တိတ်ဆိတ်ခြင်းသိုင်းနည်းစနစ်

~သိုင်းကစားကွင်းပေါ်၌...

အားလုံး၏ အာရုံသည် သူတို့နှစ်ဦး၏ တိုက်ပွဲအပေါ်တွင် စုစည်းနေခဲ့သည်။

အတွင်းစွမ်းအားနယ်ပယ်၏ နဝမအလွှာတွင် အတွင်းအားသည် အလွန်အမင်း ခိုင်မာနေပြီး၊ ခန္ဓာကိုယ် သို့မဟုတ် လက်နက်များပေါ်တွင် ကပ်ငြိနိုင်စွမ်း ရှိ၏။

ပို၍ ကျွမ်းကျင်သူများဆိုလျှင် ၎င်းကို ဆယ်ပေအရှည်အထိ ဆန့်ထုတ်နိုင်သော်လည်း၊ ခန္ဓာကိုယ်မှ ထွက်ခွာသွားသည်နှင့် ချက်ချင်း ပျောက်ကွယ်သွားတတ်သည်။

တစ်ဦးက ကောင်းကင်တုန်ဟည်းအားကို ကျင့်ကြံပြီး၊ အခြားတစ်ဦးက ပင်လယ်ဖုံးလွှမ်းအားကို ကျင့်ကြံထား၏။ သူတို့၏ တိုက်ကွက်တစ်ခုချင်းစီ၏ ဖျက်ဆီးနိုင်စွမ်းမှာ အံ့ဩဖွယ်ကောင်းလှသည်။

နင်ချီက စူးစိုက်စွာ ကြည့်နေခဲ့သည်။

သို့သော် သူ၏စိတ်ထဲတွင်တော့ တဖြည်းဖြည်းနှင့် ထူးဆန်းသော ခံစားချက်တစ်ခု ဖြစ်ပေါ်လာခဲ့၏။

‘စီနီယာအစ်ကိုကြီးနဲ့ စီနီယာအစ်ကိုငါးက အရမ်းအားကောင်းတာပဲ။ သူတို့ရဲ့ အတွင်းအားက ဆယ်ပေနီးပါးအထိ ရောက်တယ်။ ဒါပေမဲ့ ဘာလို့ ငါ သူတို့ကို ပြန်တိုက်ခိုက်နိုင်တဲ့ အင်အားရှိတယ်လို့ ခံစားနေရတာလဲ။’

သူ့မှာ သူ၏ လက်ရှိစွမ်းအားအဆင့်ကို စမ်းသပ်ရန်အတွက် ထိုနှစ်ဦးနှင့် တိုက်ခိုက်လိုစိတ်အချို့ ရှိနေခဲ့သည်။ သို့သော် နောက်ဆုံးတွင် ထိုအတွေးကို ဖိနှိပ်ထားလိုက်သည်။

မကြာမီ...

ကျန်းပိုင်ရှန်းက အနည်းငယ်အသာဖြင့် အနိုင်ရရှိသွားသည်။

လူအုပ်ကြီးက စိတ်လှုပ်ရှားစွာနှင့် စိတ်အားထက်သန်စွာ ကြည့်ရှုနေကြ၏။

လော့ဝမ်ထျန်းက ကျေနပ်မှုအပြည့်ဖြင့် ဆိုလိုက်သည်။

"ဂျူနီယာညီလေးငါး.. အခုချိန်ကစပြီး မင်းက အစစ်အမှန်သိုင်းဂိုဏ်းမှာ ဒုတိယအင်အားအကြီးဆုံးပဲ။"

ကျန်းပိုင်ရှန်းက လက်ကို အကြိမ်ကြိမ် ဝှေ့ယမ်းလိုက်သည်။

"စီနီယာအစ်ကိုကြီးသာ ဂိုဏ်းအလုပ်တွေနဲ့ အာရုံမများခဲ့ရင် ချီစွမ်းအင်နယ်ပယ်ကို ကြာပြီဖြစ်တဲ့ အဆင့်ချိုးဖြတ်ပြီးလောက်ပြီ။ ဂျူနီယာညီလေး ရှက်မိပါတယ်ဗျာ။"

လော့ဝမ်ထျန်းက အားရပါးရ ရယ်မောလိုက်သည်။

"ဘာလို့ ငါတို့ညီအစ်ကိုတွေကြားမှာ ဒီလောက်တောင် ယဉ်ကျေးနေရမှာလဲကွာ.. မင်းရဲ့စွမ်းအားက ငါ့စွမ်းအားကို ထင်ဟပ်နေတာပဲ မဟုတ်လား။"

အားလုံး စိတ်လှုပ်ရှားသွားကြသည်။

တာအိုဆရာလုံရှန်းသည် သူ၏တပည့်များ ဤသို့ သဟဇာတဖြစ်နေသည်ကို မြင်သောအခါ ကျေနပ်စွာဖြင့် ပြုံးနေခဲ့သည်။

နောက်ဆက်တွဲတွင်...

အစစ်အမှန်တပည့်များသည် အချင်းချင်း လက်ရည်စမ်းကြပြီး၊ အခြားတပည့်များက အလွန်အမင်း စွဲမက်စွာ ကြည့်ရှုရင်း ပို၍ပင် စိတ်အားထက်သန်လာကြသည်။

သူတို့သည် သာလွန်ကောင်းမွန်သော အားဆင့်ခြင်းသိုင်းစွမ်းရည်၏ အစွမ်းအစကို မျက်ဝါးထင်ထင် တွေ့မြင်ခဲ့ကြရသည်။ အစစ်အမှန်သိုင်းဂိုဏ်းတွင် သင်ကသာ အကျိုးပြုဆောင်ရွက်မည်ဆိုလျှင် သာလွန်ကောင်းမွန်သော အားဆင့်ခြင်းသိုင်းစွမ်းရည်ကို ရရှိရန် အခွင့်အရေးရှိပေသည်။

နင်ချီက လော့ဝမ်ထျန်းကို ကြည့်ရင်း စိတ်လှုပ်ရှားလာရသည်။

အစစ်အမှန်သိုင်းဂိုဏ်းသည် မိသားစုတစ်ခုဖြစ်ရာ မည်သူက အားကောင်းသည်၊ အားနည်းသည်မှာ အရေးမကြီးပေ။

စီနီယာအစ်ကိုကြီး သို့မဟုတ် စီနီယာအစ်ကိုငါးထက် အားကောင်းခြင်း၊ အားနည်းခြင်းသည် ယခုအခါတွင် လုံးဝ အရေးမကြီးတော့ပါ။ သူ၏စိတ်ထဲတွင် ရှိခဲ့သော ပြိုင်ဆိုင်လိုစိတ်

အနည်းငယ်သည် ချက်ချင်းပင် ပျောက်ကွယ်သွားခဲ့တော့သည်။

သူသည် ယခင်က အနည်းငယ် ရိုးအခဲ့သည်ဟု ရုတ်တရက် နားလည်သွားခဲ့သည်။

ယခင်က နတ်ဘုရားဓားဂိုဏ်း တောင်ပေါ်သို့ ရောက်လာစဉ်က ဝတုတ်လေးသာ အစစ်အမှန်သိုင်းဂိုဏ်းမှ လူတိုင်းကို အနိုင်ယူသွားခဲ့လျှင်ပင် ဘာဖြစ်နိုင်မည်နည်း။

သူ မသိလိုက်ခင်မှာပင် သူ၏စိတ်နေသဘောထားသည် ပိုမိုပွင့်လင်းလာသည်ဟု နင်ချီ ခံစားလိုက်ရသည်။

ဤသည်ကို စီနီယာအစ်ကိုကြီးထံမှ သင်ယူခဲ့ခြင်း ဖြစ်သည်။

...

နှစ်စဉ်ပြိုင်ပွဲသည် ချောမွေ့စွာ ပြီးဆုံးသွားပြီး၊ အစစ်အမှန်သိုင်းဂိုဏ်း၏ စည်းလုံးညီညွတ်မှုသည် မကြုံစဖူးသောအဆင့်သို့ ရောက်ရှိခဲ့သည်။ တပည့်များသည် ယခင်ကထက် သိုင်းပညာအပေါ် ပိုမိုစိတ်အားထက်သန်လာကြသည်။

ဆောင်းရာသီကုန်ဆုံး၍ နွေဦးရာသီ တစ်ပတ် လည်လာပါတော့သည်။

'တာအိုရှာဖွေခြင်း ကျောင်းတော်' ၏ အပြင်ဘက်တွင်...

မက်မွန်ပင်အနည်းငယ် ထပ်တိုးလာခဲ့သည်။

နင်ချီသည် ၎င်းတို့ကို အစစ်အမှန်သိုင်းတောင်မှ ရွှေ့ပြောင်းလာခဲ့ခြင်း ဖြစ်ပါသည်။

ခြံဝင်းထဲတွင် တစ်ခါတစ်ရံ အလွန်ငြီးငွေ့ဖွယ်ကောင်းသည်ဟု

အမြဲတစေ ခံစားခဲ့ရ၏။ ယခုအခါ ပို၍ မျက်စိပသာဒ ဖြစ်ကာ ကြည့်ကောင်းသွားသည်။

ပွင့်လန်းနေသော မက်မွန်ပန်းများသည် ထူးခြားသော ကျက်သရေတစ်ခု ရှိပြီး သူ့ကို ပို၍ စိတ်အေးချမ်းစေခဲ့သည်။

နင်ချီသည် သိုင်းကွက်များကို ဖန်တီးနေခဲ့၏။

မျောက်ဖြူက လျှို့ဝှက်ကျမ်း

အနည်းငယ်ကို ပို့ဆောင်ပြီးနောက် ဆော့ကစားရန် ထွက်သွားခဲ့လေ၏။

ယခုအခါ နင်ချီသည် သိုင်းကျမ်းတိုက်သို့ တခါတလေမှသာ သွားတော့သည်။

နောက်ဆုံးနှစ်စဉ်ပြိုင်ပွဲပြီးကတည်းက တပည့်များ၏ သိုင်းပညာအပေါ် စိတ်အားထက်သန်မှု မြင့်တက်လာပြီး သိုင်းကျမ်းတိုက်သို့ ကျမ်းစာများ ငှားရမ်းရန် မကြာခဏ လာရောက်ကြသဖြင့် ယခင်ကဲ့သို့ မဆိတ်ငြိမ်နေတော့ပေ။

ထို့ကြောင့် နင်ချီသည် သူ ဖတ်လိုသော သိုင်းစာအုပ်များကို သိုင်းကျမ်းတိုက်မှ မျောက်ဖြူကိုသာ ယူဆောင်ခိုင်းလိုက်တော့သည်။

သာမန်တပည့်များမှာမူ 'တာအိုရှာဖွေခြင်း ကျောင်းတော်' သို့ ချဉ်းကပ်ရန် တင်းကြပ်စွာ တားမြစ်ထား၏။

နင်ချီသည် သူ၏လက်ထဲမှ သိုင်းကျမ်းစာများကို စစ်ဆေး လေ့လာလိုက်သည်။

"နက်နဲ လိပ်အသက်ရှုသိုင်းစနစ်။"

"သစ်ခြောက်အသက်ရှုသိုင်းနည်းစနစ်။"

"အသက်အောင့်သိုင်းနည်းစနစ်။"

"..."

"ဒီသိုင်းပညာတွေ အားလုံးက အသက်ရှုမှုကို ဖုံးကွယ်ဖို့အတွက် သာလွန်ကောင်းမွန်တဲ့ နည်းစနစ်တွေပဲ။ အဆင့်မြင့်မြင့် ကျွမ်းကျင်သွားရင် သာမန်လူ တစ်ယောက်အတွက် အစစ်အမှန်ကို ခွဲခြား သိမြင်ဖို့ ခက်ခဲသွားစေနိုင်တယ်။ သိုင်းလောကမှာ ခရီးသွားတဲ့အခါ မရှိမဖြစ် လိုအပ်တဲ့ အရာပဲ။"

နင်ချီ တွေးတောသုံးသပ်နေခဲ့သည်။

သူ၏ အရှိန်အဝါသည် ပြောင်းလဲ စပြုနေခဲ့ပြီ ဖြစ်၏။

တစ်ခါတစ်ရံ သူ၏အသက်ရှုသံသည် ရှည်လျားပြီး နှေးကွေးကာ မကြားရလောက်နီးပါး ဖြစ်သွား၏။

တစ်ခါတစ်ရံတွင် ခြောက်သွေ့နေသော သစ်သားကဲ့သို့ မှေးမှိန်သွားပြီး၊ ဝှက်ထားသော ရေအိုင်ထဲတွင် အသက်မရှိသကဲ့သို့ ဖြစ်သွား၏။ တစ်ခါတစ်ရံတွင်မူ လုံးဝပျောက်ကွယ်သွားပြီး လူများကို ဗလာနတ္ထိကိုသာ မြင်စေတော့သည်...။

သိသာထင်ရှားစွာပင် နင်ချီသည် ဤသိုင်းပညာများကို အထင်ကြီးလောက်သော အဆင့်အထိ ကျွမ်းကျင်နေပြီ ဖြစ်သည်။

နောက်ဆုံးတစ်ကြိမ် တာအိုဆရာလုံရှန်းနှင့် စကားစမြည်ပြောပြီးနောက် နင်ချီသည် အသက်ရှုမှု ဖုံးကွယ်ဖို့ ပိုမိုအာရုံစိုက်ရန် တွေးတောခဲ့သည်။

သည်တစ်ကြိမ် သူ၏စီနီယာအစ်ကိုနှင့် အစ်မတို့က ထူးခြားသေ ာအရာတစ်ခုကို တစ်စိတ်တစ်ပိုင်း သတိပြုမိပုံရသောအခါ၊ အစွမ်းထက်သော အသက်ရှုမှု ဖုံးကွယ်သည့် သိုင်းပညာတစ်ခု ဖန်တီးရန် သူ၏စိတ်ပိုင်းဖြတ်မှုကို ပိုမိုခိုင်မာသွားစေခဲ့သည်။

"ဒီအသက်ရှုခြင်းနည်းစနစ်တွေက ကောင်းပေမဲ့ အားလုံးမှာ အားနည်းချက်တွေ ရှိနေတယ်။ တစ်ခါအသုံးပြုလိုက်ရင် တခြားသူတွေက မင်းရဲ့အဆင့်ကို မခွဲခြားနိုင်တာမှန်ပေမဲ့ မင်းက ပုံမှန်မဟုတ်ဘူးဆိုတာကိုတော့ ချက်ချင်းသိသွားနိုင်တယ်။"

ဥပမာအားဖြင့် 'နက်နဲ လိပ်အသက်ရှုသိုင်းနည်းစနစ်' ကို အသုံးပြုသည့်အခါ အသက်ရှုမှုသည် ရှည်လျားပြီး နှေးကွေးနေ၏။ သင်က သိုင်းကွက်များ အသုံးမပြုသရွေ့ သာမန်လူက သင့်စွမ်းအားကို မခွဲခြားနိုင်သည်မှာ မှန်သော်လည်း၊ အသက်ရှုမှုကို ဖုံးကွယ်ထားသည့် လက္ခဏာကလည်း အလွန်ထင်ရှားနေသည်။

ထို့ကြောင့် အခြားသူများက သင် တမင်တကာ ဖုံးကွယ်ထားမှန်း သဘာဝအတိုင်း သိရှိသွားကြသည်ပင်။

အခြားသော အသက်ရှုမှု ဖုံးကွယ်သည့် သိုင်းပညာများမှာလည်း အလားတူပင် ဖြစ်သည်။

ဤသည်မှာ နင်ချီ၏ မျှော်လင့်ချက်များနှင့် မကိုက်ညီခဲ့ပါ။

သူလိုအပ်သည်မှာ အခြားသူများ သူ၏ အသက်စွမ်းအင် ပြင်းအားကို လုံးဝမခွဲခြားနိုင်ခြင်း သို့မဟုတ် ပြီးပြည့်စုံသော အယောင်ဆောင်မှု အဆင့်သို့ ရောက်ရှိခြင်းပင် ဖြစ်သည်။

"ဖြစ်နိုင်ရင်... ငါ ‘မဟာအိပ်မက် သေခြင်း ကိုးပါးအားကျမ်း’ရဲ့ အသေတု အခြေအနေကို ထုတ်သုံးလို့ ရနိုင်တယ်။"

နင်ချီ၏စိတ်ထဲတွင် ဉာဏ်အလင်း တစ်ခု လက်ခနဲ ပေါ်လာခဲ့သည်။

အသက်ရှုမှုဖုံးကွယ်သည့် သိုင်းပညာ အများအပြား၏ အနှစ်သာရများသည် တစ်ခုပြီး တစ်ခု စီးဆင်းလာ၏။

မကြာမီ…သိုင်းနည်းစနစ် တစ်ခု ပုံပေါ်လာခဲ့သည်။

နင်ချီအတွက်တော့ ဒီလို နည်းစနစ်ပိုင်းဆိုင်ရာ သိုင်းပညာများကို ဖန်တီးခြင်းသည် ကျင့်စဥ်များထက် များစွာ မခက်ခဲပေ။

‘တိတ်ဆိတ်ခြင်းသိုင်းနည်းစနစ်’....

၎င်းသည် ရုပ်ခန္ဓာကိုယ် တိတ်ဆိတ်သွားပြီး အသက်စွမ်းအင် တည်ငြိမ်သွားသော နည်းစနစ်တစ်ခု ဖြစ်သည်။

နင်ချီသည် အသစ်ဖန်တီးထားသော ကျင့်ကြံခြင်းနည်းစနစ်ကို အသုံးပြုလိုက်ရာ သူ၏ခန္ဓာကိုယ်အတွင်းမှ အသက်စွမ်းအင်သည် ချက်ချင်းပင် လျော့ကျသွားခဲ့သည်။ မကြာမီမှာပင် ၎င်းသည် သာမန် အကြောသန့်စင်ခြင်းနယ်ပယ်နှင့် ဆင်တူသော အသက်စွမ်းအင်ပြင်းအားသို့ ချဉ်းကပ်သွားသည်။

နင်ချီ၏ နှုတ်ခမ်းထောင့်တွင် အပြုံးလေး တစ်ခု ပေါ်လာခဲ့သည်။

ထို့နောက် ကျင့်ကြံခြင်းနည်းစနစ်ကို ပြောင်းပြန်လှန်လိုက်ရာ အသက်စွမ်းအင်ပြင်းအားသည် မျက်စိဖြင့်မြင်နိုင်သော အရှိန်ဖြင့် မြင့်တက်လာပြီး၊ တစ်ခဏအတွင်းမှာပင် လော့ဝမ်ထျန်းနှင့် ကျန်းပိုင်ရှန်းတို့၏ အဆင့်ကို ကျော်လွန်သွားခဲ့သည်။

"ငါဖန်တီးလိုက်တဲ့ တိတ်ဆိတ်ခြင်းသိုင်းကွက်က အသက်စွမ်းအင်ပြင်းအားကို ဖုံးကွယ်နိုင်ရုံတင်မကဘဲ အဆင့်မြင့်နယ်ပယ်တစ်ခုကိုလည်း အယောင်ဆောင်နိုင်တယ်။ ချီစွမ်းအင်နယ်ပယ် ကျွမ်းကျင်သူတွေအတွက်တော့ ငါက ဆရာနဲ့ နတ်ဘုရားဓားသခင်

အဘိုးကြီးကိုပဲ မြင်ဖူးသေးတော့ အယောင်ဆောင်တာက သိပ်မကောင်းလောက်ဘူး။ ဒါပေမဲ့ ဒီလိုဖြစ်နေရင်တောင် သာမန်လူတစ်ယောက်ကို လှည့်စားဖို့တော့ လုံလောက်တာပေါ့။"

နင်ချီ စိတ်ခံစားမှု ကောင်းနေခဲ့သည်။

‘တိတ်ဆိတ်ခြင်းသိုင်းနည်းစနစ်’ ကို အသုံးပြုလျှင် တာအိုဆရာလုံရှန်းပင် သူ့ကို ထွင်းဖောက်မမြင်နိုင်ဟု သူ ယုံကြည်သည်။

တိုက်ပွဲများအတွင်းမှာပင် သူ အစွမ်းကုန်မထုတ်သုံးသရွေ့ သူ၏အစစ်အမှန်အဆင့်ကို ဖော်ထုတ်မိမည်မဟုတ်ပေ။

သို့သော် သူသည် ကောင်းကင်ဘုံ လူသား နယ်ပယ်နှင့် မကြုံတွေ့ဖူးသေးပေ။

ဤနယ်ပယ်၏ ကောင်းကင်ဘုံပဲ့တင်ထပ်ခြင်းဟု

ခေါ်သော အရာမှာ အဘယ်အရာ ဖြစ်သည်ကို သူ မသေချာသောကြောင့် ‘တိတ်ဆိတ်ခြင်းသိုင်းနည်းစနစ်’သည် ကောင်းကင်ဘုံ လူသား နယ်ပယ်တစ်ဦးကို လှည့်စားနိုင်မ ည်မဟုတ်ပေ။ သို့သော် အနာဂတ်တွင် ထိုသို့သော ပညာရှင်များနှင့် ရင်ဆိုင်ရသည့်အခါ တဖြည်းဖြည်း တိုးတက်အောင် လုပ်ဆောင်သွားလျှင် လုံလောက်ပေလိမ့်မည်။

ယခုလောလောဆယ်အတွက်တော့ ဤသည်မှာ လုံလောက်နေခဲ့ပြီ။

"အသက်ရှုမှု ဖုံးကွယ်တဲ့ သိုင်းပညာအပြင်၊ ခန္ဓာကိုယ် ပြောင်းလဲတဲ့ သိုင်းပညာ တစ်ခုလည်း ငါလိုအပ်တယ်။"

နင်ချီ တွေးလိုက်သည်။ အကြောင်းမှာ သူ၏လက်ရှိခန္ဓာကိုယ်သည် အလွန်ငယ်ရွယ်ပြီး ထင်ရှားသော လက္ခဏာများ ရှိနေသောကြောင့် ဖြစ်၏။ တစ်နေ့တွင် သူ တကယ်တမ်း လှုပ်ရှားရန် လိုအပ်လာပါက သူ မည်သူမည်ဝါဖြစ်ကြောင်းကို မဖော်ထုတ်ခြင်းသည် အကောင်းဆုံး ဖြစ်ပေလိမ့်မည်။

ထိုနေ့က တာအိုဆရာလုံရှန်း၏ သတိပေးချက်ကို သူ စိတ်ထဲတွင် မှတ်ထားခဲ့သည်။

နှစ်ရက်ကြာပြီးနောက်…

နင်ချီသည် သူ၏လက်ထဲမှ ပုံနေသော သိုင်းပညာများနှင့် အရိုးကျုံ့ခြင်း သိုင်းစွမ်းရည် သိုင်းကျမ်းပုံကြီးကို ကြည့်ရင်း သူ တောင့်တခဲ့သော အရာအတွက် ကျေနပ်နေမိသည်။

ခန္ဓာကိုယ်ရွှေ့ပြောင်းခြင်းနှင့် အရိုးပြောင်းလဲခြင်းသိုင်းစွမ်းရည်။

၎င်းသည် အယောင်ဆောင်နိုင်သည်၊ ပြောင်းလဲနိုင်သည်။

နင်ချီ၏ ဆေးပညာစွမ်းရည်များသည် ဤကိစ္စတွင် သိသာထင်ရှားသော အခန်းကဏ္ဍမှ ပါဝင်ခဲ့၏။ သူ၏သိုင်းလမ်းစဉ်က

အတွင်းစွမ်းအားနယ်ပယ်သို့ တိုးတက်လာပြီး အတွင်းအားမွေးဖွားလာသည်နှင့်အမျှ သူ၏ဆေးပညာစွမ်းရည်များသည် ပိုမိုနက်ရှိုင်းလာခဲ့ပြီး အပ်စိုက်ကုထုံးနည်းစနစ်များအား ပိုမိုကျွမ်းကျင်လာခဲ့သည်။

ခန္ဓာကိုယ်ရွှေ့ပြောင်းခြင်းနှင့် အရိုးပြောင်းလဲခြင်းသိုင်းစွမ်းရည်သည် ဤအရာ၏ ထင်ရှားသော သရုပ်တစ်ခုသာ ဖြစ်လေသည်။

နင်ချီသည် ခန္ဓာကိုယ်ရွှေ့ပြောင်းခြင်းနှင့် အရိုးပြောင်းလဲခြင်းသိုင်းစွမ်းရည်ကို အသုံးပြုလိုက်သည်။

သူ၏ တစ်ချိန်က ကျောက်စိမ်းကဲ့သို့သော မျက်နှာသည် လျင်မြန်စွာ ပြောင်းလဲသွားပြီး သူ၏ရုပ်သွင်အင်္ဂါများသည် သာမန်ဖြစ်သွားသည်ကိုသာ မြင်လိုက်ရသည်။ အရိုးများ ကျိုးကြေသွားသည့်အသံ ထွက်ပေါ်လာပြီး သူ၏ခန္ဓာကိုယ်သည် စတင် လူကောင်ကြီးလာသည်။ မျက်စိတစ်မှိတ်အတွင်းမှာပင် သူသည် ဆယ့်ငါးနှစ် သို့မဟုတ် ဆယ့်ခြောက်နှစ်အရွယ် ကောင်လေးတစ်ယောက်၏ ပုံစံသို့ ပြောင်းလဲသွားခဲ့သည်။

မူလက ကျက်သရေရှိသော တာအို ကလေးလေးသည် ချက်ချင်းပင် သာမန်နှင့် မထူးခြားသော လူငယ်တစ်ယောက် ဖြစ်သွားခဲ့သည်။

နင်ချီ ကျေနပ်စွာ ခေါင်းညိတ်လိုက်၏။

"မဆိုးဘူး။ ဒါပေမဲ့ ဒါက ခန္ဓာကိုယ် ရွှေ့ပြောင်းခြင်းနဲ့ အရိုး ပြောင်းလဲခြင်း

သိုင်းစွမ်းရည်ရဲ့ အကန့်အသတ်တော့ မဟုတ်သေးဘူး။"

"ဒီလို သိုင်းနည်းစနစ်မျိုးက ပြည့်စုံခြင်းနယ်ပယ်ကို ရောက်ဖို့ နောက်ဆုံးမှာတော့ ဆေးဝါး အကူအညီအချို့ လိုအပ်တယ်။ အဲ့ဒီအချိန်ကျရင် အယောင်ဆောင်တာရော ပြောင်းလဲတာရော နှစ်မျိုးလုံးရဲ့ အကျိုးသက်ရောက်မှုက ပိုကောင်းလာမှာ။"

ဤသည်မှာ ‘သံထည် အင်္ကျီ’ကဲ့သို့ ယခင်က ဖန်တီးခဲ့သော နည်းစနစ်အမျိုးမျိုးနှင့် ကွဲပြားသည်။ နင်ချီသည် ၎င်း၏ရှုပ်ထွေးနက်နဲမှုများကို ချက်ချင်းနားလည်နိုင်လျှင်ပင် ၎င်းကို တစ်ဆင့်ပြီးတစ်ဆင့် လေ့ကျင့်ရန် လိုအပ်နေပါသေးသည်။ အကြောင်းမှာ သဘာဝအားဖြင့် ဤနည်းစနစ်များသည် ခန္ဓာကိုယ်ကို သန့်စင်ရန် လိုအပ်ပြီး အခြေခံသဘောတရားများကို သင်ယူရုံမျှဖြင့် မလုံလောက်သောကြောင့် တည်း။

သို့သော်လည်း…

နင်ချီ၏ ရုပ်ခန္ဓာကိုယ်သည် အလွန် သန်မာလှသဖြင့် ၎င်းကို လေ့ကျင့်ရာတွင် သာမန်လူ တစ်ယောက်ထက် အချိန်ပိုနည်းမည် ဖြစ်ပါသည်။