ကာဗွန်အခြေခံအသက်၏ အကန့်အသတ်များကို ချိုးဖြတ်ခြင်း

ဟာရီကိန်းများ

ငလျင်များ။

နှင်းမုန်တိုင်းများ

သံလိုက်စက်ကွင်း လျှပ်စီးများ

အာကာသတုန်ခါမှုများ

ရေနတ်ဘုရားက ဒြပ်စင်ငါးခုပေါင်းစည်းခြင်းကို အောင်မြင်ပြီးနောက် လေဟာနယ်ထဲသို့ ဖြတ်ကျော်၍ ကျိုတိုတက္ကသိုလ်အထက်သို့ဆင်းသက်လာသောအခါ မိုင်တစ်ရာအတွင်းတွင် ထိုသို့သော သဘာဝဘေးအန္တရာယ်များနှင့်တကွ ကမ္ဘာပျက်ကပ်များကို ကြုံတွေ့ခဲ့ရသည်။ လင်းဇီချန်က ရေနတ်ဘုရားကိုမြင်လိုက်သည့်အခိုက်တွင် သူ၏ ခန္ဓာကိုယ်ရှိ အာရုံကြောတိုင်းက တင်းမာလာကာ သူ၏ သွေးစွမ်းအင်နှင့်ဝိဉာဥ်စွမ်းအင်တို့ကိုတွန်းလှန်ရန် အသင့်ဖြစ်နေပြီဖြစ်သည်။

သို့သော် သူသည် ရှုပ်ထွေးမှုအချို့ကို ခံစားခဲ့ရသည်။

ဒြပ်ငါးပါးပေါင်းစည်းမှုတွင် အောင်မြင်ခဲ့သော ရေနတ်ဘုရားသည် ဤနေရာတွင် အဘယ်ကြောင့် ပေါ်ထွန်းလာမည်ကို သူနားမလည်နိုင်ခဲ့ပေ။

သူ ဒြပ်စင်ငါးမျိုးပေါင်းစည်းနိုင်ခဲ့ပြီလေ

ဒီမှာ တစ်ခုခုလိုချင်တာရှိသေးတာလား။

ဤသို့တွေးတောရင်းဖြင့် စကားပြောလေ့ပြောထမရှိသော ရှန်ချင်းဟန်က ရုတ်တရက် မေးခွန်းထုတ်လိုက်သည်။

“ရှေးဘိုးဘေးအဆင့် ကျွမ်းကျင်သူတွေက အခုတည်းက မသေနိုင်တဲ့စွမ်းအားတွေရှိနေပြီ၊ လုံလောက်တဲ့ စွမ်းအားတွေ ရှိနေပြီ၊ ဒါတောင်မှ နောက်ထပ် ခြေတစ်လှမ်း လှမ်းဖို့ ကမ္ဘာမြေကြီးကို ဖျက်ဆီးချင်ရတာလဲ။ အဲ့တာ ဘာကိုဆိုလိုတာလဲ”

"ကမ္ဘာမြေနဲ့ မူလမြေနှစ်ခုလုံးပျက်ဆီးသွားရင် ရှင်က တစ်ကမ္ဘာလုံးမှာ ကျန်တဲ့ သက်ရှိဖြစ်မှာ အထီးကျန်မယ်လို့ မခံစားရဘူးလား”

ရှန်ချင်းဟန်က ထိုသို့ပြောလျက် သူမ၏ အသံသည် ပျော့ညံ့နေကာ အသက်ကင်းမဲ့နေသည်။ သို့ထိတိုင် ထိုစကားလုံးများက လင်းဇီချန်ကို အံအားသင့်စေခဲ့သည်။ ငယ်စဉ်ကလေးဘဝကတည်းက ကြောက်ရွံ့တတ်သော ရှန်ချင်းဟန်သည် ယခုအခါ ဒြပ်စင်ငါးခုပေါင်းစည်းခြင်းအောင်မြင်ခဲ့သော ရေနတ်ဘုရားကို မေးခွန်းထုတ်ဝံ့မည်ကို သူဘယ်တုန်းကမှ စိတ်ကူးမယဉ်နိုင်ခဲ့ပေ။

ဤသည်က သူမ၏ စရိုက်နှင့် လုံးလုံးလျားလျား မကိုက်ညီပေ။

"စကြာဝဠာကြီးကျယ်ဝန်းတယ်၊ သက်ရှိသတ္တဝါတွေတည်ရှိတဲ့ တခြားနေရာတွေရှိတယ်။ ငါအထီးကျန်နေမှာမဟုတ်ဘူး" ရေနတ်ဘုရားက ရှန်ချင်းဟန်၏ အမေးကို အေးဆေးစွာဖြင့် ပြန်ဖြေသည်။

စကြဝဠာဇစ်မြစ်ကို ကိုယ်စားပြုသော ကမ္ဘာ့ဒြပ်ငါးပါးထဲမှ နတ်ဘုရားများအနက် ခံစားချက်အကင်းမဲ့ဆုံးနတ်ဘုရားတစ်ပါးဖြစ်သောကြောင့် မြင့်မားသောဘဝပုံစံသို့ ပြောင်းလဲတိုးတက်စေရန်အတွက်၊ ၎င်းသည် အရာအားလုံးကို စွန့်လွှတ်နိုင်သည်။ ရေနတ်ဘုရား၏ အဖြေကိုကြားသောအခါ ရှန်ချင်းဟန်က အလွန်ရက်စက်သည်ဟု ခံစားမိသည်။

သူမက ရေနတ်ဘုရား၏ မျက်လုံးတည့်တည့်သို့ သတ္တိစုဆောင်း၍ ကြည့်ကာ ထပ်မံစိန်ခေါ်လိုက်သည်။

“အခြားသတ္တဝါတွေရှိတဲ့နယ်မြေတွေရှိရင်တောင် ရှင် အပြင်လူနဲ့ရောနေဖို့လွယ်မှာမဟုတ်ဘူး”

“အရေးမကြီးပါဘူး၊ ကမ္ဘာသစ်ကို ငါဖန်တီးမယ်” ရေနတ်ဘုရားက အေးစက်စွာပြောလိုက်သည်။

ထို့နောက် အက်ကွဲသံတစ်ခုထွက်လာကာ အောက်ရှိ ရှန်ချင်းဟန်သည် ရုတ်တရက် ရေခဲရုပ်သို့ပြောင်းလဲသွားသည်။ သူမ၏ ဖျောင်းဖျရန်ကြိုးပမ်းမှုက မအောင်မြင်ခဲ့ပေ။ ရေနတ်ဘုရားက သူမကို ရေခဲထဲတွင် လှောင်ထားလိုက်သည်။

“ဟန်ဟန်”

သမီးဖြစ်သူက ရုတ်တရက် ရေခဲရုပ်အဖြစ်ပြောင်းသွားသည်ကိုမြင်လိုက်ရသောအခါ အနီးဆုံးနေရာရှိ ရွှီမုန့်က ထိတ်လန့်တကြားအော်လိုက်သည်။

ထို့နောက် စိတ်တည်ငြိမ်မှု အမြန်ပြန်ရလာပြီး အကူအညီတောင်းရန် လင်းဇီချန်အားပြောလိုက်သည်။

“ရှောင်ချန် ကျေးဇူးပြုပြီး ကယ်ပါ..."

သူမ၏ စကားမဆုံးမီတွင် လင်းဇီချန်သည် ပူလောင်သောသွေးစွမ်းအားကိုထုတ်ကာ ရှန်ချင်းဟန်ကို ရေခဲပြင်မှချက်ချင်းလွှတ်ပေးခဲ့သည်။ ယခုတင် အေးခဲနေရာမှ ပြန်လွတ်လာသည့် ရှန်ချင်းဟန်က အနည်းငယ် အံ့သြနေသည်။ ရေနတ်ဘုရားဆီမှ ရေခဲပြင်ဖုံးအုပ်မှသည် သူမ၏ ခန္ဓာကိုယ်သာမက အသိစိတ်ပင်လယ်ကိုပါ ချိပ်ပိတ်ထားခဲ့သည်။ ထိုစက္ကန့်ပိုင်းအတွင်းတွင် သူမ၏ အသိစိတ်က လုံးဝ ရပ်တန့်သွားခဲ့ကာ မည်သို့ဖြစ်ပျက်ခဲ့သည်ကို မသိလိုက်ပေ။

ရုတ်တရက်ပင် အေးစက်နေသော နောက်ထပ် အသံတစ်ခု ထပ်ပေါ်လာသည်။

ရှန်ချင်းဟန်ကို လွှတ်ပေးပြီးပြီးချင်းတွင် လင်းဇီချန်သည်လည်း မိမိ ရေခဲရုပ်အဖြစ်ပြောင်းလဲသွားသည်ကိုသိလိုက်ရသည်။ သို့သော် ချက်ချင်းဆိုသကဲ့သို့ပင် လင်းဇီချန်က အကန့်အသတ်မဲ့သော ပူလောင်စေသည့် သွေးစွမ်းအင်များကိုထုတ်လွှတ်ကာ ရေခဲများကို ကွဲကြေစေလျက် ကောင်းကင်ထက်ရှိ ရေနတ်ဘုရားဆီချီတက်သွားသည်။

ရေနတ်ဘုရားက သူ့ကို ယခုတင်တိုက်ခိုက်ခဲ့သည်ကို သူသိသည်။ ထိုကြီးမားသောတိုက်ပွဲက မလွှဲသာမရှောင်သာဖြစ်သောကြောင့် ယခုတင်ပေါက်ကွဲသွားလည်း ကိစ္စမရှိပေ။

“နန်းဆောင်သခင် အခြားသူတွေကိုခေါ်ပြီး ထွက်သွားပါ။ ကျွန်တော့်အစား သူတို့ကို ဂရုစိုက်ပေးပါ”

ရေနတ်ဘုရားဆီသို့ ချီတက်သွားလျက် လင်းဇီချန်က ချီချင်းမော့ကို အော်ပြောလိုက်သည်။ ချီချင်းမော့က နှုတ်ဖြင့် မတုံ့ပြန်သော်လည်း ချက်ချင်းဆိုသကဲ့သို့ပင် ရှန်ချင်းဟန်နှင့် ၎င်းတို့၏ မိဘများအားလုံးကို သူမ၏ တာအိုဝတ်လုံအင်္ကျီလက်ထဲသို့ ထည့်ကာ ပေါ်ပေါက်တော့မည့် ကြီးမားသောပဋိပက္ခကို ရှောင်ရှားရန် စစ်မြေပြင်မှ လျင်မြန်စွာထုတ်ပေးလိုက်သည်။

၎င်းတို့ထွက်သွားပြီးမကြာမီ၌ပင် လေထုကိုဖြိုခွဲသွားသော ကြောက်မက်ဖွယ်ပေါက်ကွဲမှုကြီးဖြစ်ပေါ်လာသည်။ အသံကြား၍ ခေါင်းလှည့်ကြည့်လိုက်သောအခါ ချီချင်းမော့သည် ကောင်းကင်ထိ ထွက်ပေါ်လာသော မီးတောက်များကိုမြင်လိုက်ရသည်။ ပို၍ အတိအကျပြောရလျှင် ကောင်းကင်တစ်ခုလုံးကို နီမြန်းသွားစေသည့် သွေးစွမ်းအင်၏ ကြီးမားသော အရှိန်အဟုန်ကြောင့်ဖြစ်သည်။

အလွန်စွမ်းအားကြီးလွန်းလှသဖြင့် ဤသွေးစွမ်းအားသည် ရှေးဘိုးဘေးအဆင့် ကျွမ်းကျင်သူများ၏ ကန့်သတ်ချက်များကို ကျော်သွားလုနီးနီးဖြစ်နေပြီဖြစ်သည်။ ချီချင်းမော့က နောက်မှ သွေးစွမ်းအားများပေါက်ကွဲမှုကို ကြည့်လျက် အေးစက်သောမျက်နှာထက်တွင် သိသိသာသာတုန်လှုပ်သွားသည်။ လင်းဇီချန်သည် အရှိန်အဟုန်ဖြင့် တိုးတက်လာနေသည်။

နှစ်နှစ်မပြည့်မီတွင်၊ သူ၏ သွေးမျိုးဆက်စွမ်းအားအဆင့်သည် “အဆင့်မြင့်အဆင့်”မှ “ရှေးဘိုးဘေးအဆင့်နဝမအဆင့်အထွတ်အထိပ်”အထိ အရှိန်အဟုန်မြင့်လာသည်။ ထို့အပြင်၊ သူထုတ်လွှတ်သော သွေးမျိုးဆက်စွမ်းအားဆိုင်ရာ ဖိအားသည် သူ့ကိုယ်ပိုင် သွေးမျိုးဆက်အဆင့်ကို ကျော်လွန်သွားပြီဖြစ်ကာ ရှေးဘိုးဘေးအဆင့်ကိုကျော်လွန်၍ နားမလည်နိုင်သော အနေအထားသို့ ရောက်လုနီးနီး ဖြစ်နေသည်။

…

ဘမ်း ဘမ်း ဘမ်း

၎င်းတို့နောက်ရှိ ကောင်းကင်ယံထက်တွင် ကျယ်လောင်သောပေါက်ကွဲသံများ အဆက်မပြတ်ထွက်ပေါ်နေသည်။ တစ်ချက်ကြည့်လိုက်သည်နှင့်မြင်လိုက်ရသောနေရာတိုင်းသည် မီးတောက်များဖုံးလွှမ်းနေကာ တစ်ပြည်လုံးကို လင်းထိန်သွားစေနိုင်သည်။ မီးတောက်များ၏ အလယ်တွင်သွေးစွမ်းအင်များနှင့်ဖုံးလွှမ်းခံထားရသည့် လင်းဇီချန်သည် အကန့်အသတ်မဲ့ စွမ်းအားကို ကိုင်စွဲကာ ရေနတ်ဘုရားကို အထပ်ထပ် အထပ်ထပ် ရိုက်နှက်သည်။

သူ၏ လက်သီးများ ဖြတ်သွားရာ နေရာသည် ချက်ချင်း ပြိုကျကာ ပျက်ပြယ်သွားသည် ။ ၎င်းတို့လမ်းကြောင်းပေါ်ရှိ အရာအားလုံးသည် သူ၏လက်သီးများမှ စွမ်းအင်များဖြင့် ဝါးမြိုသွားကာ ဗလာနတ္ထိအဖြစ် ပျက်သုဉ်းသွားခဲ့သည်။

သို့သော်၊ ရေနတ်ဘုရားကို ထိမှန်သောအခါ ဤကမ္ဘာကြီးကို ဖြိုခွဲပစ်သည့် တိုက်ခိုက်မှုများသည် အနည်းငယ်မျှ မထိခိုက်စေဘဲ ရွှေမူလစွမ်းအင်က အလွယ်တကူ တားဆီးပစ်လိုက်သည်။ ၎င်းသည် ရွှေဇစ်မြစ်၏ ကာကွယ်မှုအရည်အသွေးဖြစ်ကာ၊ ခံစစ်စွမ်းရည်ကိုအလွန်မြှင့်တင်ထားသည်။

ထိုအချိန်တွင် လင်းဇီချန်သည် အနည်းငယ် မျက်မှောင်ကြုတ်ကာ တင်းတင်းကြိတ်ကာ အံကြိတ်လျက် အနှစ်သာရသွေးကိုထုတ်၍ တလိုတလား စတေးကာ အာကာသကို လုံးဝချေဖျက်နိုင်စွမ်းရှိသော ကြောက်မက်ဖွယ်ကောင်းသော စွမ်းအားကို သယ်ဆောင်ကာ ရွှေရောင်လွှမ်းနေသော ရေနတ်ဘုရားကို တိုက်ခိုက်လိုက်သည်။

ဘမ်း

ထိုလက်သီးချက်ကြောင့် စကြဝဠာထဲမှ ကြယ်များ ပေါက်ကွဲသွားသကဲ့သို့ပင်ဖြစ်သည်။ ကမ္ဘာတစ်ခုလုံးသည် ချက်ချင်းဆိုသကဲ့သို့ပင် ဆူညံသောဟိန်းဟောက်သံများဖြင့် ပြည့်နှက်နေကာ မိုင်တစ်ရာအတွင်း အသံလှိုင်းဖြင့် ထိမိသောအရာမှန်သမျှသည် ဖုန်မှုန့်များအဖြစ် ပြောင်းလဲသွားခဲ့သည်။

ပေါက်ကွဲမှုဖြစ်ပွားချိန်တွင် ရွှေရောင်အလင်းတန်းများ ဝိုင်းရံထားသည့် သွယ်လျသောရုပ်ပုံသဏ္ဍာန်သည် ပေါက်ကွဲနေသော စွမ်းအင်များကြားမှထွက်လာ၍ မြေပြင်ပေါ်သို့ ပြုတ်ကျကာ ဖုန်မှုန့်များ ထွက်လာသည်။

တစ်ချိန်တည်းနီးပါးတွင်၊ လေဟာနယ်ထဲမှ စာသားအကြောင်းကြားချက်များ ပေါ်လာသည်။

[ကမ္ဘာကြီး၏ ကာဗွန်အခြေခံသက်ရှိများ၏ ကန့်သတ်ချက်သို့ ရောက်ရှိသွားသော ထိုးနှက်ချက်တစ်ခုကို သင် လွှတ်လိုက်ပါပြီ။]

[အောင်မြင်မှု- ကမ္ဘာ၏ ကာဗွန်အခြေခံသက်ရှိများ၏ ကန့်သတ်ချက်ကို အဆ ၁၀၀ စုစည်းလိုက်ပါသည်။]

[ဆုလာဘ်- သွေးမျိုးဆက်စွမ်းအားဆိုင်ရာစွမ်းအင် - ပုံစံမျိုးစံကို ရယူပါ။]

[ပုံစံမျိုးစုံ- သင့်ခန္ဓာကိုယ်သည် ကမ္ဘာကြီး၏ ကာဗွန်အခြေခံအသား၏ ချို့ယွင်းချက်များနှင့် ချည်နှောင်ထားခြင်းမရှိတော့ဘဲ ဆင့်ကဲဖြစ်စဉ်များကို ကျော်လွန်နိုင်စေပါသည်။]

[လက်ရှိတိုးတက်မှု- ၁/၁၀၀]

အောင်မြင်မှုအသစ်တစ်ခုလား။

အကြောင်းကြားစာပါ အကြောင်းအရာကို ဖတ်လိုက်သောအခါ လင်းဇီချန်အံ့သြသွားသည်။

အောင်မြင်မှုအသစ်တစ်ခုပေါ်လာပြီးကတည်းက ၎င်းကို လုံးဝ မေ့ထားခဲ့သည်မှာ ကြာပြီဖြစ်သည်။

သူ၏ အံ့အားသင့်မှုသည် လျင်မြန်စွာ မှိန်ဖျော့သွားကာ ကြည်နူးမှု ခံစားမှုတစ်ခုဖြင့် အစားထိုးသွားသည်။

နောက်ထပ် 99 ကြိမ်။

သူသည် ကာဗွန်အခြေခံသက်ရှိများ၏ ကန့်သတ်ချက်များကို ချိုးဖျက်ကာ သက်ရှိပုံစံများတစ်လျှောက် ဆင့်ကဲဖြစ်စဉ်ကို အောင်မြင်စွာ စွမ်းဆောင်နိုင်ခဲ့သည့် စွမ်းအားပြည့် တိုက်ခိုက်မှု ၉၉ ခုကို ထုတ်လွှတ်ရန် လိုအပ်သည်။ ထိုအချိန်တွင်မှသာ သူသည် ဒြပ်စင်ငါးခုပေါင်းစည်းခြင်းအောင်မြင်ခဲ့သော ရေနတ်ဘုရားကို

ထိုအချိန်တွင်၊ သူသည် ဒြပ်စင်ငါးခုပေါင်းစည်းခြင်းအောင်မြင်ခဲ့သော ရေနတ်ဘုရားကို မုချ ချေမှုန်းနိုင်မည်ဖြစ်သည်။ သူ၏ အသက်လေးလရှိခဲ့ကတည်းက သွေးမျိုးဆက်စွမ်းအားများကို ရရှိရန် [ ကန်ချက်တစ်သောင်း]ကို ပြီးမြောက်ရန် ရုန်းကန်ခဲ့ကာ ထို့နောက် [သုံးမလား ရှုံးမလား]စွမ်းအားကို ရရှိခဲ့ကာ ပိုမိုသန်မာလာခဲ့သည်။

စနစ်အောင်မြင်မှုများ ပြီးမြောက်ခြင်းမှ ရရှိသော သွေးမျိုးဆက်စွမ်းအားတိုင်းသည် အလွန်အစွမ်းထက်လှကာ ယခု လက်ရှိ အသစ်ရလာသော သွေးမျိုးဆက်စွမ်းအား ပုံစံမျိုးစုံက သူ့ကိို ယုံကြည်မှုပြည့်စေသည်။