အခန်း (၈၃၅)

မုတ်ဆိတ်ရှည်အဘိုးအိုက ထိုသို့ ပြောပြီးသည်နှင့် လက်ထဲမှ စာရွက်လိပ်ကို ဖွင့်လိုက်သည်။

ဝီ ...

ချက်ချင်းမှာပင် မူလမသေမျိုးလက်နက်၏ ထူးခြားပြီး အားကောင်းလှသော ဖိအားကြီးတစ်ခု ထွက်လာ၏။

၎င်းမှ ကြောက်မက်ဖွယ် ရှေးဟောင်းအရောင်အဝါတစ်ခုလည်း တိုးထွက်လာသည်။

အားလုံး စာရွက်လိပ်အား မော့ကြည့်လိုက်ကြရာ ကောင်းကင်သန့်စင် မြေပုံမှ မှိန်ဖျော့ဖျော့ လမ်းကြောင်း ၇ ခု အပြင်ဘက်သို့ မျောလွင့်လာပြီး အားလုံးရှေ့ ကျလာသည်ကို မြင်လိုက်ရ၏။

" ဒီကောင်းကင်သန့်စင် မသေမျိုးမြေပုံမှာ အဝင်လမ်း အားလုံးပေါင်း ၇ ခုရှိတယ် ။ မင်းတို့က အဲ့ထဲ

က ကြိုက်တဲ့လမ်းကို ရွေးပြီးတော့ ဝင်လို့ရတယ် ။ အဲ့ မြေပုံထဲကနေ သုံးနာရီအတွင်း ပြန်ထွက်လာနိုင်တာနဲ့ စမ်းသပ်ပွဲကို အောင်ပြီ "

" ဒါပေမယ့်.. ဒီမြေပုံထဲမှာ ကြောက်စရာ အန္တရာယ်တွေလဲ စောင့်ကြိုနေတယ် ။ အဲ့တော့ ကိုယ့်ကိုကိုယ် ယုံကြည်ချက်မရှိဘူးဆိုရင် ခုတည်းက လက်လျှော့လိုက်ဖို့ အကြံပေးချင်တယ် ။ အဲ့လိုမဟုတ်ဘဲ အထဲဝင်သွားပြီးမှ အဲ့မှာ သေသွားရင် ငါတို့က တာဝန်ယူမှာမဟုတ်ဘူး "

စကားဆုံးသောအခါ အားလုံး ရုတ်ရုတ်သဲသဲ ဖြစ်ကုန်ကြသည်။

" ကဲ.. အခု မင်းတို့ ဆုံးဖြတ်ချက် ချလို့ရအောင် စက္ကန့်သုံးဆယ် အချိန်ပေးမယ် ။ မင်းတို့ ဒီအဆင့်မှာ ဆက်ပြိုင်ချင်သေးရင် ရှေ့ကို တိုးကြပါ "

မုတ်ဆိတ်ရှည်အဘိုးအိုက ပြောသည်။

ချီလန့်ယွမ်မှာ နေရာတွင် တောင့်တောင့်ကြီးရပ်၍ အတန်ငယ်ကြာ စဥ်းစားနေပြီးမှ သခင်ကြီးဟောင်ဘက် လှည့်ကြည့်ကာ ပြောလိုက်၏။

" သခင်ကြီးဟောင် ၊ ကျုပ် တောင်းပန်ပါတယ်ဗျာ ။ ကျုပ် လက်လျှော့လိုက်ပြီ "

သူ့ စိတ်ဝိဥာဥ်အစွမ်းမှာ လက်ရှိတွင်ပင် အကန့်အသတ်ပမာဏသို့ ရောက်နေပြီကို သူ ကောင်းကောင်းကြီး သိပါသည်။

ထိုအခြေအနေမျိုးဖြင့်သာ ကောင်းကင်သန့်စင် မသေမျိုးမြေပုံထဲသို့ ဝင်သွားပါက သူ့ကိုယ်သူ သေကြောင်းကြံသလိုသာ ဖြစ်ပေလိမ့်မည်။

သခင်ကြီးဟောင် ခေါင်းညိတ်လိုက်၏။

" အင်း.. မင်း ကောင်းကောင်းကြီး လုပ်နိုင်ခဲ့ပါတယ်ကွာ "

ချီလန့်ယွမ် သက်ပြင်းချလိုက်ပြီးနောက် လောထျန်းနှင့် ယွဲ့လီတို့အား ဦးညွှတ်၍ ပြောလိုက်သည်။

" သခင်လေးတို့နှစ်ယောက်ကို အောင်မြင်မှုကြီးကြီးရဖို့ ကျုပ် ဆုတောင်းပေးပါတယ် "

လောထျန်း ခေါင်းညိတ်၍ ပြန်ပြောသည်။

" စိတ်မပူပါနဲ့ဗျာ "

ယွဲ့လီလည်း ခေါင်းအသာညိတ်ပြလိုက်၏။

ထိုစဥ်မှာပင်..

" ကဲ.. အချိန်စေ့ပြီ ၊ ပြိုင်ပွဲဝင်မယ့်သူတွေက ရှေ့ကို တိုးခဲ့ကြပါ "

လောထျန်းနှင့် ယွဲ့လီတို့ တွန့်ဆုတ်မနေဘဲ ရှေ့သိူ့ လျှောက်သွားကြသည်။

အခြားပြိုင်ပွဲဝင် အများစုမှာလည်း ရှေ့တိုးသွားကြပြီး... ချီလန့်ယွမ်လို ပြိုင်ပွဲမှထွက်ရန် ရွေးချယ်ခဲ့သူ အနည်းငယ်လည်း ရှိပါ၏။

" ဟွမ်ရှင်းဂိုဏ်းက လူတွေအားလုံး ဝင်ပြိုင်ကြမှာလား "

" ဒါပေါ့ကွ.. သူတို့အားလုံးက ဒီလောက် ကြောက်စရာကောင်းတာကို "

" ဒီတစ်ခေါက်ပြိုင်ပွဲရဲ့ ရလဒ်က ဘယ်လိုတွေလာမ

လဲ မသိပါဘူးကွာ "

" ကြည့်ရတာ.. လောထျန်းကပဲ အသာစီးရမယ်နဲ့တူတယ် "

" လောထျန်းလား ၊ သူက အစွမ်းထက်တာ မှန်ပေမယ့်... အစီအမံပညာတွေကို နားလည်မှုပဲ အားကောင်းတာလေ ။ အခု ကောင်းကင်သန့်စင် မသေမျိုးမြေပုံက စိတ်ဝိဥာဥ်အစွမ်းကို စမ်းသပ်တာဆိုတော့ သူ ကောင်းချင်မှကောင်းမှာကွ "

" အင်း.. ငါလဲ အဲ့လိုပဲထင်တယ် ။ သူ့ရဲ့ စိတ်ဝိဥာဥ်အစွမ်းက ယဲ့ဖူရှောက်လောက် မကောင်းနိုင်ဘူး "

" ဟုတ်တယ်ကွ ။ အထူးသဖြင့် ယဲ့ဖူရှောက်က ပထမအဆင့်မှာ လောထျန်းရဲ့ အနိုင်ယူတာကို ခံခဲ့ရတာဆိုတော့ ဒီတစ်ခေါက် အစွမ်းကုန်သုံးပြီး ကြိုးစားမှာပဲ ။ သူတို့နှစ်ယောက် ကြားမှာ ဘယ်သူနိုင်မလဲဆိုတာ ပြောဖို့ခက်တယ် "

" အဲ့နှစ်ယောက်ကတော့ ချင်းယွမ်ဒေသရဲ့ အစီအမံပညာရပ်ပိုင်းကို ခေတ်တစ်ခေတ်စာလုံး အုပ်စိုးကြ

မှာ သေချာပါတယ်ကွာ "

လူများ ထင်ရာပြောလိုက်ကြသည်။

အားလုံးက ထိုသို့ ဆွေးနွေးနေကြစဥ်မှာပင် သခင်ကြီးဟောင်က လောထျန်းနှင့် ယွဲ့လီနောက်သို့ ရောက်လာသည်။

" မင်းတို့နှစ်ယောက်လုံး သေချာနားထောင်ကြ ။ မြေပုံထဲကို ဝင်သွားပြီးတာနဲ့ မင်းတို့ရဲ့ စိတ်ဝိဥာဥ်အစွမ်းကို အစွမ်းကုန်သာ ထုတ်သုံးကြနော် ။ အဲ့ထဲမှာ စိတ်ဝိဥာဥ်အစွမ်းက အားကောင်းလေ ၊ ခရီးကလဲ တိုလေပဲ ။ အဲ့ကျရင် မင်းတို့ အမြန်ဆုံး ပြန်ထွက်လာနိုင်လိမ့်မယ် "

သခင်ကြီးဟောင် ရှင်းပြလိုက်သည်။

" ကျုပ် သဘောပေါက်ပါပြီ "

လောထျန်းက သူ နားလည်ကြောင်း ပြရန်အတွက် ခေါင်းအသာညိတ်၏။

ဤသို့ဖြင့် မကြာခင်မှာပင် သူတို့နှစ်ဦး မြေပုံစာရွက်လိပ်ရှေ့ ရောက်သွားကာ လမ်းကြောင်းတစ်ခု ရွေးလိုက်ကြသည်။

" ကဲ... ပြိုင်ပွဲဒုတိယအဆင့် စပါပြီ "

မုတ်ဆိတ်ရှည်အဘိုးအို၏ စကားဆုံးသည်နှင့် လောထျန်းအပါအဝင် အခြားသူများအားလုံး လမ်းများပေါ်သို့ တစ်ပြိုင်နက်တည်း ခြေချလိုက်ကြသည်။

ဝီ ...

ထို့နောက်တွင်ကား.. သူတို့အားလုံး၏ ပုံရိပ်များက တစ်ခါမှ မရှိခဲ့ဖူးသလို ပျောက်ကွယ်သွားပါ၏။

ထိုမြင်ကွင်းကို ကြည့်နေသော အကြီးအကဲတစ်ယောက်က သခင်ကြီးဟောင်ဆီသို့ လျှောက်လာကာ အပြုံးဖြင့်ဆိုသည်။

" သခင်ကြီးဟောင် ၊ အခု ပြိုင်ပွဲဒုတိယအဆင့်မှာ ဘယ်သူ အနိုင်ရမယ်လို့ ထင်လဲ "

သခင်ကြီးဟောင် တဖက်လူအား တစ်ချက်ကြည့်ရုံဖြင့် ထိုလူက သူ့အား လာစမ်းသပ်နေခြင်းဖြစ်ကြောင်း ရိပ်မိလိုက်သည်။ သို့သော် သူ အပြုံးဖြင့်သာ ပြန်ပြောလိုက်ပါ၏။

" မေးနေးရာ လိုသေးလို့လားဗျာ ၊ လောထျန်းပဲ ဖြစ်မှာပေါ့ "

သူ့စကား ဆုံးချိန်မှာပင် ကဲ့ချန်က လှောင်ပြုံးဖြင့် ပြောလာသည်။

" အကြီးအကဲဟောင်က တကယ်ကို မောက်တာတာပဲ ။ လောထျန်းရဲ့ စိတ်ဝိဥာဥ်အစွမ်းကို တကယ်ကြီး ပြိုင်ဘက်ကင်းလို့ ထင်နေတာလား မသိပါဘူး "

သခင်ကြီးဟောင် မျက်မှောင်ကြုံ့သွားကာ ကဲ့ချန်အား ပြန်ကြည့်လိုက်သည်။

" မင်းက ဘာပြောချင်တာလဲ "

ကဲ့ချန်က အပြုံးဖြင့် ပြန်ပြော၏။

" ဘာမှမဟုတ်ပါဘူး... ငါ တစ်ခုကို သတိရသွားလို့ပါ "

သူ ပြောပြောဆိုဆိုပင် ဘေးဘီသို့ တစ်ချက်လှည့်ကြည့်လိုက်ပြီးမှ ပြုံး၍ ဆက်ပြောသည်။

" ဖန်ကွေ့က ဒီ ကောင်းကင်သန့်စင် မသေမျိုးမြေပုံနဲ့ ဆင်တူ အပွားတစ်ခုထဲမှာ ကျင့်ကြံနေခဲ့တာ နှစ်တွေအများကြီး ကြာသွားခဲ့ပြီလေ "

" ဟင်.... "

သူ့းကားကြောင့် အားလုံး ထိတ်လန့်သွားကြပုံ ပေါ်ပါ၏။

" ကောင်းကင်သန့်စင် မသေမျိုးမြေပုံနဲ့ ဆင်တူ.. ဟုတ်လား ၊ အဲ့ ထိပ်တန်းအဆင့် မူလမသေမျိုးလက်နက်နဲ့လေ... "

တစ်ယောက်က အံ့သြတကြီး မေးသည်။

ကဲ့ချန်က အပြုံးဖြင့် ခေါင်းညိတ်ပြ၏။

" ဟုတ်တယ် ... အဲ့ပုံစံတူ လုပ်ထားတဲ့ဟာက မူလမသေမျိုးလက်နက် အဆင့် မဟုတ်သေးပေမယ့် အဲ့လောက်နီးနီးပဲ ။ ဖန်ကွေ့က အဲ့မြေပုံထဲကနေ ပြန်ထွက်လာဖို့ နာရီဝက်ပဲ ကြာတာ "

" ဒါ... "

တဖက် အဘိုးအို၏ မျက်နှာထား အနည်းငယ်ပြောင်းသွားသည်။

" ဒါဆို... မူလမသေမျိုးလက်နက်ရဲ့ အစွမ်းကို အ

ခြေခံပြီးတွက်လိုက်ရင် ဖန်ကွေ့အတွက် မြေပုံထဲကနေ ပြန်ထွက်လာဖို့ နှစ်နာရီလောက်ပဲ အချိန်ကြာနိုင်တာပေါ့ "

အဘိုးအို ပြောလိုက်သည်။

" နှစ်နာရီ .. .. ဒီမှာရှိကြတဲ့ အကြီးအကဲတွေတောင် အဲ့လို မလုပ်နိုင်လောက်ဘူး မဟုတ်လား "

" လောထျန်းနဲ့ ယဲ့ဖူရှောက်တို့ နှစ်ယောက်လုံးက ကြောက်စရာကောင်းလောက်အောင် အစွမ်းထက်ကြတာတော့ မှန်ပါတယ် ။ ဒါပေမယ့်.. ဖန်ကွေ့က အတွေ့အကြုံတွေ အများကြီးပိုရှိတာ ဆိုတော့... သူ ဟိုနှစ်ယောက်ကို မရှုံးလောက်ဘူး "

" ဒီတိုင်းဆိုရင် ပြိုင်ပွဲဒုတိယအဆင့်က မျှော်လင့်မထားတာတွေ အများကြီး ပြည့်နေမယ့်ပုံပဲ "

အားလုံး သက်ပြင်းကိုယ်စီ ချလိုက်ကြသည်။

မုတ်ဆိတ်ရှည်အဘိုးအိုက ထိုသူများ၏ စကားကို နားထောင်နေရင်း အပြုံးဖြင့် ပြောလာ၏။

" အားလုံး... အများကြီးတွေ လျှောက်စဥ်းစားနေလို့

ရော ဘာထူးမှာလဲဗျာ ။ နောက် နှစ်နာရီလောက်နေရင်ပဲ ရလဒ်ကို ရှင်းရှင်းကြီး တွေ့ကြရမှာပါ "

အားလုံးကလည်း သူ့စကားကို ထောက်ခံဟန်ဖြင့် ခေါင်းညိတ်လိုက်ကြသည်။

သို့သော်... အားလုံး ထိုသို့ ပြောဆိုနေကြစဥ်မှာပင်..

ဝီ...

ကောင်းကင်သန့်စင် မသေမျိုးမြေပုံပေါ်၌ အလင်းတန်းတစ်ခု လက်လာပြီး...

လောထျန်း ထွက်လာပါ၏။

" ဟင်... ဘာလို့ အပြင်ရောက်လာတာလဲ "

လောထျန်းက ဘေးဘီသို့ လှည့်ကြည့်ကာ တအံ့တသြ မေးလိုက်သည်။

" ဟင်... "

ခန်းမထဲ ရှိနေသူအားလုံး တုန်လှုပ်သွားကုန်ကြ၏။

သူတို့ ဦးနှောက်များ ပျက်သွားပြီလားဟုလည်း

အားလုံး တွေးမိလိုက်ကြသည်။

" ဒါ.... ကောင်းကင်သန့်စင် မသေမျိုးမြေပုံထဲကနေ အစောဆုံး ပြန်ထွက်လာနိုင်တဲ့ မှတ်တမ်းကို ဘယ်သူ မှတ်မိသေးလဲ "

တစ်ယောက်က မေးလိုက်သည်။

" တစ်နာရီ... "

အခြားတစ်ယောက်က ပြန်ဖြေ၏။

" အခု... ပြိုင်ပွဲစတဲ့ အချိန်ကနေ ခုထိဆိုရင်.. စက္ကန့်တစ်ရာတောင် မပြည့်သေးဘူးမဟုတ်လား "

" ကောင်းကင်သန့်စင် မသေမျိုးမြေပုံက အမှားယွင်းတစ်ခုခု ရှိနေလို့များလား "

အားလုံး မုတ်ဆိတ်ရှည် အဘိုးအိုအား လှမ်းကြည့်လိုက်ကြသည်။

မုတ်ဆိတ်ရှည်အဘိုးအို မှာလည်း အူကြောင်ကြောင် ဖြစ်နေရှာပါ၏။

အားလုံးက သူ့အား ကြည့်နေသည်ကို မြင်မှ.. သူ ကောင်းကင်သန့်စင် မသေမျိုးမြေပုံဆီ ချက်ချင်းသွားပြီး ၎င်းကို သေချာစစ်ဆေးကြည့်လိုက်သည်။

" မြေပုံမှာ... ဘာပြဿနာမှ မရှိဘူး "

" ဘယ်လို... "

အားလုံး အံ့သြတကြီး ဖြစ်ကုန်ကြသည်။

" သခင်လေးလောထျန်း ... ဘယ်လိုလုပ်ပြီး ထွက်လာနိုင်ခဲ့တာလဲ "

သခင်ကြီးဟောင်က လောထျန်းအား မေးလိုက်၏။

လောထျန်းက တအံ့တသြ ပြန်ဖြေသည်။

" ကျုပ်က သခင်ကြီးပြောတဲ့အတိုင်း လုပ်ခဲ့တာပဲလေ ။ ကျုပ် အထဲကို ရောက်တာနဲ့ စိတ်ဝိဥာဥ်အစွမ်းကို ထုတ်လိုက်တာ ။ နောက်တော့ တံခါးပေါက် ဆယ့်နှစ်ခု ပေါ်လာတာပဲ ။ ကျုပ်လဲ အချိန်အကြာကြီး တွန့်ဆုတ်နေပြီးမှ ကျပန်းတစ်ခုရွေးပြီး လာခဲ့တာ "

လောထျန်း ထိုသို့ပြောနေရင်း ရုတ်တရက်.. စကားရပ်ကာ အံ့သြတကြီး ပြောသည်။

" ကျုပ်ရွေးတာ မှားသွားလို့များလား ။ နေဦး..

ကျုပ် ထပ်စမ်းကြည့်လိုက်ဦးမယ် "

သူ ပြောပြောဆိုဆိုပင် လမ်းတစ်ခုကိုရွေးပြီး ကောင်းကင်သန့်စင် မသေမျိုးမြေပုံထဲ ပြန်ဝင်သွားသည်။

" ခဏနေပါဦး... "

သခင်ကြီးဟောင် သူ့ကိုတားရန် ကြိုးစားလိုက်သေးသော်လည်း နောက်ကျသွားပါ၏။

သို့သော် ထိုအချိန်မှာပင်..

ဝီ ...

အလင်းတန်းတစ်ခု လက်လာကာ လောထျန်း မြေပုံထဲမှ ပြန်ထွက်လာသည်။

" ဒီတစ်ခေါက်ရော.. မှန်သွားပြီလား "

လောထျန်း မေးလိုက်သည်။

အားလုံးမှာကား သူ့ကိုကြည့်ပြီး ဆွံ့အမှင်သက်လျက် ....

ဘာတွေ ဖြစ်နေပါသလဲ...

ဒုတိယတစ်ကြိမ် ဝင်တာက ပထမအကြိမ်ထက်ပင် ပိုမြန်ပြီး တစ်စက္ကန့်လောက်သာ ကြာခဲ့ပါ၏။

ထိုကောင်လေးက ကောင်းကင်သန့်စင် မသေမျိုးမြေပုံ၏ စိတ်ဝိဥာဥ်အစွမ်းအပေါ် ဖိနှိပ်ခြင်းကို လုံးဝ လျစ်လျူရှုထားနိုင်ပါသလား....