အခန်း (၄၁၀+၄၁၁)

Chapter 410

အမြင့်ဆုံး အခြေခံမူများ ၅

ထိုစကားကို ကြားသောအခါ လုရှင်းချန်၏ မျက်လုံးများ တောက်ပသွားသည်၊၊ သူသည် မီးအမျိုးအစား စွမ်းရည်ကို ဖွံ့ဖြိုးတိုးတက်အောင် ကြိုးစားနေရပြီး သူ၏ လှုပ်ရှားမှုများ၏ စွမ်းအားကို အမြဲတမ်း မြှင့်တင်ရန် ကြိုးစားနေသည်။ ဖုန်းဖုန်း၏ “လေဝဲ” နည်းစနစ်ကို မြင်ပြီးနောက် သူသည် ကမ္ဘာသစ်တစ်ခု ပွင့်လာသကဲ့သို့ ခံစားလိုက်ရသည်။

လေအမျိုးအစားကို ဤမျှ ကျယ်ပြန့်စွာ ဖွံ့ဖြိုးနိုင်သည်ဆိုလျှင် သူ၏ မီးအမျိုးအစားတွင် ပို၍ပင် အလားအလာ ရှိသည်မှာ သေချာသည်။

“နောက်မှ တစ်အုပ်သွားယူရအောင်”

လင်းရှန် အဖွဲ့အား ပြန်လှည့်ကြည့်လိုက်သည်။ ထိုလမ်းညွှန်စာအုပ်သည် မည်မျှ အရေးကြီးသည်ကို သူ သိသည်။ ဤကဲ့သို့သော အသေးစိတ် အချက်အလက်များကို ထုတ်လွှင့်မည် မဟုတ်ပေ။ ဖီးနစ် အခြေစိုက်စခန်းများကသာ ၎င်းကို ဝင်ရောက်ကြည့်ရှုခွင့်ပေးလေသည်။

“ကောင်းပြီလေ” ကီကီက စိတ်လှုပ်ရှားစွာ ပြောလိုက်သည်။

“ဖီးနစ်က အားလုံးကို တကယ် စဉ်းစားထားတာပဲ”

ချန်ဆီရွှမ် က ထပ်ပြောသည်၊၊

“သူတို့က အမေကြီးတစ်ဦးလိုပါပဲ ကျွန်မတို့ ပိုပြီး အသက်ရှင်သန်နိုင်ဖို့ ဖြည်းဖြည်းချင်း မွေးမြူပေးနေတာပဲ”

ရှုချင်းက ခေါင်းညိတ်လိုက်သည်၊၊

“ဒါက မုန်တိုင်းကြားက ကံကောင်းခြင်းပဲ ကမ္ဘာပျက်ကပ်နေ့ စတုန်းကဆို လုံးဝ စိတ်ပျက်အားငယ်စရာပဲ… အလောင်းတွေက နေရာအနှံ့ပဲ”

“ဒီအသက်ရှင်ကျန်ရစ်သူတွေကို ကြည့်လိုက်စမ်း… မြို့ကြီး တစ်မြို့လုံးကနေ လူတစ်သောင်းလောက်ပဲ လွတ်မြောက်နိုင်ခဲ့တယ်လို့ ကျွန်မတော့ ထင်တယ်”

ဘီလီယံနှင့်ချီသော လူများ သန္ဓေပြောင်းသွားကြပြီး မြေကြီးသည် ဖုတ်ကောင်များနှင့် အလောင်းများဖြင့် ပြည့်နှက်နေသည်။ လူ့ယဉ်ကျေးမှု၏ ၁% အောက်သာ အသက်ရှင်လွတ်မြောက်ခဲ့သည်။

ဆက်သွယ်မှု မရှိပေ… မိုင်ထောင်ချီ၍ တိတ်ဆိတ်နေသည်။ မည်သည့် အသက်ရှင်ကျန်ရစ်သူ၏ စိတ်ဓာတ်ကိုမဆို ချေမှုန်းနိုင်သော ကမ္ဘာပျက်ကပ်ဖြစ်ရပ်မှန် ဖြစ်သည်။

ယခုအခါ ဖီးနစ်သည် ကယ်ဆယ်ရေး အစိုးရကို ပြန်လည်ဖွဲ့စည်းပြီး ကမ္ဘာတစ်ဝန်းရှိ အသက်ရှင်ကျန်ရစ်သူများကို ထောက်ပံ့ကာ လူတိုင်းကို အာရုဏ်ဦးဆီသို့ လမ်းညွှန်ပေးနေသောကြောင့် ၎င်းသည် ရေဒီယိုလှိုင်းများမှတစ်ဆင့် ပဲ့တင်ထပ်နေသော လူ့ယဉ်ကျေးမှု၏ နောက်ဆုံးအသံဖြစ်သည်။

“ဒါတွေအားလုံးက ကျွန်တော်တို့ ညလမ်းလျှောက်သူတွေ အကျဉ်းချုပ်ထားတဲ့ အဓိက သတင်းအချက်အလက်တွေပါပဲ…အဲဒါက အပြင်မှာရှိတဲ့ စွမ်းအားရှင်တွေနဲ့ မျိုးရိုးဗီဇ မြှင့်တင်သူတွေ အားလုံးကို အထောက်အကူ ဖြစ်စေမယ်လို့ ကျွန်တော်တို့ မျှော်လင့်ပါတယ်၊၊ အမှောင်ဒီရေတွေ ဆုတ်သွားတဲ့ အာရုဏ်ဦးကို မြင်တွေ့ဖို့ ဖီးနစ်နဲ့အတူ ခင်ဗျားတို့ ဆက်လက် ရပ်တည်နိုင်ဖို့လည်း မျှော်လင့်ပါတယ်”

ဝမ်ကျိုး စကားပြောပြီးသောအခါ ပရိသတ်သည် တိတ်ဆိတ်သွားပြီး စင်မြင့်ဆီသို့ ကြည့်လိုက်ကြသည်။

“ဒီနောက်မှာ ခင်ဗျားတို့ရဲ့ စွမ်းရည် အကဲဖြတ်မှု ရမှတ်ပေါ် မူတည်ပြီး ဖီးနောက်ကနေ အခမဲ့ ထောက်ပံ့ရေး ပစ္စည်းတွေကို တောင်းခံနိုင်ပါတယ်…. နောက်ထပ် အကူအညီ လိုအပ်ရင် Xilan မြို့မှာ အခမဲ့ဆေးကုသမှုနဲ့ အသက်ရှင်ရပ်တည်ရေး လမ်းညွှန်ချက်တွေကို ပေးတဲ့ အရေးပေါ် အကူအညီ စခန်း ၁၂ ခု ရှိပါတယ်”

“အခုချိန်မှာ ဖီးနစ်ရဲ့ ဒုက္ခသည် အကူအညီပေးရေး စခန်းတွေက လူတွေ ပြည့်လျှံနေပြီး ကာကွယ်ရေးတပ်ဖွဲ့တွေက တောင့်တင်းနေပါတယ်… ဇီဝအန္တရာယ်တွေက မကြာခဏ ဖြစ်ပွားနေပြီး နေ့စဉ် သေဆုံးမှုနှုန်းက ၅% ကျော်ပါတယ် ကာကွယ်ရေး ယူနစ် ထိခိုက်မှုနှုန်းက ၃% ကျော်ပါတယ် ဒါကြောင့် အရပ်သားတွေကို ကာကွယ်ဖို့ ပိုအရည်အချင်းရှိတဲ့ ပုဂ္ဂိုလ်တွေကို ကျွန်တော်တို့ ခေါ်ယူနေပါတယ် ဖီးနစ်က ညလမ်းလျှောက်သူတွေ၊ သုတေသီတွေ၊ အုပ်ချုပ်ရေး၊ စစ်ရေး-ဆေးဘက်ဆိုင်ရာ အဖွဲ့တွေ၊ ထောက်ပံ့ပို့ဆောင်ရေးနှင့် အခြားအရာများအတွက် အများပြည်သူကို အလုပ်ခေါ်ယူနေပါတယ်… ခိုလှုံဖို့ ဆန္ဒရှိပြီး လူသားမျိုးနွယ်ရဲ့ အသက်ရှင်ရပ်တည်ရေးအတွက် ပံ့ပိုးကူညီလိုရင် စာရင်းသွင်းဖို့ အရေးပေါ် စခန်းတွေဆီကို သွားကြပါ”

ထိုစကားကြောင့် လူများစွာ၏ အမူအရာများသည် မသက်မသာဖြစ်သွားသည်။ နေ့စဉ် သေဆုံးမှုနှုန်းလား…

နေ့စဉ် သေဆုံးမှုများကို ရေတွက်ခြင်း… ၎င်းသည် ကမ္ဘာစစ်တစ်ခုကဲ့သို့ ရက်စက်ကြမ်းကြုတ်ပုံရသည်။

“ကာကွယ်ရေး ယူနစ် သေဆုံးမှုနှုန်းက ၃% လား ဒါက ညလမ်းလျှောက်သူ ၁၂၀၀ က နေ့တိုင်း သေဆုံးနေတယ်လို့ ဆိုလိုတာ မဟုတ်လား”

ချန်ဆီရွှမ် ၏ မျက်နှာသည် အေးစက်နေသည်၊၊

“ဒါက ကြောက်စရာကောင်းတယ် သူတို့က ညလမ်းလျှောက်သူတွေပဲလေ”

“ဒါက မဆန်းပါဘူး… ငါတို့က မေပယ်မြို့က လာတဲ့ လမ်းမှာ ဖြတ်သွားတဲ့ ယာဉ်တန်းကြီးတိုင်းက ၅% ကျော် အချို့ဆိုရင် ညကျရင် ၁၀% အထိ သေဆုံးမှုနှုန်း ရှိတယ်… ဘယ်သူမှ မထိခိုက်ဘဲ မနေဘူး”

ကာကွယ်ရေးလိုင်းမှ ကပ္ပတိန် ကျိုးလီ က သက်ပြင်းချလိုက်သည်၊၊

“ငါတို့ရဲ့ ယာဉ်တန်းက ပြီးခဲ့တဲ့လက လူတစ်ဝက်လောက် ဆုံးရှုံးခဲ့ရတယ် လူသစ်တွေက အဆက်မပြတ် ဝင်လာနေတယ်… တစ်ခါတလေ ငါတို့က လမ်းတစ်လျှောက်က တခြား ယာဉ်တန်းတွေနဲ့ ပေါင်းလိုက်တယ်… ငါ့ရဲ့ ဒုတိယ ကွပ်ကဲရေးမှူးက ပြီးခဲ့တဲ့ အပတ်မှာ ငါတို့ကို ကာကွယ်ပေးဖို့ ကြိုးစားရင်း ထူးဆန်းတဲ့ သတ္တဝါတစ်ကောင်က သူ့ ဦးခေါင်းတစ်ဝက်ကို စားလိုက်တာကို ခံရတယ်”

“ဒါကြောင့်ပဲ…” ရှေ့တွင် ရပ်နေသော ချီလီက အသက်ပြင်းပြင်းရှူလိုက်သည်။

“ဝင်ရိုးစွန်းညက ပိုပြီး နီးကပ်လာနေတာကို သိရဲ့နဲ့ ဒီ မြို့ထဲက ယာဉ်တန်းတွေက အစောကြီး ထွက်ခွာဖို့ ငြင်းဆန်ကြတာပေါ့ လူတိုင်းက ရွှေ့ပြောင်းတဲ့အချိန်မှာ ဖီးနစ်ရဲ့ အဓိက တပ်ဖွဲ့တွေနဲ့ အတူသွားချင်ကြတယ်… ငါတို့က သေဆုံးမှု အများကြီးကို မြင်တွေ့ခဲ့ရပြီးပြီ လူတွေက ထုံကျင်သွားကြတယ်… ဒီလိုနေရာမျိုးမှာ—အမှောင်ဒီရေတွေကြောင့်သာ မဟုတ်ရင်—လူတွေက အနှုတ် ၅၀ အထိ ကျသွားရင်တောင် ဒီမှာနေကြမှာပဲ”

“ဒါအမှန်ပဲ”

ရှီတိယွမ်က လက်ပိုက်ထားရင်း မျက်မှောင်ကြုတ်ပြီး ပြောလိုက်သည်၊၊

“ငါ့မှာ လူတစ်ထောင်ကျော် ရှိတယ်… ကလေးတွေနဲ့ မိသားစုတွေအပါဝင်… ငါက နောက်ထပ် သေဆုံးမှုတွေကို မမြင်ချင်တော့တဲ့ နောက်ဆုံးအဆင့် အနုတ်လက္ခဏာ စိတ်ခံစားမှုတွေက မြင့်တတ်နေပြီ၊၊ စိတ်ဓာတ် အားနည်းသူတွေက အမှောင်ကျုးကျော်မှုအောက်မှာ သန္ဓေပြောင်းတတ်ကြတယ်…. ဒါကြောင့် ရထားတွဲတိုင်းမှာ ပြဿနာတွေကို စောစောစီးစီး သိရှိဖို့ အချက်ပေးစနစ်တွေ တပ်ဆင်ထားခဲ့ရတယ်”

ရှုချင်း၊ လုချန်၊ မြောင်လုနှင့် အခြားသူများသည် တိတ်ဆိတ်စွာ ခေါင်းညိတ်ကြသည်။ ရှောင်ယွမ်၏ အကြည့်သည် မှိန်ဖျော့သွားသည်။ အနန္တ ရထားပေါ် မတက်မီက သူတို့၏ ယာဉ်တန်းတွင် သေဆုံးခြင်းသည် နေ့စဉ် ဖြစ်ပျက်နေသောအရာဖြစ်သည်။

သူမ သိသည်—သေဆုံးသူများသည် အများအားဖြင့် အစွန်အဖျားတွင် ရှိသူများ စွမ်းရည်အားနည်းသူများ သို့မဟုတ် ကာကွယ်မှု မရှိသူများ ဖြစ်သည်။

ရှောင်ယွမ်သည် ထိုအရိပ်အောက်တွင် နေထိုင်ခဲ့ရသည်။ သူမသည် သန်မာလာရန် သူမ၏ အဖွဲ့က အားကိုးရသူတစ်ဦး ဖြစ်လာစေရန် အသည်းအသန်လိုလားခဲ့သည်။ အနန္တ ရထားပေါ်သို့ ရောက်ကတည်းက လင်းရှန်၏ တည်ရှိနေခြင်းသည် သူတို့အားလုံးကို လုံခြုံစိတ်ချရမှု ခံစားချက်ကို ပေးခဲ့သည်။ ဤပြိုလဲနေသော ကမ္ဘာတွင် သူမ၏ နှလုံးသားသည် သူတို့အား ကာကွယ်ရန် အမြဲတမ်း ရှေ့သို့ ဆက်လျှောက်နေသူ၏ ပုံသဏ္ဌာန်တစ်ခုက တိတ်တဆိတ် ညိတွယ်နေခဲ့သည်။

လင်းရှန်၏ အမူအရာသည်လည်း လေးနက်သွားသည်။ သူသည် နှင်းများဖြင့် ဖုံးလွှမ်းနေသော ယာဉ်တန်း—အမျိုးသားနှင့် အမျိုးသမီး တစ်ရာကျော် ကိုယ်ဝန်ဆောင် အမျိုးသမီးတစ်ဦးပင် ပါဝင်ခဲ့သည်ကို ပြန်အမှတ်ရမိသည်။ ရှေ့သို့ ခြေလှမ်းတိုင်းသည် ရှင်သန်ခြင်း သို့မဟုတ် သေခြင်းတရားဖြစ်သည်။ စီလန်မြို့ရှိ ထောင်ပေါင်းများစွာသော ဤသူများသည် ဤကြီးမားသောမြေပေါ်တွင် ပြန့်ကျဲနေသော ရာနှင့်ချီသော မြို့များမှ ကံကောင်းသူ အနည်းငယ်မျှသာ ဖြစ်သည်။

စွမ်းရည် အကဲဖြတ်မှုများ ပြီးနောက် ပေးအပ်သော ထောက်ပံ့ရေးပစ္စည်းများအပြင် ကယ်ဆယ်ရေးစခန်းများသည် ယာဉ်တန်းများကို လက်နက်များနှင့် ခဲယမ်းမီးကျောက်များ—ရိုင်ဖယ်များ ပဋိဇီဝဆေးများ ကျည်ဆံများ အစားအစာများ—အားလုံးကို လူတစ်ဦးချင်းစီအလိုက် ပေးအပ်ခဲ့သည်။

ဖီးနစ်သည် အသက်ရှင်ကျန်ရစ်သူတိုင်းကို လက်နက်တပ်ဆင်လိုသည်… ဖြစ်နိုင်သမျှ အသက်များကို ကယ်တင်လိုသည်။ ဤသည်မှာ ရှည်လျားသော ခရီးစဉ်တစ်ခု ဖြစ်ပြီး ရွှေ့ပြောင်းခြင်း အလယ်တွင် မျှော်လင့်ချက်ကို ရှာဖွေရန် ခရီးတစ်ခု ဖြစ်သည်။

၎င်းကို လုံးဝ စိုးရိမ်ပူပန်မှုမရှိဘဲ—ကုန်ကျစရိတ် မည်မျှပင် ရှိပါစေ အနစ်နာခံမှု မည်မျှပင် ရှိပါစေ—ပြုလုပ်ခဲ့သည်။

“ကောင်းပါပြီ စီလန်မြို့ကို ရောက်ရှိလာတဲ့ ယာဉ်တန်းသစ် အားလုံးနဲ့ မျှဝေဖို့ လိုအပ်တဲ့ သတင်းအချက်အလက်တွေ ပြီးဆုံးပါပြီ”

ဝမ်ကျိုးက သူ၏ အကြည့်ကို ပရိသတ်တစ်လျှောက် လှည့်ပတ်လိုက်သည်၊၊

“စည်းကမ်းအရ ကျွန်တော်တို့ရဲ့ နိုင်ငံသားသစ် အားလုံးကို ဖီးနစ်ရဲ့ အမြင့်ဆုံး ယုံကြည်ချက်ကို ထပ်မံ ပြောပြခွင့်ပြုပါ”

သူသည် မတ်မတ်ရပ်လိုက်ပြီး သူ၏ ညာလက်သီးကို သူ၏ ဘယ်ဘက်ရင်ဘတ်သို့ မြှောက်၍ ကပ်လိုက်သည် သူ၏ မျက်နှာသည် လေးနက်နေသည်။ ထိုအခိုက်အတန့်တွင် ရင်ပြင်ရှိ လူတိုင်း—ဟာသလုပ်နေသော ကျိုးဝူမှ ဖုန်းဖုန်းအထိ တပ်ရင်း (၇) စုံစမ်းစစ်ဆေးရေးတပ်ဖွဲမှ စစ်သားများအဆုံး—ဖီးနစ်၏ အဖွဲ့ဝင်တိုင်း လိုက်နာကြသည်။

“ကျုပ်ဟာ ကျုပ်ရဲ့ ဘဝတစ်သက်တာလုံး လူ့ယဉ်ကျေးမှု အသက်ရှင်ရပ်တည်ရေးအတွက် တိုက်ပွဲဝင်ပါ့မယ်… ကျုပ်ရဲ့ အရိုးတွေကို လောင်စာအဖြစ် မီးရှို့ပြီး ထာဝရညကို နေ့အဖြစ် ပြောင်းလဲကာ လူသားမျိုးနွယ်ရဲ့ မီးလျှံကို ကာကွယ်ဖို့ သစ္စာပြုပါတယ်”

နောက်တစ်ခဏတွင် ဖီးနစ်တပ်ဖွဲ့ တစ်ခုလုံးသည် တစ်ပြိုင်နက်တည်း အော်ဟစ်လိုက်သည်—

“ကျုပ်တို့ရဲ့ အရိုးတွေကို လောင်စာအဖြစ် မီးရှို့မယ် ထာဝရညကို နေ့အဖြစ် ပြောင်းလဲမယ် လူသားမျိုးနွယ်ရဲ့ မီးလျှံကို ကာကွယ်မယ်”

ထိုအခိုက်အတန့်တွင် ဆူညံသံအားလုံး ရပ်တန့်သွားသည်။ ရင်ပြင်၏ အစွန်အဖျားရှိ ကြည့်ရှုသူများသည်ပင်လျှင် မတ်တပ်ရပ်နေပြီး ၎င်းတို့၏ မျက်နှာများသည် လေးနက်နေသည်။

ဝမ်းနည်းမှုနှင့် မယိမ်းယိုင်သော ခိုင်မာပြတ်သားမှု လှိုင်းလုံးတစ်ခုသည် ရင်ပြင်ကို လွှမ်းခြုံသွားသည်။

ဤအရာကို ကြည့်ရင်း လင်းရှန်သည် သူ၏ နားထဲတွင် အသံမြည်နေသည်ဟု ခံစားရသည်။ သူ၏ မျက်လုံးများသည် ရင်ပြင်တစ်လျှောက် စစ်သားများ၊ ဝန်ထမ်းများ—၎င်းတို့ မည်သည့်နေရာသို့ မျက်နှာမူသည်ဖြစ်စေ ၎င်းတို့ အားလုံးသည် ခိုင်မာရပ်နေပြီး ထိုစိတ်ဝိညာဉ်ကို လှုပ်ခတ်စေသော ယုံကြည်ချက်ကို အော်ဟစ်နေကြသည်ကို လှည့်ပတ်ကြည့်လိုက်သည်။

ထိုအခိုက်အတန့်တွင် ယူပေမြို့၌ သေခြင်းတရားသို့ ချီတက်သွားခဲ့သူများကို သူ နားလည်ခဲ့သည်။ ဖေးရွှမ်၊ ကျန်းတင်းကျုံး…

ကောင်းစီကျန်းနှင့် အဆက်မပြတ် ငြင်းခုန်ခဲ့သော်လည်း ၎င်းတို့၏ သုတေသနသည် တိုးတက်မှုတစ်ခု ရနိုင်သည်ကို ကြားသည်နှင့် သူတို့၏ ကွဲပြားမှုများကို ဘေးဖယ်ထားခဲ့သည့် ယုဟန်တို့ကို တွေးနေမိသည်၊၊

Chapter 411

အားလပ်ချိန်များ

စွမ်းရည်စမ်းသပ်မှုများ ပြီးဆုံးခဲ့လေပြီ။ အနန္တယာဉ်တန်းသည် အကျိုးကျေးဇူးများစွာ ရရှိခဲ့၏။ ရူးသွပ်သူအဆင့်ငါးဦး၊ တိုင်တန်အဆင့်လေးဦးနှင့် ဆင့်ကဲပြောင်းလဲသူအဆင့် စွမ်းအားရှင်တစ်ဦးတို့ ထွက်ပေါ်လာသည်၊၊ ထို့ကြောင့် ဖီးနစ်ထံမှ အထောက်အပံ့ပစ္စည်းများနှင့် လက်နက်ခဲယမ်းအများအပြားကို လက်ခံရရှိခဲ့သည်။

သွေးနမူနာများ ပေးအပ်ပူးပေါင်းပြီးနောက် လင်းရှန်၏အဖွဲ့သည် စုစုပေါင်း ထရပ်ကားငါးစီးစာရှိသော အထောက်အပံ့ပစ္စည်းများ၊ ပုံမှန်ရှင်သန်ရေးပစ္စည်းများထည့်ထားသည့် သေတ္တာ ၁၃ လုံး၊ အေးခဲ-အမှောင် ဆေးရည် ငါးဘူး၊ ကျည် ၄၀၀၀ ပါသော စက်သေနတ်ကြီးလေးလက်နှင့် YJ-03 အမျိုးအစား ယာဉ်ပေါ်တွင်တပ်ဆင်ရသော လေယာဉ်ပစ်အမြောက် ငါးလက်နှင့် ကျည် ၁၀၀၀ တို့ကို လက်ခံရရှိခဲ့သည်။

ဤ YJ-03 အမြောက်သည် အလယ်အလတ်အဆင့် 80mm လက်နက်ဖြစ်ပြီး အမြင့် (မီတာ ၃၀၀၀ မှ ၇၈၀၀) နှင့် ပျက်စီးထိရောက်မှု နှစ်ခုစလုံးကို အကျုံးဝင်စေသည်။ ၎င်း၏ ပစ်ခတ်နိုင်သော ပစ်မှတ်ထောင့်သည် -10° မှ +85° အတွင်း ရှိသောကြောင့် အနိမ့်ပျံသန်းသော လေကြောင်းပစ်မှတ်များနှင့် မြေပြင်ပစ်မှတ်များအတွက်ပါ သင့်လျော်ပေသည်။

ပုံမှန်ယာဉ်တန်းတစ်ခုအတွက် ဤအဆင့်၏ ပစ်ခတ်နိုင်စွမ်းအားကို လက်နက်ကြီးအဆင့်ဟု သတ်မှတ်ပြီးဖြစ်သည်။ ၎င်းသည် 1130 CIWS သို့မဟုတ် ရထားပေါ်တွင်တပ်ဆင်ထားသော သံလိုက်လျှပ်စစ်အမြောက်များနှင့် နှိုင်းယှဉ်၍ မရနိုင်သော်လည်း၊ ၎င်း၏ အားသာချက်များမှာ အရွယ်အစားကျစ်လစ်ခြင်း၊ အလိုအလျောက် ပစ်မှတ်ရှာဖွေခြင်းနှင့် ပစ်ခတ်ခြင်းတို့ဖြစ်သည်။

တစ်ခုတည်းသော အားနည်းချက်မှာ ကျည်ကို လူကိုယ်တိုင် ပြန်လည်ဖြည့်ရခြင်းဖြစ်ရာ၊ အနန္တရထားပေါ်တွင် အသုံးပြုရန်အတွက် လင်းရှန်သည် ၎င်းကို အထောက်အကူပြုရန် PX-05 စက်ရုပ်များကို အနည်းငယ် ထပ်မံထုတ်လုပ်ရန် လိုအပ်မည်ဖြစ်သည်။

နဂါးတောင် ၁ ဘက်တွင်မူ ၎င်းတို့၌ လူအင်အားအမြောက်အမြား ရှိသည်။ ရူးသွပ်သူအဆင့်လေးဦး၊ တိုင်တန်အဆင့် တစ်ဒါဇင်ခန့်နှင့် ဆင့်ကဲပြောင်းလဲသူအဆင့် စွမ်းအားရှင်ဒါဇင်ပေါင်းများစွာ ရှိသည်။ အများစုမှာ မျိုးရိုးဗီဇဆိုင်ရာ တိုးတက်ပြောင်းလဲလာသူများ ဖြစ်သော်လည်း ၎င်းတို့၏ တိုက်ခိုက်ရေးစွမ်းရည်မှာ အထင်ကြီးလောက်စရာပင်။

လူအိုကြီးရှီ၊ နန်ကျင်းနှင့် ၎င်း၏အဖွဲ့သည် ဖီးနစ်ထံမှ များပြားလှသော ပစ္စည်းများကို ပျော်ရွှင်စွာ ရိတ်သိမ်းခဲ့သည်၊၊

အေးခဲ-အမှောင်ဆေးရည်ငါးဘူး ထပ်မံရရှိထားသဖြင့် လင်းရှန်က ၎င်း၏ သွေးပဲစေ့များကို ဖီးနစ်နှင့် ထပ်မံလဲလှယ်ကာ ဆေးရည်ကို မယူတော့ရန် ဆုံးဖြတ်လိုက်သည်။ ယင်းအစား ချန်ဆီရွှမ် ဦးဆောင်သော အဖွဲ့တစ်ဖွဲ့ကို အခြားယာဉ်တန်းများနှင့် မရှိမဖြစ် ရှင်သန်ရေးပစ္စည်းများ လဲလှယ်ရန် စေလွှတ်လိုက်သည်။ ယခုအချိန်တွင် စီလန်မြို့ ၌ စုဝေးနေသော ယာဉ်တန်းများစွာ ရှိနေပြီး ၎င်းတို့ လိုအပ်သည့် ပစ္စည်းများကို တစ်စုံတစ်ဦးနှင့် ဖလှယ်နိုင်သည့် အခြေအနေဖြစ်ပေသည်။

အနန္တရထား၌ လုံလောက်သော နေရာလွတ်ရှိပေသည်။ ယခင်က နေရာအနှံ့အပြားမှ ပစ္စည်းများကို ရှာဖွေခဲ့သော်လည်း ၎င်းတို့၏ အကြီးမားဆုံးသော ရရှိမှုများသည် ထန်ဟိုင်နှင့် ဟန်ရှန်းတောင်ကြားဘူတာရုံတွင် လဲလှယ်ခြင်းမှ ရရှိခဲ့ခြင်းဖြစ်သည်။

ယခုအခါ စွမ်းရည်စမ်းသပ်ခြင်း ပြီးစီးပြီဖြစ်၍ လင်းရှန်သည် နည်းဗျူဟာကို ပြောင်းလဲကာ အဖွဲ့ကို သုံးစုခွဲလိုက်သည်။

ချန်ဆီရွှမ်၊ တာလို့၊ မြောင်လုနှင့် ရှောင်ယွမ်တို့သည် အခြားသူအချို့နှင့်အတူ ပစ္စည်းများဝယ်ယူရန် ထွက်ခွာသွားသည်။ တစ်ချိန်တည်းမှာပင် လုရှင်းချန်ကို အလုပ်လက်မဲ့မဖြစ်စေရန် ရှုချင်း၊ လုချန်နှင့် လို့ရှားရှားတို့နှင့်အတူ ဖီးနစ်ထံမှ ရရှိသော ပစ္စည်းများ ကို အနန္တရထားသို့ ဘေးကင်းစွာ သယ်ယူပို့ဆောင်ရန် တာဝန်ပေးခဲ့သည်။ ရထားပေါ်ရှိ သံချပ်ကာ ဂဟေဆော်ခြင်းလုပ်ငန်းစဥ်သည် မကြာမီ ပြီးစီးတော့မည်ဖြစ်သည်။

ကျင်းချန်ယာဥ်တန်းမှ ဟယ်ခွန်းနှင့်ပတ်သက်သော အခြေအနေကြောင့် လင်းရှန်သည် ရှုချင်းနှင့် လုရှင်းချန်တို့အား သူတို့ ရရှိခဲ့သည့် ဝေလုံအဆင့် လျှပ်စစ်ရထားစက်ခေါင်းကို သတိထားစောင့်ကြည့်ရန် ကြိုတင်သတိပေးခဲ့ရသည်။ သို့သော် မီရှဲလ်ရင်ပြင်တွင် စမ်းသပ်မှု ပြီးစီးသွားပြီဖြစ်၍ အနန္တယာဉ်တန်း၏ နာမည်သည် အနှံ့အပြား ပြန့်နှံ့သွားနိုင်သည်။

သူတို့သည် နဂါးတောင် ၁ ဘေးတွင် ရပ်နား ထားပြီး ရှီတိယွမ်ဘက်မှ လူပေါင်းတစ်ထောင်ကျော်၏ စောင့်ကြည့်မှုအောက်တွင် ရှိနေသည်။ ကျင်းချန်ယာဥ်တန်းသည် ယခုအချိန် ပြဿနာရှာရန် သတ္တိမရှိနိုင်တော့ချေ။

ထိုအချိန်တွင် လင်းရှန်သည် ကီကီကို ခေါ်ဆောင်ကာ သီးခြားနေရာတစ်ခုသို့ သွားရောက်ခဲ့သည်။

ယင်းမှာ စီလန်မြို့ လက်နက်ထုတ်လုပ်ရေးစက်ရုံ ဖြစ်သည်။

ယခုညတွင် သူသည် အနန္တရထား၏ သံချပ်ကာ၊ လက်နက်စနစ်များနှင့် အတွင်းပိုင်း အဆောက်အဦများကို အဆင့်မြှင့်တင်ရန် စီစဉ်ထားသည်။ မိုနီကာ ဘုရင်မ ၏ အခြေခံပုံကြမ်းများကြောင့် ပေါင်းစပ်ပါဝါစနစ်များ၊ လေဝင်လေထွက်၊ ဓာတ်လှေကားများ၊ လက်နက်တပ်ဆင်ခန်းများ၊ ဗုံးဒဏ်ခံ တံခါးများအထိ ဒီဇိုင်းများ ပိုမိုကောင်းမွန်လာခဲ့သည်။ ဤအချိန်အတောအတွင်း အရာအားလုံးကို အပြီးသတ်ရန် သူက အကောင်းဆုံး အခွင့်အရေးကို အသုံးချရမည်ဖြစ်သည်။

ယခုစွန့်ပစ်ထားသော စက်ရုံတွင် လင်းရှန်၏ ပန်းတိုင်မှာ ပြန်လည်အသုံးပြုနိုင်သည့် မည်သည့် ကြီးမားသော စက်ပစ္စည်းကိုမဆို ရှာဖွေရန်ဖြစ်သည်။ အလိုအလျောက် ကျည်ခွံဖိနှိပ်စက်ကဲ့သို့ တစ်စုံတစ်ရာကို ရှာတွေ့ပါက၊ ကျည်ခဲယမ်း ထုတ်လုပ်ရန်အတွက် ရထားတွဲတစ်ခုလုံးကို ပြောင်းလဲနိုင်ပြီး ပြန်လည်ဖြည့်တင်းခြင်းနှင့် ပြန်လည်ထုတ်လုပ်ခြင်း လုပ်ငန်းစဉ်ကို သိသိသာသာ အရှိန်မြှင့်နိုင်ကာ သူ့၏ အချိန်ကို သက်သာစေမည်ဖြစ်သည်။

လေပြင်းများ တိုက်ခတ်နေပြီး စီလန်မြို့ ၏ ခံတပ်နံရံများမှ အမြောက်သံများ ပဲ့တင်ထပ်နေသည်။ တပ်ရင်း (၇) စုံစမ်းစစ်ဆေးရေးတပ်ဖွဲ့သည် ထူးဆန်းသတ္တဝါများကို တိုက်ခိုက်သည့် ရှေ့တန်းတွင် အချိန်ပြည့် တာဝန်ထမ်းဆောင်နေသည်။ ဖီးနစ်တွင် လက်နက်ခဲယမ်း အလုံအလောက်ရှိပြီး အာရုဏ်ဦးစင်တာသည် အလွန်အေးစက်သော လေပွေများ မတိုက်ခတ်မီ သုံးရက်အထိ စစ်ရေးထောက်ပံ့ပို့ဆောင်မှုကို ဆက်လက်လုပ်ဆောင်ခဲ့သည်။ ဤကြီးမားသော ရွှေ့ပြောင်းနေထိုင်မှုအတွက် ဖီးနစ်သည် အနီးအနားရှိ ဒေသများမှ တိုက်ခိုက်ရေး အရင်းအမြစ်များအားလုံးကို စုစည်း ခဲ့သည်။

“ဒီမွန်းစတားတွေက တစ်ချိန်လုံး တိုက်ခိုက်နေတာပဲ… တိုက်ခိုက်မှုတွေက ပိုများပြီး ပြင်းထန်လာတယ်—ဖြစ်နိုင်တာက နီးလာတဲ့ ဝင်ရိုးစွန်းညနဲ့ ဆက်စပ်နေလိမ့်မယ်”

ကီကီက အဝေးမှ တိုက်ပွဲရှေ့တန်းကို အပေါ်စီးမှ ကြည့်ရင်း ပြောသည်။

လင်းရှန်သည် အပေါ်မှ လည်ပတ်နေသော လေပွေကို လှမ်းကြည့်လိုက်သည်။ မည်းမှောင်သော မိုးတိမ်များသည် မုန်တိုင်းထန်နေသော ကောင်းကင်ယံကို ဖုံးလွှမ်းထားကာ၊ ကိုဘော့ လျှပ်စီးကြောင်းများ တစ်ခါတစ်ရံ မုန်တိုင်းတိမ်တိုက်ကို ဖြတ်၍ လက်နေသည်မှာ နှင်းလွင်ပြင်နှင့် စီလန်မြို့ ပေါ်သို့ ဖိဆင်းလာနေသည့် စကြဝဠာသားရဲကြီးတစ်ကောင်ကဲ့သို့ ဖြစ်နေပြီး သူ၏ ရင်ထဲတွင် အေးစိမ့်မှုတစ်ခုကို ခံစားရသည်။

“ဒါက လေပွေနဲ့လည်း ဆက်စပ်နေနိုင်တယ်”

လင်းရှန်က နဖူးကြောများတွန့်လျက် တီးတိုးရေရွတ်လိုက်သည်။ မြို့သည် တည်ငြိမ်နေပုံရသော်လည်း စိုးရိမ်မှုက သူ၏စိတ်ထဲတွင် အမြစ်တွယ်နေသည်။

ဖြစ်နိုင်သည်မှာ အားဖေး မြင်ခဲ့ရသော ထူးဆန်းသည့် သတ္တဝါကြောင့်ဖြစ်လိမ့်မည်။ သို့မဟုတ် ထူးဆန်းသော နှင်းမွန်းစတားဒီရေ ဖြစ်မည်။ သို့မဟုတ် ဆန်းကြယ်စွာ ဖျက်ဆီး ခံထားရသည့် အမှတ်အသားများ ဖြစ်မည်။ အရာအားလုံးက ပုံမှန် မဟုတ်သလို ခံစားနေရသည်။

ထို့ကြောင့် မြို့တွင်းရှိ ရှင်သန်သူယာဉ်တန်းများသည် ယခုအခါ ပိုမိုသက်တောင့်သက်သာ ရှိနေပုံရသော်လည်း လင်းရှန်ကမူ သတိကြီးစွာ စောင့်ကြည့်နေခဲ့သည်။

“ဟေး… ညလမ်းလျှောက်သူတွေက ကျွန်မတို့ မျှော်လင့်ထားတာထက် အများကြီး ပိုပြီး စွမ်းအားကြီးမားနေတယ်လို့ မထင်ဘူးလား”

ကီကီက ကျိုးဝူ၏ အစောပိုင်းက တိုက်ပွဲကို ပြန်အမှတ်ရကာ ယင်းနှင့် ပတ်သက်ပြီး စိတ်လှုပ်ရှားမှုမပြေနိုင်သေးပေ။ အထူးသဖြင့် လုံတာဟေး၏ တိုက်ခိုက်ပုံသည် သူမနှင့် ဆင်တူနေသောကြောင့် နှိုင်းယှဉ်ချက်သည် ပုဂ္ဂိုလ်ရေးအရ ပိုခံစားရစေသည်။

လင်းရှန် ကီကီကို ကြည့်ပြီး ပြောလိုက်သည်။

“ဒါက မျှော်လင့်ထားတဲ့အတိုင်းပဲ။ ညလမ်းလျှောက်သူတွေက တခြားစွမ်းအားရှင်တွေထက် သတင်းအချက်အလက်ကို ဝင်ရောက် ရရှိနိုင်တဲ့ အကြီးမားဆုံး အားသာချက်ရှိတယ်။ ကမ္ဘာပျက်ကပ်နေ့ကစပြီး ၉၂ ရက်ပဲ ရှိသေးပေမယ့် လူသားမျိုးနွယ်ရဲ့ တိုးတက်ပြောင်းလဲမှုက မြန်ဆန်နေတယ်။ ငါတို့က တစ်ယောက်ချင်းစီ ခွဲပြီး ရှေ့ကို လှမ်းနေရပေမယ့် သူတို့က ကမ္ဘာတစ်ဝန်းက ညလမ်းလျှောက်သူ ၄၀,၀၀၀ ကျော်ဆီက ဒေတာတွေကို စုစည်းပြီး ရနေကြတာပဲ။ သူတို့ရဲ့ စွမ်းရည်နားလည်မှုက တခြားသူတွေထက် အများကြီး ရှေ့ရောက်နေတယ်”

“ဒါ့အပြင် သူတို့က စွမ်းရည်တွေကို မြှင့်တင်ဖို့ အေးခဲ-အမှောင်ဆေးရည်လိုမျိုး ပစ္စည်းတွေကို သုံးနေကြပြီ။ သူတို့ ကြုံတွေ့ရတဲ့ ပြင်းထန်တဲ့ လေ့ကျင့်မှုတွေနဲ့ ပေါင်းစပ်လိုက်တော့ သူတို့ စွမ်းအားကြီးတာက အံ့ဩစရာ မဟုတ်တော့ပါဘူး”

ကီကီက ခေါင်းညိတ်ကာ သဘောတူလိုက်သည်။