အခန်း (၅၃၆)

မော့ချူး မျှော်လင့်ထားသည့်အတိုင်းပင် လန်လျန့်၏ လက်ရှိအခြေအနေမှာ အမှန်တကယ်ပင် ထိုမျှ ကောင်းမွန်ခြင်းမရှိပေ။

ကျုံးဝမ်သည် ကိစ္စရပ်များကို အမြဲတစေ သန့်ရှင်းသပ်ရပ်စွာ ကိုင်တွယ်လေ့ရှိပြီး ဤတစ်ကြိမ်သည်လည်း ခြွင်းချက်မဟုတ်သည်မှာ သဘာဝပင်။

ထို့ကြောင့် ကျုံးဝမ် လွှဲပြောင်းပေးခဲ့သော အချက်အလက်များကို လက်ခံရရှိပြီးနောက် မဟူရာတိမ်တိုက် ဂလက်စီရုံးသည် လုံးဝ ကြန့်ကြာနေရန် မဝံ့ရဲဘဲ ချက်ချင်း စုံစမ်းစစ်ဆေးမှုတစ်ခုကို စတင်ခဲ့သည်။ ရလဒ်အနေဖြင့် ဤစုံစမ်းစစ်ဆေးမှုမှာ… အိုး! သဘာဝကျစွာပင် လန်လျန့်ထံသို့ ခြေရာခံမိသွားသည်။

ဤတစ်ကြိမ်တွင် ရုံးမှလူများသည် စိတ်အနှောင့်အယှက်ဖြစ်ရခြင်းကို မထိန်းနိုင်ခဲ့ကြပေ။

ပြောရမည်ဆိုလျှင် ကျုံးဝမ် ဖြစ်စေ၊ လန်လျန့် ဖြစ်စေ သူတို့သည် စော်ကားရန် မတတ်နိုင်ကြပေ။

အချိန်အတော်ကြာ ရုန်းကန်ပြီးနောက် ရုံးမှလူများသည် ဆုံးဖြတ်ချက်တစ်ခု မချနိုင်ကြသေးပေ။ အဆုံးတွင် သူတို့သည် ထိုကိစ္စကို အထက်လူကြီးများထံ တင်ပြလိုက်ရုံသာ ရှိသည်။

ကောင်းလိုက်တာ! ဒီကြီးမြတ်တဲ့သူအချို့ကို အထက်လူကြီးများထံသို့ လွှဲပြောင်းပေးသင့်သည်။ သူတို့သည် အလွန်အကျွံ မပါဝင်သင့်သော သာမန်ဝန်ထမ်းငယ်လေးများသာ ဖြစ်သည်။

တစ်ဖက်တွင် မဟူရာတိမ်တိုက် ဂလက်စီ၏ အဓိက မိသားစုမှ အထက်လူကြီးများသည် သတင်းကို လက်ခံရရှိခါစသာ ရှိသေးသည်။ သူတို့ ဆုံးဖြတ်ချက်တစ်ခု မချမီမှာပင် အခြေအနေသည် တိတ်တဆိတ် ပျံ့နှံ့သွားခဲ့ပြီဖြစ်သည်ကို သူတို့ သိလိုက်ရသည်။ ဒါက မီးပွားလေးတစ်ခုကနေ တောမီးကြီးအဖြစ် ချက်ချင်းလောင်ကျွမ်းသွားသလိုပင်။

လိမ့်ဝင်နေသော မီးလုံး၏ လျင်မြန်သော အရှိန်သည် သူတို့အား ရပ်တန့်ရန် မဖြစ်နိုင်စေခဲ့ပေ။ သူတို့သည် ဤကိစ္စ ပို းပိုပြီး ပြင်းထန်လာသည်ကို ကြည့်နေရုံသာ တတ်နိုင်၏။ အထူးသဖြင့် အရှင်သူမြတ် ချန်းပိုင်နှင့် အရှင်သူမြတ် စုယွမ်တို့၏ ပူးတွဲကြေညာချက်တစ်စောင် ထုတ်ပြန်သည့် လုပ်ရပ်သည် ဒီမီးလုံးပေါ်သို့ ဆီပူလောင်းထည့်လိုက်သကဲ့သို့ပင်။

တစ်ခဏအတွင်းမှာပင် ‘ဉာဏ်ပညာတိမ်တိုက် ဂလက်စီက လူတွေကို အနိုင်ကျင့်တယ်’၊ ‘မဟူရာတိမ်တိုက် ဂလက်စီက ဘာမှမလုပ်ဘူး’ နှင့် အခြားသော ခေါင်းကြီးပိုင်းများသည် အဓိက ဂလက်ဆီအားလုံး၏ လူကြိုက်များသော စာရင်းများကို လျင်မြန်စွာ သိမ်းပိုက်သွားခဲ့သည်။

ဤအခြေအနေတွင် မဟူရာတိမ်တိုက် ဂလက်စီသည် ဆိတ်ဆိတ်နေနိုင်ပါဦးမည်လား။

သိသာစွာပင် မနေနိုင်ပေ။

ထို့ကြောင့် လန်လျန့်သည် ကျဥ်းထဲကြပ်ထဲသို့ ရောက်ရှိသွားခဲ့သည်။

ညလယ်ခေါင်အချိန် လူတိုင်း ကောင်းစွာ အိပ်စက်နေကြစဉ် မဟူရာတိမ်တိုက် ဂလက်စီရုံးမှ လူများသည် တညီတညွတ်တည်း တံခါးဝသို့ ရောက်လာကြသည်။ စကားတစ်ခွန်းမဆိုဘဲ သူတို့သည် သူမအား တိုက်ရိုက် လက်ထိပ်ခတ်၍ ခေါ်ဆောင်သွားကြသည်။

အစပိုင်းတွင် လန်လျန့်သည် အတော်လေး မောက်မာနေခဲ့သည်။ ဉာဏ်ပညာတိမ်တိုက် ဂလက်စီရှိ သူမ၏ အဆင့်အတန်းနှင့်ဆိုလျှင် သူမအား ဘာများ လုပ်နိုင်မည်နည်း။ အလွန်ဆုံးမှာ သူမ မျက်နှာမပျက်သရွေ့တော့ ဆူပူကြိမ်းမောင်းသည့် စကားအနည်းငယ်ကိုသာ ပေးရုံသာ ဖြစ်ပေမည်။

အကယ်၍ ယခင်ကသာဆိုလျှင် ဤကဲ့သို့ ဖြစ်ကောင်းဖြစ်နိုင်သည်။ သို့သော် ဤကိစ္စတွင်မူ… ကွဲပြားခြားနားသည်။

အခြားဂလက်ဆီများမှ လူများသည် အရသာခံ၍ ကြည့်ရှုနေကြသည်ကို မဆိုထားနှင့်ဦး၊ အဖွဲ့ချုပ်တစ်ခုတည်းကပင် အလွယ်တကူ ကျော်လွှားနိုင်မည် မဟုတ်ပေ… ဘက်ပေါင်းစုံမှ ဖိအားများအောက်တွင် မဟူရာတိမ်တိုက် ဂလက်စီမှ လူများသည် မျက်နှာသာပေးရန် သတ္တိရှိနေဦးပါ့မလား။

ထို့နောက်တွင်တော့ လန်လျန့်သည် ထိန်းသိမ်းရေးစခန်းတွင် မမေ့နိုင်စရာ ညတစ်ညကို ကုန်ဆုံးခဲ့ရသည်။

အမှန်တကယ်တော့ မည်သူကမှ သူမအား ဘာမှမလုပ်ခဲ့ပေ။ သို့သော် ထိန်းသိမ်းရေးစခန်းသည် နေထိုင်ရန် အကောင်းဆုံးနေရာ မဟုတ်သည်မှာ သေချာသည်။

လန်လျန့်ကို ဆက်ဆံပုံသည် ကောင်းမွန်သည်ဟု ယူဆလို့ရသည်။ သူမအား သီးခြားအခန်းတစ်ခန်း ပေးထားပြီး ထိုရက်စက်ကြမ်းကြုတ်ပြီး စက်ဆုပ်ဖွယ်ကောင်းသော ‘အခန်းဖော်များ’ နှင့် တွေ့ဆုံရန် အခွင့်အရေး မရှိခဲ့ပေ။ သို့သော် ထိုသို့ဖြစ်နေသော်လည်း သူမသည် သူတို့ကြောင့် ညှဉ်းပန်းနှိပ်စက်ခံနေရဆဲပင် ဖြစ်သည်။

လက်ထိပ်များကို အခန်း၏ တံခါးခုံတွင် သော့ခတ်ထားသည်။ အကယ်၍ သူမ ထိုင်ချလိုက်ပါက သူမ၏ လက်များသည် အတင်းအကျပ် ဆန့်တန်းထားရမည်ဖြစ်ပြီး နာရီဝက်မပြည့်မီမှာပင် သူမ၏ လက်များသည် မမှတ်မိနိုင်လောက်အောင် နာကျင်ကိုက်ခဲလာပေလိမ့်မည်။ အကယ်၍ သူမ ရပ်နေပါက သူမ၏ လက်များသည် မပင်ပန်းသော်လည်း သူမ မခံနိုင်ပေ။ ငိုက်မျဉ်းမှုသည် တရိပ်ရိပ် တက်လာနေသည်။

ထို့အပြင် ထိန်းသိမ်းရေးခန်းရှိ အခန်းအများစုမှာ သန့်ရှင်းရေးလုပ်ထားခြင်း မရှိဘဲ ပြောမပြနိုင်သော မှိုတက်နေသည့် အနံ့တစ်ခု အမြဲရှိနေသည်။ အခန်းသည် မှောင်မိုက်နေပြီး အခါအားလျော်စွာ အော်ဟစ်သံအချို့ ထွက်ပေါ်လာတတ်သည်။

…

ညတစ်ည ကုန်လွန်သွားခဲ့သည်။

လန်လျန့်သည် နိုးနေဆဲပင် ဖြစ်သည်။

အနီးကပ်ကြည့်လိုက်လျှင် သူမ၏ မျက်လုံးများသည် သွေးကြောများ ယှက်ဖြာနေပြီး သူမသည် အလွန်အမင်း နွမ်းနယ်နေပုံရသည်။ သူမ၏ ယခင်က ဆွဲဆောင်မှုရှိပြီး စွဲမက်ဖွယ်ကောင်းသော ဟန်ပန်မှာ ဘယ်ရောက်သွားသနည်း။

သို့သော် ထိုသည်က အဆုံးသတ်မဟုတ်သေးပေ။

လူကို ဖမ်းမိပြီး သက်သေအထောက်အထားများ ရှိနေသောကြောင့် သူတို့သည် အပြစ်ရှိကြောင်း စီရင်ချက်ချပြီး ပြစ်ဒဏ်ချမှတ်ရမည်မှာ သဘာဝကျသည်။

မသမာသော စိတ်ဖြင့် တိုက်ခိုက်ခြင်း.. ထိုသည်က မည်သည့် ဂလက်ဆီတွင်မဆို ပြင်းထန်သော ရာဇဝတ်မှုတစ်ခုပင် ဖြစ်သည်။

ဤအချိန်တွင်ပင် လန်လျန့်သည် သူမ မည်သူမည်ဝါဖြစ်သည်ဟူသော ဂုဏ်ပုဒ်ကို စွဲကိုင်ထားဆဲဖြစ်ပြီး သူမ၏ သဘောထားသည် ယခင်ကဲ့သို့ပင် မာနထောင်လွှားပြီး ခေါင်းမာနေဆဲဖြစ်သည်။ လက်ထိပ်များကို ဖယ်ရှားလိုက်သည်နှင့် သူမသည် ချက်ချင်း သူမ၏ မူလအခြေအနေသို့ ပြန်လည်ရောက်ရှိသွားသည်။

ပထမဆုံး သူမသည် ဤဝန်ထမ်းအချို့ကို မျက်စောင်းထိုး စိုက်ကြည့်လိုက်ပြီးနောက် သူမ၏ မေးကို အနည်းငယ် မော့ကာ အလွန်အမင်း မောက်မာသော အမူအရာဖြင့် ကြည့်လိုက်သည်။

“ငါ့အတွက် ရေတစ်ခွက်ယူခဲ့စမ်း!”

သူမဘေးရှိ ဝန်ထမ်းအချို့သည် တစ်ယောက်ကိုတစ်ယောက် ကြည့်လိုက်ကြပြီး သူတို့၏ နှုတ်ခမ်းပေါ်မှ အပြုံးကို ထိန်းချုပ်ကာ သူမအတွက် ရေတစ်ခွက် ယူလာပေးကြသည်။ “ဒီမှာပါ”

လန်လျန့် သည် တစ်ငုံမျှသာ သောက်ရသေးစဉ်မှာပင် မျက်မှောင်ကြုတ်လိုက်သည်။

ဖွီးခနဲ သူမသည် သူမ၏ ပါးစပ်ထဲမှ ရေအားလုံးကို မြေကြီးပေါ်သို့ ထွေးထုတ်လိုက်သည်။

“ဒါတွေက ဘာသောက်တလွဲတွေလဲ?”

လန်လျန့်သည် စက်ဆုပ်ရွံရှာစွာဖြင့် ပြောလိုက်သည်။ လက်တစ်ချက် ဝှေ့ယမ်းလိုက်ရင်း သူမသည် ဖန်ခွက်ထဲမှ ကျန်ရှိနေသော ရေနွေးအားလုံးကို သူမဘေးရှိ လူများပေါ်သို့ လောင်းချလိုက်သည်။

ဤဝန်ထမ်းများသည် အတွေ့အကြုံရှိသူများဖြစ်ကြသောကြောင့် သူတို့၏ တုံ့ပြန်မှုအရှိန်သည် လန်လျန့် ထက် များစွာ ပိုမြန်ဆန်သည်မှာ သဘာဝကျသည်။ အနည်းငယ် လှည့်လိုက်ရုံဖြင့် သူတို့သည် ရေနွေး၏ တိုက်ခိုက်မှုမှ ရှောင်တိမ်းနိုင်ခဲ့ကြသည်။

သို့သော် သူတို့၏ အမူအရာများ မဲမှောင်သွားခြင်းကို မထိန်းနိုင်ခဲ့ကြပေ။

'ဒီတော့ ဒီသခင်မလေးက သူ့ကိုယ်သူ ဉာဏ်ပညာတိမ်တိုက် ဂလက်စီမှာ ရောက်နေတယ်လို့ တကယ် ထင်နေတာလား။'

“သွားကြစို့၊ ဒီနေ့က မင်းကို စစ်ဆေးမေးမြန်းမယ့်နေ့ပဲ” ရေနွေးစိုလုနီးပါးဖြစ်သွားသော ဝန်ထမ်းသည် သူမကို အေးစက်စွာ လှမ်းကြည့်လိုက်ပြီး သူ့လေသံမှာ အနည်းငယ် အေးစက်နေသည်။

'စစ်ဆေးမေးမြန်းတာ ဟုတ်လား။'

'ဘာကို စစ်ဆေးမေးမြန်းမှာလဲ။'

လန်လျန့်၏ လှုပ်ရှားမှုများမှာ တုံ့ဆိုင်းသွားခြင်းကို မထိန်းနိုင်ဘဲ သူမ၏ မျက်နှာလေးသည် တစ်ဖက်လှည့်သွားသည်။ “မဟုတ်မှလွဲရော… ရှင်တို့ ကျွန်မကို ပြန်လွှတ်ပေးဖို့ အစီအစဉ်မရှိဘူးလား”

“ဟက်ဟက်” ထိုစကားကို ကြားသောအခါ ဝန်ထမ်းသည် ရုတ်တရက် လှောင်ရယ်လိုက်သည်။

“အပြင်မှာ အခြေအနေ ဘယ်လောက်တောင် ဆိုးနေလဲဆိုတာ မင်းမမြင်ဘူးလား။ မင်းကို ပြန်လွှတ်ပေးမယ်ဟုတ်လား။ တော်တော် စိတ်ကူးယဉ်တတ်တာပဲ”

သူတို့အားလုံးသည် ဤအသိုင်းအဝိုင်းထဲမှ လူများဖြစ်ကြသောကြောင့် သူတို့ သိသင့်သည်များကို ကောင်းစွာ သိကြသည်။

ယုတ္တိရှိရှိ ပြောရလျှင် အကယ်၍ လန်လျန့်၏ အဖြစ်အပျက်သည် ဉာဏ်ပညာတိမ်တိုက် ဂလက်စီတွင် ဖြစ်ပွားခဲ့ပါက သူမသည် သူမ၏ နောက်ကွယ်မှ အာဏာကို အသုံးပြု၍ ဒီကိစ္စကို အလွယ်တကူ ဖိနှိပ်နိုင်ခဲ့လိမ့်မည်။ လူတိုင်းသည် မျက်စိစုံမှိတ်ကာ ဘာမှမသိသလို ဟန်ဆောင်ကြလိမ့်မည်။

ဒီကောင်မလေးကို ဒီလောက်တောင် မျက်စိကန်းဖို့ ဘယ်သူက ပြောလို့လဲ? သူမသည် ဤနေရာတွင်မှ လှည့်ကွက်များ ကစားခဲ့သည်။

ဒီနေရာသည် သူမ၏ စစ်ဆင်ရေးအခြေစိုက်စခန်းမဟုတ်ဘဲ မဟူရာတိမ်တိုက် ဂလက်စီဖြစ်သည်ကို သိထားရပေမည်။

သူမသည် ဤနေရာတွင် အခြားလူများကို ဝင်တိုက်ရန် ဝံ့ရဲပြီး ဤမျှ မျက်နှာပြောင်တိုက် ပြုမူရဲသည်မှာ မဟူရာတိမ်တိုက် ဂလက်စီ၏ မျက်နှာကို ဆုတ်ဖြဲကာ သူမ၏ ခြေဖဝါးအောက်တွင် နင်းခြေခြင်းနှင့် ညီမျှသည် မဟုတ်လား။ မဟူရာတိမ်တိုက် ဂလက်စီ၏ အထက်လူကြီးများသည် ပျော်ရွှင်ကြမည်လား။

ထို့အပြင် ရက်အနည်းငယ်အတွင်းမှာပင် ဒီကိစ္စ၏ သဘောသဘာဝသည် ခုန်ပျံကျော်လွှားသွားခဲ့ပြီဖြစ်သည်။

မည်သည့်အချိန်က စတင်ခဲ့သည်ကို မသိရသော်လည်း တစ်စုံတစ်ယောက်က ‘ဉာဏ်ပညာတိမ်တိုက် ဂလက်စီမှ လူများသည် အခြားဂလက်ဆီများမှ လူများကို အနိုင်ကျင့်နေကြသည်’ ဟု ရုတ်တရက် ထုတ်ဖော်ပြောကြားခဲ့သည်။ ထို့အပြင် ပြောဆိုသည့်နေရာတွင်လည်း မျက်စိကျစရာဖြစ်အောင် ပြောဆိုခဲ့ခြင်း ဖြစ်သည်။ လူတိုင်း သတိပြုမိချိန်တွင် ဤသို့သော သတင်းများသည် အဝေးသို့ ပျံ့နှံ့သွားခဲ့ပြီးဖြစ်ကာ နစ်နာသူအများအပြားလည်း ပေါ်ထွက်လာခဲ့သည်။

သဘာဝကျစွာပင် လန်လျန့်သည် ဤသို့သော အာဏာရှင်စနစ်၏ ကိုယ်စားလှယ် ဖြစ်လာခဲ့သည်။ ယခင်က တရားမမျှတစွာ ဆက်ဆံခံခဲ့ရသူများသည် သူမအား စစ်ဆေးမေးမြန်းပြီး ပြစ်ဒဏ်ချမှတ်သည်ကို ကူကယ်ရာမဲ့စွာ ကြည့်နေရုံသာ ရှိသည်။

တစ်ခဏအတွင်းမှာပင် ဤကိစ္စသည် ဆူပွက်နေသည်အထိ အရှိန်မြှင့်တင်ခံခဲ့ရသည်။

မျက်စိရှိသူတိုင်းသည် ဤကိစ္စ၏ နောက်ကွယ်တွင် ကြိုးကိုင်သူတစ်ဦး ရှိနေသည်မှာ သေချာကြောင်း မြင်နိုင်သည်။ သို့မဟုတ်လျှင် လန်လျန့် စစ်ဆေးမေးမြန်းခံရသည်နှင့် တပြိုင်နက် ဖိနှိပ်ခံရသူများစွာ ပေါ်ထွက်လာခြင်းသည် ဘယ်လိုလုပ် ဤမျှ တိုက်ဆိုင်နေမည်နည်း။

သို့သော် သိခြင်းသည် တစ်မျိုးဖြစ်သည်။ မည်သူကမှ မိုက်မဲစွာဖြင့် ဒါကို အသံထွက်၍ ပြောမည်မဟုတ်ပေ။

လန်လျန့် အတွက်မူ… သူမကို ကယ်တင်နိုင်မည့်သူ တစ်ဦးတစ်ယောက်မျှ ရှိလိမ့်မည်ဟုပင် မထင်လိုက်ပါနှင့်။ အထွေထွေ လမ်းကြောင်းနှင့် လူထု၏ လူကြိုက်များမှုနှင့်အတူ သူမအနေဖြင့် နစ်နာသူအဖြစ် ခံယူရုံမှတစ်ပါး အခြားရွေးချယ်စရာမရှိပေ။

လန်လျန့်သည် အဖြစ်အပျက်တစ်ခုလုံးကို သေချာနားလည်ပြီးသောအခါ သူမ နာရီဝက်ကျော်ကြာသည်အထိ မှင်တက်နေခဲ့သည်။

ဝန်ထမ်းက သူမအား တရားခွင်သို့ ဆွဲခေါ်သွားသောအခါ သူမ ရုတ်တရက် ပေါက်ကွဲထွက်လာခဲ့သည်။ ဆေးဝါးများဖြင့် ဖိနှိပ်ထားသော စွမ်းအားသည် အများစုလည်း ပြန်ကောင်းမွန်လာခဲ့သည်။ သူမသည် ဝန်ထမ်းအား မီးလုံးများကို တစ်လုံးပြီးတစ်လုံး ပစ်ပေါက်လိုက်သည်။

“ရှင်တို့ ဘာလုပ်နေကြတာလဲ။ ထွက်သွားကြ! ထွက်သွားကြ”

လန်လျန့်သည် အကယ်၍ သူမအား စစ်ဆေးမေးမြန်းသည့် တရားရုံးသို့ အမှန်တကယ် ခေါ်ဆောင်သွားပါက သူမ သွားပြီဖြစ်ကြောင်း အခြားမည်သူထက်မဆို ပို၍ သိသည်။

ပြစ်ဒဏ်ချမှတ်ခံရပြီး အပြစ်ပေးခံရသော အမျိုးသမီးတစ်ဦးသည် လုံးဝ တန်ဖိုးမရှိပေ။ သူမသည် ရက်စက်စွာ စွန့်ပစ်ခြင်းသာ ခံရလိမ့်မည်။

လန်လျန့်၏ အရည်အချင်းမှာ မဆိုးလှပေ။ သို့မဟုတ်လျှင် သူမသည် နှစ် ၁၀၀ ကြာ ဂလက်ဆီ တိုက်ပွဲတွင် ပါဝင်ရန် ရွေးချယ်ခံရမည် မဟုတ်ပေ။ ထို့အပြင် လူတိုင်းသည် အငိုက်မိနေသောကြောင့် သူမသည် ထွက်ပြေးရန် အပေါက်တစ်ခု ဖောက်ထွက်နိုင်ခဲ့သည်။

သူမ အခန်းထဲမှ လှစ်ခနဲ ထွက်သွားခဲ့သည်။

“သူ့ကို ဖမ်း”

“မြန်မြန်၊ ဒီဘက်ကနေ ပိတ်ထား”

“အပြင်ဘက်က အစောင့်တွေ သတိထား၊ P112 က သံသယရှိသူ ထွက်ပြေးနေတယ်။ တံခါးကို မြန်မြန်ဖွင့်”

ထိန်းသိမ်းရေးစခန်းသည် ပရမ်းပတာ ဖြစ်သွားခဲ့သည်။

အကယ်၍ လန်လျန့်သည် သူတို့၏ မျက်စိရှေ့တွင်ပင် ထွက်ပြေးလွတ်မြောက်သွားပါက သူတို့ ရှင်းပြနိုင်မည် မဟုတ်ပေ။ သူတို့သည် သူတို့၏ အလုပ်များကိုလည်း စွန့်လွှတ်ရပေလိမ့်မည်။

ပြေး၊ ပြေး!

မြန်မြန်ပြေး!

ထွက်ပြေးလွတ်မြောက်သွားသရွေ့တော့ သူမ ကယ်တင်ခြင်းခံရလိမ့်မည်။