ဝမ်ဟွမ်သည် ဦးညွှတ်၍ ခွင့်လွှတ်ရန် တောင်းဆိုခြင်း

ဤသည်မှာ ကျုံးရှင်မြို့ဝန်၏ မိသားစုနှင့် ပတ်သက်သည့် အကြောင်းအရာမဟုတ်ကြောင်း လူတိုင်း နားလည်လိုက်ကြသည်။ ကျုံးရှင်မြို့ဝန်၏မိသားစုနှင့် စစ်ဝံပုလွေဂိုဏ်းတို့သည် ထိုသို့သောဆက်ဆံရေးမျိုး မရှိကြပေ။ အကျိုးခံစားခွင့်များ ဖလှယ်ကြလျှင်ပင် တိတ်တဆိတ်သာ ပြုလုပ်ကြပေလိမ့်မည်။ ယခုကဲ့သို့ ပွင့်လင်းမြင်သာသောနေရာတွင် ထိုသို့သော လဲလှယ်မှုမျိုး လုပ်ဆောင်ရန် မဖြစ်နိုင်ပေ။

ထို့ကြောင့် ချူးယွင်ဖန်းကြောင့်ဖြစ်သည်မှာ သိသာထင်ရှားသည်။ ချူးယွင်ဖန်းသာလျှင် စစ်ဝံပုလွေဂိုဏ်း၏ကမ်းလှမ်းချက်နှင့် ထိုက်တန်ပေလိမ့်မည်။ သို့သော် ချူးယွင်ဖန်းသည် စစ်ဝံပုလွေဂိုဏ်းက ဤမျှရက်ရောစေရန်အတွက် မည်သို့သော အပြုအမူမျိုးလုပ်ဆောင်ခဲ့သည်ကို ၎င်းတို့ နားမလည်နိုင်ကြပေ။ ထိုလမ်းမပေါ်ရှိ ကြုံရာကျပန်းဆိုင်တစ်ခုသည် လွန်စွာတန်ဖိုးကြီးနေပြီဖြစ်ရာ၊ ချူးယွင်ဖန်း ပေးအပ်ခဲ့သည့် အကူအညီများကို ပြန်ပေးဆပ်ရန် လုံလောက်နေပြီဖြစ်သည်။ လမ်းတစ်ခုလုံးသည် အဆင့်နိမ့် ဝိညာဉ်ကျောက်တုံး သန်းပေါင်းများစွာထက် များစွာတန်ဖိုးရှိလှသည်။ ခုန်းလုံမြို့တစ်ခုလုံးတွင် ဤသို့သော ရွှေဥမျိုး အများအပြားမရှိလှပေ။

"ဒါက နည်းနည်းတော့ မသင့်တော်ဘူးထင်တယ်။ အရမ်းတန်ဖိုးကြီးလွန်းတယ်’’ ချူးယောင်ဝေ့သည် သခင်မကြီး စကားမပြောမီတွင် အလျင်အမြန် ပြောလိုက်သည်။

"ဒါတွေအတွက် စိတ်ပူစရာမလိုပါဘူး။ ကျုပ်တို့ဂိုဏ်းအတွက် ဆေးဆရာချူး လုပ်ပေးခဲ့တာတွေနဲ့ ယှဉ်ရင် ဒါက သမုဒ္ဒရာထဲက ရေတစ်စက်သာသာပဲရှိတာပါ" ဂိုဏ်းခေါင်းဆောင်က ပြောလိုက်သည်။

ဤလမ်းမပေါ်ရှိ မြေစာချုပ်များကို လွှဲအပ်ချိန်တွင် နှလုံးသားနာကျင်ရသော်လည်း စစ်ဝံပုလွေဂိုဏ်းတစ်ခုလုံးကို ချူးယွင်ဖန်း ကယ်တင်ခဲ့သည့်ကိစ္စနှင့် နှိုင်းယှဥ်ပါက၊ မပြောပါ့လောက်ပေ။ ချူးယွင်ဖန်းကြောင့်သာမဟုတ်ပါက၊ ဤလမ်းပေါ်ရှိ ဆိုင်များကိုလည်း ကယ်တင်နိုင်မည် မဟုတ်ပေ။ ပို၍အရေးကြီးသည့်အချက်မှာ ချူးယွင်ဖန်းသည် ပုရှန်ဂိုဏ်း၏ ဖျက်ဆီးမှုမှ ကာကွယ်ပေးနိုင်ခဲ့သည့် တစ်ဦးတည်းသောလူဖြစ်သည်။ ထိုကာကွယ်ပေးမှုအတွက် ပေးဆပ်ရမည့် အဖိုးအခများရှိနေသည်။

ဤကမ္ဘာပေါ်တွင် အလကားရသည့် နေ့လယ်စာဟူ၍ မရှိပေ။ အကြောင်းရင်းအစစ်အမှန်ကို လူတိုင်း သိသွားပါက၊ စစ်ဝံပုလွေဂိုဏ်း၏ ရက်ရောမှုဖြင့် အလွန်တုန်လှုပ်နေမည်မဟုတ်ပေ။ ဤသည်မှာ စစ်ဝံပုလွေဂိုဏ်းတစ်ခုလုံးကို ကယ်တင်ခဲ့သည့်ကိစ္စနှင့်နှိုင်းယှဥ်ပါက၊ မပြောပါ့လောက်ပေ။ ချူးယောင်ဝေ့သည် ချူးယွင်ဖန်းကို လှည့်ကြည့်လိုက်ပြန်သည်။ ချူးယွင်ဖန်းသည် ဤအင်အားကြီး ပုဂ္ဂိုလ်များကို တစ်ယောက်ပြီး တစ်ယောက်ပြီး ထွက်ပေါ်လာအောင် မည်သို့ပြုလုပ်ခဲ့သည်ကို သူ မသိပေ။

"ဆေးဆရာချူး၊ တစ်ခုခုပြောပါဦး။ ဒီနေ့ အလျင်စလိုလာလိုက်ရတော့ ဘာမှသိပ်မပြင်ဆင်နိုင်ခဲ့လို့ တောင်းပန်ပါတယ်။ ကျုပ်ကို စိတ်မရှိပါနဲ့" ချူးယောင်ဝေ့က သူ၏လက်ဆောင်ကို လက်မခံချင်ကြောင်းတွေ့လိုက်ရသည့်အတွက် ဂိုဏ်းခေါင်းဆောင်က စိတ်ပူစပြုလာသည်။

အခြားလူများသည် ထိုဖြစ်စဥ်ကိုမြင်သောအခါ မူးလဲလုနီးပါးပင် ခံစားနေရသည်။ ၎င်းတို့သည် ဤသို့သောမြင်ကွင်းမျိုးကို တစ်ကြိမ်တစ်ခါမှ မမြင်တွေ့ဖူးကြပေ။ လူတစ်ဦးသည် တစ်ဖက်လူကို ၎င်းတို့၏ ရက်ရောသောလက်ဆောင်ကို လက်ခံစေချင်နေ၍ တစ်ဖက်လူသည် ထိုလက်ဆောင်ကို လက်မခံပါက၊ ၎င်းတို့ကို စိတ်ပျက်သွားစေမည့်နှယ် ထင်မှတ်ရစေသည်။

လူအများသည် စိတ်ထဲတွင် အော်ဟစ်နေကြသည်။ 'ကျုံးရှင်မြို့ဝန်မလိုချင်ရင် ကျုပ်တို့ ယူပါ့မယ်။ အဲဒီမြေစာချုပ်တွေကို ကျုပ်တို့ကို ပေးလိုက်စမ်းပါ'

ဂိုဏ်းခေါင်းဆောင်၏ စကားလမ်းကြောင်းသည် သူ့ဆီ ရောက်ရှိလာကြောင်း မြင်လိုက်ရသဖြင့် ဤကိစ္စကို ရှောင်လွှဲ၍ မရနိုင်တော့ကြောင်း ချူးယွင်ဖန်း သဘောပေါက်သွားလေသည်။ ထို့ကြောင့် သူက ချက်ချင်း ပြောလိုက်သည်။

"လက်ခံလိုက်ပါ၊ သခင်မကြီး။ ဒါက စစ်ဝံပုလွေဂိုဏ်းရဲ့ ရိုးသားမှုသင်္ကေတတစ်ခုဆိုရင်လည်း မမှားပါဘူး"

ချူးယွင်ဖန်း၏စကားကို ကြားလိုက်ရသောအခါ ဂိုဏ်းခေါင်းဆောင်က သက်ပြင်းတစ်ချက်ချလိုက်သည်။ အခြားလူများသည် သူ၏ ထိုအမူအရာကို မြင်လိုက်ရသောအခါ အံကြိတ်လိုက်ကြသည်။ သူ၏လက်ဆောင်ကို လက်ခံလိုက်သည့်အတွက် အရာအားလုံးသည် ဖြစ်သင့်ဖြစ်ထိုက်သောအရာများဖြစ်နေသကဲ့သို့ ဂိုဏ်းခေါင်းဆောင်က စိတ်သက်သာရာရရှိသွားပုံပေါ်သည်။

"ယွင်ဖန်း၊ စစ်ဝံပုလွေဂိုဏ်းက မင်းကို ပေးနေတာဆိုတော့ ဒီမြေစာချုပ်တွေကို မင်းပဲ သိမ်းထားသင့်တယ်"

သခင်မကြီးက ခေတ္တစဉ်းစားပြီးနောက် မြေစာချုပ်များကို ချူးယွင်ဖန်းဆီ ပေးလိုက်သည်။ စစ်ဝံပုလွေဂိုဏ်းများသည် ချူးမိသားစုကိုမဟုတ်ဘဲ ချူးယွင်ဖန်းကို ဦးတည်နေကြောင်း သူမ မြင်တွေ့နိုင်သည်။ ထို့ကြောင့် ဤမြေစာချုပ်များကို ချူးယွင်ဖန်းထံ ပေးအပ်ခြင်းသည် အသင့်လျော်ဆုံးဖြစ်သည်။

"ဒီလိုလုပ်ဖို့ မလိုပါဘူး။ ဒီမြေစာချုပ်တွေကို ကျွန်တော်က ဘာအတွက်အသုံးလိုမှာမို့လို့လဲ" ချူးယွင်ဖန်းက ခေါင်းယမ်းလိုက်သည်။ သူသည် ခုန်းလုံမြို့တွင် အချိန်ကြာကြာ နေထိုင်နိုင်မည် မဟုတ်သောကြောင့် ဤမြေစာချုပ်များကို သိမ်းဆည်းထားလျှင်ပင် မည်သို့မျှ အသုံးဝင်နိုင်မည်နည်း။

"ဒါကို သခင်မကြီးပဲ လက်ခံထားလိုက်ပါ။ ကျွန်တော်ရဲ့ သားဝတ်တရား ကျေပွန်မှုလို့ပဲ မှတ်ယူလိုက်ပါ"

ချူးယွင်ဖန်း၏အမူအရာသည် အလွန်စစ်မှန်လှသည်။ အန္တရာယ်ကြုံတွေ့ခဲ့ချိန်တွင်၊ သူ့အတွက် ရပ်တည်ပေးကာ အလွန်ကြင်နာစွာ ဆက်ဆံပေးခဲ့သူသည် သခင်မကြီးသာဖြစ်သည်။ သူ၏ မျက်နှာအသွင်အပြင်ကြောင့်သာဖြစ်သော်လည်း သူသည် ၎င်းအကြောင်းအရာကို အမြဲမှတ်မိနေကာ ကျေးဇူးတင်နေခဲ့သူဖြစ်သည်။ သူ၏အသက်နှင့်နှိုင်းယှဥ်ပါက၊ ဤမြေကွက်များသည် မပြောပါ့လောက်ပေ။

သခင်မကြီးသည် ချူးယွင်ဖန်း၏စိတ်ပိုင်းဖြတ်ထားသည့် အမူအရာကို မြင်လိုက်ရသည့်အတွက် ထိုသို့ပြောလိုက်သည်။

"ဒီလိုဆိုမှတော့ မြေစာချုပ်တွေကို လက်ခံထားလိုက်ပါ၊ ယောင်ဝေ့"

ချူးယွင်ဖန်းသည် သူမ၏ ယခင်က ကြင်နာမှုအား ပေးဆပ်နေခြင်းဖြစ်ကြောင်း သူမ သိမြင်နိုင်သည်၊ သို့သော်လည်း တစ်ချိန်တည်းမှာပင် သူမနှင့် အဆက်အသွယ် အားလုံးကို ဖြတ်တောက်ပြီးနောက် ၎င်းတို့၏ ဆက်ဆံရေးသည် အနာဂတ်တွင် နည်းပါးလာပေလိမ့်မည်။ မည်သို့ပင်ဆိုစေကာမူ၊ သူသည် ကောင်းကင်ယံရှိ လင်းယုန်တစ်ကောင်ဖြစ်သည့်အတွက် မြေပြင်တွင် အချိန်ကြာကြာ နေထိုင်နိုင်မည်မဟုတ်ပေ။

"ဆေးဆရာချူး၊ ကျုပ် ဒီနေ့ အလျင်စလိုလာခဲ့ရပေမယ့် ပထမ ကတိပေးထားတဲ့ ဆုကြေးငွေကို ပြင်ဆင်ထားပြီးပါပြီ"

ဂိုဏ်းခေါင်းဆောင်သည် ထျန်ဟဲလမ်းမပေါ်ရှိ မြေကွက်များအပြင် အခြားသော ဆုကြေးငွေများပင် ပြင်ဆင်ထားခဲ့သည်။ ထျန်ဟဲလမ်းမ၏မြေကွက်တန်ဖိုးကို အခြေခံခြင်းအားဖြင့် အခြားသောဆုကြေးငွေများသည်လည်း နည်းပါးမည်မဟုတ်ပေ။ လူအများအပြားက သွားရည်ယိုလုနီးပါး ခံစားနေရသည်။ ကောင်းကင်ကဲ့သို့ မြင်မားလှသော ဤစည်းစိမ်ဥစ္စာများကို လူတစ်ယောက်ထံ ပေးအပ်ခဲ့ပါက၊ ထိုလူသည် နေ့ချင်းညချင်း ချမ်းသာသွားပေလိမ့်မည်။

သို့သော် ချူးယွင်ဖန်းကို ပြန်ကြည့်သောအခါ သူသည် ၎င်းကို လုံးလုံးလျားလျား ဂရုစိုက်ပုံမပေါ်ပေ။ ထိုအရာများသည် ချမ်းသာကြွယ်ဝမှုများ မဟုတ်သကဲ့သို့ သူ၏အမူအရာတွင် ခံစားချက်ကင်းမဲ့နေသည်။ ချူးယွင်ဖန်းသည် ပြည်ထောင်စုတွင်နေထိုင်စဥ် တိုင်းပြည်တစ်ခုနှင့် နှိုင်းယှဉ်နိုင်သည့်အထိ ချမ်းသာကြွယ်ဝသူဖြစ်ကြောင်း ၎င်းတို့ မသိခဲ့ကြပေ။ သူ၏ ပိုင်ဆိုင်မှုတန်ဖိုးသည် ဤလူများ ခန့်မှန်းနိုင်သော အရာမျိုးမဟုတ်ပေ။

"အင်း၊ ကောင်းပြီ" ချူးယွင်ဖန်းက ခေါင်းညိတ်လိုက်သည်။

ရုတ်တရက်ဆိုသလိုပင် ဂိုဏ်းခေါင်းဆောင်သည် ချူးယွင်ဖန်းကို ဂရုတစိုက်ကြည့်ပြီးနောက် တီးတိုးပြောလိုက်သည်။

"ဆေးဆရာချူး၊ အမွေခံဓားစံအိမ်ရဲ့ ပိုင်ရှင်ကလည်း ခင်ဗျားနဲ့ တွေ့ချင်လို့ပါတဲ့"

ချူးယွင်ဖန်းက အနည်းငယ် အံ့အားသင့်သွားသည်။ ဂိုဏ်းခေါင်းဆောင်သည် ဝမ်ဟွမ်၏ သတင်းစကားကို တစ်ဆင့်ပို့ဆောင်လာမည်ဟု သူ မမျှော်လင့်ထားခဲ့ပေ။ ဝမ်ဟွမ်နှင့် သူ၏တိုက်ပွဲသည် ခုန်းလုံမြို့ရှိ လူတိုင်းကို ထိတ်လန့်သွားစေကြောင်း သိထားရပေလိမ့်မည်။ ဝမ်ဟွမ်သည် သူ၏လက်ချက်ကြောင့် သေလုနီးပါးဖြစ်ကာ ထိတ်လန့်တကြား ထွက်ပြေးခဲ့ရသည်။

ဤတိုက်ပွဲသည် ချူးယွင်ဖန်း၏ ဂုဏ်သတင်းကို တည်ဆောက်ပေးခဲ့သည်။ ဝမ်ဟွမ်သည် ကံကောင်းမည့် နေ့ရက်များကို ရေတွက်လျက် ကလဲ့စားချေနိုင်မည့် နည်းလမ်းကို တွေးတောကာ အံကြိတ်နေမည်ဟု သူ တွေးထင်ခဲ့သည်။ ထို့ကြောင့် ဝမ်ဟွမ်သည် သူ့ကို မည်သို့ကြောင့် တွေးချင်နေရခြင်းဖြစ်သနည်း။

ဤဖြစ်စဥ်သည် အလွန် သိပ္ပံနည်းကျပုံမပေါ်ပေ။ ချူးယွင်ဖန်းက သူ့ကို ရုတ်တရက် သတ်ဖြတ်လာမည်ကို ဝမ်ဟွမ်က မကြောက်ရွံ့ခြင်းဖြစ်လေသလော။ ထိုသို့ပြုလုပ်ရန် မဖြစ်နိုင်ခြင်း မဟုတ်ပေ။ ချူးယွင်ဖန်း၏ ခွန်အားဖြင့် ထိုသို့လုပ်ဆောင်ရန် မခက်ခဲလှပေ။

"ဝမ်ဖေးဟုန်က ကျုပ်တို့ဂိုဏ်းထဲမှာ ဒူးထောက်နေသေးတာကို မေ့သွားပြီလား၊ ဆေးဆရာချူး"

ထိုအချိန်တွင် စစ်ဝံပုလွေဂိုဏ်းခေါင်းဆောင်သည် ချူးယွင်ဖန်းကို ခါးသီးစွာ ပြုံးပြလိုက်သည်။ ဝမ်ဟွမ်သည် ချူးယွင်ဖန်းနှင့် တိုက်ခိုက်ချိန်တွင် အလွန်ထိတ်လန့်သွားသည့်အတွက် သူသည် ချူးယွင်ဖန်းကို ကိုင်တွယ်ရန် နည်းလမ်းမရှိပေ။ သို့သော် ဝမ်ဟွမ်သည် အလွန်ဒေါသထွက်သွားသဖြင့် စစ်ဝံပုလွေဂိုဏ်းတစ်ခုလုံးကိုပင် ဖျက်ဆီးလုနီးပါးဖြစ်ခဲ့ရသည်။ ထို့ကြောင့် ၎င်းတို့သည် ဝမ်ဟွမ်ကို ၎င်းတို့နှင့်အတူအဆုံးသတ်ရန် ခြိမ်းခြောက်ရုံမှလွဲ၍ အခြားရွေးချယ်စရာနည်းလမ်း မရှိခဲ့ပေ။

ဝမ်ဟွမ်သည် ချူးယွင်ဖန်း၏စည်းတံဆိပ်ကို ချိုးဖျက်ရန် နည်းလမ်းမရှိတော့ကြောင်း မကြာမီတွင် သဘောပေါက်သွားခဲ့သည်။ စည်းတံဆိပ်သည် အလွန်အဆိပ်ပြင်းလှသည်။ ၎င်းသည် တစ်ခုခုဖြင့် တိုက်ခိုက်ခံရချိန် ခိုင်ခံ့လာစေရန်အတွက် ကောင်းကင်နှင့် မြေကြီး၏ ဝိညာဉ်စွမ်းအင်များကို စုပ်ယူနိုင်ခဲ့သည်။ တစ်ချက်တည်း မချိုးဖျက်နိုင်ပါက၊ ဖျက်ဆီးရန် ကြိုးစားလေ ပို၍ ခိုင်ခံ့လာလေဖြစ်သောကြောင့် သူ၏သားဖြစ်သူသည် ပို၍နာကျင်ရလေဖြစ်သည်။

ဝမ်ဟွမ်သည် ချူးယွင်ဖန်းထံတွင် ခေါင်းငုံ့ရန်မှတစ်ပါး ရွေးချယ်စရာမရှိပေ။ မည်သို့ပင်ဆိုစေကာမူ သူသည် ချူးယွင်ဖန်းကို တိုက်ခိုက်ရာတွင် အနိုင်မရခဲ့ပေ။ ယခုကဲ့သို့ ခေါင်းမငုံ့ပါက၊ သူ၏သားဖြစ်သူသည် စစ်ဝံပုလွေဂိုဏ်း၏ဌာနချုပ်တွင် သေဆုံးသွားနိုင်သည်။

"ကျုပ် သိပြီ" ချူးယွင်ဖန်းက ချက်ချင်း သဘောပေါက်သွားသည်။

‘’ဒါဆို သူ အခုဘယ်မှာလဲ"

ချူးယွင်ဖန်းက စိတ်မဆိုးကြောင်း မြင်လိုက်ရသောအခါ ဂိုဏ်းခေါင်းဆောင်က အလွန်ဝမ်းသာသွားသည်။ ဝမ်ဟွမ်သည် ချူးယွင်ဖန်းကို အနိုင်မယူနိုင်သော်လည်း စစ်ဝံပုလွေဂိုဏ်းကို ညှဉ်းပန်းနှိပ်စက်နိုင်ဆဲဖြစ်သည်။ စစ်ဝံပုလွေဂိုဏ်းသည် ပြီးခဲ့သည့်ရက်စွာများအတွင်း ကံဆိုးမိုးမှောင်ကျခဲ့ရသည်။

"သူ ဒီကို မကြာခင် ရောက်လာတော့မှာပါ။ သူ ဆေးဆရာချူးကို တောင်းပန်ဖို့အတွက်ဆိုပြီး လက်ဆောင်ပြင်ဆင်နေပါတယ်"