ရေတိမ်တွင် နဂါးအစစ် ပေါ်ပေါက်လာခြင်း

သာမန်လူများသည် တမန်တော်များအကြောင်း မသိကြသော်လည်း ဝေ့တိုင်းပြည်၏ ထောက်လှမ်းရေးဌာန၏ ညွှန်ကြားရေးမှူးဖြစ်သော အဘိုးအိုသည် ဤလူနှစ်ဦးအကြောင်း နက်နဲစွာ နားလည်သဘောပေါက်ထားသည်။ ကျင်ကျန်းဟန်တိုင်းပြည်ရှိ မရဏဂိုဏ်း၏ကျွမ်းကျင်သူနှစ်ဦးသည် တစ်ချိန်က ဝေ့တိုင်းပြည်၏နယ်နိမိတ်တွင် အဆုံးမဲ့သတ်ဖြတ်မှုများ ပြုလုပ်ခဲ့ဖူးသည်။ ၎င်းတို့သည် ဝေ့တိုင်းပြည်၏ အလိုရှိစာရင်းတွင် အမြဲတမ်း ပါဝင်ခဲဲ့ကြသည်။

ထောက်လှမ်းရေးဌာနသည် ကျွမ်းကျင်သူများစေလွှတ်ခြင်းဖြင့် ၎င်းတို့ကို တစ်ကြိမ်ထက်မက လိုက်လံသတ်ဖြတ်ခဲ့သော်လည်း ၎င်းတို့နှစ်ဦးသည် အဆုံးသတ်တွင် လွတ်မြောက်သွားခဲ့ကြသည်။ မိမိကိုယ်တိုင်ပင် ပြင်ပနယ်မြေသို့ ခိုးဝင်ခဲ့ကာ တစ်နှစ်ခွဲအကြာ၌ ၎င်းတို့နှစ်ဦးကို သတ်ဖြတ်ရန် အခွင့်အရေးရရှိခဲ့သည်။

သို့သော် ၎င်းတို့နှစ်ဦးသည် နောက်ဆုံးတိုက်ပွဲတွင် လွတ်မြောက်သွားကာ ဝေ့တိုင်းပြည်၏ ထိပ်တန်းကျွမ်းကျင်သူများစွာကိုပင် သတ်ဖြတ်ပစ်ခဲ့မည်ကို မည်သူသိမည်နည်း။ ထိုသို့သော အခြေအနေမျိုးတွင် သူသည် တမန်တော်များကို မည်သို့မျှ လေးနက်စွာ မမှတ်မိထားမည်နည်း။ သို့သော်လည်း ဝေ့တိုင်းပြည်တစ်ခုလုံးကို ခေါင်းခဲစေသော ဤတမန်တော်များသည် ချူးယွင်ဖန်း၏လက်ချက်ဖြင့် သေဆုံးသွားခဲ့သည်။ ထို့အပြင် အလွန်လွှမ်းမိုးဖွယ် တိုက်ပွဲမျိုးပင်ဖြစ်ခဲ့သည်။

တိုက်ပွဲအစီရင်ခံစာအရ၊ ၎င်းတို့နှစ်ဦးသည် ချူးယွင်ဖန်းနှင့်တိုက်ခိုက်ရာတွင် ကနဦးမှ နိဂုံးအထိ မည်သို့သော အသာစီးမှုမျှ မရရှိခဲ့ကြပေ။ ချူးယွင်ဖန်းသည် အနက်ရောင်တမန်တော်၏ရတနာဝတ်ရုံဖြစ်သည့် မဟူရာညနဂါးဝတ်ရုံကိုပင် ဆွဲခွာပစ်ခဲ့သည်။ ထောက်လှမ်းရေးဌာန၏ ညွှန်ကြားရေးမှူးသည် မဟူရာညနဂါးဝတ်ရုံနှင့်ပတ်သက်၍ အနည်းငယ် နားလည်ထားသည်။ ဤဝတ်ရုံသည် တမန်တော်များ ဒဏ်ရာကင်းမဲ့စွာ လွတ်မြောက်စေနိုင်ရခြင်း၏ အကြောင်းရင်းဖြစ်သည်။ တမန်တော်များသည် ထိုအချိန်တွင် မဟူရာညနဂါးဝတ်ရုံကို ရရှိခါစသာဖြစ်သော်လည်း၊ ၎င်းတို့သည် ဤ၀တ်ရုံဖြင့် မိမိတို့၏ ဝန်းရံတိုက်ခိုက်မှုမှ လွတ်မြောက်နိုင်ခဲ့ကြသည်။

ထိုအချိန်၌ အနက်ရောင်တမန်တော်တွင် မဟူရာညနဂါးဝတ်ရုံရှိနေကြောင်း မသိထားသည့် ထောက်လှမ်းရေးဌာနသည် ဆုံးရှုံးမှုများစွာနှင့် ကြုံတွေ့ခဲ့ရသည်။ ၎င်းတို့အားလုံးသည် အနက်ရောင် တမန်တော်ကို မထိခိုက်နိုင်သည့်အပြင် လုံးလုံးလျားလျား အသတ်ဖြတ်ခံခဲ့ရသည်။ အဖြူရောင်တမန်တော်၏ ဝိညာဉ်တစ်ပိုင်း ဓားသွားသည် ၎င်းတို့ကို ပို၍ပင် ခေါင်းကိုက်စေသည်။ ထိုဓားသွားနှင့် ထိုးမိလျှင် သေဆုံးစေနိုင်၍ ထိခိုက်မိပါက၊ ဒဏ်ရာအပြင်းအထန်ရရှိစေပေလိမ့်မည်။

တစ်ဦး၏ တိုက်ခိုက်မှုနှင့် အခြားတစ်ဦး၏ခံစစ်တို့ ပေါင်းစပ်မှုသည် ၎င်းတို့အတွက် ယှဉ်ပြိုင်ရန် မဖြစ်နိုင်လုနီးပါးဖြစ်စေသည်။ သို့သော်လည်း လက်ရှိ ၎င်းတို့၏တိုက်ခိုက်မှုပုံစံသည် ယခင်ကနှင့် တူညီနေသေးသော်လည်း ၎င်းတို့ရင်ဆိုင်ခဲ့ရသည့် ရန်သူသည် ယခင်ကထက် ပို၍ ကြောက်မက်ဖွယ်ကောင်းခဲ့သည်။

ညွှန်ကြားရေးမှူးသည် တမန်တော်များ မည်မျှ ကြောက်မက်ဖွယ်ကောင်းသည်ကို သိရှိထားသောကြောင့် ချူးယွင်ဖန်းက ၎င်းတို့ကို သတ်ဖြတ်လိုက်သည်ဟု ကြားသိလိုက်ချိန်တွင် လုံးလုံးလျားလျား မယုံကြည်နိုင်ဖြစ်နေမိ၏။ တစ်ဦးထက်ပိုသော သူလျှိုများသာ အစီရင်ခံစာများကို အချင်းချင်း အတည်ပြုခဲ့ခြင်းကြောင့် မဟုတ်ပါက၊ ၎င်းအကြောင်းအရာကို လုံးလုံးလျားလျား ယုံကြည်မည်မဟုတ်ပေ။

ချူးယွင်ဖန်းသည် ဤမျှအမှန်တကယ် ကြောက်မက်ဖွယ်ကောင်းခြင်းဖြစ်လေသလော။ ယခုအခါ ဤချူးယွင်ဖန်းဆိုသူသည် အလွန်ကြောက်မက်ဖွယ်ကောင်းသော ဖြစ်တည်တစ်ခုဖြစ်ဟန်ရှိသည်။ ထောက်လှမ်းရေးဌာန၏ ညွှန်ကြားရေးမှူးသည် ပင့်သက်ရှိုက်လိုက်မိသည်။ သူသည် တိုက်ပွဲအစီရင်ခံစာကို ကြည့်လိုက်ရာ၊ ချူးယွင်ဖန်းသည် အနက်ရောင်တမန်တော်ကို ချေမှုန်းပြီးနောက် မဟူရာညနဂါးဝတ်ရုံကို အင်အားသုံး၍ ချွတ်ပစ်ခဲ့ကြောင်း မြင်တွေ့လိုက်ရသည်။

သူ၏ သူငယ်အိမ်များ ပြူးကျယ်သွားလေ၏။ ချူးယွင်ဖန်းက ဝိညာဉ်တစ်ပိုင်း ဓားသွားကို လက်ဗလာဖြင့် ဖမ်းဆုပ်ခဲ့ကြောင်း ဖတ်လိုက်ရသည်နှင့် ညွှန်ကြားရေးမှူးသည် တစ္ဆေတစ်ကောင်ကို မြင်တွေ့လိုက်ရသကဲ့သို့ ပြုမူလာသည်။ ဝိညာဉ်တစ်ပိုင်း လက်နက်ကို ချက်ခြင်း ဖျက်ဆီးနိုင်သည့် ဤကိုယ်ခန္ဓာကျင့်ကြံမှုမျိုးသည် မယုံကြည်နိုင်ဖွယ်အဆင့်အထိ သန်မာအားကောင်းနေ၏။

ရွှေအမတေအဆင့်ထက်ပင် ပို၍ ကြောက်မက်ဖွယ်ကောင်းနေသည်။ ချူးယွင်ဖန်းက မည်သို့ ကျင့်ကြံခဲ့သည်ကို သူ သိချင်နေမိသည်။ ဤသည်မှာ အလွန်ကြောက်မက်ဖွယ်ကောင်းလွန်းလှသည်။ ၎င်းသည် ကျုံးရှင်မြို့ဝန်အိမ်တော်က ပြုစုပျိုးထောင်နိုင်သူ မဟုတ်ပေ။ အတိုချုပ်ပြောရလျှင် စစ်မှန်သော နဂါးတစ်ကောင်ကို ရေတိမ်တွင် မမွေးမြူနိုင်ကြပေ။ ကျုံးရှင်မြို့ဝန်အိမ်တော်မဆိုနှင့် ဝေ့တိုင်းပြည်၏ တော်ဝင်မိသားစုလျှင်ပင် ထိုကဲ့သို့သော ထိပ်တန်းကျွမ်းကျင်သူမျိုးကို ပြုစုပျိုးထောင်နိုင်မည် မဟုတ်ပေ။

ချူးယွင်ဖန်း၏ ခွန်အားတစ်ခုတည်းဖြင့် ညွှန်ကြားရေးမှူးကို ထိတ်လန့်စေရန် မလိုအပ်ပေ။ သူ့ကို အမှန်တကယ် ထိတ်လန့်စေသော အချက်သည် ချူးယွင်ဖန်း၏ အသက်အရွယ်ဖြစ်သည်။ ချူးယွင်ဖန်း၏ သတင်းအချက်အလက်များသည် အဆင့်ရှစ် အစီရင်ခံစာတစ်ခုဖြစ်နေသည်ကို နောက်ဆုံးတွင် သူ နားလည်သွားသည်။

"အံ့သြစရာပဲ။ ကျုံးရှင်မြို့ဝန်အိမ်တော်မှာ ဒီလိုကျွမ်းကျင်သူမျိုး ပေါ်လာမယ်လို့ ကျုပ် မမျှော်လင့်ထားဘူး" အဘိုးအို၏ မျက်လုံးများ အနည်းငယ် ကျဉ်းမြောင်းသွားသည်။ အဘိုအိုက မည်သည့်အကြောင်းအရာများ တွေးတောနေသည်ကို မည်သူမျှ မသိကြပေ။

"ဟုတ်ပါတယ်၊ ဒါဆိုကျွန်တော်တို့တွေ သူ့ကိုချက်ချင်း စောင့်ကြည့်ထားလိုက်ရမလား" လူငယ်က အလျင်အမြန် မေးမြန်းလိုက်သည်။

ထိုအခါ အဘိုးအိုက လူငယ်ကို လှည့်ကြည့်လာသည်။

"ကျုပ်ကို လာနောက်နေတာလား။ ခြေလှမ်းတစ်ဝက် ရွှေအမတေအဆင့်ကို မင်းတို့ ဘယ်လိုများ စောင့်ကြည့်မှာလဲ၊ သူ သိသွားရင် မင်းတို့ ဘယ်လိုသေလို့ သေသွားမှန်းတောင် သိလိုက်မှာမဟုတ်ဘူး"

လူငယ်၏ ခန္ဓာကိုယ်တွင် ချက်ချင်းပင် ချွေးစေးများ ထွက်ပေါ်လာသည်။ သူသည် ယခင်အချိန်က အခြားသော ကျွမ်းကျင်သူများကို ထိုသို့ စောင့်ကြည့်ခဲ့သောကြောင့်သာ အလိုအလျောက် အကြံပြုလိုက်မိသည်။ သို့သော် ဤတစ်ကြိမ် စောင့်ကြည့်ရန် အကြံပြုလိုက်သော ပစ်မှတ်သည် ခြေလှမ်းတစ်ဝက် ရွှေအမတေအဆင့်ကျွမ်းကျင်သူတစ်ဦးဖြစ်နေသည်ကို သူ မေ့လျော့သွားခဲ့သည်။ ဤသည်မှာ အုပ်စိုးရှင်တစ်ဦးဟုပင် ဆိုနိုင်သည်။ ထိုအဆင့်ရှိ ကျွမ်းကျင်သူထံတွင် မည်သို့သော စောင့်ကြည့်မှုမျိုးကို ဖုံးကွယ်ထားနိုင်မည်နည်း။ သူသည် ထိုပုဂ္ဂိုလ်ကို စောင့်ကြည့်ရန်အတွက် ရွှေအမတေအဆင့်ကျွမ်းကျင်သူတစ်ဦးကို ရှာဖွေရန် စီစဉ်ထားခြင်းဖြစ်လေသလော။

'ဒါဟာသတစ်ခု မဟုတ်ဘူးလား'

“ကျွန်တော် စကားမှားသွားတာပါ ဆရာ” လူငယ်က ကမန်းကတန်း ပြောလိုက်သည်။

"သူ့ကို စောင့်ကြည့်လို့မရပေမယ့် သူ့နောက်ကြောင်းကိုတော့ စုံစမ်းလို့ရသေးတယ်။ ကျုံးရှင်မြို့ဝန်အိမ်တော်က ဒီလိုကျွမ်းကျင်သူမျိုး မွေးထုတ်နိုင်မှာ မဟုတ်ဘူး။ ဒီချူးယွင်ဖန်းရဲ့နောက်ကွယ်မှာ ဂိုဏ်းတစ်ခုရှိနေလိမ့်မယ်။ အဲဒီလို ကျွမ်းကျင်သူမျိုး မွေးထုတ်နိုင်တဲ့ ဂိုဏ်းက သာမန်ဂိုဏ်းတစ်ခု မဟုတ်လောက်ဘူး။ ကျုပ်တို့တွေ အရင်က ဒီဂိုဏ်းကို သတိမထားမိခဲ့ပုံပဲ။ ဒါက ဘယ်ဂိုဏ်းလဲဆိုတာအပြင် သူတို့မှာ ဘာရည်ရွယ်ချက်တွေရှိနေလဲဆိုတာ ကျုပ်တို့တွေ သိထားဖို့လိုတယ်" ညွှန်ကြားရေးမှူးက ပြောသည်။

သူသည် ချူးယွင်ဖန်းနှင့်ပတ်သက်၍ သိပ်မစိုးရိပ်မိပေ။ ခြေလှမ်းတစ်ဝက် ရွှေအမတေအဆင့်သည် ကောင်းကင်သို့ ပျံသန်းနိုင်လျှင်ပင် ကောင်းကင်ကို ပြောင်းပြန်လှန်နိုင်မည့်အင်အားမျိုး မဟုတ်ပေ။ သူ အမှန်တကယ် စိုးရိမ်နေသည့်အရာမှာ ချူးယွင်ဖန်း၏ နောက်ကွယ်တွင် တည်ရှိနေနိုင်သည့် အင်အားကြီးဂိုဏ်းဖြစ်သည်။

ကြီးမြတ်သောဝေ့တိုင်းပြည် လက်ထက်တွင် ထိုသို့သော ဖြစ်တည်မှုများစွာရှိခဲ့ကြသည်။ ဂိုဏ်းပေါင်းစုံမှ တပည့်များနှင့် ဆက်ခံသူများသည် ကြီးမြတ်သော ဝေ့တိုင်းပြည်၏ နေရာအရပ်ရပ်သို့ ပျံ့နှံ့လျက်ရှိနေကြသည်။ ၎င်းတို့အနက် အကောက်ကြံစည်ချင်သူအများအပြားရှိကြသည်။ ချူးယွင်ဖန်းသည်လည်း ထိုသို့သော ဖြစ်တည်မှုမျိုးဖြစ်နေမည်ကို ညွှန်ကြားရေးမှူးက စိုးရိမ်နေမိသည်။ ထိုသို့ဖြစ်လျှင် သူပြသခဲ့သည့် အလားအလာများအရ၊ မည်သို့ကြီးမားသော အန္တရာယ်များပြုလုပ်လာမည်ကို မည်သူမျှသိရှိနိုင်မည် မဟုတ်ပေ။

“နားလည်ပါပြီ" လူငယ်က ခပ်မြန်မြန် ပြောလိုက်သည်။

"ဒါ့အပြင် ကျုပ်အတွက် မြို့ဝန်အိမ်တော်ကို လက်ဆောင်တစ်ခုပို့ပေး။ သခင်မကြီးအတွက် မွေးနေ့လက်ဆောင်လို့ ပြောလိုက်" ညွှန်ကြားရေးမှူးက ရုတ်တရက် ပြောလာသည်။

ထိုစကားကိုကြားသောအခါ လူငယ်၏ မျက်လုံးများ ရုတ်တရက် ပြူးကျယ်သွားလေသည်။ သူသည် အဘိုးအိုကို မယုံကြည်နိုင်သော အကြည့်မျိုးဖြင့် စိုက်ကြည့်နေ၏။ သူသည် ဤအဘိုးအို၏ နောက်ကြောင်းရာဇဝင်ကို သိရှိထားသည်။ အဘိုးအိုသည် ဝေ့တိုင်းပြည်၏ ထောက်လှမ်းရေးကိစ္စများကို တာဝန်ယူထားသူဖြစ်သည်။ တစ်ချို့လူများသည် အဘိုးအိုကို အရိပ်ဘုရင်ဟုပင် ခေါ်ဆိုကြသည်။ အများအားဖြင့်၊ အခြားလူများက သူ့ကို မျက်နှာလိုမျက်နှာရ ပြုမူလိုကြသော်လည်း ထိုသို့ပြုလုပ်ရန် နည်းလမ်းမရှိကြပေ။ သူသည် အခြားလူများနှင့် မိတ်ဆွေဖွဲ့ရန် မည်သည့်အစပျိုးမှုမှ မပြုလုပ်ဖူးပေ။

ဤချူးယွင်ဖန်းသည် အမှန်တကယ် ကွဲပြားခြားနားသူဖြစ်လေသလော။ ထိုသို့ တွေးကြည့်ရုံဖြင့် သူသည် လုံးလုံးလျားလျား မယုံကြည်နိုင်ဖွယ်ကောင်းသည်ဟု ခံစားလိုက်ရသည်။ အဘိုးအိုထံတွင် ထိုကဲ့သို့အဖြစ်အပျက်မျိုးဖြစ်ရခြင်းသည် စိတ်ကူးယဉ်ဆန်လွန်းလှသည်။ သို့သော် လူငယ်သည် အနည်းငယ်မျှ မတွန့်ဆုတ်ဝံ့ပေ။ မျက်စိစုံမှိတ်၍ ဆက်လက်ခန့်မှန်းနေပါက၊ သူ့အတွက် စောင့်နေသောအရာသည် သင်္ချိုင်းတစ်ခုသာဖြစ်သည့်အတွက် မှန်းဆရန်ပင် မဝံ့ရဲတော့ပေ။

လူငယ်ထွက်သွားပြီးနောက် အဘိုးအိုက နောက်ဆုံးတွင် သက်ပြင်းချ၍ ပြောလိုက်သည်။

"ဒီလိုလူမျိုးရှိနေလိမ့်မယ် တကယ် မထင်ထားဘူး။ အဆင့်မြင့် ဆေးပညာရှင်တဲ့လား။ မင်းသမီးကုရှဲ့က အဆင့်မြင့် ဆေးပညာရှင်ကို နေရာအနှံ့လိုက်ရှာနေတာကြာပြီ။ ဒါသင့်တော်တဲ့ ကိုယ်စားလှယ်လောင်းမျိုး ဖြစ်နိုင်တယ်..."

သူ၏လေသံသည် မကြားသိနိုင်တော့သည်အထိ အလွန်ဖျော့တော့လာသည်။ ထို့ကြောင့် သူ ဆက်ပြောခဲ့သော စကားများကို မည်သူမျှ မကြားမိနိုင်ပေ။ ချူးယွင်ဖန်းသည် သီးသန့်ကျင့်ကြံ၍ ဆေးများဖော်စပ်နေချိန်၌ သူနှင့်ပတ်သက်သည့် အကြောင်းအရာများ ခုန်းလုံမြို့မှ တိတ်တဆိတ် ပျံ့နှံ့ကာ တော်ဝင်မြို့တော်သို့ပင် စတင်သက်ရောက်နေကြောင်းကို သူ မသိခဲ့ပေ။