ရွှေအမြုတေဖွဲ့စည်းခြင်းဆိုင်ရာ စိတ်ဝိညာဉ်ပစ္စည်း၊ အခြေတည်အဆင့် ကျင့်ကြံသူတို့၏ တိုက်ပွဲ။

ညဉ့်နက်ချိန်။

ကျိုးစွေ့၊ ကျိပင်းယွီ၊ မုဇီယန်နှင့် ရှားကျင်းယန်တို့ ညစာစားနေကြစဥ် မီယွင်မြို့တစ်ဝိုက် ပြင်းထန်သော တိုက်ပွဲလှိုင်းများ ထုတ်လွှတ်နေသည်ကို ရုတ်တရက် ခံစားလိုက်ကြရသည်။

မြို့တစ်မြို့လုံး တုန်ခါနေပြီး အော်ဟစ်သံများ၊ ငိုယိုသံများနှင့် ကျိန်ဆဲသံများဖြင့် ဆူညံနေ၏။

ကြောက်မက်ဖွယ်ကောင်းသော တုန်ခါမှုများသည် မြို့ပြင်သို့ပင် လျင်မြန်စွာ ပျံ့နှံ့သွားသည်။

"ဘာတွေဖြစ်နေတာလဲ။ ဘာလို့ အခြေတည်အဆင့် ကျင့်ကြံသူတွေ တိုက်ခိုက်နေကြတာလဲ။"

ကျိုးစွေ့၏ သူငယ်အိမ်များ ကျုံ့သွားသည်။

သူသည် ကြောက်မက်ဖွယ်ကောင်းသော တိုက်ပွဲ၏ တုန်ခါမှုများကို အာရုံခံမိနေသည်။

အကယ်၍သာ သူကိုယ်တိုင် ဤအခြေအနေနှင့် ကြုံတွေ့ရပါက သေလမ်းကိုသာ မြန်းရပေမည်။

မည်သို့ပင်ဖြစ်စေ၊ သူသည် ချီသန့်စင်ခြင်း အဆင့်(၆) ကျင့်ကြံသူတစ်ဦးမျှသာ ဖြစ်သည်။

အခြေတည်အဆင့် ကျင့်ကြံသူတစ်ဦးနှင့် ရင်ဆိုင်ရပါက သူသည် အရေးမပါသော ပုရွက်ဆိတ်တစ်ကောင်ပမာ အလွယ်တကူပင် ကြေမွသွားနိုင်သည်။

ဝန်ခံရလျှင် ဤသည်မှာ အခြေတည်အဆင့် ကျင့်ကြံသူတစ်ဦး၏ ဖျက်ဆီးအားပြင်းသော တိုက်ခိုက်ရေးစွမ်းအားကို သူ ပထမဆုံးအကြိမ် ခံစားမိခြင်းဖြစ်သည်။ သူတို့သည် ချီသန့်စင်ခြင်းအဆင့် ကျင့်ကြံသူများနှင့် နှိုင်းယှဉ်၍မရလောက်အောင် အစွမ်းထက်လွန်းလှချေသည်။

"ယောက်ျား၊ ဒါက ဒီနေ့ ရွှမ်ပေါင်မျှော်စင်ရဲ့ လေလံပွဲနဲ့ ဆက်စပ်နေလောက်တယ်။ ကျွန်မကြားရတာတော့ နောက်ဆုံးလေလံပစ္စည်းက ရွှေအမြုတေဖွဲ့စည်းခြင်းဆိုင်ရာ စိတ်ဝိညာဉ်ပစ္စည်းတစ်ခုတဲ့။ အခြေတည်အဆင့် ကျင့်ကြံသူအများအပြားက အဲ့ဒီပစ္စည်းအတွက် အရူးအမူး ဈေးပြိုင်ကြပြီး ဈေးနှုန်းက အဆင့်နိမ့် ဝိညာဉ်ကျောက်တုံး သန်းပေါင်းများစွာအထိ မြင့်တက်သွားခဲ့တယ်တဲ့။"

"နောက်ဆုံးမှာ အဲ့ဒီပစ္စည်းကို အင်မော်တယ်ရှားဂိုဏ်းက အခြေတည်အဆင့် ကျင့်ကြံသူတစ်ယောက်က ရသွားပေမဲ့ တခြားအခြေတည်အဆင့် ကျင့်ကြံသူတွေက လက်မခံဘဲ နောက်ပိုင်းမှာ လုယက်တိုက်ခိုက်ဖို့ ကြံစည်ခဲ့ကြပုံပဲ။”

"ဒါက ရွှေအမြုတေဖွဲ့စည်းဖို့ ကူညီပေးနိုင်တဲ့ ပစ္စည်းဆိုတော့ ဒါက သူတို့ရဲ့ ကျင့်ကြံခြင်းလမ်းစဥ်နဲ့ သက်ဆိုင်တယ်လေ။ ပြိုင်ဘက်က အင်မော်တယ်ရှားဂိုဏ်းက ကျင့်ကြံသူဖြစ်နေရင်တောင် မျက်နှာထောက်နေမှာ မဟုတ်ဘူး။"

ကျိပင်းယွီက သူတို့ထွက်လာပြီးနောက် လေလံပွဲတွင် အလွန်တန်ဖိုးကြီးသော ပစ္စည်းများ ဆက်တိုက်တင်သွင်းခဲ့ကြောင်း သူမကြားသိခဲ့ရသည့် သတင်းအချို့ကို ပြောပြသည်။

"ရွှေအမြုတေဖွဲ့စည်းခြင်းဆိုင်ရာ စိတ်ဝိညာဉ်ပစ္စည်း ဟုတ်လား။ ဒါဆိုရင် အခြေတည်ဆေးလုံးထက်တောင် ပိုပြီးတန်ဖိုးရှိတာပေါ့။ ဒီအခြေတည်အဆင့် ကျင့်ကြံသူတွေ ဒီလောက်ပြင်းပြင်းထန်ထန် တိုက်ခိုက်နေကြတာ အံ့ဩစရာ မရှိတော့ဘူး။"

ကျိုးစွေ့ ရုတ်တရက် နားလည်သွားသည်။ သူအချိန်မီထွက်လာခဲ့သည့်အတွက် အလွန်အမင်း စိတ်သက်သာရာရသွားပြီး ကျေးဇူးတင်မိလေသည်။

သူတို့သာ လေလံပွဲတွင် မိုက်မဲစွာ ဆက်နေခဲ့မည်ဆိုပါက၊ ဘာတွေဖြစ်လာမည်အား မည်သူမျှမသိနိုင်ပေ။

ဥမင်လိုဏ်ခေါင်းများတူးပြီး မြေအောက်ခံတပ်များ တည်ဆောက်ရန် လိုအပ်နေသေးပုံရ၏။ သို့မဟုတ်ပါက၊ အခြေတည်အဆင့် ကျင့်ကြံသူများက မီယွင်မြို့ကို အမှန်တကယ် တိုက်ခိုက်လာသည့်အခါ သူပုန်းခိုစရာနေရာ ရှိတော့မည်မဟုတ်ပေ။

ကံကောင်းစွာဖြင့် သူ၏ကိုယ်ပွားတစ်ကောင်က 'ရွှေစားကူ' အကောင်တစ်ရာအား သူ့ထံသို့ ယူဆောင်လာခဲ့ပြီးဖြစ်ရာ အချိန်မရွေး မြေအောက်လိုဏ်ခေါင်းများ စတင်တူးဖော်နိုင်လေသည်။

"စလိုက်တာပေါ့။”

ထိုည၌ပင် ကျိုးစွေ့သည် သူ၏အိမ်နောက်ဘက်ခြံဝင်းထဲတွင် ဥမင်လိုဏ်ခေါင်းများ စတင်တူးဖော်ရန် 'ရွှေစားကူ' များကို ချက်ချင်း အမိန့်ပေးလိုက်သည်။

'ရွှေစားကူ' များသည် မြေကြီးများကို စတင်ဝါးမျိုကြတော့သည်။ သူတို့သည် တူးဖော်ရေးသားရဲများသဖွယ် မြေကြီးအမြောက်အမြားအား အစာအိမ်ထဲသို့ အလွယ်တကူ မျိုချလိုက်ကြသည်။ လူတစ်ယောက် တွားသွားဝင်ရောက်နိုင်လောက်သော ဥမင်လိုဏ်ခေါင်းတစ်ခု စတင်ပေါ်ပေါက်လာတော့သည်။

ထို့နောက် 'ရွှေစားကူ' အကောင်တစ်ရာသည် မြေကြီးထဲသို့ ပို၍ပို၍ နက်ရှိုင်းစွာ တူးဝင်သွားကြသည်။ သူတို့၏ စွမ်းဆောင်ရည်မှာ တူးဖော်ရေးစက်များထက်ပင် ပို၍ စွမ်းဆောင်ရည်မြင့်မားပေသည်။

ရက်အနည်းငယ်အတွင်း သူ၏အိမ်အောက်တွင် လုံလောက်စွာနက်ရှိုင်းသော ဂူတစ်ခုကို တူးဖော်ပြီးစီးလိမ့်မည်ဟု သူယုံကြည်လေသည်။

ထိုအခါ သူသည် မြေအောက်တွင် ပုန်းခိုနေနိုင်ပြီး အခြေတည်အဆင့် ကျင့်ကြံသူတစ်ဦး လာလျှင်ပင် သူ့အား ရှာတွေ့နိုင်မည် မဟုတ်တော့ပေ။

...

ရက်အနည်းငယ်ကြာပြီးနောက်။

"ယောက်ျား၊ လွန်ခဲ့တဲ့ရက်အနည်းငယ်က ဖြစ်ခဲ့တဲ့ကိစ္စကို ကျွန်မစုံစမ်းပြီးပြီ။ ရွှမ်ပေါင်မျှော်စင်မှာ လေလံတင်ခဲ့တဲ့ ရွှေအမြုတေဖွဲ့စည်းခြင်းဆိုင်ရာ စိတ်ဝိညာဉ်ပစ္စည်းက ရေခဲမီးလျှံ စိတ်ဝိညာဉ်အရည်တဲ့။ သူ့တန်ဖိုးက အဆင့်နိမ့် ဝိညာဉ်ကျောက်တုံး တစ်သန်းကျော်ရှိပြီး အင်မော်တယ်ရှားဂိုဏ်းရဲ့ ဂိုဏ်းသခင်ငယ် လန်ယွဲ့ရှီက အနိုင်ရသွားခဲ့တယ်။"

ကျိပင်းယွီက သူမစုံစမ်းသိရှိခဲ့သော သတင်းအား ပြောပြလေသည်။

"ဒါပေမဲ့ သူ မီယွင်မြို့ကနေ အင်မော်တယ်ရှားဂိုဏ်းကို ပြန်ဖို့လုပ်တဲ့အခါမှာ အမည်မသိ အခြေတည်အဆင့်ကျင့်ကြံသူတစ်စုရဲ့ ချောင်းမြောင်းတိုက်ခိုက်မှုကို ခံခဲ့ရတယ်တဲ့။ နှစ်ဖက်စလုံး ပြင်းပြင်းထန်ထန် တိုက်ခိုက်ခဲ့ကြပေမဲ့ နောက်ဆုံးမှာတော့ လန်ယွဲ့ရှီက လက်မတင်လေး လွတ်မြောက်သွားပြီးတော့၊ အမည်မသိ တစ်ကိုယ်တော်ကျင့်ကြံသူတွေကတော့ ကံမကောင်းစွာနဲ့ပဲ သူတို့ရဲ့ရည်ရွယ်ချက်ကို မအောင်မြင်ခဲ့ဘူးတဲ့။”

"အင်မော်တယ်ရှားဂိုဏ်းက ဂိုဏ်းသခင်ငယ် လန်ယွဲ့ရှီ ဟုတ်လား။ သူ့နောက်ကြောင်းက ဘယ်လိုလဲ။"

ကျိုးစွေ့က စူးစမ်းလိုက်သည်။

"ဒီ လန်ယွဲ့ရှီက လုံးဝမရိုးရှင်းဘူး။ သူမက အသက်ရှစ်ဆယ်ပဲ ရှိသေးပေမဲ့ သူ့ရဲ့ကျင့်ကြံမှုက အခြေတည်အဆင့် အထွတ်အထိပ်ကို ရောက်နေပြီလို့ ပြောကြတယ်။ သူမမှာ ကောင်းကင်အဆင့် စိတ်ဝိညာဉ်အမြစ်ထက် တစ်ဆင့်ပဲနိမ့်တဲ့၊ ပထမအဆင့်စိတ်ဝိညာဉ်အမြစ်ကို ပိုင်ဆိုင်ထားတဲ့ ကြောက်စရာကောင်းတဲ့ ပါရမီရှင်တစ်ယောက်ပဲ။"

ကျိပင်းယွီက လေးနက်စွာဆိုသည်။

"ပြီးတော့ သူမက အင်မော်တယ်ရှားဂိုဏ်းချုပ်ရဲ့ သမီးလည်း ဖြစ်တယ်။ သူ့ကို အင်မော်တယ်ရှားဂိုဏ်းရဲ့ နှစ်ငါးရာမှတစ်ခါပေါ်တဲ့ ပါရမီရှင်လို့ လူသိရှင်ကြား ကြေညာထားတယ်။ သူမသာ ရွှေအမြုတေကို အောင်မြင်စွာ ဖွဲ့စည်းနိုင်ခဲ့ရင် အင်မော်တယ်ရှားဂိုဏ်းရဲ့ နောက်တက်မယ့်ဂိုဏ်းချုပ် ဖြစ်လာမှာပဲ။"

"သူ့ရဲ့ စိတ်ဝိညာဉ်အမြစ်ပင်ကိုယ်ပါရမီနဲ့ ကျင့်ကြံမှုအဆင့်ကို ထည့်တွက်ရင်၊ ရွှေအမြုတေဖွဲ့စည်းဖို့ လိုအပ်တဲ့ပစ္စည်းတွေသာ ရလို့ကတော့ သူ့ရဲ့အောင်မြင်နိုင်ခြေက ခုနစ်ဆယ်ရာခိုင်နှုန်းကျော်လိမ့်မယ်။ အဲ့ဒီအခါကျရင် အင်မော်တယ်ရှားဂိုဏ်းမှာ ရွှေအမြုတေဆရာသခင် သုံးယောက်ရှိလာလိမ့်မယ်။"

"အသက်နှစ်ရှစ်ဆယ်ပဲရှိသေးပေမဲ့ အခြေတည်အဆင့် အထွတ်အထိပ်ရောက်နေပြီ။ ပထမအဆင့် စိတ်ဝိညာဉ်အမြစ်လည်း ရှိသေးတယ်ဟုတ်လား။ တကယ့်ကို ပါရမီရှင်ပဲ။"

ကျိုးစွေ့သည် သူ၏လေးစားမှုကို မဖုံးကွယ်နိုင်ခဲ့ပေ။

အခြေတည်အဆင့်ကျင့်ကြံသူများအတွက် ကျင့်ကြံအားထုတ်ရန် မည်မျှခက်ခဲသည်ကို သူ ကောင်းစွာသိ‌ရှိပေသည်။ မီယွင်မြို့ရှိ လုမိသားစု၏ ဘိုးဘေးသည်ပင် နှစ်ပေါင်းနှစ်ရာကျော် ကျင့်ကြံခဲ့ပြီးမှ အခြေတည်အဆင့်နှောင်းပိုင်းသို့သာ ရောက်ရှိနိုင်ခဲ့သည်။

သို့သော် လန်ယွဲ့ရှီမှာမူ အသက်ရှစ်ဆယ်အရွယ်မျှဖြင့် အခြေတည်အဆင့် အထွတ်အထိပ်သို့ ရောက်ရှိနေခဲ့ပြီဖြစ်၏။

"ဒါပေမဲ့... အဲ့ဒီအမည်မသိ အခြေတည်အဆင့် ကျင့်ကြံသူတစ်စုကကော။ သူတို့က အင်မော်တယ်ရှားဂိုဏ်းရဲ့ ဂိုဏ်းသခင်ငယ်ကို ချောင်းမြောင်းတိုက်ခိုက်ရဲတယ်ဆိုတော့ အင်မော်တယ်ရှားဂိုဏ်းကို ရန်သူအဖြစ် ကြေညာလိုက်တာနဲ့ အတူတူပဲမလား။ သာမန်ကျင့်ကြံသူတွေက ဒါမျိုးလုပ်ရဲပါ့မလား။"

ကျိုးစွေ့သည် ဤကိစ္စမှာ ထင်သလောက်မရိုးရှင်းကြောင်း အလိုလို နားလည်လိုက်သည်။

"ဟုတ်တယ်၊ ကျွန်မလည်း အဲ့ဒီလိုပဲ တွေးမိတယ်။ ဒီကိစ္စရဲ့နောက်ကွယ်မှာ တခြားဇာတ်လမ်းတစ်ခုခု ရှိရမယ်။ အင်မော်တယ်ရှားဂိုဏ်းရဲ့ ဂိုဏ်းသခင်ငယ်ကို သတ်ချင်တဲ့ တခြားဂိုဏ်းတစ်ခုခု ပါဝင်နေနိုင်တယ်။"

"ဘယ်သူကမှ အင်မော်တယ်ရှားဂိုဏ်းမှာ နောက်ထပ် ရွှေအမြုတေဆရာသခင်တစ်ယောက် ပေါ်ထွန်းလာတာကို မြင်ချင်မှာ မဟုတ်ဘူးလေ။"

"တကယ်လို့ လန်ယွဲ့ရှီသာ ရွှေအမြုတေဆရာသခင် ဖြစ်လာခဲ့ရင် အင်မော်တယ်ရှားဂိုဏ်းရဲ့ အနာဂတ်က နောက်ထပ် နှစ်ငါးရာလောက် ဆက်ပြီးတန်ခိုးထွားနေတော့မှာပဲလေ။”

ကျိပင်းယွီက သူမ၏ ထင်မြင်ချက်အား လေးနက်စွာ ပြောလိုက်သည်။

"တစ္ဆေမိစ္ဆာဂိုဏ်းများ ပါဝင်နေမလား။"

ကျိုးစွေ့ ခေါင်းထဲတွင် အတွေးတစ်ခုပေါ်လာသည်။

"သေချာတော့ မပြောနိုင်ဘူး။ ဒါပေမဲ့ ရှင်ပြောခဲ့တဲ့ သတင်းအချက်အလက်တွေအရဆိုရင် တစ္ဆေမိစ္ဆာဂိုဏ်းက နောက်ကွယ်က ကြိုးကိုင်နေနိုင်ခြေ အရမ်းများတယ်။"

"ဒါပေမဲ့ ဘာပဲဖြစ်ဖြစ်၊ ဒါသာ အမှန်ဆိုရင် မီယွင်မြို့မှာ မကြာခင် အရှုပ်အထွေးတွေ ဖြစ်လာတော့မှာပဲ။”

"မီယွင်မြို့ဟာ ဂိုဏ်းကြီးနှစ်ခုကြားက စစ်ပွဲရဲ့ ဗဟိုချက်တောင် ဖြစ်လာနိုင်တယ်။"

ကျိပင်းယွီက သူမ၏စိုးရိမ်မှုများကို လေးနက်စွာ ပြောလိုက်သည်။

"စိတ်မပူပါနဲ့။ ငါတို့အရင်က လုပ်ခဲ့တာတွေအားလုံးက ဒီလိုအခြေအနေတွေအတွက် ကြိုတင်ပြင်ဆင်ထားတာပဲ မဟုတ်လား။"

ကျိုးစွေ့က နှစ်သိမ့်လိုက်သည်။

လွန်ခဲ့သော လအနည်းငယ်အတွင်း သူသည် ဝိညာဉ်ကျောက်တုံး အမြောက်အမြားသုံးစွဲပြီး ဆယ်နှစ်စာထက်မနည်းသော စိတ်ဝိညာဉ်ဆန်နှင့် အသားများအား ဝယ်ယူထားပြီးဖြစ်သည်။ ၎င်းတို့အားလုံးကို ‘ကူနတ်ဘုရားပန်းကန်’ ထဲတွင် သိုလှောင်ထားသည်။

အကယ်၍ စစ်ပွဲဖြစ်ပွားလာပါက သူသည် သူ၏ဂူထဲတွင် ပုန်းအောင်းနေရုံသာဖြစ်သည်။ ထိုနေရာတွင် ဆယ်နှစ်ကျော်ကြာ နေထိုင်လျှင်ပင် ပြဿနာရှိမည်မဟုတ်ပေ။

ဂိုဏ်းနှစ်ခုကြားက စစ်ပွဲတစ်ခုသည် ဆယ်စုနှစ်တစ်ခုကြာသည်အထိ တည်တံ့နေမည်ဟုတော့ သူ မယုံကြည်ပေ။