မိစ္ဆာမောင်နှမ

မော့ရှာ သူ၏ အခန်းသို့ ပြန်ရောက်သည်နှင့် သူသည် စစ်တုရင်ခုံကို ဆွဲထုတ်ကာ ကျန်းပေရန်ကို ပြောလိုက်သည်။

"အကိုကြီး ကျွန်တော် ဒီနေ့ ရင်ဆိုင်ခဲ့ရတဲ့ ပြိုင်ဘက်က အရမ်းသန်မာတာပဲ သူက"

"အဲ့ဒါကို နောက်မှ ဆွေးနွေးကြရအောင် ငါ အရင်ဆုံး အပြင်ထွက်ဖို့ လိုတယ်"

"ဟင်"

မော့ရှာ၏ မျက်နှာအမူအရာ ချက်ချင်း ခဲသွားသည်။

ပြန်လာသော လမ်းတစ်လျှောက်တွင် သူသည် သူ၏ အကိုကြီး ကောင်းကောင်း "လမ်းလျှောက်" နိုင်ရန်အတွက် တစ်ချိန်လုံး တမင်တကာ တိတ်ဆိတ်နေခဲ့ပြီး ပြန်ရောက်သည်နှင့် ချက်ချင်း စစ်တုရင် ကစားနိုင်မည်ဟု တွေးထင်ထားခဲ့သည်။

သို့သော် ယခုအခါ သူ၏ အကိုကြီးက နောက်တစ်ကြိမ် အပြင်ထွက်ချင်နေပြန်သည်။

"ကစားပွဲကို မင်းဘာသာမင်း အရင် ပြန်သုံးသပ်ထားလိုက် ငါ မကြာခင် ပြန်လာခဲ့မယ်"

မော့ရှာ၏ ဆံပင်ကို ဖွရင်း ကျန်းပေရန်သည် လှည့်ကာ တံခါးကို တွန်းဖွင့်၍ ထွက်ခွာသွားသည်။

ရေကန်ငယ်လေးတစ်ခု၏ ဘေးတွင် ကျန်းပေရန်သည် ဝူချင်းစစ်ကို ရပ်တန့်ရန် အချက်ပြပြီး ရှေ့သို့တက်ကာ မေးလိုက်သည်။

"ဘာကိစ္စလဲ"

အစောပိုင်းက ကျန်းပေရန် သူ၏ အခန်းသို့ ပြန်ရောက်သည်နှင့် ဝူချင်းစစ် ထုတ်လွှတ်နေသော အနက်ရောင်စွမ်းအင်ကို သူ အာရုံခံမိခဲ့ပြီး ဆွေးနွေးစရာ တစ်ခုခု ရှိနေသည်ကို သိလိုက်သည်။

"အကိုကြီး မုယောင်ရဲ့ ပွဲစဉ်တွေကို ကြည့်ပြီးပြီလား"

"ကြည့်ပြီးပြီ"

"သူမ အရမ်းမြန်တာပဲ သူ့တိုက်ခိုက်မှုတွေကလည်း မယုံနိုင်လောက်အောင် ထက်ရှတယ် အခုထိ သူ့ကို ငါးကွက်ထက်ပိုပြီး ခံနိုင်တဲ့သူ တစ်ယောက်မှ မရှိသေးဘူး"

"ကြောက်နေတာလား"

"ကျွန်တော် ကြောက်နေတာတော့ မဟုတ်ပါဘူး ဒါက ဒီတိုင်း"

ဝူချင်းစစ် တွေဝေနေသည်ကို မြင်သောအခါ ကျန်းပေရန်က ပြောလိုက်သည်။

"ငါမင်းကို အကြံဉာဏ်တချို့ ပေးစေချင်တာလား"

ဝူချင်းစစ်၏ မျက်လုံးများ ချက်ချင်း တောက်ပသွားသည်။

"ဟုတ်ကဲ့"

"အိပ်မက်ဆက်မက်နေလိုက် ကိုယ့်ဘာသာကိုယ် ကြိုးစား ငါသွားပြီ"

ထိုသို့ပြောပြီး ကျန်းပေရန်သည် လှည့်၍ ထွက်သွားတော့သည်။

"အကို….."

ဝူချင်းစစ်သည် လက်တစ်ဖက်ကို ဆန့်တန်းလိုက်သော်လည်း နောက်ဆုံးတွင် အော်မခေါ်ခဲ့ပေ။

သို့သော် မကြာမီ သူ တစ်ခုခုကို သဘောပေါက်သွားပုံရသည်။

'အကိုကြီးက ငါ့ကို မုယောင်ကို အနိုင်ယူနိုင်တဲ့ အရည်အချင်းရှိတယ်လို့ ယုံကြည်လို့ အကြံဉာဏ် မပေးတာပဲ ဒါက ငါ့အပေါ်မှာထားတဲ့ သူ့ရဲ့ ယုံကြည်မှုပဲ'

ဒီအသိတရားနှင့်အတူ ဝူချင်းစစ်၏ ယုံကြည်မှု မြင့်တက်လာပြီး သူ၏ စိတ်လှုပ်ရှားမှု လုံးဝ ပျောက်ကွယ်သွားသည်။

နောက်တစ်နေ့ နံနက်တွင် စစ်တုရင်ပြိုင်ပွဲခန်းမတစ်ခု၌ မော့ရှာသည် ဝါးကုလားထိုင်တစ်လုံးပေါ်တွင် ထိုင်ရင်း သူ၏ နောက်ပြိုင်ဘက်ကို စောင့်ဆိုင်းနေသည်။

"အကိုကြီး ကျိုရီ ခင်ဗျား ဒီနေ့ မြန်မြန်နိုင်မှ ဖြစ်မယ်နော် မဟုတ်ရင် ကျွန်တော့်ပွဲကို လွတ်သွားလိမ့်မယ်"

မော့ရှာ၏ အနောက်တွင် မလှမ်းမကမ်း၌ ရပ်နေသော ကျန်းပေရန်သည် မော့ကြည့်လိုက်ရာ လွန်ခဲ့သော နှစ်ရက်အတွင်း ပြိုင်ပွဲ၏ အဓိကပြောစရာဖြစ်နေသော မုမောင်နှမ ချဉ်းကပ်လာသည်ကို တွေ့လိုက်ရသည်။

ညီမဖြစ်သူမှာ မုယောင် ဖြစ်သည်။

မိစ္ဆာဂိုဏ်း ပထမဆုံး ရောက်ရှိလာစဉ်က သူမသည် သူမ၏ ကျင့်ကြံမှုကို တတိယအဆင့် အနက်ရောင်သခင်အဆင့်တွင် ရှိကြောင်း ပြသခဲ့ပြီးဖြစ်သည်။

သူမသည် ဝိညာဉ်နဂါးဂိုဏ်းတစ်ခုလုံးတွင် အသန်မာဆုံး တိုက်ခိုက်ရေးသမားဖြစ်ကြောင်း အစောပိုင်းက သူမ၏ ကြွားဝါမှုနှင့် ပေါင်းစပ်လိုက်သောအခါ ဖြောင့်မတ်သောဂိုဏ်းမှ တပည့်များသည် သူမကို မိစ္ဆာဂိုဏ်း၏ အသန်မာဆုံး တိုက်ခိုက်ရေးသမားအဖြစ် သတ်မှတ်ခဲ့ကြသည်။

သို့သော် မည်သူမျှ သူမတွင် ပို၍ပင် ကြောက်စရာကောင်းသော အစ်ကိုတစ်ယောက် ရှိလိမ့်မည်ဟု မမျှော်လင့်ထားခဲ့ပေ။ ထိုသူမှာ မုကျိုရီဖြစ်ပြီး သူ၏ ကျင့်ကြံမှုသည် စတုတ္ထအဆင့် အနက်ရောင်သခင်အဆင့်သို့ ရောက်ရှိနေပြီဖြစ်သည်။

လွန်ခဲ့သော နှစ်ရက်အတွင်း ဖြောင့်မတ်သောဂိုဏ်းမှ တပည့်တစ်ဦးတစ်ယောက်မျှ သူ့ကို တစ်ကွက်ထက်ပို၍ မခံနိုင်ခဲ့ပေ။

မုကျိုရီသည် မယုံနိုင်လောက်အောင် အစွမ်းထက်ရုံသာမက အနုပညာတွင် သူ၏ ပါရမီများမှာလည်း အံ့ဩစရာကောင်းလှသည်။

သူသည် စစ်တုရင်၊ ဇီသာ၊ ပန်းချီ၊ လက်ရေးလှနှင့် အခြားများစွာတွင် ထူးချွန်သည်။

ထို့အပြင် မုကျိုရီ၏ ရုပ်ရည်မှာ ထင်ရှားပေါ်လွင်သည်။

သူ ဇီသာပြိုင်ပွဲအတွက် ပထမဆုံး ပေါ်ထွက်လာစဉ်က သူသည် တိမ်တိုက်ပုံစံ လက်စွပ်များပါသော စီးမျောနေသည့် အနီရောင်ဝတ်ရုံကို ဝတ်ဆင်ကာ မြေပြင်ပေါ်တွင် ပေါ့ပေါ့ပါးပါး ထိုင်နေခဲ့သည်။

သူ၏ ရှည်လျားပြီး ဖြန့်ကျက်ထားသော အနက်ရောင်ဆံပင်၊ ဓားသဖွယ်ထက်ရှသော မျက်ခုံးများ၊ ကြယ်တာရာများကဲ့သို့ မျက်လုံးများ၊ ဖြောင့်စင်းသော နှာတံနှင့် ပါးလွှာသော နှုတ်ခမ်းများက မင်းမျိုးမင်းနွယ်ဆန်သော ကျက်သရေရှိသည့် အငွေ့အသက်ကို ထုတ်လွှတ်နေသည်။

သူ၏ ဖျော်ဖြေမှုအပြီးတွင် ဖြောင့်မတ်သောဂိုဏ်းများမှ အမျိုးသမီးတပည့်များစွာသည် ဂိုဏ်းကွဲပြားမှုများကြောင့် ပေါ်ပေါ်ထင်ထင် လေးစားမှုကို မပြသနိုင်ခဲ့သော်လည်း ကျန်းပေရန်သည် အတော်များများ မုကျိုရီ၏ ကျက်သရေအောက်တွင် ကျရောက်သွားခဲ့သည်ကို ပြောနိုင်သည်။

မုယောင်က စစ်တုရင်ခုံသို့ ဆွဲခေါ်လာသောအခါ မုကျိုရီသည် မော့ရှာကို ခေါင်းညိတ်ပြပြီး သူ၏ မျက်နှာချင်းဆိုင်တွင် ဝင်ထိုင်လိုက်သည်။

"အကိုကြီး ကျိုရီ မြန်မြန်ရွှေ့ပါ မြန်မြန်လုပ်"

မုကျိုရီက ခေါင်းခါလိုက်သည်။

"မုယောင် ရိုင်းရိုင်းစိုင်းစိုင်း မလုပ်နဲ့ ဖေဖေက ငါတို့ကို အမြဲတမ်း ဘာသင်ပေးခဲ့လဲ"

"ကျွန်မ သိပါတယ် ပြိုင်ဘက်တိုင်းကို လေးစားပါ ကောင်းပြီ ကောင်းပြီ ကျွန်မ ဘာမှ မပြောတော့ဘူး ကျွန်မကို အဲ့ဒီလို စိုက်မကြည့်နဲ့"

'ဒီမိစ္ဆာဂိုဏ်းက သခင်လေးက တော်တော်လေး ထူးခြားတဲ့ အမူအကျင့် ရှိတာပဲ'

ဒီယဉ်ကျေးသော လူကြီးလူကောင်းကို အနီးကပ် လေ့လာကြည့်ရင်း ကျန်းပေရန်သည် သူ့ကို ထူးဆန်းစွာမြင်ရသော မိစ္ဆာဂိုဏ်း တပည့်များနှင့် ဆက်စပ်ရန် ခက်ခဲနေသည်ကို တွေ့ရှိရသည်။

ဒိုင်လူကြီး ရောက်ရှိလာသောအခါ မော့ရှာနှင့် မုကျိုရီတို့သည် အပြန်အလှန် ဦးညွှတ်ပြီး ပွဲစတင်ခဲ့သည်။

တောက် တောက် တောက်

ကျောက်တုံးများ ချသည့်အသံများ ဆက်လက်ထွက်ပေါ်နေပြီး မကြာမီ မော့ရှာ၏ မျက်နှာအမူအရာ တင်းမာလာသည်။

သူ၏ပြိုင်ဘက်သည် ထုံးတမ်းစဉ်လာ ဉာဏ်ပညာအတိုင်း မကစားနေကြောင်း သူ သဘောပေါက်လိုက်သည်။

ပုံမှန်အားဖြင့် စစ်တုရင်ကစားသမား အများစုသည် အဖွင့်အဆင့်တွင် ထောင့်များကို အာရုံစိုက်ရန် ပိုနှစ်သက်ကြသည်။

ထောင့်များသည် စစ်တုရင်ခုံ၏ အစွန်းများနှင့် ကျောထောက်နောက်ခံပြုထားသောကြောင့် သူတို့သည် လားရာနှစ်ခုကိုသာ ခုခံရန် လိုအပ်သည်။

အကယ်၍ ထောင့်တစ်ခု ဆုံးရှုံးသွားလျှင်ပင် သူတို့သည် လားရာသုံးခုကိုသာ ကာကွယ်ရန် လိုအပ်သော ဘေးဘက်များသို့ ရွှေ့ပြောင်းနိုင်သည်။

သို့သော် မုကျိုရီသည် လားရာလေးခုလုံးကို ကာကွယ်ရန် လိုအပ်သော အလယ်ဗဟိုကို တိုက်ရိုက် တိုက်ခိုက်ခဲ့သည်။

၎င်းသည် အကာအကွယ်ရှာမည့်အစား အကာအကွယ်မဲ့ ပွင့်လင်းသော စစ်မြေပြင်ကို ရွေးချယ်ခြင်းနှင့် တူနေသည်။

ရလဒ်အနေဖြင့် မော့ရှာသည် မုကျိုရီ၏ ထူးခြားသော ဗျူဟာတွင် အလွန်အမင်း နစ်မွန်းသွားပြီး သူ၏ကိုယ်ပိုင်ကစားကွက်မှာ ရှုပ်ထွေးလာကာ နယ်မြေများကို လျင်မြန်စွာ ဆုံးရှုံးခဲ့သည်။

နောက်ဆုံးတွင် အောင်ပွဲသို့ သွားရာလမ်း မမြင်တော့သောအခါ မော့ရှာသည် သူ၏ လက်သီးများကို ဆုပ်၊ သွားကြိတ်ကာ စစ်တုရင်ခုံကို စိုက်ကြည့်နေလိုက်သည်။

"ကျွန်တော် ကျွန်တော် အရှုံးပေးပါတယ်"

မကျေနပ်မှု၏ မျက်ရည်များ မော့ရှာ၏ မျက်နှာပေါ်တွင် စီးကျလာပြီး သူ၏ ခန္ဓာကိုယ်သည် မထိန်းချုပ်နိုင်အောင် တုန်ယင်နေသည်။

"မင်းရဲ့ ကျွမ်းကျင်မှုက အထင်ကြီးစရာပဲ မင်းနဲ့ နောက်တစ်ကြိမ် ရင်ဆိုင်ဖို့ မျှော်လင့်ပါတယ်"

မုကျိုရီသည် အနည်းငယ် ဦးညွှတ်ပြီးနောက် ထွက်ခွာရန် ထရပ်လိုက်သော်လည်း သူ မသွားမီ သူ၏အကြည့်သည် ကျန်းပေရန်၏ မျက်နှာပေါ်တွင် ခဏတာ တန့်နေခဲ့သည်။

ထိုအကြည့်ကို အာရုံခံမိသော ကျန်းပေရန်သည် အသိအမှတ်ပြုသည့်အနေဖြင့် ခေါင်းညိတ်ပြလိုက်သည်။

"အကိုကြီး ကျိုရီ ဘာကို ကြည့်နေတာလဲ မြန်မြန်လုပ် ကျွန်မပွဲ စတော့မယ်"

မုယောင်က ဆွဲခေါ်သွားသောအခါ မုကျိုရီသည် ကျန်းပေရန်ကို နောက်တစ်ကြိမ် ခေါင်းညိတ်ပြပြီးနောက် ထွက်ခွာသွားသည်။

ခဏအကြာတွင် ကျန်းပေရန်သည် လျှောက်လာပြီး မော့ရှာ၏ ဆံပင်ကို ဖွလိုက်သည်။

"သူက အရမ်းသန်မာတယ် သူ့ကို ရှုံးတာက ရှက်စရာ မဟုတ်ဘူး"

သို့သော် မော့ရှာသည် သူ၏ စိတ်ပျက်မှုအားလုံးကို သွန်ချလိုက်သကဲ့သို့ ပို၍ပင် ငိုကြွေးတော့သည်။

"ငါ့ပွဲ စတော့မယ် မင်း ဆက်ငိုနေမလား လာကြည့်မလား မင်းရွေးချယ်"

မော့ရှာသည် သူ၏ မျက်ရည်များကို အားဖြင့် သုတ်လိုက်ပြီး စိတ်ပိုင်းဖြတ်စွာ ပြောလိုက်သည်။

"ကျွန်တော် ကြည့်မယ်"

"ကောင်းတယ် ဒါဆို ငါ့နောက်ကို လိုက်ခဲ့"

တစ်နာရီအကြာတွင် ကျန်းပေရန်သည် သူ၏ ပြိုင်ဘက်ကို အနိုင်ယူခဲ့သည်။

မိစ္ဆာဂိုဏ်းမှ တပည့်၏ မယုံကြည်နိုင်သော အကြည့်အောက်တွင် သူသည် ထရပ်ကာ ယဉ်ကျေးစွာ ဦးညွှတ်ပြီး ခန်းမမှ ထွက်ခွာသွားသည်။

"အကိုကြီး အကိုကြီးက မုကျိုရီကို မနက်ဖြန် သေချာပေါက် အနိုင်ယူလိမ့်မယ်လို့ ကျွန်တော် သိတယ်"

သူတို့ အတူတူ ထွက်လာစဉ် မော့ရှာက ပြောလိုက်သည်။

သုံးရက်ကြာ ရှုံးထွက်အဆင့်များအပြီးတွင် ဒီနေ့သည် ဆီမီးဖိုင်နယ်နေ့ဖြစ်သည်။

သူ၏ ယခင်ပြိုင်ဘက်ကို အနိုင်ယူပြီးနောက် ကျန်းပေရန်သည် ယခုအခါ မုကျိုရီနှင့်သာ ရင်ဆိုင်ရန် ကျန်တော့သည်။

"မင်း သူ့ရဲ့ အင်အားကို သိသွားပြီလား"

ကျန်းပေရန်က မေးလိုက်သည်။

"ကျွန်တော်"

မော့ရှာ တွေဝေသွားပြီးနောက် ခေါင်းခါလိုက်သည်။

"ကျွန်တော် မသိဘူး"

သို့သော် ထို့နောက် သူ ယုံကြည်မှုဖြင့် မျက်နှာကို မော့လိုက်သည်။

"ဒါပေမဲ့ အကိုကြီးရဲ့ ကျွမ်းကျင်မှုက သူ့ထက် သာလွန်တယ်ဆိုတာ ကျွန်တော် သေချာတယ်"

ကျန်းပေရန်က ခပ်ရေးရေး ပြုံးလိုက်သည်။

"ကောင်းပြီလေ ငါ မင်းကို စိတ်မပျက်စေရအောင် အကောင်းဆုံး ကြိုးစားမယ်"

မော့ရှာ ကစားပွဲ မှတ်တမ်းများကို ပြန်လည်သုံးသပ်ရန် ထွက်ခွာသွားပြီးနောက် ကျန်းပေရန်သည် အားကစားကွင်း ဧရိယာသို့ ဦးတည်သွားပြီး ဝူချင်းစစ်သည် သူ၏ ပွဲကို အနိုင်ရပြီး ဆီမီးဖိုင်နယ်သို့ တက်လှမ်းသွားပြီဖြစ်သည်ကို တွေ့လိုက်ရသည်။

သူ၏ မနက်ဖြန် ပြိုင်ဘက် ဟုတ်လား

မုယောင်

ညဦးပိုင်းသို့ ရောက်သောအခါ ဖြောင့်မတ်သောဂိုဏ်းမှ တပည့် တစ်ဆယ့်ငါးယောက်သာ ကျန်ရှိတော့သည်။

ပြိုင်ပွဲအများစုသည် သူတို့၏ အထွတ်အထိပ်သို့ နီးကပ်နေပြီဖြစ်ပြီး ဒီနောက်ဆုံး ထိပ်တိုက်တိုက်ပွဲများတွင် ဖြောင့်မတ်သောဂိုဏ်းများသည် လုံးဝ ရှုံးနိမ့်ခဲ့ကြသည်။

အချို့ဂိုဏ်းများသည် သူတို့၏ ပါဝင်ယှဉ်ပြိုင်သူများ အားလုံး စောစောစီးစီး ရှုံးနိမ့်သွားသောကြောင့် ညစာပင် မစားတော့ဘဲ ထွက်ခွာသွားကြပြီးဖြစ်သည်။

"ခင်ဗျားရဲ့ လမ်းညွှန်မှုက အသီးအပွင့်တွေ ပေးခဲ့ပြီ ခင်ဗျားဂိုဏ်းရဲ့ တပည့်တွေက တကယ်ကို ထူးချွန်ကြတယ်"

စားသောက်ပွဲခန်းမတွင် ကွမ်းရှီအန်းက လူယင်လုံကို ပြောလိုက်သည်။

ယခုအခါ လျှို့ဝှက်လမင်းဂိုဏ်းနှင့် စိတ်နှလုံးပြန်ဂိုဏ်းတို့သာ ပါဝင်ယှဉ်ပြိုင်သူ သုံးယောက်စီ ကျန်ရှိတော့သည်။

သို့သော် ဂိုဏ်းများစွာက စိတ်နှလုံးပြန်ဂိုဏ်းသည် ကံကောင်းရုံမျှသာဟု ယုံကြည်ကြသည်။

အခြားဂိုဏ်းများတွင်လည်း မကြာသေးမီက အနက်ရောင်သခင်အဆင့်သို့ ရောက်ရှိခဲ့သော ဝူချင်းစစ်ကဲ့သို့ တပည့်များ ရှိကြသည်။ ဥပမာအားဖြင့် အနက်ရောင်နေဂိုဏ်းနှင့် ကောင်းကင်ရှာဖွေဂိုဏ်းတို့ ဖြစ်သည်။

အမှန်တကယ်တော့ ကောင်းကင်ရှာဖွေဂိုဏ်းမှ တပည့်တစ်ဦးသည် တတိယအဆင့် အနက်ရောင်သခင်အဆင့်သို့ပင် ရောက်ရှိခဲ့သည်။

သို့သော် သူတို့သည် မုကျိုရီနှင့် မုယောင်တို့နှင့် စောစောစီးစီး ရင်ဆိုင်ခဲ့ရပြီး ရှုံးနိမ့်ခဲ့ကြသည်။

ထို့ကြောင့် သူတို့၏ မျက်စိထဲတွင် မကြာသေးမီကမှ အဆင့်တက်ခဲ့သော ဝူချင်းစစ်သည် ကံကောင်းရုံသာ ဖြစ်သည်။

သူ မနက်ဖြန် မုယောင်ကို ရှုံးနိမ့်မည်မှာ သေချာသည်ဟု သူတို့ ယုံကြည်ကြသည်။

"လျှို့ဝှက်လမင်းဂိုဏ်းက တကယ်ကို ပါရမီရှင်တွေနဲ့ ပြည့်နှက်နေတာပဲ ယန်ချင်းရဲ့ အင်အားက ငြင်းမရဘူး သူက ငါတို့ ဖြောင့်မတ်တဲ့ဂိုဏ်းတွေအတွက် ဂုဏ်ဆောင်လိမ့်မယ်ဆိုတာ သေချာတယ်"

ဝမ်ယန်ချင်းသည် လက်ရှိ လျှို့ဝှက်လမင်းဂိုဏ်း တပည့်မျိုးဆက်တွင် အသန်မာဆုံး ဖြစ်သည်။

ပြိုင်ပွဲမတိုင်မီက စိတ်နှလုံးပြန်ဂိုဏ်းတစ်ခုလုံးသည် သူ့ကို ဝူချင်းစစ်၏ အခက်ခဲဆုံး ပြိုင်ဘက်အဖြစ် သတ်မှတ်ခဲ့ကြသည်။

သို့သော် ယခုအခါ ဆီမီးဖိုင်နယ်တွင် သူသည် မုကျိုရီနှင့် ရင်ဆိုင်ရမည်ဖြစ်ပြီး သူ ဖိုင်နယ်သို့ပင် ရောက်နိုင်မလား မသေချာတော့ပေ။

ကွမ်းရှီအန်း သက်ပြင်းချလိုက်သည်။

"ငါကတော့ သူ မနက်ဖြန်မှာ နောင်တကင်းကျန်ရစ်စေဖို့ပဲ မျှော်လင့်တယ်"

လူငယ်သူရဲကောင်းပြိုင်ပွဲ မစတင်မီက ကွမ်းရှီအန်းသည် ဝမ်ယန်ချင်းအပေါ် ယုံကြည်မှု ရှိခဲ့သည်။

သို့သော် လွန်ခဲ့သော နှစ်ရက်အတွင်း မုကျိုရီ၏ စွမ်းဆောင်ရည်များကို မျက်မြင်တွေ့ရှိပြီးနောက် သူ၏တပည့်က ဒီအတားအဆီးကို ကျော်လွှားနိုင်မလားဟု သူ စိုးရိမ်မဆုံး ဖြစ်နေမိသည်။

"အား အချင်းချင်း မြှောက်ပင့်နေကြတာလား ကျုပ်လည်း ပါဝင်ပါရစေ"

ယင်ကျန်းဟုန်သည် အရက်နံ့များ ထောင်းနေပြီး ဝိုင်ပုလင်းတစ်လုံးဖြင့် ချဉ်းကပ်လာသည်။

ကွမ်းရှီအန်းက သူ့ကို အားမလိုအားမရသော အကြည့်ဖြင့် ကြည့်လိုက်သည်။

"မင်းရဲ့ ကလေးနှစ်ယောက်က ဘယ်လောက် အထင်ကြီးစရာကောင်းလဲဆိုတာ ငါတို့ သိပြီးသားပဲ မင်းကြွားနေဖို့ မလိုတော့ဘူး"

လွန်ခဲ့သော သုံးရက်အတွင်း ကွမ်းရှီအန်း၏ ဒေါသသည် ယင်ကျန်းဟုန်ကြောင့် ပျောက်ကွယ်သွားခဲ့သည်။

ထိုလူက စိန်ခေါ်ရန် ဒီကိုလာခြင်းဖြစ်ကြောင်း သူသိသော်လည်း သူ၏ အပြုအမူမှာ အလွန်အကျွံ စော်ကားခြင်း မရှိခဲ့ပေ။

သူတို့၏ ရှုံးနိမ့်မှုများမှာ ကျွမ်းကျင်မှု နိမ့်ကျခြင်းကြောင့်သာ ဖြစ်သည်။ သူတို့ နောက်မှ ပို၍ ကြိုးစားလေ့ကျင့်နိုင်သည်။

"ဟားဟားဟား ဂိုဏ်းချုပ်ကွမ်း ခင်ဗျားက ကျုပ်ကို မျက်နှာပူအောင် လုပ်နေတာပဲ အား ကျုပ်ဂိုဏ်းက လူမိုက်လေးတွေ အပြင်မှာ မီးပုံပွဲ ကျင်းပနေကြတယ် ခင်ဗျားတို့ ဘာလို့ ကျုပ်တို့နဲ့ လာမပူးပေါင်းတာလဲ ဒီထဲမှာ ပုန်းအောင်းနေလို့ ဘာအဓိပ္ပာယ်ရှိမှာလဲ"

"မဟုတ်ဘူး ငါဒီမှာပဲ အဆင်ပြေတယ်"

အေ့

ယင်ကျန်းဟုန် လေချဉ်တက်လိုက်သည်။

"ခင်ဗျားတို့ ဖြောင့်မတ်တဲ့ဂိုဏ်းက တပည့်တွေ အများကြီး အပြင်မှာ ရောက်နေကြပြီ ခင်ဗျား မစိုးရိမ်ဘူးလား"

"သူတို့ရဲ့ ကိုယ်ပိုင်ဂိုဏ်းချုပ်တွေ သူတို့နဲ့ အတူရှိတယ် ငါဘာလို့ စိုးရိမ်ရမှာလဲ"

စကားပုံအတိုင်းဆိုလျှင် "ရန်ဖြစ်ရင်း သံယောဇဉ်ဖြစ်"…..

လေးရက်ကြာ ပြိုင်ပွဲအပြီးတွင် နှစ်ဖက်စလုံးမှ တပည့်များသည် အတိအကျ မရင်းနှီးသော်လည်း အကျွမ်းတဝင် ဖြစ်လာခဲ့ကြသည်။

အစပိုင်းက စိန်ခေါ်မှုများမှသည် စိတ်အားထက်သန်သော ပြိုင်ဆိုင်မှုများအထိ သူတို့၏ အပြန်အလှန်ဆက်ဆံရေးမှာ အနေရခက်မှု နည်းပါးလာခဲ့သည်။

ဂလု ဂလု

ဟား

အရက်နံ့များပါသော လေကို ထုတ်လွှတ်ရင်း ယင်ကျန်းဟုန် ပြုံးလိုက်သည်။

"ဝန်ခံရမယ်ဆိုရင် ခင်ဗျားတို့ ဖြောင့်မတ်တဲ့ဂိုဏ်းတွေမှာ တော်တဲ့ တိုက်ခိုက်ရေးသမား အနည်းငယ် ရှိလိမ့်မယ်လို့ ကျုပ် မမျှော်လင့်ထားခဲ့ဘူး ကျုပ်တို့ ထိပ်ဆုံးရှစ်ယောက်ကို အကုန်ယူနိုင်မယ်လို့ ထင်ခဲ့တာ"

"မင်းတို့ ကိုယ့်ကိုယ်ကို အထင်ကြီးလွန်းသွားတာ"

ကွမ်းရှီအန်းက နှာမှုတ်လိုက်သည်။

သူသည် မိစ္ဆာဂိုဏ်းက အင်အားတွင် အလုံးစုံ အားသာချက်ရှိကြောင်း ဝန်ခံရသော်လည်း ဖြောင့်မတ်သောဂိုဏ်းများ၏ ထိပ်တန်းတပည့်များသည် ဆက်လက်တိုက်ပွဲဝင်ခဲ့ကြပြီး ဂုဏ်သိက္ခာအချို့ကို ကယ်တင်နိုင်ခဲ့သည်။

"လာစမ်းပါ ရိုးရိုးသားသားပြောစမ်း မနက်ဖြန် ဘယ်သူနိုင်မယ်လို့ ခင်ဗျားထင်လဲ"

"အချိန်တန်ရင် သိလာမှာပေါ့"

"ခန့်မှန်းကြည့်စမ်း ဟေး ထွက်မသွားနဲ့"

...

ပျော်ပွဲရွှင်ပွဲများကြားတွင် ညကုန်ဆုံးသွားပြီး နေ့သစ်တစ်ခု ရောက်ရှိလာခဲ့သည်။ အနုပညာနှင့် ပြိုင်ပွဲအားလုံးအတွက် နောက်ဆုံးဗိုလ်လုပွဲဖြစ်သည်။

ဖြောင့်မတ်သောနှင့် မိစ္ဆာခေါင်းဆောင်များသည် သူတို့၏တပည့်များနှင့်အတူ ကြည့်ရှုစင်များတွင် စုရုံးကာ ချန်ပီယံများ ပေါ်ထွက်လာမည်ကို စောင့်ဆိုင်းနေကြသည်။

မုကျိုရီသည် သူ၏ အပြတ်အသတ် အောင်မြင်မှုကို ဆက်လက်ထိန်းသိမ်းကာ လက်ရေးလှ၊ ဇီသာနှင့် ပန်းချီတို့တွင် ပထမနေရာကို ရယူခဲ့ပြီး လူအုပ်ထံမှ အာမေဋိတ်သံများကို ဆွဲဆောင်နိုင်ခဲ့သည်။

"မုကျိုရီက လူရောဟုတ်ရဲ့လား သူ မလုပ်နိုင်တာများ ရှိသေးရဲ့လား"

"သူက တကယ်ကို ထူးချွန်တာပဲ မိစ္ဆာဂိုဏ်း တပည့်တစ်ယောက်အနေနဲ့တောင် ငါလေးစားမှုပဲ ပေးနိုင်တယ်"

"ဟားဟားဟား ဟုတ်တာပေါ့ အကိုကြီး ကျိုရီက ငါတို့ မျိုးဆက်ရဲ့ ပါရမီရှင်အဖြစ် မိစ္ဆာဂိုဏ်း တပည့်တွေကြားမှာ တစ်ကမ္ဘာလုံးက အသိအမှတ်ပြုထားတာ ဒီသေးငယ်တဲ့ တောင်ထွတ်ပြည်နယ်ကို မေ့လိုက် အနက်ရောင်ပြည်နယ်မှာတောင် သူက အတောက်ပဆုံးပဲ"

"တော်ပြီ မင်းလွန်လွန်းသွားပြီ 'အနက်ရောင်ပြည်နယ်မှာ အတောက်ပဆုံး' ဟုတ်လား သူက အနာဂတ် အနက်ရောင်ဧကရာဇ်တစ်ပါးရဲ့ ဟိတ်ဟန်ရှိတယ်လို့ပဲ ပြောလိုက်ပါလား"

"ဘာလို့ မဖြစ်ရမှာလဲ အကိုကြီး ကျိုရီမှာ အနာဂတ် အနက်ရောင်ဧကရာဇ်တစ်ပါးရဲ့ ဟိတ်ဟန် လုံးဝရှိတယ်"

"ဟုတ်ပါပြီ ဟုတ်ပါပြီ ကြွားနေလိုက် ငါနားထောင်နေတယ်"

"ငြင်းခုံနေတာ တော်ကြတော့ စစ်တုရင် ဖိုင်နယ်ပွဲ စတော့မယ် အကိုကြီး ကျိုရီသာ ဒီပွဲနိုင်ရင် သူအပြတ်အသတ် အောင်မြင်မှု ရလိမ့်မယ်"

"ပြိုင်ဘက်ရဲ့ နာမည် ဘာတဲ့"

"မသိဘူး သူက သိုင်းပညာပြိုင်ပွဲတွေမှာ မပါဝင်ခဲ့ဘူးထင်တယ် စစ်တုရင်အတွက်ပဲ လာတာ"

"သူ ဖိုင်နယ်ကို ရောက်တာ အံ့ဩစရာ မရှိတော့ဘူး တစ်ခုတည်းမှာ အထူးပြုတာကလည်း သူ့အားသာချက်တွေ ရှိတာပဲ ကံဆိုးတာက သူ အကိုကြီး ကျိုရီနဲ့ တွေ့သွားတာပဲ သူတော့ ရှုံးမှာပဲ"

ဖိုင်နယ်ပွဲ ကျင်းပရာ ခန်းမတွင် ကျန်းပေရန်နှင့် မုကျိုရီတို့သည် မျက်နှာချင်းဆိုင် ထိုင်ကာ အပြန်အလှန် ဦးညွှတ်လိုက်ကြသည်။

"အကိုကြီး ကျိုရီ မြန်မြန်နိုင်လိုက် ငါတို့ နင့်ရဲ့ အောင်ပွဲကြီးကို ဆင်နွှဲကြမယ်"

မုကျိုရီ၏ နောက်မှ ပွဲကြည့်စင်များမှ မုယောင်သည် သူမ၏ အသံကို အနက်ရောင်စွမ်းအင်ဖြင့် ချဲ့လိုက်သည်။

သူမ၏ စိတ်ထဲတွင် သူမ၏ အစ်ကိုသည် အားပေးမှု မလိုအပ်ပေ။ သူသာ ပါဝင်ယှဉ်ပြိုင်လျှင် အောင်ပွဲသည်သာ တစ်ခုတည်းသော ဖြစ်နိုင်သော ရလဒ်ဖြစ်သည်။

ကြည့်ရှုစင်ပေါ်တွင် ရွှေပန်းငါးပွင့်သည် မုယောင်ကို စိုက်ကြည့်နေကြသည်။

'ဟမ့် အကိုကြီးကို အထင်သေးနေတာလား စောင့်နေလိုက် သူဘယ်လောက် အံ့ဩစရာကောင်းလဲဆိုတာ မင်းမြင်ရလိမ့်မယ်'

အတွေ့အကြုံရရန် အတူခေါ်ဆောင်လာခဲ့သော လျိုဇီဂျင်းနှင့် အခြားသူများသည် စောစောစီးစီး ရှုံးထွက်သွားခဲ့ကြသည်။

စစ်တုရင်ပွဲများသည် ကြည့်ရှုသူ နည်းပါးသောကြောင့် သူတို့ တက်ရောက်ခြင်းက သူတို့၏ အကိုကြီးကို စိတ်အနှောင့်အယှက်ဖြစ်စေမည်ကို စိုးရိမ်သဖြင့် သူတို့ ထိန်းချုပ်ထားခဲ့ကြသည်။

သို့သော် ယခုအခါ ဖိုင်နယ်နေ့တွင် တပည့်များနှင့် ဂိုဏ်းချုပ်များ အားလုံး ကြည့်ရှုရန် စုရုံးရောက်ရှိလာကြရာ သူတို့ကို ပရိသတ်အဖြစ် တရားဝင် ပူးပေါင်းခွင့်ပြုလိုက်သည်။

သူတို့ မုယောင်ကို ပြန်လည်ချေပချင်သော်လည်း ယခင်ပြိုင်ပွဲများတွင် မုကျိုရီ၏ အလွန်အမင်း အောင်မြင်မှုများက ဖြောင့်မတ်သောဂိုဏ်းမှ တပည့်များကိုပင် ကျန်းပေရန်၏ အခွင့်အလမ်းများအပေါ် သံသယဝင်စေခဲ့သည်။

ယွီကွေ့မြောင်ပင်လျှင် သူမ၏ ထုံးစံအတိုင်း "ဟုတ်တယ် ဟုတ်တယ်" ဟု ဝင်ပြောရန် အခွင့်အရေး မရှာနိုင်ခဲ့ပေ။

သို့သော် အခြားသူများ၏ ထင်မြင်ချက်များ မည်သို့ပင်ဖြစ်စေ သူတို့ငါးယောက်သည် သူတို့၏ အကိုကြီး အနိုင်ရမည်ဟု ခိုင်မာစွာ ယုံကြည်ကြသည်။