သန့်စင်သောနှလုံးသား

ယီထျန်းယွမ်၏ စကားတစ်ခွန်းက သူမတို့အားလုံးကို ရည်မှန်းချက်တစ်ခု ပေးလိုက်သည်။ တစ်ယောက်ပြီးတစ်ယောက် သစ္စာတရားများ ရုတ်ချည်းမြင့်တက်လာပြီး သူ့နားထဲတွင် အသံများ တစ်ခုပြီးတစ်ခု ထွက်ပေါ်လာသည်။

"- ကျာယူလင်သည် သစ္စာရှိဗိုလ်ချုပ်ဖြစ်လာသည်၊ အတွေ့အကြုံအမှတ် ၅ သိန်း၊ ဆန်းကြယ်မှတ် ၅၀,၀၀၀ ရရှိသည်။"

"- ယူထျန်လင်သည် သစ္စာရှိဗိုလ်ချုပ်ဖြစ်လာသည်၊ အတွေ့အကြုံအမှတ် ၁ သန်း၊ ဆန်းကြယ်မှတ် ၁ သိန်း ရရှိသည်။"

"- ဟွေထျန်ချင်းသည် သစ္စာရှိဗိုလ်ချုပ်ဖြစ်လာသည်၊ အတွေ့အကြုံအမှတ် ၈ သိန်း၊ ဆန်းကြယ်မှတ် ၈ ‌သောင်း ရရှိသည်။"

"- ..."

မိန်းကလေးတစ်ယောက်ပြီးတစ်ယောက် ယီထျန်းယွမ်၏ သစ္စာရှိဗိုလ်ချုပ်များ ဖြစ်လာကြသည်။ ဤအခြေအနေက သူ့ကို အံ့အားသင့်စေသည်။ သူ၏ မူလရည်ရွယ်ချက်မှာ သူမတို့အား မိမိကိုယ်ကိုသတ်သေခြင်းမှ တားဆီးရန်သာ ဖြစ်သည်။ ဤသို့သေဆုံးခြင်းသည် တန်ဖိုးမရှိသည့်အပြင် ယုံမင်နတ်ဆိုးမျိုးနွယ်၏ ကဲ့ရဲ့စကားများကိုသာ ဖြစ်ပေါ်စေမည်။

သူမတို့အား တန်ဖိုးမရှိဟု ပြစ်တင်ပြောဆိုခံရသည်ဖြစ်ရာ ယခုအခါ တန်ဖိုးဖန်တီးရန် လိုအပ်သည်။ ဒေါသအမျက်ကို ယုံမင်နတ်ဆိုးမျိုးနွယ်ထံ ပြန်လည်ပေးဆပ်ကာ ဤမျိုးနွယ်ကို သုံးဘုံလောကမှ လုံးဝဖျက်ဆီးပစ်ရမည်။

ဤသို့လုပ်ဆောင်ခြင်းဖြင့်သာ သူမတို့၏ တန်ဖိုးကို ထင်ရှားစေနိုင်မည်ဖြစ်သည်။

"- သစ္စာရှိဗိုလ်ချုပ် ၁၀ ဦးကို အောင်မြင်စွာ ခေါ်ယူပြီးစီးသည်၊ အပိုဆုကြေးအဖြစ် အတွေ့အကြုံအမှတ် သန်း ၁,၀၀၀ ၊ ဆန်းကြယ်မှတ် ၁ သန်း၊ ကျွမ်းကျင်မှုအမှတ် ၅ သိန်း ရရှိသည်။ ထို့အပြင် ဗိုလ်ချုပ်ဆင့်ခေါ်အမိန့်တစ်ခု (၃ ကြိမ်အသုံးပြုနိုင်ပြီး ဆင့်ခေါ်သည့် ဗိုလ်ချုပ်ဦးရေ မသတ်မှတ်ထား) ရရှိသည်။"

"- သစ္စာရှိဗိုလ်ချုပ် ၁၅ ဦးကို အောင်မြင်စွာ ခေါ်ယူပြီးစီးသည်၊ အပိုဆုကြေးအဖြစ် အတွေ့အကြုံအမှတ် သန်း ၅,၀၀၀ ဆန်းကြယ်မှတ် ၅ သန်း၊ ကျွမ်းကျင်မှုအမှတ် ၂ သန်း ရရှိသည်။ ထို့အပြင် ဗိုလ်ချုပ်ဆင့်ခေါ်အမိန့်တစ်ခုနှင့် ဗိုလ်ချုပ်စွမ်းအားဖြည့်အမိန့် (အသုံးပြုပြီးပါက ဗိုလ်ချုပ်များ၏ စွမ်းအားနှင့် ခုခံအား ၁၀ ဆတိုးမြှင့်ပြီး ၃ ကြိမ်အသုံးပြုနိုင်သည်) ရရှိသည်။"

ဆုလာဘ်များ တသီတတန်းကြီး ထွက်ပေါ်လာသဖြင့် ယီထျန်းယွမ်မှာ မူးမေ့လုမတတ်ဖြစ်သွားသည်။ မိန်းကလေး ၁၂ ဦးသည် သူ၏ သစ္စာရှိဗိုလ်ချုပ်များ ဖြစ်လာကြသည်မှာ မယုံနိုင်စရာပင်။ သူ၏ စကားတစ်ခွန်းကြောင့် သူမတို့၏ သစ္စာစိတ်များ ပြည့်လျှံသွားကာ သူ့အတွက် မည်သည့်အရာမဆို လုပ်ဆောင်ပေးရန် ဆန္ဒရှိလာကြသည်။

ယီထျန်းယွမ်၏ မူလရည်ရွယ်ချက်မှာ ဤသို့မဟုတ်ပေ။ သစ္စာရှိဗိုလ်ချုပ်များ ခေါ်ယူရန်မှာ အလွန်ခက်ခဲသည်။ သို့သော် ဤမျှလွယ်ကူစွာ ခေါ်ယူနိုင်လိမ့်မည်ဟု မည်သူထင်မြင်နိုင်မည်နည်း။

"ကျွန်မတို့က သခင်အတွက် မည်သည့်အရာမဆို လုပ်ဆောင်ပေးရန် ဆန္ဒရှိပါတယ်... သေရမယ်ဆိုရင်တောင် ချက်ချင်းလုပ်ဆောင်ပါမယ်..."

"သခင်က ကျွန်မတို့ရဲ့ မသန့်ရှင်းမှုကို မမုန်းပါစေနဲ့..."

"ခဏလေး..."

ယီထျန်းယွမ်က သူမတို့၏ စကားများကို နက်ရှိုင်းသောအသံဖြင့် ဖြတ်တောက်လိုက်သည်။ သူမတို့ရှေ့တွင် တစ်ချက်လှည့်ပတ်လျှောက်လှမ်းပြီးနောက် နက်ရှိုင်းစွာ ပြောလိုက်သည်။

"မင်းတို့အားလုံး ကိုယ့်ကိုယ်ကို ယုတ်မာခံရပြီးနောက် မသန့်ရှင်းတော့ဘူးလို့ ထင်နေကြတာလား... ဘယ်သူနဲ့မှ နီးကပ်ခွင့်မရှိတော့ဘူးလို့ ထင်နေကြတာလား..."

"ဟုတ်ပါတယ်... ဒီရွံစရာကောင်တွေရဲ့ ယုတ်မာမှုကို ခံရပြီးနောက် ကျွန်မတို့ မသန့်ရှင်းတော့ဘူးလို့ ခံစားရပါတယ်... သခင်တစ်ယောက်တည်းကသာ ကျွန်မတို့အတွက် ရှင်သန်ရမယ့် ရည်မှန်းချက်ကို ပေးနိုင်ပါတယ်..."

သူမတို့အားလုံး ဤသို့တွေးနေကြသည်။ ယီထျန်းယွမ်၏ စကားများမရှိခဲ့လျှင် သူမတို့သည် မိမိကိုယ်ကို သတ်သေနှင့်ပြီးဖြစ်လိမ့်မည်။

"မဟုတ်ဘူး... မင်းတို့ရဲ့ နှလုံးသားဟာ သိပ်ကိုသန့်စင်တယ်... မသန့်ရှင်းမှု တစိုးတစိမှ မရှိဘူး... မင်းတို့ဟာ ဒီသားရဲတွေရဲ့ ယုတ်မာမှုကို ခံခဲ့ရတာမှန်တယ်... ဒါပေမဲ့ ဒါက ရုပ်ခန္ဓာတစ်ခုတည်းသာ ဖြစ်တယ်... မင်းတို့ရဲ့ ကျင့်စဉ်အဆင့်က မြင့်မားတဲ့နေရာကို ရောက်တဲ့အခါ ရုပ်ခန္ဓာကို အသစ်ပြန်လည်ပြောင်းလဲဖန်တီးနိုင်ပြီး အသစ်စက်စက် ခန္ဓာကိုယ်တစ်ခုကို ပိုင်ဆိုင်နိုင်တယ်..."

"ဒါတင်မကဘူး... ဒါဟာ မင်းတို့ရဲ့ ဆန္ဒအလျောက် မဟုတ်ဘူး... မင်းတို့ရဲ့ နှလုံးသားဟာ အမြဲတမ်း သန့်စင်နေဖို့ပဲလိုတယ်... နှလုံးသားက ညစ်ညမ်းမသွားဘူးဆိုရင် ဒါကသာ အရေးအကြီးဆုံးပဲ... မင်းတို့ တစ်စက်လေးမှ ကိုယ့်ကိုယ်ကိုယ် သိမ်ငယ်စရာမလိုဘူး... မင်းတို့ဟာ အမြဲတမ်း အသန့်စင်ဆုံးနဲ့ အလှပဆုံးပဲ..."

ယီထျန်းယွမ်၏ စကားများသည် နှလုံးသားထဲမှ ထွက်ပေါ်လာခြင်းဖြစ်သည်။ သူမတို့သည် အပြစ်မရှိသူများဖြစ်သည်။ နှလုံးသားမညစ်ညမ်းသရွေ့ မည်သည့်အရာမှ ပြဿနာမဟုတ်ပေ။ သေဆုံးရမည့်သူများမှာ ဤအမှိုက်များသာဖြစ်သည်။

သူပြောသည့်အတိုင်း ကျင့်စဉ်အဆင့်သည် သူတော်စဉ်နယ်ပယ်သို့ ရောက်ရှိလျှင် ရုပ်ခန္ဓာကို အသစ်ပြန်လည်ဖန်တီးနိုင်သည်။ ခန္ဓာကိုယ်ကို ပြန်လည်သန့်စင်ပြီး အသစ်စက်စက်ဖြစ်လာစေနိုင်သည်။

သို့သော် နှလုံးသားထဲက အရိပ်မည်းများကို ဖယ်ရှားမထားနိုင်လျှင် ရုပ်ခန္ဓာကို ပြောင်းလဲဖန်တီးသည်ဖြစ်စေ အချည်းနှီးသာဖြစ်သည်။

ယီထျန်းယွမ်၏ စကားများကို ကြားလိုက်ရသောအခါ သူမတို့၏ မျက်ရည်များ စီးကျလာသည်။ သူမတို့သည် မိမိကိုယ်ကို ရွံရှာနေကြပြီး ယီထျန်းယွမ်ကလည်း သူမတို့ကို ရွံရှာမည်ကို စိုးရိမ်နေကြသည်။

သူမတို့သည် မည်သည့်အိမ်ထောင်ဖက်ကိုမှ ရှာဖွေရန် မရည်ရွယ်တော့ပေ။ တစ်ခုတည်းသော ရည်မှန်းချက်မှာ ယုံမင်နတ်ဆိုးမျိုးနွယ်အားလုံးကို သတ်ဖြတ်ရန်သာ ဖြစ်သည်။ သို့သော် ယီထျန်းယွမ်က သူမတို့ကို ရွံရှာမည်ကို စိုးရိမ်နေကြသည်။ သူမတို့ပင်လျှင် မိမိကိုယ်ကို ရွံရှာနေကြသည်ဖြစ်ရာ မည်သည့်အကြောင်းဖြင့် ငြင်းခုံခွင့်ရှိမည်နည်း။

ယခုအခါ ယီထျန်းယွမ်၏ စကားများသည် သူမတို့၏ နှလုံးသားထဲသို့ ထိမှန်လိုက်သဖြင့် ငိုကြွေးလျက် စကားမပြောနိုင်ဖြစ်သွားကြသည်။

ယီထျန်းယွမ်က ဤမြင်ကွင်းကို မြင်လိုက်ရသောအခါ ခေါင်းယမ်းကာ သက်ပြင်းချလိုက်သည်။ အမျိုးသမီးများသည် များသောအားဖြင့် နစ်နာကြရသူများဖြစ်ကြသည်။ အထူးသဖြင့် ကျင့်ကြံသူအမျိုးသမီးများသည် ဖမ်းဆီးခံရပါက ယုတ်မာခံရလေ့ရှိပြီး နောက်ပိုင်းတွင် အများစုသည် မိမိကိုယ်ကို သတ်သေကြသည်။

ဘက်လိုက်မှုသည် အမြဲတမ်း အကြောက်ဆုံးဖြစ်သည်။ လူပြောသံများသည် ကြောက်မက်ဖွယ်ရာ ဖြစ်သည်။ ယုတ်မာခံရသူများကို လူအများက လက်ခံမှုနည်းပါးကြသည်။ သူမတို့သည် သားကောင်များဖြစ်ပြီး ဆန္ဒအလျောက်မဟုတ်သည့်တိုင် ဤသို့ဆက်ဆံခံရခြင်းသည် နှလုံးအေးစက်စရာပင်။

အခြားသူများ၏ အတွေးအမြင်ကို သူမထိန်းချုပ်နိုင်သော်လည်း သူ့ဘက်တွင်တော့ ဘက်လိုက်မှု လုံးဝမရှိပေ။

"အခု မင်းတို့အတွက် တာဝန်တစ်ခု ပေးမယ်... ဒီနေရာမှာရှိတဲ့ တန်ဖိုးရှိတဲ့ ရတနာတွေအားလုံးကို စုဆောင်းပြီး ဒီနေရာကို ပြန်ယူလာကြပါ..." ယီထျန်းယွမ်က သူမတို့အား ပထမဆုံးတာဝန်ကို ပေးလိုက်သည်။

သူမတို့သည် ထာဝရအသက်ဆွဲကြိုးအောက်တွင် အကြမ်းဖျင်းအားဖြင့် အပြည့်အဝနည်းပါး ပြန်လည်ကောင်းမွန်လာကြသည်။ ကျင့်စဉ်အဆင့်များမှာ ပြန်လည်မရရှိသေးသော်လည်း လမ်းလျှောက်ရန်မှာ ပြဿနာမရှိပေ။

"ကောင်းပါပြီသခင်..."

သူမတို့သည် လက်ဖြင့် မျက်ရည်များကို သုတ်လိုက်ပြီး ချက်ချင်းပင် အခြားနေရာများသို့ ပြေးထွက်ကာ ရှာဖွေမှုစတင်လိုက်ကြသည်။ သူမတို့၏ မျက်ဝန်းများထဲတွင် မျှော်လင့်ချက်များ ပြည့်လျှံနေသည်။ ယခုအခါ သူမတို့သည် မည်သည့်အရာကိုမှ မတောင်းဆိုကြတော့ပေ။ ယုံမင်နတ်ဆိုးမျိုးနွယ်ကို သတ်ဖြတ်ရန်မှလွဲ၍ အကြီးမားဆုံး ဆန္ဒမှာ ယီထျန်းယွမ်၏ လက်အောက်ခံအဖြစ် ထာဝရလုပ်ကိုင်ရန်သာ ဖြစ်သည်။

ယီထျန်းယွမ်အနေဖြင့် သူမတို့ကို ဤသို့လုပ်ဆောင်ရန် မလိုအပ်ပေ။ သူသည် မိမိစိတ်ခံစားချက်နှင့် ကိုက်ညီသည့်အရာများကိုသာ လုပ်ဆောင်ခဲ့ခြင်းဖြစ်သည်။

ထို့နောက် သူသည် ရေနဂါးဧကရာဇ်နှင့် ယုံမင်နတ်ဆိုးမျိုးနွယ်၏ သန်မာသူရှေ့သို့ ရောက်လာပြီး အေးစက်စွာ ကြည့်ကာ ပြောလိုက်သည်။

"မူလက မင်းတို့ကို လက်ချည်ပြီး တိုက်ခိုက်ခိုင်းဖို့ စဉ်းစားခဲ့တယ်... အခုတော့ မင်းတို့ရဲ့ လက်ကို မလှုပ်ရှားစေတော့ဘူး..."

ထို့နောက်တစ်ဆင့်တွင် သူသည် လက်တစ်ချက်ဝှေ့လိုက်သည်နှင့် သူတို့နှစ်ဦးစလုံးကို ဘေးသို့ ပစ်ထုတ်လိုက်သည်။ ချက်ချင်းပင် တာအိုမီးလျှံက သူတို့ကို ဝါးမျိုလိုက်သည်။ ထိုအဆုံးသတ်မှာ ယခင်ဘိုးဘေးသုံးဦးနှင့် အတူတူပင်ဖြစ်ပြီး တစ်စွန်းတစ်စ မီးလျှံဖြင့် ဝါးမျိုခံရသည်။

ယီထျန်းယွမ်သည် ဤမျှ ရက်စက်သည်။ သူ့အပေါ် ဆိုးရွားစွာ ပြုမူသူများ သို့မဟုတ် သူ့အနားရှိသူများကို ထိခိုက်နစ်နာစေလိုသူများကို ရင်ဆိုင်ရသောအခါ သူ၏ နှလုံးသားထဲတွင် ဒေါသတရားများ ပြည့်လျှံလာပြီး လက်ချလျှင် ပြတ်ပြတ်သားသား ရက်စက်စွာ ချလိုက်သည်။

ရေနဂါးဧကရာဇ်သည် သူ၏ သူငယ်ချင်းများကို ဖမ်းဆီးပြီး ခြိမ်းခြောက်ရန် ကြံရွယ်ခဲ့သည်။ ဤအချက်ကို သိရှိပြီးနောက် သူ၏ အဆုံးသတ်မှာ သတ်မှတ်ပြီးဖြစ်သည်။

"မင်း... သေရင်တောင် ကောင်းကောင်းမသေစေရဘူး... မင်းလို ကောင်က ငါတို့ ယုံမင်နတ်ဆိုးမျိုးနွယ်ကို ဖျက်ဆီးနိုင်မယ်လို့ ထင်နေတာလား... အိပ်မက်မက်နေတာပဲ..."

"ဟုတ်တယ်... ငါတို့ သေရင်တောင် မင်းကို လုံးဝမလွှတ်ဘူး..."

"ငါတို့ ယုံမင်နတ်ဆိုးမျိုးနွယ်က အင်အားအပြည့်နဲ့ ထိုးစစ်ဆင်လာတဲ့အခါ မင်းတို့ရဲ့ သေမင်းနေ့ရောက်လာလိမ့်မယ်..."

သူတို့သည် မီးလျှံများဖြင့် ဝါးမျိုခံရချိန်တွင်ပင် အဆိပ်ပြင်းစကားများကို ဆက်လက်ပြောဆိုနေကြသည်။

"မင်းတို့ရဲ့ စကားတွေက နည်းနည်းလေးတောင် ဆန်းသစ်မှုမရှိဘူး... ဒီအဓိပ္ပါယ်မရှိတဲ့ စကားတွေပဲ..." ယီထျန်းယွမ်က အေးစက်စွာ ပြုံးလိုက်ပြီး ဆက်ပြောသည်။ "ငါဒီမှာ စောင့်နေမယ်... ဘယ်လောက်ရောက်လာလာ အကုန်သတ်ပစ်မယ်... မင်းတို့ဘက်က မလာရင်တောင် ငါကိုယ်တိုင် မင်းတို့ရဲ့ တံခါးဝကို တက်သွားပြီး သတ်မယ်... ဒီအမှိုက်တွေကို လုံးဝဖယ်ရှားပစ်ပြီး ကောင်းကင်ဘုံကိုယ်စား တရားမျှတမှုကို ဆောင်ကြဉ်းပေးမယ်..."

သူသည် ယုံမင်နတ်ဆိုးမျိုးနွယ်၏ ဌာနချုပ်ကို လုံးဝဖျက်ဆီးမပစ်မချင်း စိတ်မချမ်းသာနိုင်ဟု ဆုံးဖြတ်ထားပြီးဖြစ်သည်။ သုံးဘုံလောက၏ အခြေအနေများမှာ ထင်ရှားလာပြီဖြစ်သည်။ နောက်တစ်ကြိမ် ထိုးစစ်ဆင်လာမှုသည် အချိန်ပိုင်းသာလိုမည်ဖြစ်သည်။

ထို့နောက် မီးလျှံများ ပိုမိုပြင်းထန်လာပြီး သူတို့၏ ခန္ဓာကိုယ်များကို ဆက်လက်မီးရှို့လိုက်သည်။ သူတို့မှာ ပိုမိုပြင်းထန်သော ဝေဒနာကို ခံစားရသည်။ ယီထျန်းယွမ်အတွက်တော့ ဤအရာသည် အစပိုင်းသာဖြစ်သည်။

အခန်း (၇၇၈) ပြီးပါပြီ။