အကျိုးအမြတ်ကြီးမားစွာ ရရှိခြင်း၊ အခြေတည်ဆေးလုံးဖော်စပ်ရန် စိတ်ဝိညာဉ်ဆေးပင်များရရှိခြင်း။

"ကျွတ်..ကျွတ်.. တစ္ဆေမိစ္ဆာဂိုဏ်းရဲ့လျှို့ဝှက်ကျမ်းတွေ အများကြီးပဲ...”

ကျိုးစွေ့သည် သိုလှောင်အိတ်ထဲရှိ ရတနာများကို ဆက်လက်ကြည့်ရှုရာ၊ မိစ္ဆာလမ်းစဥ်နှင့် ပတ်သက်သော ကျမ်းများစွာကို တွေ့ရှိခဲ့သည်။

သို့သော် မိစ္ဆာလမ်းစဥ်ကျမ်းတစ်ခုချင်းစီတွင် သိသာထင်ရှားသော ဘေးထွက်ဆိုးကျိုးများ ရှိသည်။ ဥပမာအားဖြင့် "ကောင်းကင်မိစ္ဆာဖြိုခွင်း ကျင့်စဉ်" သည် မိမိ၏ ချီနှင့်သွေးကို လောင်ကျွမ်းစေပြီး၊ မူလအစွမ်းထက် အဆများစွာ ယာယီအားကောင်းလာစေသည်။ သို့သော် ပေါက်ကွဲမှု ပြီးဆုံးသည်နှင့်တစ်ပြိုင်နက် အားအင်ကုန်ခမ်းကာ သေဆုံးရပေမည်။

ယေဘုယျအားဖြင့် ရွေးချယ်စရာမရှိလျှင် မည်သူမျှ ဤကျင့်ကြံခြင်းနည်းစနစ်ကို အသုံးပြုမည်မဟုတ်ပေ။

"ခုနစ်ထွေသေမင်းလက်ချောင်း" ဟုခေါ်သော အလွန်အဆိပ်ပြင်းထန်သော နည်းစနစ်တစ်ခုလည်း ရှိသေးသည်။ တစ္ဆေမိစ္ဆာဂိုဏ်းသည် ခုနစ်ထွေသေမင်းမြွေဟုခေါ်သော ရှားပါးပြီး အလွန်အဆိပ်ပြင်းသော မြွေတစ်ကောင်ကို မွေးမြူထားသည်။ ၎င်းတွင် ခေါင်းခုနစ်လုံးရှိပြီး တစ်ခုချင်းစီမှာ အလွန်အဆိပ်ပြင်းသဖြင့်၊ ခေါင်းတစ်ခု၏ကိုက်ခြင်းကို ခံရသော မည်သည့်သက်ရှိမဆို ချက်ချင်းသေဆုံးရပေမည်။

တစ္ဆေမိစ္ဆာဂိုဏ်းမှ မိစ္ဆာကျင့်ကြံသူများသည် ခုနစ်ထွေသေမင်းလက်ချောင်းကျင့်စဉ်ကို ကျင့်ကြံရန်၊ ခုနစ်ထွေသေမင်းမြွေ၏ အဆိပ်ပြင်းသောသွေးကို အသုံးပြုကြသည်။ ၎င်းကို ကျင့်ကြံရန် မြွေ၏သည်းခြေနှင့်၊ အဆိပ်ကိုထိန်းချုပ်ရန် အထူးပြင်ဆင်ထားသောအဆိပ်ဖြေဆေးကို ဦးစွာမျိုချရသည်။

ဤနည်းစနစ်ကို ကျွမ်းကျင်သွားသည်နှင့် မရှုံးနိမ့်နိုင်တော့ပေ။ အဆိပ်သင့်သူများသည် ချက်ချင်းသေဆုံးသွားမည်ဖြစ်ပြီး၊ ထိုကျင့်စဉ်ကျင့်ကြံသူ၏လက်ချောင်းများမှ ထွက်ပေါ်လာသော လေသည်ပင် အဆိပ်ကို သယ်ဆောင်သွားပေလိမ့်မည်။

သို့သော် ဤအဆိပ်ပြင်းသောကျင့်စဉ်ကို ကျွမ်းကျင်သွားသည်နှင့်တစ်ပြိုင်နက်၊ ခန္ဓာကိုယ်သည် အဆိပ်၏ ပြင်းထန်သောတိုက်စားမှုကို ခံစားရပြီး၊ အဆက်မပြတ် အလွန်အမင်းနာကျင်မှုကို ခံစားရပေလိမ့်မည်။

"အသင်္ချေစုတ်ဖြဲခြင်းကျင့်စဉ်" သည် တစ္ဆေမိစ္ဆာဂိုဏ်း၏ နောက်ထပ်ကျင့်စဉ်တစ်ခုဖြစ်ပြီး၊ ဖုတ်ကောင်နည်းစနစ်များ၏အကိုင်းအခတ်တစ်ခုဖြစ်ရာ အလွန်ပင်ယုတ်ညံ့သည်ဟု နာမည်ဆိုးဖြင့် ကျော်ကြားသည်။

တိုက်ခိုက်သည့်အခါ ခြေသည်း၊ လက်သည်းများကို အသုံးပြုပြီး တစ်ခဏအတွင်း ပြိုင်ဘက်ကို အစိမ်းလိုက် ဆုတ်ဖြဲနိုင်သည်။ ဤနည်းစနစ်ကို အသုံးပြုသူသည် သာမန်ဓားများနှင့် ဓားမြှောင်များကို ခုခံနိုင်စွမ်းရှိလာမည်ဖြစ်ပြီး၊ အဖိုးတန်ဓားများဆိုလျှင်ပင် ၎င်းတို့၏ ဖျက်ဆီးနိုင်စွမ်းကို ၃၀မှ ၅၀ရာခိုင်နှုန်းအထိ လျော့ချပေးနိုင်သည်။

သို့သော် ဤနည်းစနစ်ကို ကျင့်ကြံသည့်အဆင့်မြင့်မားလေ၊ ဖုတ်ကောင်အဖြစ်သို့ ပြောင်းလဲနှုန်း မြန်ဆန်လေဖြစ်သည်။ အဆုံးသတ်၌ ကျင့်ကြံသူသည် အပြည့်အဝတောင့်တင်းသွားပြီး သေခြင်းချီများ ကျူးကျော်ဝင်ရောက်ကာ အသိစိတ်အားလုံး ဆုံးရှုံးသွားပေလိမ့်မည်။

၎င်း၏ တစ်ခုတည်းသော အားသာချက်မှာ ၎င်းသည် ဖြတ်လမ်းနည်းတစ်ခုဖြစ်ပြီး၊ ကျင့်ကြံသူအား ကြီးမားသောစွမ်းအားကို လျင်မြန်စွာ ရရှိစေခြင်းပင်ဖြစ်သည်။

ဤအရာများအပြင် အခြားအလားတူ မိစ္ဆာနည်းစနစ်များစွာလည်း ရှိသေးသည်။ ၎င်းတို့အားလုံးတွင် တူညီသော လက္ခဏာတစ်ခုရှိသည်။ ၎င်းတို့သည် ဖြတ်လမ်းနည်းဖြင့် ထိရောက်မှုနှင့် အစွမ်းထက်မှုတို့ကို မြန်ဆန်စွာ ပေးစွမ်းသည်။ သို့သော် ၎င်းတို့သည် ကျင့်ကြံသူအား အသက်တိုစေခြင်း၊ ပြင်းထန်သောနာကျင်မှုကိုခံစားရခြင်း စသဖြင့် အလွန်ပင်ရက်စက်ကြမ်းကြုတ်သည့် ဘေးထွက်ဆိုးကျိုးများ ရှိလေသည်။

"ကျင့်ကြံသူတွေအများကြီးက မိစ္ဆာကျင့်ကြံသူတွေကို သဘောမကျကြတာ အံ့ဩစရာမဟုတ်တော့ဘူး.. ဒီနည်းစနစ်တွေက တစ်ပါးသူတွေကိုရော၊ ကိုယ့်ကိုယ်ကိုပါ ထိခိုက်နစ်နာစေတဲ့အပြင် သက်တမ်းကိုလည်း ကုန်ဆုံးစေတာပဲ...”

"အင်း.. ထာဝရအသက်ကို ဖွေရှာတဲ့လမ်းမှာ လူတိုင်းက အသက်ရှည်ချင်ကြတာချည်းပဲ...”

"ဒါပေမဲ့ ဒီမိစ္ဆာကျင့်ကြံသူတွေက ဆန့်ကျင်ဘက်ပဲ... ကြီးမားတဲ့အစွမ်းကို ရဖို့ သူတို့ရဲ့သက်တမ်းတွေကို လောင်ကျွမ်းကြတယ်...”

“ဟူး..တကယ့်ကို ပြဒါးတစ်လမ်း..သံတစ်လမ်းပါပဲ..”

ဤမိစ္ဆာနည်းစနစ်များကို မြင်သောအခါ ကျိုးစွေ့သည် လေးလေးနက်နက် သက်ပြင်းချလိုက်သည်။ လူအများက မိစ္ဆာကျင့်ကြံသူများကို အဘယ်ကြောင့် တညီတညွတ်တည်း မုန်းတီးကြသည်ကို သူနောက်ဆုံးတွင် နားလည်သွားသည်။

ဤနည်းစနစ်များသည် အလွန်ပင် ယုတ်မာပြီး ရက်စက်ကြမ်းကြုတ်သည်။ ၎င်းတို့သည် လောကတစ်ခွင်အား အန္တရာယ်ဖြစ်စေပြီး၊ ကိုယ်တိုင်ကိုလည်းအကျိုးမပြု၊ အခြားသူများကိုလည်း အန္တရာယ်ဖြစ်စေသည်။

သာမန်ကျင့်ကြံသူများသည်ပင် မိစ္ဆာကျင့်ကြံသူများ၏လုပ်ရပ်များကို သည်းခံနိုင်ကြမည်မဟုတ်ပေ။

အချို့လူများသည် လမ်းမှန်ဂိုဏ်းများ၏ဟန်ဆောင်လုပ်ရပ်များကို မထီမဲ့မြင်ပြုကြသည်။

သို့သော် သူသည် ထိုသို့မထင်ပေ။ လမ်းမှန်ဂိုဏ်းများသည် အနည်းငယ်ဟန်ဆောင်နေလျှင်ပင် အနည်းဆုံး သူတို့သည်မခွဲခြားဘဲ သတ်ဖြတ်ခြင်းမပြုကြချေ။ သူတို့သည် အမြဲတမ်း ကိုယ်ကျင့်တရားကျင့်ဝတ်ကို ကိုင်ဆွဲပြီး စည်းကမ်းထိန်းသိမ်းကြသည်။

ထို့ကြောင့် ဖိနှိပ်ခံသာမန်လူများအတွက် ရှင်သန်ရန် အခွင့်အရေးရှိနေသေးသည်။

အခြားတစ်ဖက်တွင် မိစ္ဆာကျင့်ကြံသူများမှာမူ မည်သည့်ကျင့်ဝတ်မျှ မရှိပေ။ သူတို့သည် တွေ့သမျှလူကို သတ်ဖြတ်ကြသည်။ ဆိုးသည်ဖြစ်စေ ကောင်းသည်ဖြစ်စေ၊ သားကောင်များဟုသာ သဘောထားကာ အန္တရာယ်ပြုတတ်ကြသည်။

သို့သော် မိစ္ဆာကျင့်ကြံသူများကို အပြီးတိုင်ဖယ်ရှားရန် မဖြစ်နိုင်ကြောင်းကိုလည်း သူသိရှိသည်။ အကြောင်းမှာ မိစ္ဆာကျင့်ကြံသူအများစုသည် နိမ့်ကျသော ဝိညာဉ်အမြစ်ရှိသူများဖြစ်သောကြောင့် ဖြစ်၏။

လမ်းမှန်ဂိုဏ်းများသည် အလယ်အလတ်အဆင့်ဝိညာဉ်အမြစ် သို့မဟုတ် ထို့ထက်မြင့်သော ကျင့်ကြံသူများကိုသာ လက်ခံပြီး ကျင့်ကြံသူများစွာကို လိုက်လျှောက်ရန် လမ်းမရှိအောင် ထားခဲ့သည်။

သို့သော် မိစ္ဆာလမ်းစဥ်မှာမူ လူတိုင်းကို ကြိုဆိုသည်။

ဝိညာဉ်အမြစ်တစ်ခု ရှိသရွေ့ မိစ္ဆာကျင့်ကြံသူတစ်ဦး ဖြစ်လာနိုင်ပြီး၊ မည်သည့်ခွဲခြားမှုမျှမရှိဘဲ မိစ္ဆာကျင့်စဉ်ပညာရပ်များကို သင်ယူနိုင်သည်။

ထို့ကြောင့် အဆင့်နိမ့် ဝိညာဉ်အမြစ်ရှိသူများအတွက် ရွေးချယ်စရာနှစ်ခုသာ ရှိသည်။

တစ်ကိုယ်တော်ကျင့်ကြံသူ သို့မဟုတ် မိစ္ဆာကျင့်ကြံသူ ဖြစ်လာရန်သာ ဖြစ်၏။

မိစ္ဆာကျင့်ကြံသူအများစုတွင် သာမန်အရည်အချင်းများသာ ရှိသောကြောင့် သူတို့သာ ထူးခြားသောကံကြမ္မာကိုသာ မပိုင်ဆိုင်ပါက၊ သူတို့၏ဘဝတစ်လျှောက်လုံး အခြေတည်အဆင့်ကို မျှော်လင့်ရန် အခြေခံအားဖြင့် မဖြစ်နိုင်ပေ။

သို့သော် သူတို့သည် ကျင့်ကြံခြင်းလမ်းစဥ်ပေါ်သို့ စတင်လျှောက်လှမ်းခဲ့ပြီးဖြစ်ရာ၊ မည်သူက လမ်းတစ်ဝက်တွင် တလိုတလား ပျက်သုဉ်းကာ၊ သူတို့၏သက်တမ်း ကုန်ဆုံးသွားသည်ကို ကြည့်နေမည်နည်း။

ထို့ကြောင့် ဤမိစ္ဆာကျင့်ကြံသူများသည် ပို၍ရက်စက်ကြမ်းကြုတ်ပြီး ရန်လိုလာကြသည်။ သူတို့၏ ကျင့်ကြံခြင်းလမ်းစဥ်ကို ရှေ့ဆက်နိုင်ရန် ဖြစ်နိုင်သမျှ နည်းလမ်းတိုင်းကို အသုံးပြုကြသည်။

ကြီးမားသော ဘေးထွက်ဆိုးကျိုးများရှိသော မိစ္ဆာနည်းစနစ်များကို ကျင့်ကြံရလျှင်ပင်၊ သူတို့သည် စွမ်းအားကို လျင်မြန်စွာပိုင်ဆိုင်နိုင်ပြီး၊ သူတို့၏ကျင့်ကြံမှုအဆင့်ကို မြှင့်တင်နိုင်သရွေ့ အခြေတည်အဆင့်ကျင့်ကြံသူတစ်ဦး ဖြစ်လာနိုင်ရန် အရာရာကို ပေးဆပ်နိုင်ပေသည်။

"ဒီမိစ္ဆာလျှို့ဝှက်ကျမ်းတွေအားလုံးကို 'စာအုပ်ကူ'ကိုပဲ ကျွေးလိုက်သင့်တယ်..”

ကျိုးစွေ့က သူ၏မေးစေ့ကို ပွတ်သပ်လိုက်သည်။

သူသည် ဤမိစ္ဆာလျှို့ဝှက်ကျမ်းများကို စေ့စေ့စပ်စပ်စစ်ဆေးကြည့်ရာ သူလိုအပ်သောအရာ တစ်ခုမျှမပါချေ။ သူ၌ အင်မော်တယ်ဖြစ်နိုင်ရေးအတွက် မျှော်လင့်ချက် ရှိနေသည်ဖြစ်ရာ၊ အဘယ်ကြောင့် သူသည် ဤသို့သော ဖြတ်လမ်းကျင့်ကြံခြင်းနည်းစနစ်များကို ကျင့်ကြံရန် လိုအပ်မည်နည်း။

မှန်ပေသည်၊ ဤမိစ္ဆာလျှို့ဝှက်ကျမ်းများ အသုံးမဝင်ဟု မဆိုလိုပေ။

'စာအုပ်ကူ' အတွက်မူ ၎င်းတို့သည် တစ်နည်းအားဖြင့် အစားအစာများ ဖြစ်သည်။

၎င်းစားသုံးသော စာအုပ်များလေ၊ ၎င်းကြီးထွားနှုန်း မြန်လေဖြစ်ပြီး ၎င်း၏ နားလည်သဘောပေါက်နိုင်စွမ်းကိုလည်း တိုးမြင့်စေကာ၊ အသိပညာအမျိုးမျိုးကို လျင်မြန်စွာ နားလည်နိုင်ရန် ကူညီပေးနိုင်သည်။

"မှော်လက်နက်တွေလည်း အတော်များများ ရှိပုံရတယ်..”

ကျိုးစွေ့သည် သိုလှောင်အိတ်များထဲမှ ပစ္စည်းများအား ဆက်လက်စစ်ဆေးလိုက်သည်။ အဆောင်များ၊ မိစ္ဆာလျှို့ဝှက်ကျမ်းများ၊ ဝိညာဉ်ကျောက်တုံးများအပြင် အဖိုးတန်ဆုံး ရတနာများမှာ မှော်လက်နက်များ ဖြစ်သည်။

ချီသန့်စင်ခြင်းအဆင့်(၉)ရှိကျင့်ကြံသူများဖြစ်သောကြောင့် သူတို့သည် သာမန်မှော်လက်နက်များကို အသုံးပြုမည်မဟုတ်သည်မှာ သေချာပေသည်။

သူတို့သည် ယေဘုယျအားဖြင့် အနည်းဆုံး ထိပ်တန်းအဆင့်မှော်လက်နက်တစ်ခု ရှိကြပေမည်။

စုစုပေါင်းအားဖြင့် အနည်းဆုံး ထိပ်တန်းအဆင့် မှော်လက်နက် ဆယ်ခု ရှိပေလိမ့်မည်။

ထို့အပြင် အောက်ခြေအဆင့် မှော်လက်နက် တစ်ရာကျော်နှင့် အလယ်အလတ်တန်းစား ဒါဇင်ပေါင်းများစွာလည်း ရှိသေးသည်။

ဤမှော်လက်နက်များသည် ဤမိစ္ဆာကျင့်ကြံသူများက အခြားသူများထံမှ လုယက်လာခြင်းသာ ဖြစ်နိုင်ခြေများသည်။ အကြောင်းမှာ သာမန်ကျင့်ကြံသူများတွင် ဤမျှများပြားသော မှော်လက်နက်များ မရှိသောကြောင့် ဖြစ်သည်။

သူသာ ဤမှော်လက်နက်များအားလုံးကို ရောင်းချမည်ဆိုလျှင်၊ အလယ်အလတ်ဝိညာဉ်ကျောက်တုံး ထောင်ပေါင်းများစွာ ရရှိနိုင်ပေသည်။

၎င်းမှာ အတော်ပင် အံ့ဩဖွယ်ကောင်းသောကြွယ်ဝမှု ဖြစ်ပေလိမ့်မည်။

သူအစောပိုင်းက ရရှိခဲ့သောအရာများမှပင် အလယ်အလတ်ဝိညာဉ်ကျောက်တုံး တစ်သောင်းကျော် တန်ဖိုးရှိသောရတနာများကို ရရှိခဲ့သည်မှာ သံသယဝင်စရာမလိုပေ။

ဤသည်မှာ တစ်ညတည်းဖြင့် ချမ်းသာကြွယ်ဝလာခြင်းပင် ဖြစ်သည်။

"နေဦး.. ဒီဝိညာဉ်ဆေးပင်တွေက အခြေတည်ဆေးလုံးအတွက်များလား...”

ရုတ်တရက် ကျိုးစွေ့ အံ့အားသင့်သွားသည်။ သူသည် သိုလှောင်အိတ်ထဲရှိ ကျန်ရှိသောရတနာများကို စစ်ဆေးနေပြီး၊ ၎င်းတို့အားလုံးမှာ ဝိညာဉ်ဆေးပင်များ ဖြစ်ကြသည်။

သူသည် အံ့ဩဖွယ်ကောင်းစွာဖြင့် ဝိညာဉ်ဆေးပင်အမျိုးပေါင်း ဒါဇင်ပေါင်းများစွာကို တွေ့ရှိခဲ့ပြီး၊ အများစုမှာ အခြေတည်ဆေးလုံး ဖော်စပ်နည်းတွင် မှတ်တမ်းတင်ထားသည်။

အဓိကဆေးပင်ဖြစ်သော ရွှေကျောက်စိမ်းလင်ဇီးမှလွဲ၍ အခြားဝိညာဉ်ဆေးပင်များအားလုံး ရှိနေသည်။

အားလုံးပေါင်းလိုက်လျှင် အနည်းဆုံး အခြေတည်ဆေးလုံး ငါးစုံ ဖော်စပ်ရန် လုံလောက်သည်။

"ဟုတ်သား.. ရှုထျန်းဇယ်နဲ့ တခြားသူတွေက ချီသန့်စင်ခြင်းအဆင့်(၉)ကျင့်ကြံသူတွေပဲ.. သူတို့က အခြေတည်အဆင့်ကို ရောက်ဖို့ သိပ်မဝေးတော့ဘူး.. ဒီတော့ သဘာဝအတိုင်း အခြေတည်အဆင့်ကို စပြီး စဉ်းစားဖို့ လိုအပ်တာပေါ့...”

"ခက်တာက သူတို့က တစ္ဆေမိစ္ဆာဂိုဏ်းကျင့်ကြံသူတွေဆိုရင်တောင် အခြေတည်ဆေးလုံးကို ရဖို့က လွယ်ကူတဲ့ကိစ္စမဟုတ်ဘူး...”

"ပင်မတပည့်တွေကလွဲ၍ သာမန်တပည့်တွေက အခြေခံအားဖြင့် အခြေတည်ဆေးလုံးရရှိဖို့ အခွင့်အရေးမရှိဘူး...”

"ဒီတော့ ဒီမိစ္ဆာကျင့်ကြံသူတွေက သဘာဝအတိုင်း အခြားအရင်းအမြစ်တွေကနေ အခြေတည်ဆေးလုံးရဖို့ စဉ်းစားကြရတာပဲ... ဆေးလုံးဖော်စပ်ဖို့ ဆေးပင်တွေစုဆောင်းပြီးတော့ ဒုတိယအဆင့် ဆေးဖော်စပ်ပညာရှင်တစ်ယောက်နဲ့ ပူးပေါင်းပြီး အခြေတည်ဆေးလုံးကို ဖော်စပ်ဖို့ပဲ...”

"ဒါက အခြေတည်ဆေးလုံးရနိုင်ဖို့ ကျင့်ကြံသူအတော်များများသုံးတဲ့ နည်းလမ်းတစ်ခုပဲ...”

ကျိုးစွေ့သည် ထိုမိစ္ဆာကျင့်ကြံသူများ၏ မှတ်ဉာဏ်များမှတစ်ဆင့်၊ သူတို့တွင် အခြေတည်ဆေးလုံးဖော်စပ်ရန် ဆေးပင်အစုံများစွာ အဘယ်ကြောင့် ရှိနေသည်ကို ချက်ချင်း နားလည်သွားသည်။ ဤသည်မှာ မိစ္ဆာကျင့်ကြံသူများက သူတို့၏ကိုယ်ပိုင် အခြေတည်အဆင့်အတွက် ပြုလုပ်ထားသော ပြင်ဆင်မှုများ ဖြစ်သည်။

ကံမကောင်းစွာဖြင့် ဤမိစ္ဆာကျင့်ကြံသူများသည် ၎င်းကို မည်သည့်အခါကမျှ တွေးထားမိမည် မဟုတ်ပေ။ သူတို့သည် အခြေတည်ဆေးလုံးဖော်စပ်ရန် နှစ်ပေါင်းများစွာ ပင်ပင်ပန်းပန်း စုဆောင်းခဲ့သော ဝိညာဉ်ဆေးပင်များသည် ကျိုးစွေ့အတွက်သာ ကျန်ရစ်ခဲ့သည်။

ဤသည်မှာ တစ်ပါးသူအတွက် တင်တောင်းပစ္စည်းများ ပြင်ဆင်ပေးနေသကဲ့သို့ ဖြစ်သည်။

ကျိုးစွေ့သည် ကြီးမားစွာ မျက်နှာသာပေးခံရပြီး၊ ဆေးပင်များ စုဆောင်းရာတွင် သုံးရမည့် အချိန်များစွာကို ချွေတာနိုင်ခဲ့သည်။

နောက်ထပ် သူသာ ရွှေကျောက်စိမ်းလင်ဇီး သို့မဟုတ် အဆင့်နှစ် ယောင်သားရဲအမြုတေတစ်ခုကို ရှာဖွေနိုင်ပါက၊ သူသည် အခြေတည်ဆေးလုံး ဖော်စပ်ရန် ကြိုးစားနိုင်ပေတော့မည်။