တွေ့ဆုံခြင်း  

သူသည် ပထမနေ့တွင် လူသားများကို ရှာဖွေ တွေ့ရှိခဲ့သည်။ မကောင်းဆိုးဝါးနှင့် ယိုယွင်းနေသော သတ္တဝါများသည် မြေအောက်လောက သားရဲကောင်များကို အမဲလိုက်ရန် အုပ်စုဖွဲ့ နေကြသည်။ သူ မြေအောက်လောက သားရဲကောင်များ အတွက် သနားကြင်နာစိတ် ပထမဆုံး အကြိမ် ခံစားခဲ့ရခြင်း ဖြစ်သည်။

မြေပေါ်လောက၏ ယိုယွင်းနေသော သတ္တဝါများသည်လည်း ထာဝရတိုင်းပြည်၏ စစ်သည်တော်များနှင့် ကြမ်းတမ်းစွာ တိုက်ခိုက် နေကြသည်။

ချယ်ရီသည် အဘယ်ကြောင့် အလုံးအရင်းဖြင့် အကြီးစား စစ်ပွဲများ ဖြစ်ရမည့်အစား အသေးစား တိုက်ခိုက်မှုများသာ ဖြစ်ပွားနေသည်ကို နားမလည်နိုင် ဖြစ်နေ၏။ ဟုတ်ပေသည်၊ သူတို့သည် တိုက်ခိုက်မှုများတွင် အချင်းချင်းလည်း သတ်ဖြတ် နေကြသည်။

ထာဝရတိုင်းပြည်သည် မြေပေါ်လောကမှ ဖန်တီးထားသော ရှေ့တန်းစခန်းကို အဘယ်ကြောင့် အမြစ်ပြတ် မတိုက်ခိုက်သနည်း။ အကယ်၍ ထာဝရတိုင်းပြည်သည် သူတို့ အနိုင်မတိုက် နိုင်မည်ကို စိုးရိမ်နေပါက ထာဝရတိုင်းပြည်သည် ဆောင်းတောင်ကုန်းမြို့ကို အဘယ်ကြောင့် အကြောင်းမကြား သနည်း။ ဤနယ်မြေသည် ကုန်သည်မဟာမိတ် အဖွဲ့ပိုင် ဖြစ်သောကြောင့် အကယ်၍ ကုန်သည်မဟာမိတ် အဖွဲ့က လူသား ကျူးကျော်မှုကို သိရှိသွားပါက ဆောင်းတောင်ကုန်းမြို့သည် သေချာပေါက် ဝင်ရောက် စွက်ဖက်မည်သာ ဖြစ်သည်။

ထာဝရတိုင်းပြည်သည် အခြား အထူး အကြောင်းပြချက် တစ်ခုခု ကြောင့် လူသား အရေအတွက်ကို ထိန်းသိမ်း ထားခြင်းလော။

ချယ်ရီ မသေချာချေ။ သူသည် သင့်တော်သော ကောက်ချက် တစ်ခု ချမှတ်နိုင်ရန် ပိုမို အသေးစိတ်သော ထောက်လှမ်းရေး သတင်းများ ရရှိရန် လိုအပ်သည်။

ချယ်ရီသည် တောရိုင်း သားရဲများဖြင့် ပြည့်နှက်နေသော သစ်ပင် ကင်းမဲ့သည့် လွင်ပြင်ထဲတွင် ထောက်လှမ်းရေး သတင်းများ ရရှိရန် ခက်ခဲသည်ဟု ခံစားနေရသည်။

သူသည် တစ်ယောက်တည်း လှည့်လည်နေသော ဂနိုမ်း တစ်ကောင်နှင့် ကြုံတွေ့ခဲ့ရခြင်းမှာ ကံကောင်းလှသည်။ သူသည် ဂနိုမ်းကို သတိလစ်အောင် လုပ်လိုက်ပြီး အသုံးဝင်သော သတင်း အချက်အလက် တစ်စုံတစ်ရာ မရရှိခဲ့သော်လည်း ဂနိုမ်း၏ အစားအစာ အားလုံးကို ခိုးယူသွားခဲ့သည်။

သတိလစ်နေသော ဂနိုမ်းကိုမူ ချယ်ရီသည် လျှို့ဝှက် ပြီး ဘေးကင်းသော နေရာ တစ်ခုတွင် ထားရှိခဲ့ပြီး ဂနိုမ်း သူ့ကို မှတ်မိမည် မဟုတ်ကြောင်း သေချာအောင် ပြုလုပ်ခဲ့သည်။

ချယ်ရီသည် ထာဝရတိုင်းပြည်မှ ပြည်သူ ရာပေါင်းများစွာနှင့် ကြုံတွေ့ခဲ့ရသည်။ ရှေ့တန်းစခန်း၏ အရွယ်အစားကို ကြည့်၍ သူသည် စစ်သည်တော် ထောင်ပေါင်းများစွာ ရှိနိုင်သည်ဟု ခန့်မှန်းခဲ့ပြီး ထိုအရေအတွက်မှာ တိုက်ဆိုင်မှု တစ်ခုမျှ မဟုတ်ချေ။

သူတို့နှင့် တွေ့ဆုံပြီးနောက် ဆာမေးလ်သည် ဆောင်းတောင်ကုန်းမြို့ကို ကျူးကျော် ခဲ့သည်။ ဆောင်းတောင်ကုန်းမြို့ကို ကာကွယ်ရန် အတွက် ထာဝရတိုင်းပြည်သည် သေဆုံးမှု ၁၀၀,၀၀၀ ကြုံတွေ့ခဲ့ရသည်။

လွန်ခဲ့သော ခြောက်လကမှ အသစ် တည်ဆောက်ခဲ့သော ထာဝရတိုင်းပြည်သည် သေဆုံးမှု ထောင်သောင်းချီ၍ မည်သို့ ရှိနိုင်ခဲ့သနည်း။ ထာဝရတိုင်းပြည်သည် ထိုမျှ များပြားသော သတ္တဝါများကို မည်သည့် နေရာမှ ရရှိခဲ့သနည်း။

အရှင်ရှားလော့ခ်သည် နက်ရှိုင်း လျှို့ဝှက်ပြီး နားလည်ရခက်လှသည်။

ချယ်ရီ၏ စောင့်ကြည့်မှုမှာ အချိန်အတော် ပေးရတော့မည်။

ချယ်ရီသည် သူ အလွန် အလေးထားသော အရှင်ရှားလော့ခ်က ကိုယ်ပျောက်စွမ်းရည်ကို အသုံးပြု၍ သူ့ နောက်သို့ လိုက်ပါနေသည်ကိုမူ မသိရှိခဲ့ချေ။

တကယ်တော့ ရှားလော့ခ်သည် သူ့ နောက်သို့ အတော်အတန် ကြာအောင် လိုက်ပါနေခဲ့ပြီး ဖြစ်သည်။

"အရှင်ရှားလော့ခ်၊ ဒီ ဆောင်းတောင်ကုန်းမြို့ တပ်စောင့်ဗိုလ်ကြီးက အလည်အပတ် ရောက်နေပုံ မရဘူး။ ကျွန်တော် သူ့ကို ဖမ်းဆီး၊ နှိပ်စက်ပြီး စစ်ဆေးမေးမြန်းဖို့ အကြံပြု ပါတယ်။ သူ့ကို ဂိမ်းမာတွေဆီ အပ်လိုက်ပါ၊ သူတို့မှာ သူ့ကို အမှန်တရားတွေ ထုတ်ဖော် ပြောကြားအောင် လုပ်နိုင်တဲ့ နည်းလမ်းပေါင်း တစ်သန်း ရှိပါတယ်။ ကျွန်တော့်ကို ယုံပါ" ဟု ဘရုက လေးနက်စွာ အကြံပြုလိုက်သည်။

ဘရု၏ အကြံပြုချက်မှာ ကောင်းမွန်ပြီး အမြန်ဆုံး နည်းလမ်း ဖြစ်သော်လည်း ရှားလော့ခ်သည် သူ၏ နည်းလမ်းကို အသုံးပြုရန် ရည်ရွယ်ချက် မရှိခဲ့ချေ။

"ချယ်ရီက အတွေ့အကြုံ ရှိတဲ့ တပ်စောင့်ဗိုလ်ကြီး တစ်ယောက်ပဲ။ ငါ့ရဲ့ စုံစမ်းစစ်ဆေးမှု အရ သူ ဆောင်းတောင်ကုန်းမြို့ ထောက်လှမ်းရေး တပ်ဖွဲ့ကနေ ခေါ်ယူခြင်း ခံရလု နီးပါး ဖြစ်ခဲ့တယ်။ ကိုယ်ရေးကိုယ်တာ အကြောင်းပြချက် တွေကြောင့်သာ သူက တပ်စောင့်တစ်ယောက် ဖြစ်လာခဲ့တာ။ ငါတို့ သူ့ကို နှိပ်စက်ရင်တောင် ဘာမှရမှာ မဟုတ်ဘူး။ ဒါ့အပြင်…"

ရှားလော့ခ် ခေတ္တမျှ ရပ်တန့်လိုက်ပြီး "အကယ်၍ ငါသာ ကုန်သည်မဟာမိတ် အဖွဲ့ရဲ့ အဆင့်မြင့် စီမံခန့်ခွဲရေး အဖွဲ့ဝင် တစ်ယောက် ဖြစ်ပြီး ဖွံ့ဖြိုး တိုးတက်နေဆဲ ဒန်ဂျင် တစ်ခုက ဆောင်းတောင်ကုန်းမြို့ကို သေဆုံးမှု ထောင်သောင်းချီပြီး ပေးဆပ်ပြီး နှစ်ကြိမ်တိုင်တိုင် ကယ်တင်ခဲ့တာကို တွေ့မြင်ခဲ့ရရင်၊ ပြီးတော့ အဲ့ဒီဒန်ဂျင်က မြောက်ပိုင်း မြေအောက်လောကရဲ့ အဆိုးရွားဆုံး နေရာမှာ တည်ရှိနေခဲ့ရင်၊ ငါ့ကို သန်းနဲ့ချီတဲ့ မှော်ကျောက်တုံးတွေနဲ့ ကုန်ကြမ်း တန်ချိန်ပေါင်း များစွာ လျော်ကြေး တောင်းဆိုခဲ့တဲ့ ဒီဈေးပေါပြီး ယိုယွင်းနေတဲ့ ဒန်ဂျင်ကို သေချာပေါက် စုံစမ်းစစ်ဆေးလိမ့်မယ်" ဟု ပြောလိုက်သည်။

"အရှင်ရှားလော့ခ်၊ ကျွန်တော်က ဈေးပေါပြီး ယိုယွင်းနေတဲ့ ဒန်ဂျင်ဆိုတဲ့ စကားလုံးကို ပြင်ဆင် ပေးရပါလိမ့်မယ်။ ကျွန်တော်က ကံကြမ္မာ ဖန်တီးထားတဲ့ အရှင်ရှားလော့ခ်ကို စောင့်မျှော်နေခဲ့တာပါ" ဟု ဘရုက တင်စား ပြောလိုက်သည်။

"ဘာပဲ ဖြစ်ဖြစ်၊ ငါ ကုန်သည်မဟာမိတ် အဖွဲ့နဲ့ ရန်ငြိုးရန်စ မရှိဘူး၊ ဒါကြောင့် ချယ်ရီကို တိုက်ခိုက်တာက အကောင်းဆုံး ရွေးချယ်မှု မဟုတ်ဘူး။ ဒါ့အပြင် သူက ငါ ပေးချင်တဲ့ သတင်း အချက်အလက်တွေကို ပြန်ယူသွား နိုင်လိမ့်မယ်။ နောက်ဆုံးတော့ ငါတို့ ဒီအချိန်ကာလ အတွင်းမှာ အရမ်း ထင်ပေါ်ကျော်ကြား နေခဲ့ပြီလေ။"

ရှားလော့ခ်သည် ချယ်ရီနောက်သို့ ဆက်လက် လိုက်ပါရင်း "အဖွဲ့နှစ်ဖွဲ့ လုံးကနေ သရုပ်ဆောင်ကောင်း တချို့ကို ရှာဖွေလိုက်ပါ။ သူတို့က နာခံမှု ရှိရမယ်၊ ဒါကြောင့် သူတို့ကို ပိုကြီးမား များပြားတဲ့ ဆုလာဘ်တွေ ပေးနိုင်တယ်" ဟု ပြောလိုက်သည်။

"ကျွန်တော် နားလည်ပါတယ် အရှင်ရှားလော့ခ်။"

…

ဘောင်းဘီမဝတ်သူ အနည်းငယ် ပျော်ရွှင်နေသည်၊ အကြောင်းမှာ သူနှင့် သူ၏ ရဲဘော်ရဲဘက်များ အထူးမစ်ရှင် တစ်ခု ရရှိခဲ့သောကြောင့် ဖြစ်သည်။

[မစ်ရှင်ခေါင်းစဉ် - အဖွဲ့အစည်းပဋိပက္ခ

မစ်ရှင်ဖော်ပြချက် - ဗစ်တိုးရီးယားမြို့နှင့် ထာဝရတိုင်းပြည်ကြားမှ ပဋိပက္ခသည် ဆူပွက် ပေါက်ကွဲလု နီးပါး အခြေအနေသို့ ရောက်ရှိနေပြီ ဖြစ်သော်လည်း အိုဂါများကို ကိုင်တွယ်ရန် တူညီသော ရည်မှန်းချက် တစ်ခု ရှိနေသည်။ ဖိုးဉာဏ်ကျယ်သည် ဟမ်းစတားများနှင့် အဆက်အသွယ် ပြုလုပ်နေပြီး အဖွဲ့ နှစ်ဖွဲ့လုံး၏ အနာဂတ်ကို လုံခြုံစေရန် သူ၏ စူးစမ်းရှာဖွေမှုတွင် ဖိုးဉာဏ်ကျယ် နှင့်အတူ လိုက်ပါရန် သင့်အား ရွေးချယ်ထားသည်။

မစ်ရှင်ရည်ရွယ်ချက် - ဖိုးဉာဏ်ကျယ်နောက်သို့ လိုက်ပါပြီး အုပ်စုမှ သွေဖည် မသွားပါနှင့်။ မစ်ရှင်ကြာချိန်မှာ တစ်နာရီခန့် ကြာမြင့် နိုင်သောကြောင့် သင့်တော်သော ပြင်ဆင်မှုများ ပြုလုပ်ပါ။

မစ်ရှင်ဆုလာဘ် - အရှင်ရှားလော့ခ်၏ မျက်နှာသာပေးမှုကို ရရှိမည် ဖြစ်ပြီး အနာဂတ်တွင် လျှို့ဝှက် မစ်ရှင်များ ပိုမို ရှိလာနိုင်သည်။ အကယ်၍ ကျရှုံးပါက သင်၏ နာမည်ကို ဒန်ဂျင်အရှင်၏ စာရင်းမှ ပယ်ဖျက်ခြင်း ခံရမည်။]

ဤအထူးမစ်ရှင်ကို ဗစ်တိုးရီးယားမြို့နှင့် ထာဝရတိုင်းပြည် နှစ်ဖွဲ့လုံးမှ ဂိမ်းမာများအား ချမှတ်ပေးထားသည်။

အဖွဲ့အစည်း တစ်ခုစီမှ ဂိမ်းမာ ငါးဦးစီ ခေါ်ဆောင်လာမည် ဖြစ်ပြီး ထိုအချက်ကို ဘောင်းဘီမဝတ်သူက ဆွေးနွေးချက် ဖိုရမ်တွင် အတည်ပြုခဲ့ပြီး ဖြစ်သည်။

အခြားဂိမ်းမာများသည် ဘောင်းဘီမဝတ်သူ၏ မစ်ရှင်အကြောင်း သိရှိ သွားကြပြီး သူတို့သည် ဤမစ်ရှင်တွင် သူတို့နှင့် အတူ ပူးပေါင်း ပါဝင်ရန် မျှော်လင့်ခဲ့ ကြသော်လည်း ဖိုးဉာဏ်ကျယ်က ငြင်းပယ်ခဲ့သည်။

ငြင်းပယ်သည့် နည်းလမ်းမှာ တိုက်ရိုက် ဖြစ်ပြီး ကြမ်းတမ်းလှသည်၊ ၎င်းကို အသေးစိတ် ဖော်ပြမည် မဟုတ်ချေ။

…

စိတ်လှုပ်ရှားမှု ကင်းမဲ့သော ဖိုးဉာဏ်ကျယ်သည် လမ်းပြပေးနေသည်။ အရှင်ရှားလော့ခ်၏ ညွှန်ကြားချက် များအတိုင်း သူသည် ထာဝရတိုင်းပြည်မှ ဂိမ်းမာများကို ဦးဆောင်ကာ ရှားလော့ခ်၏ အရှိန်အဝါ ရှိရာကို လိုက်လံရှာဖွေ နေသည်။

ခရီးစဉ်မှာ ရှည်လျားခြင်း မရှိချေ။ သူတို့ တစ်နာရီ မပြည့်တပြည့် လမ်းလျှောက် ခဲ့ကြပြီးနောက် ဖိုးဉာဏ်ကျယ်သည် ပန်းတိုင်ကို မြင်တွေ့လိုက် ရသည်။ လူသား အနည်းငယ်နှင့် အက်လ်ဖ်များသည် သူတို့ ရောက်ရှိလာသည်နှင့် သူတို့ ထံသို့ လျှောက်လှမ်း လာကြသည်။

ဖိုးဉာဏ်ကျယ်သည် စာရွက် တစ်ရွက်ကို ထုတ်ယူကာ အကြိမ်ပေါင်း များစွာ စစ်ဆေး လိုက်သည်။ ထို့နောက် သူသည် ခေါင်းလှည့်ကာ သူ၏ နောက်မှ ဂိမ်းမာများအား "ငါတို့ ဗစ်တိုးရီးယားမြို့က ပြည်သူတွေနဲ့ တွေ့ဆုံကြတော့မယ်။ ကျေးဇူးပြုပြီး တိတ်ဆိတ်စွာ နေကြပါ။ အကယ်၍ ဆက်သွယ်မှု ပျက်ပြားသွားရင် ပဋိပက္ခ တစ်ခု ဖြစ်ပွားနိုင်တယ်။ သနားညှာတာမှု မထားကြနဲ့၊ သတ်ပစ်လိုက်ကြ၊ ဒါပေမဲ့ ဟမ်းစတားကိုတော့ ထိခိုက်မှု မပြုကြနဲ့" ဟု ပြောလိုက်သည်။

"အာ။"

ဂနိုင်သား ကြောင်ငေးသွားသည်။ ဖိုးဉာဏ်ကျယ်၏ စကားထဲတွင် သတင်း အချက်အလက်များ အလွန် များပြားနေပြီး သူတို့ အကြောင်းအရာကို နားမလည်နိုင်ကြချေ။

သူတို့ ထိတ်လန့်မှုမှ အသိပြန်မဝင်နိုင်ခင်ပင် ဝတုတ်ဟမ်းစတားတစ်ကောင် ရောက်ရှိလာသည်။

အဖွဲ့အစည်းများသည် ကျောက်တုံးကြီး တစ်တုံး နောက်တွင် ဆုံတွေ့ကြသည်။ ချယ်ရီသည် သူ၏ မွဲခြောက်ခြောက် မီးခိုးရောင် အိပ်ရာအိတ်ထဲတွင် အိပ်ပျော်နေသည်။ သူသည် သူ၏ နေရာကို ဖုံးကွယ်ရန် ကျောက်တုံး များစွာကို တမင်သက်သက် စီထားသောကြောင့် အဝေးမှ အိပ်ရာအိတ်ကို ရှာဖွေ တွေ့ရှိရန် ခက်ခဲလှသည်။

ဖိုးဉာဏ်ကျယ်နှင့် ဟမ်းစတားတို့သည် ညှိနှိုင်း ဆွေးနွေးရန် အတွက် ဂိမ်းမာ ငါးဦးစီ ခေါ်ဆောင် လာကြသည်။ သူတို့၏ အသံများကြောင့် ချယ်ရီ ထိတ်လန့်တကြား နိုးထလာသည်။

ချယ်ရီ ပတ်ပတ်လည် ကြည့်ရှု လိုက်ပြီး အသံများ၏ ရင်းမြစ်ကို ရှာဖွေတွေ့ရှိ လိုက်သည်။ ရှာဖွေ တွေ့ရှိသည်နှင့် သူသည် သတိကြီးစွာဖြင့် ရှေ့သို့ တွားသွား လိုက်သည်။

သူသည် သူ၏ အိပ်စက်ချိန်အတွင်း ဤကဲ့သို့သော အခြေအနေကို ရှာဖွေတွေ့ရှိခဲ့ခြင်းမှာ အလွန် ကံကောင်းသည်ဟု ခံစားနေရသည်။ ထာဝရတိုင်းပြည်မှ လစ်ခ်ျ တစ်ကောင်သည် ဤကဲ့သို့သော လူသူမနီး လွင်ပြင်ထဲတွင် ဗစ်တိုးရီးယားမြို့မှ လူသားတစ်ဦးနှင့် တွေ့ဆုံနေသည် တကား။

ချယ်ရီသည် ရှေ့တန်း စခန်း နှစ်ခုလုံးနှင့် ဝေးကွာသော နေရာ တစ်ခုကို တမင်သက်သက် ရွေးချယ်၍ အနားယူခဲ့ခြင်း ဖြစ်သည်။

ထင်ရှားသည်မှာ ကြီးမားသော လျှို့ဝှက် ကြံစည်မှု တစ်ခု ရှိနေခြင်း ဖြစ်သည်။

ချယ်ရီသည် ကျောက်တောင်စောင်း အနောက်သို့ တွားသွားရင်း အုပ်စုကို အာရုံစိုက် နားထောင်နေစဉ် အလွန် တိတ်ဆိတ်နေခံ့သည်။ သူတို့ သူ့ကို စိတ်ပျက်စေခြင်း မရှိခဲ့ချေ။

ဘော့စ်အကြီး ဟမ်းစတားက သူ၏ စူးရှသေးငယ်သော အသံဖြင့် ပထမဆုံး စကားစ ပြောလိုက်သည် "မင်း ဒီကိုရောက်လာတာပဲ ဖိုးဉာဏ်ကျယ်၊ ငါတို့ရဲ့ သဘောတူညီချက် အတိုင်းပဲ။"

ဘော့စ်အကြီးသည် သူ၏ A4 စာရွက်ကို ကြည့်လိုက်ပြီးနောက် "အိုဂါခြိမ်းခြောက်မှု နေ့တိုင်း တိုးပွားလာနေတာနဲ့အမျှ ငါတို့ အချင်းချင်း ဆက်တိုက်ခိုက်နေလို့ အဆင်ပြေမှာ မဟုတ်ဘူး။ ငါတို့ ပူးပေါင်းဆောင်ရွက်ရမယ်" ဟု ပြောလိုက်သည်။