သုံးရက်ကြာပြီးနောက် ထာဝရရေကန်တွင်

ချူးယွင်ဖန်းသည် ဝိညာဉ်မုဆိုးကို သတ်ဖြတ်ပြီးနောက် မီစစ်ယွမ်ကို စိန်ခေါ်ခဲ့သည်ဟူသော သတင်းများ ညတွင်းချင်း ပျံ့နှံ့သွားခဲ့ရာ၊ ကြီးမြတ်သော ဝေ့တိုင်းပြည်တစ်ခုလုံး ရုတ်ရုတ်သဲသဲသွားလေ၏။ အဓိက အင်အားစုကြီးများအားလုံးသည် ဤအကြောင်းအရာကို ညတွင်းချင်း ကြားသိလိုက်ကြသည်။ ၎င်းတို့အားလုံး လုံးလုံးလျားလျား ထိတ်လန့်သွားလေသည်။ မီစစ်ယွမ်မဆိုနှင့် ဝိညာဉ်မုဆိုးလျှင်ပင် ကြီးမြတ်သော ဝေ့တိုင်းပြည်တွင် ထင်ပေါ်ကျော်ကြားနေသည့် လူငယ်ကျွမ်းကျင်သူတစ်ဦးဖြစ်သည်။

ကြီးမြတ်သော ဝေ့တိုင်းပြည်၏ လူငယ်မျိုးဆက်တစ်ခုလုံးတွင် သူ၏ ခွန်အားသည် ပြိုင်ဘက်ကင်းလှသည်။ သို့သော် သူ့အောက် အလွန်ငယ်ရွယ်သော ချူးယွင်ဖန်းကို ရင်ဆိုင်ရာတွင် ပြေးမလွှတ်နိုင်သော ရန်သူတစ်ပါးနှင့် ကြုံတွေ့ခဲ့သည့်နှယ်ဖြစ်ခဲ့ရသည်။ ဝိညာဉ်ချပ်ဝတ်တန်ဆာ ဝတ်ဆင်ထားစဉ်၌ ချူးယွင်ဖန်းထံတွင် အပြတ်အသတ် ချေမှုန်းခံခဲ့ရသည်ဟူသော ကောလဟာလများပင်ရှိနေသည်။ လူအများအပြားသည် ဤကောလဟာလ စတင်ပြန့်နှံ့လာချိန်တွင် လုံးလုံးလျားလျား မယုံကြည်စွာ လှောင်ပြောင်လိုက်ကြသည်။

ဝိညာဉ်ချပ်ဝတ်တန်ဆာကို ဝတ်ဆင်ထားသည့် ဝိညာဉ်မုဆိုးသည် ရွှေအမတေအဆင့်ကျွမ်းကျင်သူတစ်ဦးအတွက်ပင် ခက်ခဲသောပြိုင်ဘက်တစ်ဦးဖြစ်ပေလိမ့်မည်။ ၎င်း၏အခွံအတွင်းသို့ ကျုံ့ဝင်သွားသော လိပ်တစ်ကောင်သကဲ့သို့ ကိုင်တွယ်ရ ခက်ခဲပေလိမ့်မည်။ ၎င်းကို ဝိညာဉ်လက်နက်ဖြင့်ပင် ထိုးဖောက်ရန် ခဲယဉ်းမည်ဖြစ်သည်။ ထိုသို့မှမဟုတ်ပါက၊ ဤခုခံကာကွယ်ရေး ဝိညာဉ်လက်နက်များသည် အလွန်အဖိုးတန်နေမည် မဟုတ်ပေ။ ၎င်းသည် သာမန်ဝိညာဉ်လက်နက်များထက် အဆပေါင်းများစွာ တန်ဖိုးရှိပေသည်။

တိုက်ခိုက်ရေး ဝိညာဉ်လက်နက်ဖြင့်ပင် မပြုလုပ်နိုင်ပါက၊ ချူးယွင်ဖန်းသည် ၎င်းကို လက်ဗလာဖြင့် ဖျက်ဆီးခြင်းဟူသည် အဓိပ္ပာယ်မဲ့လှသည်။ ကြီးမြတ်သော ဝေ့တိုင်းပြည်တောင်ပိုင်းဒေသရှိ ရာနှင့်ချီသော နာမည်ကြီးပုဂ္ဂိုလ်များက တညီတညွတ်တည်း ပြောနေကြသော်လည်း ၎င်းအကြောင်းအရာကို လုံးလုံးလျားလျား မယုံကြည်သူများရှိနေဆဲဖြစ်သည်။

၎င်းတို့သည် ချူးယွင်ဖန်း၏ အင်အားကို ချဲ့ကားပြောဆိုနေခြင်းဟု ခံစားနေမိသည်။ ထို့အပြင် ဤကောလာဟလများ ပျံ့နှံ့လာတိုင်း ပိုပို၍ အဓိပ္ပာယ်မဲ့လာကြသည်။ တစ်စုံတစ်ယောက်သည် ဝိညာဉ်လက်နက်ကို လက်ဗလာဖြင့် မည်သို့မျှ ချေမှုန်းနိုင်မည်နည်း။ ဤသည်နှာ မွန်းစတားတစ်ကောင်ဖြစ်လေသလော။

သို့သော် ချူးယွင်ဖန်းက မီစစ်ယွမ်ကို စိန်ခေါ်ခြင်းနှင့် နှိုင်းယှဉ်လျှင် ဝိညာဉ်မုဆိုးကို သတ်ဖြတ်ခဲ့ခြင်းသည် မပြောပါ့လောက်ပေ။ ဝိညာဉ်မုဆိုးသည် ခြေလှမ်းတစ်ဝက် ရွှေအမတေအဆင့်မျှသာဖြစ်သည်။ သူသည် အစစ်အမှန်ရွှေအမတေအဆင့်နှင့် နှိုင်းယှဉ်၍ မရနိုင်ပေ။ ချူးယွင်ဖန်းသည် ရွှေအမတေအဆင့်တစ်ဦးမဟုတ်သော်လည်း သူ၏ခွန်အားသည် ဤနယ်ပယ်ထဲသို့ ဝင်ရောက်နေပြီဖြစ်ကြောင်း ဝိညာဉ်မုဆိုး၏သေခြင်းတရားကို အသုံးပြု၍ လူတိုင်းထံ သက်သေပြလိုက်သည်။ ဝိညာဉ်မုဆိုးကဲ့သို့သော ကျွမ်းကျင်သူပင် သူ၏လက်ထဲတွင် သေဆုံးသွားသောကြောင့် အခြားမည်သည့်ကိုမျှ ပြောရန်မလိုအပ်တော့ပေ။

လူများစွာ၏အမြင်တွင် နှစ်ဖက်ကြားရှိ ဤတိုက်ပွဲသည် ရှောင်လွှဲ၍မရနိုင်ပေ။ ဤသည်မှာ ပုံမှန်မဟုတ်သော မရဏတိုက်ပွဲတစ်ခုပင်ဖြစ်သည်။ မဟာပုံစံမဲ့ဂိုဏ်းသည် ဤစစ်ပွဲကို ပထမဆုံးစတင်ခဲ့သူဖြစ်သည်။ ချူးမိသားစုတွင် လူရာပေါင်းများစွာ အသတ်ဖြတ်ခံခဲ့ရ၍ မိသားစုတစ်ခုလုံး ဝမ်းနည်းကြေကွဲခဲ့ရသည်။ မဟာပုံစံမဲ့ဂိုဏ်းသည်လည်း အလွန်ကြီးမားသော အဖိုးအခကို ပေးဆောင်ခဲ့ရသည်။ မကြာမီနှစ်များအတွင်း ရွှေအမတေအဆင့်သို့ ဝင်ရောက်ရန် အလားအလာအရှိဆုံးသူဟု ယူဆရသည့် ဆက်ခံသူသည် ချူးယွင်ဖန်း၏တိုက်ခိုက်မှုဖြင့် သေဆုံးသွားခဲ့သည်။

နှစ်ဖက်စလုံးသည် အပြင်းအထန် နစ်နာခဲ့ကြ၍ ခက်ထန်စွာ ရိုက်ခတ်တော့မည်ဖြစ်သည်။ သုံးရက်အကြာတွင် ခုန်းလုံမြို့အစွန်းရှိ ထာဝရရေကန်ဘေးတွင် ရွှေအမတေအဆင့်ကျွမ်းကျင်သူများကြားက ပြင်းထန်သော တိုက်ပွဲတစ်ခုဖြစ်ပွားတော့မည်ဖြစ်သည်။ ဤတိုက်ပွဲ မစတင်မီပင် ကြီးမြတ်သော ဝေ့တိုင်းပြည်၌ မရေတွက်နိုင်သော လူများ၏ အာရုံကို စွဲဆောင်နေခဲ့သည်။ ကြီးမြတ်သော ဝေ့တိုင်းပြည်ရှိ မရေတွက်နိုင်သည့် အင်အားကြီးမားသော ဖြစ်တည်မှုများသည် ထာဝရရေကန်ဆီသို့ စတင်ချဉ်းကပ်လာကြသည်။

ထိုသို့သော တိုက်ပွဲသည် ဆယ်စုနှစ်များ သို့မဟုတ် ရာစုနှစ်များအတွင်းတွင်ပင် ရှားပါးသည်ဟု ဆိုနိုင်သည်။ ဤလူများသည် အမြန်ဆန်ဆုံး အရှိန်အဟုန်ဖြင့် ရောက်ရှိလာကြသည်။ များမကြာမီတွင်၊ မတူညီသော လေယူလေသိမ်းနှင့် မျက်နှာအသွင်အပြင်များသည် ခုန်းလုံမြို့တွင် ပေါ်ပေါက်လာသည်။ သို့သော်လည်း ခြွင်းချက်မရှိစွာဖြင့် ဤလူတစ်ဦးစီချင်းတွင် ထူးခြားသောစွမ်းရည်များနှင့် အလွန်ကြောက်မက်ဖွယ်ကောင်းသော ကျင့်ကြံမှုများရှိကြသည်။ ဤလူများကို မနှောင့်ယှက်ရန်အတွက် ဒေသခံအင်အားစုများထံ စောစီးစွာ သတိပေးထားကြလေသည်။

မကြာမီတွင်၊ ခုန်းလုံမြို့ရှိ လူအများအပြားသည် ဖြစ်စဉ်တစ်ခုလုံး၏ အကြောင်းရင်းများကို သိရှိသွားကြသည်။ ခုန်းလုံမြို့တွင် လတ်တလော ပေါ်ပေါက်လာသည့် ဒဏ္ဍာရီလာပုဂ္ဂိုလ်နှင့် ကြီးမြတ်သော ဝေ့တိုင်းပြည်တောင်ပိုင်ရှိ ဒဏ္ဍာရီလာပုဂ္ဂိုလ် မီစစ်ယွမ်တို့သည် မြို့အပြင်ဘက်ရှိ ထာဝရရေကန်တွင် တိုက်ပွဲဝင်ကြမည်ဖြစ်သည်။ ချက်ချင်းပင် မြို့တစ်မြို့လုံး ရုတ်ရုတ်သဲသဲဖြစ်သွားကြသည်။

နှစ်ရက်အတွင်းမှာပင် မြို့တွင်းရှိ တည်းခိုခန်းများအားလုံး ကမ္ဘာအရပ်ရပ်ရှိ ကျွမ်းကျင်သူများဖြင့် ပြည့်နှက်နေသည်။ ဤလူများ အားလုံးသည် ခြွင်းချက်မရှိစွာဖြင့် အစွမ်းထက်သေည့် ခွန်အားများရှိကြသည်။ ဤလူများသည် မောက်မာ၍ ရမ်းကားလွန်းသောကြောင့် ခုန်းလုံမြို့၏အရာရှိများကို ခေါင်းကိုက်စေခဲ့သည်။ ၎င်းတို့ကို ထိန်းချုပ်ရန် မလွယ်ကူလှပေ။

အဆုံးတွင် ခုန်းလုံမြို့ပိုင်ရှင်ပင် အခြေအနေများကို မထိန်းချုပ်နိုင်တော့ပေ။ မြို့သို့ ရောက်ရှိလာသော ပုဂ္ဂိုလ်များအနက် ခြေလှမ်းတစ်ဝက် ရွှေအမတေအဆင့်ကျွမ်းကျင်သူအများအပြားပင် ပါဝင်ကြသည်။ ဤသည်မှာ ပေါ်တင်ရောက်ရှိလာသော ကျွမ်းကျင်သူများသာဖြစ်သည်။ ၎င်းတို့အပြင် တိတ်တဆိတ် ရောက်ရှိလာ၍ ပုန်းကွယ်နေကြသော ကျွမ်းကျင်သူများလည်းရှိနေသည်။ ၎င်းတို့၏ အဆင့်အတန်းနှင့် ခွန်အားများသည် မြို့ပိုင်ရှင်ထက် မြင့်မားနေသောကြောင့် မြို့ပိုင်ရှင်ပင် မထိန်းချုပ်နိုင်ပေ။

တိုတောင်းသော နှစ်ရက်အတွင်း တိုက်ပွဲပေါင်း တရာကျော် ဖြစ်ပွားခဲ့ရသည်။ ထို့အပြင် ၎င်းတို့အားလုံးသည် နတ်အဆင့်ထက်ရှိ ကျွမ်းကျင်သူများဖြစ်ကြသည်။ ၎င်းတို့ ယခင်ကတည်း အချင်းချင်းရန်ငြိုးရှိခဲ့ကြရာ၊ ယခုအချိန်မှသာ တွေ့ဆုံလိုက်ရသည်။ အဆုံးတွင် ကျုံးရှင်မြို့ဝန်၏အိမ်တော်မှ ချူးယွင်ဖန်း၏ အမှာစကားများ ထွက်ပေါ်လာသည်။ နောက်ရက်အနည်းငယ်အတွင်း မြို့တော်တွင် တိုက်ခိုက်ကြသူတိုင်းကို ချူးယွင်ဖန်းကကိုယ်တိုင် ဖြေရှင်းမည်ဖြစ်သည်။ မည်မျှသော ရန်ငြိုးရန်စများရှိနေပါစေ၊ ၎င်းတို့သည် ခွန်းလုံမြို့တွင် မဖြေရှင်းသင့်ပေ။

ဤအချိန်တွင်အားလုံး တိတ်ဆိတ်သွားကြသည်။ မည်သို့ပင်ဆိုစေကာမူ၊ ၎င်းတို့အားလုံးသည် ချူးယွင်ဖန်း၏ ရဲရင့်သော တိုက်ပွဲမှတ်တမ်းကို သိထားကြသည်။ ချူးယွင်ဖန်းသည် မီစစ်ယွမ်နှင့် ယှဉ်ပြိုင်နိုင်သည်ဖြစ်စေ မယှဉ်ပြိုင်နိုင်သည်ဖြစ်စေ၊ ၎င်းတို့ကို ဖြေရှင်းခြင်းသည် သူ့အတွက် အလွန်လွယ်ကူနေဆဲဖြစ်သည်။ ဤလူများအားလုံး ကိုယ့်ကိုယ်ကို အနည်းငယ် ထိန်းချုပ်လိုက်ပြီးနောက် ခုန်းလုံမြို့သည်လည်း ငြိမ်းချမ်းမှုတချို့ ရရှိလာခဲ့သည်။

မကြာမီတွင် သုံးရက်မြောက်နေ့သို့ ရောက်ရှိလာသည်။ နံနက်စောစောတွင် ကမ္ဘာတစ်ဝှမ်းရှိ ကျွမ်းကျင်သူများသည် တည်းခိုခန်းများမှ ထွက်ခွာကာ မြို့အပြင်ဘက်ရှိ ထာဝရရေကန်သို့ အပြေးနှင်ကြလေသည်။ ၎င်းတို့အနက် ခရီးပန်းနေသူအများအပြားရှိကြသည်။ ၎င်းတို့သည် ခုန်းလုံမြို့သို့ ယနေ့မှ ရောက်ရှိလာကြ၍ တည်းခိုစရာနေရာပင် မရှိကြပေ။ ၎င်းတို့သည် ထာဝရရေကန်ဆီသို့ တိုက်ရိုက် ဦးတည်သွားကြသည်။

ဤကျွမ်းကျင်သူများနှင့် ပွဲကြည့်ချင်သော သာမာန်ပြည်သူများသည် အင်အားကြီး အဖွဲ့တစ်ဖွဲ့ စုစည်းလိုက်သည်။ သို့သော် ထာဝရရေကန်နှင့် ဆယ်မိုင်ခန့်အကွာတွင် ခုန်းလုံမြို့၏တပ်သားများသည် သာမန်ပြည်သူများကို တားဆီးလိုက်ကြသည်။ ၎င်းတို့အားလုံးသည် ရှေ့တန်းမှ တားဆီးခံလိုက်ရသည်။ လူများစွာသည် အလွန်အမင်း စိတ်ဓာတ်ကျသွားကြသည်။ ၎င်းတို့သည် တိုက်ပွဲကို ကြည့်ရန်အတွက် မနက်စောစော အိပ်ရာထခဲ့ကြသော်လည်း အပြင်ဘက်တွင် တားဆီးခံရမည်ဟု မည်သူသိမည်နည်း။

ခုန်းလုံမြို့၏ စစ်သားများသည်လည်း ဤကိစ္စနှင့် ပတ်သက်၍ အလွန် စိတ်ဓာတ်ကျနေမိသည်။ ၎င်းတို့က ထိုသို့ အော်ပြောလိုက်သည်

"ရွှေအမတေအဆင့်ကျွမ်းကျင်သူတွေဆိုတာ ဘယ်လိုဖြစ်တည်မှုမျိုးလို့ ထင်လို့လဲ၊ ခင်ဗျားတို့ဆီ နောက်ဆက်တွဲသက်ရောက်မှုလောက် ပျံ့လာရင်တောင် ခင်ဗျားတို့အကုန် သေသွားနိုင်တယ်။ အဲ့ဒီ့အချိန်ကျ ထွက်ပြေးနိုင်မှာတောင် မဟုတ်ဘူး"

လူအများအပြားသည် တွေးကြည့်လိုက်သောအခါ ဤစစ်သားများ၏ စကားများသည် အဓိပ္ပါယ်ရှိသည်ဟု ခံစားလိုက်ရသည်။ တိုက်ပွဲကြည့်ရခြင်းက ကောင်းမွန်သော်လည်း နောက်ဆက်တွဲ သက်ရောက်မှုများ ရောက်ရှိလာပါက၊ ၎င်းတို့ သေဆုံးသွားနိုင်သည်။ သို့သော် ရုတ်တရက်ဆိုသလိုပင် မလှမ်းမကမ်းတွင် အတူတူလမ်းလျှောက်နေသော အမျိုးသမီးနှစ်ဦးကို တစ်စုံတစ်ယောက်က လက်ညှိုးထိုးပြ၍ မေးလိုက်သည်။

“ဒါဆို သူတို့ကိုကျ ဘာလို့ သွားခွင့်ပြုထားတာလဲ”

"ဟုတ်တယ်။ ကျုပ်အဖေလည်း မြို့စောင့်တပ်ကပဲ၊ ကျုပ်ကိုကျ ဘာလို့ မဝင်ခိုင်းတာလဲ"

"ဟုတ်တယ်၊ ကျုပ်အဖေကလည်း မြို့ရဲ့ မော်ကွန်းထိန်းအရာရှိပဲ။ ကျုပ်တို့ကို ဘာလို့ ဝင်ခွင့်မပြုတာလဲ"

ထိုအချိန်တွင် အထက်တန်းလွှာ အမျိုးကောင်းသားအချို့၏ အော်ဟစ်သံများ စတင်ထွက်ပေါ်လာသည်။

စစ်သားများက ၎င်းတို့ကို တစ်ချက်လှည့်ကြည့်၍သာ ပြောလိုက်သည်။

"သူတို့ကို မသိဘူးလား။ တစ်ယောက်က အန်းကော်မြို့ဝန်ရဲ့ အကြီးဆုံးသမီး၊ နောက်တစ်ယောက်က စီတုကုန်သည်အဖွဲ့အစည်းက ဥက္ကဋ္ဌရဲ့ အကြီးဆုံးသမီး။ သူတို့က နတ်အဆင့်ကျွမ်းကျင်သူတွေ ဒါပေမယ့် ခင်ဗျားတို့ကြတော့ရော"