ထာဝရမြင့်မြတ်သောအရှင်သခင်

ဆူဇီမို နေထိုင်ရာ ကမ္ဘာတွင် စိတ်ဝိညာဉ်ရင်းမြစ်နှင့်အတူ မွေးဖွားလာသောလူနှင့် မပါဘဲ မွေးလာသောလူဟူ၍ နှစ်မျိုးရှိ၏။ စိတ်ဝိညာဉ်ရင်းမြစ်ဆိုသည်မှာ မြေကြီးနှင့်ကောင်းကင်အကြားရှိ စိတ်ဝိညာဉ်ချီကို အာရုံခံနိုင်သော ဉာဏ်ပညာမျိုးစေ့တစ်မျိုးဖြစ်ပြီး စိတ်ဝိညာဉ်ရင်းမြစ်ရှိသောသူများသာ ကျင့်ကြံရေးလောကသို့ စတင်ခြေချနိုင်၏။ မရှိသူများမှာ မော်တယ်တစ်ယောက်အဖြစ်နှင့်ပင် အရိုးထုတ်ရ၏။ ဆူဇီမိုသည် စိတ်ဝိညာဉ်ရင်းမြစ်မပါဘဲ မွေးဖွားလာသူတစ်ယောက်ဖြစ်ပြီး ဘွဲ့ရပညာတတ် စာပေသမားလေး တစ်ယောက်ဖြစ်၏။ တစ်နေ့ သူသည် ဒူးမ‌ထောက်လိုသောကြောင့် အင်မော်တယ်တစ်ယောက်ကို အာခံခဲ့မိပြီး စာပေပညာရှင်အဖြစ်မှ ရုတ်သိမ်းခြင်းခံခဲ့ရ၏။ သူ့မိသားစုကလည်း ပြဿနာများဖြင့် ကပ်ဆိုးဝင်နေချိန်တွင် လျှို့ဝှက်ဆန်းကြယ်သော အမျိုးသမီးတစ်ယောက်သည် သူထံရောက်လာပြီး သူ့အား စိတ်ဝိညာဉ်ရင်းမြစ် မလိုဘဲ ကျင့်ကြံ၍ ရသော အန္တိမနတ်ဆိုးသားရဲကျင့်ကြံခြင်း နည်းစနစ်တစ်ခုကို သင်ကြားပေးခဲ့၏။ သူသည် ထိုကမ္ဘာတွင် တစ်ဦးတည်းသော စိတ်ဝိညာဉ်ရင်းမြစ်မရှိသည့် ကျင့်ကြံသူတစ်ယောက် ဖြစ်လာခဲ့၏။ ပြဿနာများက သူ့နောက်ကို တောက်လျှောက်လိုက်နေသည့်အပြင် သူသည် လူသားတို့၏ မဟာရန်ဘက်ဖြစ်သော သားရဲ့တို့၏ ကျင့်ကြံခြင်း နည်းစနစ်တို့ကို ကျင့်ကြံခဲ့သောကြောင့် အင်မော်တယ် ဂိုဏ်းကြီးများ၏ အမဲလိုက်ခြင်းကိုလည်း ခံရပြန်၏။ တစ်ခုထူးခြားသည်မှာ သူကျင့်ကြံခဲ့သော သားရဲပညာရပ်မှာ ထိုကမ္ဘာတွင်ရှိသော မည်သည့်သားရဲကလန်ထက်မဆို (နဂါးမျိုးနွယ်အပါအဝင်) ပို၍ အဆင့်မြင့်သော ပညာရပ်ဖြစ်နေ၏။ တစ်နည်းအားဖြင့် ထိုကမ္ဘာတွင် တစ်ခါမျှ မရှိခဲ့ဖူးသော ကျင့်ကြံခြင်း ပညာရပ်တစ်ခု ဖြစ်လေ၏။ ဆူဇီမိုသည် ရန်သူများကို သတ်ဖြတ်ရာတွင် တွန့်ဆုတ်သနားညှာတာခြင်း အလျှင်း မရှိသော်လည်း အမြဲတမ်း အနိုင်ကျင့်ခံနေရသော မော်တယ်များ၏ ဘဝကို သနားဂရုဏာသက်မိသောကြောင့် စိတ်ဝိညာဉ်ရင်းမြစ်မလိုဘဲ ကျင့်ကြံနိုင်သော ကိုယ်ပိုင်နည်းစနစ်တစ်ခုကို တီထွင်ခဲ့ရာမှ အထက်ဘုံများတွင်ပင် မရှိခဲ့သော တာအိုလမ်းစဉ်တစ်ခု ပေါ်ထွန်းလာပြီး သူသည် ထိုလမ်းစဉ်၏ တာအိုဖခင်ကြီး ဖြစ်လာခဲ့၏။ သူ့တာအိုလမ်းစဉ်သည် အစပြုနိုင်ခဲ့သော်လည်း မပြည့်မစုံနှင့် အဆုံးသတ်မသေချာသော လမ်းစဉ်တစ်ခု ဖြစ်နေဆဲဖြစ်၏။ တစ်နေ့မှာတော့ သူသည် အထက်ဘုံမှ အမှတ်တမဲ့ ရောက်ရှိလာခဲ့သော ထိတ်ထိတ်ကြဲ အမျိုးသမီးတစ်ယောက်ကို စွဲလန်းသွားရာမှ ထိုအမျိုးသမီး၏ ကျင့်ကြံခြင်းအဆင့်နောက်သို့ အမီလိုက်နိုင်ဖို့ ကြိုးစားရင်း ဆူဇီမိုတစ်ယောက် ဘယ်လောက်ဝေးဝေးထိရောက်အောင် သွားနိုင်မလဲ စောင့်ကြည့်ရင်း ဇာတ်လမ်းဇာတ်ကွက် စိပ်စိပ်၊ ဟာသ၊ အလွမ်းအဆွေး၊ ချစ်ခြင်းမေတ္တာအမျိုးမျိုး၊ အညှာအတာမဲ့ သတ်ဖြတ်ခြင်းများ စသည်တို့ကို ရသပေါင်းစုံဖြင့် ခံစားဖတ်ရှုနိုင်မှာ ဖြစ်ပါတယ်။