အသန်မာဆုံးအရှင်

"စကြာဝဠာရဲ့အကြီးမားဆုံးသစ်တောလို မျှော်လင့်ထားတဲ့အတိုင်းပါပဲလား-ကြယ်စုသစ်တော"

ဒီနေ့မှာ လီဖူချန်းက စကြာဝဠာရဲ့ထိပ်ဆုံးအံ့ဖွယ်ဆယ်ခုထဲကတစ်ခုဖြစ်တဲ့ကြယ်မြစ်သစ်တောကို ရောက်ရှိလာတယ်။

ကြယ်မြစ်သစ်တောက ကြယ်ကောင်းကင်မှအစပျိုးလာတဲ့အဆုံးမဲ့တောအုပ်တစ်ခုဖြစ်တယ်။ အတိုဆုံးမြက်ပင်က ကီလိုမီတာသန်းတစ်ရာရှိပြီး အရှည်ဆုံးအပင်တွေကတော့ ကီလီုမီတာဘီလီယံရာချီမြင့်တယ်။ နက္ခတ်တာရာဧရာမသားရဲကတောင် ကြယ်မြစ်တောအုပ်မှာဆိုရင် သေးငယ်တဲ့ပိုးမွှားတစ်ကောင်သာသာပဲ ရှိပေလိမ့်မယ်။

လီဖူချန်းက ကြယ်မြစ်‌တောအုပ်ထဲမှာ သက်သောင့်သက်သာလမ်းလျှောက်နေပြီး လှပတဲ့သဘာဝရှုခင်းကို ရှုစားနေတယ်။

လမ်းတစ်လျှောက်မှာ လီဖူချန်းက အသိတွေပိုပိုကြွယ်ဝလာတယ်။ သူ့ရဲ့စိတ်အခြေအနေက ကြီးမားတဲ့ပြောင်းလဲမှုတစ်ခုရှိလာတယ်လို့ လီဖူချန်းက ရေးတေးတေးခံစားမိတယ်။

စိတ်အခြေအနေက အလွန်ထူးဆန်းတဲ့အရာတစ်ခုဖြစ်တယ်၊ ၎င်းကို ပြင်ပအားတွေနဲ့ မတိုးတက်စေနိုင်ဘူး၊ ပြီးတော့ မြင့်မားတဲ့နားလည်မှုရှိတဲ့လူတစ်ယောက်က မြင့်မားတဲ့စိတ်အခြေအနေတစ်ခုရှိမယ်လို့ မဆိုလိုပါဘူး။ ၎င်းက တကယ်တော့ လူတစ်ယောက်ရဲ့ပင်ကိုစရိုက်၊ ဘဝအမြင်၊ အတွေ့အကြုံတွေရဲ့ပြီးပြည့်စုံသောပြယုဂ်တစ်ခုဖြစ်တယ်။

လီဖူချန်းမှာ ရွှေရောင်အဆောင်ရှိရင်တောင် သူ့ရဲ့စိတ်အ‌ခြေအနေက လက်ခံနိုင်ဖွယ်မရှိတဲ့အဆင့်မှာ ရှိမနေပါဘူး။

ဝှစ်......

အဖြူရောင်အလင်းတစ်ခုက လီဖူချန်းရဲ့ဘေးနားမှာ လက်သွားပြီး အရှိန်က မြန်လွန်းတာကြောင့် လီဖူချန်းက အလွန်အံ့အားသင့်သွားတယ်။

ဒီလိုအရှိန်မျိုးက သူတို့ဆန္ဒရှိသလောက် ဘယ်နေရာကိုပဲသွားသွား သွားနိုင်တဲ့ခံစားချက်တစ်ခုကို ပေးတယ်။

အရှေ့ရှိသစ်ကိုင်းပေါ်မှာ အဖြူရောင်အလင်းက ရပ်သွားတယ်။ ဒါက နှင်းဖြူရောင်အရေပြား၊ ခေါင်းပေါ်မှာ ရစ်ခွေနေတဲ့ဦးချိုတစ်ခု၊ ဖက်ဂဆက်လိုသေးသွယ်တဲ့ခန္ဓာကိုယ်တစ်ခု၊ နဂါးငွေ့တန်းလိုစိတ်ကူးယဉ်ဆန်တဲ့မျက်လုံးတွေရှိတဲ့လှပတဲ့မျိုးစိတ်တစ်ခုဖြစ်တယ်။

နဂါးငွေ့တန်ယူနီကွန်ကို စကြာဝဠာရဲ့စိတ်စွမ်းအင်အကြွယ်ဝဆုံးသတ္တဝါတစ်ကောင်လို့ ပြောကြတယ်။ ဒဏ္ဍာရီတွေက ပြောတယ်၊ နဂါးငွေ့တန်ယူနီကွန်ကိုမြင်တဲ့ဘယ်သူမဆို ကံကြမ္မာကောင်းတွေ ပေးအပ်ခံရမယ်လို့ ပြောကြတယ်။

ဒါပေမယ့် နဂါးငွေ့တန်းယူနီကွန်ကို မြင်ဖို့ဆိုတာ မလွယ်လှပါဘူး။

တစ်ဖက်လူက ကံကြမ္မာရဲ့ပြယုဂ်အလား ဖြစ်ရမယ်။ သူက သင့်ကို မမြင်ချင်ရင် သင်က သူ့ကို လုံးဝမြင်ရမှာမဟုတ်ဘူး၊ သင် ဘယ်လောက်ပဲသန်မာနေပါစေ ကိစ္စမရှိဘူး။

"နဂါးငွေ့တန်းယူနီကွန်ကို မြင်နိုင်တယ်ဆိုတော့ ငါ့ကံက အတော်လေးကောင်းတယ်လို့ ဆိုရမယ်"

လီဖူချန်းက နှာခေါင်းပွတ်ကာ ပြုံးလိုက်တယ်။

တောက်.....တောက်.....

နဂါးငွေ့တန်းယူနီကွန်က လျှပ်တစ်ပြက်လက်ကာ လီဖူချန်းရဲ့ဘေးနားမှာ ထွက်ပေါ်လာတယ်။

ဘာကြောင့်လဲတော့ မသိဘူး၊ နဂါးငွေ့တန်းယူနီကွန်က လီဖူချန်းကို လုံးဝကြောက်မနေဘူး။ လီဖူချန်း ရှေ့ကို လျှောက်တဲ့အခါ သူက နောက်က လိုက်လာတယ်။ လီဖူချန်းရပ်လိုက်တဲ့အခါ သူလဲ ရပ်လိုက်တယ်။ မကြာခဏ သူ့ခေါင်းကို အသုံးပြုလျက် လီဖူချန်းရဲ့ပခုံးကို ပွတ်နေတယ်။

လီဖူချန်းက လိုက်ခွင့်ပြုပါတယ်၊ အနည်းဆုံးတော့ လမ်းမှာ သူ့အတွက် အဖော်တစ်ယောက်ရှိလာတာပေါ့။

နှစ်အနည်းငယ်ကြာပြီးနောက် နောက်ဆုံးတော့ လီဖူချန်းက ကြယ်မြစ်တောအုပ်မှာထွက်ခွာတော့မှာပါ။ ဒီတစ်ခါမှာတော့ ကြယ်မြစ်ယူနီကွန်က မလိုက်လာတော့ဘူး။ ၎င်းက တောအုပ်ရဲ့အစွန်းမှာ ရပ်လျက် လီဖူချန်းထွက်သွားတာကို စောင့်ကြည့်နေခဲ့တယ်။

"နောက်မှ ပြန်တွေ့မယ်"

လီဖူချနိးက လက်ကို ဝှေ့ယမ်းကာ ပျောက်ကွယ်သွားတယ်။

……

အချိန်က လျင်မြန်စွာ ကုန်ဆုံးသွားတယ်။ လီဖူချန်း စကြာဝဠာအနှံ့လှည့်လည်နေတာ နှစ်သုံးရာကျော်သွားပြီ။ မူလဘူတမြေပြင်မှ ပြန်ရောက်လာကတည်းကဆိုရင် နှစ်ငါးရာကျော်ပါပြီ။

လွန်ခဲ့တဲ့နှစ်သုံးရာအတွင်း လီဖူချန်းက နေရာများစွာကို ရောက်ရှိခဲ့တယ်။ သူက ထိပ်ဆုံးအံ့ဖွယ်ဆယ်‌နေရာလုံးကို လည်ပတ်ခဲ့တယ်။ သူက ကျော်ကြားတဲ့အံ့ဖွယ်နေရာအချို့ကိုလည်း လည်ပတ်ခဲ့တယ်။ သူ့ရဲ့ချီတည်ရှိမှုကို ဖုံးကွယ်ပြီး စကြာဝဠာရှိမြို့တစ်မြို့အထဲမှာ သာမန်လူတစ်ယောက်အဖြစ်နေထိုင်တဲ့အချိန်တွေတောင် ရှိတယ်။

တမင်တကာကျင့်ကြံခြင်းမရှိဘဲ လီဖူချန်းရဲ့စိတ်အခြေအနေက ရုတ်ခြည်းတိုးတက်လာတယ်။

"ငါ နားလည်ပြီ"

ပျက်စီးနေတဲ့ကြယ်တစ်လုံးအပေါ်မှာ လီဖူချန်းက ဆန်းကြယ်ပြီးအလွန်သိမ်မွေ့နူးညံ့တဲ့အခြေအနေသို့ ဝင်ရောက်ခဲ့တယ်။

မူလအဆုံးစွန်းဓားနည်းစနစ်က အလုံးစုံတတ်သိနားလည်ခြင်းအဆင့်ကို အောင်မြင်ဖို့ဆိုရင် ဓားလမ်းကြောင်းတွေမှာ အလုံးစုံတတ်သိနားလည်ဖို့လိုတဲ့အပြင် တစ်စုံတစ်ယောက်ရဲ့မိမိကိုယ်ကိုယ်မိမိနားလည်မှုနဲ့စကြာဝဠာအပေါ်နားလည်မှုတို့ကလည်း အလွန်အမင်းနက်နဲသိမ်မွေ့တဲ့အဆင့်ကို ရောက်ရှိထားရပါမယ်။

ဒါပေမယ့် အချက်အလက်အရ မိမိကိုယ်တိုင်နဲ့စကြာဝဠာကိုနားလည်ခြင်းက အပေါ်ယံမျှပဲ။ စစ်မှန်တဲ့အနှစ်သာရက စိတ်အခြေအနေဖြစ်တယ်။

လီဖူချန်းက သူ့ခန္ဓာကိုယ်ရဲ့ဖွဲ့စည်းတည်ဆောက်ပုံနဲ့ပတ်သက်ပြီး ထပ်ပြီးမကျွမ်းဝင်နိုင်တော့ဘူး။ လီဖူချန်းက လူသားခန္ဓာကိုယ်ဆန်းကြယ်မှုအားလုံးကိုလည်း ရှာတွေ့ခဲ့တယ်။

စကြာဝဠာကိုနားလည်ခြင်းက လူတစ်ယောက်နဲ့တစ်ယောက်မတူပါဘူး။ သူတို့က စကြာဝဠာနဲ့ပတ်သက်ပြီး အပြည့်အဝနားလည်ရမယ်လို့ တစ်ယောက်မှ မပြောရဲကြပါဘူး။ ဒါပေမယ့် အရှင်အဆင့်ကိုရောက်ရှိနိုင်တဲ့သူတိုင်းကတော့ စကြာဝဠာရဲ့နက်နဲသိမ်မွေ့တဲ့နားလည်မှုတစ်ခု ရှိပါလိမ့်မယ်။

ဒါကြောင့် လီဖူချန်းက လိုအပ်ချက်အားလုံးကို ဖြည့်ထားခဲ့တယ်၊ လိုအပ်ချက်မကိုက်ညီတဲ့တစ်ခုတည်းသောအရာက စိတ်အခြေအနေဖြစ်တယ်။

အသန်မာဆုံးအရှင်က အသန်မာဆုံးစိတ်အခြေအနေကို လိုအပ်တယ်။

ဒါပေမယ့် သင့်တော်တဲ့စိတ်အခြေအနေတစ်ခု မရှိပေမယ့် သူတို့ကိုယ်တိုင်နဲ့စကြာဝဠာအပေါ်နားလည်မှုများပြားလွန်းသူတွေ ရှိတယ်။ သူတို့က အသန်မာဆုံးအရှင်ဖြစ်လာခဲ့တယ်။

ဝှစ်......

လီဖူချန်းတည်ရှိရာအပျက်အစီးကြယ်နဲ့ဟင်းလင်းပြင်က ဧရာမနှလုံးတစ်ခုပမာ အသက်ရှုနေတယ်။ ၎င်းက ကျုံ့လိုက်ကျုံ့လိုက်ဖြစ်နေပြီး ထာဝရနဲ့မသေမျိုးဓားတာအိုတည်ရှိမှုတစ်ခုက ပျံ့နှံ့သွားတယ်။

"ဒီလိုပြင်းထန်တဲ့လှိုင်းတွေ"

အပျက်အစီးကြယ်မှအလင်းနှစ်ရာအနည်းငယ်အကွာမှာ ခရမ်းရောင်အလင်းစီးကြောင်းတစ်ခုက ရပ်သွားတယ်။

ခရမ်းရောင်အလင်းစီးကြောင်းက ပြန့်ကျဲသွားပြီး ခရမ်းရောင်ပုံဆောင်ခဲအသွင်သူငယ်အိမ်တွေရှိတဲ့လူလတ်ပိုင်းတစ်ယောက်က လီဖူချန်းရှိရာဦးတည်ဘက်ကို ကြည့်လိုက်တယ်။

အသိဗဟုသုတများတဲ့တစ်ယောက်ယောက်က ဒီနေရာမှာရှိရင် ဒီခရမ်းရောင်ပုံဆောင်ခဲအသွင်သူငယ်အိမ်တွေရှိတဲ့လူလတ်ပိုင်းက ခရမ်းရောင်မျက်လုံးမျိုးနွယ်စုမှအကြိုနတ်ဘုရားတစ်ယောက်ဖြစ်တဲ့ခရမ်းမျက်လုံးနတ်ဘုရားမှန်း သ‌ိပေလိမ့်မယ်။

စကြာဝဠာထဲမှာ ဂိုဏ်းကြီးတွေများစွာရှိတယ်။ ဂိုဏ်းတစ်ခုမှာ အကြိုနတ်ဘုရားတစ်ယောက်ရှိသရွေ့ ၎င်းကို ဂိုဏ်းကြီးတစ်ခုလို့ သတ်မှတ်လို့ရတယ်။

ခရမ်းမျက်လုံးကလန်မှာ အကြိုနတ်ဘုရားတစ်ယောက်သာ ရှိပေမယ့် ခရမ်းမျက်လုံးနတ်ဘုရားက အဆင့်မြင့်အကြိုနတ်ဘုရားတစ်ယောက်ဖြစ်ပြီး သာမန်ဂိုဏ်းကြီးတွေထက် တစ်ဆင့်ပိုမြင့်တယ်။ စကြာဝဠာထဲမှာ သူတို့က အနည်းငယ်ကျော်ကြားတယ်လို့ ပြောလို့ရတယ်။

"ဒါ မူလအဆုံးစွန်းအရှင်ပဲ"

ခရမ်းမျက်လုံးနတ်ဘုရားရဲ့မျက်လုံးတွေက လင်းလက်သွားတယ်။

အကြိုနတ်ဘုရားနယ်မြေမှပြန်ရောက်လာတဲ့အကြိုနတ်ဘုရားတွေအကြားမှာ လီဖူချန်းကို မသိတဲ့သူတစ်ယောက်မှမရှိဘူး။ ခရမ်းမျက်လုံးနတ်ဘုရားအနေနဲ့ လီဖူချန်းကို သိတာ သဘာဝပါပဲ။

"ဒီမူလအဆုံးစွန်းအရှင်မှာ အ‌ဆင့်မြင့်စကြာဝဠာရတနာတစ်ခုရှိတယ်။ ငါက သူ့ကို အနိုင်မယူနိုင်လောက်ဘူး။ ဒါပေမယ့် ငါက ဒုမဟာမိတ်ခေါင်းဆောင်ကို ခေါ်နိုင်တယ်။ ဒုမဟာမိတ်ခေါင်းဆောင်ရဲ့စွမ်းရည်နဲ့ဆိုရင် ငါတို့တွေ သူ့ကို အနိုင်ယူနိုင်မှာ သေချာသလောက်ရှိတယ်"

စကြာဝဠာမှာ အဓိကဂိုဏ်းကြီးကိုးဂိုဏ်းရှိတယ်။ ဒီအဓိကဂိုဏ်းကြီးကိုးဂိုဏ်းမှာ အကြိုနတ်ဘုရားတွေများစွာ ရှိရုံသာမက သူတို့ရဲ့အကြိုနတ်ဘုရားတွေက အလွန်အားကောင်းတယ်။

သူတို့က အဓိကဂိုဏ်းကြီးကိုးဂိုဏ်းကို မယှဉ်နိုင်မှန်း အခြားဂိုဏ်းကြီးတွေက သိတယ်။ သူတို့က အဓိကဂိုဏ်းကြီးကိုးဂိုဏ်းကို အညံ့ခံဖို့ ရွေးချယ်ရမယ် ဒါမှမဟုတ် မဟာမိတ်တစ်ခုကို ဖွဲ့ရမယ်။

ခရမ်းမျက်လုံးမျိုးနွယ်ရဲ့မဟာမိတ်က စကြာဝဠာရဲ့အဓိကမဟာမိတ်ငါးခုထဲကတစ်ခုဖြစ်တဲ့ မြောက်ပိုင်းနယ်စပ်မဟာမိတ်ဖြစ်တယ်။

မြောက်ပိုင်းနယ်စပ်မဟာမိတ်ကို ဂိုဏ်းကြီးနှစ်ဆယ်ကျော်က တည်ထောင်ခဲ့တယ်။ အခရာပုဂ္ဂိုလ်တစ်ယောက်၊ ကိုယ်စားလှယ်သုံးယောက်၊ မဟာမိတ်ခေါင်းဆောင်လေးယောက်ရှိတယ်။

ဒီမဟာမိတ်ခေါင်းဆောင်လေးယောက်လုံးက ပထမတန်းစားအဆင့်အကြိုနတ်ဘုရားတွေဖြစ်ကြတယ်။

မြောက်ပိုင်းနယ်စပ်မဟာမိတ်မှပြန်ရောက်လာတဲ့အကြိုနတ်ဘုရားတွေအကြားမှာ ကိုယ်စားလှယ်သုံးယောက်ထဲကတစ်ယောက်ဖြစ်တဲ့သံမဏိလက်သည်းတစ္ဆေနတ်ဘုရားလည်း တစ်ယောက်အပါအဝင်ဖြစ်တယ်။

ဆက်သွယ်ရေးတိုကင်ကို ထုတ်ကာ ခရမ်းမျက်လုံးနတ်ဘုရားက သံမဏိလက်သည်းတစ္ဆေနတ်ဘုရားထံ သတင်းပို့လိုက်တယ်။

……

"ကီကီ၊ ငါ၊ သံမဏိလက်သည်းတစ္ဆေနတ်ဘုရားက ကံအတော်ကောင်းတာပဲ။ ငါ့ဟာငါနေတာတောင်မှ အဆင့်မြင့်စကြာဝဠာရတနာတစ်ခုက ငါ့ဆီ ဆိုက်ဆိုက်မြိုက်မြိုက်ရောက်လာတာပဲ"

ဒါက ချောက်ချားဖွယ်ရာချီတွေပြည့်နေတဲ့လျှို့ဝှက်နယ်မြေတစ်ခုဖြစ်တယ်။ လျှို့ဝှက်နယ်မြေရဲ့အလယ်မှာ အနက်ရောင်ချောက်တစ်ခုရှိတယ်။ တစ္ဆေပုံရိပ်တစ်ခုက ရုတ်တရက် ပြေးထွက်လာပြီး သိပ်သည်းတဲ့တစ္ဆေချီက ကျောချမ်းစရာကောင်းလှတယ်။

သံမဏိလက်သည်းတစ္ဆေနတ်ဘုရားအနေနဲ့ မပျော်ဖို့က ခက်ခဲတယ်။ အရင်က ရွှေအလင်းနတ်ဘုရား၊ သွေးနတ်ဘုရား၊ ဖရိုဖရဲတိုက်ပွဲနတ်ဘုရားနဲ့ ရေတံခွန်မိုးဓား‌မော့နတ်ဘုရားတို့ကတောင် အဆင့်မြင့်စကြာဝဠာရတနာတစ်ခုကို မလုယူနိုင်ခဲ့ဘဲ လီဖူချန်းကု နက်ပြာပလိန်းဆီ ထွက်ပြေးလွတ်‌မြောက်သွားစေခဲ့တယ်။ ပြီးနောက် ကောင်းကင်ဘုံဖောက်ဓားနတ်ဘုရားက ရုတ်တရက်ထွက်ပေါ်လာပြီး အကြိုနတ်ဘုရားသုံးယောက်ကို မောင်းထုတ်ပြီး ရေတံခွန်မိုးဓားမော့နတ်ဘုရားကို စည်းရုံးခဲ့တယ်။

သံမဏိလက်သည်းတစ္ဆေနတ်ဘုရားက ကောင်းကင်ဘုံဖောက်ဓားနတ်ဘုရားကို မဆန့်ကျင်ချင်ခဲ့ပါဘူး၊ ဒါပေမယ့် အဲဒါက အနေအထားပေါ်မှာ မူတည်တယ်။ အဆင့်မြင့်စကြာဝဠာရတနာတစ်ခုအတွက်ဆိုရင် သူက ကောင်းကင်ဘုံဖောက်ဓားနတ်ဘုရားကိုဆန့်ကျင်ရလဲ ပြဿနာမရှိဘူး။

ပုံမှန်အ‌နေအထားမှာ အဆင့်မြင့်စကြာဝဠာရတနာတစ်ခုရဲ့တန်ဖိုးက ပထမတန်းစားအဆင့်အကြိုနတ်ဘုရားအသုံးအဆောင်ပစ္စည်းတစ်ခုနဲ့ နှိုင်းယှဉ်နိုင်တယ်။

သံမဏိလက်သည်းတစ္ဆေနတ်ဘုရားရဲ့ပထမတန်းစားအဆင့်အကြိုနတ်ဘုရားအသုံးအဆောင်ပစ္စည်းက လက်သည်းအမျိုးအစားအကြိုနတ်ဘုရားအသုံးအဆောင်ပစ္စည်းတစ်ခုဖြစ်ပြီး တိုက်ခိုက်ရေးအကြိုနတ်ဘုရားအသုံးအဆောင်ပစ္စည်းတစ်ခုလည်းဖြစ်တယ်။

အသံဒါမှမဟုတ်ချီတည်ရှိမှုတစ်ခုမှ မထွက်ပေါ်ဘဲ သံမဏိလက်သည်းတစ္ဆေနတ်ဘုရားက လျှို့ဝှက်နယ်မြေက ထွက်လာပြီး ခရမ်းရောင်မျက်လုံးနတ်ဘုရားရဲ့တည်နေရာဆီ ပျံသန်းသွားလိုက်တယ်။

……

လူသားခန္ဓာကိုယ်ဆန်းကြယ်မှု၁၀၇၊ လူသားခန္ဓာကိုယ်ဆန်းကြယ်မှု၁၀၈။

လူသားခန္ဓာကိုယ်မှာ လူသားခန္ဓာကိုယ်ဆန်းကြယ်မှုစုစုပေါင်း၁၀၈ခုရှိတယ်။

လီဖူချန်းက လူသားခန္ဓာကိုယ်ဆန်းကြယ်မှုအားလုံးကို ရှာတွေ့ခဲ့ပြီးဆိုပေမယ့် သူက သူတို့ကို မူလအဆုံးစွန်းဓားနည်းစနစ်နဲ့ မပေါင်းစပ်နိုင်ခဲ့ဘူး။

လူသားခန္ဓာကိုယ်ဆန်းကြယ်မှု၁၀၈ခုက ဆက်သွယ်ပေါင်းစပ်ခဲ့တာကြောင့် သဘာဝအခြေအနေသို့ပြန်ရောက်လာတဲ့ရိုးရှင်းပြီးရှေးကျတဲ့ဓားပုံကြမ်းတစ်ခုက လီဖူချန်းနဲ့ပေါင်းစပ်လာတယ်။

ဒါက အလွန်ဆန်းကြယ်တဲ့ခံစားချက်တစ်ခုပဲ။ သူက ဓားတာအိုနဲ့စကြာဝဠာအဖြစ် ပြောင်းလဲသွားသလို လီဖူချန်းက ခံစားရတယ်။

"ဒါ အလုံးစုံတတ်သိနားလည်ခြင်းအခြေအနေကျင့်ကြံခြင်းနည်းစနစ်တစ်ခုလား"

လီဖူချန်းက ပြုံးလိုက်တယ်။ အလုံးစုံတတ်သိနားလည်ခြင်းအခြေအနေကျင့်ကြံခြင်းနည်းစနစ်က တကယ်ကို ချို့ယွင်းချက်မဲ့တာပဲ။

မူလအဆုံးစွန်းဓားနည်းစနစ်က ကြယ်ပိုင်နက်အဆင့်အလုံးစုံတတ်သိနားလည်ခြင်းအခြေအနေကို ရောက်ရှိလာတာကြောင့် အဆုံးမဲ့ဓားတာအိုရင်းမြစ်အဆီအနှစ်က စကြာဝဠာရဲ့အနက်ပိုင်းမှ ဆင်းသက်လာပြီး လီဖူချန်းရဲ့ခန္ဓာကိုယ်နဲ့ ပေါင်းစပ်သွားတယ်။ တစ်ချိန်တည်းမှာပဲ သူ့ရဲ့သက်စောင့်စွမ်းအားက အဆများစွာပိုခိုင်မာလာတယ်၊ ခမ်းနားတဲ့လက္ခဏာတစ်ခုရှိလာတယ်၊ သူက စွမ်းအားကို ကိုင်တိုင်ဖန်တီးနိုင်လာတယ်။

အကြိုနတ်ဘုရားတွေကတောင် သူတို့ရဲ့ကိုယ်ပိုင်စွမ်းအားကို မဖန်တီးနိုင်ဘူး၊ အပြင်ကမ္ဘာမှ စွမ်းအားကို စုပ်ယူရတယ်။

အပြင်ကမ္ဘာနဲ့ချိတ်ဆက်အားမှုပြတ်သွားတာနဲ့ သူတို့က သူတို့ရဲ့ကိုယ်ပိုင်သက်စောင့်စွမ်းအားကိုပဲ မှီခိုနိုင်တော့တယ်။ စွမ်းအားကုန်ဆုံးသွားတာနဲ့ သူတို့က သေရပါလိမ့်မယ်။

ဒါပေမယ့် လီဖူချန်းက မတူပါဘူး။ အပြင်ကမ္ဘာနဲ့ချိတ်ဆက်မှုပြတ်သွားရင်တောင် ကိုယ်တိုင်ဖြည့်စွမ်းနိုင်ပြီး အပြင်ကမ္ဘာမှစွမ်းအားကို စုပ်ယူစရာမလိုပါဘူး။

ဒါပေမယ့် သူ အပြင်ကမ္ဘာမှစွမ်းအားကို စုပ်ယူနိုင်ရင်တော့ ပိုကောင်းတာပေါ့လေ။

"အသန်မာဆုံးအရှင်က တကယ်ကို အသန်မာဆုံးအရှင်ပဲ။ အားနည်းချက်နဲ့ချို့ယွင်းချက်တွေ မရှိဘူးပဲ"

အသန်မာဆုံးအရှင်က ဘာလဲဆိုတာ နောက်ဆုံးတော့ လီဖူချန်းက သိပါပြီ။

သူ့ရဲ့ကျင့်ကြံခြင်းအဆင့်က အလုံးစုံတတ်သိနားလည်ခြင်းအခြေအနေမှာရှိရုံသာမက သူ့ခန္ဓာကိုယ်ကလည်း ချို့ယွင်းချက်မဲ့တယ်။

အသန်မာဆုံးအရှင်က အကြိုနတ်ဘုရားတစ်ယောက်ဖြစ်လာပြီးနောက် သူက သူ့ရဲ့ကိုယ်ပိုင်အကြိုနတ်ဘုရားစွမ်းအားကို ဖန်တီးနိုင်ဖို့များပြီး အကြိုနတ်ဘုရားစွမ်းအားအလုံအလောက်မရှိတဲ့က‌မောက်ကမဖြစ်ရပ်တွေကို ရင်ဆိုင်စရာမလိုတော့ဘူးလို့ လီဖူချန်းက ယူဆလိုက်တယ်။

ဒါပေမယ့် အသန်မာဆုံးအရှင်ရဲ့စွမ်းအားက အဆုံးမဲ့တယ်လို့တော့ မဆိုလိုဘူး။

ဖန်တီးနိုင်တဲ့စွမ်းအားက အကန့်အသတ်တစ်ခုရှိတယ်။ သုံးစွဲခြင်းက စွမ်းအားဖန်တီးတဲ့အရှိန်ကို ကျော်လွန်ရင် စွမ်းအားက ကုန်ဆုံးရအုံးမှာပဲ။ ဒါပေမယ့် အခြားသူတွေနဲ့နှိုင်းယှဉ်ရင် အနေအထားက ပိုကောင်းပါတယ်။

ဆင်းသက်လာတဲ့ဓားတာအိုရင်းမြစ်အဆီအနှစ်က မများလွန်းပါဘူး။ အများစုကို လီဖူချန်းရဲ့သက်စောင့်စွမ်းအားတိုးဖို့ အသုံးပြုခဲ့ပြီး သေးငယ်တဲ့အစိတ်အပိုင်းတစ်ခုကို လီဖူချန်းရဲ့ခန္ဓာကိုယ်ကို ပြုပြင်ဖို့ အသုံးပြုခဲ့တယ်။

အချိန်ကျလာတာနဲ့အမျှ သူ့ခန္ဓာကိုယ်မာကျောမှုက အလယ်အခြေအနေကပ်ဘေးလက်ကို တဖြည်းဖြည်းချဉ်းကပ်လာနေတယ်လို့ လီဖူချန်းက ခံစားရတယ်။ အသန်မာဆုံးအရှင်ရဲ့ခန္ဓာကိုယ်မာကျောမှုက အလွန်အမင်းကြောက်စရာကောင်းပြီး ချို့ယွင်းချက်တစ်ခုမှမရှိဘူးလို့ ဆိုလိုတယ်။

……

"ခရမ်းရောင်မျက်လုံးနတ်ဘုရား"

အလင်းနှစ်တစ်ရာအကွာမှာ တစ္ဆေပုံရိပ်တစ်ခုက ထွက်ပေါ်လာတယ်။

"နှုတ်ဆက်ပါတယ်၊ ဒုမဟာမိတ်ခေါင်းဆောင်" ခရမ်းရောင်မျက်လုံးအရှင်က တုန်လှုပ်သွားကာ သံမဏိလက်သည်းတစ္ဆေနတ်ဘုရားကို ဦးညွှတ်လိုက်တယ်။

သံမဏိလက်သည်းတစ္ဆေနတ်ဘုရားက ခေါင်းညိတ်ကာ ပြောလိုက်တယ်"ခရမ်းရောင်မျက်လုံးနတ်ဘုရား၊ မင်းက မဆိုးဘူးပဲ။ မူလအဆုံးစွန်းအရှင်ကို ရှာတွေ့တာနဲ့ မင်း ငါ့ကို ချက်ချင်း အကြောင်းကြားခဲ့တာပဲ။ မစိုးရိမ်နဲ့၊ ငါ အဆင့်မြင့်စကြာဝဠာရတနာကို ရတာနဲ့ မင်း ဆုလာဒ် သေချာပေါက်ရစေရမယ်"

"ဒုမဟာမိတ်ခေါင်းဆောင်ကို ခစားရတာ ကျွန်တော်ရဲ့တာဝန်ပါပဲ"

မြောက်ပိုင်းနယ်စပ်မဟာမိတ်မှာ ဂိုဏ်းအနည်းငယ်ရှိတယ်။ ခရမ်းရောင်မျက်လုံးနတ်ဘုရားက သံမဏိလက်သည်းတစ္ဆေနတ်ဘုရားရဲ့ဂိုဏ်းကပဲ။  သံမဏိလက်သည်းတစ္ဆေနတ်ဘုရားပိုသန်မာလေ၊ သူ့ဂိုဏ်းနဲ့ခရမ်းရောင်မျက်လုံးအရှင်အတွက် ပိုကောင်းလေလေပဲ။

"ဒီလူက မူလအဆုံးစွန်းအရှင်လား။ သူက တကယ်ကို ထူးခြားတာပဲ"

သံမဏိလက်သည်းတစ္ဆေနတ်ဘုရားက မျက်မှောင်ကြုတ်လိုက်မိတယ်။ အလင်းနှစ်ရာအနည်းငယ်အကွာရှိပျက်ဆီးနေတဲ့ကြယ်တစ်လုံးပေါ်မှာရှိတဲ့လီဖူချန်းက သူ့ကို အလွန်ထူးဆန်းတဲ့ခံစားချက်တစ်ခု ပေးစွမ်းတယ်။ အဲဒါကို ဘယ်လိုဖော်ပြရမှန်းမသိပေမယ့် သံမဏိလက်သည်းတစ္ဆေနတ်ဘုရားကို သက်ရောက်နေတုန်းပဲ။

"ငါ ဂရုမစိုက်ဘူး။ ငါက ပြောင်မြောက်တဲ့ပထမတန်းစားအဆင့်အကြိုနတ်ဘုရားတစ်ယောက်ပဲ။ အရှင်တစ်ယောက်လောက်ကို ကြောက်နေရမှာလား"

သံမဏိလက်သည်းတစ္ဆေနတ်ဘုရားက လီဖူချန်းဆီ တစ်ဟုန်ထိုးပြေးသွားတော့တယ်။