ကမ္ဘာငယ် ချင်းယွင်ရှိ အင်အားစု အသီးသီး၊ စုရှင်း၏ လျှို့ဝှက်ချက် ဖော်ထုတ်ခံတော့မည်လော။

စုရှင်းသည် သက်ပြင်းချလိုက်သည်။

လောထျန်း ညီလာခံကို သူသည် ကျင့်ကြံသူများ အတွက် အသုံးဝင်သည့် “အတွေ့အကြုံ အကျဉ်းခန်း”သာ ဖြစ်သည်ဟု လက်ရှိတွင် နားလည်ထားသည်။

လောထျန်း ညီလာခံသို့ ဝင်ရောက်ရန် လိုအပ်ချက် တစ်ခုကို ပြည့်မီရမည်။ အသက်မွေးဝမ်းကျောင်း ပညာရှင် ဖြစ်ရမည်။

သို့သော် အသက်မွေးဝမ်းကျောင်း ပညာရှင်များထဲတွင် စုရှင်းတစ်ဦးတည်းသာလျှင် ကျင့်ကြံသူ အသက်မွေးဝမ်းကျောင်း ပညာရှင် ဖြစ်သည်။

ဤသည်မှာ လောထျန်း ညီလာခံဆ၏ လျှို့ဝှက်ချက်များကို စုရှင်း တစ်ဦးတည်းသာ ဖော်ထုတ်နိုင်သည်ဟု အဓိပ္ပာယ်ရသည်။

“လောထျန်း ညီလာခံ... ပျောက်ကွယ်သွားဖို့ နှစ်နှစ်ပဲ လိုတော့တယ်။ ငါ အဲဒီ အကျဉ်းခန်းကို ပိုပြီး စူးစမ်းရှာဖွေရမယ်။”

စုရှင်း၏ မျက်လုံးများတွင် ပြင်းပြသော စိတ်လှုပ်ရှားမှုများဖြင့် ပြည့်နှက်နေသည်။

လောထျန်း ညီလာခံသည် သူ့အတွက် မည်သို့သော အံ့အားသင့်စရာများကို ယူဆောင်ထားမည်နည်း။ မည်သို့သော ထိတ်လန့်စရာ လျှို့ဝှက်ချက်များ ပါဝင်နေမည်နည်း။

“လောထျန်း ညီလာခံကို ရည်ညွှန်းနေတာဘဲ ဖြစ်ရမယ်...ကြယ်ပြာပေါ်က အသက်မွေးဝမ်းကျောင်း ပညာရှင်တွေကြားမှာတော့ သတ်ဖြတ်မှုကနေ အဆင့်တက်နိုင်တာကလွဲပြီး တခြားလျှို့ဝှက်ချက်တွေ မရှိဘူး ထင်တာပဲ”

စုရှင်းသည် သူ့ဘာသာ စဉ်းစားလိုက်သည်။

“ပြီးတော့ သွေးစေ့ပြိုင်ပွဲမှာ ထူးချွန်ပြီး သွေးစေ့ဖြစ်လာသူတွေလည်း ဘယ်လိုပဲဖြစ်ဖြစ် အသက်ရှည်ရှည် နေရမှာ မဟုတ်ဘူး”

“ဒါပေမဲ့ အသက်ရှင်ဖို့ကိုပဲ ရည်ရွယ်မယ် ဆိုရင်တော့ သွေးစေ့လောင်းလျာ ဖြစ်တာက သရုပ်ပြချိန်ကို အတိုင်းအတာ တစ်ခုအထိ တိုးမြှင့်ပေးနိုင်လိမ့်မယ်”

စုရှင်းက ဆင်ခြင်သုံးသပ်သည်။

မည်သို့ပင်ဆိုစေ၊ ကြယ်ပြာမှ ထွက်ခွာပြီး ကမ္ဘာသုံးထောင်နှင့် ထိတွေ့လာရသည့် ဤသရုပ်ပြခြင်းသည် စုရှင်းအတွက် ကြီးမားသော တိုးတက်မှုတစ်ရပ် ဖြစ်သည်။

သရုပ်ပြခြင်းက ပိုမိုများပြားသော ဖြစ်နိုင်ခြေများကို ပေးသည်။ စုရှင်းသည် သူ၏ အင်အားကို ပိုမိုမြှင့်တင်ရန် ကမ္ဘာငယ် ချင်းယွင်မှ ရင်းမြစ်များကို ရယူနိုင်ပေလိမ့်မည်။

“ဒါပေမဲ့ အခုတော့... ဒီသရုပ်ပြခြင်းကရတဲ့ ဆုလာဘ်တွေကို အရင်ရွေးတာ ပိုကောင်းမယ်။”

စုရှင်းသည် သူ့ဘာသာ တီးတိုးပြောရင်း သရုပ်ပြခြင်း ဆုလာဘ်စာရင်းကို ကြည့်လိုက်သည်။

[မသေမျိုး ရှောင်ချီ] - ရွှေရောင် စွမ်းရည်၊ စွမ်းအင်မှတ် ၁၀ သန်းမှတ်။

[ဆေးဖော်စပ်ခြင်း ပညာအတွေ့အကြုံ အနှစ်နှစ်ဆယ်] - လဲလှယ်ပြီးနောက် လက်ရှိ ဆေးဖော်စပ်ခြင်းဆိုင်ရာ နားလည်မှုကို အနည်းငယ် တိုးမြှင့်ပေးလိမ့်မည်။ စွမ်းအင်မှတ် ၂သန်း။

[ကိုယ်ခန္ဓာပေါင်းစည်းခြင်း တတိယအဆင့် ကျင့်ကြံမှု] - ကိုယ်ခန္ဓာပေါင်းစည်းအဆင့် ကျင့်ကြံသူ၊ ကြီးမြတ်သော တာအို၏ ပုံစံမူကြမ်းကို ခံစားမိခြင်း၊ မူလစွမ်းအားကို နားလည်သဘောပေါက်ခြင်း... စွမ်းအင်မှတ် ၁ ဘီလီယံ။

[အနန္တ မီးလျှံ ထိုးထွင်းသိမြင်ခြင်း နည်းစနစ် (သတ္တမအဆင့်)] - ကောင်းကင်အဆင့် ထိပ်တန်းနည်းစနစ်၊ နတ်ဘုရားအဆင့်အထိ အများဆုံး ကျင့်ကြံနိုင်သည်၊ ဝိညာဉ်စွမ်းအင် စုပ်ယူနှုန်းနှင့် ကျင့်ကြံမှုသို့ ပြောင်းလဲနှုန်းကို ပိုမိုတိုးတက်စေသည်။ စွမ်းအင်မှတ် သန်း ၃၀၀ မှတ်။

“ကိုယ်ခန္ဓာပေါင်းစည်းအဆင့် ကျင့်ကြံမှုက ငါလိုချင်တာ မှန်ပေမဲ့...အနန္တ မီးလျှံ နည်းစနစ်ကို သင်ယူမှ ပိုပြီးဝေးဝေး သွားနိုင်မယ်။ ကျင့်ကြံမှုအရှိန်ကိုလည်း ပိုတိုးမြှင့်နိုင်မယ်။”

စုရှင်းသည် တီးတိုးပြောသည်။ ဤတစ်ကြိမ်တွင် သူသည် သရုပ်ပြခြင်း ဆုလာဘ်များကြောင့် အခက်မတွေ့တော့ပေ။

အနန္တမီးလျှံ နည်းစနစ် နှင့် အသစ်ထပ်မံ ရရှိသော ရွှေရောင်စွမ်းရည် မသေမျိုး ရှောင်ချီ တို့သည် ရှောင်လွဲ၍မရသော ရွေးချယ်မှုများ ဖြစ်သည်။

“ဒါပေမဲ့ ပြဿနာက ရွှေရောင် စွမ်းရည်ကို စွမ်းအင်မှတ် ၁၀ သန်းနဲ့ လဲလှယ်တာက မများပေမဲ့... စွမ်းရည်နေရာ တိုးချဲ့ဖို့ စွမ်းအင်မှတ် ၁ဘီလီယံ ဆိုတာကြီးက ငါ့ကို ဒုက္ခပေးလိမ့်မယ်”

စုရှင်းသည် သက်ပြင်းချကာ သူအစားထိုးနိုင်သော စွမ်းရည် ရှိမရှိကို ကြည့်ရှုရန် ပြင်ဆင်သည်။

သို့သော် စဉ်းစားပြီးနောက် စုရှင်း၏ စွမ်းရည် တစ်ခုစီတိုင်းတွင် ရည်ရွယ်ချက် တစ်ခုစီ ရှိနေသည်။

အစပိုင်းတွင် အပိုဖြစ်နေသည်ဟု ထင်ခဲ့သည့် သေခြင်းတရားကို အန်တုသော မျက်လုံးများ စွမ်းရည်ပင်လျှင် ကမ္ဘာသုံးထောင်သို့ ဝင်ရောက်ပြီးနောက် သူ့ကို အကြီးအကျယ် ကူညီခဲ့သည်။

“ကောင်းပြီလေ... ဒါဆိုရင် စွမ်းရည်နေရာ တိုးချဲ့ဖို့အတွက် စွမ်းအင် သုံးရတော့မှာ‌ပေါ့”

[ဒင်၊ စွမ်းအင်မှတ် ၁ ဘီလီယံ သုံးစွဲ၍ စွမ်းရည် နေရာ တိုးချဲ့လိုပါသလား။]

“အင်း” စုရှင်းသည် စိတ်မချမ်းသာစွာ ပြောလိုက်သည်။

ထို့နောက် စုရှင်း၏ သရုပ်ပြခြင်း စွမ်းအင်သည် လျင်မြန်စွာ လျော့ကျသွားပြီး စွမ်းအင်မှတ် ၃ သန်း ၈၅၈ ထောင် သာ ကျန်ရှိတော့သည်။

၎င်းသည် အနန္တ မီးလျှံ နည်းစနစ် နှင့် ရွှေရောင် စွမ်းရည်ကို လဲလှယ်ရန်ပင် မလုံလောက်ပေ။

စုရှင်းသည် အကူအညီမဲ့စွာဖြင့် ကျိန်စာသင့်ကျုံး၏ အမွေအနှစ်ထဲမှ သူကိုယ်တိုင် အသုံးမပြုနိုင်သော အစိတ်အပိုင်းများကို ရွေးချယ်ကာ သရုပ်ပြခြင်း စွမ်းအင် သန်းအနည်းငယ်ဖြင့် လဲလှယ်လိုက်သည်။

“ငါ ရွှေရောင်စွမ်းရည် မသေမျိုး ရှောင်ချီ နဲ့ အနန္တမီးလျှံ နည်းစနစ် ထိုးထွင်းသိမြင်မှုကို ထုတ်ယူမယ်။”

[သင်သည် ရွှေရောင်စွမ်းရည် မသေမျိုး ရှောင်ချီကို အောင်မြင်စွာ ထုတ်ယူလိုက်သည်။ စွမ်းအင်မှတ် ၁၀ သန်း သုံးစွဲခဲ့သည်၊ ကျန်ရှိသော စွမ်းအင်မှတ် သန်း ၃၀၀ ၂၃၃ ထောင်။]

[သင်သည် အနန္တမီးလျှံ နည်းစနစ် ထိုးထွင်းသိမြင်မှုကို အောင်မြင်စွာ ထုတ်ယူလိုက်သည်။ စွမ်းအင်မှတ် သန်း ၃၀၀ သုံးစွဲခဲ့သည်၊ ကျန်ရှိသော စွမ်းအင်မှတ် ၂၃၃ ထောင်။]

သရုပ်ပြစက်၏ အချက်ပေးသံနှင့်အတူ နတ်ဘုရား စွမ်းအင်သည် စုရှင်း၏ ခန္ဓာကိုယ်ထဲသို့ စီးဝင်လာသည်။

အနန္တမီးလျှံ နည်းစနစ် ကျင့်ကြံခြင်းဆိုင်ရာ မှတ်ဉာဏ်အပိုင်း တစ်ခုသည် သူ၏စိတ်ထဲတွင် ပေါ်လာသည်။

ခဏလေး အတွင်းတွင် စုရှင်း၏ အနန္တမီးလျှံ နည်းစနစ်ဆိုင်ရာ နားလည်သဘောပေါက်မှုသည် သတ္တမအဆင့်သို့ ရောက်ရှိသွားသည်။

“မဆိုးဘူး... အခုကစပြီး ငါ အနန္တမီးလျှံ နည်းစနစ်ကို ကျင့်ကြံဖို့ အသုံးပြုနိုင်ပြီ။ နတ်ဘုရားအဆင့် ရောက်တဲ့အထိ အဆင့်တက်ဖို့ စိတ်ပူစရာ မလိုတော့ဘူး”

စုရှင်းသည် ကျေနပ်စွာ ခေါင်းညိတ်ပြီး ရုတ်တရက် တစ်စုံတစ်ခုကို သတိရလိုက်သည်။

“သူ‌တော်စင် ဝမ်မူမှာလည်း သစ်မျိုးစုံ နည်းစနစ် ရှိတယ်။ အချိန်ရရင် ငါ ပြန်ယူလို့ရတယ်”

ဝိညာဉ်သွေးကြော နဂါးကို နိုးထစေခြင်းက ကျိန်စာသင့်နဂါး၏ အာရုံစိုက်မှုကို ဆွဲဆောင်နိုင်သည် မှန်သော်လည်း သူတော်စင် ဝမ်မူကို သတ်ရုံဖြင့် ကြီးမားသော သက်ရောက်မှု မရှိနိုင်ပေ။

သို့သော် စုရှင်းသည် ယခုအခါ ရုပ်သေးတာအိုကို နားလည်သဘောပေါက်ထားပြီဖြစ်ရာ စစ်မှန်သောဝမ်မူ သက်ရှိအလောင်းကောင်ကို ရုပ်သေးအဖြစ် ပြုလုပ်ရန် စဉ်းစားမိသည်။

ထိုအချိန်တွင် စုရှင်း၌ အင်အားကြီးသော တိုက်ခိုက်ရေး စွမ်းအားတစ်ခု ရှိလာမည်ဖြစ်ပြီး စစ်မှန်သော သူတော်စင် ဝမ်မူကို အဆင့်မြင့်ဆေးလုံးများ ပြုလုပ်ခိုင်းနိုင်သည်။

“ဒါပေမဲ့ စိတ်မကောင်းစရာပဲ၊ ငါ့လက်ရှိအင်အားက သူတော်စင် ဝမ်မူကို သတ်နိုင်ပေမဲ့ သူ့ခန္ဓာကိုယ်ကို သေချာ ပြည့်စုံအောင်လုပ်ဖို့ကျ ခက်တယ်”

“သူ့ကို မသတ်သေးဘဲ ငါ့အင်အား ပိုတိုးတက်လာတဲ့အထိ စောင့်နေလိုက်မယ်။”

စုရှင်းသည် ထိုသို့ တွေးလိုက်သော်လည်း သူ၏ ကျန်ရှိနေသော သရုပ်ပြခြင်း စွမ်းအင်ကို ကြည့်ကာ ပြန်လည် စိတ်ပူပန်လာသည်။

“သရုပ်ပြစွမ်းအင် ၂ သန်းနဲ့ ၈သောင်း ၈ထောင်... တောက်၊ တစ်ခါမှ ဒီလောက်ထိ မမွဲဖူးဘူး”

စုရှင်း အနည်းငယ် တွက်ချက်လိုက်သည်။

“ဒီတစ်ပတ်ပြီးရင် အဆာခံဆေးလုံး ၅ သောင်းကို ဒုတိယအဆင့် ထူးခြားသတ္တုတွင်း ဧရိယာနဲ့ လဲလှယ်နိုင်တယ်။ ရှေ့ဖြစ်ဟော အဖွဲ့က တစ်ပတ်ကို စွမ်းအင်မှတ် သန်း ၂၀၀ ပဲ ပေးနိုင်တယ်၊ ငါ့အတွက်တော့ လုံလောက်မှု မရှိသေးဘူး။”

စုရှင်းသည် ခေါင်းကို အနည်းငယ်ယမ်းလိုက်သည်။ ရုတ်တရက် သူသည် ဘိုင်လီ စီးပွားရေးအသင်းကို သတိရလိုက်သည်။

“ပြောရရင် ဘိုင်လီ စီးပွားရေး အသင်းကို နောက်ဆုံးသွားခဲ့တာ နှစ်လကျော်ပြီ။ အဲဒီကနေ စွမ်းအင်တွေ အများကြီး ရနိုင်မယ် ထင်တယ်”

စုရှင်းသည် ခြေမြန်လက်မြန်ရှိသူဖြစ်ရာ ချက်ချင်းပင် ရုပ်ဖျက်၍ သူ၏အရှိန်အဝါကို ဖုံးကွယ်ကာ ဓားဖြင့် ဘိုင်လီအိမ်တော်သို့ ထွက်ခွာသွားသည်။

သိုလှောင်လက်စွပ်ကို ရရှိပြီးနောက် စုရှင်းသည် ၎င်းကို ချက်ချင်း သရုပ်ပြခြင်း စွမ်းအင်နှင့် လဲလှယ်လိုက်သည်။

ဤသို့ဖြင့် စုရှင်း၏ သရုပ်ပြခြင်း စွမ်းအင်သည် ၅ ဘီလီယံ သန်း ၅၀၀ သို့ ရောက်ရှိသွားသည်။

ဤအရာများ အားလုံးကို ပြီးမြောက်ပြီးနောက် စုရှင်းသည် ဝိညာဉ်စိုက်ခင်းဂူသို့ ပြန်လာပြီး ရုပ်သေးပြုလုပ်ခြင်း အပတ်သစ်ကို စတင်သည်။

ဤတစ်ကြိမ် သရုပ်ပြခြင်းတွင် စုရှင်းသည် ရုပ်သေးတာအို အကြောင်း ပိုမိုနက်ရှိုင်းစွာ နားလည်ထားသဖြင့် တစ်ပတ်အတွင်း ရုပ်သေးသုံးခုကို ပြုလုပ်နိုင်ခဲ့သည်။

စုရှင်းသည် ၎င်းတို့ကို ဒန်ချီ၊ ဒန်ပါ၊ ဒန်ကျူးဟု အမည်ပေးခဲ့သည်…

ဤနည်းဖြင့် ဆေးဖော်သည့် ရုပ်သေးများသည် စုရှင်းအတွက် တစ်ပတ်လျှင် အဆာခံဆေးလုံး ၆ ထောင်နီးပါး ပြုလုပ်ပေးနိုင်ခဲ့သည်။

၎င်းသည် စုရှင်းကိုယ်တိုင် ပြုလုပ်နိုင်သည့် အရှိန်နှင့် လုံးလုံးလျားလျား ကိုက်ညီနေပြီ ဖြစ်သည်။

ဇန်နဝါရီ ၁၃ ရက်နေ့သို့ ရောက်သည့်အခါ စုရှင်းသည် ရုတ်တရက် သတိရသွားပြီး သူ့နဖူး သူရိုက်ကာ ပြောလိုက်သည်။

“ကျစ်၊ ဒီလ အရမ်းအလုပ်များနေတော့ လောရွှေရင်နဲ့ တွေ့ဖို့ မေ့နေတာပဲ...”

“ဒါပေမဲ့ ငါမသွားရင် သူမဘာသာ ပြန်လို့ရတယ်လို့ အရင်က ငါ ပြောထားခဲ့တာပဲ၊ ဘာပြဿနာမှ ရှိမှာ မဟုတ်ပါဘူး”

စုရှင်းသည် တီးတိုးရေရွတ်သည်။

ထို့နောက် သူသည် ရုပ်ဖျက်ပြီး ကျင်းချုံးရွှယ်နှင့် တွေ့ဆုံရန် အတွက် ဗီလာသို့ သွားရန် ပြင်ဆင်သည်။

နှစ်ဦးသား အတူတူ ထမင်းစားရင်း စကားပြောကြသည်။

ထမင်းစားပြီးလုနီးသောအခါ စုရှင်းသည် ဆေးလုံး ၅ သောင်းကို ထုတ်ယူ၍ ကျင်းချုံးရွှယ်အား ပေးလိုက်သည်။

ကျင်းချုံးရွှယ်ကလည်း သူမ ချက်ချင်း ထွက်ခွာရမည် ဖြစ်ကြောင်း ပြောခဲ့သည်။ ထို့ပြင် နှစ်ရက်အတွင်း ရှေ့ဖြစ်ဟော အသင်း၏ စက်မှုလုပ်ငန်းများက ဒုတိယအဆင့် ထူးခြား သတ္တုတွင်းဧရိယာကို ရရှိမည်ဟု ပြောခဲ့သည်။

တစ်ပတ်စာ ကုန်ပစ္စည်းအသစ်ကို ယူဆောင်ပြီးနောက် စုရှင်းသည် ဝိညာဉ်စိုက်ခင်းဂူသို့ ပြန်လာသည်။

ဤတစ်ပတ်၏ ကုန်ပစ္စည်းများသည် စွမ်းအင်မှတ် ၁ ဘီလီယံ သန်း ၅၀၀ နှင့် ညီမျှပြီး စုရှင်း၏ စွမ်းအင်ကို ၇ ဘီလီယံ အထိ ရောက်ရှိစေသည်။

“၇ ဘီလီယံ... နည်းနည်း လိုအုံးမယ် ထင်တယ်။”

စုရှင်းသည် ခေါင်းကို အနည်းငယ် ခါယမ်းလိုက်သည်။

“ကိုယ်ခန္ဓာပေါင်းစည်းအဆင့် ကျင့်ကြံခြင်းမှာ မြန်မြန် အဆင့်တက်ဖို့ဆိုရင် နောက်နှစ်လ သုံးလအတွင်း စွမ်းအင်အမှတ် ၁၀ ဘီလီယံ လောက် လိုအပ်လိမ့်မယ်”

“‌ရှေ့ဖြစ်‌ဟော အဖွဲ့ကနေ ဖြည်းဖြည်းချင်း ရနေတဲ့ နည်းနည်းလေးကိုဘဲ မှီခိုနေလို့ မရဘူး...”

ခဏရပ်ပြီးနောက် စုရှင်းက တီးတိုးပြောသည်။

“စွမ်းအင်တွေ ပိုရဖို့ စစ်တပ်တို့ စီးပွားရေး အသင်းကြီးတို့နဲ့ ငါ့ရဲ့ ကုန်သွယ်မှုနယ်ပယ်ကို ပိုချဲ့ထွင်ဖို့ လိုမယ် ထင်တယ်...”

စုရှင်းသည် နက်နက်နဲနဲ စဉ်းစားပြီး အစီအစဉ် အသစ်တစ်ခုကို အကောင်အထည်ဖော်ရန် ဆုံးဖြတ်လိုက်သည်။

“ဒါပေမဲ့ အဲဒါမတိုင်ခင်၊ မမျှော်လင့်ထားတဲ့ အဖြစ်အပျက်တွေ မဖြစ်အောင် သရုပ်ပြခြင်းတစ်ခု လုပ်သင့်တယ်။”

…