အခန်း (၂၁၆၇-၂၁၇၂)

အခန်း ၂၁၆၇ ယွမ်နှစ်သောင်းပြန်လျော်ပါ

“ရွက်ကျပင်ရောင်းတဲ့သူရှာဖို့ ကျွန်မကိုအပ်လိုက်ပါ။ ရှာတွေ့ပြီးတာနဲ့ အတူတူသွား၀ယ်ကြမယ်” ဟု ကုနင်းကဆိုသည်။

"ကောင်းပြီ"

ပန်းဈေးသည် အလွန်ကြီးမားပြီး ခရီးစဉ်ပြီးဆုံးရန် အချိန်အတော်ကြာခဲ့သည်။ ပိုင်ရှင်အသစ်များကို စောင့်မျှော်နေသော စတိုးဆိုင်အလွတ်များစွာကိုလည်း တွေ့ခဲ့ရသည်။ သို့သော် အများစုမှာ အလွန်သေးငယ်သောကြောင့် ကုနင်းက မကျနေပ်သေးပေ။

ကုနင်း၏လိုအပ်ချက်များနှင့်ကိုက်ညီသောစတိုးဆိုင်တစ်ခုရှိသော်လည်းတည်နေရာသည်အတွင်းအတော်ကျပြီးမပေါ်လွင်ပဲ လူများဝင်ရောက်နိုင်မှုသည် စျေးကွက်၏အရှေ့ဘက်ခြမ်း၏တစ်ဝက်ဖြစ်သည်။

ဘာပဲဖြစ်ဖြစ် ကုနင်းက အရည်အသွေးသာကောင်းလျှင် ထိုးဖောက်နိုင်မည်ဟု ယုံကြည်သည်။ လုပ်ငန်းကို ကောင်းမွန်စွာ လည်ပတ်နိုင်သရွေ့ ဖောက်သည်များ ကင်းမဲ့နေမည် မဟုတ်ပေ။

ထို့ကြောင့် ကျင်းယွင်ယောင်နှင့် မြောင်ကျင်းကျင်းတို့သည် အစပိုင်းတွင် မကျနေပ်သော်လည်း ကုနင်း၏ ရှင်းပြချက်ကို ကြားပြီးနောက် လက်ခံခဲ့ကြသည်။

ထို့ကြောင့် ကုနင်းသည် စတိုးဆိုင်၏ ငှားရမ်းမှုအကြောင်း ဆွေးနွေးရန် ပိုင်ရှင်ကို ချက်ချင်းခေါ်ခဲ့သည်။

အငှားဆိုင်မျက်နှာစာဖြစ်သောကြောင့် ပိုင်ရှင်၏ဖုန်းနံပါတ်ကို တံခါးအပြင်ဘက်တွင် ချိတ်ဆွဲထားသည်။

ပိုင်ရှင် မရောက်ခင်မှာ သူတို့ လမ်းလျှောက်ကြသည်။ ဒါပေမယ့် ဒီတစ်ခါတော့ ကိစ္စတစ်ခုဖြစ်သွားသည်။

လူလတ်ပိုင်းအရွယ် အမျိုးသားတစ်ဦးသည် စိမ့်ကလိဗီယာအိုးကိုကိုင်ဆောင်ကာ မြောင်ကျင်းကျင်းနားက ဖြတ်သွားသောအခါ ရုတ်တရက် သူမကို တိုက်ကာ သူ့လက်ထဲရှိ အိုးကလေးပြုတ်ကျသွားပြီး အော်လိုက်သည်။

ဒီမတော်တဆမှုက လူတော်တော်များများရဲ့ အာရုံစိုက်မှုကို ချက်ချင်းခံခဲ့ရပေမယ့် မြောင်ကျင်းကျင်း ကတော့ စိတ်ရှုပ်ထွေးသွားခဲ့သည်။ ဒီလူက သူမကို ဘာကြောင့် လာတိုက်တယ်ဆိုတာ သူမ နားမလည်ပေ။

မြောင်ကျင်းကျင်းသည် ယခင်က ဤကဲ့သို့ ထိခိုက်ယောင်ဆောင်ခြင်းမျိုး တစ်ခါမှ မကြုံဖူးသောကြောင့် သူမ ဘာဖြစ်သွားသည်ကို မသိခဲ့ပေ။

ဟုတ်ပါတယ် ဟန်ဆောင်ထားတဲ့ ထိခိုက်မှုတစ်ခုပါ။

ပန်းဈေးမှာ လူများပြီး လမ်းများကလည်း အနည်းငယ် စည်ကားသော်လည်း လူများ သွားလာရလောက်အောင် ကျယ်သည်။ ထို့အပြင် လူသွားရန်အတွက် မြောင်ကျင်းကျင်း ဘေးတွင် နေရာများစွာရှိသော်လည်း ထိုလူသည် မြောင်ကျင်းကျင်းကိုဖြတ်တိုက်လျှောက်ရန် ရွေးချယ်နေဆဲဖြစ်သည်။ သူမကို ကျော်ဖြတ်သွားသောအခါတွင် သူမကို တမင်တကာ ဝင်တိုက်သည်။

မြောင်ကျင်းကျင်းနှင့် အခြားသူများ မတုံ့ပြန်မီတွင် ထိုအမျိုးသားက သူမကို အရင် တိုက်ခိုက်ခဲ့သည်။ “မင်း လမ်းကို ဘာလို့ ကြည့်မလျှောက်တာလဲ။ မင်းက ငါ့လက်ထဲက စိမ့်ကလစ်ဗီးယားအိုးကို ခွဲပစ်လိုက်တယ်။ ငါ့ဆုံးရှုံးမှုအတွက် မင်းငါ့ကို ပေးလျော်ပေး"

"ရယ်ရတယ်! ရှင်ပဲလမ်းကို မကြည့်ပဲ လျှောက်တာလေ။ ကျွန်မဘေးကလမ်းက အရမ်းကျယ်တယ်၊ ဒါပေမယ့် ရှင်ကျွန်မဆီ လျှောက်လာတုန်းပဲ။ ကျွန်မကို လာတိုက်တဲ့သူက ရှင်ပဲ။ ကျွန်မတောင် ရှင့်ကို မဝေဖန်သေးဘူး! ရှင်ကျွန်မကို ဘာလို့အပြစ်တင်ရတာလဲ" မြောင်ကျင်းကျင်းသည် ယောင်ဆောင်ထားသော ထိခိုက်မှုတစ်ခုဖြစ်ကြောင်း မသိသော်လည်း သူမသည် ဤလူ၏ ၀င်တိုက်ခြင်းကို သိသာထင်ရှားစွာ ခံခဲ့ရသောကြောင့် ထိုယောက်ျား၏ စွပ်စွဲခြင်းကို ခံရသောအခါ သူမ စိတ်ဆိုးခဲ့သည်။

ထိုယောက်ျားက သူမကို အနိုင်ကျင့်ဖို့ လွယ်တယ်လို့ ထင်နေတာလား။ မဟုတ်ပါ။ သူမဟာ အနိုင်ကျင့်ဖို့ မလွယ်ကူသလို ပျော့လည်း မပျော့ညံ့ပေ။

လမ်းသွားလမ်းလာတွေအတွက်တော့ ဘယ်သူက ဘယ်သူ့ကို ဝင်တိုက်မိမှန်း မသိသလို ဟန်ဆောင်ထားတဲ့ ထိခိုက်မှုအတုတစ်ခုဆိုတာ မသိကြပေ။

သို့သော် အနီးနားရှိ ပန်းဆိုင်များ၏ ပိုင်ရှင်များနှင့် ဝန်ထမ်းများအတွက်မူ ယင်းသည် ယောင်ဆောင်ထားသော ထိခိုက်မှုတစ်ခုဖြစ်ကြောင်း သိသာထင်ရှားစွာ သိကြပါသည်။ တကယ်တော့ မကြာခဏဆိုသလို ဖြစ်နေကြဖြစ်၍ သူတို့ မအံ့သြပါ။

ဟန်ဆောင်ထားတဲ့ ထိခိုက်တစ်ခုလို့ သူတို့သိပေမယ့်လည်း အဲဒီလူက လူဆိုးဂိုဏ်းဝင်တွေ အများကြီးရှိလို့ ကူညီဖို့ ရည်ရွယ်ချက်မရှိကြပါ။ ဒီလူတွေကို စော်ကားမိပြီး ပြန်ကလဲ့စားချေခံရမှာကို ကြောက်ကြသည်။

မြောင်ကျင်းကျင်း၏ ငြင်းဆိုချက်အား ရင်ဆိုင်ရသောအခါ ထိုလူက ၎င်းကို သိပ်ဂရုမစိုက်ဘဲ ယုံကြည်စွာ ပြန်ပြောသေးသည်။ "ငါမမှားဘူး မင်းငါ့ကိုတိုက်ပြီး ယွမ်သုံးသောင်းတန်တဲ့ ငါ့လက်ထဲက စိမ့်ကလီဗီယာကို ခွဲလိုက်တာ သိသာနေတာပဲ။ ငါ့ဆုံးရှုံးမှုအတွက် မင်းပြန်ပေးရမယ်"

"သူက ရှင်ကို တိုက်သွားတာလို့ သူပြောပြီး ရှင်က သူတိုက်သွားတယ်လို့ ပြောတယ်။ ဘယ်သူ့ကိုယုံရမှန်းမသိဘူး။ ရဲခေါ်လိုက်ရင် ပိုကောင်းမယ်။ ရဲတွေကို စောင့်ကြည့်ကင်မရာတွေကို စုံစမ်းခိုင်းလိုက်ရင် ဘယ်သူက ဘယ်သူကို တိုက်မိခဲ့တာလဲဆိုတာ ချက်ချင်း သိနိုင်မှာပဲ” ကုနင်းက ဝင်ပြောလိုက်သည်။

ထိုလူသည် မြောင်ကျင်းကျင်းဆီသို့ ပြေးသွားသောအခါ ကုနင်း မြင်လိုက်သော်လည်း ရပ်တန့်ရန် အချိန်နှောင်းသွားခဲ့သည်။

မတော်တဆမှုတစ်ခုလို့ သူမ,ထင်ခဲ့ပေမဲ့ အဲဒီအမျိုးသားက စကားပြောတဲ့အခါမှာတော့ ဒါဟာ ဟန်ဆောင်ထားတဲ့ ထိခိုက်မှုတစ်ခုလို့ သူမ သိလိုက်သည်။

ကျင်းယွင်ယောင်လည်း သိသည်။ ထိုယောက်ျားက ဆိုးသွမ်းပုံရတဲ့အတွက် လောလောဆယ်တော့ သူမ ဘာမှ မပြောပေ။

ရဲခေါ်ချင်ကြောင်းကြားတော့ အဲဒီအမျိုးသားက ကြောက်ရွံ့မှုမပြဘဲ လှောင်ပြောင်ရယ်မောခဲ့သည်။ “မင်းရဲခေါ်ရင်တောင် ရလဒ်က အတူတူပဲ၊ ဒါကြောင့် မင်းငါ့ကို အခုချက်ချင်း ပိုက်ဆံပေးရင် ပိုကောင်းမယ်! စိမ့်ကလစ်ဗီယာအိုးက ယွမ်သုံးသောင်းတန်ဖိုးရှိတယ်။ ငါက ယုတ္တိမရှိတဲ့လူမဟုတ်ပါဘူး၊ ဒါကြောင့် မင်းငါ့ကို ယွမ်နှစ်သောင်းပေးရင်ရပြီ"

ရဲကိုခေါ်ရင်တောင် ရလဒ်က အတူတူပဲလား။ အဲဒီလူက ရဲတွေ သူ့ဘက်မှာ ရှိနေမယ်ဆိုတာ သိသာထင်ရှားတဲ့ ရည်ရွယ်ချက်နဲ့ ဖြစ်သည်။ ရဲတွေ ရောက်လာရင်တောင် သူတို့ ပိုက်ဆံတွေ ဆုံးရှုံးမှာပင်။

တခြားလူတွေက အဲဒါ ယောင်ဆောင်ထားတဲ့ ထိခိုက်မှုတစ်ခုလို့ အခုထိ မသိကြ‌သေးပေမဲ့ ဒီအချိန်မှာတော့ သူတို့ သဘောပေါက်လာကြသည်။

ဤအမျိုးသားသည် ဆုံးရှုံးခဲ့သူဖြစ်သည်ဟု ထင်ခဲ့သော်လည်း ၎င်းသည် ကျိုးကြောင်းဆီလျော်မှုမရှိသော လူတစ်ဦးမဟုတ်ကြောင်းနှင့် အလွန်ရှက်ဖွယ်ကောင်းစွာ ပြောနေသည်။ တကယ်တော့ သူသာ အရှက်ရှိရင် ဟန်ဆောင်ထားတဲ့ ထိခိုက်မှုကို သူလုပ်မှာ မဟုတ်ပေ။

သို့သော် ၎င်းသည် ယောင်ဆောင်ထားသော ထိခိုက်မှုဖြစ်ကြောင်း လူတိုင်းသိသော်လည်း ကုနင်းအတွက် မည်သူမျှ မငြင်းကြပေ။ သူသည် ရဲများနှင့် ဆက်ဆံရေးရှိသည်မှာ ထင်ရှားသည်။ ရလဒ်အနေဖြင့် ၎င်းတို့သည် သူမတို့ဘက်မှ ရပ်တည်ပါက ၎င်းတို့သည် အကူအညီမဖြစ်နိုင်သလို ဒုက္ခရောက်သွားနိုင်သည်။

“ရဲခေါ်ရင်တောင် ဒီလိုပဲဖြစ်မှာလား။ ဘယ်သူက ဘယ်သူ့ကို လာတိုက်တာဖြစ်ဖြစ် ငါတို့က မင်းကို ပိုက်ဆံပေးရမှာပဲလား” ကုနင်းက မေးသည်။

“ဟုတ်တယ်” ထိုလူက မောက်မာစွာပြောသည်။ အရင်က ဒီလိုမျိုး အကြိမ်ကြိမ်လုပ်ခဲ့ပြီး တစ်ခါမှ မအောင်မြင်ခဲ့ဖူးပါ။

"ရဲက ရှင့်ကို လူတွေကို လိမ်လည်လှည့်ဖြားဖို့ ကူညီပေးတာ သိသာနေတာဘဲ!" ကုနင်းသည် အားကိုးရာမဲ့ဖြစ်ကာ သက်ပြင်းချလိုက်သည်။ နေရာတိုင်းမှာ လူဆိုးတွေရှိမှန်း သူမသိပေမယ့် သူတို့နဲ့တွေ့တဲ့အခါ စိတ်ပျက်နေတုန်းပါပဲ။

"မဟုတ်တရုတ်‌တွေ! ရဲတွေက ငါ့ကို ကူညီတာမဟုတ်ဘူး။ ငါ့ကို အပြစ်မတင်နဲ့။ ငါ မင်းကို လှည့်စားခဲ့တာမဟုတ်ဘူး။ သူ့ကြောင့် ပြုတ်ကျသွားတာသိသာနေတာပဲ” ကုနင်းရဲ့စကားကိုကြားတော့ ထိုလူက ဒေါသတကြီးအော်လိုက်သည်။ ကုနင်းပြောတာ မှန်ပေမယ့် လူသိရှင်ကြားဖြစ်သွားရင် ဒုက္ခ‌ရောက်လိမ့်မည်။

“ဒီမှာ ဘယ်သူမှ ငတုံး မဟုတ်ဘူး၊ ငါတို့အားလုံး ဖြစ်ပျက်ခဲ့တာကို အတိအကျ သိတယ်။ ငါတို့ကို အနိုင်ကျင့်ဖို့ လွယ်တယ်လို့ ထင်‌မ‌နေနဲ့!” ကုနင်းသည် ထိုလူကို လှောင်ပြောင်စွာ စိုက်ကြည့်ကာ ဖိအားများကို လွှတ်လိုက်သည်။

“…” ထိုလူသည် အံ့အားသင့်စွာ စိတ်ဖိစီးလာသောကြောင့် ကုနင်းကို အနည်းငယ် ကြောက်လာသည်။ သူမမှာလည်း အဆက်အသွယ်ရှိ‌နေမှာကို ကြောက်မိသည်။ အကယ်၍ သူသည် ၎င်းတို့အား ဆက်၍ လိမ်လည်ပြောဆိုပါက သူကသာ အဖမ်းခံရသူဖြစ်နိုင်သည်။ သို့သော်လည်း ကုနင်းက သူ့ကို ခြောက်ဖို့ အစွမ်းထက်ဟန်ဆောင်နေတာလည်း ဖြစ်နိုင်သည်ဟု သူခံစားမိသည်။

အဲဒါကို တွေးကြည့်တော့ လူက ကြောက်စရာ ဘာမှမရှိဘူးလို့ ယုံလိုက်မိတာ စိတ်တိုလာပြီး အသံပြန်ထွက်လာသည်။ "ငါ့ကို ‌မခြောက်နဲ့! ငါ့ကို ယွမ်နှစ်သောင်း ပေးရင်ပေး မဟုတ်ရင် မင်းထွက်သွားလို့မရဘူး"

ကုနင်းက မြေကြီးကျကွဲသွားတဲ့ စိမ့်ကလိဗီယာပင်အိုးကို ကြည့်ပြီး "ဒီ စိမ့်ကလိဗီယာအိုးရဲ့ အမြစ်တွေ ပုပ်နေပြီး အသက်မရှည်ဘူး၊ ဒါကြောင့် သိပ်တန်ဖိုးမရှိပါဘူး။ ရှင်က ကျွန်မတို့ကို ယွမ်နှစ်သောင်းတောင်းတာ ရှင်က လူလိမ်ပဲ”

***

ဖီးနစ်သွေးစက်

အခန်း ၂၁၆၈ ယွမ်တစ်ထောင်က အရမ်းနည်းတယ်

“မင်း…” ထိုလူသည် လန့်ဖျပ်သွားပြီး စိမ့်ကလိဗီယာပင်၏အမြစ်များ ပုပ်နေပြီကို ကုနင်းသိ‌နေမည်ဟု မမျှော်လင့်ခဲ့ပေ။

ဤစိမ့်ကလိဗီယာ၏ အမြစ်များ ပုပ်နေပြီဖြစ်သည်ကို လူတိုင်းသိပြီးနောက် သူတို့အားလုံး စိတ်တိုသွားကြသည်။ ထိုအပင်ကကောင်းရင် ယွမ်သုံးသောင်းတန်သည်။

အများစုမှာ သာမန်လူများ ဖြစ်သောကြောင့် ယွမ်သုံးသောင်းသည် ၎င်းတို့အတွက် ငွေအမြောက်အများဖြစ်သည်။

“အင်း ကျွန်မရှင့်ကို ယွမ်တစ်ထောင် ပေးလို့ရတယ်။ ရောင်းချင်ရင်တော့ ယူမယ်။ မရောင်းရင် မေ့လိုက်ပါ၊ ဒါပေမယ့် ဆုံးရှုံးမှုအတွက် ပိုက်ဆံပြန်‌လျော်စေချင်ရင်တော့ မဖြစ်နိုင်ပါဘူး” ဟု ကုနင်းကဆိုသည်။ သူမက ကြင်နာလို့ မဟုတ်ဘဲ ဒီကလိဗီယာပင်ကို ကယ်တင်နိုင်၍ သူမ‌ပေးလိုက်တာထက် အများကြီး ပိုရလိမ့်မည်။

စိမ့်ကလိဗီယာသည်စျေးမ‌ပေါပါ။ အကယ်၍ ဤစိမ့်မြေ၏ အမြစ်များ မပုပ်ပါက ယွမ်သုံးသောင်းခန့် တန်ကြေးရှိသည်။ သို့သော် ဤစိမ့်ကလိဗီယာသည် သူမလက်ထဲသို့ရောက်လာပြီးနောက် သူမသည် ၎င်းကိုကုသရန်အတွက် မှော်အစွမ်းကိုအသုံးပြုကာ အမျိုးမျိုးကိုပိုမိုကောင်းမွန်အောင်ပြုလုပ်နိုင်သည်။ ထို့ကြောင့် ၎င်း၏စျေးနှုန်းသည် ယွမ်သုံးသောင်းကျော်ရှိပြီး ယွမ်ငါးသောင်းသည် ကနဦးဈေးဖြစ်သည်။

"ဘာ? ယွမ်တစ်ထောင်ဟုတ်တယ်? အရမ်းနည်းတယ်။ ဘယ်လိုမှမဖြစ်နိုင်တာ!" ထိုလူက ကုနင်း၏ အဖြေကို ကြားလိုက်သည်နှင့် ဒေါသထွက်သွားသည်။

ဒီ စိမ့်ကလစ်ဗီယာအိုးက တကယ့်ကို ပုပ်ပွနေပြီး အသက်မရှင်နိုင်တော့‌ပေ။ အများကြီးမတန်ပေမယ့် ယွမ်တစ်ထောင်က အရမ်းနည်းသည်။ အမြစ်တွေသာ မပုပ်ဘူးဆိုရင် ယွမ်သုံးသောင်း တန်ကြေးရှိသည်။

သို့ရာတွင် ဤစိမ့်ကလိဗီယာ၏အမြစ်များသည် ပုပ်သွားသောကြောင့် တန်ဖိုးမရှိတော့တာ အတိအကျပင်။ မဟုတ်ရင် ဟန်ဆောင်တဲ့ ထိခိုက်မှုကို သူလုပ်မှာ မဟုတ်ပါ။ စျေးကွက်မှာ တိုက်ရိုက်ရောင်းလျှင် ပိုမြန်မြန်ရောင်းရလိမ့်မည်။

"နည်းလွန်းတာလား? ကောင်းပြီ အဲဒါဆို ကျွန်မမလိုချင်‌တော့ဘူး။ ဘာပဲဖြစ်ဖြစ် ရှင်နဲ့ကျွန်မ ဒီကိစ္စဖြစ်ရတဲ့ အကြောင်းရင်းကို သိတယ်။ ကျွန်မတို့ရဲ့ ခေါင်းပေါ်မှာ စောင့်ကြည့်ကင်မရာ‌တွေရှိတယ်။ ဒီနယ်မြေမှာရှိတဲ့ ရဲစခန်းတွနေဲ့ ရှင်ဆက်ဆံရေးရှိရင်တောင် ပြည်သူ့လုံခြုံရေးဗျူရိုကို တိုက်ရိုက်သွားလို့ရတယ်။ ဒါကြောင့် ရှင် ကျွန်မတို့ကို ဆက်ပြီးဒုက္ခပေးရင် ဘယ်သူအနိုင်ရမလဲဆိုတာကို ကြည့်ဖို့ ရှင်နဲ့အတူ ကျွန်မအဆုံးအထိ ရှိနေမှာပါ” ကုနင်းက ယုံကြည်မှုအပြည့်နဲ့ သရုပ်ဆောင်ပုံမပေါ်ပဲ အမှန်အတိုင်းပြောနေသလိုပင်။

“မင်း…” ထိုလူက စိတ်ဆိုးသွားသော်လည်း ကုနင်း၏ ယုံကြည်မှုကြောင့် သူ ရှက်ရွံ့သွားသည်။ ဤမြို့သည် မြို့တော်ကြီးဖြစ်ပြီး ဤမြို့၌ မရေမတွက်နိုင်သော အာဏာရှင်များ ရှိခဲ့သည်။ ဂရုမစိုက်မိရင် သူနဲ့မလိုက်ဖက်တဲ့သူကို စော်ကားမိနိုင်သည်။

ယွမ်တစ်ထောင်သည် အလွန်နည်းသော်လည်း မရောင်းပါက ဒုက္ခရောက်လိမ့်မည်။ အဲ့လိုဆိုလျှင် ယွမ်တစ်ထောင်တောင် မပြောနဲ့ တစ်ယွမ်တောင် မရနိုင်ပေ။

“ယွမ်တစ်ထောင်က အရမ်းနည်းတယ်။ ပိုလိုတယ်။" ထိုလူသည် စွန့်လွှတ်ရန် ဝန်လေးသောကြောင့် ကုနင်းနှင့် ညှိနှိုင်းခဲ့သည်။ သို့သော် ကျယ်ကျယ်လောင်လောင်ပြောပြီးသည်နှင့် အလျှော့ပေးလိုက်သည်ဟု ဆိုလိုသည်။

“ရှင်ထပ်ပြောရင် ယွမ်တစ်ထောင်တောင်မှ ပေးတော့မှာမဟုတ်ဘူး” ဟု ကုနင်းက ဆိုသည်။

“အင်း…” ထိုလူက တုံ့ဆိုင်းသွားသည်။ သူက ကုနင်းကို ယွမ်တစ်ထောင်နဲ့ မရောင်းချင်ပေမယ့် မရောင်းရင် ဘယ်သူမှ ပိုက်ဆံပေးမည်မဟုတ်ပေ။

သူက တင်းတင်းမာမာလုပ်ပြီး ကုနင်းကို ယွမ်နှစ်သောင်းပေးခိုင်းပေမယ့် သူ သူမနဲ့မယှဉ်နိုင်မှာကြောက်နေမိသည်။ မကောင်းတာတွေ လုပ်လေ့ရှိပေမယ့် ဘာမှမကြောက်ဘူးလို့ မဆိုလိုပါ။

“ကောင်းပြီ ရတယ်၊ ယွမ်တစ်ထောင်ပဲပေးပါ” နောက်ဆုံးတော့ အဲဒီလူက အလျှော့ပေးလိုက်သည်။ ကုနင်းက သေလုမြောပါးဖြစ်နေတဲ့ စိမ့်ကလိဗီယာကို ဝယ်ဖို့ ဘာကြောင့် ယွမ်တစ်ထောင် သုံးစွဲခဲ့သလဲဆိုတာကိုတော့ အဲဒီလူက လုံးဝ မစဉ်းစားနိုင်ခဲ့ပါ။

ကုနင်းက ယွမ်တစ်ထောင်ကို ထုတ်ပြီး အဲဒီလူကို ပေးပြီးနောက် အဲဒီလူက ထွက်သွားသည်။

ထိုယောကျာ်းက ဘယ်အချိန်မှာ လက်လျော့ရမယ်ဆိုတာ သိနေတာကြောင့် ကုနင်းက ဒီတစ်ကြိမ်တော့ အမြန်သဘောတူလိုက်သည်။ သူနဲ့ စကားငြင်းခုံတာကို မရပ်ဘူးဆိုရင် လက်နဲ့ သင်ခန်းစာပေးရလိမ့်မည်။

အဲဒီနောက် ကုနင်းက သူတို့ဘေးက ဆိုင်မှာ ပန်းအိုးဝယ်ပြီး စိမ့်ကလိဗီယာကို ပြန်စိုက်သည်။

လူရှေ့သူရှေ့တွင် ကုနင်းသည် မှော်အစွမ်းကို စိမ့်ကလိဗီယာထဲသို့ ချက်ချင်းမထည့်နိုင်သော်လည်း မကြာမီ သေမည်မဟုတ်ပေ။

ပြီးသွားတော့ ကုနင်းနဲ့ တခြားသူတွေက ထွက်သွားပြီး ငှားဖို့ စတိုးဆိုင်ကို ပြန်သွားကြသည်။

ငါးမိနစ်လောက်ကြာတော့ ပိုင်ရှင်ရောက်လာတယ်။

ပိုင်ရှင်ရောက်လာပြီးနောက် ကျင်းယွင်ယောင်က လုပ်ငန်းအကြောင်းပြောသည်။ ကျင်းယွင်ယောင် သည် ယခင်က စီးပွားရေးလုပ်ငန်းတစ်ခု လုပ်ဆောင်ခဲ့ဖူးသောကြောင့် သဘောတူညီချက်ကို မည်သို့လုပ်ဆောင်ရမည်ကို သူမသိသည်။

ပိုင်ရှင်သည် ဖြောင့်မှန်သောလူဖြစ်ပြီး အိမ်ငှားခသည် အလွန်မျှတသော်လည်း ပိုင်ရှင်က ကျင်းယွင်ယောင်နှင့် အခြားသူများအား သူ့သားသည် လောင်းကစားသမားဖြစ်ပြီး ပိုက်ဆံများစွာဆုံးရှုံးခဲ့ကြောင်း ရိုးရိုးသားသားပြောခဲ့သည်။ ထို့ကြောင့် သူ့သားသည် ဤဆိုင်ကို အမြဲခိုးချင်နေပြီး နောက်ကျရင် ပြဿနာရှာလာနိုင်သည်။

ယခင်ငှားရမ်းသူကသူက သူ့သား ပြဿနာကြောင့် ငှားရမ်းခြင်းကို အဆုံးသတ်လိုလာနိုင်တဲ့အတွက် ပိုင်ရှင်က သေချာစဉ်းစားဖို့ ပြောခဲ့သည်။

သို့သော်လည်း ကျင်းယွင်ယောင်နှင့် မြောင်ကျင်းကျင်း နှစ်ဦးစလုံးသည် ထိုကိစ္စကို စိတ်မပူခဲ့ကြပေ။

ကျင်းယွင်ယောင်သည် ဆိုင်တွင် မကြာခဏ ရောက်ဖြစ်နိုင်ပြီး မြောင်ကျင်းကျင်းသည် ကျင့်ကြံသူအဖြစ် အရည်အချင်းများ ဆုံးရှုံးသွားသော်လည်း သူမသည် ကိုယ်ခံပညာ အလွန်ကောင်းသေးသောကြောင့် သူမ မကြောက်ပေ။

သို့သော် ကျင်းယွင်ယောင်က ပိုင်ရှင်၏သားက သူတို့ကို အမှန်တကယ် ဒုက္ခပေးလျှင် သူ့သားကို ရိုက်မည်ဟု ရှင်းရှင်းလင်းလင်း ပြောထားသည်။ သူတို့က ပိုင်ရှင်ကို တာဝန်ခံမှာလားဟု မေးသည်။ ဘယ်လိုပဲဖြစ်ဖြစ် သူတို့ဟာ အင်အားအပြင်းအထန်အသုံးပြုမှာ မဟုတ်ပါ။

အဲဒါကိုကြားတော့ ပိုင်ရှင်က သက်ပြင်းချပြီး သူတို့ကို အပြစ်မတင်ဘူးလို့ ပြောခဲ့ပေမယ့် သားဖြစ်သူကိုတော့ သူ မတားနိုင်ပါ။

သို့ဆိုလျှင် ကျင်းယွင်ယောင်နှင့် မြောင်ကျင်းကျင်းတို့မှာ ဘာမှစိုးရိမ်စရာမရှိသောကြောင့် စာချုပ်ကို တိုက်ရိုက်ချုပ်ဆိုခဲ့ကြသည်။

ငါးနှစ်စာချုပ်ချုပ်ဆိုပြီးနောက် အိမ်ငှားခသည် ငါးနှစ်တာကာလအတွင်း ပြောင်းလဲမည်မဟုတ်ပါ။ အဲဒီကာလမှာ လုပ်ငန်းပိတ်ရင် ခွဲဝေပေးလို့ရသည်။ အဲဒါတွေအားလုံးက သူတို့အပေါ်မှာ မူတည်သည်။

ဆိုင်က ရှုပ်နေ၍ အရင်ရှင်းဖို့ လိုသည်။

ပန်းဆိုင်အတွက် သိပ်အများကြီး အလှဆင်စရာ မလို‌ပေ။ နံရံကို အဖြူရောင်ဆေးခြယ်ကာ ကောင်တာတစ်ခုပြုလုပ်ပြီးနောက် ရိုးရိုးရှင်းရှင်း အလှဆင်ရန်သာ လိုအပ်သည်။

ဤအရာများကို ရက်အနည်းငယ်အတွင်း လုပ်ဆောင်နိုင်သောကြောင့် ၎င်းတို့သည် အပင်ရောင်းချသူအား ရှာဖွေသင့်သည်။

ကျင်းယွင်ယောင် နဲ့ မြောင်ကျင်းကျင်း တို့က အလှဆင်ဖို့ တာဝန်ယူကြပေမယ့် အခုချက်ချင်း အလျင်စလို မဖြစ်သေးတဲ့အတွက် ထမင်းစားဖို့ စစ်ဟယ်ယွမ်ကို အရင်ပြန်သွားကာ နေ့ခင်းဘက် နံရံဆေးသုတ်ဖို့ အလုပ်သမားတွေကို ငှားလိုက်သည်။

ထမင်းစားပြီးတော့ ကုနင်းကကျောင်းကိုပြန်သွားသည်။ ကုနင်းက K ကို ရွက်ကျပင်များကို ရှာခိုင်းသည်။ K သည် အချက်အလက်ရှာဖွေရာတွင် အလွန်‌တော်သည်။

မကြာခင်မှာပဲ K က ရလဒ်တစ်ခုရခဲ့သည်။ သို့သော် ဆိုင်ကိုအလှဆင်ရန် ရက်အတော်ကြာကြာ ဖြစ်သောကြောင့် ကုနင်းသည် ကုန်ပစ္စည်းကို ဝယ်ယူရန် အလျင်စလိုမလုပ်ပေ။ မကြာခင် ပိတ်ရက်ဆိုတော့ ပိတ်ရက်ပြီးတဲ့အထိ စောင့်ရဦးမည်။

ပိုင်လီကျုံးရွှယ်က ကုနင်း ကျောင်းပြန်ရောက်လာတာကို သိတဲ့အခါ သူမနဲ့ သီးသန့်စကားပြောခဲ့သည်။ ကုနင်းက ဘာကြောင့် ကျောင်းကထွက်ရလဲဆိုတာကို သူမ,သိတာကြောင့် သူမကို အခြေအနေအကြောင်းမေးခဲ့သည်။

ကုနင်း: ပြီးသွားပြီ။ တစ္ဆေအမျိုးသမီးက ကလဲ့စားချေတာကို အောင်မြင်သွားတယ်။ သူ့ရဲ့ ဝိညာဉ်က ပျောက်ကွယ်သွားပြီး လူဝင်စားနိုင်လိမ့်မယ်

ပိုင်လီကျုံးရွှယ် : ဒီလိုသိရလို့ ဝမ်းသာလိုက်တာ

ပိုင်လီကျုံးရွှယ်က ကုနင်းကို ကျောက်ရှောင်ရှီကို လူသတ်ဖို့ ကူညီတာ မှားတယ်လို့ မထင်ခဲ့‌ပေ။ အဲဒီလူက သေဖို့ ထိုက်တန်တာကြောင့်ပါ။ ထို့အပြင် ကုနင်းသည် သူ့လက်ဖြင့် မသတ်ခဲ့ပေ။ ထိုလူသည် သူကျူးလွန်ခဲ့သော ကြောက်မက်ဖွယ်ကောင်း‌ေသာ လုပ်ရပ်ကြောင့် သေဆုံးသွားရသည်။

စုန့်မြောင်ကောနှင့် ကျန်းကျီခိုင်တို့သည် စုန့်ယန် ကွယ်လွန်သည့်သတင်းကို ဖတ်ကြားခဲ့ကြသောကြောင့် နေ့လည်ကျောင်းဆင်းပြီးနောက် ညနေစာစားသောအခါတွင် စုန့်မြောင်ကောနှင့် ကျန်းကျီခိုင်တို့က ထိုအကြောင်းကို ဆွေးနွေးခဲ့ကြသည်။

စုန့်မြောင်ကော : "စုန့်ယန်က ဒီလိုလူသတ်မှု ဖြစ်‌အောင်ဘာလုပ်ခဲ့တာလဲ။ ဒါမှမဟုတ် ဒါဟာ ကြေကွဲစရာ မတော်တဆသက်သက်ပဲလား” သူမခံစားမိသလောက်တော့ စုန့်ယန်ဟာ တစ်ယောက်ယောက်ကို စော်ကားမိသွားခဲ့တယ်လို့ ထင်မိခဲ့သည်။

ကျန်းကျီခိုင် : “သူ တစ်ယောက်‌ယောက်ကို စော်ကားခဲ့တာလို့ ငါတော့ထင်တယ်။ ရဲတွေက လူသတ်သမားရဲ့ ခြေရာတွေကိုတောင် ရှာမတွေ့ခဲ့တာမို့ ဒါကို သေချာစီစဉ်ထားတာ ထင်ရှားတယ်။ မတော်တဆသာဆိုရင် သက်သနေဲ့ သဲလွန်စတွေ ကျန်ထားနိုင်ခြေက အရမ်းမြင့်တယ်”

***

ဖီးနစ်သွေးစက်

အခန်း ၂၁၆၉ လူသတ်သမားက သရဲလား

“တကယ်ကို ထူးဆန်းတယ်။ ပတ်ဝန်းကျင်မှာ စောင့်ကြည့်ကင်မရာတွေရှိပေမယ့် လူသတ်သမားက ကင်မရာတွေကို ရှောင်ပြီး သတ်ပစ်နိုင်တယ်။ ဒါမလွယ်ဘူး!" စုန့်မြောင်ကောက သက်ပြင်းချလိုက်ပြီး တစ်ချိန်တည်းမှာပင် ကြောက်လန့်သွားခဲ့သည်။ လူသတ်သမားသည် အစွမ်းထက်လွန်းပြီး စုန့်ယန်ကို မည်သူမျှ မသိရှိ‌စေဘဲ သတ်ပစ်လိုက်သည်။

"ဟေ့ လူသတ်သမားက သရဲဖြစ်နိုင်လား" ကျန်းကျီခိုင် ရုတ်တရက်ပြောလိုက်သည်။

"ဘာ?"

အဲဒါကိုကြားတော့ ပိုင်လီကျုံးရွှယ်နဲ့ စုန့်မြောင်ကော အံ့ဩသွားသည်။ ပိုင်လီကျုံးရွှယ်သည် သရဲတစ္ဆေဖြစ်ကြောင်း သိပြီးဖြစ်ကာ ကျန်းကျီခိုင်က အမှန်တရားကို မှန်းဆနိုင်ခဲ့‌သောကြောင့် အံ့ဩသွားခြင်းဖြစ်သည်။

ကုနင်းလည်း အနည်းငယ် အံ့ဩသွားသော်လည်း ကျန်းကျီခိုင်က ဒီတိုင်းပေါ့ပေါ့ပါးပါး ပြောလိုက်သည်ကို သူမ သိလိုက်သည်။

သို့သော် စုန့်မြောင်ကောသည် ကျန်းကျီခိုင်က ထိုသို့တွေးတတ်ဖို့ရန် စိတ်ကူးယဉ်နိုင်စွမ်းကောင်းသည်ဟု ခံစားမိလိုက်သည်။

"ကျန်းကျီခိုင် ဒီကမ္ဘာမှာ သရဲတစ္ဆေရှိတယ်ဆိုတာ မင်းယုံလား" စုန့်မြောင်ကောက မသိမသာ လှောင်ပြောင်လိုက်သည်။ ဒီကမ္ဘာမှာ သရဲတစ္ဆေတွေရှိတယ်ဆိုတာ သူမ မယုံပေ။

"ငါ‌ပြောရုံပဲပြောတာပါ!" သူမ တကယ် မယုံသလို ဒီတိုင်း ပြောလိုက်ရုံပါပဲ။ တိုက်ဆိုင်စွာပင် အမှန်တရားဖြစ်ခဲ့သည်။ သို့သော် ပိုင်လီကျုံးရွှယ်နှင့် ကုနင်းက ၎င်းတို့အား မပြောပါ။

ထမင်းစားပြီးတာနဲ့ ဘောလုံးကွင်းမှာ လမ်းလျှောက်ထွက်ကြသည်။

“ကျီဝမ်းနာကို အနိုင်ယူပြီးထဲက ငါကိုယ်ခံပညာ မလေ့ကျင့်တာ ကြာပြီ။ ကျုံးရွှယ် ငါနဲ့ လေ့ကျင့်ပေးပါဦး" စုန့်မြောင်ကောသည် ရုတ်တရက် လေ့ကျင့်ဖို့ စိတ်၀င်စားလာသည်။

စုန့်မြောင်ကောက ကုနင်းအစား ပိုင်လီကျုံးရွှယ်နဲ့ လေ့ကျင့်ဖို့ ခေါ်ရတဲ့ အကြောင်းအရင်းကတော့ ကုနင်းက ပိုင်လီကျုံးရွှယ်ထက် ပိုသန်မာတာကြောင့်ပါ။

ပိုင်လီကျုံးရွှယ်သည် မှော်စွမ်းအားကို မသုံးလျှင် သူမသည် စုန့်မြောင်ကောထက် များစွာသာလွန်ခြင်းမရှိပါ။ ထို့ကြောင့် ပိုင်လီကျုံးရွှယ်က ပို၍သင့်လျော်သည်။ စုန့်မြောင်ကောက သူမကို အနိုင်မယူနိုင်သေးပေမယ့် အချိန်တိုအတွင်းနဲ့ သူမကို ရှုံးမှာ မဟုတ်ပါ။

"ဟုတ်ပြီ ငါလည်းမလေ့ကျင့်တာကြာပြီ!" ပိုင်လီကျုံးရွှယ်က သိက္ခာရှိရှိ သဘောတူလိုက်သည်။ တက္ကသိုလ်တက်ပြီးနောက် ကွန်ဖူးမလေ့ကျင့်တာ ကြာပြီမို့ သူမလည်း စိတ်ဝင်စားလာသည်။

အဲဒီနောက်မှာတော့ အချင်းချင်း တိုက်ခိုက်ကြသည်။

၎င်းတို့၏ ကွန်ဖူးပြိုင်ပွဲသည် ကြည့်ရှုသူအများအပြားကို ဆွဲဆောင်ခဲ့သည်။

ကုနင်းကို မှတ်မိသွားသောအခါ ပိုလို့ပင် စိတ်လှုပ်ရှားလာကြသည်။

ကုနင်းဟာ ကျောင်းမှာ အရမ်းနာမည်ကြီးလို့ သူမရဲ့သူငယ်ချင်းတွေကိုတောင် လူအများသိကြပြီး ပိုင်လီကျုံးရွှယ်နဲ့ စုန့်မြောင်ကောတို့ဟာ ကိုယ်ခံပညာမှာ ထူးချွန်သူတွေဆိုတာလည်း သိကြသည်။

သူတို့သည် လှပရုံသာမက ကိုယ်ခံပညာတွင်လည်း ထူးချွန်ကြပြီး ယောက်ျားလေးများ မျက်စိကျသည့် မိန်းကလေးများအဖြစ် မက်မောတက်မက်စေခဲ့သည်။ ရလဒ်အနေနဲ့ သူတို့ကို သဘောကျတဲ့သူတွေ အများကြီးရှိသည်။

ကံမကောင်းစွာပဲ သူတို့ကိုသဘောကျသူ မည်သူမျှ ၎င်းတို့၏ စိတ်ဝင်စားမှုကို မဆွဲဆောင်နိုင်ပါ။ ပိုင်လီကျုံးရွှယ်ဟာ လူသားကောင်လေးထားမှာ မဟုတ်သလို စုန့်မြောင်ကောလည်း ကျောင်းနေဖက်နဲ့ ချိန်းတွေ့မှာ မဟုတ်ပေ။

ကျန်းကျီခိုင်ကို သဘောကျသူများသည် ပိုင်လီကျုံးရွှယ်နှင့် စုန့်မြောင်ကောတို့ကဲ့သို့ ထူးထူးခြားခြားမဟုတ်သော်လည်း သဘောကျသူ အများအပြားရှိပါသည်။ ကျန်းကျီခိုင်အပေါ် သဘောကျသော ယောက်ျားလေး ကျောင်းနေဖက်များ ရှိသော်လည်း အထူးသဖြင့် သူမ၏ ပထမစာသင်နှစ်တွင် အချစ်ရေးအပေါ် လွယ်လွယ်ကူကူမြုပ်နှံမည်မဟုတ်ပေ။

ပိုင်လီကျုံးရွှယ်နှင့် စုန့်မြောင်ကော နှစ်ဦးစလုံးတွင် ၎င်းတို့ကို အားပေးထောက်ခံသူများ ရှိသည်။ အဆုံးတွင် စုန့်မြောင်ကော ရှုံးနိမ့်ခဲ့သော်လည်း ပိုင်လီကျုံးရွှယ်သည် ကြည့်ရှုသူအများအပြားရှိ‌နေသောကြောင့် သူမအား ဆိုးရွားစွာမရှုံးစေခဲ့ပေ။

စုန့်မြောင်ကော ရှုံးပေမယ့် သူ့ကို အားပေးတဲ့သူတွေကတော့ စိတ်ပျက်မသွားပါ။

…

မျက်စိတစ်မှိတ်အတွင်းမှာပဲ သောကြာနေ့‌ရောက်သွားသည်။

စုန့်မြောင်ကောက သူတို့အတူတူ မထွက်လည်ဖြစ်တာ ကြာပြီဖြစ်၍ အချိန်ရကြလားဟု မေးခဲ့သည်။

ချူးဖေ့ဟန်သည်လည်း သူမတို့၏ WeChat အဖွဲ့ထဲတွင် ရှိနေပြီး သူမကိုလည်း အချိန်ရှိလားဟု မေးကာ ၎င်းတို့ လျှောက်လည်ကြမည်ဖြစ်သည်။

ဟောင်ရန် နှင့် အခြားသူများမှာ အထွန့်တက်မှုများစွာရှိခဲ့သည်။ စာ‌လေ့လာဖို့ မြို့တော်ကို မလာဖြစ်တာကို အားလုံးက နောင်တရနေကြသည်။ ကုနင်းနဲ့ တခြားသူတွေ မကြာခဏ ဆုံဖြစ်ကြတာကို တွေ့လိုက်ရတော့ သူတို့လည်း ကုနင်းနဲ့ တခြားသူတွေကို မတွေ့တာကြာပြီမို့ မပျော်မရွှင်ဖြစ်သွားသည်။

ဘာပဲပြောပြော သူတို့‌ရွေးချယ်ခဲ့တဲ့ တက္ကသိုလ်တွေဖြစ်၍ အခု မပျော်ရင်တောင် သူတို့နဲ့ ဆက်လက်တက်ရောက်ရမည်။

ကုနင်းသည် ယနေ့မွန်းလွဲပိုင်းနှင့် ညနေပိုင်းတွင် အချိန်အားလပ်သောကြောင့် ချူးဖေ့ဟန်နှင့် အခြားသူများကို တွေ့ဆုံရန် သဘောတူခဲ့သည်။

ဒါပေမယ့် စုန့်မြောင်ကောက သူမကို အကြိမ်ကြိမ် တောင်းဆိုခဲ့ပြီး အကြိမ်တိုင်း သူမကို ငြင်းပယ်ခဲ့သည်။ စုန့်မြောင်ကောကို ဆက်ပြီး လှည့်စားတာက မကောင်းဘူးလို့ သူမခံစားရတဲ့အတွက် ကုနင်းက စုန့်မြောင်ကောနဲ့ တခြားသူငယ်ချင်းတွေကို သူမနဲ့အတူ ခေါ်ဆောင်လာလို့ရမလားလို့ ချူးဖေ့ဟန်ကို မေးခဲ့သည်။ ချူးဖေ့ဟန်သာ စိတ်ထဲမထားလျှင် သူတို့ အတူတူ လျောက်လည်လိမ့်မည်။

ချူးဖေ့ဟန် က လုံးဝစိတ်ထဲမထားဘဲ သူမ၏ ရင်းနှီးသော သူငယ်ချင်းများထဲမှ တစ်ဦးကိုလည်း သူမနှင့်အတူ ခေါ်ဆောင်လာခဲ့သည်။ ထို့အပြင် သူတို့သည် ယခင်က စုန့်မြောင်ကောနှင့် အခြားသူများနှင့် တွေ့ဆုံခဲ့ဖူးသည်။ သူတို့ သိပ်မရင်းနှီးပေမယ့် သူစိမ်းတွေတော့ မဟုတ်ပါ။

အရေးအကြီးဆုံးကတော့ ကုနင်းရဲ့သူငယ်ချင်းတွေဟာ သူတို့ရဲ့သူငယ်ချင်းတွေပါပဲ။ ကုနင်း၏သူငယ်ချင်းများသည် ယုံကြည်စိတ်ချရသည်ဟု ခိုင်ခိုင်မာမာယုံကြည်သောကြောင့် ၎င်းတို့သည် ကောင်းမွန်စွာ ပေါင်းသင်းနိုင်ကြမည်။

ထို့နောက် ကုနင်းသည် စုန့်မြောင်ကောနှင့် သူမ၏ အခြားသူငယ်ချင်းများ၏ ထင်မြင်ယူဆချက်များကို တောင်းဆိုခဲ့ပြီး အားလုံးက သဘောတူခဲ့ကြသည်။ လူများများစုဝေးနိုင်လျှင် ပိုပျော်စရာ‌ကောင်းမည်ဟု သူတို့ထင်ကြသည်။ ထို့ကြောင့် အတန်းပြီးသည်နှင့် အတူတူ ထွက်ခဲ့ကြသည်။

အခုလိုအေးတဲ့ရာသီဥတုမှာ လူတိုင်းက ဟော့ပေါ့စားချင်ကြတာမို့ ချက်ဖို့ဆုံးဖြတ်လိုက်ကြသည်။

ထမင်းစားပြီးတာနဲ့ KTV မှာ သီချင်းသွားဆိုကြမည်။

သူတို့၏ကျောင်းများအားလုံးသည် ဟိုင်ချန်းခရိုင်တွင်ရှိသောကြောင့် ဟိုင်ချန်းခရိုင်ရှိ KTV တွင် စားသောက်ပြီး ပျော်ပါးကြမည်။

ချူးဖေ့ဟန် အရင်ရောက်လာသည်။ သူမသည် ရှီရှောင်ယွဲ့နှင့်အတူလာခဲ့သည်။ မုခယ်နဲ့ ယွီမီရှီက နောက်မှ ရောက်လာသည်။ အဆုံးတွင် ကုနင်းသည် ပိုင်လီကျုံးရွှယ်နှင့် အခြားသူများကို ခေါ်ဆောင်လာသည်။ သူတို့ နောက်ကျတာမဟုတ်ပါ။

တွေ့ဆုံပြီးနောက် မိတ်ဆက်စကားများဖလှယ်ကြသည်။

"ဟေ့ မင်းအကိုကြီးရော ဘယ်မှာလဲ" ချူးဖေ့ဟန်က ပိုင်လီကျုံးရွှယ်ကို မေးသည်။

ချူးဖေ့ဟန်သည် ပိုင်လီကျုံးယန်အကြောင်း ပိုင်လီကျုံးရွှယ်ကိုမေးသောအခါ သူမသည် သူမ၏ နဂိုပုံစံနဲ့မတူပဲ လုံး၀ အချစ်မှာ ပျော်၀င်နေသည့်ပုံပေါက်နေသည်။ ထိုအရာက ရှီရှောင်ယွဲ့ကို အံ့အားသင့်စေကာ သူမအား နိုးကြားလာစေသည်။

ချူးဖေ့ဟန်က ပိုင်လီကျုံးရွှယ်ရဲ့အစ်ကိုကြီးကိုသဘောကျ‌နေတာလား။

ပိုင်လီကျုံးရွှယ်က အရမ်းလှတာမို့ သူ့အကိုကြီးလည်း ချောမောရမည်။ ဒီလိုဆိုရင် သူ့အကိုဝမ်းကွဲအတွက် အန္တရာယ်ဖြစ်လိမ့်မည်။

ချူးဖေ့ဟန်သည် သူမ၏ အကိုကြီး ပိုင်လီကျုံးယန်ကို မေးသောအခါ သူမသည် ချစ်စဖွယ်‌ကောင်းသော်လည်း ဟန်ချန်းလင်အပေါ်ကိုတော့ အလွန်အေးစက်သည်။ ဒီနှစ်ခုကြားမှာ ကြီးမားသောကွာဟချက်ရှိခဲ့သည်။

ရှီရှောင်ယွဲ့သည် သူမ၏ ဝမ်းကွဲအတွက် စိတ်မကောင်းဖြစ်ရသော်လည်း မည်သို့ပင်ဖြစ်စေ သူမသည် သူ့ကိုကူညီရမည်။

ပိုင်လီကျုံးရွှယ်က "သူ အခု အိမ်မှာ ရှိလောက်မယ်" ချူးဖေ့ဟန်ရဲ့ ပိုင်လီကျုံးယန်နှင့်ပတ်သက်၍ မည်သို့ခံစားရသည်ကို သူမ အတိအကျမသိသော်လည်း ပိုင်လီကျုံးယန် အပေါ် ချူးဖေ့ဟန်၏သဘောထားကို မမုန်းပါ။ ချူးဖေ့ဟန်တစ်ယောက် ပိုင်လီကျုံးယန်အပေါ် အထူးခံစားချက်မရှိလောက်ဟုသာ မျှော်လင့်ခဲ့သည်။ အဘယ်ကြောင့်ဆိုသော် ၎င်းတို့သည် အတူရှိရန် မဖြစ်နိုင်သောကြောင့်ဖြစ်သည်။

"မနက်ဖြန်မနက်ပြေးမှာလား" ချူးဖေ့ဟန်က သိသာထင်ရှားတဲ့ မျှော်မှန်းချက်ကို ပြသပြီး မေးလိုက်သည်။

ပိုင်လီကျုံးရွှယ်က ရယ်မောပြီး "မိုးမရွာသရွေ့ ငါတို့ မနက်ခင်းမှာ ပြေးလေ့ရှိတယ်"

ချူးဖေ့ဟန် : “ကောင်းပြီ ဘော့စ် ဒီည မင်းရဲ့နေရာမှာ ငါလိုက်ခဲ့မယ်။ မနက်ဖြန် ငါ့အိပ်မက်ထဲကလူနဲ့ တိုက်တိုက်ဆိုင်ဆိုင်တွေ့တာပေါ့”

ကုနင်း : "ရတယ်‌လေ။ ဒါပေမယ့် မနက်ဖြန် ငါ အလုပ်ရှုပ်နေလိမ့်မယ်။ ငါ မင်းကို အဖော်မလုပ်ပေးနိုင်ဘူး"

ချူးဖေ့ဟန် : “အဆင်ပြေပါတယ်။ ကျုံးရွှယ်နဲ့ ငါပျော်လို့ရတယ်။ ကျုံးရွှယ် မအားရင်တောင် ပိုင်ယင်းနဲ့ အတူနေလို့ရတာပဲ” သူမသည် ကလေးမဟုတ်သောကြောင့် သူမကိုဂရုစိုက်ရန် ကုနင်းအား မလိုအပ်ပါ။

***

ဖီးနစ်သွေးစက်

အခန်း ၂၁၇၀ ချူးဖေ့ဟန် မင်းက ငါ့ကို တကယ် အံ့သြစေတယ်။

"ချူးဖေ့ဟန် မင်းငါ့ကိုတကယ်အံ့သြစေတယ်။ ငါတို့က ဟိုးအရင်ကတည်းက သူငယ်ချင်းတွေဖြစ်ခဲ့တာ မင်းအမြဲတမ်း သန်မာတဲ့မိန်းကလေးတစ်ယောက်ဖြစ်ပေမဲ့ ဒီနေ့ မင်းရဲ့ သိမ်မွေ့တဲ့ဘက်ကို ပြခဲ့တာပဲ" ရှီရှောင်ယွဲ့ သက်ပြင်းချလိုက်ပြီး "ပြော မင်း ပိုင်လီကျုံးရွှယ်ရဲ့အစ်ကိုကို ကြိုက်‌နေတာလား" ဟုမေးလိုက်သည်။

တကယ်တော့ နောက်ဆုံးစာကြောင်းက ရှီရှောင်ယွဲ့ရဲ့ တကယ့်ရည်ရွယ်ချက်ဖြစ်သည်။

"အိပ်မက်ထဲကကောင်‌လေးဆိုတဲ့ အဓိပ္ပာယ်ကို မင်းသိလား။ အိပ်မက်ထဲကကောင်လေးဆိုတာ ဒီတိုင်း ငါကြည့်ရုံ ကြည့်ချင်နေတဲ့လူပဲ။ အချစ်ဇာတ်လမ်းနဲ့ ဘာမှမဆိုင်ဘူး” ဟု ချူးဖေ့ဟန်က ဆိုသည်။ ပိုင်လီကျုံးယန်သည် သူမ၏ idol မျှသာဖြစ်ပြီး ခံစားချက်များနှင့် မသက်ဆိုင်ဟု ဆိုလိုခြင်းဖြစ်သည်။

ချူးဖေ့ဟန်က ဒီလိုပြောရင်တောင် ရှီရှောင်ယွဲ့က တုန်လှုပ်နေပြီး သတိရှိနေတုန်းပါပဲ။ ချူးဖေ့ဟန်သည် ယခုတွင် ပိုင်လီကျုံးယန်ကို နှစ်သက်ကြောင်း ငြင်းဆိုသော်လည်း သူမသည် အနာဂတ်တွင် စိတ်ပြောင်းသွားနိုင်သည်။

ပိုင်လီကျုံးရွှယ်သည် ချူးဖေ့ဟန်က ပိုင်လီကျုံးယန်ကို မကြိုက်ကြောင်း ကြားသိရသောအခါ သူမတို့သည် အတူနေရန် မဖြစ်နိုင်သောကြောင့် စိတ်သက်သာရာရသွားသည်။ ချူးဖေ့ဟန်သည် ကုနင်း၏ သူငယ်ချင်းဖြစ်သောကြောင့် သူမကို ထိခိုက်စေလိုခြင်းမရှိပါ။

စကားစမြည်ပြောရင်း မုခယ်အကြောင်းပြောကြသည်။ သူတို့အားလုံးသည် မိန်းကလေးများဖြစ်ကာ မုခယ်သည် တစ်ဦးတည်းသော ယောက်ျားလေးဖြစ်သောကြောင့် ချူးဖေ့ဟန်က နောက်ပြောင်ခဲ့သည်။ "မုခယ် မိန်းကလေး ခုနစ်ယောက်ထဲမှာ တစ်ယောက်တည်းသော ယောက်ျားလေးဖြစ်တာ မင်းဘယ်လိုခံစားရလဲ"

မုခယ်သည် အမှန်တကယ်ပင် စိတ်မသက်မသာ ခံစားခဲ့ရပြီး ချူးဖေ့ဟန်က သူ့ကို ထိုမေးခွန်းကို မေးသောအခါ ပို၍ပင် ကြောက်ရွံ့လာသည်။

ယွီမီရှီ၊ ကုနင်းနှင့် ချူးဖေ့ဟန်တို့သာရှိလျှင် သူနှင့် အလွန်ရင်းနှီးသောကြောင့် ခံစားချက်များ ကွဲပြားမည်မဟုတ်ပေ။ ကုနင်းနှင့် ချူးဖေ့ဟန်တို့သည် သူ၏ရင်းနှီးသော “ညီအကိုများ” ဖြစ်သည်။ သို့သော် ဤနေရာတွင် မရင်းနှီးသော မိန်းကလေး အနည်းငယ်ရှိသောကြောင့် အနည်းငယ် စိတ်မသက်မသာ ခံစားခဲ့ရသည်။

သို့သော် မုခယ်သည် စိတ်လှုပ်ရှားနေသော်လည်း စိတ်တည်ငြိမ်အောင် အတတ်နိုင်ဆုံး ကြိုးစားနေသေးသည်။ “ဘာမှမထူးခြားပါဘူး”

ချူးဖေ့ဟန် : "ဘာမှမထူးခြားဘူးလား? မယုံဘူး! မင်း အခု အရမ်းကောင်းလိုက်တာဆိုပြီး ခံစား‌နေရတယ်မလား။ မီရှီ စိတ်ဆိုးသွားရင် ဘယ်လိုလုပ်မလဲ”

ချူးဖေ့ဟန်က နောက်ပြောင်နေတာဖြစ်ပြီး မုခယ် ကို သူမယုံကြည်သည်။ ယွီမီရှီကလည်း နားလည်မှုရှိသောကြောင့် သူမ လုံး၀စိတ်အနှောက်အယှက်ဖြစ်မည်မဟုတ်ပါ။

မုခယ်မှာ စိတ်မသက်မသာဖြစ်ခြင်းမှလွဲ၍ အခြားခံစားချက်မရှိ၍ ချူးဖေ့ဟန် ပြောသည့်စကားက မမှန်သော်လည်း အမျိုးသမီးများသည် အမြဲအကဲဆတ်တတ်သည်ကို သူသိသောကြောင့် ယွီမီရှီအတွက်အနှောက်အယှက်ဖြစ်မည်ကို သူစိုးရိမ်ခဲ့သည်။

"ဘာလို့စားဖို့ကိုပဲ အာရုံမစိုက်နိုင်တာလဲ။ အကျင့်ပုတ်တဲ့စကားပြောနေတာ အခုရပ်လိုက်!" မုခယ်သည် ချူးဖေ့ဟန်နှင့် ငြင်းခုန်သော်လည်း သူ စိတ်မဆိုးပါ။

ဒါဟာ ဟာသတစ်ခုသာဖြစ်ပြီး ချူးဖေ့ဟန်က ဘယ်မှာရပ်ရမယ်ဆိုတာ သိတဲ့အတွက် သူမဆက်မလုပ်ဘဲ ခေါင်းစဉ်ပြောင်းခဲ့သည်။

တစ်ယောက်နဲ့တစ်ယောက် စကားစမြည်ပြောကြရင်း စုန့်ယန်နဲ့ပတ်သက်တဲ့ ကိစ္စတစ်ခုကို ထပ်ပြီး ပြောကြသည်။ ထိုကိစ္စက သတင်းထူးဖြစ်ပြီး လူသတ်သမားကို မတွေ့သေးပေ။

ချူးဖေ့ဟန် : "ငါဆိုလိုတာ နည်းနည်းထူးဆန်းတယ်။ အင်တာနက်ပေါ်ကလူအတော်များများက သရဲတစ္ဆေများနှင့် ပတ်သက်မှုရှိနိုင်တယ်ဆိုပြီး သံသယ‌တွေ ရှိလာကြတယ် သိလား”

"သရဲတစ္ဆေတွေကိုယုံလို့လား" ရှီရှောင်ယွဲ့က မထီမဲ့မြင်နဲ့ မေးသည်။

“…” ချူးဖေ့ဟန် ပါးစပ်ကို ဖွင့်လိုက်သော်လည်း ဘာမှ မပြော။ သူမသည် နောက်ဆုံးအကြိမ် ဖုတ်ကောင်များနှင့် တွေ့ကြုံရသည့် အတွေ့အကြုံကို မမေ့နိုင်ခဲ့သောကြောင့် သရဲတစ္ဆေများကို ယုံကြည်ခဲ့သည်မှာ သေချာပါသည်။ သို့သော် ရှီရှောင်ယွဲ့ကို သူမ မပြောနိုင်ပေ။

“တစ္ဆေတွေကို ယုံတယ်လို့ မပြောပါဘူး။ အင်တာနက်အသုံးပြုသူတော်တော်များများမှာ အဲဒီအကြံရှိနေတယ်လို့ ငါပြောတာ”

ရှီရှောင်ယွဲ့သည် ချူးဖေ့ဟန်နှင့် ထိုအကြောင်းအရာအကြောင်းကို ထပ်မံပြောဆိုခြင်းမရှိပေ။ ဒီအမှုကို သူတို့ သိပ်မသိကြဘဲ လူတွေ အာရုံမစိုက်ဘဲ သတ်ပစ်လို့ရရင် တရားခံပြေးတွေရှိလာမှာ မဟုတ်ပေ။

ထမင်းစားပြီးတဲ့အချိန်က KTV မှာ သီချင်းဆိုဖို့ စောလွန်းသေးပြီ ည ၈ နာရီလောက်မှသာ သွားကြဖို့ သဘောတူပြီးသားမို့ ထိုအချိန်မှသာ အဲဒီကို တိုက်ရိုက်သွားကြသည်။

သူတို့အထဲမှာ ကုနင်းတစ်ယောက်ပဲ ကားမောင်းလာပြီး သူမကားပေါ်မှာ ပိုင်လီကျုံးရွှယ်နဲ့ တခြားလူတွေက လိုက်လာခဲ့သည်။ သူတို့ထွက်သွားသောအခါ သူမသည် သူမကားကို သူတို့နှင့်အတူ စီးခဲ့ပြီး ချူးဖေ့ဟန်နှင့် အခြားသူများက တက္ကစီစီးခဲ့သည်။

အနည်းငယ်မတရားပုံပေါက်သော်လည်း သူမ၏ကားသည် ဤမျှလောက်လူမဆန့်‌သောကြောင့် အချို့က တက္ကစီစီးရသည်။

ချူးဖေ့ဟန်နဲ့ တခြားသူတွေက အဲဒါက ကြီးကြီးမားမားလို့ မထင်ထားဘဲ တက္ကစီကို ပေါ်သာတက်ကြသည်။

အရက်ပုလင်းအများကြီးမပါတဲ့ ဇိမ်ခံသီးသန့်အခန်းကို သူတို့ကြိုတင်မှာထားသည်။ ကျန်းမာရေးနှင့် မညီညွတ်သောကြောင့် အရက်အလွန်အကျွံမသောက်ပေ။ မူးလာလျှင် ဒုက္ခရောက်တတ်ပါသည်။

ည ၁၀ နာရီခန့်တွင် ရှီရှောင်ယွဲ့သည် ဖုန်းခေါ်ရန် အပြင်သို့ထွက်ခဲ့သည်။ ခဏအကြာတွင် အခြားလူတစ်ယောက်နှင့် ဝင်လာသည်။ အဲဒါ ဟန်ချန်းလင် ပင်။

ချူးဖေ့ဟန်သည် ဟန်ချန်းလင်ကိုမြင်သည်နှင့် တပြိုင်နက် တုန်လှုပ်သွားပြီး မျက်လုံးများ ပြူးသွားသည်။ သူကဘာလို့ဒီမှာရှိ‌နေတာလဲ။

စုန့်မြောင်ကောက စိတ်လှုပ်ရှားစွာ မတ်တပ်ထရပ်ပြီး “ရှင်က ဟန်ချန်းလင်လား” ဟု မေးသည်။

စုန့်မြောင်ကောသည် ဟန်ချန်းလင်ကို မှတ်မိခဲ့သည်။ ဟန်ချန်းလင်သည် ဤနေရာတွင် ပေါ်လာခဲ့သည်ကို သူမအံ့သြမိသောကြောင့် အလွန်စိတ်လှုပ်ရှားသွားသည်။

ကျန်းကျီခိုင်သည်လည်း သူ့ကို မှတ်မ်ပြီး စိတ်လှုပ်ရှားနေသော်လည်း သူမသည် စုန့်မြောင်ကောထက် အရှက်သဲသည်။

ပိုင်လီကျုံးရွှယ်သည် ဟန်ချန်းလင်ကို မသိပါ။ သူမအတွက် ဆွဲဆောင်မှု မရှိတဲ့အတွက် ဟန်ချန်းလင်ကို မြင်လိုက်ရတဲ့အခါ ဘာမှ မခံစားခဲ့ရပါ။

ကုနင်းနဲ့ တခြားသူတွေက ဟန်ချန်းလင်ကို အရင်က မြင်ဖူးကြတာမို့ သူ့ကို ဒီမှာတွေ့ရတော့ အနည်းငယ် အံ့သြသွားကြသည်။

"ဟိုင်း အားလုံးပဲ ငါက ဟန်ချန်းလင် ပါ" ဟန်ချန်းလင်က သူတို့ စနှုတ်ဆက်သည်။ သူမှာ ကျော်ကြားသူ၏ မောက်မာမှု မရှိပါ။

“အမ် ငါ အပြင်ထွက်တော့ စီနီယာဟန်ကို တိုက်တိုက်ဆိုင်ဆိုင် တွေ့လိုက်ရလို့ သူ့ကို ဝင်ထိုင်ဖို့ ဖိတ်လိုက်တာ။ စိတ်မရှိဘူးမလား?" ရှီရှောင်ယွဲ့က အနည်းငယ်အားနာမိသွားသလို ခံစားလိုက်ရသည်။ တစ်ချိန်တည်းမှာပင် သူမသည် ဟန်ချန်းလင်ကို ၎င်းတို့၏ခွင့်ပြုချက်မရှိဘဲ ခေါ်ဆောင်ခဲ့ခြင်းကြောင့် အနည်းငယ် အပြစ်ရှိကြောင်း ပြောကြားခဲ့သည်။ ထို့အပြင် သူမက ဟန်ချန်းလင်ကို သူတို့ဒီမှာရှိနေကြောင်း ပြောခဲ့တာဖြစ်လို့ ဟန်ချန်းလင်က ရောက်လာခြင်းဖြစ်သည်။

သူက ချူးဖေ့ဟန်ကြောင့် ရောက်လာတာ အသိအသာပင်။

ချူးဖေ့ဟန်သည် ပိုင်လီကျုံးရွှယ်၏အစ်ကိုကို သူမ၏အိမ်မက်ကောင်လေးအဖြစ် သတ်မှတ်ထားကြောင်း ဟန်ချန်းလင်အား ရှီရှောင်ယွဲ့က မပြောထားပေ။ မဟုတ်ပါက ဟန်ချန်းလင်သည် ၎င်းကို တူးဆွပြီး ပြဿနာဖြစ်စေနိုင်သည်။

ချူးဖေ့ဟန်သည် ယခု ဟန်ချန်းလင်အပေါ် ဆိုးရွားသော အထင်အမြင် မရှိတော့သောကြောင့် သူ့ကို တွေ့ရတော့ သူမ စိတ်မချမ်းမသာမဖြစ်ပေ။ သို့သော်လည်း သူမနှင့် ဟန်ချန်းလင်တို့သည် သာမန်သူငယ်ချင်းများသာဖြစ်သောကြောင့် စိတ်လှုပ်ရှားခြင်းမရှိပေ။

"ဘယ်ဟုတ်မလဲ! ထိုင်ပါ!" ချူးဖေ့ဟန်က "ရှင်သောက်မှာလား" ဟုမေးလိုက်သည်။

“ကိုယ် နည်းနည်းပါးပါးသောက်လို့ရပါတယ်”

စုန့်မြောင်ကောနဲ့ ကျန်းကျီခိုင် နှစ်ယောက်လုံးက ဟန်ချန်းလင်ကို တကယ်ကြိုက်ကြပြီး သူ့ပရိသတ်တွေမို့ သူတို့နှစ်ယောက်လုံး သူနဲ့ ခဏတာသောက်ကြသည်။

သာမာန်အားဖြင့် ဟန်ချန်းလင်သည် လူများနှင့် အလွန်ခင်မင်ရင်းနှီးသူမဟုတ်သော်လည်း ချူးဖေ့ဟန်ရဲ့အသိုင်းအဝိုင်းဖြစ်သောကြောင့် ၎င်းတို့အပေါ် ရိုးရိုးသားသား ကြင်နာစွာဆက်ဆံပါသည်။

ဟန်ချန်းလင်သည် သူမကို အမှန်တကယ်လေးစားသောကြောင့် ကုနင်းနှင့်လည်း သောက်ခဲ့သည်။

နောက်နာရီများတွင် ဟန်ချန်းလင်သည် ချူးဖေ့ဟန်နှင့် ပျော်ပျော်ပါးပါး အချိန်အများစုကို ကုန်ဆုံးခဲ့သည်။ ဂိမ်းတွေကစားပြီး သူမနဲ့ အတူသောက်သည်။ သူသည် သူမအပေါ် မတူကွဲပြားစွာ ကြည့်သော်လည်း ချူးဖေ့ဟန်သည် ထိုအကြောင်းကို ဘာမှ မခံစားရဘဲ သူ့သဘောထားကို လုံးဝ ဂရုမစိုက်သည့်ပုံရသည်။

***

ဖီးနစ်သွေးစက်

ဖီးနစ်သွေးစက်

အခန်း ၂၁၇၁ ဖြည်းဖြည်းပေါ့

ဟန်ချန်းလင်သည် ဂိမ်းများတွင် အကြိမ်‌ပေါင်းများစွာ ရှုံးနိမ့်ခဲ့သောကြောင့် ချူးဖေ့ဟန် အလွန်စိတ်အခြေအနေကောင်းနေသည်။ သူတို့ ဆုံတွေ့ပြီးကတည်းက ဒါဟာ စည်းလုံးမှုအရှိဆုံး တွေ့ဆုံမှုဖြစ်ပြီး ချူးဖေ့ဟန်ကလည်း သူ့ကို ကြိမ်ဖန်များစွာ ပြုံးပြခဲ့သည်။ တကယ်တော့ ချူးဖေ့ဟန်က သူ့ကို ပြုံးပြဖူးတာ ဒါပထမဆုံးအကြိမ်ပါ။

ချူးဖေ့ဟန်၏အပြုံးကိုမြင်နိုင်ဖို့အတွက် ဟန်ချန်းလင်သည် ဂိမ်းတွေ ရှုံးရင်တောင် ဆက်ရှုံးဖို့ ဆန္ဒရှိသည်။

ဟန်ချန်းလင်သည် သူ ချူးဖေ့ဟန်ကို အမှန်တကယ် ချစ်မိသွားပြီးဖြစ်ကြောင်း နားလည်ထားပြီးဖြစ်သော်လည်း သူမကို ချစ်ကြောင်း ဝန်ခံရန် စောလွန်းနေသေးသည်။ ဒါ့အပြင် ချူးဖေ့ဟန်သည် သူ့အပေါ် ကောင်းမွန်သော သဘောထားမရှိသေးပါ။

ချူးဖေ့ဟန်ကို ချစ်မြတ်နိုးကြောင်း ဝန်ခံရန် စီစဉ်ထားသော်လည်း ချူးဖေ့ဟန်သည် သူ့အပေါ် ပိုမိုကောင်းမွန်သော အထင်အမြင် ရှိလာသည်အထိ စောင့်ရပေအုံးမည်။

ဤအခိုက်အတန့်တွင် သူ၀န်ခံခဲ့လျှင်ပင် ချူးဖေ့ဟန်သည် သူ့ကို ငြင်းပယ်လိမ့်မည်ဟု သူယုံကြည်သည်။

“ရှင် ကျွန်မတို့နဲ့ ရှိနေတာ ကြာပြီ။ ရှင့်သူငယ်ချင်းတွေ ရှင့်ကို စိတ်မဆိုးဘူးလား" ရုတ်တရက် ချူးဖေ့ဟန်က ဟန်ချန်းလင်ကို မေးလိုက်ရာ ဟန်ချန်းလင်၏ ကောင်းသော စိတ်များ ပျက်စီးသွားသည်။

“အဆင်ပြေပါတယ်။ တကယ်တော့ သူတို့နဲ့ မကစားချင်လို့ လေကောင်းလေသန့်ရဖို့ အပြင်ထွက်ခဲ့တာ။ အဲ့တာနဲ့ ရှီရှောင်ယွဲ့ကို အမှတ်တမဲ့ တွေ့ခဲ့တယ်။ မင်းဒီမှာရှိနေတယ်ကြားလို့ ကိုယ်လာခဲ့တာပါ။ မင်းနဲ့အတူရှိရတာ ပိုပျော်စရာကောင်းတယ်" ဟန်ချန်းလင်သည် အပြစ်ရှိသည်ဟု လုံးဝမခံစားရဘဲ လိမ်ညာခဲ့သည်။

“ကောင်းပြီလေ!” ဟန်ချန်းလင်ပြောလိုက်ကတည်းက ချူးဖေ့ဟန်သည် ထိုအကြောင်းကို ဆက်မပြောတော့ပေ။ သူ့ကို မောင်းထုတ်နေတယ်လို့ မခံစားစေချင်ပေ။

သူမမှာ ဟန်ချန်းလင်ကို အရမ်းကောင်းတဲ့ အထင်အမြင် မရှိသော်လည်း သူ့ကို မောင်းထုတ်ပစ်ဖို့အထိ အထင်အမြင်သိပ်မဆိုးလှပေ။

…

ည ၁၁ နာရီခန့်တွင် ကလပ်မှ ထွက်လာခဲ့သည်။

သူတို့ မထွက်ခွာခင်မှာ ကျန်းကျီခိုင်က သူမ အိမ်ကိုဖုန်း‌ခေါ်ပြီး သူမမိသားစုရဲ့ ကားမောင်းသူကို လာခေါ်ဖို့ ပြောပြီး စုန့်မြောင်ကောကို အိမ်ပြန်ပို့ခဲ့သည်။

ဟန်ချန်းလင်သည် ချူးဖေ့ဟန်ကို အိမ်ပြန်မောင်းပို့ချင်သော်လည်း ကုနင်းနှင့် အတူသွားရမည်ဖြစ်သောကြောင့် ချူးဖေ့ဟန်က သူ့ကို ငြင်းပယ်ခဲ့သည်။ ထို့အတွက်ကြောင့် ဟန်ချန်းလင်သည် ရှီရှောင်ယွဲ့ကိုသာ အိမ်ပြန်ပို့ရန် ဆုံးဖြတ်ခဲ့သည်။

ရှီရှောင်ယွဲ့နှင့် ဟန်ချန်းလင်၏ ဆက်ဆံရေးကို အခြားလူများက မသိကြသော်လည်း ဟန်ချန်းလင်သည် ရှီရှောင်ယွဲ့ကို ထိခိုက်မည်မဟုတ်ဟု ယုံကြည်သောကြောင့် သူတို့ စိတ်မပူကြပေ။

ထို့နောက် ကုနင်းသည် ပိုင်လီကျုံးရွှယ်၊ ချူးဖေ့ဟန်၊ ယွီမီရှီ နှင့် မုခယ်တို့ကို ရာစုနှစ်မြို့တော်သို့ ပြန်ခေါ်သွားခဲ့သည်။

…

ရှီရှောင်ယွဲ့နှင့် ဟန်ချန်းလင် ထွက်သွားပြီးနောက် ရှီရှောင်ယွဲ့ က သူနှင့် နောက်ပြောင်ခဲ့သည်။ "ချန်းလင်၊ နင်အခု ချူးဖေ့ဟန်ကို တကယ်ကြိုက်တယ်ဆိုတာ ဝန်ခံရမယ်။ ဒီနေ့ အရမ်းသိသာတာပဲ လူတိုင်းမြင်နိုင်တယ်”

"ချူးဖေ့ဟန်ကလွဲလို့ လူတိုင်းမြင်နိုင်တယ်" ဟု ဟန်ချန်းလင်ကဆိုသည်။ သူအရမ်းစိတ်ဆိုးနေပုံရပေမယ့် ချူးဖေ့ဟန်ကို သူတကယ်ကြိုက်ကြောင်း ဝန်ခံဖို့ မငြင်းဆန်ဘူးလို့ ဆိုလိုတာပါ။

"အင်း ဖြည်းဖြည်း‌‌ပေါ့။ နင် သူ့အပေါ် ကောင်းမွန်တဲ့ ပထမဆုံးအထင်အမြင်မှ မချန်ခဲ့တာ” ဟု ရှီရှောင်ယွဲ့က ဆိုသည်။ သူမသည် အချစ်ရေးဆက်ဆံရေးအကြောင်း သိပ်မသိသော်လည်း ပထမဆုံးတွေ့ဆုံမှုမှာ အထင်ကြီး‌အောင်တစ်ခုပြုလုပ်ရမည်ကို သူမသိသည်။ ဒုတိယအကြိမ်ကျလျှင် အခွင့်အရေးမရှိနိုင်‌‌ပေ။ ဟန်ချန်းလင်သည် ချူးဖေ့ဟန်၏ထင်မြင်ချက်များကို ပြောင်းလဲရန် မလွယ်ကူပေ။

သို့သော်လည်း ဟန်ချန်းလင်သည် ချူးဖေ့ဟန်နှင့်စကားပြောဆိုရန် အခွင့်အရေးအားလုံးကို လက်လွှတ်မခံဘဲ သူ့ကို ကွန်ဖူးသင်ပေးရန် တောင်းဆိုသည့်အတွက် သူမ အံ့အားသင့်နေရဆဲဖြစ်သည်။ သူမနားလည်နိုင်မှုကို လုံးဝကျော်လွန်သွားသည်။

ဟန်ချန်းလင်က သူမကို မပြောပြသောကြောင့် သူမ ထိုအရာကို ချူးဖေ့ဟန်ထံမှ ကြားခဲ့ခြင်းဖြစ်သည်။ သူသည် ဤအရာအားလုံးကို လုပ်ဆောင်သော်လည်း အခြားသူများရှေ့တွင် သူ၏ဂုဏ်သိက္ခာကို အလေးထားသည်။

ရှီရှောင်ယွဲ့၏မျက်လုံးထဲတွင် ဟန်ချန်းလင်သည် အမြဲဂုဏ်ယူစရာကောင်းခဲ့သည်။

ချစ်မိသွားတဲ့အခါ လူတွေက ပြောင်းလဲသွားတယ်ဆိုတာ အမှန်ပါပဲ။

ယခု ပိုင်လီကျုံးရွှယ်၏ အကိုကြီးအကြောင်းကို သူမ သိချင်နေမိသည်။ သူကဘယ်လိုလူလဲ။ ချူးဖေ့ဟန်က ဘာလို့ သူ့ကို အိပ်မက်ထဲက ယောက်ျားလေးအဖြစ် ဘာကြောင့် မှတ်ယူထားတာလဲလို့ သူမ တွေး‌နေမိသည်။

သူမ၏မျက်လုံးထဲတွင် ဟန်ချန်းလင်သည် အလွန်ထူးချွန်သူဖြစ်သည်။ ချမ်းသာတဲ့ မိသားစုမှာ မွေးဖွားခဲ့ပြီး ချောမောပြီး တော်လည်းတော်သည်။ သူသည် မိန်းကလေးများစွာ၏ စိတ်ကူးယဉ်ကောင်လေးလည်း ဖြစ်သော်လည်း ချူးဖေ့ဟန်အတွက် ခြွင်းချက်ဖြစ်သည်။

သို့သော် ချူးဖေ့ဟန်သည် မတူညီသောကြောင့် ဟန်ချန်းလင်က ချူးဖေ့ဟန်ကို ဆွဲဆောင်မိသည်ဟုလည်း သူမ နားလည်သည်။

ချူးဖေ့ဟန်က အခြားမိန်းကလေးများနှင့် အတူတူပင်ဖြစ်ပြီး သူ့ကိုတွေ့တာနဲ့ လိုက်ဆွဲ‌ဆောင်ပါက သူမကို အထူးဂရုပြုမိမည်မဟုတ်ပါ။

လူတွေက မတူညီတဲ့လူနဲ့ ပစ္စည်းတွေကို အမြဲနှစ်ခြိုက်တတ်ကြသည်။

…

နောက်နေ့မနက်မှာ သူတို့နှစ်ယောက်အတူတူ ပြေးဖို့ထကြပြီး အံ့ဩစရာမရှိပဲ ပိုင်လီကျုံးယန်နဲ့ ပိုင်လီကျုံးရွှယ်တို့ကို တွေ့ခဲ့သည်။

ပိုင်လီကျုံးယန်ကိုတွေ့တော့ ချူးဖေ့ဟန်က စိတ်လှုပ်ရှားပြီး သူ့ကို နှုတ်ဆက်သည်။ သူနဲ့လည်း စကားပြောဖို့ ကြိုးစားသည်။ ပိုင်လီကျုံးယန်သည် သူမအား ယဉ်ကျေးစွာ ဆက်ဆံခဲ့ပြီး စိတ်မရှည်ခြင်း သို့မဟုတ် မကြိုက်ကြောင်း မပြသခဲ့ပေ။

နံနက်ခင်းပြေးပြီးနောက် ကုနင်းသည် ပိုင်လီကျုံးယန်နှင့် ပိုင်လီကျုံးရွှယ်အား သူမ၏အိမ်၌ နံနက်စာ ဝေမျှရန် ဖိတ်ခေါ်ခဲ့သည်။ ပိုင်လီကျုံးယန်သည် ယခင်က သူတို့သွားစားဖူးသေးတာကြောင့် ၎င်းတို့ ဖိတ်ခေါ်ချက်ကို လက်ခံရန် တုံ့ဆိုင်းနေသည်။ ထို့ကြောင့် သူက နံနက်စာ၀ယ်ကျွေးရန် အဆိုပြုခဲ့သည်။

သူ့အိမ်မှာ မနက်စာ ချက်ပြီးသားဆိုပြီး ကုနင်းက ပိုင်လီကျုံးယန်ကို လှည့်စားလိုက်သည်။ ပိုင်လီကျုံးရွှယ်ကလည်း ကုနင်းနဲ့ လိုက်သွားဖို့ အခိုင်အမာပြောနေ၍ ပိုင်လီကျုံးယန်က သူတို့နောက်ကို လိုက်သွားရသည်။

မနက်စာစားပြီးနောက် ပိုင်လီကျုံးယန်က သူတို့ကို ကျေးဇူးတင်ကြောင်းပြောပြီး ပြန်ထွက်သွားသည်။ ပိုင်လီကျုံးရွှယ်သည် ချက်ချင်းမထွက်ခွာဘဲ ကုနင်းနှင့် အခြားသူများနှင့်အတူနေခဲ့သည်။

ကုနင်းလည်း နံနက် ၉ နာရီတွင် ထွက်ခွာခဲ့သည်။

မနေ့က ကောင်းယိကို ကုန်ပစ္စည်းတွေသယ်ဖို့ ထရပ်ကားကို ပြင်ခိုင်းပြီး ကုနင်းထွက်လာတဲ့အခါ ကောင်းယိနဲ့ ချောင်ယတို့ကို တိုက်ရိုက်မောင်းလာခိုင်းလိုက်သည်။

ထွက်ခွာပြီးနောက် သူမသည် ကျင်းယွင်ယောင်နှင့် မြောင်ကျင်းကျင်းကို‌ခေါ်ရန် စစ်ဟယ်ယွမ်သို့သွားခဲ့ပြီး XX ပန်းအခြေစိုက်စခန်းသို့သွားခဲ့သည်။

ပန်းဆိုင်ပိုင်ရှင်အများစုသည် ပန်းလက်ကားစင်တာသို့သွားလေ့ရှိသော်လည်း ကုနင်းသည် ကျင်းယွင်ယောင်နှင့် မြောင်ကျင်းကျင်းကို ပန်းအခြေစိုက်စခန်းသို့ တိုက်ရိုက်ခေါ်သွားခဲ့သည်။ အဓိကက ရှောင်းယောင်တောင်ဗီလာမှာ အပင်တွေ စိုက်ဖို့ ဒီနေ့ လာတာမို့ သူတို့အတွက် အများကြီး လိုအပ်သည်။

ပန်းပင်များကို အမြောက်အမြားဝယ်ယူရန် ပန်းအခြေစိုက်စခန်းသို့ လာရောက်လေ့ရှိကြသည်။ များများဝယ်လေ ဈေးပိုသက်သာလေပါပဲ။

ကုနင်းနဲ့ တခြားသူတွေက ရွက်ကျပင်တွေကို အဓိကရောင်းချင်တာကြောင့် တစ်နှစ်ခွဲလောက်ကြာတဲ့အထိ ပန်းဆိုင်ရဲ့လိုအပ်တဲ့ပမာဏကို ပေးစွမ်းနိုင်‌လောက်တဲ့အထိ ရွက်ကျပင်တွေ အများကြီးလိုချင်ကြသည်။

ဇိမ်ခံမျိုးစိတ်များစွာရှိ‌ပေသည်။ အချို့က ဈေးကြီးပြီး အချို့က ဈေးသက်သာသော်လည်း ကုနင်းနှင့် အခြားသူများက ၎င်းတို့အားလုံးကို လိုချင်ကြသည်။

ပန်းများနှင့်အပင်များအခြေချပြီးနောက် ပန်းအိုးများကို ကိုင်တွယ်ရန်လိုအပ်သည်။

ရှန်းယွင်ရှေးဟောင်းပစ္စည်းဆိုင်သည် ပန်းအိုးများကို ထုတ်လုပ်သော်လည်း ပန်းခင်းကျင်းပြသရန်နှင့် စိုက်ပျိုးရာတွင် သုံးလေ့ရှိသော အိုးများထက် များစွာ ပိုစျေးကြီးပါသည်။

သို့သော် ဈေးကြီးသောအပင်များသည် တန်ဖိုးကြီးသောပန်းအိုးများနှင့် လိုက်ဖက်သင့်သည်။ အကြောင်းမှာ ၎င်းတို့သည် တန်ဖိုးကြီးထုတ်ကုန်များဖြစ်သည်။ ထို့အပြင် ပန်းအိုးများက မည်မျှပင် ဈေးကြီးသည်ဖြစ်စေ ယွမ်ဆယ်ဂဏန်း သို့မဟုတ် ရာနှင့်ချီသာ ကုန်ကျပြီး လူများစွာအတွက် တတ်နိုင်သည်။ စျေးနှုန်းများကို ပေးဆောင်ရန် ဆန္ဒရှိမရှိပေါ်တွင်သာ မူတည်ပါသည်။

ကုနင်းသည် ပန်းအိုးကောင်းများ၀ယ်ရန် ရှန်းယွင်ရှေးဟောင်းပစ္စည်းအအရောင်းဆိုင်သို့ မသွားဘဲ အခြားကုမ္ပဏီများမှ သာမန်ပန်းအိုးအချို့ကို ဝယ်ယူခဲ့သည်။ အမှန်တော့ လူတိုင်းက တန်ဖိုးကြီးပန်းအိုး‌တွေကို လိုလိုလားလား၀ယ်ကြမှာမဟုတ်သလို မလိုအပ်ဘူးလို့လည်း ထင်နိုင်ပေသည်။

ပန်းများနှင့် အပင်များကို ရှောင်းယောင်တောင်ဗီလာသို့ တိုက်ရိုက်ယူသွားသော်လည်း အလုပ်သမားများ မခေါိလာပါ။ သူတို့ကိုယ်တိုင် စိုက်ပျိုးပြီး အပင်တွေကို ဥယျာဉ်ထဲမှာ အစားထိုး စိုက်ပျိုးကြမည်။

ရှောင်းယောင်တောင်ဗီလာမှ အလုပ်သမားအများအပြားက သူတို့ကို ကူညီခဲ့သည်။

သူတို့သည် ရှောင်းယောင်တောင်ဗီလာဥယျာဉ်ကို နှစ်ပေါင်းများစွာ ပြုစုစောင့်ရှောက်ခဲ့ကြသောကြောင့် ပန်းနှင့်အပင်များ စိုက်ပျိုးပြုစုပျိုးထောင်ရာတွင် အလွန်ကျွမ်းကျင်နေပြီဖြစ်သည်။ သူတို့ဟာ အတော်လေး ကျွမ်းကျင်သည်။

ထို့ကြောင့် ၎င်းတို့၏အကူအညီဖြင့် ကုနင်းသည် စိတ်ပူစရာမလို‌တော့ပေ။

***

ဖီးနစ်သွေးစက်

အခန်း ၂၁၇၂ တစ်စုံတစ်ယောက်? ဘယ်သူလဲ?

ပန်းများနှင့် အပင်များသည် များပြားလွန်းသောကြောင့် ၎င်းတို့ကို အစားထိုးမစိုက်မီ နေ့ခင်းတစ်ခင်းလုံး အလုပ်များနေခဲ့ကြသည်။

အစားထိုးစိုက်ပြီးသောအခါ ကုနင်းသည် အလုပ်သမားများကို အနားယူစေခဲ့သည်။ နောက်လုပ်ရမှာက မှော်စွမ်းအင်အရည်တွေကို အပင်တွေပေါ်တင်ရမှာပါ။ လူမသိစေချင်တာကြောင့် သူတို့ကိုယ်တိုင်လုပ်မှာဖြစ်သည်။

အပင်တွေအပေါ်မှာ မှော်စွမ်းရည်တွေကို ဖြန်းဖို့ အချိန်တော်တော်ယူခဲ့ရတာမို့ ပြီးသွားတဲ့အခါ မှောင်လုနီးပါးဖြစ်နေပါပြီ။

ပြီးတာနဲ့ ထမင်းစားဖို့ ဆုံးဖြတ်လိုက်သည်။

ပန်းနှင့်အပင်များကို အစားထိုးရန် အချိန်များစွာယူရမည်ဟု သိသဖြင့် ကျင်းယွင်ယောင် သည် အလုပ်သမားများအား ၎င်းတို့အတွက် အစားအသောက်ပြင်ဆင်ရန် အမိန့်ပေးခဲ့သည်။ ထို့ကြောင့် သူတို့သည် ရှောင်းယောင်တောင်ဗီလာတွင် ထမင်းစားကြသည်။

…

တနင်္ဂနွေနေ့တွင် ကုနင်းသည် ကျင်းယွင်ယောင်နှင့် မြောင်ကျင်းကျင်းကို ပန်းဈေးသို့ ခေါ်ဆောင်သွားခဲ့သည်။ ဆေးသုတ်ထားသော အဖြူရောင်နံရံသည် နှစ်ရက်ကြာ‌သောအခါ ခြောက်သွားပြီဖြစ်သောကြောင့် အလှဆင်ရန် အချိန်တန်ပြီဖြစ်သည်။

ကောင်တာများနှင့် စင်များလည်း လိုအပ်သည်။ အချိန်မဖြုန်းချင်သောကြောင့် စတော့ရှိသောဆိုင်များမှ မှာယူထားကြသည်။ မည်သို့ပင်ဆိုစေကာမူ ကွာခြားမှု မရှိပါ။

ဆိုင်၏ အလှဆင်မှုက တစ်နေကုန်လုပ်မှ ပြီးမြောက်မည်ဖြစ်သည်။ ကုန်ပစ္စည်းများကို မနက်ဖြန်တွင် ယူဆောင်ပြီး ထားရှိနိုင်ပြီး သဘက်ခါတွင် ဖွင့်လှစ်နိုင်မည်ဖြစ်သည်။

ဆိုင်ကြီးမဟုတ်သောကြောင့် ကြီးကျယ်ခမ်းနားသောဖွင့်ပွဲ မလိုအပ်ပေ။ ဖွင့်ပွဲကျင်းပသည့်အခါတွင် သူငယ်ချင်းကောင်းအချို့သာ ခေါ်ယူကျင်းပမည်။

နေ့ခင်းတွင် ပြင်ဆင်ပြီးနောက် ကုနင်းနှင့် အခြားသူများ ထွက်ခွာသွားကြသည်။ ထိုအချိန်တွင် လူငယ်ငါးဦးရောက်လာသည်။ သူတို့ကိုကြည့်ရတာ ရန်လို‌နေပုံရသည်။

"ဒီဆိုင်ကို မင်းငှားထားတာလား" ခေါင်းဆောင်က မေးသည်။

အဲဒါကိုကြားတော့ ကုနင်းနဲ့ တခြားသူတွေက ဒီလူတွေထဲက တစ်ယောက်ဟာ ဆိုင်ပိုင်ရှင်ရဲ့သား ဒါမှမဟုတ် ပိုင်ရှင်ရဲ့သားက ခေါ်ထားတာဖြစ်လောက်တယ်လို့ မှန်းဆမိကြသည်။

အိမ်ပိုင်ရှင်ရဲ့သားက အဲဒီမှာ ရှိသည်ဖြစ်စေ မရှိသည်ဖြစ်စေ ဒီကိုလာရတဲ့ ရည်ရွယ်ချက်က အတူတူပါပဲ။

အနီးနားရှိ ဆိုင်ပိုင်ရှင်များနှင့် စာရေးများသည် ဤဆိုင်ပိုင်ရှင်၏သားကို သိကြသည်။ ဆိုင်ပိုင်ရှင်ရဲ့သားကတော့ ဒီလူတွေထဲမှာ မပါပေမယ့် ဒီလူတွေအားလုံးက သူ့သူငယ်ချင်းတွေပင်။ သူတို့က သူ့ကို အကြိမ်ပေါင်းများစွာ ကူညီပေးခဲ့တဲ့အတွက် ဒီလူတွေကို တွေ့တာနဲ့ သူတို့ ဘာလုပ်မယ်ဆိုတာ သဘောပေါက်ကြသည်။

ထို့အတွက်ကြောင့် ဤဆိုင်ပိုင်ရှင်မှာ လောင်းကစားကို စွဲလမ်းသော ကျေးဇူးကန်းသော လောဘကြီးသော သားတစ်ယောက်ရှိသောကြောင့် ဤဆိုင်ပိုင်ရှင်ကို သနားမိကြသည်။

အစပိုင်းတွင် ပိုင်ရှင်၏ မိသားစုက စီးပွားရေးလုပ်ရန် ဆိုင်ဖွင့်ခဲ့သော်လည်း နောက်ပိုင်းတွင် ပိုင်ရှင်၏သားသည် လောင်းကစားကို စွဲလမ်းသောကြောင့် ပိုက်ဆံများစွာ ဆုံးရှုံးကာ ပိုက်ဆံမရှိသည့်အချိန်တွင် ဖခင်ထံ ပြန်လာသည်။

အစပိုင်းမှာတော့ ဆိုင်ပိုင်ရှင်က သူ့သားကို ပိုက်ဆံနည်းနည်းပေးပေမယ့် အချိန်အတော်ကြာတော့ တောင်းတိုင်းပေးဖို့ မတတ်နိုင်တော့ပေ။ သူတို့လုပ်ငန်းက သိပ်အမြတ်မရဘူးလေ။

ဆိုင်ပိုင်ရှင်ရဲ့သားက ပိုက်ဆံမရတဲ့အခါ ဒေါသထွက်ပြီး ဆိုင်ကို ဖျက်ဆီးခဲ့သည်။ ထို့ကြောင့် ဆိုင်ပိုင်ရှင်သည် လုပ်ငန်းကို ဆက်လက်မလုပ်ဆောင်နိုင်တော့ပေ။ သူအလုပ်ရပ်ပြီး ဆိုင်ကို လူငှားတင်သည်။

သို့သော်လည်း ဆိုင်ခန်းငှားသူသည် လုပ်ငန်းကို လွှဲပြောင်းယူပြီးနောက် မကြာမီ ဆိုင်ရှင်၏သားဖြစ်သူက ထပ်မံရောက်ရှိလာပြီး တစ်ကြိမ် ထပ်မံဖျက်ဆီးခဲ့သည်။ လောင်းကစားလုပ်ဖို့ ပိုက်ဆံရအောင် ဒီဆိုင်ကိုရောင်းမယ် လို့အော်ဟစ်သည်။

အကြိမ်ပေါင်းများစွာ ဖျက်ဆီးခံရပြီးနောက် ငှားရမ်းသူ၏လုပ်ငန်းမှာ ဆက်လက်မလည်ပတ်နိုင်တော့သဖြင့် ငှားရမ်းသူ ဆိုင်မှထွက်သွားပြီး တစ်လခန့် လစ်လပ်သွားပြီးနောက် ကုနင်းပေါ်လာခြင်းဖြစ်သည်။

ကုနင်းက စတိုးဆိုင်ကို ငှားထားတာကို တခြားသူတွေ သိသွားတဲ့အခါ ကြင်နာတဲ့လူ‌တွေက သူမကို လာပြောပြပေမယ့် ကုနင်းက ဂရုမစိုက်ပါ။ သူမ ဂရုမစိုက်သောကြောင့် အပြင်လူများက ထိုအကြောင်းကို ဘာမှထပ်မပြောနိုင်ပေ။

အခု ကုနင်းဒုက္ခရောက်လာ၍ သူမ ဘယ်လိုကိုင်တွယ်မလဲဆိုတာ သူတို့သိချင်နေကြသည်။

"ဟုတ်တယ်ဆိုရင်ရော?" ကုနင်းက အဲဒီလူကို ပြန်ဖြေသည်။ သူက အရမ်း ရန်လိုပေမယ့် ကုနင်းက မကြောက်ပါ။

ယောက်ျားက အနည်းငယ် မျက်မှောင်ကြုတ်လိုက်ပြီး ကောင်မလေးက သတ္တိရှိလို့ အံ့သြသွားသည်။ သူမသည် ၎င်းတို့ကို လုံးဝမကြောက်ဘဲ ကြမ်းတမ်းသည့်ပုံပေါက်သည်။

ထို့အတွက်ကြောင့် ထိုအမျိုးသားသည် အနည်းငယ်ရှက်ရွံ့သွားကာ သူ၏အမူအရာမှာ အနည်းငယ်အေးစက်သွားခဲ့သည်။ "အေး! ဒါဆိုရင် စတိုးဆိုင်က ထွက်သွားဖို့ အကြံ‌ပေးချင်တယ်။ မဟုတ်ရင် ငါမင်းရဲ့လုပ်ငန်းကို ပျက်ဆီးအောင်လုပ်နိုင်တာမလို့ သတိထားပါ"

"အိုတကယ်ပဲလား? ဘာကြောင့်လဲ?" ကုနင်းက အေးအေးဆေးဆေး မေးသည်။ သူမသည် သူတို့ကို လုံးဝကြောက်ပုံမပေါ်။

“တစ်‌ယောက်ယောက်က ဒီဆိုင် ငှားထားတာကို မလိုချင်ဘူး” ဟု အဆိုပါ အမျိုးသားက ပြောသည်။

"တစ်‌ယောက်ယောက်? ဘယ်သူလဲ? အဲ့လူက ကျွန်မတို့ကို စတိုးဆိုင်မငှားအောင် ဘာလို့တားတာလဲ။ ကျွန်မတို့က ပိုင်ရှင်ဆီကငှားထားပြီး စာချုပ်လည်းရှိတယ်။ ရှင်တို့ ခုနကပြောခဲ့တဲ့လူနဲ့ ဘာမှမဆိုင်ဘူး”

အကြောင်းအရင်းကို သူမသိသောကြောင့် ကုနင်းသည် ဤဆိုင်ပိုင်ရှင်ကို သူ့မှာ မကြင်နာသော၊ လောဘကြီးသောသားတစ်ယောက်ရှိသောကြောင့် အမှန်တကယ်ပင် သနားမိပါသည်။

“မင်း…” ကုနင်းသည် သူ၏ခြိမ်းခြောက်မှုကို လုံးဝမကြောက်သည်ကို မြင်လိုက်ရသဖြင့် ထိုလူသည် ဒေါသထွက်သွားပြီး တစ်ချိန်တည်းမှာပင် အလွန်အရှက်ကွဲသွားကာ သူ့အမူအရာမှာ ရုတ်တရက် ပိုဆိုးလာသည်။ “ဆိုင်တယ် အဲဒီလူက ဒီဆိုင်ရဲ့ ပိုင်ရှင်အစစ်”

"အိုး? အကယ်၍ သူက ဒီစတိုးဆိုင်ရဲ့ ပိုင်ရှင်အစစ်သာဆိုရင် ပိုင်ဆိုင်မှုလက်မှတ်ကို ပြလေ။ အဲ့တာရှိမှပဲ ကျွန်မယုံမှာပေါ့” ဥပဒေကို သူမနားလည်ပြီး ပိုင်ဆိုင်မှုလက်မှတ်ကို စစ်ဆေးထား၍ ဒီစတိုးဆိုင်ပိုင်ရှင်က ဘယ်သူလဲဆိုတာ သေချာသိပြီးမှသာ စာချုပ်ကို လက်မှတ်ရေးထိုးခဲ့ခြင်းဖြစ်သည်။ သူမ လှည့်စားခံရတာ မဟုတ်ပေ။

ထို့ကြောင့် ဤစတိုးဆိုင်၏ ပိုင်ရှင်အစစ်ဟုခေါ်သောအမျိုးသားမှာ ပိုင်ဆိုင်မှုလက်မှတ် မရှိ‌လောက်ဟု ဆိုလိုခြင်းဖြစ်သည်။

“မင်း…” အဲဒီလူက စိတ်ဆိုးသွားသည်။ သူတို့မှာ ပိုင်ဆိုင်မှု လက်မှတ်ရှိရင် ဖျက်ဆီးဖို့ ဒီကို လာမှာ မဟုတ်‌ပေ။ ပိုင်ဆိုင်မှုလက်မှတ်ဖြင့် ဤဆိုင်ကို သူတို့အလိုရှိသမျှ အားလုံး လုပ်နိုင်သည်။ အတိအကျပြောရရင် သူတို့မှာ ပိုင်ဆိုင်မှုလက်မှတ်မရှိ၍ ဒီညစ်ပတ်တဲ့လှည့်ကွက်ကို သူတို့ကစားရခြင်းဖြစ်သည်။

မမျှော်လင့်ဘဲ ကုနင်းသည် ကိုင်တွယ်ဖြေရှင်းရန် လုံးဝ မလွယ်ကူခဲ့သဖြင့် ထိုလူသည် သည်းခံစိတ် မရှိတော့ပေ။ တခဏချင်းမှာပဲ သူက ပြင်းပြင်းထန်ထန် ခြိမ်းခြောက်သည်။ “စကားပြောပြီး အချိန်ဖြုန်းမ‌နေ‌တော့ဘူး။ မင်း ဒီဆိုင်ကနေ အခုချက်ချင်း ထွက်သွားရင် ပိုကောင်းမယ် ဒါမှမဟုတ်ရင် ရက်စက်တဲ့အတွက် ငါတို့ကို အပြစ်မတင်နဲ့!"

"ဟုတ်ပါပြီ ရှင်ဘာလုပ်နိုင်လဲဆိုတာ ကျွန်မကိုပြပါ!" ကုနင်းက အကြောက်အလန့်မရှိ နှိုးဆော်လိုက်သည်။ ပြန်မတိုက်ရင် သူမကို အနိုင်ကျင့်ဖို့ လွယ်တယ်လို့ သူတို့ ထင်ကြလိမ့်မည်။

“မင်း…” ထိုလူက စိတ်ဆိုးသွားပြန်သည်။ ဒီလို ရဲရင့်လွန်းတဲ့ မိန်းကလေးတစ်ယောက်ကို ပထမဆုံးတွေ့ဖူးတာပါ။ အကြမ်းဖက်မှုကို မသုံးဘူးလို့ သူမထင်‌နေတာလား။

ကုနင်း၏ စကားကြောင့် ထိုလူက စိတ်ဆိုးသွားသည်။

“ကောင်းပြီ! အဲဒါဆိုရင် ငါဘာလုပ်နိုင်တယ်ဆိုတာ မင်းကိုပြရ‌သေးတာ‌ပေါ့။ အခုချက်ချင်း ဆိုင်ထဲက ပစ္စည်းအားလုံးကို ဖျက်စီးလိုက်!”

သူတို့သည် လူများကို ထိခိုက်စေလိုသော ရည်ရွယ်ချက်မရှိဘဲ ပစ္စည်းများကို ချိုးဖျက်ရန်သာ ရည်ရွယ်သော်လည်း ကုနင်းနှင့် အခြားသူများက ၎င်းတို့ကို ထိုသို့ပြုလုပ်ရန် ခွင့်ပြုမည်မဟုတ်ပေ။ ထို့ကြောင့် သူတို့ဘာမှ မလုပ်မီ ကုနင်းနှင့် အခြားလူများက စတင်တိုက်ခိုက်ခဲ့သည်။

သူတို့ထဲက တစ်ယောက်နဲ့တင် အဲဒီလူတွေကို အသာ‌လေးအနိုင်ယူနိုင်ပေမယ့် အဲဒီလူတွေကို သူတို့အားအနိုင်ကျင့်ဖို့ မလွယ်ဘူးဆိုတာ သိစေချင်တာကြောင့် အတူတကွ တိုက်ခိုက်ဖို့ သွားလိုက်ကြသည်။

သူတို့သည် မိန်းမသားများဖြစ်သောကြောင့် ထိုအမျိုးသားများကို တိုက်ခိုက်အနိုင်ယူရန် မဖြစ်နိုင်၍ ကြည့်ရှုသူများ စိတ်ပူခဲ့ကြသည်။ သို့သော်လည်း ကုနင်းနှင့် အခြားသူများ၏ အရည်အချင်းကြောင့် မကြာမီပင် အံ့သြသွားကြရသည်။

စက္ကန့်ပိုင်းအတွင်းမှာပဲ ပစ္စည်းတွေကို ပျက်စီးအောင်ကြိုးစားတဲ့ အမျိုးသားတွေက မြေပြင်ပေါ်ကို ရိုက်နှက်ခံရပြီး ထပင်မထနိုင်တော့ကာ ဒဏ်ရာအပြင်းအထန်ရသွားပုံရသည်။

“ဘုရား‌ရေ အရမ်းအံ့သြစရာကောင်းတာပဲ။ သူတို့ လွယ်လွယ်လေးနဲ့ အနိုင်ယူနိုင်တယ်!”

***