အလဲအလှယ်

“ခင်ဗျားက ဆာ-ဆာရီရယ် ဖြစ်ရမယ်။ ကျုပ်တို့ အရင်က တွေ့ဖူးပါတယ်။” တည်ငြိမ်သော အသံတစ်ခု ထွက်လာပြီး ဧရာမ မျက်လုံး သူငယ်အိမ်ကြီးများက အက်ဂ်လက်စ်၏ နောက်သို့ အကြည့်ကို တဖြည်းဖြည်း လှည့်လိုက်၏။ နတ်ဘုရား တစ်ပိုင်း အထွတ်အထိပ် အဆင့်ရှိတဲ့ ဒီအမျိုးသားက နဂါး နောက်လိုက် တစ်ဦးနဲ့ တူနေပေမဲ့ သူရဲ့မျက်လုံးထဲက တည်ငြိမ်မှုက နတ်ဘုရား-ယောင် အဆင့်ထက် အများကြီး သာနေတယ်။ နောက်ကွယ်ကနေ ကြိုးကိုင်နေတဲ့သူ လိုမျိုးပဲ။

ငါ... သူ့ကို အရင်က တွေ့ဖူးတာလား။

ဆာရီရယ်၏ အကြည့်က သူ့ကို အံ့ဩဖွယ် ဖိအားကို ခံစားစေသော်လည်း ချန်လွေ့က လူသစ် တစ်ယောက် မဟုတ်တော့။ မိုက်ကယ်၊ ဂေဘရီယယ်၊ ရာဖယ်ရယ်၊ စေတန်၊ အသူရာ ချောက်နက်၏ အုပ်စိုးသူသုံးပါးကဲ့သို့သော အထွတ်အထိပ် အဆင့် အစွမ်းထက် ပုဂ္ဂိုလ်များနှင့် ရင်ဆိုင်ပြီးနောက်တွင် ဆာရီရယ်၏ ဖိအားပေးမှုက သူ၏ စိတ်ကို ကြောက်ရွံ့ခြင်း သို့မဟုတ် တုန်လှုပ်ခြင်း လုံးဝ မဖြစ်စေနိုင်တော့ပေ။

အရေးအကြီးဆုံး အချက်မှာ သူက ယနေ့တွင် အနိုင်ရရုံသာ တတ်နိုင်ပြီး ရှုံးနိမ့်၍ မဖြစ်ပေ။

ချန်လွေ့ ဖျော့တော့သော အပြုံး တစ်ခုကို ပြုံးပြလိုက်သည်။ “ကျုပ်နာမည် အက်ဂ်ယောပါ။”

ဧရာမ မျက်လုံး သူငယ်အိမ်က အနည်းငယ် လင်းသွားပြီး မျက်လုံးများ ပို၍ပို၍ စူးရှလာခဲ့သည်။

“ဒါက သာမန်နာမည် တစ်ခုပါ။ သမိုင်း တစ်လျှောက် ထားလိုက်ဦး။ အခုလို အချိန်မှာတောင် နတ်ဆိုးဘုံမှာ ဒီနာမည်နဲ့ လူအနည်းဆုံး ထောင်နဲ့ချီပြီး ရှိပါတယ်။” ချန်လွေ့က ခပ်ပေါ့ပေါ့ ပြောလိုက်သည်။ “ဆာ-ဆာရီရယ်က အတော်လေးကို အံ့အားသင့်နေတဲ့ပုံပဲ။”

“ငါ့စိတ်ထဲမှာရှိတဲ့ နာမည်တစ်ခုနဲ့ တူနေရုံပါ။” ဆာရီရယ် နောက်ဆုံးတွင် စကားပြောလိုက်သည်။ သူ၏အသံက ဝိညာဉ်ကို ထိုးဖောက် သွားသကဲ့သို့ ထင်ရသည်။ ၎င်းက နေရာလွတ်ထဲတွင် ဟိုဟိုဒီဒီ ပဲ့တင်ထပ်နေ၏။ “တူတူ မတူတူ၊ ဘာပဲဖြစ်ဖြစ် အရေးမပါတဲ့ ပုရွက်ဆိတ် တစ်ကောင်ပါပဲ။”

ချန်လွေ့က သူ၏ အသံထဲမှ မထီမဲ့မြင်ပြုမှုကို ကြားလိုက်ဟန်မတူဘဲ ဆာရီရယ်၏ မိစ္ဆာမျက်ဆံများကို တည့်တည့် စိုက်ကြည့်လိုက်သည်။ “ဒါက အဖေတစ်ယောက်ရဲ့ နာမည် ဆိုတာကို ကျုပ် အလေးထားပြီး ပြောချင်တယ်။ လွန်ခဲ့တဲ့ လဝက်တုန်းက ခင်ဗျား ကျုပ်သမီးကို ဒီနဂါးရဲ့ လက်ထဲကနေ ယူသွားခဲ့တယ်။”

“‘သူ’က မင်း သမီးလား။” ဆာရီရယ်၏ မျက်ဆံများ ကျုံ့သွားပြီးနောက် သူက မထီမဲ့မြင် ပြုံးလိုက်သည်။ “ရယ်စရာပဲ!”

“ကျုပ်ကတော့ ရယ်စရာလို့ လုံးဝ မထင်ဘူး။ ဒီနေ့ ကျုပ် ဒီကိုလာတာ ကျုပ်ရဲ့ သမီးကို ပြန်ခေါ်ဖို့ပဲ။”

“မိုက်မဲပြီးတော့ အသိတရား မရှိတဲ့ ပုရွက်ဆိတ်! ငါ့သြဇာကို သိနေတာတောင် ဒီလိုစကားမျိုး ပြောထွက်ရဲသေးတယ်! [လဝိညာဉ်]ရဲ့ စွမ်းအားအောက်မှာ ပြာမှုန့် အဖြစ် ပြောင်းသွားစမ်း!” ငွေရောင် အလင်းတန်းတစ်ခုက ဘယ်ဘက်မှ ဧရာမ မျက်လုံးသူငယ်အိမ်ကြီးမှ ချန်လွေ့ထံသို့ ပစ်လွှတ်လာသည်။ လမ်းတစ်လျှောက်ရှိ နေရာလွတ် ဖြတ်တောက်ခံလိုက်ရသလို ထင်ရသည်။

ထိုတိုက်ကွက်၏ ဂုဏ်သတ္တိက [အစစ်အမှန်အနီရောင်ပျက်သုဉ်း]နှင့် အနည်းငယ် ဆင်တူသော်လည်း ၎င်း၏ စွမ်းအားမှာ [အစစ်အမှန်အနီရောင် ပျက်သုဉ်း]ထက် များစွာ သာလွန်သည်။

ခရမ်းရောင် ကြယ်အလင်းရောင်များ ချက်ချင်း တောက်ပလာပြီး ငွေရောင် အလင်းတန်း ရုတ်တရက် နှေးသွားကာ တိုင်းပြည်တစ်ခုလုံး အေးခဲသွား၏။ မျက်စိတစ်မှိတ်အတွင်းတွင် ပုံမှန်အတိုင်း ပြန်ဖြစ်သွားလေသည်။ မြေပြင်ပေါ်တွင် အဆုံးမရှိသော ဧရာမအပေါက်ကြီးတစ်ခု ပေါ်လာသည်။ ၎င်းမှာ ခုနက ဧရာမ သူငယ်အိမ်ကြီး၏ တိုက်ကွက်ကြောင့် ဖြစ်သည်မှာ ထင်ရှားပေသည်။ သို့သော် ခရမ်းရောင်ကြယ်အလင်း တောက်ပနေသော ပုံရိပ်က အခြား တစ်ဖက်တွင် ဦးစွာပေါ်ထွက်လာခဲ့သည်။

“မင်းကိုး။ ငါတို့ တွေ့ဖူးတာ အသေအချာပဲ။” ဆာရီရယ်က လှောင်ရယ်လိုက်သည်။ သူ ချန်လွေ့ကို ထိုနေ့က နဂါးနောက်မှ သူ့ထံမှ ကလေးမလေးကို လုယူရန် ကြိုးစားခဲ့သော နတ်ဘုရား-ယောင်အဖြစ် မှတ်မိသွားပြီ ဖြစ်သည်။ ဒီကောင်ရဲ့ အစွမ်းက နဂါးထက်တောင် သာတယ်။ အမြန်နှုန်း အရှိန်အဝါရှိတဲ့ နတ်ဘုရား-ယောင် အလယ်ပိုင်း ဖြစ်နိုင်ပေမဲ့ သူ့ရဲ့ အစွမ်းက ငါနဲ့ အများကြီး ကွာသေးတယ်။

ဒီ‘အက်ဂ်ယော’က စေတန်သတ်ခဲ့တဲ့ ငါ့လက်အောက်ငယ်သားနှင့် အများကြီး ကွာခြားသည်။ လူနှစ်ယောက် ဖြစ်ရမယ်။ တကယ်တော့ ဒါက မဖြစ်နိုင်ဘူးလေ။ စေတန်က ဘယ်သူလဲ။ သူ ဘယ်လိုလုပ် ကျရှုံးမှာလဲ။ ပြီးတော့ အဲဒီငယ်သား သေသွားတာကို ငါကိုယ်တိုင် မျက်မြင် တွေ့ခဲ့ရတာပဲ!

“ငါ့ရဲ့ [လဝိညာဉ်] စွမ်းအားကနေ ဒီလောက်မြန်မြန် ပြန်ကောင်းလာမယ်လို့ မထင်ထားခဲ့ဘူး။” ဆာရီရယ်၏ ဧရာမ မျက်လုံး သူငယ်အိမ်ကြီးများ အနည်းငယ် ကျဉ်းမြောင်းသွား၏။ “အမြန်နှုန်း အရှိန်အဝါ အပြင် မင်းမှာ... အချိန် အရှိန်အဝါလည်း ရှိသေးတယ်လား။ ဆက်ခရက်တောင်နဲ့ မင်း ဘယ်လိုမျိုး ပတ်သက်မှုရှိလဲ။”

“အချိန် အရှိန်အဝါ ရှိတဲ့ လူတိုင်းက စေတန်နဲ့ တိုက်ရိုက် ပတ်သက်နေတာ မဟုတ်ဘူး။” ချန်လွေ့ ခေါင်းခါလိုက်၏။

“ကြည့်ရတာ မင်းက စေတန်နဲ့ ငါလိုမျိုး အထွတ်အထိပ် အဆင့် အစွမ်းထက် ပုဂ္ဂိုလ်တွေနဲ့ မစိမ်းဘူး ထင်တယ်။ မဟုတ်ရင် မင်း ဒီတိုင်းပြည်ကို တိုက်ရိုက် ရှာတွေ့မှာ မဟုတ်ဘူး။ မပြည့်စုံတဲ့ [နဂါးနတ်ဘုရားမျက်လုံး] ရှိတဲ့ အဲဒီ နဂါးနက်လေးက နဂါးကျွန်းက ဖြစ်မယ်။ သူက လက်ရှိ နဂါးဧကရာဇ် ဖြစ်ပြီးတော့ မင်းရဲ့ အစွမ်းက သူ့ထက်တောင် အများကြီးသာလွန်တယ်။ ဒီနေ့ခေတ်မှာ မင်းလို အစွမ်းရှိတဲ့လူက ရှားပါးတဲ့ တည်ရှိမှု တစ်ခုပဲ။ ငါ နည်းနည်းလောက် သိချင်သား။ မင်းရဲ့ နာမည်ကို ငါ တစ်ခါမှတောင် မကြားဖူးဘူး!”

“နာမည်ဆိုတာ သင်္ကေတ တစ်ခုပါပဲ။” ချန်လွေ့က ဆာရီရယ်က အက်ဂ်လက်စ်၏ သရုပ်ကို အလွယ်တကူ သိမြင်နိုင်သည်ကို အံ့ဩခြင်းမရှိပေ။

“မင်းနဲ့ အပိုစကားတွေ ပြောနေဖို့ ငါ့မှာ အချိန်မရှိဘူး!” ဧရာမ မျက်လုံး သူငယ်အိမ်ကြီးများမှ လှောင်ရယ်သံတစ်ခု ထွက်ပေါ်လာသည်။ “မင်းက ပါးနပ်တဲ့သူ တစ်ယောက် ဆိုတော့ ကိုယ့်ကိုယ်ကို မလှည့်စားနဲ့။ အဲဒီ ကလေးမလေးရဲ့ လျှို့ဝှက်ချက်တွေကို ငါသိပြီးပြီ! မျက်စိ တစ်မှိတ်အတွင်း ခံစားနိုင်တဲ့ သားကောင် တစ်ကောင်ကို လုယူခံလိုက်ရတဲ့ မင်းရဲ့ စိတ်အခြေအနေကို ငါ နားလည်နိုင်တယ်။ ဒါပေမဲ့ ဒါက အင်အားအကြီးဆုံး ဂုဏ်ပြုခံရတဲ့ လောကကြီးပဲ။ ငါက မင်းထက် ပိုအစွမ်းထက်တယ်။ ဒါကြောင့် ငါက နတ်ဘုရားသွေးမျိုးဆက် ပိုင်ရှင်ပဲ!”

ဆာရီရယ်က သူ၏ ယူဆချက်များဖြင့် သူ့ကို တိုင်းတာလိုက်ပြီး ချန်လွေ့လည်း သော်သော်၏ သွေးမျိုးဆက်ကြောင့် ကလေးမလေးကို ‘မွေးစား’ထားပြီး သူ၏ သမီးဖြစ်ကြောင်း လိမ်လည် ပြောဆို နေသည်ဟု ထင်မြင်နေလေသည်။

ချန်လွေ့ ရှင်းမပြခဲ့ပေ။ အကြောင်းမှာ အဓိပ္ပာယ်မရှိ၍ပင်။ သူက သော်သော်၏ ဖခင်ဖြစ်ကြောင်း သက်သေပြနိုင်လျှင်ပင် ဆာရီရယ်က သူကို လွှတ်ပေးမည် မဟုတ်ပေ။ “သူ အခုဘယ်မှာလဲ။”

“ငါ့ အစစ်အမှန် တိုင်းပြည်ထဲမှာပေါ့။” ကောင်းကင်ပေါ်မှ ဧရာမမျက်လုံးကြီး တစ်ခုသည် မှန်တစ်ချပ် အဖြစ်သို့ ပြောင်းလဲသွားလေသည်။ မှန်ထဲတွင် ကလေးမလေးတစ်ဦးက အပြာနုရောင် စက်လုံးတစ်ခုထဲ မျက်လုံးများမှိတ်ကာ ကွေးကွေးလေး လဲလျောင်းနေ၏။ သူက သော်သော်ပင်။

သော်သော်၏ ခန္ဓာကိုယ်က အနီရောင် ဖျော့ဖျော့ တောက်ပနေသည်။ သူ၏ နောက်တွင် ထူးဆန်းသော အရာများကို မရေမရာ မြင်တွေ့နိုင်ပြီး ၎င်းမှာ အတောင်ပံအစ တစ်မျိုးမျိုး ဖြစ်ပုံရသည်။

“သူက အထူး သန့်စင်ခြင်း တစ်မျိုးကို ခံယူခဲ့ရပုံပဲ။ ငါ့တိုင်းပြည် စွမ်းအားရဲ့ ပံ့ပိုးမှုနဲ့ဆိုရင် သူရဲ့ သွေးမျိုးဆက်က ပြီးပြည့်စုံစွာ နိုးထလာလိမ့်မယ်။ အဲဒီ အချိန်ကျရင် ငါ ရိတ်သိမ်းရမယ့်အချိန်ပဲ။”

ချန်လွေ့က စက်လုံးထဲမှ သော်သော်ကို စိုက်ကြည့်နေစဉ် လက်သီးဆုပ်ထားသော သူ၏လက်ဆစ်များ ဖြူလာခဲ့သော်လည်း ၎င်းက သော်သော်၏ မှန်ထဲမှ ပုံရိပ်မျှသာ ဖြစ်ကြောင်း သူသိသည်။ တကယ့် နေရာမှာ ဆာရီရယ်၏ နတ်ဘုရား-ယောင်ဘဝ၏ အဓိကတိုင်းပြည်ထဲတွင် ဖြစ်ရာ သူ အမြန် တည်ငြိမ်သွားခဲ့သည်။

“မင်း ငါ့တိုင်းပြည်ထဲကို ဝင်လာရဲတဲ့ သတ္တိရှိမှတော့ အခြေအနေကို သိလောက်ပါတယ်။ ဒါကြောင့် အခု မင်းရှေ့မှာ လမ်းနှစ်ခုပဲ ရှိမယ်။ ငါ့ရဲ့ နောက်လိုက်ဖြစ်လာမလား၊ ဒါမှမဟုတ် ဖျက်ဆီးခံမလား။ မင်းရဲ့ အစွမ်းနဲ့ဆိုရင် ငါ မင်းကို အမြင့်ဆုံးအာဏာနဲ့ ယုံကြည်မှုကို ပေးမယ်။ အထူးသဖြင့် မင်း၊ ငါ မင်းရဲ့ အစွမ်းကို အသိအမှတ် ပြုတယ်၊ အနာဂတ်မှာ ငါ နတ်ဘုရားမျိုးဆက်ကို ဝါးမျိုပြီး ပိုမြင့်တဲ့အဆင့်ကို တက်လှမ်း သွားပြီးရင်တောင် မင်း ငါ့ရဲ့လက်ထောက် ဖြစ်နိုင်ပြီးတော့ ငါ့လမ်းညွှန်မှုအောက်မှာ ပိုပြီး တိုးတက်မှုတွေ ရနိုင်တယ်။ မဟုတ်ရင်တော့... မင်းဘဝရဲ့ အဆိုးဆုံးနဲ့ နောက်ဆုံးရွေးချယ်မှုကို ရင်ဆိုင်ရမယ်။”

“သေတာနဲ့ အညံ့ခံတာလား။” ချန်လွေ့ တည်ငြိမ်စွာ ခေါင်းခါလိုက်သည်။ “ဆာ-ဆာရီရယ် ကိုယ်တိုင် လေ့ကျင့်မှုမှာ ဒီလို ရွေးချယ်မှုမျိုးကို မရေမတွက်နိုင်အောင် ကြုံတွေ့ခဲ့ဖူးမယ်လို့ ယုံကြည်ပါတယ်။ ဒါက အရမ်း ခေတ်နောက်ကျနေပြီလို့ မထင်ဘူးလား။ ကျုပ်တို့ ဒီကို လာကတည်းက သေဖို့ ပြင်ဆင်ပြီးသား ဆိုတာ ခင်ဗျား မြင်သင့်တယ်။ ဒါကြောင့် သေခြင်းတရားနဲ့ ခြိမ်းခြောက်တာကို ကျုပ်တို့ စိတ်ထဲ ထည့်မှာမဟုတ်ဘူး။ ကျုပ်တို့ အားလုံးက ပါးနပ်တဲ့လူတွေပါ။ ပြောစရာမလိုတဲ့ အရာတချို့ ရှိတယ်။ တတိယ ရွေးချယ်စရာ အကြောင်းကို ပြောကြတာပေါ့။ အလဲအလှယ်လုပ်တာ။”

“ဟားဟား...” ဆာရီရယ်၏ လှောင်ရယ်သံက ကျယ်လောင်လှ၏။ “ဒီလောကကြီးမှာ ငါ့အတွက် နတ်ဘုရား သွေးမျိုးဆက်ထက် ပိုပြီးအရေးကြီးတဲ့ အရာတစ်ခုခု ရှိနေသေးတယ်လို့ မင်း ထင်တာလား။”

“သူရဲ့ နတ်ဘုရား သွေးမျိုးဆက်က တကယ်တော့ အတော် နည်းပါးတယ်။ ခင်ဗျား ဝါးမျိုတာ အောင်မြင်ရင်တောင် အကျိုး သက်ရောက်မှုက နည်းနည်းပဲ ရှိမယ်။ အထွတ်အထိပ် အဆင့်ကို ရောက်နေပြီးသား အစွမ်းထက် ပုဂ္ဂိုလ် အတွက်တော့ ရှေ့ကို ခြေတစ်လှမ်း တိုးဖို့က အတော်လေး ခက်ခဲတယ်။ တကယ်လို့ အဆင့် တစ်ခုအထိ ဖောက်ထွက် နိုင်မယ်ဆိုရင် ဒါမှမဟုတ် အနာဂတ်မှာ လမ်းကြောင်းကို ပိုချောမွေ့ သွားစေနိုင်မယ်ဆိုရင် ဒါက အတော်လေး ရှားပါးတဲ့ အခွင့်အရေးတစ်ခု ဆိုတာ မှန်ပါတယ်။ ဒါပေမဲ့ ဒီလိုဝါးမျိုတာလည်း အရဲစွန့်ရမှာနဲ့ ကျရှုံးနိုင်ခြေတွေ ရှိတယ်။ စွမ်းအားကို အဟန့်အတား ဖြစ်စေမယ့် တန်ပြန်အကျိုးသက်ရောက်မှုလည်း ရှိလာနိုင်တယ်။ ဆာ-ဆာရီရယ်တောင်မှ ၁၀၀% အောင်မြင်မယ်လို့ သေချာပေါက် ပြောနိုင်မယ် မထင်ဘူး။”

ထိုအရာများအားလုံးမှာ ဖိုက်သွန်ထံမှ ရရှိသော အသိပညာများ ဖြစ်သည်။ တူညီသောအဆင့်ရှိ အတွေ့အကြုံရှိသော အစွမ်းထက် ပုဂ္ဂိုလ်တစ်ဦး အနေဖြင့် ချန်လွေ့ ပြောလိုက်ရာ ဆာရီရယ်၏ မျက်လုံးများတွင် အနည်းငယ် အံ့ဩသော အမူအရာ ပေါ်လာသည်။ “ဟုတ်တယ်၊ မင်းရဲ့အသိပညာက မင်းရဲ့ အစွမ်းထက် ပိုပြီး ချီးကျူးစရာကောင်းပုံပဲ။ ဒါပေမဲ့ မင်းနဲ့ စကားတွေ ဝေ့ဝိုက်ပြောနေဖို့ ငါ့မှာ အချိန်မရှိဘူး။ နတ်ဘုရား မျိုးဆက်နဲ့ နှိုင်းယှဉ်နိုင်တဲ့ ဘယ်လို အရာမျိုးကို မင်း ထုတ်ပြနိုင်မှာလဲ။”

“ဒါက ဒီလိုတန်ဖိုးမျိုး သေချာပေါက် ရှိတယ်။ ဒီထက်တောင်... သာနိုင်တယ်။” ချန်လွေ့ တည်ငြိမ်စွာ ပြောလိုက်သည်။ “ပထမဆုံးအနေနဲ့ ကျုပ်ရဲ့ ရိုင်းပြမှုကို ခွင့်လွှတ်ပြီး နေရာလွတ် လှည့်ကွက်လေး တစ်ခု သုံးခွင့်ပြုပါ။”

ရှေ့တွင် ပေါ်လာသော အလင်းတံခါး တစ်ခုထဲသို့ လျှောက်ဝင်သွားပြီးနောက် သူက ထိုထဲသို့ ပျောက်ကွယ်သွားသည်။ အက်ဂ်လက်စ် တစ်ဦးတည်းသာ ကျန်ရစ် တော့သည်။

ဆာရီရယ်၏ ဧရာမမျက်လုံးများတွင် ထူးဆန်းသော အမူအရာတစ်ခု လင်းလက် သွားသည်။ ဒီနေရာလွတ် တံခါးက ငါ့ရဲ့ တိုင်းပြည်စွမ်းအားကို လုံးဝလျစ်လျူရှုပြီး ဘာကြားဖြတ်နှောင့်ယှက်မှုမှ မရှိဘဲ ပေါ်လာတယ်။ ငါ တိတ်တဆိတ် အထူး စွမ်းအား သုံးတာတောင် ‘အက်ဂ်ယော’ရဲ့ တည်နေရာကို ခြေရာခံလို့မရဘူး။

သူ၏ တိုင်းပြည် စွမ်းအားက အလင်းတံခါးကို ထိမှန်ရာတွင် ၎င်းကို ဖြတ်သွားနိုင်ရုံသာရှိပြီး အလင်းတံခါးက ဖောက်ထွင်းမြင်နိုင်သော ပုံရိပ်ယောင် တစ်ခုမျှသာ ဖြစ်သည့်အလား ထင်ရ၏။ သို့သော် ဆာရီရယ်က ‘အက်ဂ်ယော’ သည် အလင်းတံခါးထဲသို့ အမှန်တကယ် ဝင်ရောက် ပျောက်ကွယ်သွားသည်ကို အသေအချာ ခံစားမိသည်။ ဒါဆိုရင် ဒီတံခါးက သခင်က လွဲပြီးတော့ တခြား စွမ်းအားတိုင်းကို တွန်းလှန်တယ်။ သူ့ရဲ့ သခင်ထက် ပိုအားကောင်းသော တည်ရှိမှု တစ်ခု ဆိုရင်တောင်မှပေါ့။

ဒါက အထူးပါရမီ တစ်မျိုး ဖြစ်ရမယ်၊ ပြီးတော့ တစ်ဖက်က အားကိုးနေတဲ့ အရာလည်း ဟုတ်တယ်။ တကယ် ကိုင်တွယ်ရခက်တဲ့ ပါရမီပဲ။

‘အက်ဂ်ယော’၏ ပုံရိပ်က အလင်း တံခါးမှ လျင်မြန်စွာ ပြန်ထွက်လာပြီး သူ၏ လက်ထဲတွင် လေးထောင့်ပုံ အထုပ် တစ်ထုပ် ရှိနေသည်။

“ဒါပဲ။”

“မင်း ဒါနဲ့ အဲဒီကလေးမလေးကို လဲလှယ်နိုင်မယ်လို့ သေချာလား။”

“တော်တော်လေး သေချာပါတယ်။ ဘာလို့လဲဆိုတော့ ဒါကို ဆာ-ဆာရီရယ် တင်မကဘူး။ စေတန်တောင်မှ အမြဲတမ်း တပ်မက်နေလို့ပါ။” ချန်လွေ့ အထုပ်ကို ဖြည်းညှင်းစွာ ဖွင့်လိုက်သည်။

“ဟမ့်! ဒီလောက်က...” ဆာရီရယ် စကားမဆုံးခင်မှာပင် သူ၏မျက်လုံးက ရုတ်တရက် ကျုံ့သွားသည်။ အကြောင်းမှာ အထုပ်ထဲမှ အရာကို မြင်တွေ့လိုက်၍ပင်။

သေတ္တာ။

ငွေသေတ္တာ။

ဧကန္တ...

“တစ်ခုခုရဲ့ ၇ပုံ ၁ပုံ။ ပြီးတော့ ၂ပုံ ၁ပုံလည်း ဟုတ်တယ်။ နည်းနည်း ဆန့်ကျင်ဘက် ဖြစ်နေသလိုပဲ။ ဒါပေမဲ့ ဆာ-ဆာရီရယ် အတွက်တော့ ကျုပ် ထပ်ရှင်းပြစရာ မလိုဘူး ထင်ပါတယ်။” ချန်လွေ့က ငွေသေတ္တာကို အနည်းငယ် ဟလိက်ရာ နေရာလွတ် တစ်ခုလုံးသည် ကြောက်မက်ဖွယ်ရာ ပျက်စီးခြင်း အငွေ့အသက်ဖြင့် ချက်ချင်းပင် ပြည့်နှက်သွားလေသည်။

ချန်လွေ့ သေတ္တာကို ပိတ်လိုက်ရာ အငွေ့အသက် ချက်ချင်း ပျောက်သွား၏။

ဆာရီရယ် တုံ့ပြန်မှု မပြုနိုင်ခင်မှာပင် ချန်လွေ့က အလင်းတံခါးထဲသို့ ချက်ချင်း ပျောက်ကွယ်သွားခဲ့သည်။

သူ နောက်တစ်ကြိမ် ပေါ်လာရာတွင် ငွေသေတ္တာသည် မရှိတော့ပေ။

“ဒါက ကျုပ်ရဲ့ သမီးကို လဲလှယ်ဖို့ လုံလောက်ရဲ့လား မသိဘူး။”

“မင်း... မင်းမှာ ဒီအရာ တကယ်ပဲ ရှိနေတာလား!” ဆာရီရယ်၏ အသံက စိတ်လှုပ်ရှားလာသည်။ တခြားတစ်ဖက်၏ အပေးအယူလုပ်စရာက အမှန်တကယ် ပျက်စီးခြင်း စာအုပ် ဖြစ်နေလိမ့်မည်ဟု သူ လုံးဝ မတွေးမိခဲ့ပေ!

ထိုစဉ်က သူသည် ပျက်စီးခြင်းစာအုပ် အတွက် စေတန်၊ ဖိုက်သွန်နှင့် အခြား သူများနှင့် အစွမ်းကုန် ယှဉ်ပြိုင်ခဲ့ရသည်။ ပထမအကြိမ်တွင် ဖိုက်သွန်က သူ၏ ခန္ဓာကိုယ်ကို စွန့်လွှတ်ရန် မတွန့်ဆုတ်ဘဲ ငွေသေတ္တာ နှင့်အတူ ထွက်ပြေး လွတ်မြောက် သွားခဲ့သည်။ ဒုတိယ အကြိမ်တွင် အတွက်အချက် မှားခဲ့ပြီး ရလုနီးပါး ဖြစ်နေသော ငွေသေတ္တာကို စေတန်က လုယူသွားခဲ့သည်။ သူက ထိုရှုံးနိမ့်မှုနှစ်ခုကို အကြီးမားဆုံးသော ဆုတ်ယုတ်မှုများအဖြစ် မှတ်ယူခဲ့သည်။ ယခုတစ်ကြိမ်တွင် တစ်စုံတစ်ယောက်က ငွေသေတ္တာကို သူ့ထံသို့ အရောက် ပို့ပေးနေခဲ့သည်!

စေတန်က ငွေသေတ္တာ နှစ်လုံး ရထားတယ်။ သူက ငွေသေတ္တာတွေကို နတ်ဘုရားမျိုးဆက်နဲ့ ဘယ်တော့မှ လဲလှယ်မှာ မဟုတ်ဘူး။ ဒါက ဖိုက်သွန် ယူသွားခဲ့တဲ့ ငွေသေတ္တာ ဖြစ်ရမယ်၊ ပြီးတော့ တစ်နည်းနည်းနဲ့ ဒီလူရဲ့ လက်ထဲကို ရောက်သွားတာပဲ!

ဒါက ပျက်စီးခြင်း စာအုပ်ရဲ့ နောက်ဆုံး အပိုင်းပဲ။ ငါ ဒါကို ရလိုက်တာနဲ့ စေတန်နဲ့ ယှဉ်ပြိုင်နိုင်တဲ့ အစွမ်းကို ရလိမ့်မယ်။ အဲဒီအားကောင်းတဲ့ ပျက်စီးခြင်း ဇစ်မြစ် စွမ်းအားတင် မကဘူး။ ဖြစ်နိုင်ရင် ငါ စေတန်နဲ့ ပူးပေါင်းပြီးတော့ ပြည့်စုံတဲ့ ပျက်စီးခြင်း စာအုပ်ကို အသုံးချပြီး ရာဖယ်ရယ်နဲ့ တခြားသူတွေလိုမျိုး နတ်ဘုရားယုံကြည်မှုကို ကိုယ့်အတွက် ခိုးယူ သုံးစွဲပြီး ပိုမြင့်တဲ့ နယ်ပယ်ကို တပ်မက်လို့ ရနိုင်တယ်။

ထာဝရ မိတ်ဆွေ၊ ထာဝရ ရန်သူ ဆိုတာ မရှိဘူး။ ထာဝရ အကျိုးစီးပွားပဲ ရှိတယ်။

စေတန် အတွက်လည်း အတူတူပဲ။ ဆာရီရယ် ၎င်းကို ကောင်းကောင်းသိ၏။

“ဆာ-ဆာရီရယ်။ ကျုပ်တို့ အရေးမပါတဲ့ ရွေးချယ်မှု တချို့ကို စွန့်လွှတ်ပြီးတော့ ကောင်းကောင်းမွန်မွန် စကားပြောလို့ ရပြီလား။”

ချန်လွေ့၏ အသံက ဆာရီရယ်ကို လျင်မြန်စွာ သတိ ပြန်ဝင်လာစေသည်။ ဟုတ်တယ်။ တန်ဖိုး တစ်ခုတည်းအရ ဆိုရင် ပျက်စီးခြင်း စာအုပ်က ကျရှုံးနိုင်ခြေ ရှိပြီး တန်ပြန် အကျိုးသက်ရောက်မှုတွေ ဖြစ်နိုင်တဲ့ နတ်ဘုရားသွေးမျိုးဆက်ထက် ပိုရေရှည်ခံပြီး တည်ငြိမ်တဲ့အရာပဲ။

လနှစ်စင်း တဖြည်းဖြည်း ပေါင်းစပ် သွားပြီး ရွှေရောင် ဆံပင်ကောက်နှင့် နူးညံ့ သိမ်မွေ့မှုကို ခပ်ရေးရေး ခံစားရစေသော မသဲမကွဲ မျက်နှာရှိသည့် ပုံရိပ်တစ်ခု အဖြစ်သို့ ပြောင်းလဲသွားသည်။ သူက ဝတ်ရုံ တစ်ထည်ကို ဝတ်ဆင်ထားသည်။ ၎င်းမှာ ဆာရီရယ်၏ မူလခန္ဓာကိုယ်ပင်။

“ရတာပေါ့။” ဆာရီရယ် ပြုံးလိုက်၏။ ဒီအခွင့်အရေးက တစ်သက်မှာ တစ်ခါပဲ ရနိုင်တယ်။ ဆာရီရယ်ဆိုတဲ့ ငါက အမြင့်ဆုံး လမ်းကြောင်းပေါ်ကို တကယ် စတင်လျှောက်လှမ်းပြီး နတ်ဘုရားတွေရဲ့ ဆည်းဆာချိန်ပြီးတော့ နတ်ဘုရားအသစ် ဖြစ်လာဖို့ ဖြစ်နိုင်ခြေရှိတယ်။

ပျက်စီးခြင်း စာအုပ် တစ်ခုတည်းတင် မကဘူး။ ငါ့အတွက် လမ်းခင်းပေးနိုင်မယ့် နတ်ဘုရား သွေးမျိုးဆက်လည်း ရှိတယ်။