"စံပြ" အဖြစ် သတ်မှတ်ထားသော အသုံးမကျသည့် ဇာတ်ကောင်၏ အစ

ဂိမ်းဇာတ်ကောင် တစ်ခုချင်းစီကို ဖန်တီးသည့်အခါတွင် "မွေးရာပါ အရည်အသွေး" များကို ကျပန်း ရရှိသည်။ နောက်ပိုင်းတွင် တိုးမြှင့်ရရှိသော အရည်အသွေး အမှတ်များနှင့် မတူဘဲ ဤမွေးရာပါ အရည်အသွေးများမှာ အနာဂတ် ဖွံ့ဖြိုးတိုးတက်မှုအပေါ် အလွန်အရေးကြီးသော သက်ရောက်မှု ရှိ၏။

မွေးရာပါ အရည်အသွေးများမှာ ခွန်အား၊ ကြံ့ခိုင်မှု၊ အရိုးအကြော၊ ကိုယ်ဖော့ပညာ၊ ဉာဏ်ရည်၊ ကံကောင်းခြင်း ဟူ၍ ခြောက်မျိုးသာ ရှိပြီး စုစုပေါင်း အမှတ် ၁၂၀ ရှိကာ တစ်မျိုးချင်းစီ၏ အမြင့်ဆုံး အမှတ်မှာ ၄၀ ဖြစ်ပြီး အနိမ့်ဆုံး အမှတ်မှာ ၁၀ ဖြစ်သည်။ ဖော်ပြမထားသော "ရုပ်ရည်" ဆိုသည့် လျှို့ဝှက် အရည်အသွေး တစ်ခုလည်း ရှိသေးသည်ဟု ဆိုကြသော်လည်း ၎င်းမှာ ဇာတ်ကောင် ဖန်တီးစဉ်က ရုပ်ရည် ပြင်ဆင်မှုနှင့်သာ သက်ဆိုင်ပေ၏။

ဤမွေးရာပါ အရည်အသွေး ခြောက်မျိုးကို ကျပန်း ရွေးချယ်သည့်အခါ အများစုမှာ ၂၀ ဝန်းကျင်တွင်သာ ရှိသည်။ ကစားသမားများက အနည်းငယ် ချိန်ညှိနိုင်ပြီး တစ်မျိုးချင်းစီကို အများဆုံး ၁၀ မှတ်အထိ လျှော့ချ၍ လွတ်လပ်စွာ ခွဲဝေချထားနိုင်သော အမှတ်များအဖြစ် ပြောင်းလဲနိုင်သော်လည်း လျှော့ချပြီးနောက် ထိုအရည်အသွေးမှာ ၁၀ အောက် မနိမ့်ရချေ။

မကြာမီပင် ချူကျန့် က ထိုပို့စ်နှစ်ခုမှ အကြံပြုချက်များကို ပေါင်းစပ်၍ ဂိမ်းဇာတ်ကောင်၏ အရည်အသွေး ခွဲဝေမှု ဦးစားပေး စာရင်းကို စာရွက်ပေါ်တွင် ရေးဆွဲလိုက်ပြီး ကံကောင်းခြင်း၊ ခွန်အား၊ ကြံ့ခိုင်မှုနှင့် ဉာဏ်ရည်တို့ကို အစဉ်လိုက် ရေးသားလိုက်၏။

ကံကောင်းခြင်း၏ အရေးပါမှုမှာမူ ပြောရန်မလို‌ေချ။ အဘယ်ကြောင့်ဆိုသော် အဆင့်မြင့် ပစ္စည်းများ သွန်းလုပ်ခြင်းနှင့် အဆင့်မြင့် ဓာတ်လုံးဆေးများ ဖော်စပ်ခြင်း၏ အောင်မြင်နှုန်းမှာ အတတ်ပညာ အဆင့်နှင့် ကျွမ်းကျင်မှုအပေါ် မူတည်သကဲ့သို့ ကံကောင်းခြင်း၊ ကံဆိုးခြင်းအပေါ်တွင်လည်း မူတည်သောကြောင့် ဖြစ်သည်။ ခွန်အားမှာ သံရည်ကျိုခြင်း၏ အားအင်နှင့် သက်ဆိုင်သဖြင့် ဒုတိယ ဦးစားပေး ဖြစ်ရမည်။ ကြံ့ခိုင်မှုမှာ ခန္ဓာကိုယ် ကြံ့ခိုင်မှုနှင့် တိုက်ရိုက် သက်ဆိုင်ရာ အနည်းငယ် ထည့်သွင်းပေးရမည်။

ဉာဏ်ရည်မှာ ၁၂ မှတ်ရှိလျှင် လုံလောက်ပြီဖြစ်သည်။ သံရည်ကျိုခြင်းနှင့် ဆေးဖော်စပ်ခြင်းဆိုင်ရာ အလယ်အလတ်တန်းစာ ကျွမ်းကျင်မှုစာအုပ် အများစုကို နားလည်နိုင်သည်ဖြစ်၍ နောက်ပိုင်းတွင် တိုးတက်လိုပါက ငွေရှာ၍ စာသင်ကျောင်း၊ မြို့နယ်ကျောင်း၊ ခရိုင်ကျောင်းများတွင် ငွေပေး၍ စာပေပညာ သင်ကြားကာ တိုးမြှင့်နိုင်၏။

အရိုးအကြောနဲ့ ကိုယ်ဖော့ပညာ ဆိုတာက ဘာလဲ။ ငါ့လို သံရည်ကျို၊ ဆေးဖော်စပ်မဲ့သူအတွက် အဲဒါတွေက ဘယ်လိုလုပ် အသုံးဝင်မှာလဲ။ ဖြစ်နိုင်သမျှ အကုန်လုံး လျှော့ချပစ်ရမယ်။

လက်ထဲမှ ပြီးပြည့်စုံသည့် အရည်အသွေး ခွဲဝေမှု အစီအစဉ်ကြီးကို ကြည့်၍ ချူကျန့် က မိမိကိုယ်ကို အစီအစဉ် ရေးဆွဲရာတွင် ပါရမီရှင်တစ်ဦးဟုပင် တွေးထင်သွားမိကာ ဟက်ခနဲ ဟက်ခနဲ ကျေနပ်စွာ ရယ်မောလိုက်သည်။

သို့သော်လည်း အွန်လိုင်းဂိမ်း တစ်ခါမှ မကစားဖူးသော သူမှာ အရေးကြီးသော အရာတစ်ခုကို မေ့လျော့နေပုံရ၏။ ဥပမာအားဖြင့် တစ်ချိန်က အလွန်ကျော်ကြားခဲ့သော ထိုပို့စ်နှစ်ခုမှာ ယခုအခါ အဘယ်ကြောင့် ပို့စ်စာရင်း၏ စာမျက်နှာ ထောင်ချီ၍ နောက်သို့ ရောက်ရှိနေရသနည်း...။

ချူကျန့် အချိန်ကို ကြည့်လိုက်ရာ တစ်ညလုံး အချက်အလက် ရှာဖွေခြင်းနှင့် ထိုပို့စ်နှစ်ခုမှ လမ်းညွှန်များကို အလွတ်ကျက်မှတ်ခြင်းတို့တွင် အာရုံစိုက်နေခဲ့ရာ အချိန်မှာ ၂၃:၃၂ သို့ ရောက်ရှိနေပြီ ဖြစ်ကြောင်းကိုပင် သတိမပြုမိလိုက်ချေ။

"ကောင်းပြီ... ဆာဗာအသစ် မဖွင့်ခင်မှာ ဂိမ်းဇာတ်ကောင်ကို အရင် မှတ်ပုံတင်ထားလိုက်မယ်…"

ချူကျန့် က ကုတင်ပေါ်တွင် ပက်လက်လှန်၍ လုပ်ငန်းလမ်းညွှန်အတိုင်း သူ၏ မှတ်ပုံတင်ကို အပေါက်ထဲသို့ ထည့်သွင်းပြီးနောက် ဂိမ်းဦးထုပ်ကို ဆောင်းလိုက်ပြီး ဖွင့်ခလုတ်ကို နှိပ်လိုက်သည်။

ချက်ချင်းပင် သူ၏ မျက်စိရှေ့တွင် ဂိမ်း၏ သတိပေးစာတန်း ပေါ်လာ၏။

"သင်သည် ဂိမ်းထဲသို့ ပထမဆုံးအကြိမ် ဝင်ရောက်ခြင်း ဖြစ်ပါသည်... နောက်ပိုင်းတွင် ရွှေပြား လဲလှယ်နိုင်ရန် ဘဏ်အကောင့်ကို ဦးစွာ ချိတ်ဆက် အတည်ပြုပေးပါ…"

ချူကျန့် က လုပ်ငန်းစဉ်အတိုင်း လက်ကျန်ငွေ သုညရှိသော ဘဏ်ကတ်တစ်ခုကို ချိတ်ဆက်၍ မှတ်ပုံတင် အတည်ပြုခြင်းကို ပြီးမြောက်အောင် လုပ်ဆောင်လိုက်သည်။

"ဤဂိမ်းတွင် တကယ့်ငွေကြေးနှင့် လဲလှယ်နိုင်ခြင်း၊ အွန်လိုင်းနှင့် အော့ဖ်လိုင်း ပြိုင်ပွဲကြီးများ ကျင်းပခြင်းတို့ ပါဝင်သောကြောင့် ဝင်ရောက်သည့်အခါတိုင်း သင်၏ ကိုယ်ရေးအချက်အလက်များကို စစ်ဆေးရန် မျက်နှာနှင့် မျက်လုံးသူငယ်အိမ်ကို စစ်ဆေးမည်ဖြစ်ပါသည်... နားလည် ပူးပေါင်းဆောင်ရွက်ပေးပါရန် မေတ္တာရပ်ခံအပ်ပါသည်။ ယခု သင်၏ ကိုယ်ပိုင် ဂိမ်းဇာတ်ကောင်ကို ဖန်တီးပါမည်…"

ဂိမ်းမျက်နှာပြင် ပြောင်းလဲသွားပြီး ချူကျန့် ၏ ရှေ့တွင် အဝတ်ကြမ်းများ ဝတ်ဆင်ထားသော အမျိုးသား ဇာတ်ကောင်တစ်ဦး ပေါ်ထွက်လာသည်။

"ခွင့်ပြုချက် သဘောတူညီချက်နှင့် သင်၏ အထောက်အထားပါ ကျား၊ မ အချက်အလက်များအရ ဂိမ်းဇာတ်ကောင်ကို အမျိုးသားအဖြစ် သတ်မှတ်လိုက်ပါသည်…"

ခဏအကြာတွင် ဂိမ်းဇာတ်ကောင်မှာ ပိုမို ကြည်လင်ပြတ်သားလာပြီး အလွန် သေသပ်လှပစွာ ဖန်တီးထားကြောင်း တွေ့မြင်နိုင်၏။ ထို့အပြင် အရပ်၊ မျက်ခုံး၊ မျက်လုံးနှင့် ရုပ်ရည်မှာ ချူကျန့် နှင့် ရှစ်ဆယ်၊ ကိုးဆယ်ရာခိုင်နှုန်းခန့် တူညီနေသည်။

"ဂိမ်းဇာတ်ကောင်ကို သင်၏ အထောက်အထား ဓာတ်ပုံအရ ပုံဖော်ထားပါသည်... သင်သည် မျက်နှာ၊ အသားအရေ၊ ကိုယ်လုံး စသည်ဖြင့် အနည်းငယ် ပြုပြင်ပြောင်းလဲနိုင်ပါသည်... အကြံပြုချက် - မျက်နှာကိုသာ ကြည့်သော ဤလောကတွင် ရုပ်ရည်ချောမောခြင်းသည် တစ်ခါတစ်ရံတွင် သိုင်းပညာ ကောင်းမွန်ခြင်းထက် ပို၍ အရေးပါပါသည်…"

ချူကျန့် မှာ ကြောင်သွား၏။ ဘာလဲ ဇာတ်ကောင်၏ ရုပ်ရည်မှာ ကစားသမား၏ တကယ့်ရုပ်ရည်နှင့် ဆင်တူသည်တဲ့လား။

ဒီလိုဆို မျက်နှာပြရမှာပေါ့။

ချူကျန့် က မျက်မှောင်ကြုတ်လိုက်သည်။ ကံကောင်းထောက်မစွာဖြင့် ရုပ်ရည်ကို အနည်းငယ် ပြုပြင်ပြောင်းလဲနိုင်သေး၏။ သူက ချက်ချင်းပင် ဂိမ်းဇာတ်ကောင်၏ ရုပ်ရည်ကို ပြန်လည် ပြင်ဆင်၍ သူ၏ မူလ အလွန်ချောမောသော ရုပ်ရည်ကို ဖြစ်နိုင်သမျှ သာမန်ရိုးကျဖြစ်အောင် ပြုလုပ်လိုက်သည်။

သူ၏ မူလရုပ်ရည်မှာ အလွန်ကောင်းမွန်သဖြင့် ဖြစ်နိုင်သမျှ ပြုပြင်ပြောင်းလဲပြီးနောက်တွင်လည်း ကြည့်ကောင်းနေသေးသော်လည်း အနည်းဆုံးတော့ သာမန်ဖြစ်သွားပြီ ဖြစ်သည်။ လူအုပ်ထဲတွင် သေချာ မကြည့်ပါက အလွယ်တကူ သတိပြုမိနိုင်တော့မည် မဟုတ်ချေ။

ထိုအခါမှ ချူကျန့် က စိတ်အေးသွားသည်။ ဘာလို့လဲ။

"ရုပ်ရည်ချောမောခြင်းသည် တစ်ခါတစ်ရံတွင် သိုင်းပညာ ကောင်းမွန်ခြင်းထက် ပို၍ အရေးပါသည်" တဲ့လား။ တောင်းပန်ပါတယ်၊ ငါက သိုသိုသိပ်သိပ် ငွေရှာချင်တာပါ... သာမန်ဖြစ်လေလေ၊ လူတွေရဲ့ အာရုံစိုက်မှုကို မခံရလေလေ၊ ကိုယ့်ရဲ့ တည်ရှိမှုကို လျှော့ချပြီး သိုသိုသိပ်သိပ် ချမ်းသာလိုတဲ့ အခြေအနေကို ထိန်းသိမ်းထားနိုင်မှာ။

"ဇာတ်ကောင် အမည်ကို ထည့်သွင်းပါ…"

ချူကျန့် က အွန်လိုင်းနာမည်ကို တစ်ခါမှ အသုံးမပြုဖူးသောကြောင့် အချိန်အတော်ကြာ စဉ်းစားပြီးမှ လျှို့ဝှက်သိုင်းလောကတွင် အသုံးပြုခဲ့ဖူးသော နာမည်ကို ထည့်သွင်းရန် ဆုံးဖြတ်လိုက်သည်။ သိုသိပ်ပြီး သတိမပြုမိလွယ်ဘဲ မှတ်မိရန် မလွယ်ကူသကဲ့သို့ စာလုံးပေါင်းမှားသည်ဟုလည်း အထင်ခံရလွယ်၏။ အဲဒါကိုပဲသုံးလိုက်မယ်

"ချူလော့ကျွင်း…"

"နာမည် တူညီမှု ရှိမရှိ စစ်ဆေးနေပါသည်... စစ်ဆေးပြီးနောက် ဤဇာတ်ကောင်အမည်ကို အသုံးပြုနိုင်ပါသည်... အမည်ပေးခြင်း ပြီးဆုံးပါပြီ... ဇာတ်ကောင်၏ အသက်ကို ပြောင်းလဲလိုပါသလား…"

ကစားသမား အများစုမှာ သိုင်းပညာ ပိုမို လေ့ကျင့်နိုင်ရန် အသက်ကို အငယ်ဆုံး ၁၆ နှစ်သို့ ပြောင်းလဲကြသည်။ သို့သော်လည်း ချူကျန့် က သိုင်းပညာ လေ့ကျင့်ရန် စိတ်ကူး လုံးဝ မရှိသကဲ့သို့ ကိုယ်ခန္ဓာ သေးငယ်သွားပါက ကျင့်သားမရဖြစ်မည်ကို စိုးသောကြောင့် "မပြောင်းလဲပါ" ကို ရွေးချယ်လိုက်သည်။

"ဇာတ်ကောင် ဖန်တီးခြင်း ပြီးဆုံးပါပြီ... လေးစားရပါသော ကစားသမား... သင်သည် မည်သည့် အခြေခံ ဆာဗာ သို့ ဝင်ရောက်လိုပါသလဲ။ ယနေ့ည သန်းခေါင်ယံ ဖွင့်လှစ်မည့် ဆာဗာ အသစ်လား…"

"ဟုတ်ကဲ့…"

"ကောင်းပါပြီ... သင့်အတွက် ဆာဗာ အသစ် ဝင်ရောက်ခွင့်ကို ဖွင့်လှစ်ပေးလိုက်ပါပြီ... မဟာသိုင်းလောကခေတ်ဂိမ်း မှ ကြိုဆိုပါသည်…"

ချူကျန့် ၏ ထင်မြင်ချက်နှင့် ဆန့်ကျင်စွာပင် နောက်ဆက်တွဲမှာ မွေးရာပါ အရည်အသွေး အမှတ်များ ခွဲဝေချထားရန် မျက်နှာပြင် မပေါ်လာဘဲ သူက အမှောင်ထုထဲသို့ ပို့ဆောင်ခံလိုက်ရသည်။

"ဂျိန်း…"

လျှပ်စီးလက်၍ မိုးခြိမ်းသံ ထွက်ပေါ်လာပြီးနောက် နောက်တစ်ခဏတွင် ကောင်းကင်မှ မိုးစက်များ သည်းထန်စွာ ရွာကျလာသည်။ အေးခဲနေသော မိုးစက်များက ချူကျန့် ၏ မျက်နှာပေါ်သို့ လေပြင်းများနှင့်အတူ ကျရောက်လာပြီး မယုံနိုင်လောက်အောင် လက်တွေ့ဆန်လှ၏။

ပတ်ဝန်းကျင်မှာ အမှောင်ထုဖြင့် ဖုံးလွှမ်းနေဆဲ ဖြစ်ပြီး လေပြင်းမုန်တိုင်း ကျရောက်နေသော ညတစ်ည ဖြစ်သည်။

ငါ ဘယ်ရောက်နေတာလဲ။ ချူကျန့် အနည်းငယ် ကြောင်သွား၏။

"မင်းအသက်ကို ဒီမှာထားခဲ့…"

ဟိန်းဟောက်သံတစ်ခု တဖွဲဖွဲ ရွာသွန်းနေသော မိုးသံကို ဖောက်ထွင်း၍ ထွက်ပေါ်လာပြီး မရေမတွက်နိုင်သော ခြေသံများက အဝေးမှ အနီးသို့ ရောက်ရှိလာသည်။ တဖျပ်ဖျပ် ရေနင်းသံများနှင့်အတူ အနက်ရောင် အရိပ်ဆယ့်နှစ်ခုက လေထဲသို့ ခုန်ပျံတက်၍ တိုက်ခိုက်ခံရသော အခြားလူအုပ်စုထံသို့ ပြေးဝင်သွားကြသည်။

အမှောင်ထုထဲတွင် လက်နက်ရောင်များ လင်းလက်နေပြီး နေရာအနှံ့မှ လက်နက် လှုပ်ရှားသံများကို ရှင်းလင်းစွာ ကြားနေရသည်။ မျက်စိတစ်မှိတ်အတွင်းတွင် သတ္တုချင်း ရိုက်ခတ်သံများ တချွင်ချွင် ထွက်ပေါ်လာပြီး လူနှစ်စုမှာ အပြင်းအထန် တိုက်ခိုက်နေကြပြီ ဖြစ်သည်။

ချူကျန့် ၏ မျက်စိဖြင့်ပင် ထူထပ်သော အမှောင်ထုကို ဖောက်ထွင်း၍ တိုက်ပွဲအခြေအနေကို ရှင်းလင်းစွာ မမြင်နိုင်ချေ။ သို့သော်လည်း သူက ရှုပ်ထွေးသည့် စည်းချက်ကျသော ခြေသံများနှင့် နှစ်ဖက် တိုက်ခိုက်ရာမှ ထွက်ပေါ်လာသော လေဟုန်များမှတစ်ဆင့် နှစ်ဖက်စလုံးမှာ ပါရမီရှင်များ ဖြစ်ကြပြီး လျှို့ဝှက်သိုင်းလောကတွင်ပင် ပါရမီရှင်များ ဖြစ်နိုင်ကြောင်း သိလိုက်၏။

တိုက်ခိုက်ခံရသော လူသုံးဦးမှာ ဓားဖြင့်ပြန်ချကြလေရာ ဓားချက်မှာ နဂါးဟိန်းသံကဲ့သို့ ဝေါင်းခနဲ ထွက်ပေါ်၍ ကြယ်ကြွေသကဲ့သို့ ကျရောက်လာသည်။ အနှီလူသုံးဦးမှာ ရောနှောတိုက်ခိုက်မှုကြားတွင်ပင် တည်ငြိမ်စွာဖြင့် ခုခံတိုက်ခိုက်နေပြီး တိုက်ခိုက်သူများထက် အစွမ်းအစ သာလွန်၏။

တိုက်ခိုက်သူများမှာတော့ လူအင်အားများပြားခြင်း၊ လက်နက်နှင့် သိုင်းပညာများ မျိုးစုံခြင်းတို့တွင် အသာစီးရနေသည်။ ဓား၊ လှံ၊ ဓားရှည်၊ တုတ် စသည်တို့ ပါဝင်သကဲ့သို့ ကြယ်ကြွေတူနှင့် လျှို့ဝှက်လက်နက်များ ကျွမ်းကျင်သော ကျင့်ကြံသူများလည်း ပါဝင်သည်။ အနည်းဆုံးတောင် မြှား၊ လင်းယုန်မြီးမြှား၊ ဓားပျံ စသည့် လျှို့ဝှက်လက်နက် ခုနစ်မျိုး၏ အသံကို ချူကျန့် ကြားလိုက်ရသည်။

ချူကျန့် ၏ ခန္ဓာကိုယ်ထဲမှ သွေးများ အနည်းငယ် တက်ကြွလာသကဲ့သို့ ဖြစ်သွားသည်။ သိုင်းလောက… လွမ်းဆွတ်ဖွယ်ပါတကား။ ချူကျန့် အမြဲတမ်း သိကျွမ်းခဲ့သော သိုင်းလောက နှင့် အနည်းငယ် ကွာခြားသော်လည်း ဤသွေးစွန်းနံ့ လွှမ်းနေသော ညလေနှင့် ရှုပ်ထွေးသော အော်ဟစ်သံများက သူ့ကို စိတ်ပျက်ခြင်းနှင့် လွမ်းဆွတ်ခြင်း ရောနှောနေသော ခံစားချက်ကို ဖြစ်ပေါ်စေသည်။

သို့သော်လည်း ဤလူနှစ်စုမှာ ချူကျန့် ကို မတွေ့သကဲ့သို့ အချင်းချင်း သတ်ဖြတ် တိုက်ခိုက်ရင်း မကြာမီပင် သူ၏ ဘေးသို့ ရောက်ရှိလာကြသည်။

ချူကျန့် မှာ ချက်ချင်းပင် ထိခိုက်နစ်နာရမည့်သူ ဖြစ်သွား၏။

"ဝှစ်…"

ဖရဲသီးအရွယ် ကြယ်ကြွေတူနှစ်ခုက ကြောက်မက်ဖွယ် လေဟုန်နှင့်အတူ တည့်တည့်သို့ ဝင်ရောက်လာသည်။ ရှေ့မှ ဓားရောင်များ လင်းလက်နေပြီး ဓားမကြီးများက ပိုက်ကွန်ကဲ့သို့ ယှက်၍ ချူကျန့် ၏ မျက်နှာဆီသို့ ခုတ်ပိုင်းလာကြသည်။ ဘယ်ညာမှ ခက်ရင်းခွတိုနှစ်ခုကလည်း ချူကျန့် ကို လျင်မြန်စွာ ထိုးစိုက်လာသည်။ အပြင်းထန်ဆုံးမှာ နောက်မှ တိုက်ခိုက်လာသည့် ပါရမီရှင်ဖြစ်ပြီး သူ၏ ဓားရှည်မှာ ချူကျန့် ၏ ကျောဘက်နှင့် ပေအနည်းငယ်သာ ကွာဝေးသော်လည်း ချူကျန့် က ထိုပြင်းထန်အေးစက်သော ဓား၏ ရည်ရွယ်ချက် ရှင်းလင်းစွာ ခံစားမိလိုက်သည်။ ဓားမှာ လျင်မြန်၍ အသံမရှိဘဲ ဤဓားသမားပါရမီရှင်မှာ ပထမတန်းစားပါရမီရှင်ဟု ဆိုနိုင်ပြီး တိုက်ခိုက်ခံရသော သုံးဦးထဲမှ တစ်ဦး ဖြစ်ဖွယ်ရှိ၏။

ဤသို့သော ရှုပ်ထွေး ကြောက်မက်ဖွယ် သတ်ဖြတ်မှု မြင်ကွင်းအား ယနေ့ခေတ် သာမန်ကစားသမား တစ်ဦးဦးသာ ကြုံတွေ့ရပါက ထိတ်လန့်၍ နေရာတွင်ပင် တောင့်တောင့်ကြီး ဖြစ်သွားပေလိမ့်မည်။

သို့သော်လည်း လျှို့ဝှက်သိုင်းလောကတွင် မရေမတွက်နိုင်သော ချောင်းမြောင်း တိုက်ခိုက်မှုများကို ကြုံတွေ့ခဲ့ဖူးသော ချူကျန့် မှာ စိတ်အလိုလိုပင် တုံ့ပြန်လိုက်မိသည်။ သူ၏ ကိုယ်ခန္ဓာမှာ လေထဲတွင် ယိမ်းနွဲ့နေသော မိုးမခပင်ကဲ့သို့ ဖြစ်သွားကာ အချိန်တခဏအတွင်းတွင် ကြယ်ကြွေတူနှစ်ခုနှင့် ရှေ့မှလာသော ဓားပိုက်ကွန်ကို ရှောင်တိမ်းလိုက်သည်။ ထို့နောက် အံ့ဩဖွယ်ကောင်းစွာ ရှေ့တက်၍ ဘေးစောင်းလှုပ်ရှားလိုက်ပြီး ခက်ရင်းခွတိုနှစ်ခုကို သူ၏ ရင်ဘတ်နှင့် ကျောဘက်မှ လက်မလောက်အကွာမှ ဖြတ်သန်းသွားစေသည်။ နောက်ဆုံးတွင် ထိုပထမတန်းစားပါရမီရှင်၏ ဓားရှည်ဖြင့် တိုက်ခိုက်မှုကိုမူ ချူကျန့် မှာ ပို၍ပင် ပါးနပ်စွာ ရှောင်တိမ်းလိုက်၏။ သူ၏ ခြေထောက်များက မျက်စိတစ်မှိတ်အတွင်းတွင် အကြိမ်ပေါင်းများစွာ ရှေ့တိုးနောက်ဆုတ် လှုပ်ရှားလိုက်ပြီး တစ်ကြိမ်စီမှာ လက်မအနည်းငယ်အတွင်းသာ ဖြစ်သော်လည်း ကိုယ်ခန္ဓာ၏ လှုပ်ရှားမှုနှင့် ပေါင်းစပ်လိုက်သောအခါ ထိုဓားရှည်၏ ပြောင်းလဲနေသော ဓားကွက်များအားလုံးကို ရှောင်တိမ်းနိုင်ခဲ့သည်။

နှစ်ဖက်စလုံး ဖြတ်ကျော်သွားသည့် တစ်ခဏတွင် ချူကျန့် ၏ လက်ငါးချောင်းမှာ ချိတ်သဖွယ် ဖြစ်သွားပြီး ဓားသမားပါရမီရှင်၏ လည်မျိုကို လျှပ်စီးကဲ့သို့ ဖမ်းဆုပ်လိုက်သည်။ ဤတစ်ချက်မှာ တစ်ဖက်လူ၏ ဓားကွက်ပြီးဆုံးသွား၍ ရှောင်တိမ်းနိုင်ခြင်း မရှိတော့သည့်အချိန်တွင် တိုက်ခိုက်ခြင်းဖြစ်ရာ လွဲချော်ရန် မဖြစ်နိုင်ချေ။ သို့သော်လည်း ချူကျန့်ထင်ထားတာနှင့် ဆန့်ကျင်စွာပင် သူ၏ သံချိတ်ကဲ့သို့ လက်ငါးချောင်းမှာ တစ်ဖက်လူ၏ လည်မျိုကို ဖောက်ထွင်းသွားပြီး ပုံရိပ်ယောင်ကို ဖောက်ထွင်းသွားသကဲ့သို့ ဖြစ်သွားသည်။

ချူကျန့် ကြောင်သွားသည်။ ထိုအချိန်တွင် တိုက်ခိုက်နေသော နှစ်ဖက်စလုံးမှ ပါရမီရှင်များမှာ သူ၏ ဘေးမှ ထွက်ခွာသွားကြပြီး တိုက်ခိုက်ရင်းနှင့် ဝေးကွာသွားကြသည်။ သူတို့သည် တစ်လျှောက်လုံး သူ့ကို မမြင်သကဲ့သို့ ပြုမူသွားကြ၏။

ချူကျန့် မှာ ရယ်ရမလို ငိုရမလို ဖြစ်သွားပြီး ထိုအခါမှ ယခင်က ဖြစ်ရပ်များမှာ ကစားသမားများအား စစ်မှန်သော သိုင်းလောက ကို ခံစားစေရန် ပြုလုပ်ထားသော ရုပ်လုံးပေါ် ပုံရိပ်များ၊ ဇာတ်ဝင်ခန်းများ ဖြစ်ကြောင်း သိရှိလိုက်သည်။ အင်တာနက်တွင် ကစားသမား အများအပြားက ဤဇာတ်ဝင်ခန်းမှာ အလွန် သေသပ်လှပစွာ ဖန်တီးထားပြီး လူများကို ဤအတုအယောင် လောကကို ချက်ချင်းပင် စွဲလမ်းသွားစေသည်ဟု မှတ်ချက်ပေးကြသည်မှာ မဆန်းတော့ချေ။ ချူကျန့် မှာလည်း အလားတူ ခံစားမိပြီး သူကဲ့သို့ စူပါပါရမီရှင်တစ်ဦးပင် ၎င်းထဲသို့ ရောက်ရှိသွားသကဲ့သို့ ခံစားရရာ ဤဇာတ်ဝင်ခန်းမှာ မည်မျှ လက်တွေ့ဆန်သည်ကို စဉ်းစားကြည့်နိုင်၏။

ချူကျန့် သက်ပြင်းချနေစဉ် မျက်စိရှေ့မှ အမှောင်ထု၊ မုန်တိုင်းနှင့် သိုင်းလောက သတ်ဖြတ်မှုများမှာ ရုတ်ခြည်း ပျောက်ကွယ်သွားပြီး ယခင်က ကောင်းကင်ယံသို့ ပြန်လည် ရောက်ရှိသွားကာ မျက်စိရှေ့တွင် ဂိမ်း၏ သတိပေးစာတန်း ထပ်မံ ပေါ်လာသည်။

"ဂုဏ်ယူပါတယ်... သင်သည် မဟာသိုင်းလောကခေတ်ဂိမ်း ဖွင့်လှစ်ပြီးနောက် လျှို့ဝှက် အရည်အချင်း စမ်းသပ်မှုကို အောင်မြင်သော ပထမဆုံး ကစားသမား ဖြစ်ပါသည်... ဂိမ်းစနစ်မှ သင့်အား လွတ်လပ်စွာ ခွဲဝေချထားနိုင်သော မွေးရာပါ အမှတ် ၃၀ ကို အထူး လက်ဆောင် ပေးအပ်ပါသည်…"

"…"

ချူကျန့် နားမလည်နိုင် ဖြစ်သွားသည်။ လျှို့ဝှက် အရည်အချင်း စမ်းသပ်မှု။ ခုနက ဇာတ်ဝင်ခန်း မဟုတ်ဘူးလား။ လျှို့ဝှက် စမ်းသပ်မှု အပိုင်း ပါသေးတာလား။ ဒီဂိမ်း ဒီဇိုင်နာကောင် ဘယ်‌လောက် စိတ်ပုပ်လို့ ဒီလို စမ်းသပ်မှုနည်းလမ်းကို စဉ်းစားမိတာလဲ။

ချူကျန့် ၏ မြည်တွန်တောက်တီးမှုကို လုံးဝ ဂရုမစိုက်ဘဲ ဂိမ်းသတိပေးစာတန်းအသစ် ထပ်မံ ပေါ်လာသည်။

"ဂိမ်းစနစ်မှ သင့်အတွက် အကြံပြုထားသော ဇာတ်ကောင် မွေးရာပါ အရည်အသွေးများကို ဖန်တီးပေးထားပါသည်... သင်သည် မိမိနှစ်သက်သလို အမှတ်များကို ချိန်ညှိနိုင်ပါသည်…"

ချူကျန့် ၏ ရှေ့တွင် ဇာတ်ကောင် မွေးရာပါ အရည်အသွေး မျက်နှာပြင်တစ်ခု ချက်ချင်း ပေါ်လာသည်။

ဇာတ်ကောင်အမည်: ချူလော့ကျွင်း

မွေးရာပါ ခွန်အား: ၂၆

မွေးရာပါ ကြံ့ခိုင်မှု: ၁၇

မွေးရာပါ အရိုးအကြော: ၁၂

မွေးရာပါ ကိုယ်ဖော့ပညာ: ၄၀

မွေးရာပါ ဉာဏ်ရည်: ၁၃

မွေးရာပါ ကံကောင်းခြင်း: ၁၂

လွတ်လပ်စွာ ခွဲဝေချထားနိုင်သော အမှတ်: ၃၀

ချူကျန့် အံ့အားသင့်သွားသည်။ ကိုယ်ဖော့ပညာ... ၄၀ မှတ် အပြည့် ဖြစ်နေပါလား။ ဇာတ်ဝင်ခန်းထဲမှာ တိုက်ခိုက်မခံရလို့ ဒီလို အမြင့်ဆုံး ကိုယ်ဖော့ပညာကို ကျပန်း ရသွားတာလား။

တကယ်လို့ အဲဒီ ၄၀ မှတ် က ကံကောင်းခြင်း ဖြစ်မယ်ဆို ဘယ်လောက် ကောင်းလိုက်မလဲ။ အသုံးမဝင်ဆုံး ကိုယ်ဖော့ပညာ လာဖြစ်နေတယ်။

ချူကျန့် က ကိုယ်ဖော့ပညာကို လျှော့ချရန် ကြိုးစားကြည့်ရာ ၁၀ မှတ်သာ လျှော့ချနိုင်ကြောင်း တွေ့ရှိလိုက်ရသည်။ ထို့အပြင် ကိုယ်ဖော့ပညာမှာ အမြင့်ဆုံးသို့ ရောက်ရှိနေသောကြောင့် ကျန်အရည်အသွေး ငါးမျိုးမှာ များစွာ ကျဆင်းသွား၏။ အပိုဆု ၃၀ မှတ် ရရှိခဲ့လို့သာမဟုတ်လျှင် ချူကျန့် မှာ ဆဲဆိုမိပေလိမ့်မည်။

"ကျစ်... အစီအစဉ်အတိုင်း ချိန်ညှိလိုက်တော့မယ်…"

မကြာမီပင် ချူကျန့် ၏ မွေးရာပါ အရည်အသွေး ခွဲဝေချထားမှုမှာ အသစ်ဖြစ်သွားသည်။

မွေးရာပါ ခွန်အား: ၄၀

မွေးရာပါ ကြံ့ခိုင်မှု: ၁၈

မွေးရာပါ အရိုးအကြော: ၁၀

မွေးရာပါ ကိုယ်ဖော့ပညာ: ၃၀

မွေးရာပါ ဉာဏ်ရည်: ၁၂

မွေးရာပါ ကံကောင်းခြင်း: ၄၀

"မတော်တဆ အဖြစ်အပျက်လေးတွေ ရှိခဲ့ပေမဲ့ ဒါက အကောင်းဆုံး အစပဲ…"

ချူကျန့် က မတော်တဆ ၃၀ မှတ်သို့ ရောက်ရှိသွားသော ကိုယ်ဖော့ပညာကို လုံးဝ လျစ်လျူရှု၍ အမှတ်ပြည့်နေသော ကံကောင်းခြင်းနှင့် ခွန်အားကို ကြည့်ကာ ကျေနပ်စွာ ပြုံးလိုက်သည်။ သူက နောက်ဆုံးတွင် "အတည်ပြုသည်" ကို နှိပ်လိုက်ရာ ခွဲဝေချထားသော အရည်အသွေး အမှတ်များအားလုံးမှာ ချက်ချင်း အတည်ဖြစ်သွား၏။

"ဇာတ်ကောင် ဖန်တီးခြင်း အဆင့် ပြီးဆုံးပါပြီ... ဆာဗာ အသစ် ဖွင့်လှစ်သည်အထိ စောင့်ဆိုင်းပေးပါ... ဤဂိမ်းကို အားပေးသည့်အတွက် ကျေးဇူးတင်ပါသည်…"

ထို့နောက် ချူကျန့် ၏ မျက်စိရှေ့မှာ အမှောင်ထုဖြင့် ဖုံးလွှမ်းသွားပြီး ကြီးမားသော အချိန်မှတ်စက်တစ်ခုသာ ကျန်ရစ်တော့သည်။

"ဆာဗာ အသစ် ဖွင့်လှစ်ရန် ၇ မိနစ် ၃၉ စက္ကန့် ကျန်ရှိပါသေးသည်…"

အကယ်၍သာ ဒုတိယလူတစ်ဦး ဤနေရာတွင် ရှိနေပြီး ဤအဖြစ်အပျက်ကို မြင်တွေ့ခဲ့ပါလျှင် ချူကျန့် ၏ ဤသို့သော ထူးဆန်းသော အရည်အသွေး ခွဲဝေမှုကြောင့် ပါးစပ်အဟောင်းသား ဖြစ်သွားမည် သို့မဟုတ် ရင်နာသွားပေလိမ့်မည်။

သိုင်းလောက ဂိမ်းတစ်ခုတွင် မွေးရာပါ အရိုးအကြောနှင့် မွေးရာပါ ဉာဏ်ရည်မှာ အဓိက အကျဆုံးဖြစ်၏။ အဘယ်ကြောင့်ဆိုသော် သိုင်းကျမ်း အများစုမှာ မွေးရာပါ ဉာဏ်ရည်နှင့် မွေးရာပါ အရိုးအကြောကို တောင်းဆိုပြီး အစွမ်းထက်လေလေ၊ တောင်းဆိုချက် မြင့်မားလေလေ ဖြစ်သောကြောင့် ဖြစ်သည်။ ထို့ကြောင့် လူတိုင်းနီးပါးမှာ ဤနှစ်မျိုးကို ဦးစားပေး၍ ၂၅ မှတ်အထက်သို့ တိုးမြှင့်ကြပြီးနောက် နောက်ပိုင်းတွင် တိုးမြှင့်ရန် ခက်ခဲသော ကံကောင်းခြင်းကို အနည်းငယ် ထည့်သွင်းကြသည်။ နောက်ဆုံးတွင် အစပိုင်းတွင် ပိုမို ချောမွေ့စွာ ကစားနိုင်ရန် နောက်ပိုင်းတွင် သိုင်းပညာ လေ့ကျင့်၍ တိုးမြှင့်နိုင်သော ခွန်အား၊ ကြံ့ခိုင်မှု၊ ကိုယ်ဖော့ပညာ စသည်တို့ကို အနည်းငယ် ထည့်သွင်းကြသည်။

အထက်ပါ အခြေအနေများကို ပြည့်မီရန် လူတိုင်းနီးပါးမှာ တစ်မျိုးချင်းစီကို အမြင့်ဆုံးသို့ ရောက်အောင် မထည့်သွင်းကြပေ။ အဘယ်ကြောင့်ဆိုသော် ၎င်းမှာ ကျန်အရည်အသွေးများကို များစွာ ကျဆင်းစေပြီး ဂိမ်း၏ အခက်အခဲကို နှစ်ဆ တိုးမြင့်စေသောကြောင့် ဖြစ်သည်။ အမှန်တကယ်တွင် သည်လို တစ်မျိုးတည်းကိုသာ အမှတ်ပြည့် ထည့်ပြီးကစားသည့် ကစားသမားများအားလုံးမှာ ရှုံးနိမ့်ခဲ့ကြပြီး ချူကျန့် ဖတ်ရှုခဲ့သော ထိုပို့စ်နှစ်ခုတွင်ပင် ဤသို့ မထည့်သွင်းရန် အကြံပြုထား၏။

ထို့ကြောင့် ချူကျန့် က ပို့စ်နှစ်ခုမှ အကြံပြုချက်များကို ပေါင်းစပ်၍ မိမိဘာသာ ထည့်သွင်းလိုက်သော အရည်အသွေး ခွဲဝေမှုမှာ အခြားသူများကို ရယ်မောစေမည်သာ ဖြစ်သည်။

ကံကောင်းခြင်း အမှတ်ပြည့်တဲ့လား။ မင်းက ချော်လဲရင်တောင် "ကိုးယန်သိုင်းကျမ်း" ကို ကောက်ရနိုင်ပေမဲ့ မင်းရဲ့ ညံ့ဖျင်းတဲ့ ဉာဏ်ရည်နဲ့ နားလည်နိုင်မှာလား။ မင်းရဲ့ ညံ့ဖျင်းတဲ့ အရိုးအကြောနဲ့ လေ့ကျင့်နိုင်မှာလား။

ထို့အပြင် အဓိက အချက်မှာ သုံးလမတိုင်မီက ဂိမ်းတွင် အကြီးစား ဗားရှင်း မွမ်းမံမှုတစ်ခု ပြုလုပ်ခဲ့ပြီး သိုင်းပညာများသာမက ဘဝရပ်တည်မှု အတတ်ပညာများအားလုံးမှာ အခြေခံ အတတ်ပညာများမှအပ ကျန်အားလုံးမှာ ၁၅ မှတ်အထက် မွေးရာပါ ဉာဏ်ရည် လိုအပ်လာခြင်းပင်ဖြစ်သည်။ ချူကျန့် အနှစ်သက်ဆုံးဖြစ်သော လက်နက်သွန်းလုပ်ခြင်း အတတ်ပညာနှင့် ဆေးဖော်စပ်ခြင်း အတတ်ပညာများလည်း ပါဝင်၏။ အမှန်တကယ်တွင် ထိုစဉ်က ဂိမ်းတွင် ၁၅ မှတ်အောက် မွေးရာပါ ဉာဏ်ရည်ဖြင့် ၉၉% သော သိုင်းပညာများကို လေ့ကျင့်နိုင်မည် မဟုတ်ကြောင်း သတိပေးခဲ့သော်လည်း ချူကျန့် က မိမိကိုယ်ကို သိုင်းပညာ လေ့ကျင့်ရန် မလိုအပ်ဟု ယူဆ၍ တိုက်ရိုက် လျစ်လျူရှုခဲ့ခြင်း ဖြစ်သည်။

ထို့ကြောင့် ချူကျန့် ဤသို့ ထည့်သွင်းလိုက်သော ဇာတ်ကောင်မှာ အခြား ကစားသမားများ၏ မျက်စိထဲတွင် တကယ့်ကို အသုံးမကျသော ဇာတ်ကောင်တစ်ဦး ဖြစ်သွားလေပြီ။

ယခုအခါ ချူကျန့် မှာ ဒါတွေအားလုံးကို လုံးဝ မသိသေးဘဲ သူ၏ "စံပြ အစ" ကြီး အတွက် ဝမ်းမြောက်နေဆဲ ဖြစ်ပြီး ဆာဗာ အသစ် ဖွင့်လှစ်ရန် အလွန် စိတ်လှုပ်ရှားစွာ စောင့်မျှော်နေ၏။