မင်းကြီးက မင်းကြီးပါပဲ

ဤအမျိုးသမီး၏ အသံကို ကြားလိုက်ရသောအခါ လေဝမ်တလည်း ဝိညာဉ်လွင့်ထွက်မတတ် ကြောက်လန့်သွားသည်။ ထို့နောက် သူ၏ခြေလှမ်းများကို ရုတ်တရက် ရပ်တန့်လိုက်ပြီး ရှေ့သို့ စိုက်ကြည့်လိုက်သည်။

သူ၏အရှေ့တွင် ရင်သပ်ရှုမောဖွယ်အလှနှင့် ကျော့ရှင်းသော ကိုယ်ဟန်ရှိသည့် အမျိုးသမီးတစ်ဦး ရပ်နေသည်။ သူမသည် ဖြူဖွေးသော ဝမ်းဗိုက်ကို ဖော်ပြနေသည့် ပေါ့ပါးသော ပိုးသားဝတ်ရုံကို ဝတ်ဆင်ထားပြီး သူမ၏အသားအရေမှာ ရေခဲနှင့် ကျောက်စိမ်းကဲ့သို့ ချောမွေ့ကြည်လင်ကာ ဆွဲဆောင်မှုရှိသော အလှကို ထုတ်လွှတ်နေသည်။

သို့သော် လေဝမ်တ ထိုအခိုက်တွင် ပေါ့ဆရဲခြင်း မရှိပေ။ အဘယ်ကြောင့်ဆိုသော် ထိုအမျိုးသမီးသည် သူမ၏ အငွေ့အသက်ကို ချုပ်တည်းထားသော်လည်း ကောင်းကင်လူသား စွမ်းအားရှင်တစ်ဦးဖြစ်ကြောင်း သူပြောနိုင်သောကြောင့် ဖြစ်သည်။

အမှန်တကယ်‌တော့ လေဝမ်တ မုယန်စီ၏ အဆင့်နယ်ပယ်ကို လျှော့တွက်ခဲ့ခြင်း ဖြစ်သည်။ သူမသည် ကောင်းကင်လူသား စွမ်းအားရှင်တစ်ဦး မဟုတ်ပါ။ မူလအစကမ္ဘာနယ်ပယ်အဆင့်တစ်ဦး ဖြစ်သည်။

ဟုတ်ပါသည်။ ဤကမ္ဘာလောက၏ ကောင်းကင်ဘုံလမ်းစဉ်၏ ကန့်သတ်ချက်များကြောင့် ယခုအချိန်တွင် သူမ၏ မူလအစကမ္ဘာ၏ နယ်ပယ် အစွမ်းအပြည့်ကို ထုတ်သုံးနိုင်ခြင်း မရှိပေ။

လုချန်းထံမှ ထွက်ခွာလာပြီးနောက်

မုယန်စီသည် နဂါးနက်မြို့တော်သို့ ထွက်ပြေးလာခဲ့ပြီး မြူခိုးဒေသ၏ ကန့်သတ်ချက်များ ပျောက်ကွယ်သွားသည်နှင့် မြူခိုးဒေသသို့ ပြန်ကာ ထိုမှတစ်ဆင့် ဤကမ္ဘာမှ ထွက်ခွာရန် အခြားနည်းလမ်းတစ်ခုကို ရှာဖွေရန် ရည်ရွယ်ခဲ့သည်။

သို့သော်လည်း မကြာသေးမီ ရက်များအတွင်း သူမ ထိုအရည်အချင်းမရှိသော ဧကရာဇ်ကို ပို၍ပို၍ လွမ်းဆွတ်လာသည်ကို တွေ့ရှိခဲ့ရသည်။ အထူးသဖြင့် သူမ ကျင့်စဉ်ကျင့်လျှင် စိတ်မငြိမ်မသက်မှုများက သူမ၏ခန္ဓာကိုယ်ကို လွှမ်းမိုးလာတတ်၏။ သူမ၏အတွေးများက သူ့အပေါ်တွင်သာ ရောက်နေသည်။

တဖြည်းဖြည်းနှင့် တစ်စုံတစ်ခု မှားယွင်းနေကြောင်း မုယန်စီ သဘောပေါက်လာသည်။ သူမထွက်သွားမည် မဟုတ်ကြောင်း လုချန်းက သေချာနေသောကြောင့် သူမနောက်သို့ လိုက်မလာခြင်းဖြစ်သည်ဟု သူမ သံသယဝင်မိသည်။ ထို့ကြောင့် သူက သူမကို တမင်သက်သက် လွှတ်ပေးလိုက်ခြင်း ဖြစ်သည်။

အစပိုင်းတွင် ထိုအရာကို စိတ်ခံစားမှုဆိုင်ရာ စမ်းသပ်မှုတစ်ခု ဖြတ်ကျော်ခြင်းဟု သဘောထားကာ ကြံ့ကြံ့ခံရန် သူမ စီစဉ်ထားခဲ့သည်။ သို့သော် စိတ်ခံစားချက်များက သည်းမခံနိုင်လောက်အောင် ကြီးထွားလာခဲ့ပြီး နောက်ဆုံးတွင် သူမ ရူးသွပ်သွားနိုင်သည်ဟု ခံစားခဲ့ရသည်။ ထို့ကြောင့် လုချန်းထံ ပြန်သွားပြီး ရင်ဆိုင်ရန် သူမ ဆုံးဖြတ်လိုက်ရတော့သည်။

ထိုအရည်အချင်းမရှိသော ဧကရာဇ်က သူမ၏ အတွေးများကို လုံးလုံးလျားလျား ဖမ်းစားနိုင်သည်အထိ သူမအပေါ် ဘာများလုပ်ခဲ့သည်ကို သိနိုင်ရန် သူမ ဆုံးဖြတ်ထားသည်။

ရန်ခရိုင်သို့ သွားရန် ပြင်ဆင်နေစဉ်တွင် မြူခိုးမှော်ဂိုဏ်းနှင့် တန်ခိုးရှင် တစ်သောင်းဂိုဏ်းတို့က လင်ဟူဂိုဏ်းကို ဝိုင်းရံတိုက်ခိုက်နေသည်ကို မမျှော်လင့်ပဲ တွေ့ရှိခဲ့ရပြီး သူတို့၏အခြေအနေကို မုယန်စီ သိသွားခဲ့သည်။

သူမသည် လင်ဟူဂိုဏ်း၏ တပည့်များနောက်သို့ ကျူးမြို့တော်ဟောင်းအထိ နောက်ယောင်ခံ လိုက်ပါခဲ့ပြီး လမ်းတစ်လျှောက်တွင် လျှိုချင်းချိုနှင့် ပတ်သက်သော သတင်းအချက်အလက်အချို့ကို စုဆောင်းခဲ့သည်။

လက်ရှိတွင် သူမ လျှိုချင်းချို၏ အခြေအနေကို စိုးရိမ်နေသည်။ သူမနှင့်အတူ လုချန်း၏ ဖမ်းဆီးခြင်းကို ခံခဲ့ရသူ လျှိုချင်းချိုတစ်ယောက် သူ၏လက်ထဲတွင် လုံးဝ စားသုံးခံလိုက်ရပြီလားဆိုသည်ကို မုယန်စီ အလွန်သိချင်နေသည်။

သူမရရှိခဲ့သော သတင်းအချက်အလက်များအရ လျှိုချင်းချိုသည် အမှန်တကယ်ပင် လုချန်း၏ မိဖုရားကြီး ဖြစ်လာခဲ့ပြီး လုချန်း စားသုံးပြီးဖြစ်လောက်သည်။

လျှိုချင်းချို၏ ကံကြမ္မာကို တွေးမိသောအခါ သူမကိုယ်တိုင်လည်း ထိုအရည်အချင်းမရှိသော ဧကရာဇ်၏ လက်မှ လွတ်မြောက်နိုင်မည် မဟုတ်ဟု မုယန်စီ ခံစားမိသည်။ လျှိုချင်းချိုကဲ့သို့ အရေးပါသော ပုဂ္ဂိုလ်ကိုပင် အမဲလိုက်ရဲသူဖြစ်သောကြောင့် သူမအပေါ် သူ၏သဘောထားမှာလည်း ထိုအတိုင်းပင် ဖြစ်ပေမည်။

မည်သို့ပင်ဖြစ်စေ သူမ ရန်ခရိုင်သို့ သွားရမည်ဖြစ်သည်။ လုချန်းအပေါ်ထားရှိသော သူမ၏ခံစားချက်များကို ဖြေရှင်းရန် လိုအပ်သည်။ မဟုတ်ပါက သူမသည် ဤကမ္ဘာမှ ထွက်ပြေးသွားနိုင်လျှင်ပင် သူမ၏ စိတ်ခံစားမှုဆိုင်ရာ အစမ်းသပ်ခံရခြင်းကို ကျော်လွှားနိုင်မည်မဟုတ်ပဲ သူမ၏ အတွင်းစိတ်မှ နတ်ဆိုးများ ပို၍ဆိုးရွားလာမည်သာ ဖြစ်သည်။

မုယန်စီသည် အစပိုင်းတွင် ကျူး မြို့တော်ဟောင်းသို့ တိုက်ရိုက်ဝင်ရောက်ရန် စဉ်းစားခဲ့သော်လည်း လျှိုကျိန့်ချူတို့က လင်ဟူဂိုဏ်း၏ တပည့်များကို တိုက်ခိုက်နေသည်ကို မြင်သောအခါ ပုန်းအောင်းရန် နေရာတစ်ခု ရှာလိုက်သည်။

သူမမျှော်လင့်ထားသည့်အတိုင်း လင်ဟူဂိုဏ်း၏ တပည့်များသည် ကြာရှည်မခံနိုင်ခဲ့ပဲ လင်ဟူဂိုဏ်း၏ အဓိကပုဂ္ဂိုလ်ဖြစ်သော လေဝမ်တလည်း ထွက်ပြေးသွားခဲ့သည်။ လေဝမ်တ ထွက်ပြေးသွားသည်ကို မြင်သောအခါ သူ့ကို ဖမ်းဆီးရန် မုယန်စီ စဉ်းစားမိသည်။ ထိုသို့ပြုလုပ်ခြင်းဖြင့် ထိုအရည်အချင်းမရှိသော ဧကရာဇ်၏ မျက်နှာသာကို ရနိုင်ပြီး သူနှင့် စကားပြောရန် အခွင့်အရေး ရှာတွေ့နိုင်မည်ဖြစ်သည်။

လေဝမ်တက မုယန်စီကို တစ်ချက်ကြည့်လိုက်ပြီးနောက် ပြုံးကာ

“နတ်သမီးလေး။ ကျွန်တော်တို့ကြားမှာ အငြိုးအတေး မရှိပါဘူး။ ကျွန်တော့်ကို ဖြတ်သွားခွင့်ပြုနိုင်မလားလို့ သိချင်ပါတယ်။”

မုယန်စီက လျှိုကျိန့်ချူတို့အုပ်စုထဲမှ ကောင်းကင်လူသား ဟုတ်မဟုတ် လေဝမ်တ မသေချာသော်လည်း သူ၏ လမ်းကိုပိတ်ဆို့ထားခြင်းကြောင့် သူမတွင် မကောင်းသော ရည်ရွယ်ချက်များ ရှိနိုင်သည်ကို သူသဘောပေါက်သည်။

ထိုစကားကို ကြားသောအခါ မုယန်စီ၏ နှုတ်ခမ်းများလည်း စွဲမက်ဖွယ်အပြုံးတစ်ခုအဖြစ် ကွေးညွတ်သွားပြီး သူမက မေးလိုက်သည်။

“ကျင့်စဉ်ကျင့်ဖော်။ ခရီးသွားဖို့ ဘာလို့ဒီလောက် အလျင်လိုနေတာလဲ။ ဘယ်ကိုများ ဦးတည်နေတာလဲ။”

မုယန်စီတွင် လမ်းဖယ်ပေးရန် အစီအစဉ်မရှိသည်ကို မြင်သောအခါ လေဝမ်တ စိုးရိမ်လာသည်။ အမြန်ခရီးသွားအင်းက သူ့ကို ကောင်းကင်လူသား စွမ်းအားရှင်များ၏ လိုက်လံရှာဖွေမှုမှ ယာယီရှောင်တိမ်းနိုင်စေခဲ့သော်လည်း သူတို့သာ သူ၏အငွေ့အသက်ကို ဆက်လက်ခြေရာခံနေပါက နောက်ဆုံးတွင် သူ့ကို လိုက်မှီလာကြမည်ဖြစ်သည်။

လေဝမ်တက အမြန်ပြောလိုက်သည်။

“နတ်သမီးလေး။ ကျွန်တော်က လင်ဟူဂိုဏ်းက တပည့်တစ်ယောက်ပါ။ ဒီနေ့ ကျွန်တော့်ကို အသက်ချမ်းသာပေးမယ်ဆိုရင် မြူခိုးဒေသရဲ့ ကန့်သတ်ချက်တွေ ပျောက်ကွယ်သွားပြီး လင်ဟူဂိုဏ်းက ထျန်းချန်တိုက်ကြီးကို ရောက်လာတဲ့အခါ လင်ဟူဂိုဏ်းက နတ်သမီးလေးကို ကျေးဇူးအကြီးအကျယ် ဆပ်ပါလိမ့်မယ်။”

မုယန်စီက ရယ်မောကာ

“မြူခိုးဒေသက လူတစ်ယောက်ဖြစ်တဲ့ ကျွန်မက မြူခိုးဒေသက အရုပ်ကလေးတွေကို စိတ်ဝင်စားမယ်လို့ရှင်ထင်နေတာလား။”

လေဝမ်တ၏ နှလုံး တစ်ချက်တုန်သွားသည်။

ဤအမျိုးသမီးကလည်း မြူခိုးဒေသမှ လာတာလား။

ဘယ်လိုလုပ် ဖြစ်နိုင်မည်နည်း။ မြူခိုးဒေသ၏ ကန့်သတ်ချက်များက မပျောက်ကွယ်သေးပေ။ ဤကောင်းကင်လူသား စွမ်းအားရှင်က ဤနေရာသို့ မည်သို့ရောက်ရှိလာနိုင်ခဲ့သနည်း။

ဤအမျိုးသမီးလည်း လွန်ခဲ့သောအချိန်တစ်ခုတည်းက အာကာသအက်ကွဲကြောင်းတစ်ခုကို ရှာဖွေတွေ့ရှိခဲ့ပြီး ကောင်းကင်လူသား စွမ်းအားရှင်အဆင့်သို့ မရောက်မီ ဤကမ္ဘာသို့ ရောက်ရှိလာခဲ့ခြင်း ဖြစ်ရမည်ဟု မကြာမီ လေဝမ်တ ကောက်ချက်ချလိုက်သည်။ သူမသည် ဤတိုက်ထဲရောက်မှာသာ ကောင်းကင်လူသား စွမ်းအားရှင်အဆင့်သို့ တက်လှမ်းခဲ့ခြင်း ဖြစ်မည်။

ထို့နောက် လေဝမ်တက

“နတ်သမီးလေးကလည်း မြူခိုးဒေသက လာတယ်ဆိုမှတော့ လင်ဟူဂိုဏ်းရဲ့ အဆင့်အတန်းကို သိသင့်ပါတယ်။ လင်ဟူဂိုဏ်းကို ပြစ်မှားမိရင် သူတို့က လက်စားချေမှာကို မကြောက်ဘူးလား။”

မုယန်စီက မထူးခြားသလို ပြောလိုက်သည်။ “လင်ဟူဂိုဏ်းကို ဘာလို့ကြောက်ရမှာလဲ။ ကျွန်မ မှတ်မိသလောက်တော့ ရှင့်တို့ရဲ့ လင်ဟူဂိုဏ်းမှာ ယင်ယန်နယ်ပယ် အဆင့်က တစ်ယောက်ပဲ ရှိတာ။ ကောင်းကင်ဘုံ လမ်းစဉ်ရဲ့ ကန့်သတ်မှုသာ မရှိရင် ယင်ယန်နယ်ပယ်တစ်ယောက်မပြောနဲ့ နောက်ထပ် သုံးလေးယောက် ထပ်လာရင်တောင် ကျွန်မ လုံးဝမကြောက်ဘူး။”

မုယန်စီ၏ စကားကို ကြားသောအခါ လေဝမ်တ လုံးဝ ကြက်သေသေသွားသည်။

ဤအမျိုးသမီး၏ သတ္တိသည် အံ့ဩစရာကောင်းလှသည်။

သူမ၏ အဆင့်နယ်ပယ်က ကောင်းကင်လူသား စွမ်းအားရှင် နယ်ပယ်ထက် ပိုနိုင်သလား။

မည်သို့ ဖြစ်နိုင်မည်နည်း။

ကန့်သတ်ချက်များကြောင့် ကောင်းကင်လူသား စွမ်းအားရှင်များ ဤတိုက်ထဲသို့ မလာနိုင်ကြပေ။ အကယ်၍ သူမသာ သူမပြောသကဲ့သို့ စွမ်းအားကောင်းပါက ဤနေရာသို့ မည်သို့ရောက်ရှိလာခဲ့သနည်း။

သတိပြန်ဝင်လာပြီးနောက် လေဝမ်တက ချက်ချင်း ပြောလိုက်သည်။

“စကားကြီးစကားကျယ်တွေ ပြောတတ်လိုက်တာ။”

မုယန်စီက ခပ်ရေးရေး ပြုံးလိုက်သည်။

“ကောင်းပြီ။ အချိန်မဖြုန်းတော့ဘူး။ မင်းကြီးရဲ့ လူတွေ ရောက်လာရင် ကျွန်မရဲ့ စွမ်းဆောင်မှုတွေ အလုခံရလိမ့်မယ်။”

သူမစကားပြောနေစဉ်တွင်ပင် မုယန်စီ၏ ခြေကျင်းဝတ်မှ ခေါင်းလောင်းများ မြည်လာပြီး မြင်နိုင်သော ခေါင်းလောင်းသံလှိုင်းများကို ထုတ်လွှတ်လိုက်သည်။ လေဝမ်တ မတုံ့ပြန်နိုင်မီ သူ၏ခန္ဓာကိုယ် မလှုပ်ရှားနိုင်တော့သည်ကို သူတွေ့ရှိလိုက်ရသည်။

လေဝမ်တ ကြိုးစား ရုန်းကန်ခဲ့သော်လည်း အသုံးမဝင်ခဲ့ပေ။ သူ၏မျက်နှာသည် ထိတ်လန့်မှုများဖြင့် ပြည့်နှက်နေပြီး အသက်ချမ်းသာပေးရန် အလျင်အမြန် တောင်းပန်လိုက်သည်။

“အသက်ချမ်းသာပေးပါ နတ်သမီးလေး။ ကျွန်တော့်အဖေက လင်ဟူဂိုဏ်းက အကြီးအကဲတစ်ယောက်ပါ။ နတ်သမီးလေးသာ ကျွန်တော့်ကို အသက်ချမ်းသာပေးမယ်ဆိုရင်…”

လေဝမ်တ စကားမဆုံးမီ မုယန်စီက ဖြတ်ပြောလိုက်သည်။

“ရှင့်ကို သတ်မယ်လို့ ကျွန်မ မပြောမိပါဘူး။ ဘာလို့ ဒီလောက် ကြောက်နေရတာလဲ။”

လေဝမ်တ အခြားစကားတစ်ခွန်း ထပ်ပြောတော့မည့်အချိန်တွင် သူ၏ပါးစပ်ကို ဖွင့်မရတော့သည်ကို ရုတ်တရက် တွေ့ရှိလိုက်ရသည်။

“အွန်း အွန်း အွန်း…”

လေဝမ်တ၏ ရုန်းကန်နေသော ပုံစံကိုကြည့်ရင်း မုယန်စီ ညင်သာစွာ သက်ပြင်းချလိုက်သည်။ ထိုအချိန်က လုချန်းသည်လည်း ညီညွတ်ခြင်းအဆင့်တွင် ရှိခဲ့သည်။ သူတို့နှစ်ဦးစလုံး ညီညွတ်ခြင်းအဆင့်တွင် ရှိခဲ့ကြသော်လည်း အဘယ်ကြောင့် စွမ်းအားကွာဟချက်က ဤမျှကြီးမားနေရသနည်း။

ဤ လေဝမ်တသည် မြူခိုးဒေသမှ ညီညွတ်ခြင်းအဆင့် ကျင့်စဉ်ကျင့်သူတစ်ဦးဖြစ်သော်လည်း သူမ၏ရှေ့တွင် ခုခံနိုင်စွမ်းမရှိခဲ့ပေ။ သို့သော် လုချန်းကတော့ သူမနှင့် လျှိုချင်းချိုကို အနိုင်ယူရုံသာမက သူတို့ကိုပင် ဖမ်းဆီးနိုင်ခဲ့သည်။

မုယန်စီ ထိုအကြောင်းကို ဆက်မတွေးတော့ပေ။ ထို့နောက် နောက်ပြန်လှည့်ကာ ရန်ခရိုင်ဘက်သို့ အမြန်ဦးတည်လိုက်သည်။ လေဝမ်တလည်း သူမ ဦးတည်ရာနောက်သို့ လိုက်ပါကာ ရန်ခရိုင်ဘက်သို့ မျောလွင့်သွား တော့သည်။

မုယန်စီနှင့် လေဝမ်တတို့ ရှိခဲ့သောနေရာသို့ ရှထျန်းယွမ် ရောက်ရှိလာသောအခါ လေထုထဲတွင် သူရင်းနှီးသော ကောင်းကင်လူသား စွမ်းအားရှင်တစ်ဦး၏ စိတ်ဝိညာဉ် စွမ်းအား အကြွင်းအကျန်ကို အာရုံခံမိပြီး ချက်ချင်း နားလည်သွားသည်။

ရန်ခရိုင်ဘက်သို့ ငေးကြည့်နေသော ရှထျန်းယွမ်၏မျက်လုံးများတွင် လေးစားမှုများဖြင့် ပြည့်နှက်နေသည်။

မင်းကြီးက မင်းကြီးပါပဲ။

မကြာမီပင် အနားတွင် ခစားမည့် မိန်းမပျိုတစ်ဦး ထပ်ရတော့မည်ဖြစ်သည်။