ကြယ်တာရာမြို့တော်သို့ ဝင်ရောက်ခြင်း၊ အင်တာနက်ကဖေးသို့ ဝင်ရောက်ခြင်း

ရဲဆွေ့က ဟုန်လျန်နှင့် အားရိကိုခေါ်ဆောင်၍ ပင်လယ်ပြင်ဆီသို့ ပျံသန်းသွား၏။

သူတို့ သုံးယောက်က ရဲရှင်းဟွေ့တို့ လက်တွေ့ကမ္ဘာသို့ ပြန်ရန် အသုံးပြုခဲ့သော လမ်းကြောင်းမှတစ်ဆင့် မသေမျိုးကျင့်ကြံရေးလောကသို့ သွားရန် စီစဉ်ထား၏။

ပင်လယ်ပြင်ပေါ်သို့ ရောက်ရှိသောအခါ ရဲဆွေ့က သူ၏အရှိန်အဝါကို ထုတ်လွှတ်လိုက်ရာ မကြာမီပင် ကြီးမားသော ဝဲဂယက်တစ်ခုက ပင်လယ်ရေမျက်နှာပြင်ပေါ်တွင် ပေါ်ပေါက်လာသည်။

၎င်းမှာ ရဲဆွေ့က ဤနေရာ၌ ဝှက်ထားခဲ့သည့် အိမ်မွေးတိရစ္ဆာန်အမျိုးအစား ဂါထာဖြစ်သော ‘ခွိုက်ကျဲ့မန်’ ပင် ဖြစ်၏။

ရဲဆွေ့က နှုတ်ဆက်လိုက်ပြီးနောက် အားရိနှင့် ဟုန်လျန်ကိုခေါ်ဆောင်၍ ဝဲဂယက်ထဲသို့ ပြေးဝင်သွားသည်။

သူတို့ သုံးယောက် ပင်လယ်ထဲသို့ ပျောက်ကွယ်သွားသောအခါ ဝဲဂယက်မှာလည်း ပျောက်ကွယ်သွားပြီး ပင်လယ်ပြင်မှာ တဖန် ငြိမ်သက်သွား၏။

ရဲဆွေ့ မသေမျိုးကျင့်ကြံရေးလောကထဲသို့ ဝင်ရောက်သောအခါ အခြားနယ်မြေသခင်တစ်ဦး၏ တည်ရှိမှုကို ချက်ချင်း ခံစားမိလိုက်သည်။

"အဲဒါက… ဟိုဘက်မှာ မြင့်မြတ်နယ်မြေနန်းတော်ပဲ… မြင့်မြတ်နယ်မြေနန်းတော်ကကောင်တွေ အောင်မြင်သွားပုံပဲ… ခွေးမသား… ငါဖုန်းခေါ်တဲ့အချိန်ကျမှ အဲ့ဒီဘုရားစုတ်က ဘာလို့ဖုန်းမကိုင်ရတာလဲ…"

စိတ်မချရသော သူ့သူဌေးကို စိတ်ထဲမှ ကျိန်ဆဲရင်း ရဲဆွေ့က ဟုန်လျန်နှင့် အားရိကို ဝိညာဉ်သားရဲအင်ပါယာဆီသို့ ပျံသန်း ခေါ်ဆောင်သွားသည်။

ရဲဆွေ့က သူ တစ်ချိန်က တည်ထောင်ခဲ့သည့် ဝိညာဉ်သားရဲအင်ပါယာမှာ ယခု ဘယ်သို့ဖြစ်နေသည်ကို သွားကြည့်ချင်နေ၏။

နယ်မြေသခင် နှစ်ဦးမှာ တစ်ယောက်နှင့်တစ်ယောက် တည်ရှိမှုကို သတိပြုမိသော်လည်း ချက်ချင်း သွားရှာရန် ရည်ရွယ်ချက် မရှိကြပေ။

ရဲဆွေ့က ဝိညာဉ်သားရဲအင်ပါယာသို့ သွား၏။

မုန်ကျစ်ယွီက ကြယ်တာရာဂိုဏ်းသို့ သွား၏။

မုန်ကျစ်ယွီမှာ ရဲရှင်းဟွေ့ကို ရှာဖွေ၍ သူ့ရှေ့တွင် ကြွားဝါရန် စွဲလမ်းနေဆဲ ဖြစ်သည်။

ထို့ကြောင့် မုန်ကျစ်ယွီက ကြယ်တာရာဂိုဏ်းသို့ တစ်ချက် သွားကြည့်ရန် စီစဉ်လိုက်သည်။

ဤတစ်ကြိမ်တွင် မုန်ကျစ်ယွီက ယခုအခါ သူ့တပည့်များဟု သတ်မှတ်နိုင်သည့် ဆာလာပိုင်ကျီနှင့် ရှီထိုက်လုံကိုသာ ခေါ်ဆောင်သွားသည်။

အမှန်ပင် အကြိမ်ကြိမ် စဉ်းစားပြီးနောက် မုန်ကျစ်ယွီက ဆာလာပိုင်ကျီကို သူ့တပည့်အဖြစ် လက်ခံရန် နောက်ဆုံးတွင် ဆုံးဖြတ်လိုက်သည်။

မူလက မုန်ကျစ်ယွီမှာ အနည်းငယ် တွန့်ဆုတ်နေသေးသည်။ နောက်ဆုံးတွင် ဆာလာပိုင်ကျီက သူ၏ကိုယ်ပိုင်သူဌေးကိုပင် ပြိုလဲစေမည့် အလွန်အစွမ်းထက်သော ဗျူဟာမြောက် လက်နက်တစ်ခု ဖြစ်သည်။

သို့သော် သေချာစဉ်းစားပြီးနောက် သူက ယခု နယ်မြေသခင် ဖြစ်နေပြီဖြစ်ပြီး တစ်လောကလုံး၌ အစွမ်းအထက်ဆုံး ပုဂ္ဂိုလ်ဖြစ်ရာ ရှုံးနိမ့်မည်ကို အဘယ်ကြောင့် ကြောက်နေရဦးမည်နည်း။

ထို့အပြင် ရဲရှင်းဟွေ့က ဆာလာပိုင်ကျီထံမှ “သူဌေး” ဟု အခေါ်ခံရမည်ကို ကြောက်သော်လည်း သူက ရဲရှင်းဟွေ့ထက် ပို၍ စွမ်းဆောင်နိုင်ပုံရရန် ဆာလာပိုင်ကျီကို “သူဌေး” ဟု ခေါ်ခွင့်ပြုလိုက်သည်။

"သူဌေး… ကျွန်တော်တို့ ရဲရှင်းဟွေ့ရဲ့ညီမကို သွားဖမ်းကြမှာလား…"

ဆာလာပိုင်ကျီက ပြုံး၍ မေးလိုက်သည်။

"သူ့ကိုဖမ်းဖို့မလိုပါဘူး… ငါက ရဲရှင်းဟွေ့ရဲ့သဲလွန်စကို စုံစမ်းဖို့ ကြယ်တာရာဂိုဏ်းကို သွားချင်တာ… တကယ်တော့ ရဲရှင်းဟွေ့က လက်တွေ့ကမ္ဘာကို ပြန်သွားပြီလို့ ငါသံသယရှိတယ်… ဒါကြောင့်လည်း ငါဒီကိုလာတာ… မသေမျိုးကျင့်ကြံရေးလောကကနေထွက်ပြီး လက်တွေ့ကမ္ဘာကို ဘယ်လိုပြန်ရမလဲဆိုတာ မေးချင်လို့…"

လက်တွေ့ကမ္ဘာအကြောင်း ကြားသောအခါ ရှီထိုက်လုံနှင့် ဆာလာပိုင်ကျီ နှစ်ယောက်စလုံးမှာ အလွမ်းရိပ်များ ထင်ဟပ်သွား၏။

"ငါတို့ လက်တွေ့ကမ္ဘာကိုပြန်ရောက်ရင် ကမ္ဘာကြီးကို အုပ်စိုးလို့ရနိုင်မလားမသိဘူး…"

ရှီထိုက်လုံက စိတ်လှုပ်ရှားစွာ ပြောလိုက်သည်။

"ဟုတ်တယ် ဟုတ်တယ်… ငါအာဖရိကကို ပြန်သွားပြီး ငါ့ကိုအနိုင်ကျင့်ခဲ့တဲ့ကောင်တွေကို ရှာပြီး သင်ခန်းစာပေးချင်တယ်… ပြီးရင်သူတို့ကို ငါ့တပည့်တွေဖြစ်အောင်လုပ်မယ်…"

ထိုသို့ပြောပြီးနောက် ဆာလာပိုင်ကျီက တစ်စုံတစ်ခုကို ရုတ်တရက် သတိရသွားဟန်ဖြင့် မုန်ကျစ်ယွီဘက်သို့ လှည့်လိုက်သည်။

"သူဌေး… ရဲလန်ယွဲ့ဆိုတဲ့တစ်ယောက်က အရမ်းချောတယ်လို့ ကြားတယ်… သူ့ကိုဖမ်းပြီး တစ်ခုခုလုပ်ဖို့ အစီအစဉ်မရှိဘူးလား…"

"အခြေအနေကြည့်ပြီး လုပ်ကြတာပေါ့…"

သူက ကြွက်သားကြီးကြီးနှင့် မိန်းမလျာများသောင်းကျန်းသော ရွှမ်ထီဂိုဏ်း၌ နေသားကျသွားသောကြောင့် ဖြစ်ကောင်းဖြစ်နိုင်သည်။ ယခု မုန်ကျစ်ယွီမှာ အမျိုးသမီးများအပေါ် စိတ်ဝင်စားမှု လျော့နည်းလာသည်။

နောက် ဖြစ်နိုင်ခြေတစ်ခုမှာ သူက နယ်မြေသခင် ဖြစ်လာသည့်အတွက် ထိုလောကီဆန္ဒများမှာ တဖြည်းဖြည်း မှေးမှိန်သွားခြင်းကြောင့် ဖြစ်သည်။

အကယ်၍ ရဲဆွေ့သာ မုန်ကျစ်ယွီ၏ အတွေးများကို သိရှိပါက သူ ဤသို့ ပြောပေလိမ့်မည်။

"ညီလေး… သိပ်မစဉ်းစားနဲ့… မင်းက မင်းရဲ့ဂိုဏ်းကြောင့် အဆိပ်မိနေတာပဲ… ငါနယ်မြေသခင်ဖြစ်လာတာ နှစ်ပေါင်းများစွာကြာပြီ… ဒါပေမဲ့ စားသောက်ပျော်ပါးလိုတဲ့ဆန္ဒက ငါ့ကိုလုံးဝ မစွန့်ခွာသွားဘူး…"

ဤသို့ဖြင့် မုန်ကျစ်ယွီက သူ၏တပည့်နှစ်ယောက်ကို ကြယ်တာရာဂိုဏ်းသို့ ခေါ်ဆောင်လာခဲ့သည်။

ကြယ်တာရာဂိုဏ်း၏ အပြင်ဘက် ကြယ်တာရာမြို့တော်ရှိ အစောင့်အကြပ်များမှာ သိပ်မတင်းကျပ်လှပေ။ သူတို့ ကြယ်တာရာမြို့တော်၌ ဒုက္ခမရှာသရွေ့ မည်သူမဆို မြို့ထဲသို့ ဝင်ရောက် ကစားနိုင်၊ ဈေးဝယ်ထွက်နိုင်၏။

သူတို့ သုံးယောက်အတွက် ကြယ်တာရာမြို့တော်သို့ ပထမဆုံးအကြိမ် ရောက်ဖူးခြင်း ဖြစ်သော်လည်း ကြယ်တာရာမြို့တော်၏ ခေတ်မီသော မြို့ပြဟန်ကို မြင်ပြီးနောက် သူတို့အားလုံးမှာ လွမ်းဆွတ်တမ်းတနေကြ၏။

"သောက်ကျိုးနည်း… ဒီနေရာက တကယ်ကောင်းတာပဲ…"

"ညီလေး… ဟိုမှာကြည့်စမ်း… အီးစပို့ပြိုင်ပွဲတွေတောင်ရှိတယ်…"

စကားပြောနေရင်း ရှီထိုက်လုံက အဆောက်အအုံမြင့်ကြီးတစ်ခုကို လက်ညှိုးထိုးပြလိုက်သည်။

အပေါ်ထပ်တွင် မျက်နှာပြင်ကြီးတစ်ခု ချိတ်ဆွဲထားပြီး ထိုမျက်နှာပြင်ပေါ်တွင် League of Legends ၏ တိုက်ရိုက်ထုတ်လွှင့် ပြိုင်ပွဲတစ်ခု ပြသနေ၏။

မုန်ကျစ်ယွီနှင့် ရှီထိုက်လုံ နှစ်ယောက်စလုံးမှာ League of Legends ကို ကစားဖူးကြသည်။ သူတို့ မသေမျိုးကျင့်ကြံရေးလောကတွင်လည်း League of Legends ဂိမ်းများကို မြင်တွေ့ရလိမ့်မည်ဟု မမျှော်လင့်ထားခဲ့ကြပေ။

သူ အချိန်အတော်ကြာ မကစားခဲ့ရသည့် ကြာမြင့်စွာ လွမ်းဆွတ်နေသော ဂိမ်းကို မြင်သောအခါ မုန်ကျစ်ယွီက ရဲလန်ယွဲ့ကို ရှာဖွေရန် အစီအစဉ်ကို စွန့်လွှတ်လိုက်၏။ သူက အင်တာနက်ကဖေးတစ်ဆိုင်ကို ရှာ၍ ဝင်ရောက်လိုက်သည်။

ကြယ်တာရာမြို့တော်မှ အင်တာနက်ကဖေးများမှာ လက်တွေ့ကမ္ဘာပေါ်မှ အင်တာနက်ကဖေးများနှင့် ဆင်တူသော်လည်း မှတ်ပုံတင်ကတ် ပြရန် မလိုအပ်ဘဲ ငွေဖြည့်ကတ် ဝယ်ယူရန် လိုအပ်သည်။

"မင်းတို့ဆီမှာ ဝိညာဉ်ကျောက်တုံးတွေ ပါလား…"

မုန်ကျစ်ယွီက ရှီထိုက်လုံနှင့် ဆာလာပိုင်ကျီကို မေးလိုက်၏။

"ကျွန်တော် နည်းနည်းယူလာတယ်…"

"ကျွန်တော်လည်း နည်းနည်းယူလာတယ်…"

စကားပြောနေရင်း သူတို့နှစ်ယောက်က ကိုယ်ပေါ်မှ ဝိညာဉ်ကျောက်တုံးအားလုံးကို ထုတ်ယူလိုက်ကြသည်။

ဤသည်ကိုမြင်သော် မုန်ကျစ်ယွီက စကားတစ်ခွန်းမျှ မပြောဘဲ ငွေဖြည့်ကတ် နှစ်ကတ်ကို မှာယူလိုက်သည်။

မူလက သူ အင်တာနက်သုံးရန်အတွက် ဤမျှလောက်သော ဝိညာဉ်ကျောက်တုံးများကို အသုံးပြုမည် မဟုတ်သော်လည်း ဂိမ်းကစားရန် ရောက်လာခြင်း ဖြစ်သည့်အတွက် သူက စကင်များ မဖြစ်မနေ ဝယ်ယူရပေမည်။

စကင်များ၏ ကုန်ကျစရိတ်မှာ အင်တာနက်သုံးခြင်းထက် များစွာ ပိုမို ဈေးကြီး၏။

သူက ငွေဖြည့်ကတ် နှစ်ကတ် ဝယ်ယူပြီး မုန်ကျစ်ယွီနှင့် ရှီထိုက်လုံအတွက် တစ်ယောက်တစ်ကတ် ယူလိုက်၏။ ဆာလာပိုင်ကျီမှာမူ ဂိမ်းကို စိတ်မဝင်စားပေ။

ဆာလာပိုင်ကျီက မုန်ကျစ်ယွီကို သူ လမ်းလျှောက်၍ ဈေးဝယ်ထွက်မည်ဟု ပြောလိုက်သည်။

ဤနေရာက သူ၏အာဖရိကရှိ မွေးရပ်မြေထက် အဆမတန် ကောင်းမွန်သောကြောင့် သူ မဖြစ်မနေ လမ်းလျှောက်ကြည့်ချင်နေသည်။

"အင်း… အင်း… သူဌေးကို ဒီနေရာကို သိမ်းပိုက်ခိုင်းရင် ကောင်းမှာပဲ…"

ဆာလာပိုင်ကျီက ပတ်ဝန်းကျင်ကို ကြည့်၍ ရေရွတ်လိုက်သည်။

ဤအခိုက်တွင် အရပ်မြင့်၍ သန်မာသော လူတစ်ယောက်က ဆာလာပိုင်ကျီ၏ လမ်းကို ပိတ်ဆို့လိုက်ပြီး လက်ကမ်းကြော်ငြာတစ်ခုကို သူ့လက်ထဲသို့ ထည့်ပေးလိုက်၏။

"ညီလေး… အရသာရှိတဲ့အကင်တွေ… အလကားမြည်းစမ်းခွင့်ရှိတယ်… စမ်းကြည့်ချင်လား…"

အသားကင် အလကား မြည်းစမ်းခွင့်ရှိသည်ဟု ကြားသောအခါ ဆာလာပိုင်ကျီ၏ မျက်လုံးများမှာ အရောင်တောက်သွားသည်။ နောက်ဆုံးတွင် အလကားရသည့်အရာကို အခွင့်ကောင်းယူခြင်းမှာ လူသားတို့၏ သဘာဝပင် ဖြစ်သည်။

သူ့ကို လက်ကမ်းကြော်ငြာ ပေးသည့် သန်မာသောလူက ဆာလာပိုင်ကျီ ဘာဘီကျူးဆိုင်ထဲသို့ ဝင်တော့မည်ကို မြင်သောအခါ သူက ချက်ချင်း လက်ကမ်းကြော်ငြာကို ချ၍ သူ့ကို ဧည့်ခံရန် စတင်လိုက်သည်။

"သူဌေး… ဖောက်သည်သစ်တစ်ယောက်လာတယ်…"

ထိုသန်မာသောလူက မီးဖိုချောင်ဘက်သို့ အော်ပြောလိုက်ပြီးနောက် အသားကင်ပန်းကန်များကို ယူလာ၍ စားပွဲပေါ်တွင် ချလိုက်သည်။

သို့သော်လည်း အသားကင်များ ချထားပုံမှာ အလွန် ထူးခြား၏။ ထိုအရသာရှိပုံရသော အသားကင်များကို စားပွဲ၏ အခြားတစ်ဖက်တွင် ချထားပြီး ဆာလာပိုင်ကျီ၏ ရှေ့တွင်မူ အလွန်ရိုးရှင်းပြီး သေးငယ်သော အသားကင်စတိတ်တစ်ပွဲသာ ရှိသည်။

သူက သေးငယ်သော အသားစတိတ်ကို လျင်မြန်စွာ စားသုံးပြီးနောက် စကားတစ်ခွန်းမျှ မပြောဘဲ မျက်နှာချင်းဆိုင်မှ အသားကင်များကို လှမ်းယူလိုက်သည်။

သန်မာသောလူက ဤသည်ကို မြင်သောအခါ သူ့ကို မတားဆီးဘဲ ပြုံးလိုက်၏။

သန်မာသောလူ၏ အမည်မှာ ထောင်ထျဲ့ ဖြစ်ပြီး သူက မူလက အင်ပါယာတစ်ခု၏ ဗိုလ်ချုပ်တစ်ဦး ဖြစ်သည်။

သို့သော် သူ ပိုက်ဆံမပေးနိုင်သည့်အတွက်ကြောင့် သူ၏အကြွေးများကို တဖြည်းဖြည်း ပြန်ဆပ်ရန် ဤနေရာ၌ အလုပ်လုပ်နေရခြင်း ဖြစ်သည်။

အစပိုင်း၌ ထောင်ထျဲ့က သူ့လုပ်ဖော်ကိုင်ဖက် ဟုန်လျန်က သူ့အတွက် ပိုက်ဆံလာရှင်းပေးလိမ့်မည်ဟု ထင်ခဲ့သော်လည်း အချိန်အတော်ကြာ စောင့်ဆိုင်းပြီးနောက် ဟုန်လျန်မှာ ပြန်မလာခဲ့ပေ။

သူ စွန့်ပစ်ခံလိုက်ရကြောင်း နောက်ဆုံးတွင် သူ သိလိုက်ရသည်။

ရွေးချယ်စရာမရှိသည့်အဆုံး သူ ပန်းကန်များ ဆေးကြောရုံသာ တတ်နိုင်တော့၏။

သို့သော်လည်း ဤကံမကောင်းသော ကလေး ထောင်ထျဲ့၏ အခြေအနေကြောင့် ဤဆိုင်၏ ပိုင်ရှင်မှာ လိမ်လည်မှုပုံစံသစ်တစ်ခုကို တီထွင်လိုက်သည်။မဟုတ်သေး၊ တိတိကျကျဆိုရလျှင် လုပ်ငန်းပုံစံသစ်တစ်ခု ဖြစ်သည်။

သူက ထောင်ထျဲ့ကို အလကားမြည်းစမ်းခွင့် ကမ်းလှမ်းသည့် လှည့်ကွက်ကို အသုံးပြု၍ မျက်နှာသစ်အချို့ကို ဆိုင်ထဲသို့ ဆွဲဆောင်ခိုင်း၏။

ထို့နောက် သူတို့က အလွန် အရသာရှိပုံပေါ်သော အစားအစာများစွာကို စားပွဲ၏ အခြားတစ်ဖက်၌ ချထားလိုက်ကြသည်။

အကယ်၍ တစ်ဖက်လူက မမေးမြန်းဘဲ စားပွဲ၏ အခြားတစ်ဖက်မှ အသားကင်များကို စားသုံးလိုက်လျှင် သူ အလိမ်ခံလိုက်ရပြီ ဖြစ်သည်။

ဆာလာပိုင်ကျီမှာမူ ယခု အလိမ်ခံနေရသူ ဖြစ်၏။