဦးကျော် ရောက်ရှိလာပြီး သွေးစေ့ပြိုင်ပွဲ ပြီးဆုံးကြောင်း ကြေညာခဲ့သည်။]

[သူတို့ထဲတွင် သင်ယခင်က တွေ့ဆုံခဲ့ဖူးသည့် သွေးသခင်၁၉လည်း ပါဝင်သည်။]

[သွေးစေ့ပြိုင်ပွဲ၏ အဆင့်များကို မကြာမီ ကြေညာသည်။]

[ထိုသစ်သားမျက်နှာပေါက်ရှိ ကျင့်ကြံသူသည် ဤသွေးစေ့ပြိုင်ပွဲတွင် ပထမနေရာ ရရှိခဲ့ပြီး ရမှတ်တစ်ထောင့်သုံးရာကျော် ရရှိသည်။]

[ရမှတ်ခုနစ်ရာကျော် ရရှိသော သင်သည် သွေးစေ့ပြိုင်ပွဲတွင် သတ္တမနေရာ ရရှိခဲ့ပြီး သွေးစေ့အဖြစ်သို့ အောင်မြင်စွာ ရောက်ရှိသွားသည်။]

[သင်အပါအဝင် သွေးစေ့ဆယ်ဦး အောင်မြင်စွာ ပေါ်ထွက်လာသည်။]

[သွေးသခင်၁၉က သင်နှင့် သစ်သားမျက်နှာပေါက်ရှိ ကျင့်ကြံသူအား အံ့သြစွာ ကြည့်လိုက်သည်။ လွန်ခဲ့သောတစ်လက သူ ကယ်တင်ခဲ့သူများက သွေးစေ့နှစ်ဦး ဖြစ်လာလိမ့်မည်ဟု သူ မျှော်လင့်မထားခဲ့ပေ။]

[သွေးသခင်၂၃ဟု အမည်ခံသော ဆွဲဆောင်မှုရှိသည့် အမျိုးသမီးက သူမ၏ ကြီးမားသော ရင်အုံကို စိတ်လှုပ်ရှားစွာ ရိုက်လိုက်ပြီး အပြစ်ပေးခံရခြင်းမှ လွတ်မြောက်သွားကြောင်း တီးတိုးရေရွတ်နေသည်။]

[သို့သော် သင် မမျှော်လင့်ခဲ့သည်မှာ သွေးစေ့ပြိုင်ပွဲသည် မပြီးဆုံးသေးခြင်းပင် ဖြစ်သည်။]

[မကြာမီပင် အရပ်ပုပြီး သာမန်ရုပ်ရည်ရှိသော အမျိုးသားတစ်ဦးသည် ရှေ့သို့တက်လာပြီး နောက်ဆုံး အလောင်းအလျာ စိန်ခေါ်ပွဲ စတင်ပြီ ဖြစ်ကြောင်း ကြေညာသည်။]

[ဤအရပ်ပုသူ၏ ပုံပန်းသဏ္ဌာန်သည် ရိုးရှင်းလှသော်လည်း သင်သည် သူ့ကို အထင်မသေးရဲပေ။ အကြောင်းမှာ သူ၏ အမည်မှာ သွေးသခင်၁၆ ဖြစ်သောကြောင့်ပင်။]

[သင်၏ ခန့်မှန်းချက်အရ အမည်၏ နံပါတ်က ပိုနီးကပ်လေ၊ ဤပုဂ္ဂိုလ်များ၏ အင်အားမှာ ပို၍ ကြောက်မက်ဖွယ်ကောင်းလေ ဖြစ်သည်။]

…