လူသတ်ဖို့

"အံ့သြစရာကောင်းတဲ့ အရှိန်အဝါပါလား။ ဒီလိုအင်အားကြီးပုဂ္ဂိုလ်တွေတောင် ကြောက်လန့်တကြားနဲ့ ဒီနေရာမှာ စုရုံးနေကြပြီ"

"ကျွတ် ကျွတ်၊ မိသားစုကြီးတွေ အများကြီးပါလား။ အထက်တန်းလွှာ မိသားစုကြီးတွေ၊ ကုန်သွယ်ရေး အဖွဲ့စည်းတွေက ဥက္ကဋ္ဌတွေရောပဲ"

"မဟာပုံစံမဲ့ဂိုဏ်းက တောင်းပိုင်းဒေသမှာ တကယ့်ကို နံပါတ်တစ်ဂိုဏ်းပါလား။ သူတို့ကို ဘယ်သူမှ ယှဉ်နိုင်မှာမဟုတ်ဘူး"

"ဝိညာဉ်မုဆိုးက မဟာပုံစံမဲ့ဂိုဏ်းရဲ့ ဂုဏ်သိက္ခာကို အားကိုးရုံနဲ့တော့ ဒီလိုအာဏာမျိုးရှိလာမှာ မဟုတ်ဘူး။ သူ့ရဲ့ ကျွမ်းကျင်တဲ့ တိုက်ခိုက်မှုတွေကြောင့် သူကိုယ်တိုင်လည်း တောင်ပိုင်းဒေသမှာ တကယ် ထင်ရှားကျော်ကြားတဲ့လူ။ ဒါကြောင့်လည်း သူ သတ်ခဲ့တဲ့ ဂိုဏ်းတွေ မိသားစုတွေဆိုတာ ဆယ်ခုထက်မနည်းရှိနေတာ"

လူအများအပြားသည် တိတ်တဆိတ် ဆွေးနွေးနေကြသည်။ ဝိညာဉ်မုဆိုးသည် အမှန်တကယ် အထင်ကြီးဖွယ်ကောင်းသူဟု ၎င်းတို့ ခံစားနေရသည်။ သူသည် အလွန်အင်အားကြီးမားလှရာ၊ ၎င်းတို့ပင် စိတ်ကူးမယဉ်ဝံ့ကြပေ။ ၎င်းတို့သည် ဝိညာဉ်မုဆိုး၏ နောက်ခံပိတ်ကားများဖြစ်လာကြသော်လည်း မကျေနပ်သည့် အမူအရာမျိုး မပြသဝံ့ကြပေ။ ဝိညာဉ်မုဆိုးသည် မဟာပုံစံမဲ့ဂိုဏ်းတွင် ရွှေအမတေအဆင့်သို့ တက်လှမ်းရန် ဖြစ်နိုင်ခြေအရှိဆုံးဟု ဆိုထားသည့် ဖြစ်တည်မှုတစ်ခုဖြစ်သည်။ ၎င်းတို့သည် သူ၏နောက်ခံပိတ်ကားဖြစ်မည်ဆိုလျှင်ပင် ယင်းဖြစ်စဉ်သည် ၎င်းတို့ကို လေးစားမှုပြနေခြင်းဖြစ်၏။

ဝိညာဉ်မုဆိုးသည် ညစာစားပွဲကျင်းပရာ အလယ်ဗဟိုသို့ လှမ်းလာကာ ပြောလိုက်သည်။

"အားလုံးပဲ၊ ကျုပ် ဒီနေ့ ခင်ဗျားကို ဖိတ်ကြားလိုက်ရတဲ့ အကြောင်းအရင်းက နှစ်ချက်ရှိတယ်"

သူသည် လူတိုင်းကို ဖြတ်သန်းကြည့်ရှုပြီးနောက် တက်ကြွစွာ ပြောလိုက်သည်။

"ပထမတစ်ချက်အနေ မဟာပုံစံမဲ့ဂိုဏ်းက ချူးမိသားစုကို ဆန့်ကျင်ဖို့ ဆန္ဒရှိနေတာကို အားလုံး သိထားလောက်ပါပြီ၊ ခင်ဗျားတို့မိသားစုတွေ အရင်တုန်းက ချူးမိသားစုနဲ့ အနည်းနဲ့အများ ပူးပေါင်းဆောင်ရွက်ခဲ့ကြပေမယ့် ဒီနေ့ကစပြီး ခင်ဗျားတို့အားလုံး သူတို့နဲ့ အဆက်အသွယ်ဖြတ်ရမယ်"

သူ၏အကြည့်သည် တစ်စုံတစ်ယောက်အပေါ် ကျရောက်သွားခဲ့ရာ၊ ထိုလူသည် ချက်ချင်းပင် အလွန်ထိတ်လန့်သွားသည်။ ထိုလူသည် လူသတ်ဖြတ်ရာတွင် ဝိညာဉ်မုဆိုး၏ ထိတ်လန့်ဖွယ် မှတ်တမ်းများကို ကြားသိဖူးသည်။ သူ၏ဦးဆောင်မှုနောက် လိုက်ပါသူများသည် ကြီးပွားမည်ဖြစ်၍ သူ့ကို ဆန့်ကျင်သူများသည် သေဆုံးရပေလိမ့်မည်။

လူများစွာသည် ဝိညာဉ်မုဆိုး၏စကားကိုကြားသောအခါ ချက်ချင်း သက်ပြင်းချလိုက်ကြသည်။ ဝိညာဉ်မုဆိုးသည် ဤကိစ္စနှင့်ပတ်သက်၍ ဆက်လက်ဆောင်ရွက်ရန် ရည်ရွယ်ချက်မရှိပေ၊ သို့သော် ဤသည်မှာလည်း ၎င်းတို့ မျှော်လင့်ထားသည်နှင့် ထပ်တူကျပေသည်။ ချူးမိသားစုသည် ရှေးဟောင်း အထက်တန်းလွှာမိသားစုများဖြစ်ကြရာ၊ တိုင်းပြည် ထူထောင်ချိန်မှစ၍ တည်ရှိခဲ့ကြသည်။ မဟာပုံစံမဲ့ဂိုဏ်းနှင့် နှိုင်းယှဉ်၍မရနိုင်သော်လည်း၊ ၎င်း၏အဆက်အသွယ်များသည် ကြီးမြတ်သော ဝေ့တိုင်းပြည်၏တောင်းပိုင်းဒေသတစ်ခုလုံးတွင် ပျံ့နှံ့လျက်ရှိသည်။

၎င်းတို့သည် ချူးမိသားစုနှင့် အနည်းနှင့်အများ ပူးပေါင်းလုပ်ဆောင်ခဲ့ကြရာ၊ ဤသည်မှာ သာမန်ဖြစ်စဉ်ဖြစ်၏။ မဟာပုံစံမဲ့ဂိုဏ်းသည် ဤကိစ္စရပ်ကို ဆက်လက်ဆောင်ရွက်ရန် တွန်းအားပေးနေပါက၊ သက်ရောက်မှုများ အလွန်ကြီးမားပေလိမ့်မည်။ မဟာပုံစံမဲ့ဂိုဏ်းပင် လူတိုင်းကို တစ်ပြိုင်နက်တည်း စော်ကားနိုင်မည် မဟုတ်ပေ။

"ရောက်မလာတဲ့လူတွေကတော့ ဘယ်သူ့ကို ရွေးကြမယ်ဆိုတာ ကျုပ် သိပြီးသားပါ။ ကိစ္စမရှိပါဘူး၊ ဒီည သူတို့ကို တစ်စုံတစ်ယောက်က သင်ခန်းစာပေးလိမ့်မယ်"

ဝိညာဉ်မုဆိုး၏အမူအရာသည် အလွန်မောက်မာနေခဲ့ရာ၊ သူသည် မည်သည်ကိုမျှ လုံးလုံးလျားလျား ဂရုစိုက်ပုံမပေါ်ပေ။ ဝေ့တိုင်းပြည်၏ ဥပဒေများတွင် ၎င်းတို့ကဲ့သို့သောလူများကို ထိန်းချုပ်ရန် နည်းလမ်းမရှိပေ။ အသုံးမဝင်ဘူးဟု ဆိုလျှင်ပင် မှန်ကန်ပေလိမ့်မည်။ သူသည် ရက်စက်စွာ တိုက်ခိုက်နိုင်သည့်အတွက် မည်သည်ကိုမျှ လုံးလုံးလျားလျား ဂရုမစိုက်ပေ။ သူ၏စကားကြောင့် လူအများအပြား ပင့်သက်ရှိုက်လိုက်ကြသည်။ ၎င်းတို့သည် မရောက်လာသေးသူများအတွက် စိတ်ပူစပြုလာသည်။ ဤလူများသည် သေခြင်းတရားမှ မလွတ်မြောက်နိုင်မည်ကို စိုးရိမ်မိသည်။ ၎င်းတို့သည် ဝိညာဉ်မုဆိုး၏ ရက်စက်ကြမ်းကြုတ်မှုကြောင့် တုန်လှုပ်သွားကြသည်။

"ဒုတိယအချက်က ခင်ဗျားတို့အားလုံးနဲ့ ဆက်စပ်နေတယ်။ ထျန်နန်မြို့မှာ မဟာမိတ်ဖွဲ့ပြီး လူတိုင်းရဲ့ ခွန်အားကို စုဆောင်းဖို့ ကျုပ်ဆရာက အမိန့်ပေးထားတယ်။ အနာဂတ်မှာ ကျုပ်တို့တွေ အတူချီတက်ပြီး အတူဆုတ်ခွာကြမယ်၊ ဂုဏ်ကျက်သရေကို အတူခံစားပြီး ငွေလည်း အတူတူ ရှာကြမယ်" ဝိညာဉ်မုဆိုးသည် လူအုပ်ကြီးကို ဖြတ်သန်းကြည့်ရှု၍ ပြောလိုက်သည်။

လူတိုင်း ရုတ်ရုတ်သဲသဲ ဖြစ်သွားကြသည်။ ဤသည်မှာ မဟာပုံစံမဲ့ဂိုဏ်း၏ ပန်းတိုင်အစစ်ဖြစ်မည်ဟု ၎င်းတို့ယူဆလိုက်ကြသည်။ နှစ်များစွာကြာပြီးနောက်၊ မဟာပုံစံမဲ့ဂိုဏ်းသည် သိုင်းလောကတွင် တစ်ဖန်ပြန်ပေါ်လာသည်။ ၎င်းတို့ပေါ်ပေါက်လာသောအခိုက်တွင် ဤသို့သော မဟာမိတ်အဖွဲ့အစည်းမျိုး ဖွဲ့စည်းချင်နေကြသည်။ မဟာမိတ်အဖွဲ့၏ ခေါင်းဆောင်သည်တစ်ဦးတည်းသာရှိနိုင်ရာ၊ ၎င်းသည် မဟာပုံစံမဲ့ဂိုဏ်းဖြစ်သည်။

အနာဂတ်တွင်၊ ၎င်းတို့သည် မဟာပုံစံမဲ့ဂိုဏ်း၏ ဦးဆောင်မှုကိုသာ လိုက်နာနိုင်မည်ဖြစ်သည်။ ထိုအခြေအနေတွင် မဟာပုံစံမဲ့ဂိုဏ်းသည် ကြီးမြတ်သော ဝေ့တိုင်းပြည်၏တောင်ပိုင်းဒေသတွင် နယ်ခံ ဧကရာဇ်တစ်ပါးဖြစ်လာကာ အုပ်ချုပ်သူအစစ်ဖြစ်လာမည်ဖြစ်သည်။ ကြွရောက်လာကြသော ဧည့်သည်များသည် ကြီးမြတ်သော ဝေ့တိုင်းပြည်၏တောင်းပိုင်းဒေသတစ်ခုလုံးရှိ ထက်ဝက်ကျော်ခန့်ကို ပိုင်ဆိုင်ထားသည့် ချမ်းသာကြွယ်ဝသော ကုန်သည်များဖြစ်ကြသည်။ အကယ်၍ ဤလူအားလုံးကို မဟာမိတ်အဖြစ် ပေါင်းစည်းမည်ဆိုပါက၊ ဤမဟာမိတ်အဖွဲ့၏ စွမ်းအင်ကို တွေးကြည့်၍ပင် သိနိုင်သည်။

သို့သော် ဝိညာဉ်မုဆိုးသာ သူ၏အဆင့်အတန်းဖြင့် မဟာမိတ်ဖွဲ့ရန် ကြိုးစားပါက၊ ဟာသဖြစ်လာလိမ့်မည်ကို သူ သိထားသည်။ ခြေလှမ်းတစ်ဝက် ရွှေအမတေအဆင့်သည် ထူးခြားသော်လည်း ၎င်းတို့သည် ရှားပါးသော ကျင့်ကြံမှုအဆင့် မဟုတ်ပေ။ သူ့တွင် ထိုသို့ပြုလုပ်ရန် အရည်အချင်းမရှိပေ။ မဟာပုံစံမဲ့ဂိုဏ်းနှင့် သူ၏ဆရာသာလျှင် ထိုသို့မဟာမိတ်ဖွဲ့ရန် အရည်အချင်းရှိမည်ဖြစ်သည်။

သို့သော် ၎င်းတို့အားလုံးသည် မတူညီသော အင်အားစုများနှင့် သက်ဆိုင်နေကြသည်။ ယခုအချိန်တွင် လူတိုင်းသည် ခက်ခဲသော အနေအထားတွင်ရှိနေကြသည်။ ၎င်းတို့ဘက်မှ သဘောမတူပါက၊ မဟာပုံစံမဲ့ဂိုဏ်း၏ တပည့်များအားလုံးသည် ၎င်းတို့ကို သားကောင်များကဲ့သို့ စိုက်ကြည့်နေပေလိမ့်မည်။ ၎င်းတို့၏ မျက်လုံးများတွင် ခြိမ်းခြောက်မှုအရိပ်အမြွက်များပင် ပါရှိနေသည်။ ထိုမှသာလျှင် ယနေ့ပွဲသည် ထောင်ချောက်တစ်ခုဖြစ်ကြောင်း လူတိုင်း နားလည်သွားကြသည်။ ၎င်းတို့သည် ချူးယွင်ဖန်းကို ဖြေရှင်းရန်ဟူသော ခေါင်းစဉ်ဖြင့် စုရုံးခဲ့ကြသော်လည်း ရည်ရွယ်ချက်အမှန်သည် ဤမဟာမိတ်ဖွဲ့စည်းရန်အတွက်ဖြစ်သည်။

ဤသည်မှာ ကျောက်တစ်လုံးနှင့် ငှက်နှစ်ကောင် သတ်ဖြတ်မည့် ထက်မြက်သော အစီအစဉ်တစ်ခုဟု ဆိုနိုင်သည်။ လူများစွာသည် နှလုံးသားထဲတွင် သက်ပြင်းချလိုက်ကြသည်။ ဤသည်မှာ ရေလှိုင်းဟောင်းများကို ရေလှိုင်းသစ်များက တွန်းထုတ်လိုက်ခြင်းဖြစ်သည်။ လူများစွာတို့ အကျပ်ရိုက်နေကြစဉ် ပွဲ၏အပြင်ဘက်မှ ခြေသံတချို့ ရုတ်တရက် ထွက်ပေါ်လာသည်။ လူတစ်ဦးသည် ခန်းမထဲသို့ စိမ်ပြေနပြေ လျှောက်လှမ်းလာပြီးနောက် လူတိုင်းကို လှည့်ကြည့်လာသည်။

"အိုး၊ ဒီနေရာက တော်တော်လေးသက်ဝင်လှုပ်ရှားနေပါလား”

ထိုလူသည် တွန်းဆုတ်ခြင်းမရှိဘဲ တိုက်ရိုက်ပြောလိုက်သည်။ လူတိုင်း လှမ်းကြည့်လိုက်သောအခါ အနက်ရောင် ၀တ်စုံဝတ်ဆင်ထားသော လူငယ်တစ်ဦးကို မြင်တွေ့လိုက်ရသည်။ သူသည် အသက်နှစ်ဆယ်ဝန်းကျင်ခန့်ရှိနေ၍ အရပ်ရှည်ရှည် ပိန်ပါးသည့် ခန္ဓာကိုယ်နှင့် သိမ်မွေ့သော အသွင်အပြင်မျိုးရှိနေသည်။

"ခင်ဗျားက ဘယ်သူလဲ" မဟာပုံစံမဲ့ဂိုဏ်း၏ တပည့်တစ်ဦးက အော်ပြောလိုက်သည်။

ထိုလူငယ်သည် လူတိုင်းကို ရွေးချယ်မှုပြုလုပ်ရန် တွန်းအားပေးနေသော ဝိညာဉ်မုဆိုးအပါအဝင် လူတိုင်း၏ အာရုံများကို ချက်ချင်း ဆွဲဆောင်နိုင်ခဲ့သည်။ သို့သော် လူတချို့သည် အနက်ရောင် ဝတ်ရုံနှင့် လူငယ်ကို မြင်တွေ့လိုက်သောအခါ ၎င်းတို့၏ ခန္ဓာကိုယ်များ ချက်ချင်းပင် တုန်လှုပ်သွားကာ မျက်လုံးများတွင် အံ့ဩထိတ်လန့်နေသည့် အရိပ်အမြွက်များ ပေါ်ပေါက်လာသည်။

"သူက ဘာလို့ဒီကိုရောက်နေတာလဲ"

"ဘာလို့ သူလဲ"

"တကယ် သူပဲဟ"

လူအများအပြားက ၎င်းတို့အရှေ့တွင် ရောက်ရှိနေသည့် လူငယ်ကို မှတ်မိသွားသည့်အတွက် အော်ဟစ်လိုက်ကြသည်။ ဤလူငယ်သည် လက်ရှိတွင် မဟာပုံစံမဲ့ဂိုဏ်းက ချူးမိသားစုကို သုတ်သင်ရှင်းလင်းမည့် ရုန်းရင်းဆန်ခတ်ကိစ္စများ ဖြစ်ပွားစေသည့် အခြားသော ဇာတ်ကောင်တစ်ဦးဖြစ်သည်။ လူအများသည် သူ၏ရပ်တည်ချက်ကို ထုတ်ဖော်လာမည့်အချိန်အား စောင့်မျှော်နေကြသည်။ ချူးယွင်ဖန်းသည် သူ၏ရပ်တည်ချက်ကို မဖော်ပြဝံ့ဘူးဟုပင် တချို့က ထင်မှတ်နေကြသည်။

"သူ ဒီကိုရောက်လာမယ်လို့ ကျုပ် မမျှော်လင့်ထားဘူး။ ကောင်းသွားတာပေါ့။ ဝိညာဉ်မုဆိုးရဲ့ အကြံအစည်တွေ ပျက်စီးတော့မှာကို စိုးရိမ်မိသား"

"ဟုတ်တယ်၊ သူ ဒီလိုရောက်လာတာ သိပ်ကောင်းတယ်။ ဝိညာဉ်မုဆိုးက ဒီမဟာမိတ်အဖွဲ့ ထူထောင်ချင်တယ်ဆိုရင်၊ ဒီလူက အဲဒါကို လက်သင့်ခံမလားဆိုတာ စောင့်ကြည့်ဦးမှပေါ့"

"သူ ဒီနေရာမှာ တကယ်ပေါ်လာမယ်လို့ ကျုပ် မမျှော်လင့်ထားဘူး။ သူ ဒီကိုကောင်းတဲ့ရည်ရွယ်ချက်နဲ့ ရောက်လာတာမဟုတ်ဘူးလို့တော့ ကျုပ် ထင်တယ်"

လူများစွာသည် ချူးယွင်ဖန်းကို တိတ်တဆိတ် စိုက်ကြည့်၍ ဤနေရာသို့ ရောက်လာရသည့် အကြောင်းအရင်းကို အဆက်မပြတ် ခန့်မှန်းနေကြသည်။

"ချူးယွင်ဖန်း ခင်ဗျား ဒီကို ဘာလာလုပ်တာလဲ" ဝိညာဉ်မုဆိုးက အော်ပြောလိုက်သည်။

"လူသတ်မလို့"