မဟာအိပ်မက် သေခြင်းကိုးပါး၊ အတွင်းစွမ်းအားနယ်ပယ်သို့ တက်လှမ်းခြင်း

'တာအိုရှာဖွေခြင်း ကျောင်းတော်' အတွင်း၌...

နင်ချီသည် ‘အသင်္ချေဖြစ်ရပ်ဆန်းကြယ် မူလဇာစ်မြစ်ခန္ဓာကျင့်စဉ်’ကို ဖြည်းညင်းစွာ လေ့ကျင့်နေခဲ့သည်။ သူ၏ ရုပ်ခန္ဓာသည် ယခုအခါ အပြစ်အနာအဆာ ကင်းမဲ့ပြီး အကန့်အသတ်သို့ ရောက်ရှိနေပြီ ဖြစ်သော်ငြားလည်း၊ သူသည် ခန္ဓာကိုယ်ကို လှုံ့ဆော်ရန် ‘စိတ်စွမ်းအင်’ ကို အသုံးပြုရန် လိုအပ်နေသေး၏။ ထိုသို့ဖြင့်သာ အတွင်းအားကို အဆက်မပြတ် ထုတ်ပေးနိုင်မည် ဖြစ်သည်။

ဥပမာ ယခုအချိန်ကဲ့သို့ပင်...။

နင်ချီ၏ ခန္ဓာကိုယ်အတွင်းမှ အတွင်းအားသည် ယခင်ကကဲ့သို့ အမျှင်တန်း အနည်းငယ်မျှသာ မဟုတ်တော့ပေ။ ၎င်းသည် တဖြည်းဖြည်းနှင့် အစုအဝေး တစ်ခုအဖြစ်

ပေါင်းစပ်လာခဲ့လေ၏။

ရက်အနည်းငယ်အတွင်းမှာပင် ၎င်းသည် အတွင်းစွမ်းအား ‘အသီး’ တစ်လုံးအဖြစ် လုံးဝစုစည်းသွားနိုင်လေသည်။၊ ထိုအခါ ခန္ဓာကိုယ်ကို အာဟာရဖြည့်ကာ သက်တမ်းကို တစ်ဖန် ပြန်လည်၍ အလွန်အမင်း တိုးမြှင့်ပေးတော့မည်။

ဤသည်သာ အတွင်းစွမ်းအား နယ်ပယ်သို့ အမှန်တကယ် တက်လှမ်းခြင်း ဖြစ်ပါ၏။

နင်ချီအတွက်တော့ ထိုနေ့သည် သိပ်မဝေးတော့ချေ။ ရက်နှစ်ဆယ်ခန့်သာ လိုတော့သည်။

ဤကာလအတွင်းတွင်...

နင်ချီသည် အတွင်းအား၏ အနှစ်သာရကို ပိုမိုနက်ရှိုင်းစွာ နားလည်လာခဲ့တော့သည်။

'အတွင်းအားဆိုတာ ပုံသဏ္ဌာန်မရှိဘူး၊ ရုပ်လုံးမရှိတဲ့ ‘ထင်မြင်ရရုံ ပစ္စည်း’ တစ်ခုပဲ။ အရင်က ခံစားမိခဲ့တဲ့ အမျှင်တန်းတွေပဲဖြစ်ဖြစ်၊ အခု အစုအဝေးဖြစ်လာတာပဲဖြစ်ဖြစ်၊ ဒါတွေအားလုံးက ခန္ဓာကိုယ်က ငါ့ကို ပြန်ပေးတဲ့ အာရုံခံစားမှုတွေပဲ။ တကယ်တမ်း အတွင်းထဲမှာ ရှိချင်မှ ရှိမှာ။'

'ဒါပေမဲ့ အတွင်းစွမ်းအား နယ်ပယ်ကို ကျင့်ကြံတယ် ဆိုတာက ထင်မြင်ရရုံ အရာကို အစစ်အမှန်ဖြစ်အောင် စုစည်းတာပဲ။ အတွင်းစွမ်းအား နယ်ပယ်မှာ နက်နဲတဲ့ အဆင့်ကို ရောက်သွားတဲ့အခါ၊ အတွင်းအားက ‘တစ်ပိုင်းတစ်စ အစစ်အမှန်’ အခြေအနေနီးပါးမှာ ရှိနေတယ်။ ခန္ဓာကိုယ်ကို အားဖြည့်ပေးရုံတင် မကဘဲ လက်သီးတွေ၊ လက်ဖဝါးတွေနဲ့ လက်နက်တွေပေါ်မှာ ကပ်ငြိပြီး သူတို့ရဲ့ စွမ်းအားကို မြှင့်တင်ပေးနိုင်တယ်။'

‘ထင်မြင်ရရုံအရာကို အစစ်အမှန်ဖြစ်အောင် ဘယ်လိုလုပ်မလဲ။’

နင်ချီက သူ၏လက်သီးကို ညင်သာစွာ ဝှေ့ယမ်းလိုက်ရင်း ခန္ဓာကိုယ်က အတွင်းအားအမျှင်တန်းများကို ညင်သာစွာ ‘အခွံခွာ’ ပြီး ‘ညှစ်ထုတ်’ နေသည်ကို ခံစားလိုက်ရသည်။

သူ၏စိတ်ထဲတွင် ဉာဏ်အလင်းများ အဆက်မပြတ် ပေါ်ထွက်လာ၏။

သူလေ့လာခဲ့ဖူးသည့် အားဆင့်ခြင်းသိုင်းစွမ်းရည်များနှင့် လျှို့ဝှက်သိုင်းကွက်အမျိုးမျိုးသည် သူ၏စိတ်ထဲတွင် ပေါ်လာပြီး ဤပြဿနာအတွက် အဖြေတစ်ခုကို ပေးအပ်နေကြသည်။

"အားဆင့်ခြင်း တစ်ကြိမ်စီတိုင်းက တကယ်တော့ အတွင်းအားကို ခန္ဓာကိုယ်နဲ့ နောက်တစ်ကြိမ် ပြန်ပေါင်းစည်းစေတာပဲ။ ဒါမှ ခန္ဓာကိုယ်က ပိုအားကောင်းပြီး ပို ‘အစစ်အမှန်’ ဆန်တဲ့ အတွင်းအားကို ထုတ်လုပ်နိုင်မှာ။ ကိုးကြိမ်ပြီးသွားရင်တော့ ချီစွမ်းအင်အဖြစ် လုံးဝပြောင်းလဲသွားနိုင်တယ်။"

"ဒါကြောင့် လောကမှာရှိတဲ့ အားဆင့်ခြင်းသိုင်းစွမ်းရည်အားလုံးကို အဆင့်နှစ်ဆင့် ခွဲလို့ရတယ်။"

"ပထမအဆင့်က အတွင်းအားနဲ့ ခန္ဓာကိုယ်ကြားမှာ ဆက်သွယ်မှုတစ်ခု ဖန်တီးပြီး ခန္ဓာကိုယ်စွမ်းအားကို တိုးတက်ဖို့ နောက်တစ်ကြိမ် ပြန်ပေါင်းစည်းတာပဲ။ ဒုတိယအဆင့်ကတော့ အားကောင်းလာတဲ့ ခန္ဓာကိုယ်ကနေ အတွင်းအားအသစ်ကို ညှစ်ထုတ်တာ။"

"ဆိုလိုတာက ဒီဖြစ်စဉ်အတွင်းမှာ ခန္ဓာကိုယ်က အတွင်းအားကို ‘အားဖြည့်’ ပေးပြီး ‘ဖိသိပ်’ ပေးတဲ့ အလုပ်ကို လုပ်ဆောင်ပေးတယ်။ အားဆင့်ခြင်းသိုင်းစွမ်းရည်ရဲ့ ထိရောက်မှုက ဒီဖြစ်စဉ်ကို ဘယ်လောက် အကောင်းဆုံးဖြစ်အောင် လုပ်နိုင်မလဲဆိုတဲ့အပေါ်မှာ မူတည်တယ်။ ဥပမာ ရေခဲပိုးမျှင်အားကျမ်းလိုပေါ့။ ပိုးအိမ်ဖွဲ့ဖောက်ထွက်ခြင်းနဲ့ ပြန်လည်မွေးဖွားခြင်း ကိုးကြိမ်က ခန္ဓာကိုယ်ကို အလွန်မြင့်မားတဲ့ အတိုင်းအတာအထိ ဖိသိပ်ပေးတာ။ ငါတို့ အစစ်အမှန်သိုင်းဂိုဏ်းက သာလွန်တဲ့ အားဆင့်ခြင်း သိုင်းစွမ်းရည် လေးခုထက်တောင် သာလွန်တယ်။"

"ဒါပေမဲ့... ဒါက အစစ်အမှန် အကန့်အသတ်လို့တော့ ငါမထင်ဘူး။"

နင်ချီသည် သူ ခန္ဓာကျင့်စဉ် လေ့ကျင့်နေသည်ကိုပင် မေ့လျော့သွားခဲ့ပြီး အံ့ဩဖွယ် ကောင်းသော ဉာဏ်အလင်း ရသည့် အခြေအနေ တစ်ခုသို့ ဝင်ရောက်သွားခဲ့သည်။

နင်ချီ၏ စိတ်ထဲတွင် ဉာဏ်ကွန့်မြူးမှုများ ပွက်ပွက်ဆူနေပြီး အဆက်မပြတ် ထွက်ပေါ်နေလေ၏။

"ဒီဖြစ်စဉ်တစ်ခုချင်းစီမှာ ခန္ဓာကိုယ်က အစစ်အမှန် အကန့်အသတ်ကို ရောက်ချင်တယ်ဆိုရင် ခန္ဓာကိုယ်က ‘သေဆုံး’ ပြီးမှ ပြန်လည် မွေးဖွားဖို့ လိုအပ်တယ်။ ဒီလို လုပ်မှ ပိုအားကောင်းတဲ့ အတွင်းအားကို ထုတ်ယူနိုင်ရုံတင် မကဘူး၊ ခန္ဓာကိုယ်ကိုလည်း နောက်တစ်ကြိမ် ပြောင်းလဲစေနိုင်တယ်။ ဒါမှ အစစ်အမှန် ‘ပိုးအိမ်ဖွဲ့ ဖောက်ထွက်ခြင်းနဲ့ ပြန်လည် မွေးဖွားခြင်း’ ပဲ။"

"ဒါပေမဲ့ ခန္ဓာကိုယ်ကို သေဆုံးစေတာက အရမ်း အန္တရာယ်များတဲ့ လုပ်ရပ်ပဲ။ နည်းနည်းလွဲသွားတာနဲ့ ဇီဝိန်ချုပ်ပြီး တကယ် သေသွားနိုင်တယ်။ ဒါကြောင့် ‘အသေတု’ ကို သုံးလို့ ရတယ်။ သံသရာလည်ပတ်ပြီး ခန္ဓာကိုယ်ရဲ့ အစစ်အမှန်အကန့်အသတ်ကို ရောက်အောင် လုပ်ရမယ်။"

ထိုအခိုက်အတန့်၌ သူ၏စိတ်ထဲတွင် ကောင်းကင်မိုးကြိုး ထစ်ချုန်းသံကို မသဲမကွဲ ကြားလိုက်ရသည်။

ဘယ်အချိန်မှန်းမသိ…

နင်ချီသည် ခန္ဓာကျင့်စဉ် လေ့ကျင့်နေခြင်းကို ရပ်တန့်လိုက်၏။

သူ မျက်လုံးများကို မှိတ်ထားပြီး ခြံဝင်းထဲတွင် ရုပ်တု တစ်ခုကဲ့သို့ မလှုပ်မယှက် ရပ်နေတော့သည်။

ကောင်းကင်မှ မိုးစက်များ ဖြည်းပညင်းစွာ သွန်ချလာ၏။

ထိုမြင်ကွင်းကို မြင်သောအခါ မျောက်ဖြူသည် သူ၏ မျောက်ဘုရင် ခန္ဓာကျင့်စဉ်ကို လျင်မြန်စွာ ရပ်တန့်လိုက်သည်။ သိုလှောင်ခန်းထဲမှ ဆီစိမ်စက္ကူထီးတစ်လက်ကို ယူဆောင်လာခဲ့ပြီး နင်ချီ၏ ဘေးသို့ ဂရုတစိုက် လျှောက်သွားကာ သူ့ကို မိုးကာပေးထားလိုက်၏။ နင်ချီကို အနှောင့်အယှက်ဖြစ်မည်စိုး၍ တတ်နိုင်သမျှ အသံတိတ်နေရန် သေချာဂရုစိုက်နေသည်။

မျောက်ဖြူ၏မျက်လုံးများမှာ

အထင်ကြီး လေးစားမှုများဖြင့် ပြည့်နှက်နေလေသည်။

နင်ချီနှင့် အတူ နေထိုင်ပြီးနောက် နင်ချီသည် မည်မျှ စွမ်းအား ကြီးမြတ်ပြီး သူ့အပေါ် မည်မျှ ကောင်းမွန်စွာ ဆက်ဆံသည်ကို သူ သိလာခဲ့သည်။

နင်ချီက သူ့ကို တပည့်အဖြစ် ဘယ်တော့မှ အသိအမှတ်

မပြုသော်လည်း မျောက်ဖြူကမူ နင်ချီကို သူ၏ ဆရာသမားအဖြစ်ပင် သတ်မှတ်ထားခဲ့၏။

လူတစ်ယောက်နှင့် မျောက်တစ်ကောင်သည် မိုးရေထဲတွင် တိတ်ဆိတ်စွာ ရပ်နေကြသည်။

ညဉ့်နက်ပိုင်း မိုးစဲသည် အထိပင်...။

နင်ချီက ဖြည်းညင်းစွာ မျက်လုံးများကို ဖွင့်လိုက်ရာ စစ်မှန်သော ပျော်ရွှင်မှုများ ထိုမျက်ဝန်းထဲတွင် ရှိနေခဲ့သည်။

"ထျန်းချန်... သွားနားတော့။"

သူ ညင်သာစွာ ဆိုလိုက်သည်။

ထိုအခါ မျောက်ဖြူက ရိုသေစွာ ဦးညွှတ်ပြီး သူ၏ ခြံဝင်းထဲသို့ ပြန်ဝင်သွားလေ၏။

နင်ချီက ကောင်းကင်ယံမှ ခပ်ဖျော့ဖျော့ မိုးစက်ကြောင်းများကို ကြည့်ကာ ပြုံးလိုက်သည်။

အားဆင့်ခြင်းသိုင်းစွမ်းရည် ခုနစ်ဆယ့်ခြောက်မျိုးကို ပြန်လည်သုံးသပ်ပြီး၊ ‘အသင်္ချေဖြစ်ရပ်ဆန်းကြယ် မူလဇာစ်မြစ်ခန္ဓာကျင့်စဉ်’ကို အခြေခံအဖြစ် အသုံးပြုလိုက်သည်။

တစ်ဖန်..ရေခဲပိုးမျှင် အားကျမ်းမှ ‘ပိုးအိမ်ဖွဲ့ ဖောက်ထွက်ခြင်းနှင့် ပြန်လည် မွေးဖွားခြင်း’ အယူအဆကို ချေးယူလိုက်သည်က တဖုံ၊ ‘မက်မောစွာ အိပ်မက်မက်ခြင်း’ ၏ အနှစ်သာရကို ဖမ်းဆုပ်ကာဖြင့် သူ ဉာဏ်အလင်း ရရှိခဲ့သည်။

မဟာအိပ်မက် သေခြင်း ကိုးပါး

အားကျမ်း။

ဤသည်မှာ ဤအချိန်အတွင်း နင်ချီ၏ အောင်မြင်မှုဖြစ်ပြီး သူကိုယ်တိုင်အတွက် သီးသန့် ဖန်တီးထားသော အားဆင့်ခြင်းသိုင်းစွမ်းရည်တစ်ခု ဖြစ်သည်။

"အိပ်စက်ခြင်းလို အိပ်မက်ထဲမှာ ခန္ဓာကိုယ်ကို သေဆုံးစေပြီး နိုးထလာချိန်မှာ ပြန်လည်မွေးဖွားခြင်းပဲ။ အားဆင့်ခြင်း တစ်ကြိမ်စီတိုင်းက အစစ်အမှန် အကန့်အသတ်ကို ရောက်နိုင်တယ်။ ဒါက မဟာအိပ်မက် သေခြင်းကိုးပါးပဲ။"

"နယ်ပယ်တစ်ခု ချိုးဖြတ်တိုင်းမှာ ကြာရှည်စွာ အိပ်စက်ခြင်းနဲ့ အစားထိုးနိုင်တယ်။ ဒါမှ ဘယ်အန္တရာယ်မှ မရှိတော့မှာ။ မအိပ်ခင်မှာ လုံလောက်တဲ့ စွမ်းအင်ကို စားသုံးထားဖို့ပဲ လိုတယ်။ ကံကောင်းတာက ကျွမ်းချန်လို ဝတုတ်လေးတစ်ယောက် ဖြစ်မလာအောင် ခန္ဓာကိုယ်ရဲ့ စုပ်ယူမှုပြဿနာကို ငါ အကောင်းဆုံးဖြစ်အောင် လုပ်ထားနိုင်ခဲ့လို့‌ပေါ့။"

နင်ချီက ပြုံးလိုက်မိသည်။

သူက ပျင်းရိစွာ အကြောဆန့်လိုက်ရင်း အလွန်ကျေနပ်နေမိသည်။

ယခု သူလုပ်ရန်လိုအပ်သည်မှာ အတွင်းစွမ်းအားနယ်ပယ်သို့ အပြည့်အဝ ခြေချရန်သာဖြစ်ပြီး၊ ထို့နောက်တွင် အစွမ်းထက်သော မဟာအိပ်မက် သေခြင်းကိုးပါး အားကျမ်းကို နောက်ဆက်တွဲအဆင့်များတွင် စူးစမ်းရှာဖွေနိုင်ပေတော့မည်။

အတွင်းစွမ်းအားနယ်ပယ်ကို အနှစ်နှစ်ဆယ်အတွင်း အပြီးသတ်ခြင်းသည် ထူးချွန်သော ပါရမီရှင်ဟု သတ်မှတ်ခံရသော်လည်း နင်ချီကမူ သူ အလွန် မြန်မြန်ဆန်ဆန် ပြီးမြောက်လိမ့်မည်ဟု ထင်နေသည်။

"တိတိကျကျ ပြောရရင် မဟာအိပ်မက် သေခြင်း ကိုးပါး အားကျမ်းရဲ့ ဒုတိယ တစ်ဝက်က လိုအပ်နေသေးတယ်။"

'အတွင်းစွမ်းအား နယ်ပယ်မှာ အောင်မြင်မှု အကြီးစားကို ရောက်တဲ့အခါ၊ ‘တစ်ပိုင်းတစ်စ အစစ်အမှန်’ အခြေအနေကို ရောက်ရင် အတွင်းအားက အရည်အချင်း အမျိုးမျိုးကို ရရှိနိုင်တယ်။ ဥပမာ ရေခဲပိုးမျှင် အားကျမ်းနဲ့ဆိုရင် ရေခဲပိုးမျှင် အတွင်းအားကို စုစည်းနိုင်ပြီး လက်ဖဝါးထဲမှာ ဖွဲ့စည်းနိုင်တယ်။ အရိုးတွေကို ခဲသွားစေနိုင်လောက်အောင် အစွမ်းထက်ပြီး နောက်ပိုင်း ချီစွမ်းအင် နယ်ပယ်ရဲ့ အစစ်အမှန်ချီ ကျင့်စဉ်နဲ့တောင် ဆက်စပ်နေတယ်။’

‘ဒါပေမဲ့ အလျင်လိုစရာ မရှိပါဘူး။ အတွင်းစွမ်းအား နယ်ပယ်မှာ အောင်မြင်မှု အကြီးစားကို ရောက်ဖို့ အနည်းဆုံး တစ်နှစ်ကျော်လောက် အချိန်ယူရမှာ ဆိုတော့ နောက်ထပ် သေသေချာချာ စဉ်းစားဖို့ လိုသေးတယ်။’

နင်ချီက ထိုအတွေးကို ဘေးဖယ်ထားလိုက်သည်။

သူသည် အနာဂတ်တွင် ဤပန်းတိုင်သို့ ရောက်ရန် ကြိုးပမ်းသွားမည် ဖြစ်လေ၏။