ကမ္ဘာသုံးထောင်သို့ ပြန်လည်ရောက်ရှိခြင်း၊ ဓားထိန်းချုပ် နည်းစနစ် ပြီးပြည့်စုံခြင်း။

လက်တွေ့ကမ္ဘာတွင် စုရှင်းသည် ဤအရာကို မြင်သောအခါ ကျေနပ်စွာ ခေါင်းညိတ်လိုက်သည်။

“အနှစ်သာရ အားဖြည်ြဆေးလုံး နဲ့ ကိုယ်တွင်းအင်္ဂါ သန့်စင်ဆေးလုံး ငါးသောင်း... ဒါက လုံလောက်တာထက် ပိုပါတယ်။”

“‌ဒီ့ထပ်ပိုယူရင်ကျ ကျွန်တော် ပြန်ပေးဖို့ စွမ်းအင်မရှိမှာ စိုးရိမ်တယ်...”

“ရှားနိုင်ငံ စစ်တပ် အတွက် ဆေးလုံး တစ်သောင်းရှစ်ထောင် ချန်ထားခဲ့တာက နှစ်ဆယ့်ငါးနှစ်လောက် ခံနိုင်ရည်ရှိဖို့ လုံလောက်ပါတယ်... ဒါက အသင့်တော်ဆုံးပဲ။”

ဤသို့ တွေးတောရင်း စုရှင်း၏ အကြည့်သည် သရုပ်ပြခြင်း ဖန်သားပြင်သို့ ပြန်ရောက်လာသည်။

[ပဉ္စမနှစ်တွင် သင်သည် ကောင်းကင်ဓားနည်းစနစ်ကို ဆက်လက် ကြိုးစား လေ့ကျင့်သည်။ တိုးတက်မှုအချို့ ရှိသော်လည်း မဟာယာနအဆင့်သို့ ရောက်ရန်မူ ဝေးနေသေးသည်။]

[သို့သော် ဆင်းသက်ဂိုဏ်းအတွင်း သင်၏ အခြေအနေသည် ဆက်လက် မြင့်တက်လာပြီး သစ္စာရှိသော နောက်လိုက်များလည်း ပိုမိုများပြားလာသည်။]

[ဤသို့ဖြင့် နောက်ထပ် သုံးနှစ် ကုန်လွန်သွားသည်။]

[အဋ္ဌမနှစ်တွင် သင်၏ ကျင့်ကြံမှုသည် ပိုမိုတိုးတက်လာပြီး ကိုယ်ခန္ဓာ ပေါင်းစည်းအဆင့် တတိယအလွှာနှင့် ပိုမိုနီးစပ်လာသည်။]

[ထိုအတောအတွင်း သင်သည် ဝမ်မူဂိုဏ်း အပျက်အစီးများသို့ သွားရောက်ကာ သူတော်စင် ဝမ်မူကို သတ်ပစ်ပြီး ဝိညာဉ်ကျောက်တုံး ထောင်ပေါင်းများစွာကို ပြန်လည် ရရှိခဲ့သည်။]

[သို့သော် တစ်ချိန်တည်းမှာပင် သင်သည် ယခင်က စုဆောင်းထားသော ဝိညာဉ်အရည်များနှင့် ဝိညာဉ်ကျောက်တုံးများ အားလုံးကို သုံးစွဲလိုက်ရာ ထပ်မံ ကျင့်ကြံရန် ပိုမို ခက်ခဲလာသည်။]

[သင်သည် ကောင်းကင်ဓားနည်းစနစ်ကို နားလည်သဘောပေါက်ရာတွင် အသေးစား အခက်အခဲတစ်ခုနှင့် ရင်ဆိုင်ရသည်။ ထို့ကြောင့် မဟာယာနအဆင့်နှင့် ဝေးနေဆဲ ဖြစ်သည်။]

[ထို့ကြောင့် ကောင်းကင်ဓားနည်းစနစ်ကို နားလည်ရန် ကြိုးစားနေစဉ် သင်သည် ဓားထိန်းချုပ် နည်းစနစ်ကိုပါ လေ့လာရန် စတင်လိုက်သည်။]

[ဓားထိန်းချုပ် နည်းစနစ်သည် ကောင်းကင် ဓားနည်းစနစ်ထက် လိုအပ်ချက် နည်းပါးသည်၊ သင်၏ ဓားတာအို အပေါ် နှစ်များတစ်လျှောက် နားလည်မှု တိုးတက်လာခြင်းသည် ဓားထိန်းချုပ်နည်းစနစ် အပေါ် ပိုမိုနက်ရှိုင်းသော ထိုးထွင်းသိမြင်မှုကို ရရှိစေသည်။]

[သင်၏ လက်ရှိ လွတ်မြောက်ခြင်း အမြန်နှုန်းနှင့် ဓားပျံသန်းမှုတို့ဖြင့်ဆိုလျှင် တစ်နေ့လျှင် မိုင်ပေါင်း တစ်သိန်းကျော် သွားလာခြင်းသည် ပြဿနာ မရှိတော့ပေ။]

[ကိုးနှစ်မြောက်တွင် သင်၏ အကူအညီကြောင့် လောရွှေရင်သည် ဒဏ္ဍာရီအဆင့် နှောင်းပိုင်းသို့ ရောက်ရှိရန် မဝေးတော့ပေ။]

[ဆင်းသက်ဂိုဏ်းတွင် သင်၏ ဂုဏ်သတင်းသည် မြင့်တက်လာပြီး နောက်လိုက်များစွာကလည်း သင့်ကို ဂိုဏ်းခေါင်းဆောင်အသစ် ဖြစ်လာရန် မျှော်လင့်နေကြသည်။]

[အချိန်တန်ပြီ ဖြစ်ကြောင်း သိရှိသော သင်သည် သဘာဝဂိုဏ်းခေါင်းဆောင်ကို အစားထိုးရန် အခွင့်အရေးကို စောင့်ဆိုင်းနေခဲ့သည်။]

[ဆယ့်တစ်နှစ်မြောက်တွင် သင်သည် ရိုးရှင်းသော အစီအစဥ်ဖြင့် သဘာဝဂိုဏ်းခေါင်းဆောင်ကို ဖယ်ရှားပြီး ဂိုဏ်းခေါင်းဆောင်နေရာသို့ အောင်မြင်စွာ တက်လှမ်းသည်။]

[သင်၏ နောက်လိုက်များ အပြင်၊ အကြီးအကဲများနှင့် စောင့်ရှောက်သူများကပင် သင့်အား အလွန် လေးစားကြသည်။ သင်၏ ဦးဆောင်မှုအောက်တွင် ဆင်းသက်ဂိုဏ်းသည် အဆင့်သစ်သို့ ရောက်ရှိနိုင်သည်ဟု ယုံကြည်ကြသည်။]

[နဂါး စောင့်ရှောက်သူသည် သင့်အား အနည်းငယ် မကျေနပ်သော်လည်း အရှိန်အဟုန်သည် ဆန့်ကျင်ရန် ခက်ခဲလွန်းသည်။]

[ဆယ့်နှစ် နှစ်မြောက်တွင် သင်သည် အခြားအင်အားစုများ အတွင်း ထိုးဖောက်ဝင်ရောက်နေသော ဆင်းသက်ဂိုဏ်း သူလျှိုများကို စာရင်း ပြုစုရန် အမိန့်ထုတ်ပြန်သည်။]

[အမိန့်သည် ထူးဆန်းသော်လည်း မည်သူမျှ သင့်အား မေးခွန်း မထုတ်ပေ။]

[သို့သော် ပြည့်စုံသော သူလျှိုများ စာရင်းကို ပြုစုရန် ခက်ခဲပြီး အသေးစိတ် အချက်အလက်များ အားလုံးကို စုဆောင်းရန် အတွက်လည်း သင်သည် ခြောက်လ အချိန်ယူခဲ့ရသည်။]

လက်တွေ့ကမ္ဘာတွင် စုရှင်းသည် ဝမ်းမြောက်သွားပြီး တိတ်ဆိတ်စွာ တွေးလိုက်သည်။

“မြှုပ်နှံသရုပ်ပြခြင်း လုပ်ဆောင်ချက်ကို တစ်နာရီကြာ အသုံးပြုမယ်။”

[သင်သည် မြှုပ်နှံသရုပ်ပြခြင်းကို အောင်မြင်စွာ အသုံးပြုလိုက်သည်... ကျန်ရှိသော စွမ်းအင်မှတ်- ၆၉၉.၉၉ သန်းမှတ်။]

သရုပ်ပြစက်၏ အချက်ပေးသံ ထွက်ပေါ်လာသည်နှင့်အမျှ စုရှင်းသည် ထူးဆန်းသော အခန်းတစ်ခန်းတွင် ပေါ်လာသည်။

သူ၏ လက်ထဲတွင် စာရင်းအထူကြီး ရှိနေသည်။ ၎င်းတို့သည် အနည်းဆုံး သူလျှို တစ်ထောင် နှင့် ၎င်းတို့၏ အသေးစိတ် အချက်အလက်များကို ဖော်ပြထားသည်။

ဤစာရွက်အတွဲတွင် စကားလုံးပေါင်း တစ်သိန်းကျော် ပါဝင်သည်။

စုရှင်းသည် သူလျှိုများ၏ အချက်အလက်များကို လျင်မြန်စွာ ဖတ်ရှုပြီး မှတ်သားလိုက်သည်။

သူ၏ လက်ရှိ ကျင့်ကြံမှုအဆင့်နှင့် ခိုင်မာသော နတ်အာရုံတို့ကြောင့် သာမန်စာသားများကို မှတ်မိရန်မှာ လွယ်ကူသည်။ မည်သည့် အားထုတ်မှုမှ မလိုပေ။

ကျင့်ကြံသူ လောကမှ စွမ်းအားကြီးသော ကျင့်ကြံမှု နည်းစနစ်များနှင့် နတ်ဘုရား စွမ်းရည်များကသာ ၎င်းတို့၏ စာသားများတွင် ကြီးမားသော စွမ်းအားများ ပါဝင်သောကြောင့် မှတ်မိရန် ခက်ခဲသည်။

သို့သော် စုရှင်းသည် ကောင်းကင်ဓားနည်းစနစ်ကို မှတ်မိနိုင်သောကြောင့် ဤသာမန် စကားလုံး သိန်းပေါင်းများစွာသည် ပို၍ပင် လွယ်ကူသည်။

[မကြာမီ မြှုပ်နှံသရုပ်ပြခြင်း ပြီးဆုံးသွားပြီး စုရှင်းသည် လက်တွေ့ကမ္ဘာသို့ ပြန်ရောက်လာသည်။]

သူသည် ဖြည်းညှင်းစွာ မျက်လုံး ဖွင့်လိုက်သည်။ သူ၏ မျက်လုံးများတွင် ရှုပ်ထွေးသော အရိပ်အယောင်များ ရှိနေသည်။

“ဆင်းသက်ဂိုဏ်းက အင်အားစု အသီးသီးထဲမှာ ဒီလောက်များတဲ့ သူလျှိုတွေ ထား ထားလိမ့်မယ်လို့ ငါတစ်ခါမှ မတွေးမိခဲ့ဘူး... တကယ်ကြီးကို နက်နက်ရှိုင်းရှိုင်း အမြစ်တွယ်နေတာပဲဟ။”

စုရှင်းသည် သက်ပြင်းချလိုက်သည်။ သူ ရရှိထားသော အချက်အလက်များသည် အမှန်တကယ် ပေါက်ကွဲနိုင်စွမ်းရှိသည်။

အဆိုပါ အချက်အလက်များအရ ကြယ်ပြာပေါ်တွင် ဆင်းသက်ဂိုဏ်းမှ သူလျှို စုစုပေါင်း ၂,၃၀၀ ကျော် ရှိနေသည်။

၎င်းတို့အနက် ၁,၅၀၀ ကျော်သည် ရှား နယ်နိမိတ်အတွင်း၌ ရှိသည်။

ရှား စစ်တပ်၊ ကျင်း ကုန်သည်အသင်း၊ ရှေ့ဖြစ်ဟော အဖွဲ့... ထိပ်တန်းနှင့် ပထမတန်းစား ဂိုဏ်းများ အားလုံးတွင် ဆင်းသက်ဂိုဏ်း သူလျှိုများ ရှိနေသည်။

“ဆင်းသက်ဂိုဏ်းက ရှေ့ဖြစ်ဟော အဖွဲ့ထဲကို ပထမဆုံး ထည့်ထားတဲ့ သူလျှိုက ဒီ ဇူလိုင်လ မှ... ငါက အဲဒီ သူလျှိုရဲ့ အချက်အလက်ကို ကြိုသိနေပြီဆို‌တော့ သူတို့ကို ဝင်ခွင့်မရအောင် လုပ်ရမယ်။”

“ကျင်း ကုန်သည်အသင်းနဲ့ တခြား ဂိုဏ်းတွေထဲက သက်တမ်းအကြာဆုံး သူလျှိုဆိုရင် ဆယ်စုနှစ်များစွာတောင် ဖော်ထုတ်မခံရဘဲ ပုန်းအောင်းနေခဲ့တယ်... သူတို့ဆိုရင် ဘယ်လောက်ထိ အရေးပါတဲ့ အချက်အလက်တွေ စုဆောင်းထားပြီးလောက်ပြီလဲ။”

ခဏရပ်နားပြီး စုရှင်းက သက်ပြင်းချသည်။

“ဟုတ်ပါတယ်၊ အဆိုးဆုံးကတော့ ရှား စစ်တပ်ပါပဲ...”

“ဆင်းသက်ဂိုဏ်းက ရှား စစ်တပ်ထဲမှာ စုစုပေါင်း ၇၈၃ ဦးကို ထည့်သွင်းထားတယ်။”

“နတ်ဆိုးနှိမ်နင်းရေး စခန်းက စစ်ဧကရာဇ်အဆင့် ဗိုလ်ချုပ်တွေကနေ... ထောက်ပံ့ပို့ဆောင်ရေး တာဝန်ယူရတဲ့ သာမန်အရာရှိတွေ အထိ ဆင်းသက်ဂိုဏ်းရဲ့ သူလျှိုတွေက အဆင့်တိုင်းမှာ ရှိနေတယ်။”

စုရှင်းသည် ယုံကြည်ရန် ခက်ခဲနေသည်။

သူအတုန်လှုပ်ဆုံးမှာ ထို စစ်ဧကရာဇ်အဆင့် သူလျှိုသည် နတ်ဆိုးနှိမ်နင်းရေး စခန်းတွင် နှစ်ပေါင်း ၂၀၀ နီးပါး အယောင်ဆောင်နေခဲ့ခြင်းပင်။

စုရှင်းသည် ထိုသူနှင့်ပတ်သက်သော သတင်းများကိုပင် မြင်ဖူးသည်။

ထို စစ်ဧကရာဇ် သူလျှိုသည် တစ်ချိန်က ရှားနိုင်ငံ စစ်တပ်တစ်ခုလုံးကို ကယ်တင်ရန် နတ်ဆိုးဧကရာဇ် တစ်ပါးနှင့် တိုက်ခိုက်ခဲ့ပြီး ဒဏ်ရာပြင်းထန်စွာ ရကာ သေလုနီးပါးပင် ဖြစ်ခဲ့သည်…

ထိုကဲ့သို့သော သူရဲကောင်း၊ သံမဏိသွေးစစ်သားတစ်ဦး... စုရှင်းသာ သူ၏ အချက်အလက်ကို သေချာမသိခဲ့လျှင် ထိုသူက သူလျှိုဖြစ်သည် ဆိုသည်ကို ဘယ်တော့မှ ယုံမည်မဟုတ်ပေ။

“အင်း... ဒီ သူလျှိုကွန်ရက်က တကယ်ကို အမြစ်တွယ်နေတာပဲ...”

“အခုချိန်မှာ အကောင်းဆုံး အစီအစဉ်က ဒီစာရင်းကို သေချာပြုစုပြီး လုယွမ်ဝူကို ပေးအပ်ဖို့ဘဲ၊ ပြီးရင် သူ့ကို ဒီသူလျှိုတွေကို ဖြည်းဖြည်းချင်း ဖယ်ရှားခိုင်းရမယ်...”

စုရှင်းသည် သူ၏ နဖူးကို ပွတ်သပ်လိုက်သည်။

သူလျှိုကိစ္စအား မည်သို့ ကိုင်တွယ်ဖြေရှင်းရမည်ကို သူ ဂရုမစိုက်ပါ။ သူ၏ အခန်းကဏ္ဍမှာ ဤစာရင်းကို ပေးအပ်ရန်သာ ဖြစ်သည်။ ရှား စစ်တပ်က သူတို့ဘာသာ ကိုင်တွယ်လိမ့်မည်။

…