ရီမိသားစုမှာ ပြည်သူ့ပစ်မှတ် ဖြစ်လာခြင်း_၂...

~သူသည် အခြားဌာနခွဲတစ်ခုသို့ အထူးတလည် သွားရောက်ကာ နောက်ထပ် နတ်ဘုရားလက်နက်တစ်ခုကို ထပ်မံရယူခဲ့လေ၏။

နတ်ဘုရားလက်နက်နှစ်ခုသည် နဂါးမျိုးနွယ်စု၏ အင်အားဥစ္စာအများစုကို ကုန်ခန်းသွားစေခဲ့သော်လည်း၊ မာနကြီး စစ်မှန်သောနတ်ဘုရားအတွက်မူ ဤသည်မှာ လုံးဝထိုက်တန်သော ရင်းနှီးမြှုပ်နှံမှုတစ်ခုပင် ဖြစ်သည်။

သူနှင့် အကြီးအကဲ တစ်ယောက်စီတွင် နတ်ဘုရားလက်နက် တစ်ခုစီ ရှိသွားခဲ့ပြီဖြစ်ရာ၊ ဤသည်မှာ အလယ်အလတ်အဆင့် စစ်မှန်သောနတ်ဘုရားနှစ်ယောက်စာနှင့် ညီမျှသော တိုက်ခိုက်ရေးအင်အားကို ပိုင်ဆိုင်လိုက်သကဲ့သို့ပင်တည်း။

နောက်ဆုံးတော့ နဂါးမျိုးနွယ်စုအတွက် အားကိုးစရာတစ်ခု ရရှိသွားခဲ့လေပြီ။

နတ်ဘုရားလက်နက်နှစ်ခုကို ရရှိပြီးနောက် မာနကြီး စစ်မှန်သောနတ်ဘုရားသည် အတိုင်းမသိ ကျေနပ်သွား၏။

ထို့နောက်တွင်တော့ အော့ထျန်းသည် ဖီးနစ်မျိုးနွယ်စုမှ ဖီးနစ် စစ်မှန်သော နတ်ဘုရားထံသို့ အကြောင်းကြားလိုက်လေသည်။

ပြီးခဲ့သည့်တစ်ကြိမ်က ဖီးနစ် စစ်မှန်သော နတ်ဘုရားသည် ရီထျန်းရှင်းဘက်မှ ရပ်တည်ပေးခဲ့သည့်အချိန်မှစ၍ ဖီးနစ်မျိုးနွယ်စုမှာ ရီမိသားစု၏ မိတ်ဆွေများ ဖြစ်လာခဲ့သည်။

ရီမိသားစု၏ မိတ်ဆွေသည် သူ၏နဂါးမျိုးနွယ်စု၏ မိတ်ဆွေပင် ဖြစ် လေသည်။

ယခုအချိန်တွင် ဖီးနစ်မျိုးနွယ်စုနှင့် နဂါးမျိုးနွယ်စုကြားမှ ဆက်ဆံရေးသည် နှစ်သန်းပေါင်းများစွာအတွင်း သမိုင်းတစ်လျှောက် အရင်းနှီးဆုံးသော ဆက်ဆံရေးဟု ဆိုနိုင်လေ၏။

ယခုကဲ့သို့ သတင်းကောင်းမျိုးကို သူ၏မိတ်ဆွေကောင်းထံ ပြောပြရမည်မှာ မြေကြီးလက်ခတ်မလွဲပင်။

မာနကြီး စစ်မှန်သောနတ်ဘုရားထံမှ သတင်းစကားကို ကြားလိုက်ရသည့်အခါ ဖီးနစ်စစ်မှန်သောနတ်ဘုရား၏ ပထမဆုံးတုံ့ပြန်မှုမှာ ထိုသူ နောက်နေသည်ဟု ထင်လိုက်ခြင်း ဖြစ်သည်။

သို့သော် တစ်ဖန်ပြန်စဉ်းစားကြည့်သောအခါ၊ မာနကြီး စစ်မှန်သောနတ်ဘုရားသည် ဤသို့သောကိစ္စမျိုးကို နောက်ပြောင်တတ်သူ တစ်ယောက် မဟုတ်ပေ။

ဤသို့သောကိစ္စမျိုးသည် အမှန်အမှားသိရန် ကိုယ်တိုင်သွားကြည့်လိုက်ရုံသာ ဖြစ်၏။

ထို့နောက်တွင်တော့ ဖီးနစ်စစ်မှန်သောနတ်ဘုရားသည် အနီးဆုံး အရွက်တစ်ထောင်ဆေးခန်း ဌာနခွဲဆီသို့ သုတ်သီးသုတ်ပျာ ထွက်ခွာသွားလေသည်။

အရွက်တစ်ထောင်ဆေးခန်း၏ အပေါ်ဆုံးထပ်တွင်ရှိသော နတ်ဘုရားလက်နက်များကို မြင်လိုက်ရသည့်အခါ၊ ဖီးနစ်စစ်မှန်သောနတ်ဘုရားသည် ရီမိသားစုနှင့် နဂါးမျိုးနွယ်စုတို့နှင့် ဆက်ဆံရေးကောင်းများ ထူထောင်ထားခဲ့မိသည့်အတွက် မိမိကိုယ်ကို အလွန်ကံကောင်းသည်ဟု ခံစားလိုက်ရလေ၏။

ယခုဆိုလျှင် နတ်ဘုရားလက်နက်များကိုပင် သူမကိုယ်တိုင် ရယူနိုင်မည့် အခွင့်အရေးတစ်ခု ပေါ်ပေါက်လာခဲ့ပြီ မဟုတ်ပါလော။

ဖီးနစ်မျိုးနွယ်စု၏ အခြေခံအင်အားမှာ နဂါးမျိုးနွယ်စုနှင့် နှိုင်းယှဉ်ပါက များစွာ ကွာခြားနေဆဲ ဖြစ်သည်။

နောက်ဆုံးတွင်တော့ ဖီးနစ်စစ်မှန်သောနတ်ဘုရားသည် မီးလျှံစိမ် ကောင်းကင်ပုလဲ ဟု ခေါ်သော နတ်ဘုရား လက်နက် တစ်ခုကိုသာ ရယူနိုင်ခဲ့လေသည်။

မီးလျှံစိမ် ကောင်းကင် ပုလဲသည် မီးဓာတ်ဂုဏ်သတ္တိ ရှိသော နတ်ဘုရားလက်နက် ဖြစ်ပြီး ဖီးနစ် စစ်မှန်သော နတ်ဘုရားနှင့် အသင့်တော်ဆုံး ဖြစ်၏။

မိမိ၏ ကိုယ်ပိုင် နတ်ဘုရားလက်နက်ကို ရရှိပြီးနောက်တွင်မှ ဖီးနစ် စစ်မှန်သော နတ်ဘုရားသည် သူမ၏ စစ်မှန်သော နတ်ဘုရားအဆင့် မိတ်ဆွေအချို့ထံသို့ အကြောင်းကြားလေတော့သည်။

ထိုသူများထဲတွင် အေးစိမ့်လမင်းနတ်ဘုရားဂိုဏ်းမှ အေးစိမ့်လမင်းစစ်မှန်သောနတ်ဘုရားလည်း အပါအဝင် ဖြစ်သည်။

ဤဖြစ်ရပ်နောက်တွင်တော့ အလုအယက် တိုးဝှေ့မှုကြီးတစ်ခု စတင်ခဲ့လေသည်။

နတ်ဘုရားလက်နက်များ၏ ရှေ့မှောက်တွင် မည်သူတစ်ဦးတစ်ယောက်မျှ လက်လွတ်မခံချင်ကြပေ။

မိမိတို့၏ ပိုင်ဆိုင်မှုအားလုံးကို ကုန်ခမ်းသည်အထိသုံးစွဲ၍ နတ်ဘုရားလက်နက်တစ်ခုနှင့် လဲလှယ်ရသည် ဆိုစေကာမူ၊ လုံးဝထိုက်တန်သည်ဟု အားလုံးက ယုံကြည်ကြ၏။

သို့သော် စင်စစ်တွင်တော့ ယခုတစ်ကြိမ်ရောင်းချသော နတ်ဘုရားလက်နက် အရေအတွက်မှာ အကန့်အသတ်ရှိနေပြီး လူတိုင်း ရရှိနိုင်ကြသည်တော့ မဟုတ်ပေ။

ယခုအကြိမ်တွင် နတ်ဘုရားလက်နက်များကို ဝယ်ယူနိုင်ခဲ့သူ အများစုမှာ ရီမိသားစုနှင့် ဆက်စပ်မှုရှိသူများ၊ သို့မဟုတ် ရီမိသားစုနှင့် ဆက်ဆံရေးကောင်းမွန်သော အင်အားစုများနှင့် ဆက်ဆံရေးကောင်းသူများသာ ဖြစ်ကြသည်။

တစ်ခါတစ်ရံတွင် ဤသည်ပင်လျှင် အဆက်အသွယ်ကောင်းရှိခြင်း၏ တန်ခိုးဖြစ်လေသည်။

လုံလောက်သော အဆက်အသွယ်မရှိပါက၊ ကောင်းမွန်သော အရာများ ပေါ်လာသည့်တိုင်အောင် သင်၏ ဝေစုကို ရရှိနိုင်မည် မဟုတ်ပေ။

အရွက်တစ်ထောင်ဆေးခန်းမှ တက်ကြွစွာ မကြော်ငြာခဲ့သော်လည်း၊ ဤသို့သောကိစ္စမျိုးကို အချိန်ကြာမြင့်စွာ ဖုံးကွယ်ထား၍ မရနိုင်ခဲ့ပါ။

မကြာမီပင်၊ စစ်မှန်သောနတ်ဘုရားနယ်ပယ်မှ ကျင့်ကြံသူအများအပြားသည် အရွက်တစ်ထောင်ဆေးခန်းတွင် နတ်ဘုရားလက်နက်များ ရောင်းချနေကြောင်း သိရှိသွားကြလေသည်။

ထိုသတင်းမှာ အမှားအမှန်ဖြစ်ကြောင်းပင် မစစ်ဆေးကြတော့ဘဲ၊ သူတို့သည် အတည်ပြုနိုင်ရန်အတွက် အရွက်တစ်ထောင်ဆေးခန်းဆီသို့ ချက်ချင်းဆိုသလို ဦးတည်လာကြ၏။

မာနကြီး စစ်မှန်သောနတ်ဘုရားနှင့် အခြားသူများမှာ သူတို့အလိုရှိသော နတ်ဘုရားလက်နက်များကို ရရှိသွားကြသော်လည်း၊ ထိုသူများမှာ အရေအတွက် နည်းပါးလှသည်။

နောက်ဆုံးတွင်တော့၊ နောက်ကျမှ ရောက်လာကြသော စစ်မှန်သောနတ်ဘုရားများအတွက် အရွက်တစ်ထောင်ဆေးခန်းတွင် နတ်ဘုရားလက်နက်အချို့ ကျန်ရှိနေသေးလေ၏။

အစောဆုံးရောက်ရှိလာကြသော စစ်မှန်သောနတ်ဘုရားများသည် နောက်ဆုံးအခွင့်အရေးကို အရယူကာ နတ်ဘုရားလက်နက်တစ်စုံစီကို လုယက်ဝယ်ယူသွားနိုင်ခဲ့ကြသည်။

ကံမကောင်းစွာဖြင့်၊ အစောပိုင်း ရောက်ရှိလာကြသော်လည်း ကံနည်းသော သူအချို့မှာမူ သူတို့ ရောက်ရှိသွားသော အရွက်တစ်ထောင် ဆေးခန်းဌာနခွဲတွင် နတ်ဘုရားလက်နက်များ ကုန်သွားပြီဖြစ်သောကြောင့် အခြားဌာနခွဲများဆီသို့ သွားကြရပြန်သည်။

သူတို့ထိုနေရာသို့ ရောက်ရှိသွားချိန်တွင်တော့ နောက်ဆုံးကျန်ရှိသော နတ်ဘုရားလက်နက်အနည်းငယ်မှာ အခြားသူများ၏ လက်ထဲသို့ ရောက်ရှိသွားခဲ့လေပြီ။

အခွင့်အရေးကို လက်လွတ်ဆုံးရှုံးခဲ့ရခြင်းကြောင့် သူတို့တစ်ယောက်ချင်းစီမှာ နောင်တကြီးစွာဖြင့် ရင်ဘတ်ထုကာ မြည်တမ်းကြလေတော့သည်။

အလယ်အလတ်အဆင့် စစ်မှန်သောနတ်ဘုရားများပင်လျှင် ချွင်းချက်မရှိ ဖြစ်ကြရ၏။

အခြားနည်းလမ်းမရှိပေ။ အလယ်အလတ်အဆင့် စစ်မှန်သောနတ်ဘုရားများထဲတွင်ပင် နတ်ဘုရားလက်နက် မပိုင်ဆိုင်ကြသူများ အများအပြား ရှိနေလေသည်။

နတ်ဘုရားလက်နက်များကို တိုက်ရိုက်ဝယ်ယူနိုင်မည့် ဤအခွင့်အရေးကို လွဲချော်ပြီးနောက်တွင်တော့၊ သူတို့အတွက် နောင်အနာဂတ်တွင် နတ်ဘုရားလက်နက်တစ်စုံ ရရှိရန်မှာ အလွန်ပင် ခက်ခဲသွားပေလိမ့်မည်။

ရီမိသားစုက နတ်ဘုရားလက်နက်များကို နောက်တစ်ကြိမ် ထပ်မံရောင်းချပေးနိုင်ခြင်း မရှိလျှင်ပေါ့လေ။

သို့သော် ရီမိသားစုက နတ်ဘုရားလက်နက်များကို ထပ်ရောင်းဦးမည်လော။

မည်သူမျှ သေချာမသိကြပေ။

ရီမိသားစုတွင် စစ်မှန်သောနတ်ဘုရားအဆင့်ရှိ နတ်ဘုရားလက်နက်သန့်စင်သူတစ်ယောက် ရှိနေသလော၊ သို့မဟုတ် သူတို့သည် ကြီးမားသော အခွင့်အရေးတစ်ခုမှတစ်ဆင့် နတ်ဘုရားလက်နက်မြောက်မြားစွာကို ရရှိခဲ့ခြင်းလော။

လူအများစုက ပထမဖြစ်နိုင်ခြေကိုသာ ပို၍ မှန်းဆနေကြသည်။ ရီမိသားစုတွင် ဒဏ္ဍာရီလာ နတ်ဘုရားအဆင့် လက်နက်သန့်စင်သူတစ်ဦးရှိပြီး သူကိုယ်တိုင် နတ်ဘုရားလက်နက်များကို သန့်စင်နိုင်သည်ဟု ယူဆကြ၏။

မဟုတ်ပါက၊ ရီမိသားစုသည် ဤမျှများပြားသော နတ်ဘုရားလက်နက်များကို မည်သို့ရောင်းချနိုင်မည်နည်း။ သို့ဆိုလျှင် ရီမိသားစုတွင် နတ်ဘုရားလက်နက် မည်မျှများပြားနေမည်နည်း။

သူတို့သာ ရီမိသားစုနေရာမှာဆိုလျှင် မိမိတို့၏ အင်အားစုအတွက် မလိုအပ်တော့သည့် အခြေအနေမျိုးမှလွဲ၍ ရောင်းချရန် စဉ်းစားကြလိမ့်မည် မဟုတ်ပေ။

ယခုတစ်ကြိမ် နတ်ဘုရားလက်နက်များကို ရရှိသွားကြသော ကျင့်ကြံသူများထဲတွင် အများစုမှာ အစောပိုင်းအဆင့် စစ်မှန်သောနတ်ဘုရားများ ဖြစ်ကြသည်။

ဤအချက်သည် အလယ်အလတ်အဆင့် စစ်မှန်သောနတ်ဘုရားများအကြားတွင် မကောင်းသော အကြံအစည်အချို့ ပေါ်ပေါက်လာစေခဲ့၏။

ရီမိသားစုသည် ယခုအခါတွင် ဩဇာအာဏာ ကြီးမားနေသည်။၊ ဦးဆောင်သူတစ်ဦး မရှိဘဲနှင့်တော့ သူတို့သည် ရီမိသားစုကို ပစ်မှတ်ထားရန် မကြံစည်ကြပေ။

သို့သော် နတ်ဘုရားလက်နက်များ ရရှိသွားကြသော ထိုအစောပိုင်းအဆင့် စစ်မှန်သောနတ်ဘုရားများကရော။ သူတို့တွင် အခွင့်အရေးရှိနိုင်ပါသလော။

ကျင့်ကြံသူအချို့သည် ထိုသို့စဉ်းစားမိကြပြီးနောက် လက်တွေ့ပင် အကောင်အထည်ဖော်ခဲ့ကြသည်။

ထို့နောက်တွင်တော့ လက်တွေ့အရှိတရားက သူတို့၏အိပ်မက်ကို ရက်ရက်စက်စက် ရိုက်ချိုးလိုက်လေသည်။

သူတို့သည် နတ်ဘုရားလက်နက် ကိုင်ဆောင်ထားသော ထိုအစောပိုင်းအဆင့် စစ်မှန်သောနတ်ဘုရားများကို မထင်မှတ်ဘဲ မနှိမ်နင်းနိုင်ခဲ့ကြပေ။

နတ်ဘုရားလက်နက် ကိုင်ဆောင်ထားသော အစောပိုင်းအဆင့် စစ်မှန်သောနတ်ဘုရားတစ်ဦးသည် လက်နက်မဲ့ အလယ်အလတ်အဆင့် စစ်မှန်သောနတ်ဘုရားတစ်ဦးထက် စွမ်းအား မနိမ့်ကျခဲ့ချေ။

နတ်ဘုရားလက်နက်များ၏ စွမ်းပကားကို ဤအခိုက်အတန့်တွင် အပြည့်အဝ သက်သေပြလိုက်နိုင်ခဲ့လေပြီ။

နတ်ဘုရားလက်နက်များ၏ စွမ်းအားသည် ထိုစစ်မှန်သောနတ်ဘုရားများ၏ ရည်မှန်းချက်ကို မတားဆီးနိုင်သည့်အပြင်၊ သူတို့ကို ပို၍ပင် လောဘတက်လာစေခဲ့ တော့သည်။

ယခင်က နတ်ဘုရားလက်နက်ရှိသူမှာ အလွန်နည်းပါးသောကြောင့်၊ လက်နက်မရှိခြင်းကို လူအများက လက်ခံနိုင်ခဲ့ကြ၏။

သို့သော် ယခုအခါတွင်မူ နတ်ဘုရားလက်နက်မရှိခြင်းသည် ကြီးမားသော အားနည်းချက်တစ်ခုအဖြစ် ရှုမြင်ခံလာရသည်။

နတ်ဘုရားလက်နက် ကိုင်ဆောင်ထားသော ထိုစစ်မှန်သောနတ်ဘုရားများသာ သူတို့၏ ကျင့်ကြံခြင်းအဆင့် မြင့်တက်သွားပါက၊ နတ်ဘုရားလက်နက်မရှိသော သူတို့အတွက် ရပ်တည်စရာ နေရာပင် ကျန်တော့မည် မဟုတ်ပေ။

သူတို့သည် နတ်ဘုရားလက်နက်တစ်စုံ ရရှိရန် နည်းလမ်းတစ်ခုခုကို မဖြစ်မနေ ရှာဖွေရပေတော့မည်။

မတည်ငြိမ်သော ကာလများ ရောက်ရှိလာတော့မည်ဖြစ်ရာ၊ မိမိတို့၏အစွမ်းကို မြှင့်တင်ခြင်းထက် ပိုအရေးကြီးသောအရာ မရှိတော့ချေ။

သူတို့ရရှိနိုင်သော ပန်းတိုင်များထဲတွင်၊ နတ်ဘုရားလက်နက်တစ်စုံကို ရရှိခြင်းကသာ သူတို့၏ကျင့်ကြံခြင်းအဆင့်ကို အချိန်တိုအတွင်း မြှင့်တင်ပေးနိုင်ပေလိမ့်မည်။

တဖြည်းဖြည်းနှင့် ကောင်းကင်ဘုံချိတ်ဆက်နယ်ပယ်မှာသာမက အခြားအထက်ဘုံနယ်များတွင်ပါ ကောင်းကင်ဘုံချိတ်ဆက်နယ်ပယ်၌ နတ်ဘုရားလက်နက်များကို သန့်စင်နိုင်သော မိသားစုတစ်စုအကြောင်း သတင်းများ ပျံ့နှံ့သွားလေ၏။

ဤသတင်းသည် နတ်ဘုရားလက်နက်များအတွက် အာသာငမ်းငမ်းဖြစ်နေသော ကျင့်ကြံသူများကို မျှော်လင့်ချက်ပေးခဲ့ပြီး၊ သူတို့အားလုံးကို နတ်ဘုရားလက်နက်ရှာဖွေရန် ကောင်းကင်ဘုံချိတ်ဆက်နယ်ပယ်သို့ အလုံးအရင်းဖြင့် လာရောက်စေခဲ့သည်။

ရီမိသားစုနှင့် အဆက်အသွယ် မလုပ်နိုင်သောအခါ၊ သူတို့သည် ရီမိသားစုနှင့် အဆက်အသွယ်ရလိုရငြား မျှော်လင့်ချက်ဖြင့် အရွက်တစ်ထောင် ဆေးခန်းဆီသို့သာ ဦးတည်နိုင်ကြတော့သည်။

ယခင်က တွေ့ရခဲလှသော စစ်မှန်သောနတ်ဘုရားများသည် ယခုအချိန်အတောအတွင်း အရွက်တစ်ထောင်ဆေးခန်းတွင် အဆက်မပြတ် ပေါ်ထွက်လာကြလေ၏။

လက်နက် ဝယ်ယူရန် ရောက်ရှိလာကြသော ဤစစ်မှန်သောနတ်ဘုရားများကို ရင်ဆိုင်ရသည့်အခါ အရွက်တစ်ထောင်ဆေးခန်း၏ ဆိုင်အုပ်များမှာလည်း အလွန်ပင် ဖိအားများနေကြသည်။

သူတို့တွင် ရွေးချယ်စရာမရှိပေ။ ရောက်လာသူအားလုံးမှာ စစ်မှန်သောနတ်ဘုရားနယ်ပယ်မှ တန်ခိုးရှင်ကြီးများဖြစ်ကြပြီး သူတို့ အပြစ်ပြုနိုင်သည့်သူ တစ်ယောက်မျှ မပါဝင်ခဲ့ချေ။

သို့သော်လည်း၊ ရီမိသားစုဘက်မှမူ မည်သည့်တုံ့ပြန်မှုမျှ မပြသသေးပေ။

ရီမိသားစု၏ သဘောထားသည် နူးညံ့သိမ်မွေ့သော အခြေအနေတစ်ရပ်ကို ဖန်တီးလာခဲ့သည်။

အခြားနယ်ပယ်များမှ ရောက်ရှိလာသော စစ်မှန်သောနတ်ဘုရားအချို့သည် ရီမိသားစုမှာ သူတို့ကို လုံးဝအလေးမထားဘဲ အလွန်မာနကြီးလွန်းသည်ဟု ခံစားလာကြ၏။

ရီဖန်သည် အမှန်တကယ်ပင် သူ၏အစွမ်းကိုပြသပြီး အလယ်အလတ်အဆင့် စစ်မှန်သောနတ်ဘုရားတစ်ဦးဖြစ်သည့် ပေဟွမ်စစ်မှန်သောနတ်ဘုရားကို လူအများရှေ့တွင် သတ်ဖြတ်ခဲ့ဖူးသော်လည်း...

နောက်ဆုံးတွင်တော့၊ ဤကျူးကျော်လာသော ကျင့်ကြံသူများသည် ရီဖန်၏ တိုက်ပွဲစွမ်းဆောင်ရည်ကို ကိုယ်တိုင်မြင်တွေ့ခဲ့ရခြင်း မဟုတ်ပေ။

ထို့အပြင် တန်ခိုးကြီးသော ပြိုင်ဘက်များ တစ်ယောက်ပြီးတစ်ယောက် ပေါ်ထွက်လာသည်နှင့်အမျှ၊ ပေဟွမ်စစ်မှန်သောနတ်ဘုရား၏ အစွမ်းသည် သူတို့မျက်စိထဲတွင် ထင်သလောက် ကြောက်စရာမကောင်းတော့ချေ။

ဤအချက်သည် စစ်မှန်သောနတ်ဘုရားအချို့ကို မကောင်းသော အတွေးများ တွေးစေခဲ့သည်။ နတ်ဘုရားလက်နက် တစ်ပါး ဝယ်ယူရုံဖြင့် အမြတ်အစွန်း

ကြီးကြီးမားမား ရမည်မဟုတ်။

သို့သော် နတ်ဘုရားလက်နက်များကို သန့်စင်နိုင်သော ရီမိသားစုကိုသာ ထိန်းချုပ်နိုင်ခဲ့မည်ဆိုလျှင်၊ သူတို့သည် အမှန်တကယ်ပင် ဝက်ဝက်ကွဲ အောင်မြင်မှု ရရှိကြပေလိမ့်မည်။

တဖြည်းဖြည်းနှင့် ရီမိသားစုကို ပစ်မှတ်ထားသော ဝေဖန်မှုများ စတင်ပေါ်ထွက်လာလေသည်။

တစ်ခဏအတွင်းမှာပင်၊ ရီမိသားစုသည် ပြည်သူ့ပစ်မှတ် ဖြစ်လာခဲ့ပုံရလေ၏။

စစ်မှန်သောနတ်ဘုရားအများအပြားသည် ဤမျှပြင်းထန်သော အကျပ်အတည်းကာလတွင် ရီမိသားစုမှာ မိမိတို့၏ အကျိုးစီးပွားကိုသာ ဦးစားပေးနေသည်ဟု စွပ်စွဲကြသည်။

သူတို့က ရီမိသားစုသည် ကောင်းကင်ဘုံနတ်ဆိုးမျိုးနွယ်စုကို ခုခံတွန်းလှန်ရန်အတွက် သူတို့၏ နတ်ဘုရားလက်နက်များကို လှူဒါန်းသင့်သည်ဟု ယုံကြည်ကြ၏။

ဤစွပ်စွဲချက်များမှာ နောက်ပြောင်ခြင်းတစ်ခုသာဖြစ်ကြောင်း လူတိုင်းသိကြသည်။

သို့သော် တစ်ခါတစ်ရံတွင် လူတွေ လိုအပ်နေသည်က ဆင်ခြေတစ်ခုသာ ဖြစ်လေသည်။

သူတို့၏ သိက္ခာမဲ့သော အပြုအမူများအတွက် မျက်နှာပြောင်တိုက်ခွင့်ရမည့် ဆင်ခြေတစ်ခုသာ ဖြစ်သည်။

လက်ရှိအခြေအနေကဲ့သို့ပင်၊ ရီမိသားစုနှင့် ယခင်က မည်သည့်ရန်ငြိုးမျှမရှိခဲ့သော ကျင့်ကြံသူအများအပြားသည် နတ်ဘုရားလက်နက်များနှင့် ရီမိသားစု၏ လက်နက်သန့်စင်သူများအတွက် ရီမိသားစုကို စတင်ပစ်မှတ်ထားလာကြလေသည်။

သို့သော်လည်း၊ ယခုတစ်ကြိမ် ရီမိသားစုကို ဝေဖန်သူများမှာ အခြားအထက်ဘုံနယ်များမှ လာသူများသာ အဓိက ဖြစ်ကြ၏။

ကောင်းကင်ဘုံချိတ်ဆက်နယ်ပယ်အတွင်းမှ အင်အားစုများမှာမူ အတော်လေး တိတ်ဆိတ်နေကြ၏။

သူတို့ထဲမှ အများအပြားသည် ရီမိသားစုက တန်ပြန်တိုက်ခိုက်မည်လားဟုပင် မျှော်လင့်နေကြသေးသည်။

ယခင်က တိုက်ပွဲကြီးကို မျက်မြင်ကိုယ်တွေ့ ကြုံခဲ့ရသော စစ်မှန်သောနတ်ဘုရားအများအပြားမှာ အမှန်တကယ်ပင် မျှော်လင့်တကြီး စောင့်စားနေကြလေသည်။

ယခုအခါတွင် ရီမိသားစုသည် မည်မျှအထိ အစွမ်းထက်လာခဲ့ပြီနည်း။

မည်သို့ပင်ဖြစ်စေ၊ ရီမိသားစုသည်လည်း သူတို့၏ ကောင်းကင်ဘုံချိတ်ဆက်နယ်ပယ်အတွင်းမှ မျိုးနွယ်စုတစ်ခုပင် မဟုတ်ပါလော။

ဘေးမှ ရပ်ကြည့်နေရုံဖြင့်ပင် သူတို့သည် မသက်မသာ ခံစားနေရပြီ ဖြစ်သည်။ ရီမိသားစုကို ပေါ်ပေါ်တင်တင် ပစ်မှတ်ထားရန်မှာ သူတို့ကိုယ်တိုင် မလုပ်ရက်နိုင်သော အရာတစ်ခု ဖြစ်လေသည်။

အချို့မိသားစုများမှာမူ ဤပြင်ပမှ ကျူးကျော်လာသူများကို ဆန့်ကျင်ပြီး ရီမိသားစုကို မည်သို့ ကူညီရမည်ကိုပင် စတင်စဉ်းစားနေကြလေပြီ။

သူတို့ ကောင်းကင်ဘုံချိတ်ဆက်

နယ်မြေမှာတောင် နတ်ဘုရားလက်နက်တွေ လိုအပ်နေတာ၊ ဒီကျူးကျော်သူတွေကို ဘယ်လို သောင်းကျန်းခွင့် ပေးနိုင်ပါ့မလဲ။