ကမ်းလှမ်းချက်
Vol. 24 Ch. 359
“ဟေး… ဒါပေမဲ့ အစ်ကိုလင်းက ကျွန်မတို့ရဲ့ ယာဥ်တန်းခေါင်းဆောင်ပဲ… ရှင်တို့က သူ့ကို—ပြီးတော့ အစ်မကီကီကို—ခေါ်သွားရင် ကျွန်မတို့က ဘာလုပ်ရတော့မှာလဲ” ထိုအချိန်တွင် ရှားရှားသည် ကျိုးဝူကို အရေးကြီးသော မေးခွန်းတစ်ခု မေးလိုက်သည်။
သူမ ပြောလိုက်သည်နှင့် အိပ်ငိုက်နေသော လုရှင်းချန်သည် မျက်လုံးများကို ပျင်းရိစွာ ဖွင့်လိုက်ပြီး ၎င်းတို့ဘက်သို့ မျက်လုံးများကျဉ်းမြောင်းကာ ကြည့်လိုက်သည်။
“ဖီးနစ်ကို ဝင်ရောက်ခြင်းက မင်းတို့ အဖွဲ့ကို ဖျက်သိမ်းရမယ်လို့ မဆိုလိုပါဘူး” ဖုန်းဖုန်းအမည်ရှိသော အမျိုးသမီးက ယုံကြည်မှုအပြည့်နှင့် ရှင်းပြလိုက်သည်။
“ဖီးနစ်က ကမ္ဘာလုံးဆိုင်ရာ ရွေ့လျားအဖွဲ့အစည်း ဖြစ်တယ်။ ဖီးနစ်စင်တာနဲ့ နောဧလို နေရာတွေတောင်မှ အသက်ရှင်ကျန်ရစ်သူအားလုံးကို ခိုလှုံပေးနိုင်တဲ့ အမှန်တကယ် ဘေးကင်းတဲ့နေရာတွေ မဟုတ်ဘူး။ ဒါကြောင့် ငါတို့က ဝင်ရိုးစွန်းဒေသတွေမှာ အာရုဏ်ဦး ကာကွယ်ရေးလိုင်းနဲ့ အာကာသဓာတ်လှေကားကို အရန်အစီအစဉ်တွေအဖြစ် တည်ဆောက်နေကြတယ်။ ငါတို့ရဲ့ အဓိကမစ်ရှင်က ကမ္ဘာလုံးဆိုင်ရာ အကူအညီပဲ။ ဒါကြောင့် ဖီးနစ်အဖွဲ့စည်းကို ဝင်ရောက်ခြင်းက မင်းတို့က ဌာနချုပ်မှာ အခြေစိုက်ရမယ်လို့ မဆိုလိုဘူး—မင်းတို့ ဘယ်နေရာမှာမဆို လုပ်ဆောင်နိုင်တယ်။ တစ်ခုတည်းသော မီးပွားက မြက်ခင်းပြင်ကို လောင်ကျွမ်းစေနိုင်တယ်ဆိုတဲ့ အယူအဆပဲ။ ဖီးနစ်အဖွဲ့အစည်း ဒါမှမဟုတ် ညလမ်းလျှောက်သူ ဌာနခွဲက ဘယ်ဒေသမှာမဆို၊ ဘယ်အသက်ရှင်ကျန်ရစ်သူ အဖွဲ့မှာမဆို ရှိနိုင်တယ်၊၊ ပြန့်ကျဲနေပေမယ့် ခိုင်မာစွာ တည်ရှိနေပြီး ဘယ်လိုပဲဖြစ်ဖြစ် အသက်ရှင်နေနိုင်တယ်”
ကျိုးဝူက ခေါင်းညိတ်ပြီး ထပ်ပြောသည်။
“အတိအကျပဲ။ အခုချိန်မှာ ရန်သူရဲ့ အင်အားဟာ မယှဉ်နိုင်စရာဖြစ်ပြီး သေချာမသိရသေးဘူး။ ဒီအခြေအနေမှာ ငါတို့က ပထမဆုံး လူသားမျိုးနွယ်ရဲ့အင်အားကို ထိန်းသိမ်းရမယ်၊၊ အသက်ရှင်သန်ရေး အခွင့်အလမ်းတွေကို တဖြည်းဖြည်း ရှာဖွေရမယ်၊၊ ပြီးတော့ အသက်ရှင်ကျန်ရစ်တဲ့ ကမ္ဘာ့လူဦးရေတစ်ခုလုံးကို စုစည်းရမယ်။ တစ်ကြိမ်တည်း ဖြေရှင်းချက်ကို ရှာဖွေခြင်းက အချည်းနှီးပဲ—လုံးဝ ဘေးကင်းတဲ့နေရာဆိုတာ မရှိဘူး။ ဒါကြောင့် ဖီးနစ်က အထက် ဒါမှမဟုတ် အောက်မှာ ရှိနိုင်တယ်—သူက အဓိကမြို့ကြီးတွေ အတွင်းမှာ ဒါမှမဟုတ် လူအများကြားမှာ တည်ရှိနိုင်တယ်၊၊ ပြန့်ကျဲနေပေမယ့် ခိုင်မာနေပြီး ဘာလိုအခြေနေမှာဖြစ်ဖြစ် အသက်ရှင်နေနိုင်တယ်”
လင်းရှန်၏ မျက်စိသူငယ်အိမ်များ ကျုံ့ဝင်သွားသည်။ သူ ရုတ်တရက် သဘောပေါက်သွားသည်။
“မင်း ဆိုလိုတာက... ငါ ဖီးနစ်ကို ဝင်ရင်တောင် ခင်ဗျားတို့လို တိုက်ရိုက် အမိန့်နာခံစရာ မလိုဘူးလား… ငါတို့ရဲ့ အဖွဲ့က ရွေ့လျားပြည်သူ့စစ် ယူနစ်တစ်ခုအဖြစ် လုပ်ဆောင်ပြီး ပြောက်ကျားစစ်ဆင်ရေးကနေတစ်ဆင့် ဖီးနစ်ရဲ့ စစ်ဆင်ရေးတွေနဲ့ ပူးပေါင်းဆောင်ရွက်ရမယ်ပေါ့”
“အတိအကျပဲ”
ကျိုးဝူနဲ့ ဖုန်းဖုန်းတို့ တစ်ပြိုင်နက် ပြောလိုက်မိပြီး ရုတ်တရက် အံ့ဩစွာဖြင့် လင်းရှန်ကို လှည့်ကြည့်လိုက်သည်—သူတို့သည် ထိုသူက ဤအယူအဆကို လျင်မြန်စွာ နားလည်လိမ့်မည်ဟု မမျှော်လင့်ခဲ့ကြပေ။
အဖွဲ့ထဲမှ ကျန်သူများ၏ မျက်နှာအမူအရာများ ဝင်းပသွားလေသည်၊၊ လင်းရှန်သည် ချန်ဆီရွှမ်ဘက်သို့ လှည့်လိုက်ပြီး သူ၏ ကျောရိုးတစ်လျှောက် ထူးဆန်းသောအေးစက်မှု တစ်ခုကို ခံစားလိုက်ရသည်။
ပြောက်ကျားစစ်ဆင်ရေးလား…
နှစ်ဦးစလုံးသည် ရုတ်တရက် ထူးဆန်းသော ရင်းနှီးမှုတစ်ခုကို ခံစားလိုက်ရသည်။ ဘာလို့ သူတို့ပြောတဲ့ ဒီမဟာဗျူဟာက သမိုင်းဝင်အဓိပ္ပါယ်ရှိနေသလိုမျိုး ထွက်ပေါ်လာရတာလဲ…
“...ကောင်းပြီလေ”
လင်းရှန် ခေါင်းညိတ်လိုက်သည်။ သူသည် ဖီးနစ်က မည်သို့ အလုပ်လုပ်သည်ကို အနည်းနှင့်အများ နားလည်သွားခဲ့သည်။
“တကယ် ဒီလိုဆိုရင် ဖီးနစ်ကို ဝင်ရောက်ခြင်းက ငါတို့ကို နောက်ထပ် ကိုယ်ပိုင်ဘဝတစ်ခု ပေးလိမ့်မယ်။ ဒါပေမဲ့ ငါတို့က အခုမှ ဘဝကို မနည်းရှင်သန်နေရတာ—ငါတို့ ဘာများ ပံ့ပိုးပေးနိုင်မှာလဲ”
“မင်းက တကယ်ပဲ ဘာက အကျိုးရှိမလဲဆိုတာ မေးချင်နေတာမလား…ဟုတ်လား” ကျိုးဝူက စပ်ဖြဲဖြဲ လုပ်ပြီး သူ့ကို မျက်စိမှိတ်ပြလိုက်သည်၊၊
မိတ်ဆွေ…မင်းအတွေးကို ငါ လုံးဝ မြင်နေတယ်…
လင်းရှန် ပြန်မဖြေခဲ့ပေ။ သူသည် ဖီးနစ်၏ ကောင်းမွန်သော သဘောထားကို တန်ဖိုးထားသော်လည်း သူတို့အတွက် မျက်စိမှိတ်ပြီး အလံကို ကိုင်ဆောင်ပေးရမည့် တာဝန်မရှိပေ၊၊
အခုချိန်မှာ သူသည် သေမင်းလက်မှ မနည်းလွတ်မြောက်ခဲ့ရုံသာ ရှိသေးသည်။ အနန္တ ရထားကို အသက်ရှင်နေစေဖို့တောင် သူ ရုန်းကန်နေရသည်—သူ လူသားမျိုးနွယ်ကို ကယ်တင်ဖို့ ဘယ်လို စတင် စဥ်းစားနိုင်မှာလဲ….
ရိုးရိုးသားသား ပြောရလျှင် လင်းရှန်သည် ကမ္ဘာပျက်ကပ်တွင် မိမိကိုယ်ကျိုးကြည့်ခြင်းသည် အသက်ရှင်သန်ရေးအတွက် အဓိကဖြစ်သည်ဟု အမြဲတမ်း ယုံကြည်ခဲ့သည်။
သို့တိုင် သေခြင်ရှင်ခြင်းမျဥ်းကြောင်းအပေါ် ရောက်တိုင်း သူသည် မယုံနိုင်လောက်အောင် မိုက်မဲသောအရာတစ်ခုကို လုပ်နေသည်ကို သူ့ကိုယ်သူ တွေ့ရှိလိုက်ရသည်။
သူသည် ဤလုပ်ရပ်များက သူ၏ ကိုယ်ပိုင်အသက်ရှင်သန်ရေးအတွက် ဖြစ်သည်—သူသည် သူရဲကောင်းတစ်ယောက် ဖြစ်ချင်၍ မဟုတ်ကြောင်း မိမိကိုယ်ကို အမြဲ ပြောနေခဲ့သည်။
သို့သော် သူ မိုက်မဲသောအရာများကို ပိုလုပ်လေ… မိမိကိုယ်ကို ယုံကြည်အောင် လုပ်ရန် ပို၍ခက်ခဲလာလေ ဖြစ်သည်။
“ဟုတ်တာပေါ့… ငါတို့မှာ မင်းအတွက် တစ်ခုခုတော့ ရှိပါတယ်”
ကျိုးဝူက လက်ဖျောက်တီးလိုက်သည်။ ထူးဆန်းသော လှိုင်းတွန့်တစ်ခု ပျံ့နှံ့သွားပြီး ရုတ်တရက်—သူ၏ နောက်ကွယ်မှ ငွေရောင်သတ္တု သေတ္တာ တစ်လုံးသည် လေထဲမှ ပေါ်လာပြီး ကြမ်းပြင်ပေါ်သို့ ဒုန်းခနဲ မြည်သံဖြင့် ကျသွားသည်။
လူတိုင်း အံ့အားသင့်စွာ စိုက်ကြည့်နေကြသည်။
“ဒါက ဘယ်လို စွမ်းရည်အမျိုးအစားလဲ...”
ကလစ် ကလစ်
ဖုန်းဖုန်းက ရှေ့သို့ ထွက်လာပြီး သတ္တုသေတ္တာကို စားပွဲပေါ်သို့ မြှောက်တင်လိုက်ကာ သော့ဖွင့်ရန် စတင်လိုက်သည်။
“ပထမဆုံး ဖီးနစ်က မင်းတို့ကို ပေးမယ့် အထူးလက်ဆောင်အကြောင်း ပြောရအောင်—ယူပေအာကာသဆိပ်ကမ်းမှာ လူပေါင်းထောင်ပေါင်းများစွာကို ကယ်ဆယ်ရေးမှာ အနန္တ ရထားရဲ့ ကြိုးစားအားထုတ်မှုအတွက် ကျေးဇူးတင်ခြင်း အထိမ်းမှတ်အနေနဲ့ပါ”
ကျွီ
မျက်လုံးအားလုံး သေတ္တာဆီသို့ စူးစိုက်သွားသည်။ အဖုံးကို မြှင့်တင်လိုက်သောအခါ အတွင်း၌ အထူးဒီဇိုင်းပြုလုပ်ထားသော ပုလင်းငယ်ဆယ်လုံးသည် တစ်လုံးချင်းစီတွင် ဖျော့တော့သော အစိမ်းရောင် အရည်များဖြင့် ပြည့်နေသည်ကို တွေ့ရသည်။
သေတ္တာဖွင့်လိုက်သည့် အချိန်၌ လင်းရှန်၏ ထူးဆန်းသော ကုဗတုံးက သတိပေးချက် ထုတ်ပြန်ခဲ့သည်။
[ဘီပ် ဘီပ်: အမှောင်ကျုးကျော်မှု…. ကြောက်ရွံ့ခြင်းစွမ်းအင် ဝင်ရောက်မှုကို တွေ့ရှိပါသည်]
လင်းရှန် မျက်မှောင်ကြုတ်လိုက်သည်။ ထိုအရည်သည် အမှောင်ကျူးကျော်မှု စွမ်းအင်များနှင့် သက်ဆိုင်နေကြောင်း ရှင်းရှင်းလင်းလင်း သိသာနေသည်—သို့သော် ၎င်းသည် ဖီးနစ်မှ လာသောကြောင့် သူ၏ အတွေးများကို ထိန်းချုပ်ထားလိုက်သည်။