ခြေလှမ်းတစ်ဝက်ရွှေအမတေအဆင့် ရှစ်ယောက် ဆယ်ယောက်လောက် ငှားရင်တောင် လုံလောက်မှာမဟုတ်ဘူး

ချူးယောင်ဝေ့သည် ဒေါသစိတ်ကြောင့် အံကြိတ်လျက် မျက်လုံးများနီရဲနေသော်လည်း ဆက်ပြောလိုက်သည်။

"ဒါက ကျုပ်တို့မိသားစုအပေါ် ကျလာမယ့်အိမ်မက်ဆိုးရဲ့အစပျိုးမှုပဲ၊ ကျုပ်က ကျုပ်အဖေရဲ့တစ်ဦးတည်းသောသား မဟုတ်ဘူး။ တကယ်တော့ ကျုပ်အဖေရော ကျုပ်မှာရော သားသမီးတွေအများကြီးရှိပေမယ့် အဲဒီနှစ်တွေမှာ ချူးရှို့ကျဲရဲ့အဖေအပါအဝင် တစ်ယောက်ပြီး တစ်ယောက်အသတ်ခံခဲ့ရတယ်၊ ဒါကြောင့်မို့လို့လည်း ကျုပ် ချူးရှို့ကျဲကို အလိုလိုက်ခဲ့မိတာ၊ ဒါပေမယ့် သူ့ကို ဒီအတိုင်းအတာအထိ အလိုလိုက်မိမယ်လို့ မထင်ခဲ့မိဘူး"

ချူးယောင်ဝေ့သည် ချူးရှို့ကျဲအကြောင်းပြောမိသောအခါ သူ၏မထွန်းပေါက်မှုအတွက် မျက်လုံးများတွင် မုန်းတီးမှုများဖြင့် ပြည့်နှက်နေသော်လည်း အနည်းငယ်မျှ ကိုယ့်ကိုယ်ကို အပြစ်တင်နေပုံပေါ်သည်။ သူသည် သူ၏အစ်ကိုကို ဆုံးရှုံးပြီးနောက် ချူးရှို့ကျဲကို ကောင်းမွန်စွာ မသွန်သင်ခဲ့မိပေ။

"သခင်မကြီးက မင်းအပေါ် တော်တော်လေးကြင်နာတယ်ဆိုတာ မင်းသိတယ်မဟုတ်လား၊ အကြောင်းပြချက်ကို မင်းလည်း သိမယ်ထင်ပါတယ်။ မင်းနဲ့တူတဲ့ ကျုပ်ညီက တိုက်ခိုက်မှုမှာ အသက်ခံခဲ့ရလို့ပဲ"

ချူးယွင်ဖန်းက လေးနက်သောအမူအရာဖြင့် ခေါင်းညိတ်လိုက်သည်။ ကျွမ်းကျင်သူများသည် ကြောက်စဖွယ်မဟုတ်သော်လည်း ယုတ်ညံ့သောကျွမ်းကျင်သူများသည် ကြောက်မက်ဖွယ်ကောင်းလှသည်။ ၎င်းတို့သည် နှစ်ဦးနှစ်ဖက်စလုံး သဘောထားကွဲလွဲမှုကြောင့် ထိပ်တိုက်ရင်ဆိုင်နေကြခြင်းဖြစ်သည်။ ထိုသို့သော ကျွမ်းကျင်သူများသည် အခြားအရာများထက် ပို၍ကြောက်မက်ဖွယ်ကောင်းသည်။

ဤသည်မှာ ၎င်းတို့သည် စည်းမျဉ်းစည်းကမ်းများကို မလိုက်နာသောကြောင့်ဖြစ်သည်။ ထို့အပြင် ထိုသို့သော ကျွမ်းကျင်သူများကို မည်သူမျှ တားဆီးနိုင်မည်မဟုတ်ပေ။ ၎င်းတို့သည် တစ္ဆေသရဲများကဲ့သို့ ပေါ်ပေါက်လာ၍ ရုတ်တရက် ပျောက်ကွယ်သွားလေ့ရှိသည်။ ယနေ့တွင် လူတစ်ဦးကို သတ်ဖြတ်၍ နောက်တစ်နေ့တွင် အခြားတစ်ယောက်ကို သတ်ဖြတ်မည်ဖြစ်သည်။ ထိုကျွမ်းကျင်သူသည် အနှေးနှင့်အမြန်ဆိုသလိုပင် ၎င်းတို့၏မိသားစုဝင်အားလုံးကို သတ်ဖြတ်ပစ်ပေလိမ့်မည်။

ကျုံးရှင်မြို့ဝန်ဖြစ်သော ချူးယောင်ဝေ့သည် ခုန်းလုံမြို့တွင် အခြေချ၍ သီးခြားနေထိုင်ခဲ့သည်။ ထိုကြောင့် သူ့ကိုသတ်ဖြတ်ရန် အခွင့်အရေးရှာဖွေရခြင်းသည် မလွယ်ကူလှပေ။ သို့သော်လည်း အခြားသော ချူးမိသားစုဝင်များတွင် ထိုကဲ့သို့ ကောင်းမွန်သော အခြေအနေမျိုး မရှိခဲ့ပေ။ ထိုကြောင့် ၎င်းတို့ကို ရှာဖွေတွေ့ရှိသည်နှင့် သတ်ဖြတ်ခံခဲ့ရသည်။ ဆယ်စုနှစ်ပေါင်းများစွာကြာ ထိုသို့ပြုလုပ်ရန် စိတ်ပိုင်းဖြတ်ထားပါက ဝမ်ဟွမ်ကဲ့သို့ကျွမ်းကျင်သူမျိုးပင် လုပ်ဆောင်ရန် နည်းလမ်းရှိပေလိမ့်မည်။ ထို့ကြောင့်သာ စစ်ဝံပုလွေဂိုဏ်းသည် အဆုံးတွင် ဝမ်ဟွမ်၏ အပေးအယူကို လက်ခံခဲ့ရသည်။

"အဲဒီနောက်တော့ ကျုပ်သားတွေအလှည့် ရောက်လာတယ်။ အပြင်ထွက်သွားတာနဲ့ တစ်ယောက်ပြီးတစ်ယောက် လုပ်ကြံခံရတော့တာပဲ။ ခုန်းလုံမြို့ကနေ ထွက်သွားရင်တောင် အကုန်လုံးလုပ်ကြံခံခဲ့ရတယ်" ချူးယောင်ဝေ့၏ မျက်လုံးများ နီရဲလာ၍ သူ၏အသံသည်လည်း အလွန်တုန်ခါနေသည်။ ကုလားထိုင်၏ လက်တင်တန်းများကို ဖိကိုင်နေသောကြောင့် လက်ပေါ်ရှိ သွေးကြောများပင် ဖောင်းကြွလာလေသည်။ ထိုကုလားထိုင်သာ ထူးခြားသော ပရိဘောဂပစ္စည်းတစ်ခုမဟုတ်ပါက၊ အပိုင်းပိုင်းကွဲထွက်သွားပေလိမ့်မည်။

"မင်း ကျုပ်ကို လှောင်ရယ်လာမှာကိုလည်း ကျုပ် မကြောက်တော့ပါဘူးလေ။ နောက်ဆုံးတစ်ခေါက် တိုက်ခိုက်ခံရတုန်းက ကျုပ်ရဲ့မျိုးပွားနိုင်စွမ်းကို ဆုံးရှုံးသွားရတယ်။ ဒါကြောင့် အမွေဆက်ခံဖို့ ရွေးချယ်ပွဲ လုပ်ခဲ့တာ"

ချူးယောင်ဝေ့သည် အဆုံးတွင် တည်ငြိမ်သောလေသံဖြင့် ပြောလိုက်သည်။ ဤသည်မှာ အမျိုးသားတစ်ယောက်အတွက် ဖော်မပြနိုင်သည့် နာကျင်မှုတစ်ခုဖြစ်သည်။ ဤအခိုက်အတန့်တွင် ထိုဝေဒနာသည် သူ့အတွက် သိပ်မခက်ခဲတော့ပေ။ အဘယ်ကြောင့်ဆိုသော် သူ့အတွက် အမှန်တကယ် စိတ်ထိခိုက်ရဆုံးအရာသည် သူ၏ပထမဇနီးနှင့် သားသမီးများစွာတို့ကိုပင် တစ်ဦးပြီး တစ်ဦးပြီး ဆုံးရှုံးလိုက်ရခြင်းဖြစ်သည်။

အသက်အရွယ်ကြီးရင့်နေသူသည် ငယ်ရွယ်သူများကို ဦးစွာပို့ဆောင်ပေးရခြင်းက ကမ္ဘာပေါ်တွင် ဝမ်းနည်းစဖွယ်အကောင်းဆုံးဖြစ်သည်။ ထို့အပြင် သူသည် ၎င်းကို အကြိမ်များစွာ ကြုံတွေ့ခဲ့ရသည်။ သို့သော် ဤခံစားချက်သည် အများအားဖြင့် ပေါ်ပေါက်လာလေ့မရှိပေ။ သူသည် ကျုံးရှင်မြို့ဝန်အိမ်တော်တစ်ခုလုံး၏ ကြီးလေးသောတာဝန်များကို ထမ်းဆောင်ရသောကြောင့် ပြင်ပလူများအရှေ့တွင် ထိုခံစားချက်များကို မပြသနိုင်ပေ။

သူသည် ဤအကြောင်းအရာကို ပေါ့ပေါ့တန်တန်ပင် ပြောကြားခဲ့ဖူးသည်။ အိမ်တော်တစ်ခုလုံး၏ လေထုအခြေအနေသည် မတင်းကြပ်လှသောကြောင့် ချူးယွင်ဖန်းသည် ဤနေရာတွင် တစ်နှစ်ကျော်ကြာ နေထိုင်ခဲ့သော်လည်း သိပ်သတိမထားမိပေ။ မှန်သည်၊ ချူးယွင်ဖန်းသည် အိမ်တော်နှင့် ဆက်စပ်ပတ်သက်မှုမရှိဘဲ သီးသန့်ကျင့်ကြံနေသောကြောင့်လည်းဖြစ်သည်။

"ကျုပ် ဒီနှစ်တွေအတွင်း လုပ်ကြံနေတဲ့လူကို ရှာဖို့ကြိုးစားခဲ့တယ်။ တစ်ချိန်တည်းမှာပဲ၊ ကျွမ်းကျင်သူအမျိုးမျိုးကိုလည်း ဖိတ်ခေါ်ဖို့ကြိုးစားခဲ့တယ်။ ဒါပေမယ့်၊ အဲဒီအဘိုးကြီးက ဟိုတလောက တိုက်ပွဲတစ်ခုမှာ မသေရုံတင်မကဘဲ ကျင့်ကြံမှုတွေလည်း တိုးတက်လာတယ်ဆိုပြီး သိလိုက်ရတယ်။ ဒင်းက ရွှေအမတေအဆင့်ကိုတောင် ဖြတ်ကျော်သွားပြီ" ချူးယောင်ဝေ့က လက်တင်တန်းကို ရိုက်နှက်လိုက်ရာ၊ ထိခိုက်ပျက်စီးမှုများစွာ ခံစားခဲ့ရသော လက်တင်တန်းသည် အဆုံးတွင် အပိုင်းပိုင်းကွဲထွက်သွားခဲ့သည်။

"ကောင်းကင်ဘုံက မျက်စိကန်းနေတာပဲဖြစ်ရမယ်။ ဒီလူကို အခုအချိန်အထိ အသက်ရှင်ခွင့်ပေးထားတဲ့အပြင် သူ့ရဲ့ ကျင့်ကြံမှုတွေကိုလည်း တိုးတက်ခွင့်တောင် ပြုထားတယ်"

ချူးယွင်ဖန်းက သက်ပြင်းချလိုက်သည်။ ဤသည်မှာပုဂ္ဂိုလ်ရေးအရ တိုက်ခိုက်မှုတစ်ခုဖြစ်သည်။ သူနှင့် နတ်ဘုရားသည်လည်း ညှိနှိုင်းမရခဲ့သော်လည်း ဤသည်မှာ မတူညီသော လူမျိုးစုများကြားရှိ တိုက်ပွဲတစ်ခုဖြစ်သည်။ ၎င်းအကြောင်းအရာသည် အများသူငှာကို အာဃာတဖြစ်စေသော်လည်း သူကိုယ်တိုင်က နတ်ဘုရားကို ပုဂ္ဂိုလ်ရေးအရ မုန်းတီးခြင်းမရှိခဲ့ပေ။ အများသူငှာ၏ အာဃာတနှင့် နှိုင်းယှဉ်ပါက၊ ပုဂ္ဂိုလ်ရေးအာဃာတသည် အမှန်တကယ် အဆုံးမရှိပေ။

"သူတို့ဂိုဏ်းကို ဖျက်ဆီးဖို့အတွက် ဧကရာဇ်မင်းက ကျုပ်အဘိုးကို အမိန့်ပေးခဲ့တာ။ ဒါ့အပြင် ဒီဂိုဏ်းက ပြင်ပနယ်မြေက သူပုန်တပ်တွေနဲ့ ပူးပေါင်းခဲ့တာ ကျုပ်အဘိုးမှာ ဘာအမှားမှ မရှိဘူး" ချူးယောင်ဝေ့က အံကြိတ်လိုက်သည်။ သူသည် ဤအကြောင်းအရာနှင့် ပတ်သက်၍ တစ်စုံတစ်ရာ မှားယွင်းနေသည်ဟု မထင်မှတ်ခဲ့ပေ။ ချူးမိသားစုသည် ဧကရာဇ်အမိန့်တော်ကို ရရှိပြီးနောက် စည်းစိမ်ဥစ္စာများကို ပိုင်ဆိုင်ခဲ့ရသည်။ ဤသည်မှာလည်း ၎င်းတို့ ပေးဆပ်ရမည့် တန်ရာတန်ကြေးဖြစ်သည်။

သို့သော်လည်း ဂိုဏ်းခေါင်းဆောင်သည် ကြီးမြတ်သော ဝေ့တိုင်းပြည်တစ်ခုလုံးနှင့် မယှဉ်နိုင်ကြောင်း ရှင်းလင်းစွာ နားလည်ပုံပေါ်သည်။ ဝေ့တိုင်းပြည်သည် ရွှေအမတေအဆင့်ကျွမ်းကျင်သူများကို ကြောက်ရွံ့သော်လည်း ၎င်းတို့ကို သတ်ဖြတ်ရန် မဖြစ်နိုင်ခြင်း မဟုတ်ပေ။ ထို့ကြောင့် ဝေ့တိုင်းပြည်တွင် ၎င်းတို့ကို သတ်ဖြတ်ရန် နည်းလမ်းပေါင်းစုံရှိသည်မှာ သေချာသည်။ ကြီးမြတ်သော ဝေ့တိုင်းပြည်၏ တော်ဝင်မိသားစုကို စော်ကားခဲ့လျှင် အဆုံးမဲ့လိုက်လံသတ်ဖြတ်ခံရမည့် အဖြစ်မျိုးနှင့် ရင်ဆိုင်ရပေလိမ့်မည်။ ထို့ကြောင့် လက်စားချေမှုသည် ကျုံးရှင်မြို့ဝန်၏အိမ်တော်သို့ ကျရောက်လာလေ၏။ အဆုံးတွင် ဤဂိုဏ်းခေါင်းဆောင်သည် လုံးလုံးလျားလျား ရူးသွပ်နေသူ မဟုတ်ပေ။

"ဒါပေမယ့် ဒီကိစ္စက ဧကရာဇ်မင်းရဲ့ အမိန့်ကြောင့် စတင်ခဲ့တာဆိုတော့ ဧကရာဇ်ရုံးတော်ကရော ဘာတုံ့ပြန်မှုမှ မလုပ်ခဲ့ဘူးလား" ချူးယွင်ဖန်းက မေးလိုက်သည်။

"ဟုတ်တယ် ဘာတုံ့ပြန်မှုမှမရှိခဲ့ဘူး။ မဟုတ်ရင် ကျုပ် မင်းကို ဒီအကြောင်းနဲ့ ပတ်သက်ပြီး မေးနေမှာ မဟုတ်ဘူး"

ချူးယောင်ဝေ့သည် ချူးယွင်ဖန်းထံမှ ဖုံးကွယ်မထားခဲ့ပေ။ ကြီးမြတ်သော ဝေ့တိုင်းပြည်၏ တော်ဝင်မိသားစုသည် ယင်းကို လျစ်လျူရှုထားမည် မဟုတ်ပေ။ ထိုသို့ပြုလုပ်ခဲ့ပါက၊ ပြည်သူတိုင်း စိတ်ပျက်အားလျော့သွားပေလိမ့်မည်။ အနာဂတ်တွင် ၎င်းတို့၏ တော်ဝင်မိသားစုအတွက် မည်သူက အလုပ်ကြွေးပြုရဲမည်နည်း။

"မြို့ဝန်မင်းက ကျွန်တော်ကို မေးနေမှတော့ လူအရေအတွက်က အရေးမကြီးဘူးဆိုတာကို ကျွန်တော် ပြောလိုက်မယ်။ ရွှေအမတေအဆင့်ကျွမ်းကျင်သူတစ်ယောက်ကို ရှာမရရင် ဘယ်နှစ်လောက်ပဲ လွှတ်လိုက်ပါစေ အကုန်သေရလိမ့်မယ်။ အရေးကြီးဆုံးကတော့ ဒီလို ရွှေအမတေအဆင့်ကျွမ်းကျင်သူမျိုးသာ ပုန်းအောင်းနေချင်ရင် သူဘယ်တော့ပြန်ပေါ်လာမလဲဆိုတာ ဘယ်သူသိမှာလဲ။ ကျွန်တော်လည်း တကယ်ကူညီချင်ပေမယ့် ကျွန်တော် ဒီမှာပဲ အချိန်တိုင်းနေနိုင်မှာ မဟုတ်ဘူး"

ချူးယွင်ဖန်းသည်လည်း အနည်းငယ် ကူကယ်ရာမဲ့နေမိသည်။ သူသည် ခံစားချက်အရ ချူးမိသားစုကို ကူညီရန် ဆန္ဒရှိသော်လည်း ထိုကျွမ်းကျင်သူ နောက်ထပ်ပေါ်ပေါက်လာမည့်အချိန်ကို မည်သူသိမည်နည်း။ ဤနှစ်များအတွင်း မြို့ဝန်အိမ်တော်သည် မည်သည့်လှုပ်ရှားမှုမျှ မပြုလုပ်ခဲ့ရန် မဖြစ်နိုင်သော်လည်း ရလဒ်များ ထိရောက်ခဲ့ပုံမပေါ်ပေ။

"ကျုပ်မှာ ဒီလူကို မျှားခေါ်နိုင်တဲ့ နည်းလမ်းရှိတယ်ဆိုရင်ရော ဘယ်လိုလဲ" ချူးယောင်ဝေ့က အံကြိတ်၍ ပြောလိုက်သည်။

"ဒါလည်း အကူညီဖြစ်မှာမဟုတ်ဘူး။ သူ့ကို မျှားခေါ်နိုင်ပြီး ခြေလှမ်းတစ်ဝက် ရွှေအမတေအဆင့်ကျွမ်းကျင်သူ ရှစ်ယောက် ဆယ်ယောက်လောက် ဖိတ်ခေါ်နိုင်ရင်တောင် သူ့ကိုသတ်နိုင်မယ်လို့ ကျွန်တော် မထင်ဘူး" ချူးယွင်ဖန်းက ခေါင်းခါလိုက်ပြီးနောက် သူ၏ မျက်လုံးများ ရုတ်တရက် တောက်ပလာသည်။ ဤပြဿနာကို ဖြေရှင်းနိုင်မည့် နည်းလမ်းတစ်ခုရှိနေသည်။ သူသည် ဆေးဖော်စပ်ခဲ့သရွေ့ သူ၏ကျင့်ကြံမှုများ ပြန်လည်ကောင်းမွန်လာပေလိမ့်မည်။ ထိုအချိန်တွင် သူ၏ကျင့်ကြံမှုများ ပြန်လည်ကောင်းမွန်လာရုံသာမကဘဲ ယင်းထက်ပို၍လည်း တိုးတက်နိုင်မည်ဖြစ်သည်။ ယခု မဟုတ်သော်လည်း ချူးယွင်ဖန်းသည် ထိုအချိန်တွင် ယုံကြည်မှုအပြည့်ရှိနေပေလိမ့်မည်။

"ရွှေအမတေအဆင့်ကျွမ်းကျင်သူကို ကျုပ် ရှာနိုင်တယ်လို့ပြောရင်ရော ဘယ်လိုလဲ" ချူးယောင်ဝေ့က ချူးယွင်ဖန်းကို စိုက်ကြည့်၍ လေးနက်စွာ ပြောလိုက်သည်။

"မြို့ဝန်မင်းက ရွှေအမတေအဆင့် ကျွမ်းကျင်သူတစ်ယောက်ကို ရှာနိုင်တယ်လား" ချူးယွင်ဖန်းသည် ချူးယောင်ဝေ့ကို ပြောလိုက်သည်။

"ဟုတ်တယ်။ ကျုပ်မှာ ယုံကြည်ချက်ရှိတယ်။ ဒီကျွမ်းကျင်သူကို ကျုပ်ဘယ်လိုသိလဲဆိုတာကိုတော့ မင်း စိတ်ပူစရာမလိုဘူး။ ဒါပေမယ့် မင်းရဲ့တိုက်ခိုက်ရေးစွမ်းအင်ကို ကျုပ် လိုအပ်တယ်။ မင်း ကျုပ်ကိုကူညီဖို့ ဆန္ဒရှိလား" ချူးယောင်ဝေ့သည် ချူးယွင်ဖန်းကို စိုက်ကြည့်နေသည်။

ချူးယွင်ဖန်းက ခေတ္တစဉ်းစားပြီးနောက် ပြောလိုက်သည်။

"ရပါတယ်။ အကူအညီပေးမယ့် ရွှေအမတေအဆင့်ကျွမ်းကျင်သူတစ်ယောက်ကို ရှာနိုင်သရွေ့ ကျွန်တော် မြို့ဝန်မင်းကို ကူညီဖို့ဆန္ဒရှိပါတယ်။ ဒါပေမယ့် မြို့ဝန်မင်းမှာ ဘယ်လိုအစီအစဉ်မျိုးပဲရှိပါစေ ဒီကိစ္စကို တစ်လအတွင်း လုပ်ရမယ်"

"ကောင်းပြီ၊ ဒါက ပြဿနာမဟုတ်ဘူး" ချူးယောင်ဝေ့က တည်ကြည်စွာ ခေါင်းညိတ်လိုက်သည်။