သိုင်းလောကရဲ့ သိုင်းဘိုးဘေးကြီး

ချန်မူသည် သိုင်းပညာများ ထွန်းကားလှသော မဟာကျိုးမင်းဆက်၏ သိုင်းလောကသို့ ကူးပြောင်းလာခဲ့ပြီးနောက် အလောင်းများဆီမှ ကတ်ပြားများ ကောက်ယူနိုင်စွမ်းကို ရရှိလာခဲ့သည်။ ​အတွင်းအားကတ် - လေထဲမှနေ၍ အတွင်းအားများကို ရုတ်တရက် တိုးပွားလာစေသည်။ ကျွမ်းကျင်မှုစွမ်းရည်ကတ် - အမျိုးမျိုးသော သိုင်းကွက်များနှင့် ကျွမ်းကျင်မှုများကို လွတ်လပ်စွာ ရွေးချယ်နိုင်သည်။ ဉာဏ်အလင်းပွင့်ကတ် - အချိန်မရွေး၊ နေရာမရွေး ရုတ်တရက် ဉာဏ်အလင်းပွင့်သွားသော အခြေအနေသို့ ချက်ချင်း ဝင်ရောက်နိုင်သည်။ အဆင့်ချိုးဖျက်ခြင်းကတ် - မည်သည့် အတားအဆီးမျှမရှိဘဲ နယ်ပယ်အဆင့်များကို အလွယ်တကူ ချိုးဖျက်နိုင်သည်။ ပြန်လည်မွေးဖွားခြင်းကတ် - လက်၊ ခြေထောက်၊ ဒါမှမဟုတ် ခေါင်းပြတ်သွားရင်တောင်မှ ဘာပြဿနာမှမရှိဘဲ ပြန်လည်ကောင်းမွန်လာစေနိုင်သည်။ ​... ​အခြားသူများက ကျင့်စဉ်တစ်ခု ရရှိရန်အတွက် အသေအလဲ လိုက်လံရှာဖွေကာ နေရာအနှံ့ ငွေကြေးများ အလဟဿ သုံးစွဲနေရချိန်တွင် ချန်မူကတော့ ရွေးချယ်စရာကျင့်စဉ်များ အရမ်းများလွန်းနေတာကြောင့် မည်သည့်အရာကို ရွေးချယ်ရမည်နည်းဟု ခေါင်းခဲနေ၏။ ​အခြားသူများက နယ်ပယ်အဆင့်တစ်ခုကို ချိုးဖျက်နိုင်ရန် တံခါးပိတ်ကျင့်ကြံရင်း နှစ်ပေါက်အောင် နေ့ရောညပါ ကြိုးစားပမ်းစား အားထုတ်နေရချိန်တွင် ချန်မူကမူ မနက်အိပ်ရာမှ နိုးလာသည်နှင့် နယ်ပယ်အဆင့်သစ်တစ်ခုသို့ အလွယ်တကူ လှမ်းတက်သွားပြန်သည်။ ​အခြားသူများက ကျင့်ကြံခြင်းဆိုင်ရာ အရင်းအမြစ်များအတွက် အသေအလဲ ပြေးလွှားရှာဖွေနေရချိန်တွင် ချန်မူကမူ သူ၏ ပိုလျှံနေသော အရင်းအမြစ်များကို ပြန်လည်ရောင်းချနေခဲ့ရသည်။ ​တခြားသူတွေကတော့... ... ​အချိန်တွေ ကုန်လွန်လာသည်နှင့်အမျှ... အမျိုးမျိုးသော ပါရမီရှင်များ၊ အမြင့်ဆုံးသော ပုဂ္ဂိုလ်ကြီးများနှင့် ရှေးဟောင်း နတ်ဘုရားများ၊ နတ်ဆိုးများက ဤလောကကြီးကို အလှည့်ကျ စိုးမိုးကာ သူတို့၏ ခေတ်ကာလများကို လွှမ်းမိုးခဲ့ကြပြီးနောက် နောက်ဆုံးတွင်တော့ အားလုံး ပျောက်ကွယ်သွားခဲ့ကြ၏။ ချန်မူကတော့ မြစ်ကမ်းဘေးတွင် ရပ်ကာ အရက်သောက်ရင်း နောက်ခေတ်ကာလတစ်ခုတွင် သူ ဘာလုပ်ရမည်နည်းဟု တွေးတောနေချေသည်။ ​ဘယ်လိုမှ မတတ်နိုင်.... အရမ်းအစွမ်းထက်လွန်းပြီး အသက်အရမ်းရှည်လွန်းခြင်းကလည်း တစ်ခါတစ်ရံတွင် အထီးကျန်ခြင်းကို မလွဲမသွေ ဖြစ်ပေါ်စေတတ်သည် မဟုတ်လော.... ​တစ်နေ့တွင်တော့... ​"မင်းက ဘယ်အလောင်းဆီကနေမဆို ကတ်ပြားတွေ ကောက်ယူနိုင်တယ်ဆိုတော့... နေမင်းကြီး သေဆုံးသွားတဲ့အခါကျရင်ရော ဘယ်လိုလုပ်မလဲ..." ​ချန်မူက ကောင်းကင်သို့ မော့ကြည့်လိုက်၏။ ထိုနေရာတွင်တော့ အလင်းနှင့် အပူပေးစွမ်းမှု ရပ်တန့်သွားပြီဖြစ်သော မည်းမှောင်နေသည့် နေမင်းကြီး တစ်စင်း ရှိနေချေသည်။